Maluʻi Ho Tofiʻá ʻAki Hono Fai ha Fili Fakapotopoto

1, 2. (a) Ko e hā naʻá ne tokoniʻi koe ke ke fai hoʻo fili ke tauhi ki he ʻOtuá? (e) Ko e hā ʻa e ngaahi fehuʻi fekauʻaki mo hotau tofiʻa meia Sihová ʻe tali ʻi he kupu ko ení?

KUO fai ʻe he laui miliona ʻa e fili fakapotopoto ke nau tauhi kia Sihova ko e ʻOtuá pea faʻifaʻitaki ki he faʻifaʻitakiʻanga ʻa Sīsū Kalaisí. (Māt. 16:24; 1 Pita 2:21) Ko ʻetau fakatapui ki he ʻOtuá ko ha fili mafatukituki ia. Naʻe ʻikai te tau fai ʻa e fili ko ení ʻi ha hili pē haʻatau ako ki he ngaahi moʻoni tefitó mei ha ngaahi konga Tohi Tapu. Ka, naʻa tau ako fakalelei ʻa e Tohi Tapú pea fakaivimālohiʻi ʻetau tui ki he tofiʻa kuo talaʻofa ʻe Sihová. Te ne ʻoange ʻa e tofiʻa ko ení ki he faʻahinga kotoa ʻoku nau hanganaki ako fekauʻaki mo iá pea fekauʻaki mo Sīsū Kalaisí.—Sione 17:3; Loma 12:2.

² Kapau ʻoku tau loto ke tauhi maʻu hotau vahaʻangatae lelei mo Sihová, kuo pau ke tau hanganaki fai ʻa e ngaahi fili fakapotopoto ʻa ia ʻoku fakahōifua kiate iá. ʻOku tali ʻi he kupú ni ʻa e ngaahi fehuʻi mahuʻinga ko ení: Ko e hā hotau tofiʻá? ʻOku totonu ke mahuʻinga fēfē ia kia kitautolu? ʻE lava fēfē ke tau fakapapauʻi te tau maʻu hotau tofiʻá? Ko e hā te ne tokoniʻi kitautolu ke tau fai ʻa e ngaahi fili fakapotopotó?

 3. (a) Ko e hā ʻa e tofiʻa ʻe maʻu ʻe he kau paní? (e) Ko e hā ʻa e tofiʻa ʻe maʻu ʻe he “fanga sipi kehe”?

³ Ko ha kiʻi tokosiʻi ʻo e kau Kalisitiané ʻoku nau ʻamanaki ke maʻu honau tofiʻa ko e moʻui taʻefaʻamate ʻi hēvani. Te nau maʻu ʻa e monū mātuʻaki makehe ko e pule fakataha mo Kalaisi ʻi hono Puleʻangá. (1 Pita 1:3, 4) Ko e faʻahinga te nau maʻu ʻa e tofiʻa ko iá kuo “fanauʻi foʻou” kinautolu. (Sione 3:1-3) Kae fēfē ʻa e laui miliona ʻo e “fanga sipi kehe” ʻa Sīsuú, ʻa ia ʻoku nau ngāue fakataha mo e kau paní ʻi hono malangaʻi ʻa e ongoongo lelei ʻo e Puleʻanga ʻo e ʻOtuá? (Sione 10:16) ʻE maʻu ʻe he fanga sipi kehé ʻa e meʻa naʻe ʻikai ke maʻu ʻe ʻĀtama mo ʻIví, ʻa ia, ko e moʻui taʻengata ʻi ha māmani palataisi ʻe ʻikai ke toe ʻi ai ha faingataʻaʻia, mate, pe mamahi. (Fkh. 21:1-4) ʻI he taimi naʻe ʻi he ʻakau fakamamahí ai ʻa Sīsuú, naʻá ne talaʻofa ange ki ha tangata ʻe taha te ne maʻu ʻa e tofiʻa ko ení. Naʻe pehē ʻe Sīsū: “ʻOku ou tala moʻoni atu kiate koe ʻi he ʻahó ni, Te ke ʻi Palataisi mo au.”—Luke 23:43.

