Tuli Ki He Melinó

“Tau tuli ki he gaahi mea fakamelino.”—LOMA 14:19, PM.

1, 2. Ko e hā ʻoku maʻu ai ʻe he Kau Fakamoʻoni ʻa Sihová ʻa e melino ʻi honau haʻohaʻongá?

ʻOKU faingataʻa ke maʻu ʻa e melino moʻoní ʻi he māmani ʻo e ʻaho ní. Naʻa mo e kakai ʻoku kau ki he kulupu fakafonua tatau mo lea ʻi he lea tatau ʻoku nau faʻa māvahevahe fakalotu, fakapolitikale, mo fakasōsiale. ʻI hono kehé, ko e kakai ʻa Sihová ʻoku nau fāʻūtaha neongo ʻa e foʻi moʻoni ko ia kuo nau haʻu “mei he kotoa ʻo e ngaahi puleʻanga mo e ngaahi matakali mo e ngaahi kakai mo e ngaahi lea.”—Fkh. 7:9.

² Ko e tuʻunga melino ʻoku meimei ʻi hotau haʻohaʻongá ʻoku ʻikai ko ha meʻa hokonoa ia. Kuo hoko tefito ia koeʻuhi ʻoku “tau maʻu melino ai mo e ʻOtua” fakafou ʻi heʻetau tui ki hono ʻAló, ʻa ia ko hono taʻataʻa kuo lilingí ʻokú ne ʻufiʻufi ʻetau ngaahi angahalá. (Loma 5:1; Ef. 1:7) ʻIkai ko ia pē, ʻoku ʻomai ʻe he ʻOtua moʻoní ʻa e laumālie māʻoniʻoní ki heʻene kau sevāniti mateakí, pea ko e fua ʻo e laumālie ko iá ʻoku kau ai ʻa e melino. (Kal. 5:22) Ko e toe ʻuhinga ʻe taha ki heʻetau melino fāʻūtahá he ko kitautolú ʻoku “ʻikai ʻo māmani.” (Sione 15:19) ʻI he ʻikai kau ki ha tafaʻaki ʻi he ngaahi ʻīsiu fakapolitikalé, ʻoku tau tuʻuʻatā ai pē. ʻI hono ‘tuki huo ʻaki ʻetau ngaahi heletá,’ ʻoku ʻikai ke tau kau ai ʻi he ngaahi tau fakalotofonua pe fakavahaʻapuleʻangá.—Ai. 2:4.

 3. Ko e hā ʻoku hanga ʻe he melino ʻoku lava ke tau maʻú ʻo ʻai ke malavá, pea ko e hā te tau lāulea ki ai ʻi he kupu ko ení?

³ Ko e melino ʻoku lava ke tau maʻu ʻiate kitautolú ʻoku loloto atu ia ʻi ha fakaʻehiʻehi pē mei hono fai ha kovi ki hotau fanga tokouá. Neongo ko e fakatahaʻanga ʻo e Kau Fakamoʻoni ʻa Sihova ʻoku tau kau ki aí ʻoku faʻuʻaki nai ia ʻa e niʻihi tāutaha mei he ngaahi kulupu fakafaʻahinga mo e anga fakafonua kehekehe lahi, ko kitautolú ʻoku tau “feʻofaʻaki.” (Sione 15:17) ʻOku fakaʻatā kitautolu ʻe heʻetau melinó ke tau “ngaue ʻaonga ki he kakai kotoa pe: kae lahi pe kiate kinautolu ʻoku ʻi he famili ʻo e lotu.” (Kal. 6:10) Ko hotau palataisi fakalaumālie melinó ko ha meʻa ia ke fakamahuʻingaʻi mo maluʻi. Ko ia ai, tau sivisiviʻi pe fēfē nai haʻatau tuli ki he melinó ʻi loto ʻi he fakatahaʻangá.

