Fakaʻaiʻai ki he ʻOfá mo e Ngaahi Ngāue Leleí—ʻo Anga-Fēfē?

“Ke tau fetokangaʻaki, ke fefakaʻaiʻaiʻaki ʻa kitautolu ki he feʻofaʻaki mo e ngaue lelei: . . . mou feenginakiʻaki [“fefakalototoʻaʻaki,” NW], pea ʻasili he ʻoku mou sio ki he fakaofiofi mai ʻa e ʻaho.”​—HEPELŪ 10:​24, 25.

 1, 2. (a) Ko e hā naʻe mahuʻinga ai ki he muʻaki kau Kalisitiané ke nau maʻu ʻa e fiemālie mo e fakalototoʻa mei heʻenau fakataha fakatahatahá? (e) Ko e hā ʻa e enginaki ʻa Paula ki he fiemaʻu ʻa e fakataha fakatahatahá?

NAʻA nau feʻiloaki fakapulipuli mo feʻefiʻefihi fakatahataha pē ʻi loto kae lokaʻi ʻa e ngaahi matapā. Ko e fakatuʻutāmakí naʻe ʻi he feituʻu kotoa pē ʻi tuʻa. Ko honau taki, ʻa Sīsū, naʻe toki tāmateʻi fakahāhā ia, pea naʻá ne ʻosi fakatokanga ki hono kau muimuí ʻe ʻikai ke toe lelei ange ʻa e meʻa ʻe fai kiate kinautolú. (Sione 15:20; 20:19) Ka ʻi heʻenau fefanafanahi ʻo kau kia Sīsū naʻa nau ʻofa aí, ʻoku pau ko ʻenau fakataha fakatahatahá naʻá ne ʻai ke nau ongoʻi malu ange ai.

² Pea ʻi he ʻosi atu ʻa e ngaahi taʻú, naʻe fehangahangai ʻa e kau Kalisitiané mo e faʻahinga ʻahiʻahi mo e fakatanga kotoa pē. Naʻa nau maʻu ʻa e fiemālie mo e fakalototoʻa mei heʻenau fakataha fakatahatahá, ʻo hangē ko e ʻuluaki kau ākongá. Ko ia, naʻe tohi ʻe he ʻaposetolo ko Paulá ʻi he Hepelū 10:​24, 25: “Ke tau fetokangaʻaki, ke fefakaʻaiʻaiʻaki ʻa kitautolu ki he feʻofaʻaki mo e ngaue lelei: ʻo ʻoua naʻa tau liʻaki ʻetau ngaahi fakataha, ʻo hange ko e anga ʻo e niʻihi; ka mou feenginakiʻaki [“fefakalototoʻaʻaki,” NW], pea ʻasili he ʻoku mou sio ki he fakaofiofi mai ʻa e ʻaho.”

 3. Ko e hā te ke pehē ai ko e Hepelū 10:​24, 25 ʻoku lahi ange ʻa hono ʻuhinga ʻi ha fekau pē ki he kau Kalisitiané ke nau fakataha fakatahatahá?

³ Ko e ngaahi lea ko iá ʻoku lahi ange ʻa hono ʻuhingá ʻi ha fekau pē ke hokohoko atu ʻa e fakataha fakatahatahá. ʻOku ʻomai ai ʻa e ngaahi tuʻunga fakamānavaʻi ʻa e ʻOtuá ki he ngaahi fakataha kotoa pē ʻa e Kalisitiané​—ko e moʻoni, ʻi ha tuʻunga pē ʻoku feohi fakataha ai ʻa e kau Kalisitiané. ʻI he ʻahó ni ʻoku lahi ange ia ʻi ha toe taimi ki muʻa, ʻi heʻetau ʻilo lelei ʻoku ofi mai ʻa e ʻaho ʻo Sihová, ko e ngaahi fakaʻaiʻai mo e ngaahi fakatuʻutāmaki ʻo e fokotuʻutuʻu fulikivanu ko ʻení ʻokú ne ʻai ke mahuʻinga ʻa ʻetau ngaahi fakatahá ʻo hangē ha taulanga ū, ko ha maʻuʻanga ʻo e ivimālohi mo e fakalototoʻa ki he tokotaha kotoa pē. Ko e hā ʻoku lava ke tau fai ke fakapapauʻi ai ʻa e meʻá ni? Tau sivisiviʻi tokanga ange ʻa e ngaahi lea ʻa Paulá, pea ʻeke ʻa e ngaahi fehuʻi mahuʻinga ʻe tolu: Ko e hā ʻa e ʻuhinga ke “fetokangaʻaki”? Ko e hā ʻa e ʻuhinga ke ‘fefakaʻaiʻaiʻaki ki he feʻofaʻaki mo e ngāue lelei’? Fakaʻosí, ʻoku anga-fēfē ke tau “fefakalototoʻaʻaki” ʻi he ngaahi taimi faingataʻá ni?

