ʻAi Ke Tau Hoko ko e Haʻa ʻOku Maʻu ʻa e Tuí

“Ko kitaua . . . ko e haʻa tui ai pe ke maʻu mai hota laumalie.”​—HEPELU 10:39.

 1. Ko e hā ʻoku lava ai ke pehē ko e tui ʻa e sevāniti mateaki taki taha ʻa Sihová ʻoku mātuʻaki mahuʻinga?

KO E taimi hono hoko te ke ʻi ha Fale Fakatahaʻanga ai ʻoku fonu ʻi he kau lotu ʻa Sihová, kiʻi tuʻu ʻo vakai ki he faʻahinga takatakai ʻiate koé. Fakakaukau atu ki he ngaahi founga lahi ʻa ia ʻoku nau fakahāhaaʻi ai ʻa e tuí. Te ke sio nai ki he kau taʻumotuʻa kuo nau tauhi ʻa e ʻOtuá he ngaahi hongofuluʻi taʻu, ko e kau talavou ʻoku nau talitekeʻi fakaʻaho ʻa e tenge ʻa e toʻumeʻá, mo e ngaahi mātuʻa ʻoku nau ngāue mālohi ke tauhi hake ʻa e fānau manavahē-ʻOtua. ʻOku ʻi ai ʻa e kau mātuʻa mo e kau sevāniti fakafaifekau ʻa e fakatahaʻangá, ʻa ia ʻoku nau fua ʻa e ngaahi fatongia lahi. ʻIo, te ke sio nai ki he fanga tokoua mo e fanga tuofāfine fakalaumālie ʻo e ngaahi taʻumotuʻa kotoa pē ʻa ia ʻoku nau lavaʻi ʻa e ngaahi faʻahinga faingataʻaʻiaʻanga kotoa koeʻuhi ke tauhi ʻa Sihova. He mātuʻaki mahuʻinga ē ko e tui ʻa e faʻahinga tāutahá ni!​—1 Pita 1:7.

 2. Ko e hā ʻoku ʻaonga ai kiate kitautolu ʻi he ʻaho ní ʻa e akonaki ʻa Paula ʻi he Hepelu vahe 10 mo e 11?

² Ko e tokosiʻi pē he faʻahinga ʻo e tangata taʻehaohaoá, kapau ʻoku ʻi ai, kuo nau mahinoʻi ʻa e mahuʻinga ʻo e tuí ʻo lelei ange ia ʻi he mahino naʻe maʻu ʻe he ʻapositolo ko Paulá. Ko hono moʻoní, naʻá ne fakatokangaʻi ko e tui moʻoní ʻoku taki atu ia ki he “maʻu mai hota laumalie.” (Hepelu 10:39) Neongo ia, naʻe ʻilo ʻe Paula ko e tuí kuo pau ke ʻohofi mo mōlia atu ʻi he māmani taʻetui ko ʻení. Naʻá ne tokanga loloto fekauʻaki mo e kau Kalisitiane Hepelū ʻi Selusalema mo Siuteá, ʻa ia naʻa nau fāinga ke fakatolonga ʻenau tuí. ʻI heʻetau vakai ki he ngaahi konga ʻo e Hepelu vahe 10 mo e 11, ʻai ke tau fakatokangaʻi ʻa e ngaahi founga naʻe ngāueʻaki ʻe Paula ke langa hake ai ʻenau tuí. ʻI he fai peheé, te tau sio ki he founga ʻoku malava ke tau langa hake ai ha tui mālohi angé ʻiate kitautolu pea ʻi he faʻahinga ʻoku takatakai ʻiate kitautolú.

Fefakahāʻaki ʻa e Loto-Falala

 3. ʻOku anga-fēfē hono fakahaaʻi ʻe he ngaahi lea ʻa Paula ʻi he Hepelu 10:39 naʻá ne maʻu ʻa e loto-falala ki hono fanga tokoua mo e fanga tuofāfine ʻi he tuí?

