Fakaʻehiʻehi mei he Hoko ʻo “Ueʻingofua mei Hoʻomou Fakaʻuhingá”!

“Fanga tokoua, . . . ʻoku mau kole atu kiate kimoutolu ke ʻoua ʻe hoko ʻo ueʻingofua mei hoʻomou fakaʻuhingá.”—2 TES. 2:1, 2.

NGAAHI POINI KE FAKAKAUKAU KI AI

Ko e hā ʻa e ngaahi fakatokanga feʻungamālie naʻe ʻi he ongo tohi ʻa Paula ki he kau Tesalonaiká?

Ko e hā ʻe lava ke ne tokoniʻi kitautolu ke ʻoua ʻe hoko ʻo kākāʻí?

ʻOku anga-fēfē hono maluʻi kitautolu ʻe he malanga faivelengá?

1, 2. Ko e hā ʻoku fuʻu anga-maheni ai ʻa e kākaá, pea ko e hā ʻa e faʻahinga kākā ʻoku tau sio ki ai he ʻaho ní? (Sio ki he ʻuluaki fakatātā ʻi he kupú ni.)

KO E kākaá mo e loí ʻoku anga-maheni ʻaupito ia ʻi he māmani ʻoku tau nofo aí. ʻOku ʻikai totonu ke fakaʻohovaleʻi heni kitautolu. ʻOku fakahaaʻi mahino ʻe he Tohi Tapú ko Sētane ko e Tēvoló ko ha tokotaha taukei ʻi hono kākaaʻi ʻa e kakaí pea ko ia ʻa e pule ʻo e māmani ko ʻení. (1 Tīm. 2:14; 1 Sio. 5:19) Ko ʻetau ofi ange ki he ngataʻanga ʻo e māmani fulikivanu ko ení, ko e ʻita lahi ange ia ʻa Sētané koeʻuhí he “ʻoku toe siʻi pē hono taimí.” (Fkh. 12:12) Ko ia ʻe lava ke tau ʻamanekina ko e faʻahinga ʻoku tākiekina ʻe he Tēvoló te nau hoko ʻo taʻefaitotonu lahi ange. ʻE tautefito ʻenau feingá ke kākaaʻi ʻa e faʻahinga ʻoku tauhi kia Sihová.

² ʻI he taimi ʻoku lave ai ʻa e mītiá ki he kau sevāniti ʻa Sihová mo ʻenau ngaahi tuí, ʻoku nau līpooti fakakonga pē ʻa e foʻi moʻoní pe aʻu ʻo loi. Ko e ngaahi ʻuluʻi kaveinga ʻi he nusipepá, ngaahi polokalama televīsoné, mo e ngaahi peesi ʻInitanetí ʻoku ngāueʻaki ia ke fakamafola ʻa e ngaahi talanoa loi. Ko e kakai ʻe niʻihi ʻoku nau hoko ʻo loto-mamahi pe aʻu ʻo nau ʻita koeʻuhí ko ʻenau tui ki he ngaahi loi ko ení ʻo ʻikai tomuʻa vakaiʻi ʻa e ngaahi moʻoniʻi meʻá.

 3. Ko e hā ʻe lava ke ne tokoniʻi kitautolu ke ʻoua ʻe hoko ʻo kākāʻí?

³ Ko e meʻa fakafiefiá, he ʻoku lava ke tau taukapoʻi kitautolu mei he ngaahi loi ʻa Sētané. Ke tokoniʻi kitautolu ke fakaʻehiʻehi mei he hoko ʻo kākāʻí, ʻoku tau maʻu ʻa e Tohi Tapú, ʻa ia ʻoku “ʻaonga . . . ki he fakatonutonu.” (2 Tīm. 3:16) Ko e meʻa naʻe tohi ʻe he ʻapositolo ko Paulá ʻoku fakahaaʻi mai ai kia kitautolu ko e niʻihi ʻi he kau Kalisitiane ʻi Tesalonaiká naʻe kākaaʻi kinautolu ʻe he ngaahi loi. Naʻá ne tohi kia kinautolu: “ʻOku mau kole atu kiate kimoutolu ke ʻoua ʻe hoko ʻo ueʻingofua mei hoʻomou fakaʻuhingá.” (2 Tes. 2:1, 2) Ko e hā ʻa e ngaahi lēsoni ʻe lava ke tau ako mei he fakatokanga anga-ʻofa ʻa Paulá, pea ʻe lava fēfē ke tau ngāueʻaki ia?

