Ko e Meʻa ʻOku Fiemaʻu ke Tau Fai Kae Moʻulaloa Fakaʻotua

“Ko ia ai, mou moʻulaloa ki he ʻOtuá.”​—SEMISI 4:7, NW.

 1. Ko e hā ʻa e meʻa ʻoku malava ke tau leaʻaki ʻo kau ki he ʻOtua ʻoku tau lotu ki aí?

KO HA ʻOtua fakaofo lahi ē ka ko Sihova! Taʻe ʻi ai hano tatau, ʻo laulōtaha ʻi he ngaahi founga lahi ʻaupito! Ko ia ʻa e Fungani Māʻolungá, ʻa e ʻEiki Hau Fakalevelevá ʻa ia ʻoku ʻiate ia ʻa e mafai moʻoni kotoa. Naʻe ʻikai hano kamataʻanga pea ʻoku ʻikai hano ngataʻanga, ʻoku fuʻu lāngilangiʻia pea ʻoku ʻikai ha tangata ʻoku malava ke sio kiate ia pea kei moʻui. (ʻEkisoto 33:20; Loma 16:26) ʻOkú ne taʻefakangatangata ʻi he mālohi mo e poto, haohaoa fakaʻaufuli ʻi he fakamaau totonu, pea ko e fakahāhā haohaoa ia ʻo e ʻofá. Ko hotau Tokotaha-Fakatupú ia, ko hotau Fakamaau, ko hotau Fai-Fono, pea mo hotau Tuʻi. ʻIlonga ha foaki lelei pea ʻilonga ha meʻaʻofa haohaoa, ko e ʻalu hifo pē ia meiate ia.​—Sāme 100:3; ʻAisea 33:22; Sēmisi 1:17.

 2. Ko e hā ʻa e ngaahi meʻa ʻoku kau ki he moʻulaloa fakaʻotuá?

² Koeʻuhi ko e ngaahi meʻá ni kotoa, ʻoku ʻikai toe malava ke fehuʻia ko hotau fatongia ke tau moʻulaloa kiate ia. Ka ko e hā ʻoku kau ki he meʻá ni ʻi he fekauʻaki mo kitautolú? ʻOku ʻi ai ha ngaahi meʻa. Koeʻuhi ʻoku ʻikai malava ke tau sio kia Sihova ko e ʻOtuá, ʻoku kau ki he moʻulaloa kiate iá ʻa hono tokangaʻi ʻa e tataki ʻo hoto konisēnisi kuo ʻosi akoʻí, ko e ngāue fakataha mo e kautaha ʻa e ʻOtuá ʻi māmaní, ko hono ilo pe tali pe ko hai ʻa e kau maʻu mafai fakaemāmaní, pea mo hono tokaʻi ʻa e tuʻunga-ʻulu ʻi he fāmilí.