“Fetokangaʻaki”

 4. Ko e hā ʻa e ʻuhinga ke “fetokangaʻaki”?

⁴ ʻI he naʻinaʻi ʻe Paula ki he kau Kalisitiané ke nau “fetokangaʻaki,” naʻá ne ngāueʻaki ʻa e veape faka-Kalisi ko e ka·ta·no·eʹo, ko hono tuʻungá ʻoku toe mālohi ange ia ʻi he lea anga-mahení “ke ʻiloʻi.” ʻOku pehē ʻe he Theological Dictionary of the New Testament ʻoku ʻuhingá “ke fakahanga kakato ʻa e fakakaukau ʻa ha tokotaha ki ha meʻa.” Fakatatau kia W. E. Vine, ʻoku toe lava ʻo ʻuhinga “ke maʻu ʻa e mahino fakaʻaufuli, fakatokanga lelei ʻaupito.” Ko ia ʻi he “fetokangaʻaki” ʻa e kau Kalisitiané, ʻoku ʻikai ngata pē ʻa ʻenau sio ki he meʻa ʻoku hā maí ka ʻoku nau ngāueʻaki ʻa ʻenau ngaahi malava fakaefakakaukaú hono kotoa mo feinga ke maʻu ʻa e mahino ʻoku loloto angé.​—Fakafehoanaki mo Hepelū 3:1.

 5. Ko e hā ʻa e ngaahi tafaʻaki ʻe niʻihi ʻoku ʻikai hā mai ia mei ha tokotaha, pea ko e hā ʻoku totonu ke tau tokanga ai ki aí?

⁵ ʻOku fiemaʻu ke tau manatuʻi ʻoku lahi ange ʻa e meʻa ʻoku kaunga ki ha taha ʻi he meʻa ʻoku hā mai ʻi hono fōtungá, ngaahi ngāué, pe ʻulungaangá. (1 Sāmiuela 16:7) ʻOku faʻa anga-fakalongolongo pē ha taha ʻo puli ai ʻa e ngaahi ongoʻi loloto pe fakakata mālie ʻaupito ʻokú ne maʻu. Ko ia, ko e ngaahi tupuʻangá ʻoku faikehekehe lahi ʻaupito. Ko e niʻihi kuo nau fou mai ʻi he ngaahi ʻahiʻahi fakamamahi fakamanavahē ʻi heʻenau moʻuí; ko e niʻihi kehe ʻoku nau lolotonga kātekina ʻa e ngaahi tuʻunga ʻe faingataʻa ke tau fakakaukau ki ai. ʻOku faʻa hoko maʻu pē ʻa e ʻosi atu ʻo ʻetau ʻita ʻi ha fāliunga ʻa hotau tokouá pe tuofefiné ʻi he lahi ange ʻa ʻetau ʻilo ʻo fekauʻaki mo honau tupuʻanga mo e ngaahi tuʻunga ʻo e tokotaha ko iá.​—Palōvepi 19:11.

 6. Ko e hā ʻa e ngaahi founga ʻe lava ke tau feʻilongaki lelei ange ai, pea ko e hā ʻa e ola lelei nai ʻe hoko aí?

⁶ Ko e moʻoni, ʻoku ʻikai ke ʻuhinga ʻeni iá ke tau kaunoaʻia ʻi he ngaahi meʻa fakafoʻituitui ʻa e niʻihi kehé. (1 Tesalonaika 4:11) Ka ʻoku kei lava pē ke tau fakahā ʻa e femahuʻingaʻiaʻakí. ʻOku lahi ange ʻa e meʻa ʻoku kau ki ai ʻi he lea fakafeʻiloaki pē ʻi he Kingdom Hall. Fēfē ke ke fili ha tokotaha ʻokú ke loto ke sai ange ʻa hoʻo ʻilo ki aí mo fakataumuʻa ki ha fetalanoaʻaki ʻi ha ngaahi miniti siʻi ki muʻa pe ko e ʻosi ʻa e fakatahá? ʻE ʻaonga lahi ange ke “nofo ki he fakaafe ʻāunofo” ʻaki hono fakaafeʻi ha kaumeʻa ʻe toko taha pe toko ua ki ho ʻapí ki ha maʻu meʻatokoni maʻamaʻa pē. (Loma 12:13) Fakahā ʻa e mahuʻingaʻiá. Fakafanongo. ʻE lahi ʻa e meʻa ʻe hā mai ʻi hono ʻeke ʻa e anga ʻo ʻene hoko ʻo ʻilo mo ʻofa kia Sihová. Ka neongo ia, ʻe kei lahi ange ʻa e meʻa te ke ʻiló ʻi he ngāue fakataha mo ia ʻi he ngāue fakamalanga ʻi he fale ki he falé. Ko e fetokangaʻaki ʻi he ngaahi founga peheé ʻe tokoni ia kiate kitautolu ke fakatupulekina ʻa e kaungāongoʻi moʻoní, pe femahinoʻakí.​—Filipai 2:4; 1 Pita 3:8.

