Founga ke Tauhi Maʻu Ai ʻa e Laumālie Feilaulauʻi-Kitá

 1. Naʻe anga-fēfē hono fokotuʻu ʻe Sīsū ha faʻifaʻitakiʻanga haohaoa ʻo e feilaulauʻi-kitá?

ʻI HE taimi naʻe ʻi māmani ai ʻa Sīsuú, naʻá ne fokotuʻu ha faʻifaʻitakiʻanga haohaoa ʻo e feilaulauʻi-kitá. Naʻá ne fakamuʻomuʻa ʻa e finangalo ʻo e ʻOtuá ʻi heʻene ngaahi holí mo ʻene ngaahi fiemālie ʻaʻaná. (Sione 5:30) ʻI he nofoʻaki faitōnunga ʻo aʻu ki he mate ʻi he ʻakau fakamamahí, naʻá ne fakamoʻoniʻi ai naʻe ʻikai ha fakangatangata ki he meʻa naʻá ne loto-lelei ke feilaulauʻi maʻá e niʻihi kehé.—Fil. 2:8.

 2. ʻE lava fēfē ke tau maʻu ha laumālie feilaulauʻi-kita? Ko e hā ʻoku totonu ai ke tau maʻu iá?

² ʻI he tuʻunga ko e kau muimui ʻo Sīsuú, ʻoku fiemaʻu foki kia kitautolu ke fakahāhā ʻa e laumālie feilaulauʻi-kitá. Ko e hā ʻa e ʻuhinga ʻo hono maʻu ha laumālie feilaulauʻi-kitá? ʻOku ʻuhinga iá ʻoku loto-lelei ha taha ke siʻaki ʻa ʻene ngaahi meʻa ʻaʻaná koeʻuhí ke tokoni ai ki he niʻihi kehé. ʻI ha founga, ko e fehangahangai ia ʻo e siokitá. (Lau ʻa e Mātiu 16:24.) Ko e hoko ʻo taʻesiokitá ʻe lava ke ne tokoniʻi kitautolu ke fakamuʻomuʻa ʻa e ngaahi ongoʻi mo e ngaahi saiʻia fakafoʻituitui ʻa e niʻihi kehé ʻi haʻatautolú. (Fil. 2:3, 4) Naʻe akoʻi ʻe Sīsū ko e taʻesiokitá ko e konga mahuʻinga ia ʻo ʻetau lotú. Anga-fēfē? Ko e ʻofa faka-Kalisitiané ʻokú ne ueʻi kitautolu ke tau maʻu ha laumālie feilaulauʻi-kita. Ko e ʻofa ko ení ʻa e meʻa ʻoku ʻiloʻiʻaki ʻa e kau ākonga moʻoni ʻa Sīsuú. (Sione 13:34, 35) Fakakaukau ki he ngaahi tāpuaki ʻoku tau maʻu koeʻuhí ko ʻetau hoko ko e konga ʻo ha fetokouaʻaki ʻi māmani lahi ʻoku fakahāhā ai ʻa e laumālie feilaulauʻi-kitá!

 3. Ko e hā ʻe lava ke ne fakavaivaiʻi ʻa e laumālie feilaulauʻi-kita ʻoku tau maʻú?

³ Ka, ʻoku tau fehangahangai mo ha fili ʻe lava ke ne fakavaivaiʻi māmālie ʻa e laumālie feilaulauʻi-kita ʻoku tau maʻú. Ko e fili ko iá ko ʻetau hehema ke siokitá. Fakakaukau ki he founga naʻe siokita ai ʻa ʻĀtama mo ʻIví. Naʻe fakahāhā ʻe ʻIvi ha holi siokita ke hangē ko e ʻOtuá, pea ko hono husepānití naʻá ne fakahāhā ha holi siokita ke fakahōhōʻiaʻi ʻa ʻIvi. (Sēn. 3:5, 6) Hili hono fakatafokiʻi ʻa ʻĀtama mo ʻIvi mei he lotu moʻoní, naʻe hokohoko atu ʻa e Tēvoló ke fakataueleʻi ʻa e kakaí ke nau hoko ʻo siokita. Naʻe aʻu ʻo ne feinga ke fai eni kia Sīsū. (Māt. 4:1-9) ʻI he ʻahó ni, kuo lavameʻa ʻa Sētane ʻi hono takihalaʻi ʻa e tokolahi taha ʻo e kakaí, pea ʻokú ne tākiekina kinautolu ke fakahāhā ʻa e siokitá ʻi he ngaahi founga lahi. Kapau heʻikai ke tau tokanga, ko e fakakaukau siokita ʻo e māmani ko ení ʻe lava ke ne uesia mo kitautolu foki.—ʻEf. 2:2.