NGAAHI FAKATOKANGA FEʻUNGAMĀLIE

 4. Ko e hā ʻa e fakatokanga naʻe fai ki he kau Kalisitiane ʻi Tesalonaiká fekauʻaki mo e hoko mai ʻa e “ʻaho ʻo Sihová,” pea ko e hā ʻa e fakatokanga kia kitautolú?

⁴ ʻI heʻene ʻuluaki tohi ki he kau Kalisitiane ʻi Tesalonaiká, naʻe fakatokanga ʻa Paula kia kinautolu fekauʻaki mo e hoko mai ʻa e “ʻaho ʻo Sihová.” Naʻe ʻikai te ne loto ke hoko ʻo puputuʻu pe taʻemateuteu hono fanga tokouá. Naʻá ne tala ange ko kinautolú ko e ‘ngaahi foha ʻo e māmá,’ peá ne tānaki atu leva: “Ke tau nofoʻaki ʻāʻā mo tauhi maʻu ʻetau fakakaukau leleí.” (Lau ʻa e 1 Tesalonaika 5:1-6.) ʻI he ʻahó ni, ʻoku tau tatali ki hono fakaʻauha ʻo Pāpilone ko e Lahí, ʻa ia, ko e kotoa ʻo e lotu loí. Ko e fakaʻauha ko ení ʻe hoko ia ko e kamataʻanga ʻo e ʻaho lahi ʻo Sihová. ʻOku tau mahinoʻi ʻa e founga ʻe fakahoko ai ʻe Sihova ʻene taumuʻá. ʻI he fakatahaʻangá, ʻoku tau maʻu maʻu pē ʻa e ngaahi fakamanatu lelei ʻa ia ʻe lava ke ne tokoniʻi kitautolu ke hoko ʻo mateuteu ai ki he ʻaho ʻo Sihová. Kapau te tau fanongo lelei ki he ngaahi toutou fakatokanga ko ení, ʻe lava ke fakaivimālohiʻi ai ʻetau fakapapau ke tauhi ki he ʻOtuá ʻaki ʻetau “mafai fakaefakaʻuhingá.”—Loma 12:1.

5, 6. (a) Ko e hā naʻe hiki ʻe Paula ʻi heʻene tohi hono ua ki he kau Tesalonaiká? (e) Ko e hā ʻe vavé ni ke fai ʻe Sīsuú, pea ko e hā ʻoku totonu ke tau ʻeke hifo kia kitautolú?

⁵ Naʻe hiki ʻe Paula ha tohi hono ua ki he kau Tesalonaiká. ʻI he tohi ko iá, naʻá ne hiki ai fekauʻaki mo e hoko mai ʻa e mamahi lahí ʻi he taimi ʻe fakahoko ai ʻe Sīsū ʻa e fakamaau ʻa e ʻOtuá ki he “faʻahinga ko ia ʻoku ʻikai te nau ʻiloʻi ʻa e ʻOtuá pea mo e faʻahinga ko ia ʻoku ʻikai te nau talangofua ki he ongoongo lelei.” (2 Tes. 1:6-8) ʻI he vahe 2 ʻo e tohi ko iá, ʻoku hiki ai ʻe Paula ʻo pehē ko e niʻihi ʻi he fakatahaʻangá naʻa nau hoko ʻo fuʻu “fakahohaʻasi” ʻe he ʻaho ʻo Sihová ʻo nau tui ai naʻe fuʻu ofi ʻaupito. (Lau ʻa e 2 Tesalonaika 2:1, 2.) Naʻe ʻikai ke mahinoʻi kakato ʻe he muʻaki kau Kalisitiané ʻa e founga ʻe fakahoko ai ʻa e taumuʻa ʻa Sihová. Naʻe fakahaaʻi eni ʻe Paula ʻi he taimi naʻe hiki ai ki mui ʻa e meʻa ko eni fekauʻaki mo e kikite: “ʻOku tau maʻu ha konga pē ʻo e ʻiló pea ʻoku tau kikite fakakonga pē; ka ʻi he taimi ʻe aʻu mai ai ʻa e meʻa ʻoku kakató, ko e meʻa ʻoku fakakonga peé ʻe hoko ʻo ʻosi atu ia.” (1 Kol. 13:9, 10) Ka ʻe lava ke nau nofoʻaki faitōnunga ʻaki ʻa e fanongo ki he ngaahi fakatokanga naʻe ʻai ʻe Sihova ke hiki ʻe Paula, ko e ʻapositolo ko Pitá, mo e fanga tokoua pani faitōnunga kehe ʻo e taimi ko iá.