“Fefakaʻaiʻaiʻaki”

 7. (a) Naʻe anga-fēfē ʻa hono ueʻi ʻe he faiako ʻa Sīsuú ʻa e kakaí? (e) Ko e hā naʻá ne ʻai ʻene founga faiakó ʻo fuʻu ivimālohí?

⁷ ʻI heʻetau fetokangaʻakí, ʻoku tau mateuteu lelei ange ai ke fakaʻaiʻai, ke fenaʻinaʻiʻaki ke fai ha ngāue. ʻOku kaunga fakatautautefito ki he kau mātuʻa Kalisitiané ʻa e tafaʻaki ko ʻeni. ʻOku tau lau ʻo fekauʻaki mo e taimi naʻe lea ai ʻa Sīsū ki he kakaí: “Naʻe toʻoa ʻa e kakai ʻi heʻene fai: he ko e anga o ʻene faiako.” (Mātiu 7:28) Naʻa mo ha kau sōtia ʻi he taimi ʻe taha naʻe fekau ke puke iá naʻa nau ʻalu meia Sīsū mo pehē: “ʻA, teʻeki ha tangata ʻe lea hange ko ia.” (Sione 7:46) Ko e hā naʻá ne ʻai ʻa e founga faiako ʻa Sīsū ʻo fuʻu ivimālohí? Ngaahi fakahāhā ʻo e māfanangofua? ʻIkai; naʻe lea ʻa Sīsū ia mo ne tokaʻi. Ka, naʻá ne fakataumuʻa maʻu ai pē ke aʻu ki he loto ʻo ʻene kau fanongó. Koeʻuhi he naʻá ne tokanga ki he kakaí, naʻá ne ʻilo lelei pē ʻa e anga ʻo hono ueʻi kinautolú. Naʻá ne ngāueʻaki ʻa e ngaahi talanoa fakatātā maeʻeeʻa lelei mo faingofua ʻa ia naʻe hā mei ai ʻa e ngaahi moʻoniʻi meʻa ʻo e moʻui fakaʻahó. (Mātiu 13:34) ʻOku meimei tatau pē mo kinautolu ʻoku nau fakahoko ʻa e ngaahi konga ʻi heʻetau ngaahi fakatahá ʻoku totonu ke nau faʻifaʻitaki kia Sīsū ʻaki hono fai ha ngaahi fakamatala māfana, faivelenga mo fakatupu ueʻi lotó. ʻOku lava ke tau feinga ke kumi ha ngaahi talanoa fakatātā ʻe feʻunga mo ʻetau kau fanongó mo aʻu ki honau lotó, ʻo hangē ko Sīsuú.

 8. Naʻe anga-fēfē ʻa e fakaʻaiʻai ʻe Sīsū ʻaki ʻa e faʻifaʻitakiʻangá, pea ʻe anga-fēfē ke tau faʻifaʻitaki ki ai ʻi he tafaʻaki ko ʻení?

⁸ ʻI he tauhi ki hotau ʻOtuá, ko kitautolu hono kotoa pē ʻoku lava ke tau fefakaʻaiʻaiʻaki ʻi he faʻifaʻitakiʻangá. Naʻe fakaʻaiʻai moʻoni ʻe Sīsū ʻa ʻene kau fanongó. Naʻá ne ʻofa ki he ngāue fakamalanga faka-Kalisitiané mo fakahīkihikiʻi ʻa e ngāue fakamalangá. Naʻá ne pehē naʻe hangē ko ha meʻakai ia kiate ia. (Sione 4:34; Loma 11:13) Ko e faivelenga peheé ʻoku lava ke pipihi. ʻOku lava ke ke pehē ʻo fakahā ʻa hoʻo fiefia ʻi he ngāue fakamalangá? Fakahā ʻa e ngaahi meʻa lelei naʻá ke hokosiá ki he niʻihi kehe ʻi he fakatahaʻangá, kae fakaʻehiʻehi mei he lea pōlepolé. ʻI hoʻo fakaafeʻi ʻa e niʻihi kehé ke mou ngāué, vakai ange pē ʻe lava ke ke tokoni kiate kinautolu ke nau maʻu ʻa e fiefia moʻoní ʻi he talanoa ki he niʻihi kehé ʻo fekauʻaki mo hotau Tokotaha-Fakatupu Maʻongoʻonga, ko Sihová.​—Palōvepi 25:25.