 4. (a) ʻE lava ke tau toʻo atu ʻa e ngaahi hehema siokitá? Fakamatalaʻi. (e) Ko e hā ʻa e ongo fehuʻi te tau lāulea ki aí?

⁴ Ko e siokitá ʻe lava ke fakahoa ia ki he ʻumeʻumeá. Kapau ʻoku ʻasi ha meʻa ukamea ki he ʻeá mo e vaí, ʻe kamata nai ke ʻumeʻumea. Ko hono tukunoaʻi ʻa e ʻumeʻumeá ʻoku mātuʻaki fakatuʻutāmaki koeʻuhí kapau ʻe tuku ia ke totolo, ʻe lava ke ne fakatupunga ha meʻa kuo langa ke holofa. ʻI he tuʻunga meimei tatau, neongo ʻoku ʻikai lava ke tau toʻo atu ʻetau taʻehaohaoá mo e ngaahi hehema siokitá, kuo pau ke hokohoko atu ʻetau tauʻi ʻa e ngaahi hehema ko ení. Kapau heʻikai ke tau tokanga, ko e laumālie feilaulauʻi-kita ʻoku tau maʻú ʻe uesia ia. (1 Kol. 9:26, 27) ʻE lava fēfē ke tau ʻiloʻi ʻa e ngaahi fakaʻilonga ʻo e siokitá ʻia kitautolu? Pea ʻe lava fēfē ke toe lelei ange ʻetau fakahāhā ʻa e fakakaukau feilaulauʻi-kitá?

 5. (a) ʻOku anga-fēfē ʻa e hangē ʻa e Tohi Tapú ko ha sioʻatá? (Sio ki he ʻuluaki fakatātā ʻi he kupú ni.) (e) ʻI hono vakaiʻi kitautolu pe ʻoku tau siokitá, ko e hā kuo pau ke tau fakaʻehiʻehi mei aí?

⁵ Hangē pē ko e lava ke tau ngāueʻaki ha sioʻata ke vakaiʻi ʻaki ʻa e anga hotau fōtungá, ʻe lava ke tau ngāueʻaki ʻa e Tohi Tapú ke vakaiʻi ʻaki hotau angaʻitangatá pea fakatonutonu ha ngaahi mele pē te tau ʻilo nai ai. (Lau ʻa e Sēmisi 1:22-25.) Kae kehe, ʻe tokoni ha sioʻata kia kitautolu ʻi hotau fōtungá ʻo kapau pē ʻoku tau ngāueʻaki totonu ia. Ko e fakatātaá, kapau ʻoku tau sio fakavave ki ha sioʻata, heʻikai nai ke tau fakatokangaʻi ha kiʻi tamele siʻisiʻi ka ʻoku mafatukituki ʻi hotau fōtungá. Pe kapau ʻoku tau tuʻu mei ha tuliki ʻo sio ki ha sioʻata, te tau sio nai ki ha ʻīmisi ʻo ha taha kehe. ʻI he founga tatau, ke ngāueʻaki ʻa e Tohi Tapú ke vakaiʻi ʻaki ha palopalema ʻoku tau maʻu hangē ko e siokitá, ʻoku totonu ke tau fai ʻa e meʻa lahi ange ʻi hono lau fakavave pē pe ngāueʻaki ia ke sio ai ki he ngaahi mele ʻi ha taha kehe.

 6. ʻOku anga-fēfē ʻetau hokohoko atu ʻi he lao haohaoá?