Taimi ʻOku Tau Humu Aí

 4. Ko e hā ʻe lava ke tau faí ke tuli ai ki he melinó ʻi he taimi ʻoku tau fakalotomamahiʻi ai ha taha?

⁴ “ʻOku lahi ʻa e meʻa ʻoku tau humu ai kotoa pe,” ko e tohi ia ʻa e ʻapositolo ko Sēmisí. “Toki ai ha tangata ʻoku ʻikai ke humu ʻi he lea, pea ko e tangata haohaoa ia.” (Sem. 3:2) Ko ia ai, ko e ngaahi fefaikehekeheʻaki mo e taʻefemahinoʻaki ʻi he vahaʻa ʻo e ngaahi kaungā tuí kuo pau ke malanga hake ia. (Fili. 4:2, 3) Kae kehe, ko e ngaahi palopalema ʻi he vahaʻa ʻo e niʻihi tāutahá ʻe lava ke solova ia ʻo ʻikai fakahohaʻasi ai ʻa e melino ʻa e fakatahaʻangá. Ko e fakatātaá, fakakaukau atu ki he akonaki ʻoku totonu ke tau ngāueʻakí kapau ʻoku tau fakatokangaʻi ʻoku tau fakalotomamahiʻi nai ha taha.—Lau ʻa e Mātiu 5:23, 24.

 5. ʻE fēfē nai haʻatau tuli ki he melinó ʻi he taimi kuo fai mai ai ha hala kiate kitautolu?

⁵ Fēfē kapau kuo fai mai ha hala kiate kitautolu ʻi ha fanga kiʻi founga iiki? ʻOku totonu ke tau ʻamanekina ʻa e tokotaha fakalotomamahí ke haʻu kia kitautolu ʻo kole fakamolemole? “[Ko ʻofa] ʻoku ʻikai te ne lau ʻa e kovi,” ko e lau ia ʻa e 1 Kolinito 13:6 (13:5, PM). ʻI he taimi ʻoku fakalotomamahiʻi aí, ʻoku tau tuli ki he melinó ʻaki ʻa e fakamolemoleʻi pe fakangaloʻi, ʻa ia, ko e ‘ʻikai lau ʻa e koví.’ (Lau ʻa e Kolose 3:13.) Ko e fanga kiʻi angahala iiki ʻi he ʻaho ki he ʻahó ʻoku lelei tahá ke fakaleleiʻi ia ʻi he founga ko ení, he ʻe tokoni eni ki ha vahaʻangatae melino mo e ngaahi kaungā lotú pea ʻomi ai kia kitautolu ʻa e melino ʻo e ʻatamaí. ʻOku pehē ʻe ha palōveepi poto: ‘Ko e lakai ha angahala ko e langilangi ia.’—Pal. 19:11.

 6. Ko e hā ʻoku totonu ke tau faí kapau ʻoku fuʻu faingataʻa ke fakamolemoleʻi ha faihala kuo fai mai kia kitautolu?

⁶ Fēfē kapau ʻoku tau ʻilo ha faihala ʻoku mātuʻaki faingataʻa ke tau fakamolemoleʻi? Ko hono fakamafola ʻa e meʻá ki he lahi taha ʻo e ngaahi telinga ʻoku fie fanongo ki aí ʻoku ʻikai ʻaupito ko e ʻalunga ia ʻo e potó. Ko e lau pehē ʻoku hoko pē ia ke ne maumauʻi ʻa e melino ʻa e fakatahaʻangá. Ko e hā ʻoku totonu ke fai ke fakaleleiʻi ʻa e meʻá ʻi he melino? ʻOku pehē ʻe he Mātiu 18:15: “Kapau ʻe fai hala ʻe ho tokoua, mole pe koe ʻo fakamahino kiate ia, fakaekimoua pe: kapau te ne tokanga kiate koe, kuo ke maʻu mai ho tokoua.” Lolotonga ko e Matiu 18:15-17 ʻoku ngāueʻaki ia ki ha faihala ʻoku ʻi ha natula mafatukituki, ʻi he laumālie ʻo e tefitoʻi moʻoni ʻoku fakahaaʻi ʻi he veesi 15, ʻoku totonu ke tau fakalea anga-ʻofa ki he tokotaha fakalotomamahí fakaekimoua pē ʻo feinga ke fakafoki mai ʻa e vahaʻangatae melino mo iá.a