 4. Ko e hā ʻa e ngaahi tāpuaki kuo tau ʻosi maʻú?

⁴ Ka ʻoku toe kau ki hotau tofiʻá ha ngaahi tāpuaki ʻoku tau maʻu naʻa mo e ʻi he taimí ni. Koeʻuhí kuo tau tui ki he “huhuʻi naʻe totongi ʻe Kalaisi Sīsuú,” ʻoku tau ongoʻi nonga ai pea maʻu ha vahaʻangatae vāofi mo e ʻOtuá. (Loma 3:23-25) ʻOku tau maʻu ha mahino lelei ki he talaʻofa ʻa e Tohi Tapú ki he kahaʻú. Ko e ʻofa ʻoku fefakahāhāʻaki ʻe hotau fanga tokoua mo e fanga tuofāfine takatakai ʻi he māmaní ʻoku ʻai ai kitautolu ke tau fiefia lahi. Pea ko ha lāngilangi ia ʻa e malava ke tau faifakamoʻoni fekauʻaki mo Sihova. ʻOku tau maʻu ʻa e ngaahi ʻuhinga lelei ke houngaʻia ai ʻi hotau tofiʻá!

 5. Ko e hā kuo feinga ʻa Sētane ke fai ki he kakai ʻa e ʻOtuá? Ko e hā ʻe lava ke ne tokoniʻi kitautolu ke tau fakaʻehiʻehi ai mei he ngaahi tauhele ʻa Sētané?

⁵ Ke fakapapauʻi heʻikai mole hotau tofiʻá, kuo pau ke tau tokanga ke fakaʻehiʻehi mei he ngaahi tauhele ʻa Sētané. Kuo feinga maʻu pē ʻa Sētane ke fakataueleʻi ʻa e kakai ʻa e ʻOtuá ke nau fai ha ngaahi fili kovi koeʻuhí ke mole ai honau tofiʻá. (Nōm. 25:1-3, 9) ʻOku ʻiloʻi ʻe Sētane ʻe vavé ni ke fakaʻauha ia, ko ia ʻokú ne feinga mālohi ʻaupito ke fakataueleʻi kitautolu ke faihala. (Lau ʻa e Fakahā 12:12, 17.) Kapau ʻoku tau loto ke tau “tuʻu maʻu ʻo fakafepakiʻi ʻa e ngaahi ngāue kākā ʻa e Tēvoló,” kuo pau ke tau houngaʻia maʻu pē ʻi hotau tofiʻá. (ʻEf. 6:11) ʻE lava ke tau ako ha ngaahi lēsoni mahuʻinga mei he anga ʻo e vakai ʻa e ʻuluaki foha ʻo ʻAisake ko ʻĪsoá ki hono tofiʻá.

6, 7. Ko hai ʻa ʻĪsoa? Ko e hā ʻa e tofiʻa naʻe totonu ke ne maʻú?

⁶ ʻI he taʻu nai ʻe 4,000 kuohilí, naʻe fāʻeleʻi ai ʻe Lepeka ha ongo māhanga, ko ʻĪsoa mo Sēkope. Naʻe tupu hake ʻa e ongo māhanga ko ení ʻo na fuʻu kehekehe ʻaupito. “Ko e faiva ʻo Isoa ko e tulimanu, ko e tama taka vao ia,” ka ko Sēkope “naʻe angamaopo, ko e tama taka fale.” (Sēn. 25:27) Koeʻuhí naʻe anga-tonu ʻa Sēkope pea ʻikai tōʻongaʻaki ʻa e angahalá, naʻe ui ai ia ʻokú ne anga-māopo.

