Ngaahi Mātuʻa mo e Fānau: Fakamuʻomuʻa ʻa e ʻOtuá!
“Ke ke ʻapasia kia Elohimi, ʻo tauhi ʻene ngahi fekau.”—KOHELETI 12:13.
1. Ko e hā ʻa e manavahē ʻoku fiemaʻu ke fakatupu ʻe he ngaahi mātuʻá pea mo e fānaú, pea ko e hā te ne ʻomai ai kiate kinautolú?
KO HA kikite ʻo fekauʻaki mo Sīsū Kalaisi naʻe pehē ai “e ilo vave eia ae manavahe kia Jihova.” (ʻAisea 11:3, PM) Ko ha konga tefito ʻo ʻene manavaheé ko ha ʻapasia loloto mo e ʻaʻapa ki he ʻOtuá, ko ha manavahē ke taʻefakahōifuaʻi ʻa e ʻOtuá koeʻuhi he naʻá ne ʻofa ʻiate ia. ʻOku fiemaʻu ke fakatupu ʻe he ngaahi mātuʻa tauhi fānaú pea mo e fānaú ʻa e manavahē pehē hangē ko Kalaisí ki he ʻOtuá, ʻa ia ʻe ʻomai ai kiate kinautolu ʻa e fiefia ʻo tatau mo ia naʻe hoko kia Sīsuú. ʻOku fiemaʻu ke nau fakamuʻomuʻa ʻa e ʻOtuá ʻi heʻenau moʻuí ʻaki ʻenau talangofua ki heʻene ngaahi tuʻutuʻuní. Fakatatau ki he tokotaha-tohi Tohitapu ʻe taha, “oku katoa i he mea ni ae gaue totonu ae tagata.”—Koheleti 12:13, PM.
2. Ko e hā ʻa e tuʻutuʻuni naʻe mahuʻinga taha ʻi he Laó, pea ko hai naʻe ʻoange tefito ki aí?
2 Ko e tuʻutuʻuni mahuʻinga taha ʻi he laó, ko ʻeni ia, ʻoku totonu ke tau ‘ʻofa ki he ʻEiki ko hotau ʻOtuá ʻaki ʻa e kotoa ʻo hotau loto, mo e kotoa ʻo hotau laumalie, mo e kotoa ʻo hotau ivi,’ ʻa ia naʻe tautefito ʻa hono ʻoangé ki he ngaahi mātuʻa tauhi fānaú. ʻOku fakahaaʻi ʻeni ʻi he ngaahi lea naʻe tānaki atu ki ai ʻi he Laó: “Te ke uhuʻi ki hoʻo fānau, [ʻa e ngaahi lea ko ʻeni ʻo kau ki he ʻofa kia Sihová] te ke lea ki ai ʻi hoʻo nofo ʻi ho fale, pea ʻi hoʻo ʻalu ʻi he hala, pea ʻi hoʻo tokoto hifo, pea ʻi hoʻo tuʻu hake.” (Teutalōnome 6:4-7; Maʻake 12:28-30) Ko ia ai, naʻe tuʻutuʻuni ki he ngaahi mātuʻa tauhi fānaú ke fakamuʻomuʻa ʻa e ʻOtuá ʻaki ʻenau ʻofa ʻa kinautolu ki he ʻOtuá pea ʻi hono akoʻi ʻa ʻenau fānaú ke fai ʻa e meʻa tatau.
Ko ha Fatongia Faka-Kalisitiane
3. Naʻe anga-fēfē ʻa hono fakahāhaaʻi ʻe Sīsū ʻa e mahuʻinga ʻo hono fai ʻa e tokanga ki he fānaú?
3 Naʻe fakahāhaaʻi ʻe Sīsū ʻa e mahuʻinga ʻo hono fai ʻa e tokangá ʻo aʻu ki he fānau iikí. ʻI he meʻa ʻe taha naʻe hoko ʻi he ofi ke ngata ʻa e ngāue fakafaifekau ʻa Sīsū ʻi he māmaní, naʻe kamata ke ʻomai ʻe he kakaí ʻenau fānau valevalé kiate ia. Naʻe feinga ʻa e kau ākongá ke taʻofi ʻa e kakaí, ʻo hā mahino ai ʻenau tui naʻe fuʻu femoʻuekina ʻa Sīsū pea ke ʻoua ʻe fakahohaʻasi. Ka naʻe valokiʻi ʻe Sīsū ʻa ʻene kau ākongá: “Tuku pe ʻa e kau tamaiki ke nau haʻu kiate au, pea ʻoua ʻe taʻofi kinautolu.” Naʻe aʻu ʻo “hapai ʻa e kau tamaiki” ʻe Sīsū, ʻa ia naʻá ne fakahaaʻi ai ʻi ha founga fakaueʻiloto ʻa e mahuʻinga ʻo hono fai ha tokanga ki he fānau iikí.—Luke 18:15-17; Maʻake 10:13-16.