 9. (a) Ko e hā ʻa e ngaahi founga ʻe niʻihi ʻo e fakaʻaiʻai ʻa e niʻihi kehé te tau loto ke fakaʻehiʻehi mei ai, pea ko e hā ʻa hono ʻuhingá? (e) Ko e hā ʻoku totonu ke ne ueʻi kitautolu ke foaki atu kitautolu ki he ngāue ʻa Sihová?

⁹ Kae tokanga ke ʻoua ʻe fakaʻaiʻai ʻa e niʻihi kehe ʻi he founga halá. ʻOku hangē ko ʻení, te tau matavalea nai ʻo ʻai kinautolu ke nau ongoʻi halaia ʻo fekauʻaki mo e ʻikai ngāue ke lahi ange. Te tau fakamāʻi taʻefakakaukauʻi nai kinautolu ʻaki ʻa hono fakafehoanaki taʻefakaʻatuʻi kinautolu mo e niʻihi kehé ʻa ia ʻoku lahi ange ʻa ʻenau kau ki he ngaahi ngāue faka-Kalisitiané, pe te tau fokotuʻu nai ha ngaahi tuʻunga fefeka mo fakasiʻisiʻia kinautolu ʻoku ʻikai te nau aʻusiá. Ko ha taha ʻi he ngaahi founga ko ʻení ʻe ueʻi nai ai ha niʻihi ke fai ha ngāue ʻi ha vahaʻa taimi, ka naʻe ʻikai ke tohi ʻa Paulá, ke ‘Fakaʻaiʻai ke halaia mo e ngaahi ngāue lelei.’ ʻIkai, ʻoku pau ke tau fakaʻaiʻai ke ʻofa, pea ko e ngaahi ngāué ʻe fakahoko ia ʻi he ʻuhinga lelei. ʻOku ʻikai ke totonu ki ha tokotaha ke ueʻi fakatefito ia ʻe he tokanga pe ko e hā ʻa e fakakaukau ʻa e niʻihi kehe ʻi he fakatahaʻangá ʻo fekauʻaki mo iá kapau ʻoku ʻikai ke feʻunga ia mo e ngaahi ʻamanakí.​—Fakafehoanaki mo 2 Kolinitō 9:​6, 7.

10. Ko e hā ʻoku totonu ai ke tau manatuʻi ʻoku ʻikai te tau pule ki he tui ʻa e niʻihi kehé?

¹⁰ ʻOku ʻikai ko e ʻuhinga ʻo e fefakaʻaiʻaiʻakí ia ko e fepuleʻiʻaki. Neongo naʻe lahi ʻa e mafai naʻe ʻoange ʻe he ʻOtuá, ka naʻe fakamanatu anga-fakatōkilalo ʻe he ʻaposetolo ko Paulá ki he fakatahaʻanga Kolinitoó: ‘Oku ikai ke mau buleʻi hoo mou tui.’ (2 Kolinitō 1:​24, PM) Kapau te tau hangē ko iá ʻo anga-fakatōkilalo foki ʻo ʻiloʻi ʻoku ʻikai ko hotau fatongiá ke fakapapauʻi ʻa e lahi ʻoku totonu ke fai ʻe he niʻihi kehe ʻi he ngāue kia Sihová, pe ke tau fai maʻanautolu ʻa e fakatonutonu ʻa honau konisēnisí ʻi heʻenau ngaahi fili fakafoʻituitui kehé, te tau fakaʻehiʻehi mei he hoko ʻo “maʻoniʻoni fau,” ʻikai ke fiefia, ngaofengataʻa, taʻepau, pe fakakaukau pē ki he lao. (Koheleti 7:16) ʻOku ʻikai ke fakaʻaiʻai ʻa e ngaahi ʻulungaanga peheé; ʻoku nau fakafeʻātungiá.

11. Ko e hā naʻá ne ueʻi ʻa e fai ʻo e ngaahi tokoni ʻi he ʻaho ʻo e langa ʻo e tāpanekale ʻa ʻIsilelí, pea ʻe anga-fēfē nai ke moʻoni ia ʻi hotau ʻahó ni?