⁷ ʻI he taʻu 15 ʻa ʻĪsoa mo Sēkopé, naʻe mate ai ʻena kui ko ʻĒpalahamé. Ka naʻe manatuʻi ʻe Sihova ʻa e talaʻofa naʻá ne fai kia ʻĒpalahamé. Ki mui ai, naʻe toutou tala ʻe Sihova kia ʻAisake ʻa e meʻa naʻá ne talaʻofaʻakí. Naʻe pehē ʻe he ʻOtuá ko e ngaahi puleʻanga kotoa ʻo e māmaní ʻe tāpuakiʻi kinautolu ʻo fakafou ʻi he “hako” ʻo ʻĒpalahamé. (Lau ʻa e Sēnesi 26:3-5.) ʻI he foungá ni, naʻe fakahā ai ʻe he ʻOtuá ko e taha ʻo e ngaahi hako ʻo ʻĒpalahamé ʻe hoko ko e “hako” faitōnunga ia ʻi he Sēnesi 3:15, ʻa ia, ko e Mīsaiá. Koeʻuhí ko ʻĪsoa ʻa e ʻuluaki foha ʻo ʻAisaké, naʻá ne maʻu ʻa e totonu ke ʻinasi ʻi he talaʻofa naʻe fai ʻe he ʻOtuá kia ʻĒpalahamé. Ko ia ko e Mīsaiá naʻe tonu ko e taha ia ʻo e ngaahi hako ʻo ʻĪsoá. Ko ha tofiʻa fakaofo eni kia ʻĪsoa. Ka naʻá ne houngaʻia ai?

8, 9. (a) Ko e hā ʻa e fili naʻe fai ʻe ʻĪsoa fekauʻaki mo hono tofiʻá? (e) ʻI ha ngaahi taʻu ki mui ai, ko e hā naʻe ʻiloʻi ʻe ʻĪsoa fekauʻaki mo ʻene filí? Naʻe fēfē ʻene fakafeangai ki aí?

⁸ ʻI he ʻaho ʻe taha ʻi he taimi naʻe foki mai ai ʻa ʻĪsoa mei he ngoueʻangá, naʻá ne sio atu kia Sēkope ʻoku fai ʻene “haka sepo” pe supo. Naʻe kole ange ʻe ʻĪsoa haʻane supo, ʻo ne pehē: “ʻE, ʻomi haʻaku meʻi meʻa kula ke u folo, ʻa e kula na; he kuo u ʻaungalua.” Naʻe pehē ange ʻe Sēkope: “Peʻi fakatau ni kiate au ʻa e hoko.” Ko e hā ʻa e fili naʻe fai ʻe ʻĪsoá? Naʻá ne pehē ko e tuʻunga hokó ʻoku ʻikai ʻaonga ia kiate ia peá ne fili ʻe ia ʻa e poulu supó ko e fetongi ʻo ʻene totonu ki he tuʻunga hokó! Naʻe loto ʻa Sēkope ke fakapapauʻi naʻe fakatau moʻoni ange ʻe ʻĪsoa ʻa e tuʻunga hokó, ko ia naʻá ne kole ange ke ne fai ha fuakava. Naʻe pehē ʻe Sēkope: “Peʻi fuakava mai leva.” ʻI he ʻikai vaheʻi ha taimi ke fakakaukau ki aí, naʻe fakatau atu ʻe ʻĪsoa ia hono tuʻunga hokó. Hili iá, naʻe “toki ʻange ʻe Sekope kia Isoa ha ma mo ha sepo pini, pea ne kai mo inu; pea toki tuʻu ia ʻo ʻalu.” Naʻe fakahaaʻi ʻe ʻĪsoa naʻá ne fakakaukau naʻe taʻeʻaonga mo ʻikai mahuʻinga hono tuʻunga hokó.—Sēn. 25:29-34.

⁹ ʻI ha ngaahi taʻu ki mui ai, ʻi he fakakaukau ʻa ʻAisake ʻe vave ʻene maté, naʻe fakapapauʻi ʻe Lepeka ke maʻu ʻe Sēkope ʻa e tuʻunga hoko naʻe fakatau ange ʻe ʻĪsoa kiate iá. ʻI hono ʻiloʻi ʻe ʻĪsoa naʻá ne fai ha fili fakavalevale ʻi heʻene fakatau atu ʻa hono tuʻunga hokó, naʻá ne kōlenga kia ʻAisake: “Tapuaki au, ʻala, ʻa au foki. . . . Kuo ʻikai te ke taʻofi ha tapuaki maʻaku?” ʻI hono tala ange ʻe ʻAisake kia ʻĪsoa heʻikai malava ke ne liliu ʻa e tāpuaki kuó ne ʻosi ʻoange kia Sēkopé, naʻe tangi mamahi ʻa ʻĪsoa.—Sēn. 27:30-38.