 7. Ko e hā ʻoku totonu ai ke tau fakavave ke fakaleleiʻi ʻa e ngaahi fekīhiakí?

⁷ Naʻe tohi ʻe he ʻapositolo ko Paulá: “ʻIta pe, kae ʻoua ʻe angahala ai: ʻoua ʻe tuku ke to ʻa e laʻa ʻoku mou kei mamahi; kaeʻumaʻā, ʻoua naʻa tuku ha ava ki he Tevolo.” (Ef. 4:26, 27) “ʻAlu vave ʻo ʻahiʻahi fakamolemole ki he tangata fakaʻilo,” ko e lea ia ʻa Sīsuú. (Mt. 5:25) Ko e tuli leva ki he melinó, ʻoku fiemaʻu ki ai ʻa hono fakaleleiʻi vave ʻa e ngaahi faingataʻá. Ko e hā hono ʻuhingá? Koeʻuhi ko e fai peheé ʻokú ne taʻofi ai ʻa e ngaahi fefaikehekeheʻakí mei heʻene totolo hangē ha lavea kuo ʻikai faitoʻo pea kuo palá. ʻOua naʻa tau fakaʻatá ʻa e hīkisiá, meheká, pe pīkitai fuʻu hulu ki he mahuʻinga ʻo e ngaahi meʻa fakamatelié ke ne taʻofi kitautolu mei hono fakaleleiʻi leva ʻa e ngaahi fekīhiakí hili ʻene malanga haké.—Sem. 4:1-6.

Taimi ʻOku Kau Ai ha Tokolahi ki ha Fekīhiaki

8, 9. (a) Ko e hā ʻa e fefaikehekeheʻaki ʻi he fakakaukau naʻe ʻi he fakatahaʻanga ʻi he ʻuluaki senitulí ʻi Lomá? (e) Ko e hā ʻa e akonaki naʻe fai ʻe Paula ki he kau Kalisitiane Lomá fekauʻaki mo ʻenau fekīhiakí?

⁸ ʻI he taimi ʻe niʻihi ko e ngaahi fefaikehekeheʻaki ʻi he fakatahaʻangá ʻoku kau ki ai ʻikai ko e toko ua pē ka ko e niʻihi tāutaha tokolahi. Ko e tuʻunga eni fekauʻaki mo e kau Kalisitiane ʻi Lomá ʻa ia naʻe tohi ki ai ʻa Paula ʻi ha tohi fakamānavaʻi. Naʻe ʻi ai ha fekīhiaki ai ʻi he kau Kalisitiane Siu mo e Senitailé. Naʻe ʻi ai ha niʻihi ʻi he fakatahaʻanga ko iá naʻa nau fakasīkakaʻi pe siolalo moʻoni ki he faʻahinga naʻe vaivai honau konisēnisí, pe fuʻu fakataputapui tōtuʻa. Ko e niʻihi tāutaha peheé naʻa nau fakaangaʻi pe fakamāuʻi taʻetotonu ʻa e niʻihi kehé ʻi he ngaahi meʻa mātuʻaki fakafoʻituitui ʻaupito. Ko e hā ʻa e faleʻi naʻe fai ʻe Paula ki he fakatahaʻangá?—Loma 14:1-6.

⁹ Naʻe akonakiʻi ʻe Paula ʻa e niʻihi tāutaha ʻi he ongo tafaʻaki fakatouʻosi ʻo e fekīhiakí. Naʻá ne tala ki he faʻahinga ko ia naʻa nau mahinoʻi naʻe ʻikai te nau ʻi he malumalu ʻo e Lao ʻa Mōsesé ke ʻoua te nau taʻetokaʻi pe siolalo ki honau fanga tokouá. (Loma 14:2, 10) Ko ha faʻahinga fakakaukau pehē ʻe lava ke fakatūkia ia ki he kau tui ʻoku nau kei ʻilo ʻoku fakalielia ke kai ʻa e ʻū meʻa naʻe ʻikai fakaʻatā ʻi he malumalu ʻo e Laó. “ʻOua pe te ke holoki ʻa e ngaue ʻa e ʻOtua koeʻuhi pe ko ha meʻakai,” ko e ekinakiʻi ia kinautolu ʻe Paulá. “Ko hono lelei ke ʻoua naʻa ke kai kakano, pe inu uaine, pe ko e ha fua ha meʻa ʻoku tūkia ai ho tokoua.” (Loma 14:14, 15, 20, 21) ʻI he tafaʻaki ʻe tahá, naʻe akonakiʻi ʻe Paula ʻa e kau Kalisitiane ko ia naʻa nau maʻu ha konisēnisi fakataputapui lahi angé ke ʻoua te nau fakaangaʻi pe fakamāuʻi ʻoku taʻefaitōnunga ʻa e faʻahinga ko ia naʻa nau maʻu ha fakakaukau fālahi angé. (Loma 14:13) Naʻá ne tala ‘kiate kinautolu tāutaha ke ʻoua naʻa hulu atu ʻenau fakakaukau kiate kinautolú ʻi he meʻa ʻoku totonú.’ (Loma 12:3) Hili ʻene akonakiʻi ʻa e ongo tafaʻaki fakatouʻosi ʻi he fekīhiaki ko ení, naʻe tohi ʻe Paula: “Koia ke tau tuli ki he gaahi mea fakamelino, moe gaahi mea te tau felagaaki hake ai akitautolu.”—Loma 14:19, PM.