¹¹ ʻOku tau fiemaʻu ʻa e feinga kotoa pē ʻi he ngāue ʻa Sihová ke fai ia ʻi he fakakaukau tatau ʻo hangē ko ʻIsileli ʻo e kuonga muʻá ʻi heʻenau tokoni ki he fiemaʻu ki hono langa ʻo e tāpanekalé. ʻOku pehē ʻi he ʻEkisoto 35:21: “Pea naʻa nau haʻu, ʻakinautolu kotoa pe naʻe oʻi ʻe honau loto, mo kinautolu naʻe fakalotolelei ʻe honau laumalie, ʻo nau ʻomi ʻenau meʻaʻofa kia Sihova ki he ngaue.” Naʻe ʻikai ke ueʻi kinautolu mei tuʻa ka ko e ueʻi mei loto, mei he lotó. Ko hono moʻoní, ʻoku pehē ni ʻi he lau fakafoʻilea faka-Hepelū “ko e tokotaha kotoa pē naʻe hiki hake ʻa hono loto” naʻá ne fai ʻa e ngaahi meʻaʻofa pehē. (Fakaʻītali ʻamautolu.) ʻIkai ko ia pē, te tau feinga ke felangahakeʻaki hotau lotó ʻi ha taimi pē ʻoku tau fakatahataha ai. ʻOku lava ʻe he laumālie ʻo Sihová ke fakaʻosi ʻa ia ʻoku fiemaʻu ke fakaʻaiʻai ʻa e kakaí.

“Fefakalototoʻaʻaki”

12. (a) Ko e hā ʻa e ngaahi ʻuhinga ʻo e foʻi lea faka-Kalisi naʻe liliu ko e “fakalototoʻa”? (e) Naʻe anga-fēfē ʻa hono ʻikai ke lava ʻe he ngaahi takanga ʻo Siopé ke fakalototoʻaʻi ia? (f) Ko e hā ʻoku totonu ai ke tau fakaʻehiʻehi mei he fefakamāuʻakí?

¹² Naʻe tohi ʻa Paula ʻoku totonu ke “fefakalototoʻaʻaki,” naʻá ne ngāueʻaki ha anga ʻo e foʻi lea faka-Kalisi ko e pa·ra·ka·leʹo, ʻa ia ʻoku toe lava ʻo ʻuhinga ‘ke fakaivimālohiʻi, ke fakafiemālie.’ ʻI he liliu faka-Kalisi ko e Sepituakiní, ko e foʻi lea tatau pē naʻe ngāueʻaki ʻi he Siope 29:​25, ʻa ia naʻe fakamatalaʻi ai ʻa Siope ko e tokotaha fakafiemālie ki he kau loto-mamahí. Ka ʻi he lolotonga ʻo e ʻahiʻahi lahi ʻo Siopé, naʻe ʻikai te ne maʻu ha fakalototoʻa pehē. Ko hono “kau fakafiemālie” ʻe toko tolú naʻa nau fuʻu femoʻuekina ʻi hono fakamāuʻi ia mo fai ʻa e ngaahi malanga kiate ia ʻo ʻikai te nau maʻu ha mahino kiate ia pe kaungāongoʻi mo ia. Ko hono moʻoní, ʻi he lea kotoa naʻa nau faí, naʻe ʻikai te nau leaʻaki tuʻo taha ʻa e hingoa ʻo Siope. (Fakafaikehekeheʻi ʻa e Siope 33:​1, 31.) ʻOku hā mahino naʻa nau vakai lahi ange kiate iá ko ha palopalema kae ʻikai ko ha tokotaha ia. ʻOku ʻikai ha ofo he naʻe kalanga ʻa Siope kiate kinautolu ʻi he loto-mamahi lahi: “Ka ne fetongi au ʻi heni ʻe hamou toko taha”! (Siope 16:4) ʻOku pehē pē mo e ʻahó ni, kapau ʻokú ke fiefakalototoʻaʻi ha taha, kaungāongoʻi! ʻOua ʻe fakamāu. Hangē ko e Loma 14:4 ʻoku pehē, “ko hai tū koe ke ke angaʻi ʻa e tamaioʻeiki ʻa ha taha kehe? ʻoku ʻi heʻene ʻeiki aʻana haʻane tuʻu pe hinga. ʻA, te ne tuʻu pe; he ʻoku mafai ʻe heʻene ʻEiki ke poupou ia.”