Ko Hono Tauhi Maʻu ha Konisēnisi Lelei

 3. Ke tauhi maʻu ha konisēnisi lelei, kuo pau ke tau talangofua ki he ngaahi fakataputapui fē?

³ Ke tauhi maʻu ha konisēnisi lelei, kuo pau ke tau talangofua ki he ngaahi lao pe ngaahi tefitoʻi moʻoni ʻoku ʻikai malava ke fakamālohiʻi ʻe he kakaí. Hangē ko ení, naʻe ʻikai malava ke fakamālohiʻi ʻe he kau maʻu mafai fakaetangatá ʻa e fekau hono hongofulu ʻo e Fekau ʻe Hongofulú, ʻa ia naʻe tapui ai ʻa e mānumanú. ʻOku fakamoʻoniʻi ʻe he meʻá ni ʻa e tupuʻanga fakaeʻotua ʻo e Fekau ʻe Hongofulú, he ʻoku ʻikai ha kau faʻu lao fakaetangata te nau faʻu ha lao ʻa ia ʻe ʻikai malava ke fakamālohiʻi ʻaki ʻa e ngaahi tautea ʻo ka maumauʻi ia. ʻI he foʻi lao ko ení, naʻe tuku ʻe Sihova ko e ʻOtuá ki he kakai ʻIsileli taki taha ʻa e fatongia ke ne fakahoko ʻa e ngāue fakapolisi kiate ia tonu​—ʻo kapau naʻá ne saiʻia ke maʻu ha konisēnisi lelei. (ʻEkisoto 20:17) ʻI ha founga meimei tatau, ʻoku kau ki he ngaahi ngāue ʻo e kakanó ʻa ia ʻe taʻofi ai ha taha mei hono maʻu ʻa e Puleʻanga ʻo e ʻOtuá ʻa e “meheka” mo e “femehekaʻaki”​—ʻa e ngaahi meʻa ʻa ia ʻoku ʻikai malava ke tauteaʻi ʻe he kau fakamaau fakaetangatá. (Kalētia 5:​19-21) Ka kuo pau ke tau fakaʻehiʻehi mei he ngaahi meʻá ni kae malava ke maʻu ha konisēnisi lelei.

 4. Ke tauhi maʻu ha konisēnisi lelei, ko e hā ʻa e ngaahi tefitoʻi moʻoni faka-Tohitapu kuo pau ke tau moʻuiʻakí?

⁴ ʻIo, kuo pau ke tau moʻuiʻaki ʻa e ngaahi tefitoʻi moʻoni faka-Tohitapú. ʻOku malava ke fakanounouʻi ʻa e ngaahi tefitoʻi moʻoni peheé ʻi he ongo fekau ʻe ua ʻa ia naʻe fakahā ʻe Sīsū Kalaisi ʻi heʻene tali ki he fehuʻi pe ko e hā ʻa e fekau lahi taha ʻi he Lao ʻia Mōsesé. “Ke ke ofa kia Jihova ko ho Otua aki ho laumalie kotoa, mo hoo moui kotoa, mo ho loto kotoa. . . . Ke ke ofa ki ho kaugaabi o hage be ko koe.” (Mātiu 22:​36-40, PM) ʻOku fakahāhaaʻi ʻe he ngaahi lea ʻa Sīsū ʻi he Mātiu 7:12 ʻa e meʻa ʻoku kau ki he fekau hono ua ko ení: “Ko ia ʻilonga ha meʻa ʻoku mou loto ke fai ʻe he kakai kiate kimoutolu, fai pehe foki kiate kinautolu: he ko e Lao ia mo e Tohi Palofita.”

 5. ʻOku malava fēfē ke tau tauhi maʻu ha vahaʻangatae lelei mo Sihova ko e ʻOtuá?

⁵ Kuo pau ke tau fai ʻa e meʻa ʻoku tau ʻilo ʻoku totonú pea ʻoua ʻe fai ʻa e meʻa ʻoku tau ʻilo ʻoku halá, tatau ai pē pe ʻoku fakatokangaʻi ia ʻe he niʻihi kehé pe ʻikai. Kuo pau ke pehē neongo ha malava ke ʻikai fakaangaʻi pe tauteaʻi kitautolu ʻi he ʻikai ke fai ʻa e meʻa ʻoku totonu ke faí pe ko hono fai ʻa e meʻa ʻoku totonu ke ʻoua ʻe faí. ʻOku ʻuhinga iá ke tauhi maʻu ha vahaʻangatae lelei mo ʻetau Tamai fakahēvaní, ʻo manatuʻi maʻu ai pē ʻa e fakatokanga naʻe leaʻaki ʻe he ʻapositolo ko Paulá ʻi he Hepelū 4:13: “Pea ʻoku ʻikai ha meʻa kuo ngaohi ʻe taeʻata pe ki he ʻEne ʻAfio: ka ʻoku telefua mo tokaimaʻananga ʻa e meʻa kotoa pe ki he fofonga ʻo ia ʻoku tau fakamāu ki ai.” Ko e kīvoi ʻi hono fai ