“Ko e Folofola ʻa e ʻOtua, ko e . . . Koto Malohi”

¹ “Ko e folofola ʻa e ʻOtua, ko e koto moʻui mo e koto malohi,” ko e tohi ia ʻa e ʻapositolo ko Paulá. (Hep. 4:12) Ko e hā ʻene ʻuhinga ki aí? Ko e folofola ʻa e ʻOtuá, pe pōpoaki, ʻoku maʻu ʻi he Tohitapú, ʻe lava ke ʻi ai ʻene tākiekina mālohi ʻi he kakaí. Ko e poto ʻoku maʻu ʻi he Tohitapú ʻoku ʻi ai hono mālohi ke ne liliuʻi ʻa e moʻui ʻa ha taha ke lelei ange. Ko e fakafiemālie mo e ʻamanaki ʻoku ʻomai aí ʻoku tohoakiʻi ai ʻa e faʻahinga ʻo e tangatá ki he Tokotaha Foaki-Moʻuí, ʻa Sihova ko e ʻOtuá. Ko ʻene pōpoakí ʻoku lava ke kamata ai ʻa e faʻahinga loto-totonú ke ʻalu ʻi he hala ʻoku taki atu ki he moʻui taʻengatá. Kae kehe, ke sio ki he ngaahi ola ko ʻení, kuo pau ke tau ngāueʻaki ʻa e Tohitapú ʻi heʻetau faifakamoʻoni ki he niʻihi kehé.

² Lau ha Konga Tohitapu ʻi he Faingamālie Kotoa Pē: ʻOku hā mai ʻoku ʻi ai ʻa e kau malanga tokolahi ʻoku ʻikai te nau angaʻaki ʻa hono ngāueʻaki ʻa e Tohitapú ʻi he matapaá. ʻOku hoko ia kiate koe? Koeʻuhi ko e kakai tokolahi ʻoku ngalingali heʻikai te nau maʻu ha taimi ki ha talanoa fuoloa, mahalo ʻokú ke angaʻaki pē ʻa hono tuʻuaki ʻa e ngaahi tohí pe ko hono fakamatalaʻi pē ha konga Tohitapu. ʻOku mau fakalototoʻaʻi ʻa e kau malanga kotoa pē ke nau fai ha feinga fakamātoato ke lau ʻo ʻoua ʻe toe siʻi hifo ʻi he veesi ʻe taha mei he Tohitapú ʻi hono ʻoatu ʻa e ongoongo leleí, ʻoku fakaʻatā ai ʻa e tokotahá ke ne sio ko ʻetau pōpoakí ʻoku moʻoni ʻoku maʻu ʻi he Folofola ʻa e ʻOtuá.

³ Neongo ʻoku tōʻongaʻaki ʻe ha kakai tokosiʻi ʻa hono lau ʻo e Tohitapú, ʻoku kei tokaʻi pē ia. Naʻa mo e kakai femoʻuekiná te nau faʻa fakamoleki ha miniti ʻe taha pe ua ke fanongo ai ki ha pōpoaki ʻoku lau fakahangatonu atu mei he Folofola ʻa e ʻOtuá. ʻI hano lau ha konga Tohitapu feʻungamālie fakataha mo e loto-māfana pea fakamatalaʻi nounoú, ko e mālohi ʻo e folofola ʻa Sihová ʻe lava ke maʻu ai ha ola lelei ʻi he tokotaha fanongó. Ka ʻe lava fēfē ke ke fakahoko mei hoʻo ʻuluaki fakamatalá ki hano lau ha veesi mei he Tohitapú?

⁴ ʻAhiʻahi ʻEni ʻi he Ngāue Makasiní: ʻOku ngāueʻaki ola lelei ʻe ha ʻovasia fefonongaʻaki ʻa e ngaahi Konga Tohitapú ʻi heʻene kau ʻi he ngāue makasiní. ʻOkú ne faʻo ha Tohitapu siʻisiʻi ʻi hono kató. ʻI he hili ʻa hono fakaʻaliʻali ha ongo makasini pea fakaeʻa nounou ha kupu, ʻokú ne fakaava hake ʻa e Tohitapú ʻo ʻikai toe tatali peá ne lau ha veesi ʻoku feʻunga mo e kupú. ʻE fai nai ʻeni ʻaki hono ʻeke ange, “Ko e hā hoʻo fakakaukau fekauʻaki mo e talaʻofa fakalototoʻa ko ʻení?” pea hoko atu leva ʻo lau ha konga Tohitapu kuo ʻosi fili.

⁵ ʻAi ko hoʻo taumuʻá ia ke fevahevaheʻaki ha veesi ʻe taha pe ua mei he Tohitapú mo e tokotaha fanongo kotoa pē. Ko hono mālohi fakaueʻilotó ʻe lava ke ne fakaava ai ʻa e hala ki ha kakai tokolahi ange ke nau ʻunuʻunu ki he ʻOtuá.—Sione 6:44.