4. Ko hai naʻe ʻoange ki ai ʻa e tuʻutuʻuni ke ‘ngaohi ʻa e ngaahi kakai kotoa pe ko e kau ako,’ pea ko e hā ʻe fiemaʻu ʻi he meʻá ni ke nau faí?
4 Naʻe toe ʻai foki ʻe Sīsū ke mahino kuo maʻu ʻa e fatongia ʻe hono kau muimuí ke akoʻi ʻa e niʻihi kehé tukukehe ʻenau fānau ʻanautolú. Ko Sīsū, ʻi he hili ʻa ʻene pekiá mo ʻene toetuʻú, “naʻa ne ha ki he kainga lotu ʻe toko nimangeau tupu”—ʻo kau ai ʻa e niʻihi ko e ngaahi mātuʻa tauhi fānau. (1 Kolinitō 15:6) ʻOku hā mahino naʻe hoko ʻeni ʻi ha moʻunga ʻi Kāleli ʻa ia naʻe fakatahataha ʻi ai foki mo ʻene kau ʻaposetolo ʻe toko 11. Naʻe naʻinaʻi ʻe Sīsū kiate kinautolu kotoa naʻe ʻi aí: “Ko ia ke mou ō ʻo ngaohi ʻa e ngāhi kakai kotoa pe ko ʻeku kau ako, . . . akoʻi kinautolu ke tauhi ʻa e ngāhi meʻa kotoa pe kuo u tuʻutuʻuni atu.” (Mātiu 28:16-20, fakaʻītali ʻamautolu.) ʻOku ʻikai totonu ke liʻaki ʻe ha Kalisitiane ʻa e tuʻutuʻuni ko ʻení! Ke fakahoko ia ʻe he ngaahi tamaí mo e ngaahi faʻeé ʻoku fiemaʻú ke nau tokanga ki heʻenau fānaú pea pehē foki ke kau ʻi he malanga ki he kakaí pea mo e ngāue fakafaiakó.
5. (a) Ko e hā ʻokú ne fakahā ko e tokolahi tahá, pe ko e kotoa ʻo e kau ʻaposetoló naʻa nau mali pea ko ia ai naʻe malava nai ke ʻi ai ʻenau fānau? (e) Ko e hā ʻa e akonaki naʻe fiemaʻu ki he ngaahi ʻuluʻi fāmilí ke nau fakakaukau fakamātoato ki aí?
5 ʻOku mahuʻingá, he naʻa mo e kau ʻaposetoló naʻe pau ke nau ʻai ke palanisi ʻa honau ngaahi fatongia fakafāmilí mo e ngafa ke malangá pea pehē foki ki hono tokangaʻi ʻa e tākanga ʻa e ʻOtuá. (Sione 21:1-3, 15-17; Ngāue 1:8) ʻOku ʻuhinga peheé koeʻuhi he ko e tokolahi tahá, pe ko e kotoa pē nai, ʻo kinautolú, naʻa nau mali. Ko ia ai, naʻe fakamatalaʻi ʻe he ʻaposetolo ko Paulá: “ʻOku ʻikai ʻamaua koā ke ō holo mo ha fefine lotu kuo ma mali, ʻo hange [foki] ko hono toe ʻo e kau Aposetolo, mo e ngaahi tokoua ʻo e ʻEiki, kaeʻumaʻā ʻa Kifasi?” (1 Kolinitō 9:5, fakaʻītali ʻamautolu; Mātiu 8:14.) Naʻe maʻu fānau nai foki ʻa e niʻihi ʻo e kau ʻaposetoló. Ko e muʻaki kau faihisitōliá, ʻo hangē ko Eusebius, ʻoku nau pehē naʻe maʻu fānau ʻa Pita. Naʻe fiemaʻu ke tokanga ki he akonaki Fakatohitapú ʻa e muʻaki ngaahi mātuʻa tauhi fānau Kalisitiane kotoa pē: “Ka ʻo ka ai ha taha ʻoku ʻikai tokanga ki hono kainga, kaeʻumaʻā hono famili, ʻoku ne fakaʻikaiʻi ʻene lotu, ʻio, ʻoku ne koviange ʻi ha hiteni.”—1 Tīmote 5:8.
Ko e Fatongia Tefitó
6. (a) Ko e hā ʻa e pole ʻoku maʻu ʻe he kau mātuʻa Kalisitiane ʻoku ʻi ai honau ngaahi fāmilí? (e) Ko e hā ʻa e fatongia tefito ʻo ha tokotaha mātuʻa?
