“Te U ʻAʻeva ʻi Hoʻo Moʻoní”

1-3. (a) ʻOku totonu ke fēfē ʻetau ongoʻi fekauʻaki mo e moʻoni Fakatohitapú? Fakatātaaʻi. (Sio ki he ʻuluaki fakatātā ʻi he kupú ni.) (e) Ko e hā te tau lāulea ki ai ʻi he kupu ko ení?

ʻI HE ʻahó ni, ʻoku mātuʻaki angamaheniʻaki ai hono fakatau mai ʻe he kakaí ha meʻa mei ha falekoloa pea toe fakafoki. Pea ʻi he taimi ʻoku fakatau mai ai ʻe he kakaí ha meʻa ʻi he ʻinitanetí, ʻoku mātuʻaki ngalingali te nau fakafoki ia. Mahalo pē ʻoku ʻikai te nau saiʻia ʻi he meʻa naʻa nau fakatau maí ʻo hangē ko ia naʻa nau fakakaukau ki aí pe ʻoku fehālaaki nai ha meʻa ai. Ko ia ʻoku nau fakapapauʻi ke fakafetongi ʻaki ia ha meʻa pe kole ke fakafoki mai ʻenau paʻangá.

² Heʻikai ʻaupito ke tau fai eni ki he moʻoni Fakatohitapú. Ko ʻetau “fakatau mai” pē iá, ʻoku ʻikai ʻaupito te tau loto ke “fakatau atu” ia, ʻa ia, ko e taimi pē ʻoku tau ako ai ʻa e moʻoní, ʻoku ʻikai ʻaupito te tau loto ke tuku ange ia. (Lau ʻa e Palōveepi 23:23; 1 Tīm. 2:4) Hangē ko ia naʻa tau lāulea ki ai ʻi he kupu ki muʻá, naʻa tau fakamoleki ʻa e taimi lahi ke ako ʻa e moʻoní. Pehē foki, naʻa tau feilaulauʻi nai ha ngāue naʻa tau mei maʻu ai ha paʻanga lahi. Pea naʻe pau nai ke tau liliu hotau vahaʻangatae ʻe niʻihi mo e niʻihi kehé, liliu ʻa e anga ʻo ʻetau fakakaukaú mo e tōʻongá, pe tuku ʻa e kau ʻi he anga fakafonua mo e tōʻonga ʻoku ʻikai ke fakahōifua kia Sihova. Ka ʻoku tau tuipau ʻoku halaʻatā ke mahuʻinga tatau ha meʻa naʻa tau tuku ange mo e ngaahi tāpuaki ʻoku tau maʻu ʻi hono ʻiloʻi ʻa e moʻoní.

³ Naʻe fai ʻe Sīsū ha talanoa fakatātā fekauʻaki mo ha mēsianiti fefonongaʻaki naʻá ne fekumi ki ha ngaahi mataʻitofe lelei. ʻI hono ʻilo ʻe he tangatá ha mataʻitofe naʻe mahuʻinga ʻaupito, naʻá ne fakatau atu leva ʻa e meʻa kotoa pē naʻá ne maʻú koeʻuhi ke lava ʻo ne fakatau mai ʻaki ia. Ko e mataʻitofe ko iá ʻokú ne fakatātaaʻi ʻa e moʻoni fekauʻaki mo e Puleʻanga ʻo e ʻOtuá. ʻI he foungá ni, naʻe fakahaaʻi ai ʻe Sīsū ʻa e mahuʻinga ʻa e moʻoní ki he faʻahinga ʻoku nau fekumi ki aí. (Māt. 13:45, 46) ʻI heʻetau fuofua ako ʻa e moʻoní, ʻa ia, ko e moʻoni fekauʻaki mo e Puleʻanga ʻo e ʻOtuá mo e ngaahi moʻoni mahuʻinga kehe kotoa mei he Tohi Tapú, naʻa tau loto-lelei foki ke feilaulauʻi ha meʻa pē koeʻuhi ke maʻu mai ia. Kapau ʻoku hokohoko atu ʻetau fakamahuʻingaʻi ʻa e moʻoní, heʻikai ʻaupito ke tau tuku ange ia. Ka ko e meʻa fakamamahí, ko e kakai ʻe niʻihi ʻa e ʻOtuá kuo tuku ʻenau fakamahuʻingaʻi ʻa e moʻoní pea kuo aʻu ʻo nau tuku ange ia. ʻOku ʻikai ʻaupito te tau loto ke fai pehē! ʻOku fiemaʻu ke tau muimui ʻi he faleʻi ʻa e Tohi Tapú ke ‘hokohoko atu ʻetau ʻaʻeva ʻi he moʻoní.’ (Lau ʻa e 3 Sione 2-4.) ʻOku ʻuhinga iá ke tau fakamuʻomuʻa ʻa e moʻoní pea fakahaaʻi ʻa e meʻá ni ʻi heʻetau founga moʻuí. Ka ko e hā hono ʻuhingá pea ʻoku anga-fēfē nai hano “fakatau atu,” pe tuku ange ʻe ha tokotaha ʻa e moʻoní? ʻE lava fēfē ke tau fakapapauʻi heʻikai ʻaupito ke tau fai eni? Pea ʻe lava fēfē ke tau fakapapauʻi lahi ange ke ‘hokohoko atu ʻetau ʻaʻeva ʻi he moʻoní’?