⁶ Ke fakatonutonu ʻenau fakakaukaú, naʻe fakamānavaʻi ʻe he ʻOtuá ʻa Paula ke ne fakamatalaʻi ko e ki muʻa ʻi he ʻaho ʻo Sihová, ʻe ʻi ai ʻa e fuʻu kau tafoki ʻo fakafepaki ki he moʻoní pea ʻe hoko mai ʻa e “tangata ʻo e maumau-laó.”a Hili iá, ʻi he taimi kotofa ʻa e ʻOtuá, ʻe “fakaʻauha” ʻosi ʻe Sīsū ʻa e kotoa ʻo e faʻahinga kuo kākāʻí. Naʻe fakamatalaʻi ʻe Paula ko e ʻuhinga ʻo e fakamaau ko ení koeʻuhí he “naʻe ʻikai te nau tali ʻa e ʻofa ki he moʻoní.” (2 Tes. 2:3, 8-10) ʻOku totonu ke tau ʻeke hifo kia kitautolu: ‘ʻOku lahi fēfē ʻeku ʻofa ki he moʻoní? ʻOku ou ako ʻa e makasini ko ení mo e ʻū tohi kehe ʻoku tokonaki maʻá e kakai ʻa e ʻOtuá ʻi māmani lahí, koeʻuhí ke u lava ʻo ʻiloʻi ʻetau mahino lolotonga fekauʻaki mo e ngaahi akonaki Fakatohitapú?’

FILI FAKAPOTOPOTO HO NGAAHI KAUNGĀMEʻÁ

7, 8. (a) Ko e hā ʻa e ngaahi fakatuʻutāmaki ʻe niʻihi ki he muʻaki kau Kalisitiané? (e) Ko e hā ʻe lava ke mātuʻaki fakatuʻutāmaki ki he kau Kalisitiane he ʻaho ní?

⁷ Ko e ngaahi akonaki ʻa e kau tafoki ʻo fakafepaki ki he moʻoní ʻoku ʻikai ko e fakatuʻutāmaki pē ia ki he kau Kalisitiané. Naʻe tohi ʻe Paula kia Tīmote ʻo pehē “ko e ʻofa ki he paʻangá ko ha aka ia ʻo e ngaahi faʻahinga meʻa kotoa pē ʻoku koví.” Naʻá ne toe pehē “ʻi he kakapa atu ki he ʻofa ko ʻení kuo takiheeʻi ai ʻa e niʻihi mei he tuí pea kuo nau hokohokaʻi fakaʻaufuli ai kinautolu ʻaki ʻa e ngaahi mamahi lahi.” (1 Tīm. 6:10) “Ko e ngaahi ngāue ʻa e kakanó” ʻe toe hoko maʻu pē ko ha fakatuʻutāmaki.—Kal. 5:19-21.