³ Ko e ʻuluaki meʻa nai te tau fakatokangaʻí ko e fakakaukau pau ʻa Paula ki heʻene kau fanongó. Naʻá ne tohi: “Ka ko kitaua ʻoku ʻikai ko e haʻa holomui ʻoku to ki mala, ka ko e haʻa tui ai pe ke maʻu mai hota laumalie.” (Hepelu 10:39) Naʻe fakakaukau ʻaki ʻe Paula ʻa e lelei tahá, ʻikai ko e kovi tahá, ʻo fekauʻaki mo hono kaungā Kalisitiane anga-tonú. Fakatokangaʻi foki, naʻá ne ngāueʻaki ʻa e kupuʻi lea “kitaua.” Ko Paulá ko ha tangata naʻe māʻoniʻoni. Neongo ia, naʻe ʻikai te ne lea fiemāʻolunga ki heʻene kau fanongó, ʻo hangē ia naʻá ne ʻi ha tuʻunga māʻolunga ʻo e māʻoniʻoní ʻo māʻolunga mamaʻo ia ʻiate kinautolu. (Fakafehoanaki mo Koheleti 7:16.) Ka, naʻá ne fakakau ia fakataha mo kinautolu. Naʻá ne fakahaaʻi ʻa e loto-falala ongoʻi loloto ko ia mo ʻene kau lautohi Kalisitiane anga-tonú te nau fehangahangai kotoa mo e ngaahi faingataʻaʻiaʻanga fakalotosiʻi ʻoku maluʻaki mai kiate kinautolu, ʻa ia te nau fakafisi loto-toʻa ke ʻoua te nau holomui ʻo tō ki mala, pea te nau fakamoʻoniʻi ai ko e haʻa kinautolu ʻoku maʻu ʻa e tuí.

 4. Ko e hā ʻa e ongo ʻuhinga naʻe maʻu ai ʻe Paula ʻa e loto-falala ki hono kaungātuí?

⁴ Naʻe lava fēfē ke maʻu ʻe Paula ha loto-falala pehē? Naʻe fakakuikui ia ki he ngaahi hala ʻa e kau Kalisitiane Hepeluú? ʻI hono kehé, naʻá ne ʻoange kiate kinautolu ʻa e akonaki papau ke tokoniʻi kinautolu ke nau ikuʻi ʻenau ngaahi tōnounou fakalaumālié. (Hepelu 3:​12; 5:​12-​14; 6:​4-6; 10:​26, 27; 12:5) Ka, naʻe maʻu ʻe Paula ʻo ʻikai siʻi hifo he ʻuhinga ʻe ua ki hono maʻu ʻa e loto-falala ki hono fanga tokouá. (1) ʻI he tuʻunga ko e tokotaha faʻifaʻitaki kia Sihová, naʻe feinga ʻa Paula ke sio ki he kakai ʻa e ʻOtuá ʻi he anga ʻo e sio kiate kinautolu ʻa Sihová. Naʻe ʻikai ko e fai pē ia ʻi he fekauʻaki mo ʻenau ngaahi fehālaakí ka ʻi he fekauʻaki mo honau ngaahi ʻulungaanga leleí pea mo ʻenau malava ke fili ke failelei ʻi he kahaʻú. (Sāme 130:3; Efeso 4:32 [5:1, PM]) (2) Naʻe maʻu ʻe Paula ʻa e tui haohaoa ki he mālohi ʻo e laumālie māʻoniʻoní. Naʻá ne ʻilo ʻe ʻikai ha ngaahi fakafaingataʻaʻiaʻanga, ʻikai ha ngaahi vaivai fakaetangata, ʻe lava ke ne taʻofi ʻa Sihova mei hono ʻomai ʻa e “mālohi ʻoku makehe atú” ki ha Kalisitiane pē ʻoku feinga ke tauhi anga-tonu kiate Ia. (2 Kolinito 4:​7, NW; Filipai 4:13) Ko ia, ko e loto-falala ʻa Paula ki hono fanga tokouá mo e fanga tuofāfiné naʻe ʻikai tukuhalaʻi, taʻemoʻoni, pe fakatuʻamelie kui pē. Naʻe makatuʻunga fefeka ia mo Fakatohitapu.

 5. ʻE lava fēfē ke tau faʻifaʻitaki ki he loto-falala ʻa Paulá, pea ʻoku ngalingali ko e hā hono olá?

⁵ Ko hono moʻoní, naʻe fakamoʻoniʻi naʻe pipihi atu ʻa e loto-falala naʻe fakahāhaaʻi ʻe Paulá. Kuo pau pē naʻe ʻuhinga lahi ki he ngaahi fakatahaʻanga ʻi Selusalema mo Siuteá ʻa e lea mātuʻaki fakalototoʻa ʻa Paula kiate kinautolú. ʻI he funga ʻo e paetaku taʻefaʻamatuʻuekina mo e taʻemahuʻingaʻia loto-hīkisia ʻa honau kau fakafepaki Siú, naʻe tokoniʻi ʻa e kau Kalisitiane Hepeluú ʻe he ngaahi kupuʻi lea peheé ke nau fakapapauʻi ʻi honau lotó ke hoko ko e haʻa ʻoku maʻu ʻa e tuí. ʻE lava ke tau fefaiʻaki ʻa e meʻa tatau he ʻahó ni? ʻOku mātuʻaki faingofua ke sio ki he niʻihi kehé ʻi ha fuʻu fakahokohoko lōloa pē ʻo e ngaahi fehālaakí mo e fanga kiʻi faikehe ʻi he ʻulungāngá. (Mātiu 7:​1-5) Ka, ʻoku malava ke tau fetokoniʻaki lahi ange kapau ʻoku tau fakatokangaʻi mo fakamahuʻingaʻi ʻa e tui laulōtaha ʻoku maʻu ʻe he tokotaha taki taha. ʻI he fakalototoʻa peheé, ngalingali ʻe tupulaki ange ai ʻa e tuí.​—Loma 1:​11, 12.