⁶ Ko e fakatātaá, ʻe lava ke tau lau ʻa e Folofola ʻa e ʻOtuá ʻi he ʻaho kotoa pē pea kei ʻikai pē ke tau sio ki he ngaahi hehema siokita ʻoku tupulaki ʻi loto ʻia kitautolú. ʻOku malava fēfē ia? Fakakaukau ki he meʻá ni: ʻI he talanoa fakatātā fekauʻaki mo e tangata “ʻokú ne sio atu kiate ia” ʻi he sioʻatá, naʻe ngāueʻaki ʻe Sēmisi ha foʻi lea faka-Kalisi ʻoku ʻuhingá ko e sivisiviʻi fakalelei. Ko ia naʻe sio fakalelei ʻa e tangatá ki he sioʻatá, ka naʻe kei ʻi ai pē ha palopalema. Naʻe hoko atu ʻa Sēmisi: “Peá ne mavahe atu ʻo ʻalu pea ngalo leva ai pe ko e faʻahinga tokotaha fēfē ia.” ʻIo, naʻá ne tafoki mei he sioʻatá ʻo ʻikai fai ha ngāue fekauʻaki mo e meʻa naʻá ne sio ki aí. ʻI hono kehé, ko e tangata lavameʻá ʻoku ʻikai ngata pē ʻi heʻene “sio fakamamaʻu ki he lao haohaoa” ka ʻokú ne toe ‘kīvoi ai.’ Ko ia ʻi he ʻikai ngalo ʻa e lao haohaoa ʻo e Folofola ʻa e ʻOtuá, ʻokú ne ‘kīvoi ai,’ pe hokohoko atu ʻene muimui ʻi heʻene ngaahi akonakí. Naʻe ʻomai ʻe Sīsū ha fakakaukau meimei tatau ʻi he taimi naʻá ne pehē ai: “Kapau te mou nofo maʻu ʻi heʻeku leá, ko e moʻoni ko e kau ākonga kimoutolu ʻaʻaku.”—Sione 8:31.

 7. ʻE lava fēfē ke tau ngāueʻaki ʻa e Tohi Tapú ke vakaiʻi ʻaki ʻa e ngaahi hehema siokitá?

⁷ Ko ia ke tauʻi ʻa e ngaahi hehema siokitá, kuo pau ke ke ʻuluaki lau fakalelei ʻa e Folofola ʻa e ʻOtuá. ʻE tokoni nai ia ke ke sio ai ki he meʻa ʻoku fiemaʻu kiate koe ke fakaleleiʻí. Ka ʻoku fiemaʻu ke ke fai ha meʻa lahi ange ia ai. Fai ha fekumi. ʻI he taimi ʻokú ke lau ai ha fakamatala ʻi he Tohi Tapú, sioloto atu naʻá ke ʻi ai. ʻEke ʻa e ngaahi fehuʻi hangē ko e: ‘Ko e hā ʻa e meʻa naʻá ku mei fai ʻi he tuʻunga ko ení? Naʻá ku mei fai ʻa e meʻa naʻe totonú?’ Ko e meʻa mahuʻinga tahá, hili hoʻo fakalaulauloto ki he meʻa kuó ke laú, fai hoʻo lelei tahá ke ngāueʻaki ia. (Māt. 7:24, 25) Tau sio angé ki he anga hono tokoniʻi kitautolu ʻe he fakamatala fekauʻaki mo Tuʻi Saula mo e ʻapositolo ko Pitá ke tau tauhi maʻu ai ha laumālie feilaulauʻi-kitá.

 8. ʻI he taimi naʻe kamata pule ai ʻa Saula ko e tuʻí, ko e hā ʻa e ʻulungaanga naʻá ne maʻú? Naʻe anga-fēfē ʻene fakahāhā ʻa e ʻulungaanga ko ení?

⁸ Ko Tuʻi Saula ko ha fakatokanga ia kia kitautolu fekauʻaki mo e anga hono fakameleʻi ʻe he siokitá ʻa e laumālie feilaulauʻi-kita ʻoku tau maʻú. ʻI he taimi naʻe kamata pule ai ʻa Saula ko e tuʻí, naʻá ne anga-fakanānā mo anga-fakatōkilalo ʻi heʻene vakai kiate iá. (1 Sām. 9:21) Naʻá ne anga-fakatōkilalo ʻo fili ke ʻoua ʻe tauteaʻi ʻa e kau ʻIsileli ʻe niʻihi ʻa ia naʻa nau lau kovi fekauʻaki mo ʻene pulé, neongo naʻa nau poleʻi ʻa e mafai naʻe ʻoange kiate ia ʻe he ʻOtuá. (1 Sām. 10:27) Naʻe tali ʻe Tuʻi Saula ʻa e tataki ʻa e laumālie ʻo e ʻOtuá ʻaki ʻene tataki ʻa ʻIsileli ʻi ha faitau lavameʻa mo e kau ʻĀmoní. Hili iá, naʻá ne anga-fakatōkilalo ʻo ne ʻoatu ʻa e lāngilangi ʻo e ikuná kia Sihova.—1 Sām. 11:6, 11-13.

