Tohi Tapú​—Ko ha Tohi mei he ʻOtuá

1, 2. Ko e hā ʻoku hoko ai ʻa e Tohi Tapú ko ha meʻaʻofa fakatoʻoaloto mei he ʻOtuá?

ʻOKU anga-fēfē hoʻo ongoʻí ʻi he taimi ʻoku fakaʻohovaleʻi ai koe ʻe ha kaumeʻa ʻi haʻane ʻoatu haʻo meʻaʻofa? ʻOku ʻikai te ke kei faʻa tatali ke fakaava ia, pea ʻokú ke fiefia ʻi he fakakaukau atu kiate koe ho kaumeʻá. ʻOkú ke fakamālō kiate ia ʻi he meʻaʻofá.

² Ko e Tohi Tapú ko ha meʻaʻofa ia mei he ʻOtuá. ʻOku ʻomai ai kiate kitautolu ʻa e fakamatala ʻoku ʻikai lava ke tau maʻu mei ha toe feituʻu. Ko e fakatātaá, ʻoku tala mai ai kiate kitautolu naʻe fakatupu ʻe he ʻOtuá ʻa e langí, ko e māmaní, mo e ʻuluaki tangatá mo e fefiné. ʻOku ʻomai ai ʻa e ngaahi tefitoʻi moʻoni ʻa ia ʻe lava ke ne tokoniʻi kitautolu ʻi heʻetau maʻu ha ngaahi palopalemá. ʻI he Tohi Tapú, ʻoku tau ako ai ki he founga ʻe fakahoko ai ʻe he ʻOtuá ʻene taumuʻa ke ngaohi ʻa e māmaní ke hoko ko ha feituʻu lelei ange. Ko e Tohi Tapú ko ha meʻaʻofa fakatoʻoaloto ia!

 3. Ko e hā te ke ʻiloʻi ʻi hoʻo ako ʻa e Tohi Tapú?

³ ʻI hoʻo ako ʻa e Tohi Tapú, te ke ʻiloʻi ai ʻoku fiemaʻu mai ʻe he ʻOtuá ke ke hoko ko hono kaumeʻa. Ko e lahi ange hoʻo ako fekauʻaki mo iá, ko e hoko ia ʻo toe vāofi ange ʻa hoʻomo kaumeʻá.

 4. Ko e hā ʻoku maongo kiate koe ʻo fekauʻaki mo e Tohi Tapú?

⁴ Kuo liliu ʻa e Tohi Tapú ʻi he lea nai ʻe 2,600, pea kuo pulusi ʻa e tatau ʻe laui piliona. ʻOku lava ke lau ʻe he kakai laka hake ʻi he pēseti ʻe 90 ʻi he māmaní ʻa e Tohi Tapú ʻi heʻenau leá tonu. Pea ʻi he uike taki taha, ʻoku maʻu ai ha Tohi Tapu ʻe he kakai laka hake he milioná! ʻIo, ʻoku ʻikai ha toe tohi ʻe hangē ko e Tohi Tapú.

 5. Ko e hā ʻoku lava ai ke tau pehē ko e Tohi Tapú “kuo fakamānavaʻi ia ʻe he ʻOtuá”?

⁵ Ko e Tohi Tapú “kuo fakamānavaʻi ia ʻe he ʻOtuá.” (Lau ʻa e 2 Tīmote 3:16.) Ka ʻoku fakakaukau nai ʻa e niʻihi, ‘Naʻe hiki ʻa e Tohi Tapú ʻe ha kau tangata, ko ia ʻe lava fēfē ke pehē ʻoku mei he ʻOtuá?’ ʻOku tali ia ʻe he Tohi Tapú: “Naʻe lea mei he ʻOtuá ha kau tangata ʻi hono ueʻi [pe tataki] kinautolu ʻe he laumālie māʻoniʻoní.” (2 Pita 1:21) ʻOku meimei tatau eni mo hano tala ʻe ha tangata pisinisi ki heʻene sekelitalí ke ne fai ha tohi. Ko hai ʻa e faʻutohí? Ko e tangata pisinisí, ʻo ʻikai ko e sekelitalí. ʻI he founga tatau, ko e ʻOtuá ʻa e Faʻutohi ʻo e Tohi Tapú, ʻo ʻikai ko e kau tangata naʻá ne ngāueʻaki ke nau tohi iá. Naʻe tataki kinautolu ʻe he ʻOtuá ke nau hiki ʻa ʻene ngaahi fakakaukaú. Ko e moʻoni ko e Tohi Tapú “ko e folofola ia ʻa e ʻOtuá.”​—1 Tesalonaika 2:13; sio ki he Fakamatala ʻi he Ngataʻangá 2.