Ngāue Feʻungamālieʻaki ʻa e Folofola ʻa e ʻOtuá

 6. Mei he matavai fē naʻe hiki lea mei ai ʻa Paula ʻi heʻene tohi ʻa e ngaahi lea ʻoku lēkooti ʻi he Hepelu 10:38?

⁶ Naʻe toe langa hake ʻe Paula ʻa e tuí ʻi hono kaungātuí ʻaki ʻene ngāuepōtoʻiʻaki ʻa e ngaahi Konga Tohitapú. Ko e fakatātaá, naʻá ne tohi: “Ka ko e tangata maʻoniʻoni aʻaku, te ne moʻui ʻi he tui: ka ʻo kapau te ne holomui, ʻe ʻikai hōifua hoku laumalie ʻiate ia.” (Hepelu 10:38) Naʻe hiki lea heni ʻe Paula mei he palōfita ko Hapakuké.a Ko e ngaahi leá ni ʻoku hangehangē naʻe maheni ia mo e kau lautohi ʻa Paulá, ʻa e kau Kalisitiane Hepelū ko ia naʻa nau ʻilo lelei ki he ngaahi tohi fakaekikité. ʻI he fakakaukau atu ki heʻene taumuʻá​—ke ʻai ke mālohi ʻa e tui ʻa e kau Kalisitiane ʻi Selusalemá pe ofi ki aí ʻi he taʻu 61 T.S. nai​—ko e faʻifaʻitakiʻanga ko ia ʻa Hapakuké ko ha fili taau ia. Ko e hā hono ʻuhingá?

 7. Naʻe lēkooti ʻe Hapakuke ʻene kikité ʻanefē, pea ko e hā ʻa e ngaahi tuʻunga ʻi Siuta ʻi he taimi ko iá?

⁷ ʻOku hā mahino naʻe hiki ʻe Hapakuke ʻa ʻene tohí ʻo laka siʻi hake pē he hongofuluʻi taʻu ʻe ua ki muʻa ʻi hono fakaʻauha ʻo Selusalema ʻi he 607 K.M. ʻI he vīsoné, naʻe sio ai ʻa e palōfitá ki he kau Kalitiá (pe, kau Pāpiloné), ko ha “puleʻanga angafitaʻa mo ʻoho,” ʻoku tūʻulu hifo ki Siuta ʻo fakaʻauha ʻa Selusalema, ʻo maʻu ai ʻa e kakaí mo e ngaahi puleʻangá ʻi he meʻa ko iá. (Hapakuke 1:​5-11) Ka naʻe tomuʻa tala ha fakatuʻutāmaki pehē ia talu mei he taimi ʻo ʻAiseá, laka hake ia ʻi ha senituli ki muʻa. ʻI he taimi ʻo Hapakuké, naʻe fetongi ai ʻe Sihoiakimi ʻa e tuʻi lelei ko Siosaiá, pea naʻe toe tupu ʻafaʻafa ʻa e anga-fulikivanú ʻi Siuta. Naʻe hanga ʻe Sihoiakimi ʻo fakatangaʻi pea aʻu ʻo fakapoongi ʻa e faʻahinga naʻe lea ʻi he huafa ʻo Sihová. (2 Kalonikali 36:5; Selemaia 22:17; 26:​20-24) ʻOku ʻikai ha ofo ʻi he kalanga ʻa e palōfita loto-mamahi ko Hapakuké: “Kofutu, ʻEiki?”​—Hapakuke 1:2.

 8. Ko e hā ʻoku fakamoʻoniʻi ai ʻoku tokoni ʻa e faʻifaʻitakiʻanga ʻa Hapakuké ki he kau Kalisitiane ʻi he ʻuluaki senitulí mo e ʻaho ní?