 4. Ko e hā naʻe ʻikai hokohoko atu ai ʻa e ʻaʻeva ʻi he moʻoní ʻa e niʻihi ʻi he taimi ʻo Sīsuú?

⁴ ʻI he taimi ʻo Sīsuú, ko e niʻihi naʻa nau ʻuluaki tali ʻa e moʻoní naʻe ʻikai ke hokohoko atu ʻenau ʻaʻeva aí. Ko e fakatātaá, ʻi he hili hono fakahoko ʻe Sīsū ha mana mo fafanga ha fuʻu kakai tokolahi, naʻe muimui ʻa e fuʻu kakai ko iá ʻiate ia ki he tafaʻaki ʻe taha ʻo e Tahi Kālelí. Ka naʻe leaʻaki ʻe Sīsū ha meʻa naʻe oʻo kiate kinautolu: “Ka ʻikai te mou kai ʻa e kakano ʻo e Foha ʻo e tangatá mo inu hono totó, ʻe ʻikai ha moʻui ʻiate kimoutolu.” ʻI he ʻikai ke kole kia Sīsū ke ne fakamatalaʻi ʻa e meʻa naʻá ne ʻuhinga ki aí, naʻa nau pehē: “Ko e lea eni ʻoku oʻo; ko hai ia ʻe lava ke fanongo ki ai?” Ko hono olá, “naʻe foki ʻa e tokolahi ʻo ʻene kau ākongá ki he ngaahi meʻa kuo nau sītuʻa mei aí pea ʻikai ke nau kei ō holo mo ia.”​—Sione 6:53-66.

5, 6. (a) Ko e hā nai kuo mavahe ai ʻa e niʻihi ʻi hotau taimí mei he moʻoní? (e) ʻOku lava fēfē ke ʻauhia atu ha tokotaha mei he moʻoní?

⁵ Ko e meʻa fakamamahí, ʻi he ʻahó ni kuo mavahe foki ʻa e niʻihi mei he moʻoní. Ko e hā hono ʻuhingá? Kuo tūkia ha niʻihi ʻi ha liliu ʻi hono mahinoʻi ʻo ha veesi Fakatohitapu pe ko ha meʻa naʻe leaʻaki pe fai ʻe ha tokoua tuʻu-ki-muʻa. Ko e niʻihi naʻe ʻikai te nau saiʻia ʻi hono fai ange ʻe ha taha ha akonaki mei he Tohi Tapú pe naʻa nau taʻefelotoi lahi mo ha taha ʻi he fakatahaʻangá. Pea ko e niʻihi naʻa nau muimui ʻi he ngaahi akonaki loi ʻa e kau tafoki ʻo fakafepaki ki he moʻoní mo e niʻihi ʻoku nau tala ʻa e ngaahi loi fekauʻaki mo kitautolú. Ko ha ngaahi ʻuhinga eni kuo mavahe loto-lelei ai ʻa e niʻihi meia Sihova mo e fakatahaʻangá. (Hep. 3:12-14) He mei lelei ange ē kapau naʻa nau falala kia Sīsū, ʻo hangē ko ia naʻe fai ʻe Pitá! ʻI he oʻo ki he niʻihi ʻo e fuʻu kakaí ʻa e ngaahi lea ʻa Sīsuú, naʻe ʻeke ʻe Sīsū ki heʻene kau ʻapositoló pe ʻoku nau loto mo kinautolu foki ke mavahe. Naʻe tali ange ʻe Pita: “ʻEiki, ko hai te mau ʻalu ki aí? ʻOkú ke maʻu ʻa e ngaahi lea ʻo e moʻui taʻengatá.”​—Sione 6:67-69.