6, 7. Ko e hā ʻoku lava ai ke tau pehē ʻoku feongoongoi ʻa e Tohi Tapú?

⁶ Naʻe feʻunga mo e taʻu ʻe 1,600 tupu ʻa hono hiki ʻa e Tohi Tapú. Ko e faʻahinga naʻa nau hikí naʻa nau moʻui ʻi he ngaahi taimi kehekehe. Naʻe ako lelei ʻa e niʻihi ka naʻe ʻikai ke ako lelei ʻa e niʻihi. Ko e fakatātaá, ko e toko taha ko ha toketā. Ko e niʻihi ko e kau ngoue, kau toutai, kau tauhi-sipi, kau palōfita, kau fakamaau, mo e ngaahi tuʻi. Neongo naʻe kehekehe ʻa e kau hiki-tohí, ʻoku feongoongoi ʻa e konga kotoa pē ʻo e Tohi Tapú. ʻOku ʻikai ke tala ai ha meʻa ʻi he vahe ʻe taha pea kehe ʻi he vahe ʻe taha.a

⁷ Ko e ʻuluaki ngaahi vahe ʻo e Tohi Tapú ʻoku fakamatala ai ki he anga ʻo e kamata ʻa e ngaahi palopalema ʻi he māmaní, pea ko e ngaahi vahe fakaʻosí ʻoku tala mai ai ʻa e founga ʻe solova ai ʻe he ʻOtuá ʻa e ngaahi palopalema ko iá ʻaki hono ngaohi ʻa e māmaní ko ha palataisi. ʻOku kāpui ʻi he Tohi Tapú ʻa e taʻu ʻe laui afe ʻo e hisitōlia ʻo e faʻahinga ʻo e tangatá pea fakahaaʻi ai ʻoku fakahoko maʻu pē ʻa e taumuʻa ʻa e ʻOtuá.

 8. ʻOmai ha ngaahi fakatātā ʻoku fakahaaʻi ai ʻoku tonu fakasaienisi ʻa e Tohi Tapú.

⁸ Naʻe ʻikai hiki ʻa e Tohi Tapú ke akoʻi ai ʻa e saienisí pe ke hoko ko ha tohi fakaako, ka ko e meʻa ʻoku leaʻaki ai ʻo fekauʻaki mo e ngaahi meʻa fakasaienisí ʻoku tonu maʻu pē. Ko e meʻa ia ʻoku tau ʻamanekina mei ha tohi ʻoku mei he ʻOtuá. Ko e fakatātaá, ko e tohi Livitikó ʻoku ʻi ai ʻa e ngaahi fakahinohino ʻa e ʻOtuá ki he ngaahi founga naʻe lava ke taʻofi ai ʻe he kau ʻIsilelí ʻa e mafola ʻa e mahakí. Naʻe hiki fuoloa eni ki muʻa ke ʻiloʻi ʻe he kakaí ʻa e anga hono fakatupunga ʻe he pekitīliá mo e ngaahi vailasí ʻa e mahakí. ʻOku toe akoʻi totonu ʻe he Tohi Tapú ʻoku tautau ʻa e māmaní ki he halaʻataá. (Siope 26:7) Pea ʻi he taimi naʻe tui ai ʻa e tokolahi taha ʻo e kakaí ʻoku lafalafa ʻa e māmaní, naʻe pehē ʻe he Tohi Tapú ia ʻoku fuopotopoto.​—ʻAisea 40:22.