⁸ Naʻe fakatokanga mālohi ʻa Paula ki he kau Tesalonaiká fekauʻaki mo e faʻahinga naʻá ne ui ko e “kau ʻapositolo loi.” Naʻe leaʻaki ʻe he niʻihi ʻo kinautolu ʻa e “ngaahi meʻa kuo mioʻi ke tohoakiʻi atu ai ʻa e kau ākongá ke muimui ʻiate kinautolu.” (2 Kol. 11:4, 13; Ngā. 20:30) Naʻe fakaongoongoleleiʻi ʻe Sīsū ʻa e fakatahaʻanga ʻi ʻEfesoó koeʻuhí naʻe ʻikai te nau tali ʻa e “kau tangata koví” ʻi he fakatahaʻangá. Naʻa nau fakapapauʻi ko e kau tangata ko ení ko hono moʻoní ko e kau ʻapositolo loi mo e kau loi. (Fkh. 2:2) ʻI heʻene tohi hono ua ki he kau Tesalonaiká, naʻe ʻoange ai ʻe Paula ʻa e akonaki ko ení: “Ko ia ʻoku mau ʻoatu eni ha ngaahi fakahinohino, fanga tokoua, ʻi he huafa ʻo e ʻEiki ko Sīsū Kalaisí, ke mou fakamamaʻo mei he tokoua kotoa pē ʻoku ʻaʻeva taʻemaau.” Naʻá ne lave leva ki he kau Kalisitiane ʻa ia naʻe “ʻikai ke fie ngāue.” (2 Tes. 3:6, 10) Ko ia kapau naʻe pau ke nau fakaʻehiʻehi mei he tokotaha naʻe fakapikopiko pea ʻikai fie ngāué, ʻe fuʻu mahuʻinga ange ke fakaʻehiʻehi mei ha taha naʻá ne kamata tōʻonga hangē ha tokotaha tafoki ʻo fakafepaki ki he moʻoní. Ko e fili ke fakamoleki ʻa e taimi mo ha tokotaha pehē ʻi he taimi ko iá naʻe mātuʻaki fakatuʻutāmaki pea naʻe fiemaʻu ke fakaʻehiʻehi mei ai. ʻOku toe moʻoni eni ʻi he ʻahó ni.—Pal. 13:20.

 9. Ko e hā ʻoku totonu ai ke tau tokanga kapau ʻoku kamata ha tokotaha ke mateʻi ʻa e ngaahi meʻa ʻoku ʻikai fakamatalaʻi ʻi he Tohi Tapú pe fakaangaʻi ʻa e kautaha ʻa Sihová?

⁹ ʻOku tau ofi ange ki he mamahi lahí mo e ngataʻanga ʻo e māmani fulikivanu ko ení. Ko e ngaahi fakatokanga meia Sihova naʻe ʻomai ʻi he ʻuluaki senitulí ʻoku toe mahuʻinga ange he ʻahó ni. ʻOku ʻikai moʻoni ke tau fiemaʻu ke “tali ʻa e ʻofa maʻataʻatā ʻa e ʻOtuá pea taʻemaʻu hono taumuʻá.” Kapau ʻe hoko ia, ʻe mole meiate kitautolu ʻa e faingamālie ke moʻui taʻengatá. (2 Kol. 6:1) ʻOku totonu ke tau tokanga ʻaupito kapau ʻoku feinga ha tokotaha ʻokú ne maʻu ʻetau ngaahi fakatahá ke fakataueleʻi kitautolu ke mateʻi ʻa e ngaahi meʻa ʻoku ʻikai fakamatalaʻi ʻi he Tohi Tapú pe ke fakaangaʻi ʻa e kau mātuʻá mo e niʻihi kehe ʻoku tauhi ki he ʻOtuá.—2 Tes. 3:13-15.

“TAUHI MAʻU HOʻOMOU PIKI KI HE NGAAHI FAKAHINOHINO”

10. Ko e hā ʻa e ngaahi fakahinohino naʻe tala ki he kau Kalisitiane ʻi Tesalonaiká ke nau muimui aí?

¹⁰ Naʻe akonaki ʻa Paula ki hono fanga tokoua ʻi Tesalonaiká ke nau “tuʻu maʻu” pea hokohoko atu hono fai ʻa e meʻa kuo nau akó. (Lau ʻa e 2 Tesalonaika 2:15.) Ko e hā ʻa e “ngaahi fakahinohino” naʻe akoʻi kia kinautolú? Ko e ngaahi akonaki ʻa Sīsuú mo e meʻa naʻe fakamānavaʻi ʻe he ʻOtuá ʻa Paula mo e niʻihi kehé ke nau hikí. Naʻe ʻikai te ne lave ki he ngaahi fakahinohino naʻe akoʻi ʻe he ngaahi lotu loí. Naʻe fakaongoongoleleiʻi ʻe Paula hono fanga tokoua ʻi he fakatahaʻanga ʻi Kolinitoó, hangē ko ʻene tohi, “ʻi he ngaahi meʻa kotoa pē ʻoku mou manatuʻi au, pea ʻoku mou piki maʻu ki he ngaahi akonakí ʻo hangē tofu pē ko ia ko ʻeku tuku atu ia kiate kimoutolú.” (1 Kol. 11:2) Ko e ngaahi akonaki ko ení naʻe haʻu ia mei he matavai alafalalaʻanga pea malava ke falala ki ai.