10. Hangē ko ia ko e fakatahaʻanga ʻi he ʻuluaki senitulí ʻi Lomá, ko e hā ʻoku fiemaʻu ke fakaleleiʻiʻaki ʻa e ngaahi fefaikehekeheʻaki ʻi he ʻaho ní?

¹⁰ ʻOku pau moʻoni naʻe tali lelei ʻe he fakatahaʻanga ʻi Lomá ʻa e akonaki ʻa Paulá pea fai ʻa e ngaahi fengaʻunuʻaki naʻe fiemaʻú. ʻI he taimi ʻoku hoko ai ha fefaikehekeheʻaki ʻi he ngaahi kaungā Kalisitiané he ʻahó ni, ʻikai ʻoku totonu ke pehē ʻetau fakaleleiʻi anga-ʻofa ʻa e ngaahi fekīhiakí ʻaki ʻa e kumi mo ngāueʻaki anga-fakatōkilalo ʻa e akonaki Fakatohitapú? Hangē ko ia ʻi he tuʻunga ʻo e kau Lomá, ʻe fiemaʻu nai ʻi he ʻahó ni ki he faʻahinga ko ia fakatouʻosi ʻi he ongo tafaʻaki ʻo e fekīhiakí ke fai ha ngaahi feʻunuʻaki koeʻuhi ke “mou melino be akimoutolu.”—Mk. 9:50, PM.

Taimi ʻOku Fiemaʻu Ai ke Tokoni

11. Ko e hā ʻa e tokanga ʻoku totonu ke fai ʻe ha mātuʻa kapau ʻoku loto ha Kalisitiane ke talanoa kiate ia fekauʻaki mo ha fekīhiaki mo ha kaungātuí?

¹¹ Fēfē kapau ʻoku fiemaʻu ʻe ha Kalisitiane ke talanoa ki ha mātuʻa fekauʻaki mo ha palopalema ʻokú ne maʻu mo ha kāinga pe ko ha kaungātui? ʻOku pehē ʻe he Palovepi 21:13: “Ko ia ʻoku ne tapuni hono telinga ki he kole ʻa e masiva, ʻe tangi mo ia foki, kae ʻikai ongoʻi ʻe ha taha.” ʻE ʻikai ʻaupito hanga ʻe ha mātuʻa ʻo “tapuni hono telinga.” Kae kehe, ʻoku fakatokanga mai ha palōveepi ʻe taha: “Ko ia ʻoku muʻaki fakahā ʻene keisí ʻoku ngali tonu ia, kae ʻoua kuo kamata fakafehuʻi ia ʻe hono fakafepakí.” (Pal. 18:17, New English Translation) ʻOku totonu ke fanongo anga-ʻofa ha mātuʻa, ka ʻoku fiemaʻu ke ne tokanga ke ʻoua ʻe kau mo e tokotaha ʻokú ne līpooti ʻa e faihalá. Hili ʻa e fanongo ki he meʻá, te ne ʻeke nai pe kuo lea ʻa e faʻahi ʻoku mamahí ki he tokotaha naʻá ne fakatupunga ʻa e mamahí. ʻE toe fakamanatu nai ʻe he mātuʻá ʻa e ngaahi sitepu Fakatohitapu ʻe lava ʻo fai ʻe he tokotaha mamahí ke tuli ai ki he melinó.