10. Ko e hā ʻa e fakakaukau ʻa Sihova fekauʻaki mo ʻĪsoa mo Sēkopé, pea ko e hā hono ʻuhingá?

¹⁰ Ko e hā ʻe lava ke tau ako fekauʻaki mo e fakakaukau ʻa ʻĪsoá mei he fakamatala ko ení? Naʻá ne fakahaaʻi ko ʻene ngaahi holi fakakakanó naʻe mahuʻinga ange ia kiate ia ʻi hono maʻu ʻa e ngaahi tāpuaki naʻe talaʻofa ʻe Sihova ko e konga ʻo hono tofiʻá. Naʻe ʻikai ke houngaʻia ʻa ʻĪsoa ʻi hono tuʻunga hokó pea naʻe ʻikai ke ne ʻofa moʻoni ki he ʻOtuá. Pea naʻe ʻikai ke fakakaukau ʻa ʻĪsoa fekauʻaki mo e anga hono uesia ʻe heʻene filí ʻa hono ngaahi hakó. Ka naʻe kehe ʻa Sēkope ia. Naʻá ne houngaʻia moʻoni ʻi hono tofiʻá pea fai ʻa e ngaahi fili lelei ke maluʻi ia. Ko e fakatātaá, neongo naʻe ʻikai faingofua kiate ia, naʻe loto-lelei ʻa Sēkope ke muimui ʻi he akonaki ʻene ongo mātuʻá fekauʻaki mo hono fili ha uaifí. (Sēn. 27:46–28:3) Naʻe tāpuakiʻi ʻe Sihova ʻene talangofuá ʻaki hono ʻai ʻa e Mīsaiá ke hoko ko e taha ʻo e ngaahi hako ʻo Sēkopé. Ko e hā ʻa e fakakaukau ʻa e ʻOtuá fekauʻaki mo ʻĪsoa mo Sēkopé? Naʻe pehē ʻe Sihova: “Naʻa ku ʻofa kia Sekope; ka ko Isoa naʻa ku fehiʻa ki ai.”—Mal. 1:2, 3.

11. (a) Ko e hā ʻe lava ai ke tau maʻu ʻaonga ʻi he tuʻunga ko e kau Kalisitiané mei he fakamatala fekauʻaki mo ʻĪsoá? (e) ʻI he taimi naʻá ne fakamatala ai ki he meʻa naʻe fai ʻe ʻĪsoá, ko e hā naʻe toe lave ai ʻa Paula ʻo fekauʻaki mo e feʻauakí?

¹¹ ʻE lava ke tau maʻu ʻaonga mei he fakamatala fekauʻaki mo ʻĪsoá. Naʻe fakatokanga ʻa e ʻapositolo ko Paulá ki he kau Kalisitiané ʻo pehē ke nau tokanga he “ʻi he lotolotonga ʻo kimoutolú ʻoku totonu ke ʻoua naʻa ʻi ai ha taha feʻauaki pe ha taha ʻoku ʻikai te ne houngaʻia ʻi he ngaahi meʻa toputapú, hangē ko ʻĪsoá, ʻa ia naʻá ne tukuange atu ʻene ngaahi totonu ko e ʻuluaki fohá ʻo fakafetongiʻaki ha foʻi houa kai pē ʻe taha.” (Hep. 12:16) ʻOku fiemaʻu ke tau ako mei he fakatokanga ko iá. Kuo pau ke tau houngaʻia maʻu pē ʻi he ngaahi meʻa toputapú koeʻuhí ke tau talitekeʻi ʻa e ʻahiʻahí pea maluʻi hotau tofiʻá. ʻI he taimi naʻá ne fakamatala ai ki he meʻa naʻe fai ʻe ʻĪsoá, ko e hā naʻe toe lave ai ʻa Paula ʻo fekauʻaki mo e feʻauakí? Koeʻuhí kapau te tau tōʻonga hangē ko ʻĪsoá pea tuku ʻetau ngaahi holi fakakakanó ke ne puleʻi kitautolu, ʻe faingofua ke tau fai ha angahala hangē ko e feʻauakí, pea ko hono olá ʻe lava ke mole ai hotau tofiʻá.