 9. Ko e hā ʻokú ne tokoniʻi kitautolu ke tau mahinoʻi ʻi he faitotonu ʻa e kau hiki Tohi Tapú?

⁹ ʻI he taimi ʻoku fakamatala ai ʻa e Tohi Tapú ʻo fekauʻaki mo e hisitōliá, ʻoku tonu maʻu pē ia. Ka ʻoku ʻikai ke tonu fakaʻaufuli ʻa e ngaahi tohi hisitōlia lahi koeʻuhí naʻe ʻikai ke faitotonu ʻa honau kau hiki-tohí. Ko e fakatātaá, naʻe ʻikai te nau hiki maʻu pē ʻa e ngaahi taimi naʻe foʻi ai honau fonuá ʻi he taú. ʻI hono kehé, naʻe faitotonu ʻa e kau hiki Tohi Tapú naʻa mo e ʻi he taimi naʻe foʻi ai ʻa ʻIsilelí. Naʻa nau toe hiki foki ʻa ʻenau ngaahi fehālaakí tonu. Ko e fakatātaá, ʻi he tohi Nōmipá, ʻoku tala mai ai ʻe Mōsese naʻá ne fai ha fehālaaki mafatukituki pea naʻe pau ke akonakiʻi ia ʻe he ʻOtuá ʻi he meʻa ko iá. (Nōmipa 20:2-12) Ko e faitotonu ʻa e kau hiki Tohi Tapú ʻoku fakahaaʻi ai ko e Tohi Tapú ʻoku mei he ʻOtuá. ʻOku ʻuhinga ení ʻoku lava ke tau falala ki he Tohi Tapú.

10. Ko e hā ʻoku ʻaonga ai ʻa e faleʻi ʻa e Tohi Tapú kiate kitautolu ʻi he ʻaho ní?

¹⁰ Ko e Tohi Tapú “kuo fakamānavaʻi ia ʻe he ʻOtuá pea ʻoku ʻaonga ki he akonaki, ki he valoki, ki he fakatonutonu.” (2 Tīmote 3:16) ʻIo, ko e faleʻi ʻa e Tohi Tapú ʻoku ʻaonga ia kiate kitautolu ʻi he ʻahó ni. ʻOku ʻiloʻi ʻe Sihova ʻa e founga naʻe ngaohi ai kitautolú, ko ia ʻokú ne mahinoʻi ʻa e anga ʻo ʻetau fakakaukaú mo ʻetau ongoʻí. ʻOkú ne ʻiloʻi lelei ange kitautolu ʻiate kitautolu, pea ʻokú ne loto ke tau fiefia. ʻOkú ne ʻiloʻi ʻa e meʻa ʻoku lelei kiate kitautolú mo e meʻa ʻoku kovi kiate kitautolú.

11, 12. (a) Ko e hā ʻa e faleʻi lelei naʻe fai ʻe Sīsū ʻi he Mātiu vahe 5 ki he 7? (e) Ko e hā ha toe meʻa ʻoku lava ke tau ako mei he Tohi Tapú?

¹¹ ʻI he Mātiu vahe 5 ki he 7, ʻoku tau lau ai ʻa e faleʻi lelei ʻaupito naʻe fai ʻe Sīsū ki he founga ke hoko ai ʻo fiefiá, founga ke maʻu ai ha vahaʻangatae lelei mo e niʻihi kehé, founga ʻo hono fai ʻa e lotú, pea mo e founga ke vakai ʻaki ki he paʻangá. Neongo naʻá ne fai ʻa e faleʻi ko ení ʻi he taʻu ʻe 2,000 kuo maliu atú, ʻoku kei mālohi tatau pē ia mo ʻaonga ʻi he ʻahó ni.

¹² ʻI he Tohi Tapú, ʻoku toe akoʻi mai ai ʻe Sihova ʻa e ngaahi tefitoʻi moʻoni ʻoku tokoni kiate kitautolu ke maʻu ai ha moʻui fakafāmili ʻoku toe lelei ange, ke hoko ko e faʻahinga ʻoku ngāue lelei, pea ke nofo melino mo e niʻihi kehé. ʻOku lava ke tokoniʻi maʻu pē kitautolu ʻe he ngaahi tefitoʻi moʻoni ʻi he Tohi Tapú, ʻo tatau ai pē pe ko hai kitautolu, ko fē ʻoku tau nofo aí, pe ko e hā ʻa e ngaahi palopalema ʻoku tau maʻú.​—Lau ʻa e ʻAisea 48:17; sio ki he Fakamatala ʻi he Ngataʻangá 3.