12. Lave ki ha ngaahi fakatātā ʻoku fakahaaʻi ai ʻa e fakatuʻutāmaki ʻo e ngāue fakavave hili ʻo e fanongo ki ha lāunga.

¹² ʻOku fakamamafaʻi ʻe he fakatātā Fakatohitapu ʻe tolu ʻa e fakatuʻutāmaki ʻo e ngāue fakavave hili ʻa e fanongo ki he tafaʻaki pē taha ʻo ha fekīhiaki. Naʻe tui ʻa Pōtifa ki he fakamatala hono uaifí kuo feinga ʻa Siosifa ke tohotohoʻi ia. ʻI ha ʻita taʻefaituʻunga, naʻe hanga ai ʻe Pōtifa ʻo lī ʻa Siosifa ki he pilīsoné. (Sen. 39:19, 20) Naʻe tui ʻa Tuʻi Tēvita kia Sipa, ʻa ia naʻá ne pehē ko hono ʻeikí, ʻa Mefipōseti, kuo faʻahi ia mo e ngaahi fili ʻo Tēvitá. “Si, maʻu ʻe koe ʻa e meʻa kotoa ʻa Mefiposeti,” ko e tali vave ia ʻa Tēvitá. (2 Sam. 16:4; 19:25-27) Naʻe tala kia Tuʻi ʻAtasease naʻe lolotonga langa ʻe he kau Siú ʻa e ʻā ʻo Selusalemá pea naʻa nau teu ke angatuʻu ki he ʻEmipaea Pēsiá. Naʻe tui ʻa e tuʻí ki he līpooti loi ko iá pea fekau ke tuku ʻa e toe langa kotoa pē ʻi Selusalema. Ko hono olá, naʻe tuku ʻe he kau Siú ʻa e ngāue ʻi he temipale ʻo e ʻOtuá. (Esela 4:11-13, 23, 24) ʻOku muimui fakapotopoto ʻa e kau mātuʻa Kalisitiané ki he akonaki ʻa Paula kia Tīmoté ke fakaʻehiʻehi mei hono fai ha ngaahi fakamaau teʻeki taimi.—Lau ʻa e 1 Timote 5:21.

13, 14. (a) Ko e hā ʻa e ngaahi fakangatangata ʻoku maʻu ʻe kitautolu kotoa fekauʻaki mo e ngaahi fekīhiaki ʻa e niʻihi kehé? (e) Ko e hā ʻa e tokoni ʻoku maʻu ʻe he kau mātuʻá ki hono fai ʻa e ngaahi fakamaau ʻoku tonú fekauʻaki mo e ngaahi kaungātuí?

¹³ Naʻa mo e taimi kuo ngali hā mahino ai ʻa e ongo tafaʻakí fakatouʻosi ʻo ha fekīhiaki, ʻoku mahuʻinga ke fakatokangaʻi “ka mahalo ʻe ha toko taha kuo ne ʻosi ʻilo ki ha meʻa, ta ʻoku teʻeki ke aʻu ʻene ʻilo ki hono anga totonu.” (1 Kol. 8:2) ʻOku tau ʻiloʻi moʻoni kotoa ʻa e ngaahi fakaikiiki naʻe taki mai ki he fekīhiakí? ʻE lava ke tau mahinoʻi kakato ʻa e ngaahi puipuituʻa ʻo e niʻihi tāutaha ʻoku kau ki aí? ʻI he taimi ʻoku fiemaʻu ai ki ha fakamaau, he meʻa mātuʻaki mahuʻinga moʻoni ē ki he kau mātuʻá ke ʻoua ʻe tuku ke kākaaʻi kinautolu ʻe he loí, founga olopotó, pe ngaahi talanoa sasalá! Ko e fakamaau kuo fakanofo ʻe he ʻOtuá, ʻa Sīsū Kalaisi, ʻokú ne fakamaau ʻi he māʻoniʻoni. “Ko ʻene fai fakamaau ʻoku ʻikai fai ki he meʻa ʻoku ha ki he mata, pea ko ʻene fakaʻosi ʻe ʻikai fai ki he ongo ʻo e telinga. (Ai. 11:3, 4) Ka, ʻoku tataki ʻa Sīsū ʻe he laumālie ʻo Sihová. ʻOku pehē ʻa e maʻu ʻaonga ʻa e kau mātuʻa Kalisitiané ʻi hono tataki ʻe he laumālie māʻoniʻoni ʻo e ʻOtuá.