12. (a) ʻOku anga-fēfē ʻa e feinga ʻa Sētane ke ne fakataueleʻi kitautolu taki tahá? (e) Ko e hā ʻa e faʻifaʻitakiʻanga Fakatohitapu ʻe lava ke ne tokoniʻi kitautolu ʻi he taimi ʻoku fakataueleʻi ai kitautolu ke fai ʻa e meʻa ʻoku halá?

¹² ʻI he tuʻunga ko e kau sevāniti ʻa Sihová, ʻoku tau fai ʻa e meʻa kotoa te tau malavá ke fakaʻehiʻehi ai mei he ngaahi tuʻunga ʻe lava ke ne fakataueleʻi kitautolu ke fai ha meʻa ʻoku taʻetaau. Pea kapau ʻoku fakataueleʻi kitautolu ʻe ha taha, ʻoku tau lotu ke tokoniʻi kitautolu ʻe Sihova ko e ʻOtuá ke tau talitekeʻi ʻa e ʻahiʻahí. (Māt. 6:13) ʻOku tau ngāue mālohi ke tauhi maʻu ʻetau anga-tonú ʻi he māmani fulikivanu ko ení, ka ʻoku toutou feinga ʻa Sētane ke fakavaivaiʻi hotau vahaʻangatae mo Sihová. (ʻEf. 6:12) Ko Sētane ʻa e ʻotua ʻo e fokotuʻutuʻu fulikivanu ko ení, pea ʻokú ne ʻiloʻi ʻa e founga ke ngāueʻaki ai ʻa e ngaahi ʻahiʻahí ke ʻai ʻa e kakaí ke nau tō ʻi heʻenau ngaahi holi koví. (1 Kol. 10:8, 13) ʻOkú ne feinga ke fai pehē kia kitautolu taki taha. Fēfē kapau naʻá ke ʻi ha tuʻunga ʻa ia naʻe fakataueleʻi ai koe ke ke fakatōliʻa hoʻo ngaahi holí ʻi ha founga hala? Ko e hā ʻa e fili te ke faí? Te ke hangē ko ʻĪsoá, ʻa ia naʻá ne tō vave ʻi he ʻahiʻahí? Pe te ke talitekeʻi ʻa e ʻahiʻahí pea hola mei ai, ʻo hangē ko ia naʻe fai ʻe he foha ʻo Sēkope ko Siosifá ʻi he taimi naʻe fakataueleʻi ai ia ʻe he uaifi ʻo Pōtifá?—Lau ʻa e Sēnesi 39:10-12.

13. (a) ʻI he ʻahó ni, kuo anga-fēfē ʻa e tōʻonga ʻa e tokolahi ʻo hangē ko Siosifá, ka kuo anga-fēfē ʻa e tōʻonga ʻa e niʻihi ʻo hangē ko ʻĪsoá? (e) Ko e hā kuo pau ke tau fai koeʻuhí ke ʻoua te tau tōʻonga ai ʻo hangē ko ʻĪsoá?

¹³ Kuo fehangahangai ʻa e tokolahi ʻo hotau fanga tokouá mo e fanga tuofāfiné mo e ngaahi ʻahiʻahi pea pau ai ke nau fili pe te nau hangē ko ʻĪsoá pe hangē ko Siosifá. Naʻe ngāue fakapotopoto ʻa e tokolahi pea ʻai ke fiefia ʻa e loto ʻo Sihová. (Pal. 27:11) Ka kuo fili ʻa e niʻihi ke tōʻonga hangē ko ʻĪsoá pea kuo ʻikai lava ke nau maluʻi honau tofiʻá. Ko e tokolahi ʻo e faʻahinga ko ia ʻoku valokiʻi pe tuʻusi ʻi he taʻu taki taha kuo akonekina ai kinautolu koeʻuhí naʻa nau fai ʻa e fehokotaki fakasino taʻetaau. ʻOku mātuʻaki mahuʻinga ke teuʻi he taimí ni hotau lotó koeʻuhí ke tau maʻu ai ha mālohi feʻunga ke talitekeʻi ha ʻahiʻahi pē ʻi he kahaʻú! (Saame 78:8) Te tau lāulea ki he meʻa ʻe ua ʻe lava ke tau fai ke teuʻi ai kitautolu ke talitekeʻi ʻa e ʻahiʻahí pea fai ʻa e ngaahi fili fakapotopoto ʻamui ange.