13, 14. (a) Ko e hā ʻa e moʻoni tefito ʻoku tau fiemaʻu ke ʻai ke tui ki ai ʻa hotau ngaahi tokouá mo e tuofāfiné koeʻuhi ke fakafiemālie kiate kinautolu? (e) Naʻe anga-fēfē ʻa hono fakaivimālohiʻi ʻo Tāniela ʻe ha ʻāngelo?

¹³ Ko ha anga ʻo e foʻi lea ko e pa·ra·ka·leʹo mo e nauna ʻokú na felāveʻí ʻoku liliu ko e “fiemalie” ʻi he 2 Tesalonaika 2:​16, 17 (PM): “Bea koeni, ko ho tau Eiki ko Jisu Kalaisi be, moe Otua, koe tau Tamai, aia naa ne ofeina akitautolu, o ne foaki mai ae fiemalie taegata moe amanaki lelei i he aloofa. Ke ne fakafiemalie ki ho mou loto, bea fakatuu mau akimoutolu i he gaahi lea moe gaue lelei kotoabe.” Fakatokangaʻi ʻoku fakafekauʻaki ʻe Paula ʻa e fakakaukau ʻo e fakafiemālieʻi hotau lotó mo e moʻoni tefito ʻoku ʻofaʻi kitautolu ʻe Sihová. Ko ia ke tau fefakalototoʻaʻaki mo fefakafiemālieʻaki ʻi hono fakapapauʻi ʻa e moʻoni mahuʻinga ko iá.

¹⁴ ʻI he taimi ʻe taha naʻe fuʻu hohaʻa ai ʻa e palōlfita ko Tānielá ʻi ʻosi ʻa ʻene sio ki ha vīsone fakamanavahē he naʻá ne pehē: “He nae liliu iate au a eku matamata lelei o fakalielia, bea nae ikai teu kei maʻu ha malohi.” Naʻe fekau ʻe Sihova ha ʻāngelo ʻa ia naʻá ne toutou fakamanatu kia Tāniela naʻá ne “ofeina lahi” ʻi he ʻao ʻo e ʻOtuá. Ko e hā hono ola? Naʻe tala ʻe Tāniela ki he ʻāngelo: “Kuo ke fakamalohi au.”​—Tāniela 10:​8, 11, 19, PM.

15. ʻOku totonu ke anga-fēfē hono ʻai ke mafamafatatau ʻa e fakaongoongolelei mo e fakatonutonu ʻa e kau mātuʻá mo e kau ʻovasia fefonongaʻakí?

¹⁵ Ko ia, ko ha founga ʻeni ʻe taha ke fakalototoʻaʻi ai ʻa e niʻihi kehé. Fakaongoongoleleiʻi kinautolu! ʻOku faingofua ʻaupito ke hehema ki he fakaangá, mo e fakakaukau anga-mālohí. Ka ʻoka fakangofua ʻe ʻi ai ʻa e ngaahi taimi ʻe fiemaʻu ai ʻa e fakatonutonú, tautefito mei he kau mātuʻá mo e kau ʻovasia fefonongaʻakí. Ka ʻe ʻaonga kiate kinautolu kapau te nau fai ʻa e fakalototoʻa māfaná kae ʻikai ko e fakakaukau lau melé pē.

16. (a) ʻI hono fakalototoʻaʻi ʻa e loto-mafasiá, ko e hā ʻoku ʻikai feʻunga aí pē hono naʻinaʻi ke nau ngāue lahi ange ʻi he ngāue ʻa Sihová? (e) Naʻe anga-fēfē ʻa e tokoni ʻa Sihova kia ʻIlaisiā ʻi heʻene loto-mafasiá?

