Naʻe Fōtunga Fēfē Koā ʻa Sīsū?

ʻOku ʻikai ha taha te ne maʻu ha laʻitā ʻo Sīsū. Naʻe ʻikai ʻaupito te ne tuʻu kae tā valivali ia pe tā hano maka fakamanatu. Ka, kuó ne hā ʻi he ngaahi tā valivali ʻa e kau ʻaati taʻefaʻalaua ʻi he faai mai ʻa e ngaahi senitulí.

Ko hono moʻoní, naʻe ʻikai ʻilo ʻe he kau ʻaati ko iá pe naʻe fōtunga fēfē koā ʻa Sīsū. Ko e ngaahi anga fakafonua lahi tahá, ngaahi tui fakalotu mo e ngaahi fiemaʻu ʻa e kau kasitomaá, naʻa nau faʻa puleʻi ʻa e anga hono tā valivali ʻe he kau ʻātí ʻa Sīsuú. Neongo ia, ko ʻenau tā valivalí naʻe lava ke ne tākiekina, pea aʻu ʻo ne fakanenefuʻi ʻa e vakai ʻa e kakaí kia Sīsū mo ʻene akonakí.

Naʻe tā valivali ʻe ha kau ʻaati ʻe niʻihi ʻa Sīsū ko ha tokotaha ngāvaivai mo ʻulu loloa pea kava nonou pe fakamamafaʻi ʻa ʻene hā mata mamahí. ʻI ha ngaahi tā valivali kehe, ʻoku hā ai ʻa Sīsū ko ha tokotaha ʻoku mahulu hake ia ʻi natula, pea takatakai ki ai ha maama ngingila, pe makehe ia mei he faʻahinga takatakai ʻiate iá. ʻOku fakahaaʻi totonu ʻe he ngaahi ʻata peheé ʻa Sīsū? ʻE lava fēfē ke tau ʻilo ia? Ko e founga ʻe taha ko hono sivisiviʻi ʻa e ngaahi fakamatala ʻi he Tohi Tapú ʻa ia ʻoku lava ke ne tokoniʻi kitautolu ke tau mahinoʻi pe naʻe fōtunga fēfē ʻa Sīsū. ʻE lava foki ke nau tokoniʻi kitautolu ke tau maʻu ha vakai totonu kiate ia.

Ko e lea ia naʻe leaʻaki nai ʻe Sīsū ʻi hono papitaiso iá. (Hepelū 10:5; Mātiu 3:13-17) Naʻe fēfē ʻa e sino ko iá? ʻI he taʻu ʻe 30 ki muʻá, naʻe fakahaaʻi ai ʻe he ʻāngelo ko Kepalelí kia Mele: “Te ke hoko ʻo feitama pea te ke fāʻeleʻi mai ha tama tangata . . . ko e ʻAlo ʻo e ʻOtuá.” (Luke 1:31, 35) Ko ia, ko ha tangata haohaoa ʻa Sīsū, hangē ko ʻĀtama ʻi hono fakatupú. (Luke 3:38; 1 Kolinitō 15:45) ʻOku pau pē ko ha tangata naʻe matamata lelei ʻa Sīsū, pea naʻá ne maʻu nai ha ngaahi tafaʻaki meimei tatau mo ʻene faʻē Siu ko Melé.

Naʻe kava ʻa Sīsū, hangē ko ia naʻe angaʻaki ʻe he kau Siú ʻo nau kehe ai mei he kau Lomá. Ko e kava peheé ko ha fakaʻilonga ʻo e ngeia mo e anga-fakaʻapaʻapa; naʻe ʻikai ke loloa mo tuku taʻetauhi. ʻOku ʻikai ha veiveiua naʻe tokangaʻi pe kosikosi ʻe Sīsū hono kavá mo kosi fakalelei hono ʻulú. Ko e faʻahinga pē naʻe fakamavaheʻi ko e kau Nāsilí, hangē ko Samisoní, naʻe ʻikai ke kosi honau ʻulú.​—Nōmipa 6:5; Fakamaau 13:5.