14. Ko e hā ʻa e ngaahi fehuʻi te ne tokoniʻi kitautolu ke tau fehiʻa ai ʻi he meʻa ʻoku koví pea ʻofa ʻi he meʻa ʻoku leleí?

¹⁴ Ko e ʻuluaki sitepú ke fakakaukau fekauʻaki mo e ngaahi nunuʻa ʻo e angahalá. Ko e lahi ange ʻetau ʻofa kia Sihová, ko e lahi ange ia ʻetau houngaʻia ʻi hotau tofiʻá. ʻI he taimi ʻoku tau ʻofa ai ʻi ha taha, ʻoku ʻikai te tau loto ke fakalotomamahiʻi ʻa e tokotaha ko iá. Ka, ʻoku tau feinga ʻaki hotau lelei tahá ke ʻai ia ke ne fiefia. Ko ia ʻoku totonu ke tau vaheʻi ha taimi ke fakakaukau ai fekauʻaki mo e ngaahi nunuʻa ʻo e angahalá, ʻa ia, ko e anga ʻetau fakalotomamahiʻi kitautolu mo e niʻihi kehé kapau ne tau tō ʻi he ʻahiʻahí. ʻOku totonu ke tau ʻeke hifo kia kitautolu: ‘ʻE anga-fēfē hono uesia ʻe heʻeku tōʻonga siokitá hoku vahaʻangatae mo Sihová? ʻE anga-fēfē hono uesia ʻe he angahalá hoku fāmilí? ʻE anga-fēfē ʻene uesia hoku fanga tokoua mo e fanga tuofāfine ʻi he fakatahaʻangá? ʻE fakaʻitaʻi ʻe heʻeku tōʻongá ʻa e niʻihi kehé?’ (Fil. 1:10) ʻE lava ke tau toe ʻeke hifo kia kitautolu: ‘Ko e kiʻi mōmeniti ʻo e fiefia taʻetāú ʻoku tuha moʻoni ia mo e nunuʻa te u utu ʻamuí? ʻOku ou loto moʻoni ke hangē ko ʻĪsoá, ʻa ia naʻá ne tangi mamahi ʻi heʻene ʻiloʻi ʻa e ngaahi nunuʻa ʻo ʻene angahalá?’ (Hep. 12:17) Kapau te tau fakakaukau fakalelei fekauʻaki mo e ngaahi fehuʻí ni, te tau fehiʻa ai ʻi he meʻa ʻoku koví pea ʻofa ʻi he meʻa ʻoku leleí. (Loma 12:9) ʻI he taimi ʻoku tau ʻofa moʻoni ai ʻia Sihová, te tau ngāue mālohi ai ke maluʻi hotau tofiʻá.—Saame 73:28.

15. Ko e hā te ne tokoniʻi kitautolu ke tau mateuteu ai ke talitekeʻi ha ʻahiʻahi pē pea maluʻi hotau vahaʻangatae mo e ʻOtuá?

¹⁵ Ko e sitepu hono uá ko ʻetau teuteuʻi kitautolu ke talitekeʻi ʻa e ʻahiʻahí. Kuo ʻomai ʻe Sihova ʻa e ngaahi founga lahi ke teuteuʻi ai kitautolu ke talitekeʻi ʻa e ʻahiʻahi mei he māmaní pea maluʻi hotau vahaʻangatae mo iá. Ko e fakatātaá, kuó ne fakahaaʻi mai ʻa e founga ke tau maʻu ʻaonga ai mei he ako Tohi Tapú, ngaahi fakatahá, ngāue fakafaifekaú, mo e lotú. (1 Kol. 15:58) ʻI he taimi taki taha ʻoku tau tala ai kia Sihova ʻetau ngaahi ongoʻi moʻoní ʻi he lotú pea ʻi he taimi kotoa pē ʻoku tau ngāue mālohi ai ʻi he ngāue fakafaifekaú, ʻoku tau teuteuʻi ai kitautolu ke talitekeʻi ʻa e ʻahiʻahí. (Lau ʻa e 1 Tīmote 6:12, 19.) Kapau ʻoku tau loto ke lavameʻa, kuo pau ke tau hanganaki feinga ke fai ʻa e ngaahi meʻá ni. (Kal. 6:7) ʻOku fakamatalaʻi ʻa e meʻá ni ʻi he vahe hono ua ʻo e Palōvēpí.