¹⁴ Ki muʻa ke nau fai ha ngaahi fakamaau fekauʻaki mo e ngaahi kaungātuí, ʻoku fiemaʻu ki he kau mātuʻá ke nau lotu ki he tokoni ʻa e laumālie ʻo Sihová pea fakafalala ki he tataki ʻa e laumālié ʻaki ʻa e kumi faleʻi ki he Folofola ʻa e ʻOtuá mo e ngaahi tohi ʻa e kalasi tamaioʻeiki anga-tonu mo potó.—Mt. 24:45, PM.

Melino Tatau Ai Pē pe ko e Hā?

15. Ko fē taimi ʻoku totonu ke tau līpooti ai ha angahala mamafa kuo tau hoko ʻo lāuʻilo ki ai?

¹⁵ ʻI he tuʻunga ko e kau Kalisitiané, ʻoku ekinaki kia kitautolu ke tuli ki he melinó. Kae kehe, ʻoku toe pehē ʻe he Tohi Tapú: “Koe boto oku mei oluga oku fuofua maa, bea fakamelino.” (Sem. 3:17, PM) Ko e hoko ʻo fakamelinó ʻoku fika ua ia ki he maʻá, ʻa ia, ko e pouaki ʻa e ngaahi tuʻunga maʻa fakaeʻulungaanga ʻa e ʻOtuá pea aʻusia ʻene ngaahi fiemaʻu māʻoniʻoní. Kapau ʻe hoko ha Kalisitiane ʻo lāuʻilo ki ha angahala mafatukituki ʻi he tafaʻaki ʻo ha kaungātui, ʻoku totonu ke ne fakalototoʻaʻi ʻa e tokotaha ko iá ke vete ʻene angahalá ki he kau mātuʻá. (1 Kol. 6:9, 10; Sem. 5:14-16) Kapau ʻoku ʻikai ke fai pehē ʻa e tokotaha faihalá, ko e Kalisitiane ko ia kuó ne hoko ʻo ʻilo fekauʻaki mo e angahalá ʻoku totonu ke ne līpooti ia. Ko hono taʻefai ʻo e meʻá ni ʻi ha feinga hala ke tauhi ʻa e melino mo e tokotaha angahalá ʻokú ne ʻai ai ha taha ko ha kaungāhia ki he faihalá.—Liv. 5:1; lau ʻa e Palovepi 29:24.

16. Ko e hā ʻoku lava ke tau ako mei he fetaulaki ʻa Sehu mo Tuʻi Siholamé?

¹⁶ Ko e fakamatala ʻe taha ʻoku kau ki ai ʻa Sehu ʻoku hā ai ʻa e fakamuʻomuʻa ʻa e tuʻunga māʻoniʻoni ʻa e ʻOtuá ʻi he melinó. Naʻe fekauʻi ʻe he ʻOtuá ʻa Sehu ke fakahoko ʻEne fakamaau ki he fale ʻo Tuʻi ʻĒhapí. Ko Tuʻi Siholame kovi, ʻa e foha ʻo ʻĒhapi mo Sisipelí, naʻe heka ʻi heʻene salioté ke fakafetaulaki kia Sehu mo ne pehē: “ʻOku lelei [‘melino,’ NW], Sehu? Naʻe fēfē tali ʻa Sehú? Naʻá ne tali: ʻO lelei [‘melino,’ NW] fefe, lolotonga ʻoku pehe fau ʻa e ngaahi feʻauaki ʻa hoʻo faʻe ko Sisipeli, mo ʻene tuki fakatevolo?” (2 Tuʻi 9:22) ʻI he meʻa ko iá, naʻe unuhi hake ʻe Sehu ʻene ngahaú ʻo fanaʻi ʻa Siholame ʻi hono mafú. Hangē pē ko e fai ʻe Sehu e meʻá, kuo pau ki he kau mātuʻá ke ʻoua ʻe fakavaivai ki he kau faiangahala loto-lelei mo taʻefakatomalá koeʻuhi ke tauhi ʻa e melinó. ʻOku nau kapusi ʻa e kau faiangahala taʻefakatomalá koeʻuhi ke lava ʻa e fakatahaʻangá ke hokohoko atu ke maʻu ʻa e melino mo e ʻOtuá.—1 Kol. 5:1, 2, 11-13.