⁶ Kuo faai atu pē ʻo ʻauhia ʻa e niʻihi mei he moʻoní, mahalo pē naʻe ʻikai nai ke nau fakatokangaʻi ʻa e meʻa ʻoku hokó. Ko ha tokotaha ʻoku mavahe māmālie mei he moʻoní ʻokú ne hangē ko ha vaka ʻoku ʻauhia māmālie atu mei he veʻe vaitafé. ʻOku fakatokanga mai ʻa e Tohi Tapú ke tau tokanga ke “ʻoua ʻaupito naʻa tau ʻauhia atu.” (Hep. 2:1) Ko e meʻa ʻoku faʻa hokó ko ha tokotaha ʻoku ʻauhia atu mei he moʻoní naʻe ʻikai te ne taumuʻa ke fai pehē. Ka ʻokú ne fakaʻatā ʻa ʻene kaumeʻa mo Sihová ke hoko ʻo vaivai, pea ʻe mole nai ia ʻi ha taimi. ʻE lava fēfē ke tau fakapapauʻi heʻikai ʻaupito ke hoko eni kiate kitautolu?

 7. Ko e hā te ne tokoniʻi kitautolu ke ʻoua ʻaupito naʻa tau fakatau atu ʻa e moʻoní?

⁷ Ke hokohoko atu ʻa e ʻaʻeva ʻi he moʻoní, kuo pau ke tau tali mo talangofua ki he meʻa kotoa pē ʻoku folofolaʻaki ʻe Sihová. Kuo pau ke tau ʻai ʻa e moʻoní ko e meʻa mahuʻinga taha ia ʻi heʻetau moʻuí pea muimui ʻi he ngaahi tefitoʻi moʻoni Fakatohitapú ʻi he meʻa kotoa pē ʻoku tau faí. ʻI ha lotu, naʻe palōmesi ai ʻa Tuʻi Tēvita kia Sihova: “Te u ʻaʻeva ʻi hoʻo moʻoní.” (Saame 86:11) Naʻe fakapapauʻi ʻe Tēvita ke ne hanganaki ʻaʻeva ʻi he moʻoní, pea kuo pau ke tau fai pehē foki mo kitautolu. Kapau heʻikai, ʻe lava ke tau kamata fakakaukau fekauʻaki mo e ngaahi meʻa naʻa tau tuku ange koeʻuhi ko e moʻoní pea ʻe aʻu nai ʻo tau loto ke toe fakafoki mai ha niʻihi ʻo e ngaahi meʻa ko iá. Ka heʻikai lava ke tau fili pe ko fē ʻa e ngaahi moʻoni Fakatohitapu ke talí mo ia ke liʻakí. Kuo pau ke tau ʻaʻeva ʻi he “kotoa ʻo e moʻoní.” (Sione 16:13) ʻI he kupu ki muʻá, naʻa tau lāulea ai ki he meʻa ʻe nima kuo tau feilaulauʻi nai koeʻuhi ke ako mo ngāueʻaki ʻa e moʻoní. Te tau sio leva he taimí ni ki he founga ʻe lava ke tau fakapapauʻi ai heʻikai ʻaupito ke tau toe foki ki he ngaahi meʻa naʻa tau liʻakí.​—Māt. 6:19.

 8. ʻE lava fēfē ke ʻai ha Kalisitiane ʻe he founga ʻo ʻene ngāueʻaki ʻa hono taimí ke ne ʻauhia atu mei he moʻoní? ʻOmai ha fakatātā.