 9. Naʻe anga-fēfē ʻa e kamata ke hoko ʻa Saula ʻo siokitá?

⁹ Ki mui ai, naʻe fakaʻatā ʻe Saula ʻa e fakakaukau siokitá mo e hīkisiá ke tupulekina ʻi hono lotó, ʻo hangē ha ʻumeʻumea ʻokú ne keina ha ukamea. ʻI he taimi naʻá ne ikunaʻi ai ʻa e kau ʻAmalekí ʻi he taú, naʻá ne tokanga lahi ange fekauʻaki mo ʻene ngaahi holí tonu ʻi he talangofua kia Sihová. Naʻe mānumanu ʻa Saula ʻo tauhi ʻa e ngaahi koloa ʻa e kau ʻAmalekí kae ʻikai fakaʻauha ia ʻo hangē ko e tuʻutuʻuni ʻa e ʻOtuá. Naʻe fuʻu pōlepole ʻa Saula ʻo aʻu ʻo ne langa ha fakamanatu moʻona. (1 Sām. 15:3, 9, 12) ʻI he taimi naʻe tala ange ai ʻe he palōfita ko Sāmiuelá kiate ia naʻe houhau ʻa Sihová, naʻe kumi kalofanga ʻa Saula pea hangataha pē ki he konga ʻo e tuʻutuʻuni ʻa Sihova naʻá ne talangofua ki aí. Naʻe aʻu ʻo ne tukuakiʻi ʻa e niʻihi kehé ki heʻene faihalá. (1 Sām. 15:16-21) Naʻe ʻai ʻe he hīkisiá ʻa Saula ke ne tokanga lahi ange ki hono ongoongó ʻi heʻene kaumeʻa mo e ʻOtuá. (1 Sām. 15:30) ʻE lava fēfē ke tau ngāueʻaki ʻa e faʻifaʻitakiʻanga ʻa Saulá ko ha sioʻata ke tokoniʻi kitautolu ke tau tauhi maʻu ʻa e laumālie feilaulauʻi-kitá?

10, 11. (a) Ko e hā ʻoku akoʻi mai kia kitautolu ʻe he hokosia ʻa Saulá fekauʻaki mo hono tauhi maʻu ha laumālie feilaulauʻi-kitá? (e) ʻE lava fēfē ke tau fakaʻehiʻehi mei he muimui ʻi he faʻifaʻitakiʻanga kovi ʻa Saulá?

¹⁰ ʻUluakí, ʻoku akoʻi mai ʻe he hokosia ʻa Saulá kia kitautolu ke ʻoua te tau hoko ʻo fuʻu falala tōtuʻa kia kitautolu. Ko ha laumālie feilaulauʻi-kita ʻoku ʻikai ke hokonoa mai pē ia, ko ia kuo pau ke tau fai maʻu pē ha ngāue ki ai. (1 Tīm. 4:10) Manatuʻi naʻe lelei pē ʻa Saula ʻi he kamatá peá ne fakahōifuaʻi ʻa e ʻOtuá ʻi ha vahaʻa taimi, ka naʻe ʻikai te ne ngāue mālohi ke toʻo atu ʻa e ngaahi hehema siokita naʻá ne kamata maʻú. Faifai atu pē, naʻe talitekeʻi ʻe Sihova ʻa Saula ko ʻene talangataʻá.