17. Ko e hā ʻa e tafaʻaki ʻoku fakahoko ʻe he Kalisitiane kotoa pē ʻi he tuli ki he melinó?

¹⁷ Ko e ngaahi fekīhiaki lahi ʻi he vahaʻa ʻo e fanga tokouá ʻoku ʻikai fekauʻaki ia mo ha faihala mamafa ʻoku fiemaʻu ki ai ha ngāue fakaefakamaau. He meʻa lelei leva, ke ʻufiʻufi ʻa e ngaahi fehālaaki ʻa e niʻihi kehé. “ʻOku ʻufiʻufi angahala ʻe ia ʻoku ne mamahiʻi ʻa e feʻofoʻofani,” ko e lau ia ʻa e Folofola ʻa e ʻOtuá, “ka ko ia ʻoku ne toutou langaki ha meʻa, ʻoku ne lava ke veteki ʻa e kaumeʻa fetohotohoi.” (Pal. 17:9) Ko e fai ki he ngaahi lea ko iá ʻe tokoniʻi kotoa ai kitautolu ke fakatolonga ʻa e melino ʻi he fakatahaʻangá pea tauhi maʻu ha vahaʻangatae lelei mo Sihova.—Mt. 6:14, 15.

Ko e Tuli ki he Melinó ʻOku ʻOmi Ai ʻa e Ngaahi Tāpuaki

18, 19. Ko e hā ʻa e ngaahi ʻaonga ko e iku mei he tuli ki he melinó?

¹⁸ Ko ʻetau tuli “ki he gaahi mea fakamelino” ʻoku ʻomi ai kia kitautolu ʻa e ngaahi tāpuaki lahi. ʻOku tau maʻu ha vahaʻangatae fakafoʻituitui vāofi mo Sihova ʻi heʻetau faʻifaʻitaki ko ia ki heʻene ngaahi foungá, pea ʻoku tau tokoni ai ki he fāʻūtaha melino ʻa hotau palataisi fakalaumālié. Ko e tuli ki he melinó ʻi loto ʻi he fakatahaʻangá ʻoku toe tokoniʻi ai kitautolu ke sio ki he ngaahi founga ʻe lava ke tau tuli ai ki he melino mo e faʻahinga ko ia ʻoku tau malangaʻi ki ai ʻa e “Kosipeli fakamelino.” (Ef. 6:15) ʻOku tau mateuteu lelei ange ai ke ‘angalelei ki he kakai kotoa pe, ʻo tau makataki ʻa e koví.’—2 Tim. 2:24.

¹⁹ Manatuʻi foki, ʻe ʻi ai “ha toetuʻu ʻa e angatonu mo e angahala fakatouʻosi.” (Ng. 24:15) ʻI he taimi ʻe hoko ai ʻo moʻoni ʻa e ʻamanaki ko iá ʻi heni ʻi he māmaní, ko e laui miliona ʻo e kakai ʻo e ngaahi puipuituʻa, ngaahi natula, mo e ngaahi ʻulungaanga kehekehe, ʻe fakafoki mai ki he moʻuí—pea mei he ngaahi kuonga ʻo falō atu ʻo aʻu ki he “talu e tanu pou ʻo māmani”! (Luke 11:50, 51) Ko hono akoʻi ʻa e ngaahi founga ʻo e melinó ki he faʻahinga kuo toetuʻú ʻe hoko ia ko ha monū lahi moʻoni. He tokoni fakaʻulia moʻoni ē ʻe fai kia kitautolu ʻe he ako ʻoku tau maʻu he taimí ni ʻi he tuʻunga ko e kau fakamelinó ʻi he taimi ko iá!

[Fakamatala ʻi lalo]

Ko e Hā Naʻá Ke Akó?

• ʻE fēfē nai haʻatau tuli ki he melinó kapau kuo tau fakalotomamahiʻi ha taha?

• Ko e hā ʻoku totonu ke faí ke tuli ai ki he melinó ʻi he taimi kuo fai mai ai ha hala kiate kitautolu?

• Ko e hā ʻoku taʻefakapotopoto ai ke kau ki ha faʻahi ʻi he ngaahi fekīhiaki ʻa e niʻihi kehé?

• Fakamatalaʻi ʻa e ʻuhinga ʻoku ʻikai totonu ai ke tuli ki he melinó tatau ai pē pe ko e hā.

[Fakatātā ʻi he peesi 29]

ʻOku ʻofa ʻa Sihova ki he faʻahinga ʻoku nau fakamolemoleʻi loto-lelei ʻa e niʻihi kehé