6 ʻOku ʻi ha tuʻunga meimei tatau mo ia naʻe ʻi ai ʻa e kau ʻaposetoló ʻa e kau mātuʻa Kalisitiane ʻoku ʻi ai honau ngaahi fāmili ʻi he ʻaho ní. Kuo pau ke nau ʻai ke palanisi ʻa honau fatongia ke tokanga ki he ngaahi fiemaʻu fakalaumālie mo fakamatelie ʻa honau fāmilí mo honau ngafa ke malanga ki he kakaí pea mo hono tauhi ʻa e tākanga ʻa e ʻOtuá. Ko fē ʻa e ngāue ʻoku totonu ke fakamuʻomuʻá? Ko e Watchtower ʻo Maʻasi 15, 1964, naʻe fakamatala ai: “Ko e ʻuluaki ngafa ia [ʻo e tamaí] ke ngāue ki hono fāmilí, pea ʻe ʻikai ke ne lava, ko hono moʻoní ia, ʻo ngāue lelei ko ha tokotaha mātuʻa ʻi he fakatahaʻangá ʻo kapau naʻe ʻikai te ne tokangaʻi ʻa e ngafa ko ʻení.”
7. ʻE anga-fēfē ʻa hono fakamuʻomuʻa ʻe he ngaahi tamai Kalisitiané ʻa e ʻOtuá?
7 Ko ia, kuo pau ke fakamuʻomuʻa ʻe he ngaahi tamaí ʻa e ʻOtuá ʻaki ʻenau tokanga ki he tuʻutuʻuni ko ia ‘ke hanganaki tauhi hake ʻenau fānaú ʻi he akonaki mo e fakatonutonu fakaʻatamai ʻa Sihová.’ (ʻEfesō 6:4, NW) Ko e fatongia ko iá ʻoku ʻikai lava ke ʻave ia ki ha taha kehe, neongo ai pē kapau ʻoku toe maʻu nai ʻe ha tamai ia ha ngāue kuo vaheʻi ange ko hono tokangaʻi ʻa e ngaahi ngāue ʻi he fakatahaʻanga Kalisitiané. ʻOku lava fēfē ʻe he ngaahi tamai peheé ʻo tokangaʻi ʻa honau ngaahi fatongiá—ʻo tokonaki fakamatelie, fakalaumālie, pea mo fakaeongo ki he ngaahi mēmipa ʻo e fāmilí—pea ʻi he taimi tatau, ko hono tokangaʻi mo fai ʻa e tauhi ʻo e fakatahaʻangá?
Tokonaki ʻa e Poupou ʻOku Fiemaʻú
8. ʻOku lava fēfē ke poupou ʻa e uaifi ʻo ha tokotaha mātuʻa kiate ia?
8 ʻOku mahino lelei, ʻoku malava ke maʻu ʻa e ʻaonga ʻe he kau mātuʻa ʻoku ʻi ai honau ngaahi fatongia fakafāmilí mei hano poupouʻi. Ko e Watchtower naʻe lave ki ai ʻi ʻolungá naʻe fakamatalaʻi ai ʻoku lava ke hoko ha uaifi Kalisitiane ko ha poupou ki hono husepānití. Naʻe pehē ai: “ʻOku lava ke ne ʻai ke hoko ʻo maʻu ʻa e faingamālie taha ʻe ala lavá ke malava ai ʻe he husepānití ke teuteu ki heʻene ngaahi ngāue kehekehe, pea mo tokoni ke fakahaofi ʻa e taimi mahuʻinga maʻá e husepānití pea kiate ia tonu ʻaki hano ʻai ha taimi-tēpile lelei ʻi he ʻapí, fai ʻi he taimi ʻa e maʻu ʻo e meʻatokoní, hoko ʻo mateuteu ke vave ʻa e ʻalu ki he ngaahi fakataha ʻa e fakatahaʻangá. . . . ʻI he malumalu ʻo e tataki ʻa hono husepānití, ʻoku malava ke tokoni lahi ʻa e uaifi Kalisitiané ki hono akoʻi hake ʻa e fānaú ʻi he hala ʻoku totonu ke nau fou aí ke fakahōifua kia Sihova.” (Palōvepi 22:6) ʻIo, naʻe fakatupu ʻa e uaifí ke hoko “ko ha tokoni,” pea ʻe fakapotopoto ke talitali lelei ʻe he husepānití ʻa ʻene tokoní. (Sēnesi 2:18) Ko ʻene poupoú ʻe lava ke ne fakaivia ʻa e husepānití ke toe ola lelei ange ai ʻa ʻene tokanga fakatouʻosi ki hono fāmilí pea mo hono ngaahi fatongia fakaefakatahaʻangá.