⁸ Taimi. Ke fakapapauʻi heʻikai ʻaupito ke tau ʻauhia atu mei he moʻoní, kuo pau ke tau hanganaki ngāue fakapotopoto ʻaki hotau taimí. Kapau ʻoku ʻikai ke tau tokanga, ʻe lava ke tau fakamoleki ʻa e taimi lahi ʻi he fakafiefiá, vaʻingá, sio takai ʻi he ʻInitanetí, pe ko e sio televīsoné. Neongo ʻoku ʻikai ʻaupito ke hala ʻa e ngaahi meʻá ni, ʻe lava ke tau fakamoleki ki ai ʻa e taimi naʻa tau ngāueʻaki ki muʻa ʻi he akó mo e ngāue fakafaifekaú. Naʻe hoko ha meʻa hangē ko ení kia Emma.a (Sio ki he fakamatala ʻi lalo.) Talu mei heʻene kei siʻi mo ʻene saiʻia he fanga hōsí peá ne heka ai ʻi ha taimi pē naʻe malava. Ka naʻe kamata ke ne ongoʻi halaia ʻi he lahi ʻo e taimi naʻá ne fakamoleki ʻi he meʻa naʻá ne manako aí peá ne fili ke liliu ʻa e ngaahi meʻa naʻá ne fakamuʻomuʻá. Naʻe toe ako foki ʻa Emma mei he hokosia ʻa Cory Wells, ko ha tuofefine naʻe faʻa kau ʻi ha fakaʻaliʻali ʻo e heka ʻi ha fanga hoosi hehengi.b (Sio ki he fakamatala ʻi lalo.) ʻOku fakamoleki ʻe Emma he taimí ni ʻa e taimi lahi ange ʻi he tauhi kia Sihová, pea ʻokú ne maʻu ʻa e taimi lahi ange ke fakamoleki ki hono fāmilí mo e ngaahi kaumeʻa ʻoku nau tauhi foki kiate Iá. ʻOkú ne ongoʻi ofi ange ai ki he ʻOtuá pea ʻokú ne fiefia ʻi he ʻiloʻi ʻokú ne ngāue fakapotopoto ʻaki ʻa hono taimí.

 9. ʻE lava fēfē ke hoko ʻo fuʻu mahuʻinga kiate kitautolu ʻa e ngaahi meʻa fakamatelié?

⁹ Ngaahi meʻa fakamatelié. Ke hokohoko atu ʻa e ʻaʻeva ʻi he moʻoní, heʻikai lava ke tau fakaʻatā ke hoko ʻo fuʻu mahuʻinga kiate kitautolu ʻa e ngaahi meʻa fakamatelié. ʻI heʻetau ako ʻa e moʻoní, naʻa tau ʻiloʻi ko e tauhi kia Sihová ʻoku mahuʻinga lahi ange ia ʻi he ngaahi meʻa fakamatelié, pea naʻa tau fiefia ke tuku ange ha meʻa pē ʻi he ngaahi meʻa ko iá koeʻuhi ko e moʻoní. Ka ʻi he faai mai ʻa e taimí, te tau sio nai ai ki hono fakatau mai ʻe he niʻihi kehé ʻa e ngaahi meʻa fakaʻilekitulōnika fakamuimui tahá pe maʻu ʻa e ngaahi meʻa kehe ʻoku lava ke fakatau mai ʻaki ʻa e paʻangá. ʻE lava ke tau kamata ke ongoʻi ʻoku tau tō mei ai. Heʻikai nai ke tau kei fiemālie ʻi he meʻa ʻoku tau maʻú pea kamata ke tau tokangataha ange ki hono maʻu ʻa e ngaahi meʻa fakamatelié ʻi he tauhi kia Sihová. ʻOku fakamanatu mai heni ʻa e meʻa naʻe hoko kia Tīmasí. Naʻá ne ʻofa lahi “ʻi he ngaahi meʻa ʻo e fokotuʻutuʻu lolotongá” ʻo ne tuku ange ai ʻa e vāhenga-ngāue naʻá ne maʻu mo e ʻapositolo ko Paulá. (2 Tīm. 4:10) Mahalo pē naʻe ʻofa ʻa Tīmasi ʻi he ngaahi meʻa fakamatelié ʻo laka ange ia ʻi heʻene ʻofa ʻi he ngāue ki he ʻOtuá. Pea mahalo pē naʻe ʻikai te ne kei loto ke fai ha ngaahi feilaulau koeʻuhi ke ngāue mo Paula. Ko e hā ʻa e lēsoni kiate kitautolú? Mahalo pē naʻa tau ʻofa moʻoni ʻi he kuohilí ʻi he ngaahi meʻa fakamatelié. Kapau ʻoku ʻikai ke tau tokanga, ʻe lava ke toe tupulaki ʻiate kitautolu ʻa e ʻofa ko iá pea hoko ʻo mātuʻaki mālohi ʻo mole ai ʻa ʻetau ʻofa ki he moʻoní.