Ko e tafaʻaki lelei ʻo e taʻu ʻe 30, naʻe hoko ʻa Sīsū ko ha tufunga, ʻo ngāue ʻo ʻikai ʻaki ʻa e ngaahi meʻangāue lelei fakaeonopōní. (Maʻake 6:3) Ko ia ai, kuo pau pē naʻá ne sino kaukaua. ʻI he kamata ʻo ʻene ngāue fakafaifekaú, ko ia toko taha pē naʻá ne “seʻe kotoa kinautolu ki tuʻa fakataha mo ʻenau fanga sipí mo e fanga pulú mei he temipalé, pea naʻá ne huhua ʻa e ngaahi koini ʻa e kau fakafetongi paʻangá pea fulihi mo ʻenau ngaahi tēpilé.” (Sione 2:14-17) ʻOku fiemaʻu ha tangata kaukaua mo sino mālohi ki hono fai iá. Naʻe ngāueʻaki ʻe Sīsū ʻa e sino naʻe teuteu moʻona ʻe he ʻOtuá ke fakahokoʻaki hono ngafa naʻe ʻoange ʻe he ʻOtuá: “Kuo pau foki ke u talaki ʻa e ongoongo lelei ʻo e Puleʻanga ʻo e ʻOtuá ki he ngaahi kolo kehé, koeʻuhi ko e meʻa ʻeni naʻe fekauʻi mai ai aú.” (Luke 4:43) Naʻe fiemaʻu ʻa e ivi makehe atu ke ne ʻalu lalo ai ʻi he kotoa ʻo Pālesitainé mo talaki ʻa e pōpoaki ko ení.

Ko e fōtunga loto-māfana mo e ʻulungaanga fakamānako ʻa Sīsuú kuo pau naʻá ne ʻai ʻa e fakaafe ko ení ke fakamānako tautefito ki he faʻahinga naʻe “ongosia mo mafasiá.” (Mātiu 11:28-30) Ko ʻene loto-māfana mo anga-leleí naʻá ne fakamamafaʻi ʻene talaʻofa ʻo e fakaivifoʻoú ki he faʻahinga ʻoku loto-lelei ke ako meiate iá. Naʻa mo e fānau īkí naʻa nau loto ke ofi kia Sīsū, he ʻoku pehē ʻe he Tohi Tapú: “Naʻá ne puke mai ʻa e fānaú.”​—Maʻake 10:13-16.

Neongo naʻe hokosia ʻe Sīsū ʻa e langa lahi ki muʻa ke ne pekiá, naʻe ʻikai ko ha tokotaha faʻa loto-mamahi ia. Ko e fakatātaá, naʻá ne tokoni ki he fakafiefia ʻo ha kātoanga mali ʻi Kena ʻaki hono liliu ʻa e vaí ko ha uaine lelei. (Sione 2:1-11) ʻI ha ngaahi fakatahataha kehe naʻá ne akoʻi ai ha ngaahi lēsoni heʻikai ʻaupito ngalo.​—Mātiu 9:9-13; Sione 12:1-8.

Hiliō ai, naʻe ʻai ʻe he ngāue fakamalanga ʻa Sīsuú ke ala maʻu ʻe he kau fanongó ʻa e ʻamanaki fakafiefia ki he moʻui taʻengatá. (Sione 11:25, 26; 17:3) ʻI hono fakamatala ange ʻe heʻene kau ākonga ʻe toko 70 ʻenau ngaahi hokosia ʻi he ngāue fakamalangá, naʻá ne hoko ʻo “fiefia lahi” peá ne kalanga: “Mou fiefia koeʻuhi kuo tohi homou hingoá ʻi he langí.”​—Luke 10:20, 21.