9. Ko hai naʻe fakalototoʻaʻi ʻi he fakatahaʻanga ʻi Tesalonaiká ke tokoni ki he ngaahi mēmipa kehe ʻi he fakatahaʻangá?
9 Kae kehe, ʻoku ʻikai ko e ngaahi uaifi pē ʻo e kau mātuʻa Kalisitiané ʻoku malava ke nau kau ʻi he ngāue ʻa ia ʻoku poupouʻi ai ʻa e ʻovasia ko ia kuo pau ke ne “tauhi ʻa e fanga sipi ʻa e ʻOtua” mo tokanga ki hono fale ʻoʻoná. (1 Pita 5:2) Ko hai ha taha kehe ʻokú ne malava? Naʻe naʻinaʻi ʻa e ʻaposetolo ko Paulá ki he ngaahi tokoua ʻi Tesalonaiká ke fai ha tokanga kiate kinautolu ʻoku “buleʻi” kinautolú. Ka ʻi heʻene hoko atu ʻa ʻene lea ki he ngaahi tokoua ai pē ko ʻení—ʻo fakahangatonu kiate kinautolu naʻe ʻikai pulé—naʻe tohi ʻe Paula: “Oku mau eginaki kiate kimoutolu, e kaiga, valokiʻi akinautolu oku fakamaveuveu, fakafiemalie ki he kau loto foi, boubou ae vaivai, ke mou faa katakiʻi kotoabe.”—1 Tesalonaika 5:12-14, PM.
10. Ko e hā ʻa e ola lelei kuo hoko ki he fakatahaʻangá ʻi he tokoni anga-ʻofa ʻa e ngaahi tokouá kotoa?
10 He toki lelei lahi ē ka ko e taimi ʻe maʻu ai ʻe he ngaahi tokoua ʻi ha fakatahaʻanga ʻa e ʻofa ko ia ʻoku ueʻi ai kinautolu ke fakafiemālie ʻa e loto-foʻí, ke poupou ʻa e vaivaí, ke valokiʻi ʻa e kau fakamaveuveú, pea ke hoko ʻo faʻa kātaki ki he kakai kotoa pē! Neongo naʻe faingataʻaʻia ʻi he mamahi lahi ʻa e ngaahi tokoua ʻi Tesalonaiká ʻa ia naʻa nau piki ki mui mai ki he moʻoni ʻo e Tohitapú, naʻa nau ngāueʻaki ʻa e akonaki ʻa Paulá ʻo fai ʻa e meʻa ko ʻení. (Ngāue 17:1-9; 1 Tesalonaika 1:6; 2:14; 5:11) Fakakaukau atu ki he ola lelei ʻo ʻenau fengāueʻaki fakataha anga-ʻofá ʻi hono ʻai ʻo mālohi ai mo fakafāʻūtahaʻi ʻa e fakatahaʻangá kotoa! ʻOku meimei tatau pē ʻi he ʻahó ni, ʻi he taimi ʻoku fakafiemālie ai, poupou, mo fevalokiʻaki ai ʻa e ngaahi tokouá, ʻokú ne ʻai ai ʻa e ngaahi fatongia fakatauhisipi ʻa e kau mātuʻá, ʻa ē ʻoku faʻa ʻi ai honau ngaahi fāmili ke tokanga ki aí, ʻo faingofua lahi ange ai ʻa hono fuá.
11. (a) Ko e hā ʻoku ʻuhinga lelei ai ke fakaʻosiʻaki ʻo pehē naʻe kau ʻa e kakai fefiné ʻi he lea ko ia “kaiga”? (e) Ko e hā ʻa e tokoni ʻoku malava ke fai ʻe ha fefine Kalisitiane matuʻotuʻa ki he kakai fefine kei siʻi ange ʻi he ʻaho ní?
11 Naʻe kau ha kakai fefine ʻi he lotolotonga ʻo e “kaiga” ko ia naʻe lea ki ai ʻa e ʻaposetolo ko Paulá? ʻIo, naʻe ʻi ai, koeʻuhi he naʻe hoko ʻo tui ʻa e kakai fefine tokolahi. (Ngāue 17:1, 4; 1 Pita 2:17; 5:9) Ko e faʻahinga tokoni fēfē kuo lava ke ʻomai ʻe he kakai fefine peheé? Sai, naʻe ʻi ai ʻi he ngaahi fakatahaʻangá ʻa e kakai fefine kei siʻi ange naʻe ʻi ai ʻenau palopalema ʻi hono puleʻi ʻa e “malohi ʻenau hohaʻa” pe naʻa nau hoko ʻo “loto foi.” (1 Tīmote 5:11-13) ʻOku maʻu ʻe he kakai fefine ʻe niʻihi ʻi he ʻahó ni ʻa e palopalema meimei tatau. Ko e meʻa pē nai ʻoku fiemaʻu lahi taha kiate kinautolú ko ha taha ke fanongo ki heʻenau ngaahi palopalemá pea mo kaungāmamahi. ʻOku faʻa hoko ko e tokotaha lelei taha ʻi hono ʻomai ʻo e tokoni peheé ko ha fefine Kalisitiane matuʻotuʻa. Ko e fakatātaá, ʻokú ne malava ʻo fetalanoaʻaki mo ha fefine ʻe taha ki he ngaahi palopalema fakafoʻituituí ʻa ia heʻikai malava ke fai lelei ia ʻe ha tangata Kalisitiane ʻiate ia pē. ʻI hono fakaeʻa ʻa e mahuʻinga ʻo hono ʻomai ʻa e tokoni peheé, naʻe tohi ai ʻe Paula: “Ke pehe foki mo e kau finemātutuʻa: . . . ko e akoʻanga meʻa lelei, koeʻuhi ke nau kiēʻi ʻa e kau fefine ʻoku mālōlō ke nau ʻofa ki honau ngaahi husepaniti, pea ʻofa ki heʻenau fānau, ke nau angafakapotopoto, ke nau angamaʻa, ke nau ngāue ʻi ʻapi, ke nau angalelei, ke nau anganofo ki honau ngaahi husepaniti naʻa lauʻikovi ʻa e folofola ʻa e ʻOtua.”—Taitusi 2:3-5.