10. Ko e hā ʻa e tākiekina kuo pau ke tau talitekeʻí?

¹⁰ Vahaʻangatae mo e niʻihi kehé. Ke hanganaki ʻaʻeva ʻi he moʻoní, kuo pau ke ʻoua naʻa tau fakaʻatā ʻa e faʻahinga ʻoku ʻikai te nau tauhi kia Sihová ke nau tākiekina kitautolu. ʻI heʻetau ako ʻa e moʻoní, naʻe liliu ʻa hotau vahaʻangatae mo hotau kaungāmeʻa ʻoku ʻikai ko e Kau Fakamoʻoní pea mo e ngaahi mēmipa ʻo e fāmilí. Mahalo pē naʻe fakaʻapaʻapaʻi ʻe he niʻihi ʻa ʻetau tui foʻoú, ka kuo fakafepakiʻi nai ia ʻe he niʻihi. (1 Pita 4:4) Ko e moʻoni, ʻoku tau feinga ʻaki ʻetau lelei tahá ke maʻu ha vahaʻangatae lelei mo e ngaahi mēmipa ʻo hotau fāmilí pea anga-lelei kiate kinautolu. Ka heʻikai lava ke tau tukunoaʻi ʻa e ngaahi tuʻunga ʻa Sihová koeʻuhi ke fakahōhōʻiaʻi kinautolu. Pea hangē ko ia ʻoku tau ako mei he 1 Kolinitō 15:33, ʻoku totonu ko hotau ngaahi kaumeʻa ofí ko e kakai ʻoku nau ʻofa kia Sihová.

11. ʻE lava fēfē ke tau fakaʻehiʻehi mei he ngaahi fakakaukau mo e tōʻonga taʻemaʻá?

¹¹ Fakakaukau mo e tōʻonga taʻemaʻa. Ke ʻaʻeva ʻi he moʻoní, ʻoku fiemaʻu ke tau māʻoniʻoni, pe maʻa, ʻi he vakai mai ʻa Sihová. (ʻAi. 35:8; lau ʻa e 1 Pita 1:14-16.) ʻI heʻetau ako ʻa e moʻoní, naʻa tau fai ha ngaahi liliu ʻi heʻetau moʻuí koeʻuhi ke muimui ʻi he ngaahi tuʻunga Fakatohitapú. Naʻe fai ʻe he niʻihi ʻa e ngaahi liliu lalahi. Ka ʻoku kei fiemaʻu pē ke tau tokanga ke ʻoua ʻaupito naʻa tau fakafetongi ʻa ʻetau moʻui maʻá ʻaki ha moʻui taʻetaau. Ko e hā ʻe lava ke ne tokoniʻi kitautolu ke talitekeʻi ha fakatauele pē ke fai ha meʻa taʻetaau? Fakakaukau fekauʻaki mo e meʻa naʻe tuku ange ʻe Sihova koeʻuhi ke lava ʻo tau māʻoniʻoní. Naʻá ne foaki ʻa e moʻui mahuʻinga ʻa hono ʻAlo ʻofaʻangá, ʻa Sīsū Kalaisi! (1 Pita 1:18, 19) Ke tokoniʻi kitautolu ke tau hanganaki maʻa ʻi he vakai mai ʻa Sihová, ʻoku fiemaʻu maʻu pē ke tau manatuʻi ʻa e mahuʻinga ʻo e feilaulau huhuʻi ʻa Sīsuú.

12, 13. (a) Ko e hā kuo pau ai ke tau vakai ki he ngaahi ʻaho mālōloó ʻo hangē ko e vakai ʻa Sihová? (e) Ko e hā te tau hoko atu ʻo lāulea ki aí?