11. Ko e hā ʻa e ongo founga ʻokú ne uesia ʻa e kakai ʻe niʻihi ʻi he taimi ʻoku kākaaʻi ai kinautolú?

¹¹ ʻI he taimi naʻe tohi ai ʻa Paula ki he kau Hepeluú, naʻá ne lave ki he founga ʻe ua ʻe mole nai ai ʻa e tui ʻa ha Kalisitiane pea ʻikai kei mateaki ai pē kia Sihova. (Lau ʻa e Hepelū 2:1; 3:12.) Naʻá ne tohi fekauʻaki mo e ʻauhia atu meia Sihová mo e mavahe meiate iá. ʻE faingataʻa ke lava ʻo fakatokangaʻi ʻoku ʻauhia atu ha vaka mei he matātahí. ʻE lava ke ngaʻunu māmālie atu ia ʻo mamaʻo ange. Kae kehe, ʻe lava ke toe fili ʻe ha tangata ke teke hono vaká ke mamaʻo mei he matātahí. ʻOku fakahaaʻi ʻi he ongo fakatātaá ʻa e meʻa ʻe lava ke hoko kapau ʻoku fakaʻatā ʻe ha taha ʻa ia tonu ke kākaaʻi pea tuku ʻene falala-pau ki he moʻoní ke hoko ʻo vaivai.

12. Ko e hā ʻe lava ke ne uesia hotau vahaʻangatae mo Sihová?

¹² Naʻe fakaʻatā nai ʻe he niʻihi ʻo e kau Tesalonaiká kinautolu ke kākaaʻi. ʻE lava ke hoko eni he ʻahó ni? ʻOku lahi ʻa e ngaahi ngāue ʻe lava ke ne toʻo atu hotau taimí. Fakakaukau fekauʻaki mo e ngaahi houa lahi ʻoku fakamoleki ʻi he ngaahi meʻa ʻokú te saiʻia aí, ngāueʻaki ʻa e ngaahi netiueka sōsialé, lau mo tali ʻa e ngaahi pōpoaki fakaʻilekitulōniká, pe vakaiʻi ʻa e ngaahi ongoongo sipoti fakamuimui tahá. Ko ha taha pē ʻo e ngaahi ngāue ko ení ʻe lava ke ne fakahohaʻasi ha Kalisitiane pea fakavaivaiʻi ai ʻene faivelenga kia Sihová. Ko e hā ʻa e olá? Heʻikai nai ke ne toe lotu mei he lotó. ʻE siʻi nai ʻa e taimi te ne toe ngāueʻaki ke ako ʻa e Tohi Tapú, ke ʻalu ki he ngaahi fakatahá, mo malangaʻi ʻa e ongoongo leleí. Ko e hā ʻe lava ke tau fai ke fakaʻehiʻehi ai mei hoko ʻo “ueʻingofua mei heʻetau fakaʻuhingá?

MALUʻI MEI HE HOKO ʻO UEʻINGOFUÁ

13. Hangē ko ia naʻe tomuʻa tala ʻi he Tohi Tapú, ko e hā ʻa e fakakaukau ʻoku maʻu ʻe he kakai tokolahi, pea ko e hā ʻe lava ke ne maluʻi ʻetau tuí?