12. Ko e fakahinohino ʻa hai ʻoku mātuʻaki mahuʻinga ke muimui ki ai ʻa e kotoa ʻi he fakatahaʻangá?
12 Ko ha tāpuaki lahi ē ʻi ha fakatahaʻanga ʻa e tuofāfine anga-fakatōkilaló ʻi he taimi ʻoku nau fengāueʻaki fakataha ai ʻi he poupou fakatouʻosi ki honau ngaahi husepānití pea mo e kau mātuʻá! (1 Tīmote 2:11, 12; Hepelū 13:17) ʻOku tautefito ki he kau mātuʻa ʻoku nau maʻu ʻa e ngaahi fatongia fakafāmilí ʻa ʻenau maʻu ʻa e ʻaonga ʻi he taimi ʻoku ngāue fakataha kotoa ai ʻo fetokoniʻaki ʻi ha laumālie ʻo e ʻofa pea ʻi he taimi ʻoku anganofo kotoa ai ki he tataki ʻa e kau tauhi-sipi kuo fakanofó.—1 Pita 5:1, 2.
Ngaahi Mātuʻa Tauhi Fānau, Ko e Hā ʻOku Mou Fakamuʻomuʻá?
13. ʻOku anga-fēfē ʻa e ʻikai lavameʻa ʻa e ngaahi tamai tokolahi ʻi honau ngaahi fāmilí?
13 ʻI he ngaahi taʻu kuo hilí, naʻe pehē ʻe ha tokotaha faifaiva tuʻu-ki-muʻa: “ʻOku ou sio ki he kau tangata lavameʻa ʻoku nau fakalele ʻa e ngaahi kautaha ʻa ia ʻoku ʻi ai ʻa e kau tangata ʻe laui ngeau; ʻoku nau ʻilo ʻa e founga ke feangai ai mo e ngaahi tuʻunga kotoa pē, founga ke fai ai ʻa e akonaki mo e fakapale ʻi he māmani pisinisí. Ka ko e pisinisi mahuʻinga taha ʻoku nau fakalelé ko honau fāmilí pea ʻoku ʻikai ke nau lava ʻo fakahoko honau fatongia ko iá.” Ko e hā hono ʻuhingá? ʻIkai ʻoku ʻuhingá ko ʻenau fakamuʻomuʻa ʻa e pisinisí pea mo e ngaahi mahuʻingaʻia kehé ʻo liʻaki ʻa e akonaki ia ʻa e ʻOtuá? ʻOku pehē ʻe heʻene Folofolá: “Pea ko e ngaahi foʻi folofola ko eni ʻoku ou kouna atu . . . te ke uhuʻi ki hoʻo fanau.” Pea naʻe pau ke fai fakaʻaho ʻeni. ʻOku fiemaʻu ke foaki taʻefakangatangata ʻe he ngaahi mātuʻa tauhi fānaú ʻa honau taimí—ʻo tautefito ki heʻenau ʻofá mo e tokanga lolotó.—Teutalōnome 6:6-9.
14. (a) ʻOku totonu ke fēfē ʻa e tokanga ʻa e ngaahi mātuʻá ki heʻenau fānaú? (e) Ko e hā ʻoku kau ʻi hono akoʻi totonu ʻo e fānaú?
14 ʻOku fakamanatu mai kiate kitautolu ʻe he Tohitapú ko e fānaú ko e ʻinasi kinautolu meia Sihova. (Sāme 127:3) ʻOkú ke tokanga ki hoʻo fānaú ʻi honau tuʻunga ko e koloa ʻa e ʻOtuá, ko ha meʻaʻofa kuó ne tuku atu kiate koe? ʻE ngalingali ongo ki hoʻo tamá ʻo kapau te ke hapai hake ia ki ho umá, ʻi hono fakahāhaaʻi ko ia ʻa hoʻo tauhi anga-ʻofá mo hoʻo tokangá. (Maʻake 10:16) Ka ke ‘ʻatu ako ki ha tama, ʻo taau mo hono ʻalunga’ ʻoku fiemaʻu ʻa e meʻa lahi ange ia ʻi he fāʻufua pē ki ai mo e ʻumá. Ke hoko ʻo teuʻi ʻaki ʻa e potó ke fakaʻehiʻehi ai mei he ngaahi tōʻanga ʻi he moʻuí, ʻoku toe fiemaʻu foki ʻe ha tama ʻa e akonaki anga-ʻofá. ʻOku fakahaaʻi ʻa e ʻofa moʻoní ʻe ha mātuʻa ʻaki ʻa ʻene ‘tautea a ene tama oka aoga ke fai.’—Palōvepi 13:1, 24, PM; Palovepi 22:6.