⁸ Naʻe ʻikai ke ʻilo ʻe Hapakuke ia pe naʻe ofi fēfē ʻa e fakaʻauha ʻo Selusalemá. ʻI he tuʻunga meimei tatau, naʻe ʻikai ke ʻilo ʻe he kau Kalisitiane ia ʻo e ʻuluaki senitulí ʻa e taimi ʻe ngata ai ʻa e fokotuʻutuʻu ʻo e ngaahi meʻa faka-Siú. ʻOku ʻikai ke tau ʻilo mo kitautolu ʻi he ʻaho ní ki he “ʻaho ko ia mo hono houa” ʻe hoko mai ai ʻa e fakamaau ʻa Sihová ki he fokotuʻutuʻu fulikivanu ko ʻení. (Mātiu 24:36) Ko ia ai, ʻai ke tau fakatokangaʻi ʻa e tali lōua ʻa Sihova kia Hapakuké. ʻUluakí, naʻá ne fakapapauʻi ange ki he palōfitá ʻe hoko mai ʻa e ngataʻangá ʻi hono taimi totonu. “ʻE ʻikai tuai,” ko e folofola ia ʻa e ʻOtuá, neongo ʻoku hā ngali toloi ia, ʻi he anga ʻo e vakai ʻa e tangatá. (Hapakuke 2:3) Ko hono uá, naʻe fakamanatu ʻe Sihova kia Hapakuke: “Ko e maʻoniʻoni te ne moʻui mei heʻene tui.” (Hapakuke 2:4) He ngaahi moʻoni fakaʻofoʻofa mo faingofua ē! Ko e meʻa ʻoku mahuʻinga lahi tahá, ʻoku ʻikai ko e taimi ʻe hoko mai ai ʻa e ngataʻangá, ka ko e pehē pe te tau hokohoko atu ke moʻui ʻaki ʻa e tuí.

 9. Naʻe anga-fēfē ʻa e hokohoko atu ʻa e moʻui ʻa e kau sevāniti talangofua ʻa Sihová ʻi heʻenau tuí (a) ʻi he 607 K.M.? (e) hili ʻa e 66 T.S.? (f) Ko e hā ʻoku mātuʻaki mahuʻinga ai ke tau ʻai ke mālohi ʻetau tuí?

⁹ ʻI hono fakaʻauha ʻa Selusalema ʻi he 607 K.M., ko Selemaia, ko ʻene sekelitali ko Palukí, ʻĒpeti-meleki, mo e kau Lēkapi mateakí naʻa nau sio ki he moʻoni ʻo e talaʻofa ʻa Sihova kia Hapakuké. Naʻa nau ‘moʻui’ ʻi heʻenau hola mei he fakaʻauha fakalilifu ʻo Selusalemá. Ko e hā hono ʻuhingá? Naʻe fakapaleʻi ʻe Sihova ʻenau tuí. (Selemaia 35:​1-​19; 39:​15-​18; 43:​4-7; 45:​1-5) ʻI he tuʻunga meimei tatau, ko e kau Kalisitiane Hepelū ko ia ʻi he ʻuluaki senitulí kuo pau pē naʻa nau tali lelei ʻa e akonaki ʻa Paulá, he ʻi he taimi naʻe ʻohofi ai ʻe he kau tau Lomá ʻa Selusalema ʻi he 66 T.S. pea toki holomui taʻealafakamatalaʻí, naʻe tokanga anga-tonu ʻa e kau Kalisitiane ko iá ki he fakatokanga ʻa Sīsū ke nau holá. (Luke 21:​20, 21) Naʻe hokohoko atu ʻenau moʻuí koeʻuhi ko ʻenau anga-tonú. ʻOku pehē pē, ʻe hokohoko atu ʻetau moʻuí kapau ʻe ʻiloʻi kitautolu ʻoku tau anga-tonu ʻi he taimi ʻe hoko mai ai ʻa e ngataʻangá. Ko ha ʻuhinga mātuʻaki mahuʻinga ē ki hono ʻai ke mālohi ʻetau tuí he taimí ni!

Fakamatalaʻi Maeʻeeʻa Mai ʻa e Ngaahi Faʻifaʻitakiʻanga ʻo e Tuí

10. Naʻe anga-fēfē hono fakamatalaʻi ʻe Paula ʻa e tui ʻa Mōsesé, pea ʻe anga-fēfē nai ʻetau faʻifaʻitaki kia Mōsese ʻi he meʻá ni?