Ko e kau taki lotu ʻi he taimi ʻo Sīsuú naʻá nau filioʻi ha founga ke tohoakiʻi ange ai ʻa e tokangá mo fakamamafaʻi honau mafaí. (Nōmipa 15:38-40; Mātiu 23:5-7) ʻI he ʻikai hangē ko kinautolú, naʻe akoʻi ʻe Sīsū ʻene kau ʻapositoló ke ʻoua te nau “puleʻi holo” ʻa e niʻihi kehé. (Luke 22:25, 26) Ko hono moʻoní, naʻe fakatokanga ʻa Sīsū: “Tokanga telia ʻa e kau sikalaipé ʻa ia ʻoku nau saiʻia ke lue holo mo e ngaahi kofu tōtōlofá pea nau saiʻia ʻi he ngaahi fakafeʻiloaki ʻoku fai ange ʻi he ngaahi feituʻu faiʻanga fakataú.”​—Maʻake 12:38.

ʻI hono kehé, naʻe huluni holo pē ʻa Sīsū ia ʻi he kakaí, ʻo ʻikai fakatokangaʻi ia. (Sione 7:10, 11) Naʻa mo e lotolotonga ʻo ʻene kau ʻapositolo faitōnunga ʻe toko 11, naʻe ʻikai te ne hā makehe. Naʻe ngāueʻaki ʻe he tokotaha lavaki ko Siutasí ʻa e ʻumá, ko “ha fakaʻilonga naʻa nau felotoi ki ai,” ke fakapapauʻiʻaki ʻa Sīsū ki he fuʻu kakai fakamoveuveú.​—Maʻake 14:44, 45.

Ko ia, neongo ʻoku ʻikai ʻiloʻi ʻa e ngaahi fakaikiiki lahi, ʻoku hā mahino naʻe ʻikai hangē ʻa Sīsū ia ko e founga kuo fakahaaʻiʻakí. Kae kehe, ko e meʻa ʻoku mahuʻinga angé ko e anga ʻetau vakai kiate ia ʻi he taimi ní, kae ʻikai ko e fakakaukau atu pe naʻá ne fōtunga fēfē koā.

ʻI he ʻaho naʻe leaʻaki ai ʻe Sīsū ʻa e lea ko iá, naʻá ne pekia pea tanu. (Sione 14:19) Naʻá ne foaki ʻene moʻuí “ko ha huhuʻi ko e fetongi ʻo e tokolahi.” (Mātiu 20:28) ʻI he ʻaho hono tolú, naʻe fokotuʻu hake ia ʻe he ʻOtuá “ʻi he laumālie” pea “fakaʻatā ia ke ne hā takai holo” ki he niʻihi ʻo ʻene kau ākongá. (1 Pita 3:18; Ngāue 10:40) Naʻe fōtunga fēfē ʻa Sīsū ʻi heʻene hā ki heʻene kau ākongá ʻi he taimi ko iá? ʻOku hā mahino naʻe kehe ʻaupito ia mei hono ʻuluaki fōtungá, he naʻa mo hono kaungāfeohi ofi tahá naʻe ʻikai te nau fakatokangaʻi vave ia. Naʻe pehē ʻe Mele Makitaline ko e tauhi ngoué ia; pea naʻe pehē ʻe he ongo ākonga ʻi he hala ki ʻEmeasí, ko ha sola ia.​—Luke 24:13-18; Sione 20:1, 14, 15.

ʻOku totonu ke fēfē ʻetau vakai kia Sīsū ʻi he ʻaho ní? Hili ʻa e taʻu ʻe 60 mei he pekia ʻa Sīsuú, naʻe sio ʻa e ʻapositolo ʻofeina ko Sioné ʻi ha ngaahi vīsone ʻo fekauʻaki mo Sīsū. Naʻe ʻikai sio ʻa Sione ia ko ha taha ʻoku meimei mate ʻi ha kolosi. Ka, naʻá ne sio ki he “Tuʻi ʻo e ngaahi tuʻi mo e ʻEiki ʻo e ngaahi ʻeiki,” ʻa e Tuʻi ʻo e Puleʻanga ʻo e ʻOtuá, ʻa ia kuo vavé ni ke ne ikunaʻi ʻa e ngaahi fili fakatēmeniō mo e ngaahi fili fakaetangata ʻo e ʻOtuá, pea ʻomai ʻa e tāpuaki taʻengata ki he faʻahinga ʻo e tangatá.​—Fakahā 19:16; 21:3, 4.