¹¹ Uá, ʻoku ʻikai totonu ke tau tokangataha pē ki he meʻa lelei ʻoku tau faí pea tukunoaʻi ʻa e ngaahi meʻa ʻoku fiemaʻu ke tau fakaleleiʻí. ʻE hangē eni ia ko hono ngāueʻaki ha sioʻata ke tau fiefia ai ʻi hotau kofu foʻoú kae ʻikai fakatokangaʻi ha ʻuli ʻi hotau matá. Neongo kapau ʻoku ʻikai ke tau pōlepole pe fuʻu falala tōtuʻa hangē ko Saulá, ʻoku totonu ke tau fakaʻehiʻehi mei ha hehema pē ʻe lava ke ne ʻai kitautolu ke tau muimui ki heʻene faʻifaʻitakiʻanga koví. Kapau ʻoku akonakiʻi kitautolu, ʻai ke ʻoua te tau hangē ko Saulá ʻo kumi kalofanga pe tukuakiʻi ha taha kehe. ʻOku lelei ange ke tali loto-lelei ʻa e akonakí.—Lau ʻa e Saame 141:5.

12. ʻE lava fēfē ke tokoniʻi kitautolu ʻe he laumālie feilaulauʻi-kitá kapau naʻa tau fai ha angahala mamafa?

¹² Kae kehe, fēfē kapau naʻa tau fai ha angahala mamafa? Naʻe loto ʻa Saula ke maluʻi hono ongoongó, pea naʻe taʻofi ʻe he meʻá ni ia mei hono fakaleleiʻi ʻene kaumeʻa mo Sihová. ʻI hono kehé, ko ha laumālie feilaulauʻi-kita ʻe lava ke ne ueʻi kitautolu ke tau kumi ki ha tokoni tatau ai pē pe ko e hā hono lahi ʻetau ongoʻi fakamāʻiá. (Pal. 28:13; Sēm. 5:14-16) Ko e fakatātaá, ko ha tokoua ʻe taha naʻá ne kamata sio ʻi he ʻata fakalieliá ʻi heʻene taʻu 12, pea naʻe hokohoko atu ʻene fai fakapulipuli iá ʻo laka hake ʻi he taʻu ʻe hongofulu. ʻOkú ne pehē: “Naʻe mātuʻaki faingataʻa ke fakahā ki hoku uaifí pea ki he kau mātuʻá ʻa e meʻa naʻá ku faí. Ka ko eni kuó u fakahā ia, ʻoku ou ongoʻi kuo toʻo atu ha fuʻu kavenga mei hoku umá. Naʻe loto-mamahi ʻa e niʻihi hoku ngaahi kaungāmeʻá ʻi he taimi naʻe toʻo ai au mei he sevāniti fakafaifekaú, ʻo hangē ia naʻá ku ʻai ke siva ʻenau ʻamanakí. Ka, ʻoku ou ʻiloʻi ʻoku hōifua lahi ange ʻa Sihova ʻi heʻeku ngāue he taimi ní ʻi he taimi naʻá ku sio ai ʻi he ʻata fakalieliá, pea ko ʻene vakaí ʻa e meʻa ʻoku mahuʻinga moʻoní.”

13, 14. Naʻe anga-fēfē hono fakahāhā ʻe Pita ʻa e ngaahi hehema siokitá?

¹³ Naʻe maʻu ʻe he ʻapositolo ko Pitá ʻa e feilaulauʻi-kitá lolotonga hono akoʻi ia ʻe Sīsuú. (Luke 5:3-11) Ka naʻe pau ke ne kei tauʻi ʻa e ngaahi hehema siokitá. Ko e fakatātaá, naʻá ne ʻita ʻi he taimi naʻe kole ange ai ʻe he ʻapositolo ko Sēmisi mo Sioné kia Sīsū ha ongo tuʻunga lāngilangiʻia ʻi he Puleʻanga ʻo e ʻOtuá. Mahalo pē naʻe fakakaukau ʻa Pita ʻoku totonu ke ne maʻu ha taha ʻi he tuʻunga ko iá koeʻuhí naʻe ʻosi pehē ʻe Sīsū ʻe maʻu ʻe Pita ha ngafa makehe. (Māt. 16:18, 19) Naʻe fakatokanga ʻa Sīsū kia Sēmisi, Sione, Pita, mo e toenga ʻo e kau ʻapositoló ke ʻoua te nau siokita mo tōʻonga ʻo hangē ʻoku nau lelei ange ʻi honau fanga tokouá.—Mk. 10:35-45.