¹⁶ ʻOku fiemaʻu ʻa e fakalototoʻá tautefito kiate kinautolu ʻoku nau loto-mafasiá, pea ʻoku ʻamanekina ʻe Sihova meiate kitautolu kaungā-Kalisitiané ke hoko ko ha maʻuʻanga ʻo e tokoni​—tautautefito kapau ko e kau mātuʻa kitautolu. (Palōvepi 21:13) Ko e hā ʻoku lava ke tau faí? ʻE ʻikai fuʻu faingofua nai ʻa e talí ʻo hangē ko hono tala kiate kinautolu ke nau ngāue lahi ange ʻi he ngāue ʻa Sihová. Ko e hā ʻa hono ʻuhinga? Koeʻuhí ʻe fakahuʻuhuʻu nai ʻoku nau loto-mafasiá koeʻuhi ʻoku ʻikai ke feʻunga ʻa ʻenau ngāué. Ka ʻoku ʻikai ke faʻa pehē ia. ʻI he taimi ʻe taha naʻe fuʻu loto-mafasia ʻa e palōfita ko ʻIlaisiā pea naʻá ne loto ai ke mate; pea naʻe hoko ʻeni ʻi he taimi naʻá ne mātuʻaki femoʻuekina ai ʻi heʻene ngāue kia Sihová. Naʻe anga-fēfē ʻa e fakafeangainga ʻa Sihova mo iá? Naʻá ne fekau ha ʻāngelo ke tokonaki ha tokoni ʻaonga. Naʻe fakahā ʻe ʻIlaisiā ʻa ʻene ngaahi ongoʻi loloto kia Sihova, ʻo hā ai naʻá ne ongoʻi taʻeʻaonga ʻo hangē pē ko ʻene ngaahi kui naʻe ʻosi maté, ko e kotoa ʻo ʻene ngāué naʻe taʻeʻaonga, pea naʻá ne mātuʻaki tokotaha pē. Naʻe fakafanongo mo fakafiemālieʻi ia ʻe Sihova ʻaki ʻa e ngaahi fakahāhā fakaofo ʻo Hono mālohí mo fakapapauʻi ʻoku ʻikai te ne tokotaha pē pea ko e ngāue naʻá ne kamatá ʻe fakakakato pē ia. Naʻe talaʻofa foki ʻe Sihova ke ʻoatu kia ʻIlaisiā ha takanga ke akoʻi ʻa ia ʻe faifai atu pē ʻo ne fetongi ia.​—1 Tuʻi 19:​1-21.

17. ʻE lava fēfē nai ke fakalototoʻaʻi ʻe ha mātuʻa ha tokotaha ʻokú ne fakaangaʻi pē ʻe ia ʻa ia?

¹⁷ Ko ha fakalototoʻa ē! ʻOfa ke pehē ʻetau fakalototoʻaʻi kinautolu ʻi hotau lotolotongá ʻa ia ʻoku nau faingataʻaʻia fakaeongó. Feinga ke maʻu ʻa e mahinó meia kinautolu ʻaki ʻa e fakafanongo! (Sēmisi 1:19) Tokonaki ʻa e fakafiemālie Fakatohitapú ʻo fakatatau ki heʻenau ngaahi fiemaʻu tāutahá. (Palōvepi 25:11; 1 Tesalonaika 5:14) Ke fakalototoʻaʻi kinautolu ʻoku nau fakaangaʻi pē kinautolú, ke fai ʻe he kau mātuʻá ʻi he angaʻofa ha fakamoʻoni Fakatohitapu ʻoku ʻofa mo mahuʻingaʻia ʻa Sihova ʻiate kinautolu.a Ko e fetalanoaʻaki ki he huhuʻí ʻe lava ko ha founga mālohi ia ʻo e fakalototoʻa ki he faʻahinga ʻoku nau ongoʻi taʻeʻaongá. Ko ha taha ʻokú ne mamahi koeʻuhi ko e angahala ʻi he kuo hilí ʻoku fiemaʻu nai ke fakahā kuo fakamaʻa ia ʻe he huhuʻí kapau naʻá ne ʻosi fakatomala moʻoni mo tafoki mei he tōʻonga peheé.​—ʻAisea 1:18.

18. ʻOku totonu ke anga-fēfē ʻa hono ngāueʻaki ʻa e akonaki ʻo e huhuʻí ke fakalototoʻaʻi ha taha naʻe fakalaveaʻi ʻe ha taha kehe, ʻo hangē ko e tohotohoʻí?

¹⁸ Ko e moʻoni, ʻoku totonu ki ha mātuʻa ke fakakaukau ki he meʻa ko ia ʻoku hokó koeʻuhi ke ngāueʻaki totonu ʻa e akonakí. Fakakaukau atu ki ha fakatātā: Ko e feilaulau huhuʻi ʻa Kalaisi naʻe fakatātaaʻi ia ʻe he ngaahi feilaulau monumanu ʻo e Lao ʻa Mōsesé, ʻa ia naʻe fiemaʻu ki he fakalelei ʻo e angahala kotoa pē. (Livitikō 4:​27, 28) Neongo naʻe ʻikai ke ʻi ai ha tuʻutuʻuni, ke fai ʻa e feilaulau angahala peheé ʻe ha tokotaha naʻe tohotohoʻi. Naʻe pehē ʻe he laó ʻe “ʻikai te ke fai ha meʻa ki ai” ko hano tautea. (Teutalōnome 22:​25-27) Ko ia ʻi he ʻaho ní, kapau naʻe ʻohofi ʻo tohotohoʻi ha tuofefine pea kuo fakatupunga ai ʻene ongoʻi ʻuli mo taʻeʻaonga, ʻe feʻunga ke fakamamafaʻi ʻa ʻene fiemaʻu ʻo e huhuʻí ke fakamaʻa ia mei he angahala ko iá? Ko e moʻoni ʻe ʻikai. Naʻe ʻikai te ne angahala ʻi hono ngaohikoviʻí. Ko e tokotaha tohotohó naʻe faiangahalá pea ʻoku fiemaʻu ke fakamaʻá. Kae kehe, ko e ʻofa naʻe fakahā ʻe Sihova mo Kalaisi ʻi hono tokonaki ʻo e huhuʻí ʻe lava ke ngāueʻaki nai ia ko ha fakamoʻoni ʻoku ʻikai ʻuliʻi ia ʻi he ʻao ʻo e ʻOtuá koeʻuhi ko ha angahala ʻa e tokotaha kehé ka ʻokú ne mahuʻinga mo kei ʻofaʻi pē ia ʻe Sihova.​—Fakafehoanaki mo Maʻake 7:​18-23; 1 Sione 4:16.