¹⁰ Naʻe toe langa ʻe Paula ʻa e tuí ʻaki hono ngāueʻaki mālohi ʻa e ngaahi faʻifaʻitakiʻangá. ʻI hoʻo lau ʻa e Hepelu vahe 11, fakatokangaʻi ʻa e anga ʻo ʻene fakamatalaʻi maeʻeeʻa mai ai ʻa e ngaahi faʻifaʻitakiʻanga ʻa e faʻahinga ʻi he Tohitapú. Hangē ko ʻení, ʻokú ne pehē ko Mōsese “naʻa ne kitaki heʻene sio ki he Tuʻi Taʻehamai.” (Hepelu 11:​27, fakaʻītali ʻamautolu.) ʻI hono fakalea ʻe tahá, naʻe mātuʻaki moʻoni ʻa Sihova kia Mōsese ʻo hangē naʻá ne malava ke sio ki he ʻOtua taʻehāmaí. ʻE lava ke leaʻaki ʻa e meʻa tatau fekauʻaki mo kitautolu? ʻOku faingofua ke talanoa ʻo fekauʻaki mo ha vahaʻangatae mo Sihova, ka ke langa hake mo ʻai ke mālohi ʻa e vahaʻangatae ko iá ʻoku fiemaʻu ki ai ʻa e ngāue. Ko e ngāue ia ʻoku fiemaʻu ke tau faí! ʻOku mātuʻaki moʻoni ʻa Sihova kiate kitautolu ʻo tau fakakaukau kiate ia ʻi he taimi ʻoku tau fai ai ha ngaahi fili, ʻo kau ai ʻa e fanga kiʻi meʻa ʻoku hā ngali īkí? ʻE tokoni ʻa e faʻahinga tui ko iá kiate kitautolu ke tau kātakiʻi naʻa mo e fakafepaki kovi tahá.

11, 12. (a) ʻI he malumalu ʻo e ngaahi tuʻunga fē naʻe ʻahiʻahiʻi nai ai ʻa e tui ʻa ʻĪnoké? (e) Ko e hā ʻa e pale fakalototoʻa naʻe maʻu ʻe ʻĪnoké?

¹¹ Fakakaukau atu foki ki he tui ʻa ʻĪnoké. ʻOku faingataʻa kiate kitautolu ke tau sioloto atu ki he fakafepaki naʻá ne fehangahangai mo iá. Naʻe pau kia ʻĪnoke ke ne ʻoatu ha pōpoaki mahuhuhuhu ʻo e fakamaau ki he kakai naʻe moʻui he taimi ko iá. (Siutasi 14, 15) Ko e fakatanga naʻá ne fakamanamanaʻi ʻa e tangata anga-tonú ni naʻe hā mahino naʻe mātuʻaki kovi ʻaupito, mātuʻaki fakamālohi, ʻo hanga ai ʻe Sihova ʻo “hiki ia,” ʻo toʻo ia mei he tuʻunga ko e moʻuí ki he mohe ʻi he maté ki muʻa ke ala kiate ia ʻa e ngaahi filí. Ko ia, naʻe ʻikai ke aʻu ʻa ʻĪnoke ia ʻo sio ki hono fakahoko ʻo e kikite naʻá ne talá. Kae kehe, naʻá ne maʻu ha meʻaʻofa, ʻa ia, ʻi he tuʻunga ʻe niʻihi, naʻe toe lelei ange ia.​—Hepelu 11:5; Senesi 5:​22-24.

¹² ʻOku fakamatala ʻa Paula: “ʻI he teʻeki ke hiki ia [ʻĪnoke] ne fakamoʻoni maʻana, kuo ne fakahōifua ʻa e ʻOtua.” (Hepelu 11:5) Naʻe ʻuhinga ʻeni ki he hā? Ki muʻa ke ne ʻalu ki he mohe ʻi he maté, naʻe ʻosi maʻu nai ʻe ʻĪnoke ha faʻahinga vīsone, mahalo ki he Palataisi fakaemāmani ʻa ia te ne ʻā hake ki ai ʻi ha ʻaho vavé ni mai. ʻI ha faʻahinga tuʻunga, naʻe ʻai ʻe Sihova ke ʻilo ʻe ʻĪnoke naʻá Ne hōifua lelei ʻi hono ʻalunga anga-tonú. Naʻe ʻai ʻe ʻĪnoke ʻa e loto ʻo Sihová ke fiefia. (Fakafehoanaki mo Palovepi 27:11.) ʻOku maongo ʻa e fakakaukau atu ki he moʻui ʻa ʻĪnoké, ʻikai ko ia? Te ke saiʻia ke ke moʻuiʻaki ha moʻui pehē ʻo e tuí? Peʻi fakalaulauloto atu ki he ngaahi faʻifaʻitakiʻanga peheé; sio kiate kinautolu ʻi he tuʻunga ko e kakai moʻoni. Fakapapauʻi ke moʻuiʻaki ʻa e tuí, ʻi he ʻaho ki he ʻaho. Manatuʻi foki, ko e haʻa ko ia ʻoku nau maʻu ʻa e tuí ʻoku ʻikai te nau tauhi ʻa Sihova ʻo makatuʻunga ʻi ha ʻaho pe taimi pau ʻa ia ko e taimi ia ʻe fakahoko ai ʻe he ʻOtuá ʻa e kotoa ʻo ʻene ngaahi talaʻofá. Ka, ʻoku tau fakapapau ke tauhi ʻa Sihova ʻo taʻengata! Ko hono fai iá ʻoku ʻuhinga iá ko e founga moʻui lelei taha ia ʻi he fokotuʻutuʻu ʻo e ngaahi meʻa ko ʻení pea ʻi he hoko maí.