¹⁴ Naʻa mo e hili ʻa e feinga ʻa Sīsū ke fakatonutonu ʻa e anga ʻo e fakakaukau ʻa Pitá, naʻe kei fakahāhā pē ʻe Pita ʻa e ngaahi hehema siokita. ʻI he taimi naʻe tala ai ʻe Sīsū ki he kau ʻapositoló te nau liʻaki ia ʻi ha taimi nounou, naʻe ʻai ʻe Pita ke hā kovi ʻa e niʻihi kehé ʻaki ʻene pehē ko ia toko taha pē te ne nofoʻaki faitōnungá. (Māt. 26:31-33) Naʻe ʻikai totonu ke falala tōtuʻa ʻa Pita kiate ia, koeʻuhí ʻi he pō pē ko iá, naʻe ʻikai te ne hoko ʻo feilaulauʻi-kita. Naʻá ne maluʻi ia pea fakaʻikaiʻi tuʻo tolu ʻene ʻiloʻi ʻa Sīsuú.—Māt. 26:69-75.

15. Ko e hā ʻoku fakalototoʻa ai kia kitautolu ʻa e faʻifaʻitakiʻanga ʻa Pitá?

¹⁵ Neongo ʻi he taimi ʻe niʻihi naʻe fāinga ʻa Pita pea ʻikai te ne lavameʻa, ko ʻene faʻifaʻitakiʻangá ʻoku fakalototoʻa kia kitautolu. Koeʻuhí ko e feinga tonu ʻa Pitá mo e tokoni ʻa e laumālie māʻoniʻoni ʻo e ʻOtuá, naʻe malava ai ke ne ikuʻi ʻene ngaahi hehema siokitá. Naʻá ne fakahāhā ki mui ʻa e mapuleʻi-kitá mo e ʻofa feilaulauʻi-kitá. (Kal. 5:22, 23) Naʻá ne kātekina ʻa e ngaahi ʻahiʻahi lahi ʻa ia naʻe ʻikai mei malava ke ne kātekina ki muʻa. Ko e fakatātaá, ʻi he taimi naʻe akonakiʻi fefeka ai ʻe Paula ʻa Pita ʻi he ʻao ʻo e kakai kehé, naʻe hanganaki anga-fakatōkilalo pē ʻa Pita. (Kal. 2:11-14) Hili ʻa e akonaki ko iá, naʻe ʻikai tukulotoʻi ʻe Pita ha ʻita mo ongoʻi naʻe uesia hono ongoongó. Naʻá ne kei lea pē fekauʻaki mo Paula ko hono “tokoua ʻofeina.” (2 Pita 3:15) ʻOku tokoniʻi kitautolu ʻe he faʻifaʻitakiʻanga ʻa Pitá ke tau fakaleleiʻi ʻa e laumālie feilaulauʻi-kita ʻoku tau maʻú.

16. ʻE lava fēfē ke tau hoko ʻo feilaulauʻi-kita ʻi he ngaahi tuʻunga faingataʻá?

¹⁶ Fakakaukau fekauʻaki mo e anga hoʻo fakafeangai ʻi he ngaahi tuʻunga faingataʻá. ʻI he taimi naʻe lī ai ki he pilīsoné mo haha ʻa Pita mo e kau ʻapositoló koeʻuhí ko ʻenau malangá, naʻa nau fiefia “ke ngaohikoviʻi” kinautolu ʻi he tuʻunga ko e kau muimui ʻo Sīsū. (Ngā. 5:41) Te ke lava foki mo koe ke ngāueʻaki ʻa e fakatangá ko ha faingamālie ke faʻifaʻitaki ai kia Pita pea hoko ʻo feilaulauʻi-kita hangē ko Sīsuú. (Lau ʻa e 1 Pita 2:20, 21.) Ko e fakakaukau ko ení ʻe lava nai ke tokoni kia koe kapau naʻe akonakiʻi koe ʻe he kau mātuʻá. ʻI he ʻikai hoko ʻo ʻitá, muimui ʻi he faʻifaʻitakiʻanga ʻa Pitá.—Koh. 7:9.

17, 18. (a) Ko e hā ʻa e ongo fehuʻi ʻe lava ke tau ʻeke fekauʻaki mo ʻetau ngaahi taumuʻá? (e) Ko e hā ʻe lava ke tau fai kapau ʻoku tau fakatokangaʻi ha hehema siokita ʻi hotau lotó?