19. Ko e hā ʻoku totonu ai ke ʻoua te tau ʻamanekina ko e feohi kotoa pē mo hotau ngaahi tokouá mo e tuofāfiné ʻe fakalototoʻa, ka ko e hā ʻoku totonu ke tau fakapapauʻi?

¹⁹ ʻIo, tatau ai pē pe ko e hā ʻa e tuʻunga tāutaha ʻi he moʻuí, neongo pē ko ha ngaahi tuʻunga fakamamahi ʻoku pōpōʻuli ʻi he kuohilí, ʻoku totonu ke ne malava ʻo maʻu ʻa e fakalototoʻa ʻi he fakatahaʻanga ʻo e kakai ʻa Sihová. Pea ʻe pehē kapau te tau feinga tāutaha ke fetokangaʻaki, ke fefakaʻaiʻaiʻaki, pea mo fefakalototoʻaʻaki ʻi heʻetau feohi fakatahá. Ka neongo ia, ʻi hotau tuʻunga taʻehaohaoá, ʻoku ʻikai ke tau fai ia ʻi he taimi ʻe niʻihi. ʻOku taʻemataʻofia, ʻoku tau fefakaloto-mamahiʻaki ʻi he taimi ki he taimi. Feinga ke ʻoua ʻe nōfoʻi pē ʻi he ngaahi fehālaaki ʻa e niʻihi kehé ʻi he tafaʻaki ko ʻení. Kapau ʻokú ke fakatokanga pē ki he ngaahi tōnounoú, ʻoku fakatuʻutāmaki haʻo hoko ʻo fuʻu fakaangaʻi ʻa e fakatahaʻangá pea te ke tō nai ki he tauhele naʻe loto-vēkeveke ai ʻa Paula ke tokoniʻi kitautolu ke tau fakaʻehiʻehi mei aí, ʻa ia ko e liʻaki ʻo ʻetau fakataha fakatahatahá. ʻOfa ke ʻoua ʻaupito ʻe hoko ia! ʻI he hoko ʻo toe fakatuʻutāmaki mo fakafeʻātungia ange ʻa e fokotuʻutuʻu motuʻa ko ʻení, ke tau tuʻumaʻu ʻo fakapapau ke fai ʻa ia te tau malavá ke ʻai ʻa ʻetau feohi ʻi he ngaahi fakatahá ke fakatupu langa hake​—pea ʻasilí he ʻoku tau sio ki he fakaofiofi mai ʻa e ʻaho ʻo Sihová!

[Fakamatala ʻi lalo]

ʻE Fēfē Haʻo Tali?

◻ Ko e hā ʻoku mahuʻinga ʻaupito ai ke fakalototoʻa ʻa etau ngaahi fakatahá mo e feohi ʻi he ngaahi ʻaho fakaʻosí?

◻ Ko e hā ʻa e ʻuhinga ʻo e fetokangaʻakí?

◻ Ko e hā ʻa e ʻuhinga ʻo e fefakaʻaiʻaiʻakí?

◻ Ko e hā ʻoku kaunga ki he fefakalototoʻaʻakí?

◻ ʻOku anga-fēfē ke fakalototoʻaʻi ʻa e loto-mafasiá?

[Fakatātā ʻi he peesi 16]

ʻOku tokoni ʻa e angaʻofa ʻi he tali kakaí kiate kitautolu ke tau feʻilongaki lelei ange

[Fakatātā ʻi he peesi 18]

ʻI he loto-mafasia ʻa ʻIlaisiā, naʻe fakafiemālieʻi angaʻofa ia ʻe Sihova