Founga ke Tupu Ai ʻo Mālohi Ange ʻi he Tuí

13, 14. (a) ʻOku anga-fēfē hono tokoniʻi kitautolu ʻe he ngaahi lea ʻa Paula ʻoku lēkooti ʻi he Hepelu 10:​24, 25 ke tau ʻai ʻa ʻetau ngaahi fakatahá ko e ngaahi taimi fakafiefiá? (e) Ko e hā ʻa e ʻuhinga tefito ki he ngaahi fakataha faka-Kalisitiané?

¹³ Naʻe fakahāhaaʻi ʻe Paula ki he kau Kalisitiane Hepeluú ha ngaahi founga ʻaonga ʻa ia ʻe lava ke nau ʻai ke mālohi ai ʻenau tuí. Tau lave ange ki ha meʻa ʻe ua pē. ʻOku hangehangē ʻoku tau maheni mo ʻene enginaki ʻi he Hepelu 10:​24, 25, ʻo naʻinaʻi mai ai kiate kitautolu ke tau fakatahataha maʻu pē ʻi heʻetau ngaahi fakataha faka-Kalisitiané. Kae manatuʻi, ko e ngaahi lea fakamānavaʻi ko ia ʻa Paulá ʻoku ʻikai fakahuʻunga ia ke pehē ko kitautolú ko e kau mamata taʻengāue pē ʻi he ngaahi fakataha peheé. Ka, ʻoku fakamatalaʻi ʻe Paula ʻa e ngaahi fakatahá ko e ngaahi faingamālie ia ke feʻilongaki ai, ke fefakaʻaiʻaiʻaki ke tauhi ʻa e ʻOtuá ke kakato ange, pea ke fefakalototoʻaʻaki ai. ʻOku tau ʻi aí ke foaki atu, ʻo ʻikai ko e maʻu mai pē. ʻOku tokoni ia ki hono ʻai ʻetau ngaahi fakatahá ko e ngaahi taimi fakafiefia.​—Ngāue 20:35.

¹⁴ Ka, ʻi hono tefitó, ʻoku tau maʻu ʻa e ngaahi fakataha faka-Kalisitiané ke lotu ai kia Sihova ko e ʻOtuá. ʻOku tau fai ia ʻaki ʻetau kau ki he lotú mo e hivá, ʻaki ʻa e fanongo tokanga, pea ʻaki ʻa hono ʻoatu ʻa e “fua ʻo e loungutu”​—ko e ngaahi lea ʻo e fakahīkihiki kia Sihova ʻi heʻetau ngaahi talí pea mo e ngaahi konga ʻi he fakatahá. (Hepelu 13:15) Kapau te tau tauhi ʻa e ngaahi taumuʻa ko iá ʻi heʻetau fakakaukaú pea ngāue ki ai ʻi he fakataha kotoa pē, ʻe ʻikai tō ʻetau tuí ʻi hono langa hake ʻi he taimi taki taha.

15 Ko e hā naʻe naʻinaʻi ai ʻa Paula ki he kau Kalisitiane Hepeluú ke nau pikimaʻu ki heʻenau ngāue fakafaifekaú, pea ko e hā ʻa e ʻuhinga ʻoku feʻungamālie ai ʻa e akonaki tatau pē ko iá ʻi he ʻaho ní?

¹⁵ Ko e toe founga ʻe taha ke langa hake ai ʻa e tuí ʻoku fakafou ia ʻi he ngāue fakamalangá. Naʻe tohi ʻe Paula: “Ke tau kuku maʻu, taʻengaúe, ʻa e fai fakaha o ʻetau fakatuʻamelie, (seuke, ko ia naʻa ne tala ʻa e ngaahi palomesi ko e toko taha ʻoku fai ki heʻene lea.)” (Hepelu 10:23) ʻOkú ke naʻinaʻi nai ki he niʻihi kehé ke nau piki maʻu ki ha meʻa ʻi he taimi ʻoku hā ngali fakatuʻutāmaki ai kiate kinautolu ke tukuange iá. ʻOku hā mahino naʻe tenge ʻe Sētane ʻa e kau Kalisitiane Hepelū ko iá ke nau tukuange ʻenau ngāue fakafaifekaú, pea ʻokú ne tenge pehē pē ʻa e kakai ʻa e ʻOtuá he ʻaho ní. ʻI he funga ʻo e ngaahi tenge peheé, ko e hā ʻoku totonu ke tau faí? Fakakaukau atu ki he meʻa naʻe fai ʻe Paulá.