15. Ko e hā ʻokú ne fakahaaʻi ʻoku fiemaʻu ʻa e akonaki fakaemātuʻá?
15 ʻOku lava ke tau sio ki hono fiemaʻu ʻo e akonaki fakaemātuʻá mei he fakamatala ʻa e tokotaha faleʻi ʻi ha akoʻanga, ki he fānau ʻoku omi ki hono ʻōfisí: “ʻOku nau fakaʻofa, loto-māfasia, pea tuēnoa. ʻOku nau tangi ʻi heʻenau talanoa ki he founga ʻoku ʻi ai moʻoni ʻa e ngaahi meʻá. Ko e tokolahi—ʻo tokolahi ange ia ʻi he fakakaukau nai ʻa ha taha—kuo nau feinga taonakita, ʻo ʻikai koeʻuhi ʻoku fuʻu hulu ʻenau fiefiá; ka koeʻuhí ʻoku nau fuʻu ongoʻi loto-mamahi, liʻaki noaʻia holo, pea lōmekina ʻe he loto-māfasiá koeʻuhi ʻi ha taʻu siʻi pehē ʻoku nau ‘tauhi ha fatongia’ pea ʻoku fuʻu lahi ia ke fua.” Naʻá ne tānaki atu ki ai: “Ko ha meʻa fakailifia ia ki ha taha kei siʻi ke ne ongoʻi ʻokú ne tokangaʻi ha ngaahi meʻa.” Ko e moʻoni, ʻe feinga nai ʻa e fānaú ke kalofi ʻa e akonakí, ka ʻoku nau houngaʻia moʻoni ʻi he ngaahi tākitala mo e ngaahi fakataputapui fakaemātuʻá. ʻOku nau fiefia ʻi he tokanga lahi ʻa ʻenau mātuʻá ke fokotuʻu ʻa e ngaahi fakangatangata kiate kinautolú. “ʻOkú ne toʻo atu ha kavenga fakalilifu mei heʻeku fakakaukaú” ko e lau ia ʻa ha taha taʻu hongofulu tupu ʻa ia naʻe fai pehē ʻene ongo mātuʻá.
16. (a) Ko e hā ʻoku hoko ki he fānau ʻe niʻihi naʻe tauhi hake ʻi he ngaahi ʻapi Kalisitiané? (e) Ko e hā ʻoku ʻikai ke ʻuhinga lelei nai ai ke faʻa pehē ʻi ha ʻalunga talangataʻa ʻa ha tama naʻe ʻikai lelei ʻa e akonekina naʻe fai ʻe he mātuʻá?
16 Ka neongo ʻa hono maʻu ʻo e ngaahi mātuʻa ko ia ʻoku ʻofa ʻiate kinautolu pea mo ʻoange ʻa e ngaahi akonaki leleí, ko e tamaiki ia ʻe niʻihi, hangē ko e foha maumau koloa ko ia ʻi he talanoa fakaefakatātā ʻa Sīsuú, ʻoku nau liʻaki ʻa e tataki fakaemātuʻá pea hēhē noaʻia holo. (Luke 15:11-16) Kae kehe, ʻi he meʻa ko iá, ʻoku ʻikai ʻuhinga nai ia naʻe ʻikai ke fakahoko ʻe he ongo mātuʻá ia hona fatongia ke akoʻi totonu hake ʻa ʻena tamá, ʻo hangē ko e fakahinohino ʻi he Palōvepi 22:6. Ko e fakamatala ko ia ʻo fekauʻaki mo e ‘ʻatu ako ki ha tama, ʻo tāu mo hono ʻalunga, pea ʻe ʻikai te ne hiki mei ai’ naʻe ʻomai ia ko ha lao tefito. ʻOku fakalotomamahí, hangē ko e foha maumau koloá, ʻe hanga ʻe he fānau ia ʻe niʻihi ʻo ‘maaʻi ʻa e talangofua ki heʻenau mātuʻá.’—Palōvepi 30:17.
17. ʻOku maʻu nai mei fē ʻa e fakafiemālie ki he ngaahi mātuʻa ʻa e fānau talangataʻá?