¹³ Kuo pau ke tau manatuʻi ko e ngataʻanga ʻo e māmani ʻo Sētané ʻoku ofi pea ko e fili ke fakamoleki ʻa e taimi mo e kakai ʻe ʻikai ke nau fakahaaʻi ʻoku tau moʻui ʻi he “ngaahi ʻaho fakaʻosí” ʻe lava ke fakatuʻutāmaki. Naʻe tohi ʻa e ʻapositolo ko Pitá fekauʻaki mo hotau taimí: “ʻE hoko mai . . . ha kau manuki mo ʻenau manukí, ʻo nau hokohoko atu ʻo fakatatau ki heʻenau ngaahi holi ʻanautolú mo nau pehē: ‘Ko fē ʻa ʻene ʻi heni ʻa ia naʻe talaʻofaʻakí? Ko e talu ē mei he ʻaho naʻe mohe ai ʻetau fanga kuí ʻi he maté, ʻoku kei hokohoko atu pē ʻa e kotoa ʻo e ngaahi meʻá ʻo hangē tofu pē ko ia talu mei he kamataʻanga ʻo e fakatupú.’” (2 Pita 3:3, 4) Ko hono lau fakaʻaho ʻa e Tohi Tapú pea ako tuʻu maʻu iá te ne tokoniʻi kitautolu ke manatuʻi ʻoku tau moʻui ʻi he “ngaahi ʻaho fakaʻosí.” Naʻe tomuʻa tala ʻi he Tohi Tapú ko e tafoki ʻo fakafepaki ki he moʻoní naʻe kamata fuoloa ʻaupito ia, pea ʻoku hokohoko mai ia ʻo aʻu ki he ʻahó ni. Ko e “tangata ʻo e maumau-laó” ʻoku nau kei ʻi ai pea fakafepakiʻi ʻa e kau sevāniti ʻa e ʻOtuá. Ko e ngaahi ʻuhinga kotoa ko ení, ʻoku totonu ke ʻoua ʻaupito ʻe ngalo ʻia kitautolu ʻoku ofi ʻa e ʻaho ʻo Sihová.—Sēf. 1:7.

14. ʻE anga-fēfē hono maluʻi kitautolu kapau ʻoku tau femoʻuekina ʻi he ngāue ʻa e ʻOtuá?

¹⁴ Ko e founga ʻe taha ke fakaʻehiʻehi ai mei he hoko ʻo ueʻingofua mei heʻetau fakaʻuhingá ko hono malangaʻi maʻu pē ʻa e ongoongo leleí. Ko ia ʻi he taimi naʻe fekauʻi ai ʻe Kalaisi Sīsū hono kau muimuí ke ngaohi ko e kau ākonga ʻa e kakai ʻo e ngaahi puleʻanga kotoa pē pea akoʻi kinautolu ke talangofua ki he meʻa naʻá ne akoʻí, naʻá ne ʻoange ʻa e faleʻi te ne maluʻi ai hono kau muimuí. (Māt. 28:19, 20) Ke talangofua ki he fekau ko ení, ʻoku fiemaʻu ke tau faivelenga ʻi he ngāue fakamalangá. ʻE lava ke ke sioloto atu ki he fanga tokoua ʻi Tesalonaiká ʻi heʻenau fiemālie ke malanga mo faiako pē koeʻuhi kuo pau ke nau fai ia? Manatuʻi ʻa e meʻa naʻe tohi ʻe Paula kia kinautolú: “ʻOua ʻe taʻofi ʻa e ngāue ʻa e laumālié ʻiate kimoutolú. ʻOua ʻe paetaku ʻa e ngaahi kikité.” (1 Tes. 5:19, 20) Ko e ngaahi kikite ʻoku tau ako mo vahevahe ki he niʻihi kehé ʻoku fakafiefia moʻoni!

15. Ko e hā ʻa e ngaahi meʻa ʻe niʻihi ʻe lava ke tau lāulea ki ai lolotonga ʻa e lotu fakafāmilí?

¹⁵ ʻOku tau fiemaʻu ke tokoniʻi hotau ngaahi fāmilí ke nau fakalakalaka ʻi he tuʻunga ko e kau malangaʻi ʻo e ongoongo leleí. Ke fai ení, ʻoku ngāueʻaki ʻe he fanga tokoua mo e fanga tuofāfine tokolahi ha konga ʻenau lotu fakafāmilí ke ʻahiʻahiʻi ha meʻa ki he ngāue fakafaifekaú. Mahalo pē ʻe lava ke ke teuteu ke fai ha ngaahi toe ʻaʻahi. Ko e hā ʻokú ke palani ke talanoa ki aí? Ko e hā ʻe lava ke ke leaʻaki ʻa ia te ne ʻai ʻa e tokotaha-ʻapí ke ne fie ako lahi angé? Ko e hā ʻa e taimi lelei taha ke toe ʻaʻahi aí? ʻOku toe ngāueʻaki ʻe he tokolahi ha konga ʻo ʻenau lotu fakafāmilí ke teuteu ki he ngaahi fakatahá. ʻE lava ke fai ia ʻe ho fāmilí? Kapau te ke kau ʻi he ngaahi fakatahá, ʻe fakaivimālohiʻi ai hoʻo tuí, mo tokoniʻi koe ʻe he meʻá ni ke ke fakaʻehiʻehi mei he hoko ʻo ueʻingofua mei hoʻo fakaʻuhingá. (Saame 35:18) ʻE maluʻi kitautolu ʻe he lotu fakafāmilí mei hono mateʻi ʻa e ngaahi meʻa ʻoku ʻikai fakamatalaʻi ʻi he Tohi Tapú pea mo e veiveiuá.