16, 17. (a) Naʻe anga-fēfē hono maʻu ʻe Paula ʻa e loto-toʻa ki he ngāue fakafaifekaú? (e) Ko e hā ʻa e ngaahi lākanga ʻoku totonu ke tau laka aí kapau ʻoku tau ʻilo ʻoku tau loto-siʻi ʻi ha tafaʻaki ʻo ʻetau ngāue fakafaifekau faka-Kalisitiané?

¹⁶ Naʻe tohi ʻa Paula ki he kau Kalisitiane ʻi Tesalonaiká: “Hili ʻemau ʻuluaki mamahi mo ngaohikovia (hangē pē ko ia ʻoku mou ʻilo ki ai) ʻi Filipaí, naʻa mau langaʻi ʻa e loto-toʻa fakafou ʻi hotau ʻOtuá ke leaʻaki kiate kimoutolu ʻa e ongoongo lelei ʻa e ʻOtuá fakataha mo ha fuʻu fāinga lahi.” (1 Tesalonaika 2:2, NW) Naʻe anga-fēfē hono “ngaohikovia” ʻo Paula mo hono ngaahi takangá ʻi Filipaí? Fakatatau ki he kau mataotao ʻe niʻihi, ko e foʻi lea faka-Kalisi naʻe ngāueʻaki ʻe Paulá ʻokú ne fakahaaʻi ʻa e tōʻonga fakalotomamahi, fakamā, pe fakalilifu. Naʻe tā kinautolu ʻe he kau maʻu mafai Filipaí ʻaki ʻa e ngaahi vaʻakau, lī kinautolu ki he pilīsoné, pea tuku kinautolu ʻi he ngaahi papa kiiʻi. (Ngāue 16:​16-24) Naʻe anga-fēfē hono uesia ʻo Paula ʻe he meʻa fakamamahi ko ia naʻá ne hokosiá? Naʻe ʻilo ʻe he faʻahinga ʻi he kolo lahi hono hoko ʻo ʻene fononga fakamisinalé, ʻe Tesalonaika, naʻe holomui ʻa Paula ʻi he manavahē? ʻIkai, naʻá ne “langaʻi ʻa e loto-toʻa.” Naʻá ne ikuʻi ʻa e manavaheé pea hokohoko atu ke malanga loto-toʻa.

¹⁷ Naʻe haʻu mei fē ʻa e loto-toʻa ʻa Paulá? Mei loto? ʻIkai, naʻá ne pehē naʻá ne loto-toʻá “fakafou ʻi hotau ʻOtua.” ʻOku pehē ʻe ha tohi maʻuʻanga fakamatala ki he kau liliu Tohitapú ʻoku lava nai ke fakalea ʻa e sētesí ni ʻo pehē “naʻe toʻo ʻe he ʻOtuá ʻa e manavaheé mei homau lotó.” Ko ia, kapau ʻoku ʻikai te ke ongoʻi loto-toʻa tautefito fekauʻaki mo hoʻo ngāue fakafaifekaú, pe kapau ʻoku ʻi ai ha tafaʻaki ʻo ia ʻoku hā ngali fakalotosiʻi, ko e hā ʻoku ʻikai te ke tangi ai kia Sihova ke ne fai mai ʻa e meʻa tatau maʻaú? Kole kiate ia ke ne toʻo ʻa e manavaheé mei ho lotó. Kole kiate ia ke ne tokoniʻi koe ke ke langaʻi ʻa e loto-toʻa ki he ngāué. Tānaki atu ki ai, laka ʻi ha ngaahi lākanga ʻaonga ʻe niʻihi. Ko e fakatātaá, fokotuʻutuʻu ke ke ngāue mo ha taha ʻoku poto ʻaupito ʻi he founga ʻo e faifakamoʻoni ko ia ʻokú ne fakahohaʻasi koé. ʻOku kau nai ai ʻa e feituʻu pisinisí, fakamoʻoni ʻi he halá, malanga ʻi he founga ʻikai anga-mahení, pe fakamoʻoni ʻi he telefoní. Mahalo ʻe loto ho hoá ke ne ʻuluaki kamata ia. Kapau ʻoku pehē, sio pea ako ai. Ka ke langaʻi leva ʻa e loto-toʻa ke ʻahiʻahiʻi ia.