17 Naʻe tangilāulau ha tamai ʻa ha foha talangataʻa ʻo pehē: “Kuó u feinga mo feinga ke aʻu ki hono lotó. ʻOku ʻikai ke u toe ʻilo ʻe au pe ko e hā te u faí koeʻuhi kuó u ʻosi ʻahiʻahi ʻa e ngaahi meʻa lahi kehekehe. Kuo ʻikai pē ke ʻaonga ha meʻa ia.” ʻOku ʻi ai ʻa e fakatuʻamelie, ko e fānau talangataʻa peheé, ʻe ʻi ai pē ʻa e taimi, te nau manatu ai ki he akonekina anga-ʻofa naʻa nau maʻú pea foki ʻo hangē ko ia naʻe fai ʻe he foha maumau koloá. Neongo ia, ʻoku kei ʻi ai moʻoni pē ʻa e fānau ia ʻoku nau angatuʻu pea fai mo e ngaahi meʻa taʻetaau ʻo mamahi lahi ai ʻenau ngaahi mātuʻá. ʻE ʻomai nai ha fiemālie ki he ngaahi mātuʻá mei heʻenau ʻiloʻi naʻa mo e faiako lahi taha ke moʻui ʻi he māmaní naʻá ne sio tonu ʻi hono lavakiʻi ia ʻe heʻene tokotaha ako ʻi he taimi lōloa ko ia ko Siutasi ʻIsikalioté. Pea ko Sihova tonu ē naʻe ʻikai toe veiveiua ʻa ʻene loto-mamahi ʻi he taimi naʻe liʻaki ai ʻe he tokolahi ʻo hono ngaahi foha fakalaumālié ʻa ʻene faleʻí pea fakamoʻoniʻi ʻa ʻenau angatuʻú neongo naʻe ʻikai ha kovi ia ʻi Heʻene tafaʻakí.—Luke 22:47, 48; Fakahā 12:9.
Fānau—Ko Hai Te Mou Fakafiefiaʻí?
18. ʻOku lava fēfē ke fakahaaʻi ʻe he fānaú ʻoku nau fakamuʻomuʻa ʻa e ʻOtuá?
18 ʻOku naʻinaʻi mai ʻa Sihova kiate kimoutolu fānau: “Talangofua ʻi he ʻEiki ki hoʻomou matuʻa.” (ʻEfesō 6:1) ʻOku fakamuʻomuʻa ʻe he fānaú ʻa e ʻOtuá ʻi heʻenau fai ʻení. ʻOua ʻe hoko ʻo vale! “Ko e vale ia ʻoku ne taʻetokaʻi ʻa e akonaki fakapoto ʻa ʻene tamai,” ko e lau ia ʻa e Folofola ʻa e ʻOtuá. Pehē foki ʻoku ʻikai totonu ke ke fie māʻolunga ʻo fakamahamahalo ʻo pehē ʻoku lava pē ke ʻikai fiemaʻu ha akonaki ia kiate koe. Ko e moʻoniʻi meʻá ia “ʻoku ʻi ai ha toʻutangata ʻoku nau maʻa ʻi he vakai ʻanautolú pē, ka neongo ia ʻoku teʻeki ai fufulu kinautolu mei honau ʻulí.” (Palōvepi 15:5; 30:12, American Standard Version) Ko ia, tokanga ki he fakahinohino mei he ʻOtuá—“fanongo,” “tuku tauhi,” “ʻoua ʻe ngalo,” “tokanga,” “tauhi,” pea “ʻoua ʻe keuʻi” ʻa e ngaahi tuʻutuʻuni mo e akonaki ʻa e ongo mātuʻá.—Palōvepi 1:8; 2:1; 3:1; 4:1; 6:20.
19. (a) Ko e hā ʻa e ngaahi ʻuhinga mālohi ʻoku maʻu ʻe he fānaú ke talangofua ai kia Sihová? (e) ʻOku lava fēfē ke fakahaaʻi ʻe he fānaú ʻoku nau loto-hounga ki he ʻOtuá?
19 ʻOku mou maʻu ʻa e ngaahi ʻuhinga mālohi ke talangofua ai kia Sihová. ʻOkú ne ʻofaʻi kimoutolu, pea kuó ne ʻomai ʻa ʻene ngaahi laó, ʻo kau ai ʻa e lao ko ia ki he fānaú ke talangofua ki heʻenau mātuʻá, ke maluʻi ai kimoutolu pea ke tokoniʻi kimoutolu ke mou maʻu ha moʻui fiefia. (ʻAisea 48:17) Kuó ne toe ʻomai foki ʻa hono ʻAló ke pekia maʻamoutolu koeʻuhi kae lava ʻo fakahaofi kimoutolu mei he angahalá mo e maté pea maʻu ʻa e moʻui taʻengatá. (Sione 3:16) ʻOku mou houngaʻia ai? ʻOku vakai hifo ʻa e ʻOtuá mei he ngaahi langí, ʻo sivisiviʻi homou lotó ke sio pe ʻoku mou ʻofa moʻoni kiate ia mo houngaʻia ʻi heʻene ngaahi tokonakí. (Sāme 14:2) ʻOku toe vakai mai foki mo Sētane, pea ʻokú ne manukiʻi ʻa e ʻOtuá, ʻo taukaveʻi ʻe ʻikai te mou talangofua kiate Ia. ʻOku mou ʻai ʻa Sētane ke fiefia pea “fakamamahiʻi” ʻa Sihova ʻi he taimi ʻoku mou talangataʻa ai ki he ʻOtuá. (Sāme 78:40, 41, PM) ʻOku kole atu ʻa Sihova kiate kimoutolu: “Tama, ke ke hoko ko e poto, kae fiefia hoku loto [ʻi he talangofua kiate aú]; pea ai ʻeku tali ke fai kiate ia ʻoku ngaohi au.” (Palōvepi 27:11) ʻIo, ko e fehuʻí leva, Ko hai te mou fakafiefiaʻí, ko Sētane pe ko Sihova?