13. Ko e hā naʻe tala ʻe ʻAisea ʻe hoko ki he kolo ko Pāpiloné?

¹³ Kuo ʻosi hoko moʻoni ʻa e ngaahi kikite lahi ʻi he Tohi Tapú. Ko e fakatātaá, naʻe kikiteʻi ʻe ʻAisea ʻe fakaʻauha ʻa Pāpilone. (ʻAisea 13:19) Naʻá ne fakamatalaʻi ʻa e founga tofu pē ʻe ikunaʻi ai ʻa e koló. Naʻe maluʻi ʻa e koló ʻe ha ngaahi fuʻu matapā lalahi mo ha vaitafe. Ka naʻe tomuʻa tala ʻe ʻAisea ʻe mātuʻu ʻa e vaitafé pea ʻe tuku fakaava ʻa e ngaahi matapaá. ʻE hamu ʻe he faʻahinga te nau fai ʻa e ʻohofí ʻa e koló ʻo ʻikai fai ha tau. Naʻe aʻu ʻo kikiteʻi ʻe ʻAisea ko ha tangata ko hono hingoá ko Kōlesi te ne ikunaʻi ʻa Pāpiloné.​—Lau ʻa e ʻAisea 44:27–45:2; sio ki he Fakamatala ʻi he Ngataʻangá 4.

14, 15. Naʻe anga-fēfē ʻa e hoko moʻoni ʻa e kikite ʻa ʻAiseá?

¹⁴ ʻI he taʻu ʻe 200 hili hono hiki ʻa e kikité, naʻe tūʻuta ai ha kau tau ʻo nau mateuteu ke ʻohofi ʻa Pāpilone. Ko hai naʻe taki ʻi he kau taú? Hangē tofu pē ko e lau ʻa e kikité, ko Kōlesi, ʻa e tuʻi ʻo Pēsiá. Naʻe fakapapauʻi ai ʻe hoko moʻoni ʻa e meʻa kotoa pē ʻi he toenga ʻo e kikité.

¹⁵ ʻI he pō naʻe fai ai ʻa e ʻohofí, naʻe fai ha fuʻu kātoanga kai ʻa e kau Pāpiloné. Naʻa nau ongoʻi malu he naʻe maluʻi kinautolu ʻe he ngaahi fuʻu ʻaá pea mo e vaitafé. ʻI tuʻa ʻi he koló, naʻe keli ai ʻe Kōlesi mo ʻene kau taú ha fakatafenga vai ke maha hifo ai ʻa e vai ʻo e vaitafé. Naʻe mamaha feʻunga ʻa e vaí ke aʻa atu ai ʻa e kau sōtia Pēsiá. Ka ʻe lava fēfē ke hū atu ʻa e kau taú ʻi he ngaahi ʻā ʻo Pāpiloné? Hangē tofu pē ko e lau ʻa e kikité, naʻe tuku fakaava ʻa e ngaahi matapā ʻo e koló, ko ia naʻe hamu ai ʻe he kau sōtiá ʻa e koló ʻo ʻikai ke fai ha tau.

16. (a) Ko e hā naʻe kikiteʻi ʻe ʻAisea fekauʻaki mo e kahaʻu ʻo Pāpiloné? (e) ʻOku anga-fēfē ʻetau ʻiloʻi naʻe hoko moʻoni ʻa e kikite ʻa ʻAiseá?

¹⁶ Naʻe kikiteʻi ʻe ʻAisea ʻe iku ʻo ʻikai ʻaupito ke toe nofo ha taha ʻi Pāpilone. Naʻá ne tohi: “ʻE ʻikai ʻaupito ke toe nofoʻi ia, pea ʻe ʻikai te ne hoko ko ha feituʻu ke fai ai ha nofo ʻi he ngaahi toʻutangatá kotoa.” (ʻAisea 13:20) Naʻe hoko moʻoni ia? ʻI he feituʻu naʻe tuʻu ai ʻa Pāpiloné, ʻi he maile nai ʻe 50 ki he tafaʻaki fakatonga ʻo Baghdad, ʻIulakí, ko e fokotuʻunga maumau pē ʻoku kei ʻi aí. Naʻa mo e ʻahó ni, ʻoku ʻikai ke nofo ai ha taha. Naʻe tafiʻi ʻe Sihova ʻa Pāpilone “ʻaki ʻa e taufale ʻo e fakaʻauhá.”​—ʻAisea 14:22, 23.b

