LĒSONI 6

ʻOku Anga-Fēfē ʻEmau Maʻu ʻAonga mei he Feohi mo e Ngaahi Kaungā-Kalisitiané?

Feohi ‘a e Kau Fakamo‘oni ‘a Sihová mo e kaungātuí — Matakesikā

Tokoni‘i ‘e he taha ‘o e Kau Fakamo‘oni ‘a Sihová ha kaungā-Kalisitiane — Noaue

‘A‘ahi ‘a e kau mātu‘a Kalisitiané ki ha kaungātui — Lepanoni

Feohi fakataha ‘a e Kau Fakamo‘oni ‘a Sihová — ʻĪtali

Neongo kapau ʻoku fiemaʻu ke mau fononga ʻo fou ʻi ha vaotā fihi lahi, pe fai ha fononga neongo ʻa e kovi ʻa e ʻeá, ʻoku mau maʻu maʻu pē ʻemau ngaahi fakataha faka-Kalisitiané. Neongo ʻa e ngaahi faingataʻa ʻo e moʻuí mo e helaʻia hili e ngāue ʻo e ʻahó, ko e hā ʻoku fai ai ʻe he Kau Fakamoʻoni ʻa Sihová ha feinga pehē ke feohi mo e ngaahi kaungātuí?

ʻOku lelei ia ki heʻemau moʻuí. “Ke tau fetokangaʻaki,” ko e tohi ia ʻa Paulá, ʻi heʻene lea fekauʻaki mo e faʻahinga ʻoku tau feohi mo ia ʻi he fakatahaʻangá. (Hepelū 10:24) ʻOku ʻuhinga ʻa e kupuʻi lea ko ení “ke fakakaukau fakalelei,” ʻa ia, ko e feinga ke feʻilongaki. Ko ia ko e ngaahi lea ʻa e ʻapositoló ʻoku fakalototoʻaʻi ai kimautolu ke mau tokanga fekauʻaki mo e niʻihi kehé. ʻI he feinga ke ʻilo ʻa e ngaahi fāmili Kalisitiane kehé, ʻoku mau ʻilo ai ko e niʻihi ʻo kinautolu kuo nau ikuʻi lavameʻa ʻa e ngaahi faingataʻa meimei tatau mo haʻamautolú pea ʻoku lava ke nau tokoniʻi kimautolu ke mau toe lavameʻa foki.

ʻOku langa hake ai ʻa e ngaahi kaungāmeʻa tuʻuloa. ʻI heʻemau ngaahi fakatahá, ʻoku mau fakatahataha fakataha, ʻo ʻikai mo e ngaahi mahení pē, ka ko ha kulupu ʻo e ngaahi kaungāmeʻa ofi. ʻI he ngaahi taimi kehé, ʻoku mau fakamoleki fakataha ai ʻa e taimi ʻi ha fakafiefia lelei. Ko e hā e ʻaonga ʻoku maʻu ʻi he feohi peheé? ʻOku mau ako ai ke fehoungaʻiaʻaki lahi ange, pea ʻoku ʻai ai ke mālohi ʻa e haʻi ʻo ʻemau ʻofá. ʻI he taimi leva ʻoku fehangahangai ai homau ngaahi kaungāmeʻá mo e ngaahi palopalemá, ʻoku mau loto-lelei ke tokoniʻi kinautolu koeʻuhí kuo ʻosi fokotuʻu ʻa e ngaahi kaungāmeʻa mālohi. (Palōveepi 17:17) ʻI he feohi mo e mēmipa kotoa pē ʻo ʻemau fakatahaʻangá, ʻoku mau fakahaaʻi ai ʻoku mau “tauʻaki fetokangaʻaki.”—1 Kolinitō 12:25, 26.

ʻOku mau fakalototoʻaʻi atu ke ke fili ko ho ngaahi kaungāmeʻa ʻa e faʻahinga ko ē ʻoku nau fai ʻa e finangalo ʻo e ʻOtuá. Te ke maʻu ʻa e ngaahi kaungāmeʻa peheé ʻi he haʻohaʻonga ʻo e Kau Fakamoʻoni ʻa Sihová. Kātaki ʻo ʻoua ʻe fakaʻatā ha meʻa ke ne taʻofi koe mei hoʻo feohi mo kimautolú.

Ko e hā ʻoku ʻaonga ai kiate kitautolu ke feohi fakataha ʻi he ngaahi fakatahá?
Ko e taimi fē te ke saiʻia ai ke hoko ʻo maheni mo ʻemau fakatahaʻangá?