¹² Ngaahi anga fakafonua mo e tōʻonga ʻoku ʻikai fakahōifua ki he ʻOtuá. Ko e ngaahi mēmipa ʻo e fāmilí, kaungāngāué, mo e kaungāakó te nau feinga nai ke ʻai ke tau kau mo kinautolu ʻi heʻenau ngaahi kātoangá. Ko e hā ʻe lava ke ne tokoniʻi kitautolu ke tau talitekeʻi ʻa e tenge ke kau ʻi he ngaahi anga fakafonua mo e ʻaho mālōlō ʻoku ʻikai ke hōifua ki ai ʻa Sihová? ʻOku fiemaʻu ke tau hanganaki ʻai ke mahino ki hotau ʻatamaí ʻa e ngaahi ʻuhinga ʻoku ʻikai ke hōifua ai ʻa Sihova ki he ngaahi ʻaho mālōlō ko ení. ʻE lava ke tau fai ha fekumi ʻi heʻetau ʻū tohí pea fakamanatuʻi ʻiate kitautolu ʻa e founga naʻe kamata ai ha ngaahi ʻaho mālōlō pau. ʻI heʻetau fakalaulauloto ki he ngaahi ʻuhinga Fakatohitapu ʻoku ʻikai ke tau kātoangaʻi ai ʻa e ngaahi ʻaho mālōlō ko ení, ʻoku tau ongoʻi papau ai ʻoku tau ʻaʻeva ʻi he hala ʻa ia “ʻoku fakahōifua ki he ʻEikí.” (ʻEf. 5:10) Kapau ʻoku tau falala kia Sihova mo ʻene Folofolá, heʻikai ke tau ilifia ʻi he meʻa ʻoku fakakaukau ki ai ʻa e kakai kehé.​—Pal. 29:25.

¹³ ʻOku tau ʻamanaki atu ke hanganaki ʻaʻeva ʻi he moʻoní ʻo taʻengata. Ko e hā ʻe lava ke ne tokoniʻi kitautolu ke tau fakapapauʻi lahi ange ai ke hanganaki ʻaʻeva ʻi he moʻoní? Ko e meʻa eni ʻe tolu ʻe lava ke tau fai.

14. (a) ʻE anga-fēfē hono tokoniʻi kitautolu ʻi he hokohoko atu hono ako ʻa e Tohi Tapú ke tau fakapapauʻi ke ʻoua ʻaupito naʻa tau tuku ange ʻa e moʻoní? (e) Ko e hā ʻoku fiemaʻu ai kiate kitautolu ʻa e potó, akonakí, mo e mahinó?

¹⁴ ʻUluakí, hokohoko atu hono ako ʻa e Tohi Tapú pea fakakaukau lahi fekauʻaki mo e meʻa ʻokú ke akó. Fakataimitēpileʻi maʻu pē ha taimi ki he meʻá ni. Ko e lahi ange hoʻo akó, ko e lahi ange ia hoʻo ʻofa ki he moʻoní pea fakapapauʻi ke ʻoua ʻaupito naʻa tuku ange iá. ʻOku tala mai ʻe he Palōveepi 23:23 ke tau “fakatau mai ʻa e moʻoní” pea toe fakatau mai ʻa e “potó mo e akonakí pea mo e mahinó.” ʻOku ʻikai feʻunga pē ke ʻilo ʻa e moʻoni Fakatohitapú. ʻOku fiemaʻu ke tau ngāueʻaki ia ʻi heʻetau moʻuí. ʻI heʻetau maʻu ʻa e mahinó, ʻoku tau fakatahaʻi ʻa e ngaahi meʻa ʻoku tau akó mo e ngaahi meʻa kuo tau ʻosi ʻiló. ʻOku ueʻi kitautolu ʻe he potó ke tau ngāue ki he meʻa ʻoku tau ʻiló. ʻI he taimi ʻe niʻihi ʻoku akonakiʻi kitautolu ʻe he moʻoní ʻaki hono fakahaaʻi mai ha ngaahi liliu ʻoku fiemaʻu ke tau fai. ʻOku fiemaʻu ke tau vave ke tali ʻa e akonaki ko iá, ʻa ia ʻoku pehē ʻe he Tohi Tapú ʻoku mahuʻinga ange ia ʻi he silivá.​—Pal. 8:10.

15. ʻOku anga-fēfē hono maluʻi kitautolu ʻe he moʻoní ʻo hangē ha letá?