16, 17. Ko e hā te ne tokoniʻi kitautolu ke tau fai ʻa e ngaahi fili fakapotopotó?

¹⁶ ʻOku fakalototoʻaʻi kitautolu ʻe he Palōveepi vahe 2 ke tau ngāue mālohi ke tau maʻu ʻa e potó mo e malava fakaefakakaukaú. Ko e ongo ʻulungaanga ko eni ʻoku ʻomai ʻe Sihova kia kitautolú te ne tokoniʻi kitautolu ki hono fai ʻa e fili ʻi he tonú pe ko e halá pea te ne tokoniʻi kitautolu ke mapuleʻi ʻetau ngaahi holí kae ʻikai ko hono fakatōliʻa ia ʻi ha founga hala. Ka ʻe lava ke tau fai eni kapau pē ʻoku tau loto-lelei ke fai ha feinga. ʻOku fakamatala ʻa e Tohi Tapú: “Tama, kapau te ke tali ʻeku ngaahi lea, ʻo tuku tauhi mo koe ʻeku ngaahi tuʻutuʻuni; ʻo ke tuku ai ho telinga ke fanongo ki he poto, mo ofeʻi ho loto kia Fakahinohino; kaeʻumaʻa, kapau te ke ui ʻa ʻilomeʻa, pea haʻaki ho leʻo kia Fakahinohino; kapau te ke haʻao ia hange ha haʻao siliva, pea hakule ki ai hange ko hoʻo fai ki ha koloa fufu: Te ke toki laveʻi ʻa e ʻapasia kia Sihova, pea maʻu ʻa e ʻiloʻi ʻo e ʻOtua. He ʻoku foaki poto ʻe Sihova; ʻoku mei hono fofonga ʻa e ʻilo mo e fakahinohino.”—Pal. 2:1-6.

¹⁷ Kapau te tau fai ʻa e meʻa ʻoku fakamatalaʻi ʻi he ngaahi veesi ko iá, ʻe malava ai ke tau fai ha ngaahi fili fakapotopoto. ʻE lava ke tau talitekeʻi ʻa e ʻahiʻahí kapau pē te tau fakaʻatā ʻa e folofola ʻa Sihová ke ne liliu ʻa hotau tangata ʻi lotó, kapau te tau hokohoko lotu ʻo kole ʻa e tataki ʻa e ʻOtuá, pea kapau te tau hanganaki haʻao pe kumi ki he ʻiloʻi ʻo e ʻOtuá ʻo hangē haʻatau kumi ki ha koloa fufuú.

18. Ko e hā te ke hanganaki faí, pea ko e hā hono ʻuhingá?

¹⁸ ʻOku ʻoange ʻe Sihova ʻa e ʻilo, mahino, ʻiloʻilo mo e poto ki he faʻahinga ʻoku nau feinga ke maʻu iá. Ko e lahi ange ʻetau kumi ki ai pea ngāueʻaki iá ko e lelei ange ia hotau vahaʻangatae mo Sihova ko e ʻOtuá. Pea ko hotau vahaʻangatae vāofi mo iá te ne maluʻi kitautolu ʻi heʻetau fehangahangai mo e ʻahiʻahí. Kapau ʻoku tau hanganaki nofo ofi kia Sihova pea ʻapasia kiate ia, te tau ngāue mālohi ai ke fakaʻehiʻehi mei he angahalá. (Saame 25:14; Sēm. 4:8) Ko ʻetau kaumeʻa mo Sihová pea mo e poto ʻokú ne ʻomai kia kitautolú te ne tokoniʻi kitautolu ke tau fai ha ngaahi fili fakapotopoto ʻa ia te ne ʻai ai ia ke ne fiefia pea maluʻi ai hotau tofiʻá.