18. Ko e hā ʻa e ngaahi tāpuaki te tau hokosia nai kapau te tau langaʻi ʻa e loto-toʻá ʻi heʻetau ngāue fakafaifekaú?

¹⁸ Kapau te ke langaʻi ʻa e loto-toʻá, fakakaukau atu ki he ola ʻe maʻu nai aí. ʻI hoʻo kīvoi pea ʻoua ʻe fakaʻatā koe ke ke hoko ʻo loto-siʻí, ngalingali te ke hokosia nai ai ʻa e ngaahi meʻa lelei ʻi hono vahevahe atu ʻa e moʻoní, ʻa e ngaahi meʻa ʻoku hokosia kuó ke tō nai mei ai. (Sio ki he peesi 25.) Te ke maʻu ai ʻa e fiemālie ʻo e ʻiloʻi kuó ke fakahōifuaʻi ʻa Sihova ʻaki hono fai ha meʻa ʻa ia ʻoku faingataʻa kiate koe. Te ke hokosia ai ʻa ʻene tāpuaki mo e tokoni ki hono ikuʻi ʻa hoʻo ngaahi manavaheé. ʻE mālohi ange ai ʻa hoʻo tuí. Ko hono moʻoní, heʻikai lava ke ke ngāue ki hono langa hake ʻa e tuí ʻi he niʻihi kehé ʻo ʻikai langa hake ʻa hoʻo tui ʻaʻaú tonu ʻi he taimi tatau pē.​—Siutasi 20, 21.

19. Ko e hā ʻa e pale mātuʻaki mahuʻinga ʻoku tuku tauhi maʻá e “haʻa tui”?

¹⁹ ʻOfa ke ke hokohoko atu ke ʻai ke mālohi ʻa hoʻo tuí pea mo e tui ʻa e faʻahinga ʻoku takatakai ʻiate koé. ʻE lava ke ke fai ia ʻaki hono langa hake koe mo e niʻihi kehé fakafou ʻi hono ngāuepōtoʻiʻaki ʻa e Folofola ʻa e ʻOtuá, ʻaki hono ako ʻa e ngaahi faʻifaʻitakiʻanga ʻi he Tohitapú fekauʻaki mo e tuí mo hono fakamatalaʻi maeʻeeʻa mai kinautolú, ʻaki ʻa e teuteu pea kau ki he ngaahi fakataha faka-Kalisitiané, pea ʻi he pikimaʻu ki he monū mātuʻaki mahuʻinga ʻo e ngāue fakafaifekau ki he kakaí. ʻI hoʻo fai ʻa e ngaahi meʻá ni, fakapapauʻi ko koé, ʻoku moʻoni, ko e taha ʻo e “haʻa tui.” Manatuʻi foki, ko e faʻahinga ʻo e haʻa ko ʻení ʻoku nau maʻu ha pale mātuʻaki mahuʻinga. Ko kinautolu ia ʻa e “haʻa tui ai pe ke maʻu mai hota laumalie.”b ʻOfa ke hokohoko atu ai pē ʻa e tupulekina ʻa hoʻo tuí, pea ʻofa ke fakahaofi atu ai pē koe ʻe Sihova ko e ʻOtuá ʻo ke moʻui taʻengata!

[Fakamatala ʻi lalo]

Ko e Hā Haʻo Tali?

◻ Naʻe anga-fēfē hono fakahaaʻi ʻe Paula ʻa e loto-falala ki he kau Kalisitiane Hepeluú, pea ko e hā ʻoku lava ke tau ako mei he meʻá ni?

◻ Ko e hā naʻe mātuʻaki feʻungamālie ai ʻa e lave ʻa Paula ki he palōfita ko Hapakuké?

◻ Ko e hā ʻa e ngaahi faʻifaʻitakiʻanga Fakatohitapu ʻo e tuí naʻe fakamatalaʻi maeʻeeʻa ʻe Paulá?

◻ Ko e hā ʻa e ngaahi founga ʻaonga ʻo e langa hake ʻo e tuí naʻe fakaongoongoleleiʻi mai ʻe Paulá?

[Fakatātā ʻi he peesi 23]

ʻI he hili ʻa e meʻa fakamamahi naʻá ne hokosia ʻi Filipaí, naʻe langaʻi ʻe Paula ʻa e loto-toʻa ke hokohoko atu ʻa e malangá

[Fakatātā ʻi he peesi 24]

ʻE lava ke ke langaʻi ʻa e loto-toʻa ke ʻahiʻahiʻi ʻa e ngaahi founga kehekehe ʻo e faifakamoʻoní?