¹⁵ Uá, fakapapauʻi ke ngāueʻaki ʻa e moʻoní ʻi hoʻo moʻui fakaʻahó. ʻOku fakahoa ʻe he Tohi Tapú ʻa e moʻoní ki he leta ʻo ha sōtia. (ʻEf. 6:14) ʻI he taimi ʻo e Tohi Tapú, ko ha leta ʻo ha sōtia naʻe tokoni mo maluʻi ia ʻi he taú ʻo kapau naʻe maʻu. Kapau naʻe ngatōtō, heʻikai tokoni ia kiate ia. ʻOku anga-fēfē hono maluʻi kitautolu ʻe he moʻoní ʻo hangē ha letá? Kapau ʻoku tau tauhi maʻu ʻa e moʻoni Fakatohitapú ʻi he taimi kotoa pē, te ne maluʻi kitautolu mei ha fakakaukau hala pea te ne tokoniʻi kitautolu ke tau fai ha ngaahi fili lelei. ʻI heʻetau maʻu ha palopalema mafatukituki pe fakataueleʻi ke tau fai ha meʻa ʻoku hala, ʻe ʻai kitautolu ʻe he moʻoni Fakatohitapú ke tau fakapapauʻi lahi ange ke fai ʻa e meʻa ʻoku totonú. Hangē pē ko e ʻalu ʻa ha sōtia ʻi he taú heʻikai ʻaupito te ne liʻaki ʻa hono letá, heʻikai ʻaupito te tau tuku ange ʻa e moʻoní. ʻOku tau fakapapauʻi ke ngāueʻaki ʻa e moʻoni Fakatohitapú ʻi he tafaʻaki kotoa ʻo ʻetau moʻuí. Naʻe fakamaʻu foki ʻe ha sōtia ʻa ʻene heletaá ʻi hono letá. Tau sio angé ki he founga ʻe lava ai ke tau fai ha meʻa meimei tatau.

16. ʻOku anga-fēfē hono tokoniʻi kitautolu ʻe hono akoʻi ʻa e moʻoní ke tau hanganaki ʻaʻeva ʻi he moʻoní?

¹⁶ Tolú, akoʻi ʻa e moʻoni Fakatohitapú ki he niʻihi kehé ʻi he lahi taha ʻo hoʻo malavá. ʻOku fakahoa ʻa e Tohi Tapú ki ha heletā. Hangē pē ko e hanganaki piki maʻu ha sōtia lelei ki heʻene heletaá, ʻoku fiemaʻu ke tau hanganaki piki ke maʻu ki he Folofola ʻa e ʻOtuá. (ʻEf. 6:17) ʻOku lava ke tau hoko kotoa ko e kau faiako lelei ange, ʻi hono “tofa totonu ʻa e folofola ʻo e moʻoní.” (2 Tīm. 2:15) ʻI heʻetau ngāueʻaki ʻa e Tohi Tapú ke akoʻi ʻa e niʻihi kehé, ʻoku tau hoko ai ʻo ʻilo mo ʻofa ʻo toe lahi ange ʻi he moʻoní. Pea ʻoku tau hoko ʻo fakapapauʻi lahi ange ai ke hanganaki ʻaʻeva ʻi he moʻoní.

17. Ko e hā ʻoku mahuʻinga ai kiate koe ʻa e moʻoní?

¹⁷ Ko e moʻoní ko ha meʻaʻofa mahuʻinga ia meia Sihova. ʻOkú ne ʻai ke tau malava ʻo maʻu ha vahaʻangatae vāofi mo ʻetau Tamai fakahēvaní. Ko e meʻa mahuʻinga taha ia ʻoku lava ke tau maʻú. Kuo ʻosi akoʻi lahi kitautolu ʻe Sihova, ka ko e kamataʻangá pē ia! ʻOkú ne talaʻofa mai te ne hanganaki akoʻi kitautolu ʻo taʻengata. Ko ia, koloaʻaki ʻa e moʻoní ʻo hangē ko haʻo koloaʻaki ha mataʻitofe mahuʻingá. Hokohoko atu hono “fakatau mai ʻa e moʻoní pea ʻoua ʻaupito naʻa fakatau atu ia.” Pea ʻi he hangē ko Tēvitá, te ke fai ki he palōmesi ko eni kia Sihová: “Te u ʻaʻeva ʻi hoʻo moʻoní.”​—Saame 86:11.