16. Ko e hā ʻokú ne ueʻi ʻa e kau Kalisitiane paní ke fakaʻehiʻehi mei he hoko ʻo ueʻingofua mei heʻenau fakaʻuhingá?

¹⁶ Kuo tāpuakiʻi ʻe Sihova hono kakaí ʻi he faai mai ʻa e ngaahi taʻú ʻaki ʻa e mahino lahi ange fekauʻaki mo e kikite Fakatohitapú. ʻOku ʻai ai heni ke tau falala-pau te tau maʻu ha pale fakaofo ʻi he kahaʻú. ʻOku fakatuʻotuʻa atu ʻa e kau paní ke fakataha mo Kalaisi ʻi hēvani. Ko e moʻoni ko e ʻamanaki ko ení ʻoku ueʻi ai kinautolu ke fakaʻehiʻehi mei he hoko ʻo ueʻingofua mei heʻenau fakaʻuhingá! Ko e meʻa naʻe tohi ʻe Paula ki he kau Tesalonaiká ʻoku ngāueʻaki ia ki he kau paní he ʻahó ni: “ʻOku mau moʻuaʻaki maʻu pē ke fakamālō ki he ʻOtuá koeʻuhi ko kimoutolu, fanga tokoua ʻoku ʻofaʻi ʻe Sihova, koeʻuhí naʻe fili kimoutolu ʻe he ʻOtuá . . . ʻaki hono fakamāʻoniʻoniʻi kimoutolu ʻaki hono laumālié pea ʻaki hoʻomou tui ki he moʻoní.”—2 Tes. 2:13.

17. ʻOku anga-fēfē hono fakalototoʻaʻi koe ʻe he meʻa ʻoku hiki ʻi he 2 Tesalonaika 3:1-5?

¹⁷ Ko e faʻahinga ʻoku nau fakatuʻotuʻa atu ke moʻui taʻengata ʻi he māmaní ʻoku totonu ke nau fai honau lelei tahá ke fakaʻehiʻehi mei he hoko ʻo ueʻingofua mei heʻenau fakaʻuhingá, ʻo hangē pē ko e kau paní. Kapau ʻokú ke ʻamanaki ke moʻui taʻengata ʻi he māmaní, talangofua maʻu pē ki he fakalototoʻa anga-ʻofa ʻa Paula ki he kau Kalisitiane pani ʻi Tesalonaiká. (Lau ʻa e 2 Tesalonaika 3:1-5.) ʻOku totonu ke tau houngaʻia ʻi he ngaahi lea anga-ʻofa ko ení. Ko e ongo tohi ki he kau Tesalonaiká ʻoku fakatokanga mai ai kia kitautolu fekauʻaki mo hono mateʻi ʻa e ngaahi meʻa ʻoku ʻikai fakamatalaʻi ʻi he Tohi Tapú mo tui ki he ngaahi fakakaukau ʻoku ala fehuʻiá. Koeʻuhí ʻoku tau moʻui ʻo ofi ʻaupito ki he ngataʻangá, ʻoku tau houngaʻia lahi ʻi he ngaahi fakatokanga ko ení.

[Fakamatala ʻi lalo]

[Fakatātā ʻi he peesi 6]

[Fakatātā ʻi he peesi 7]

Ko e ngaahi tohi ʻa Paulá naʻe ʻoatu ai ʻa e ngaahi fakatokanga feʻungamālie ki he kau Kalisitiané (Sio ki he palakalafi 4, 5)

[Fakatātā ʻi he peesi 10]

Ko e teuteu leleí mo hono malangaʻi ʻa e ongoongo leleí ʻe lava ke ne tokoniʻi kitautolu ke fakaʻehiʻehi mei he hoko ʻo ueʻingofua mei heʻetau fakaʻuhingá (Sio ki he palakalafi 14, 15)