17. Ko e hā ʻoku lava ai ke tau falala ki he ngaahi talaʻofa kotoa ʻa e ʻOtuá?

¹⁷ Ko e moʻoniʻi meʻa ko ia ʻa e ʻosi hoko moʻoni ʻa e ngaahi kikite lahi ʻi he Tohi Tapú ʻoku ʻuhinga iá ʻe lava ke tau falala ki he meʻa ʻoku tala ʻe he Tohi Tapú fekauʻaki mo e kahaʻú. ʻE lava ke tau fakapapauʻi ʻe fai ʻa Sihova ki heʻene talaʻofa ke ngaohi ʻa e māmaní ko ha palataisí. (Lau ʻa e Nōmipa 23:19.) ʻIo, ʻoku tau maʻu ʻa e ʻamanaki ʻo e “moʻui taʻengata naʻe talaʻofaʻaki ʻe he ʻOtuá, ʻa ia ʻoku ʻikai lava ke loí, ʻi ha taimi fuoloa ki muʻa.”​—Taitusi 1:2.c

18. ʻOku anga-fēfē hono fakamatalaʻi ʻe Paula ʻa e “folofola ʻa e ʻOtuá”?

¹⁸ Kuo tau ʻilo ʻoku ʻikai ha toe tohi ʻe hangē ko e Tohi Tapú. ʻOku feongoongoi, pea ʻi he taimi ʻoku fakamatala ai ʻo fekauʻaki mo e ngaahi meʻa fakasaienisí pe fakahisitōliá, ʻoku tonu maʻu pē ia. ʻOku toe ʻomai ai kiate kitautolu ʻa e faleʻi lelei pea ʻoku ʻi ai ʻa e ngaahi kikite lahi kuo ʻosi hoko moʻoni. Ka ʻoku fai ʻe he Tohi Tapú ʻa e meʻa lahi ange ia ai. Naʻe tohi ʻe he ʻapositolo ko Paulá: “Ko e folofola ʻa e ʻOtuá ʻoku moʻui pea ko e koto mālohi.” ʻOku ʻuhinga iá ki he hā?​—Lau ʻa e Hepelū 4:12.

19, 20. (a) ʻE lava fēfē ke tokoniʻi koe ʻe he Tohi Tapú ke ke ʻiloʻi ʻa koe tonu? (e) ʻE lava fēfē ke ke fakahāhā ʻokú ke fakamālōʻia ʻa e meʻaʻofa ko e Tohi Tapú?

¹⁹ ʻE lava ke liliu ʻe he Tohi Tapú ʻa hoʻo moʻuí. ʻE lava ke ne tokoniʻi koe ke ke ʻiloʻi moʻoni ʻa koe tonu. ʻE lava ke ne tokoniʻi koe ke ke mahinoʻi hoʻo ngaahi fakakaukau mo e ongoʻi loloto tahá. Ko e fakatātaá, te tau fakakaukau nai ʻoku tau ʻofa ki he ʻOtuá. Ka ke fakamoʻoniʻi ʻoku tau ʻofa kiate ia, ʻoku fiemaʻu ke tau ngāueʻaki ʻa e meʻa ʻoku leaʻaki ʻe he Tohi Tapú.

²⁰ Ko e moʻoni ko e Tohi Tapú ko ha tohi mei he ʻOtuá. ʻOkú ne fiemaʻu ke ke lau ia, ako ia, pea ʻofa ai. Fakamālōʻiaʻi ʻa e meʻaʻofa ko ení, pea hanganaki ako ia. Te ke toki mahinoʻi leva ai ʻa e taumuʻa ʻa e ʻOtuá ki he faʻahinga ʻo e tangatá. ʻI he vahe hono hokó, te tau ako ai ʻa e meʻa lahi ange fekauʻaki mo e taumuʻa ko ení.