¹⁷ Ko e faʻifaʻitakiʻanga ʻa Pitá ʻe lava ke ne tokoniʻi foki koe ke ke fokotuʻu ha ngaahi taumuʻa ʻi hoʻo lotu kia Sihová. ʻE lava ke ke ngāue ki he ngaahi taumuʻa ko ení ʻi ha founga feilaulauʻi-kita. Kae tokanga ke ʻoua te ke fokotuʻu ʻa e ngaahi taumuʻá koeʻuhí ko haʻo fie hoko ʻo mahuʻinga. ʻEke hifo kiate koe: ‘Ko e hā ʻoku ou loto ai ke fakalakalaka pe fai ha meʻa lahi ange maʻa Sihová? ʻOku ʻuhinga iá ʻoku ou loto ke fakahīkihikiʻi au ʻe he niʻihi kehé pe maʻu ha mafai lahi ange, ʻo hangē ko ia naʻe fiemaʻu ʻe Sēmisi mo Sioné?’

¹⁸ Kapau ʻokú ke fakatokangaʻi ʻoku tupu ʻi ho lotó ha siokita, kole kia Sihova ke ne tokoniʻi koe ke ke fakatonutonu hoʻo fakakaukaú mo e ngaahi ongoʻí. Pea ngāue mālohi leva ke fakalāngilangiʻi ʻa Sihova kae ʻikai ko koe. (Saame 86:11) ʻE lava foki ke ke fokotuʻu ha ngaahi taumuʻa ʻe ʻikai ʻoatu ai kiate koe ʻa e tokangá. Ko e fakatātaá, ʻe lava ke ke feinga ke fakahāhā lelei ange ha ʻulungaanga ʻo e fua ʻo e laumālié ʻa ia ʻoku faingataʻa kiate koé. Pe kapau ʻokú ke ngāue mālohi ke teuteu hoʻo ngaahi konga ki he fakatahá kae ʻikai loto ke fakamaʻa ʻa e Fale Fakatahaʻangá, ʻe lava ke ke fokotuʻu ha taumuʻa ke ngāueʻaki ʻa e faleʻi ʻi he Loma 12:16.—Lau.

19. Ko e hā ʻe lava ke tau fai ke ʻoua te tau hoko ai ʻo loto-siʻi ʻi he meʻa ʻoku tau sio ki ai ʻi he sioʻata ʻo e Folofola ʻa e ʻOtuá?

¹⁹ ʻI he taimi ʻoku tau siofi lelei ai kitautolu ʻi he sioʻata ʻo e Folofola ʻa e ʻOtuá pea sio ai ki he ngaahi mele pe ngaahi hehema siokitá, te tau hoko nai ʻo loto-siʻi. Kapau ʻe faifai ange ʻo hoko ia kiate koe, manatuʻi ʻa e tangata lavameʻa ʻi he talanoa fakatātā ʻa Sēmisí. Naʻe ʻikai lave ʻa Sēmisi ki he vave hono fakaleleiʻi ʻe he tangatá ʻa e ngaahi palopalema naʻá ne sio ki aí pe naʻá ne malava nai ke fakatonutonu ʻa e mele kotoa pē. Ka naʻe pehē ʻe Sēmisi naʻe hokohoko atu ʻa e tangatá ʻi he “lao haohaoa.” (Sēm. 1:25) Naʻe manatuʻi ʻe he tangatá ʻa e meʻa naʻá ne sio ki ai ʻi he sioʻatá pea hanganaki ngāue ke fakaleleiʻi ʻa ia tonu. Ko ia fakakaukau lelei maʻu pē fekauʻaki mo koe, pea manatuʻi ʻoku tau taʻehaohaoa kotoa. (Lau ʻa e Koheleti 7:20.) ʻOku loto-lelei ʻa Sihova ke tokoniʻi koe ʻo hangē pē ko ʻene tokoniʻi ʻa e fuʻu tokolahi ho fanga tokouá. Kapau te ke muimui ʻi he ngaahi akonaki ʻi he Tohi Tapú pea hokohoko atu hono fakahāhā ʻa e laumālie feilaulauʻi-kitá, te ke maʻu ai ʻa e hōifua mo e tāpuaki ʻa e ʻOtuá.