20. Naʻe anga-fēfē ʻa e tauhi maʻu ʻe ha toʻutupu ʻe taha ʻa e loto-toʻa ke tauhi ʻa Sihova naʻa mo e ʻi he taimi naʻá ne ilifia aí?
20 ʻOku ʻikai faingofua ke fai ʻa e finangalo ʻo e ʻOtuá ʻi he fehangahangai mo e ngaahi fakaʻaiʻai ʻoku ngāueʻaki kiate koe ʻe Sētane mo hono māmaní. ʻOku lava ke hoko ia ʻo fakailifia. Naʻe fakamatala ʻa e toʻutupu ʻe taha: “Ko e ilifiá ʻoku tatau pē ia mo e mokosiá. ʻOku lava pē ke ke fai ʻa e meʻa ʻo fekauʻaki mo ia.” Naʻá ne fakamatala: “ʻI he taimi ʻokú ke mokosia aí, ʻokú ke tui ha kofu māfana. Kapau ʻokú ke kei mokosia pē, ʻokú ke toe tui ha kofu ʻe taha. Pea ʻokú ke hokohoko atu ai pē ʻi hono tui ha meʻa kae ʻoua pē kuo mole ʻa e mokosiá pea ʻikai ke ke kei mokosia. Ko ia ai, ko e lotu kia Sihova ʻi he taimi ʻokú ke ilifia aí ʻoku hangē pē ia ko haʻo tui ha kofu māfana ʻi he taimi ʻokú ke mokosia aí. Kapau ʻoku ou kei ilifia ai pē ʻi he hili ʻa ʻeku lotu tuʻo tahá, ʻoku ou toe lotu, mo lotu, mo lotu, kae ʻoua pē kuo ʻikai ke u toe ongoʻi ilifia. Pea naʻe ʻaonga ia. Kuó ne ʻai au ke u mavahe mei he faingataʻá!”
21. ʻE anga-fēfē ʻa hono tokoniʻi kitautolu ʻe Sihova kapau te tau feinga moʻoni ke fakamuʻomuʻa ia ʻi heʻetau moʻuí?
21 Kapau ʻoku tau feinga moʻoni ke fakamuʻomuʻa ʻa e ʻOtuá ʻi heʻetau moʻuí, ʻe tokoniʻi kitautolu ʻe Sihova. Te ne ʻai kitautolu ke tau mālohi, ʻi hono tokonaki mai ʻa e tokoni fakaeʻāngelo ʻi he taimi ʻoku fiemaʻu aí, ʻo hangē pē ko ia naʻá ne fai ki hono ʻAló. (Mātiu 18:10; Luke 22:43) Ke mou loto-toʻa ʻa kimoutolu kotoa ngaahi mātuʻa mo e fānau. Maʻu ʻa e manavahē ʻo hangē ko Kalaisí, pea te ne ʻomai ai kiate kimoutolu ʻa e loto-fiefia. (ʻAisea 11:3) ʻIo, “ʻapasia kia Elohimi, ʻo tauhi ʻene ngahi fekau; he ko e kotoa ʻo e tangata ia.”—Koheleti 12:13.
ʻE Lava ke Ke Tali?
◻ Ko e hā ʻa e ngaahi fatongia naʻe fiemaʻu ke ʻai ke palanisi ʻe he muʻaki kau muimui ʻo Sīsuú?
◻ Ko e hā ʻa e fatongia kuo pau ke fakahoko ʻe he ngaahi mātuʻa Kalisitiané?
◻ Ko e hā ʻa e tokoni ʻoku ala maʻu ki he kau mātuʻa Kalisitiane ʻoku ʻi ai honau ngaahi fāmilí?
◻ Ko e hā ʻa e ngāue mahuʻinga ʻoku lava nai ke fai ʻe he tuofāfiné ʻi he fakatahaʻangá?
◻ Ko e hā ʻa e akonaki mo e fakahinohino ʻoku mātuʻaki mahuʻinga ke tokanga ki ai ʻa e fānaú?
[Fakatātā ʻi he peesi 33]
ʻOku faʻa lava ʻe ha fefine Kalisitiane matuʻotuʻa ke ʻoange ki ha fefine kei siʻi ange ʻa e tokoni ʻoku fiemaʻú
[Fakatātā ʻi he peesi 35]
Ko e hā ʻa e fakafiemālie ʻoku lava ke maʻu mei he Tohitapú ʻe he ngaahi mātuʻa ʻoku talangataʻa ʻenau fānaú?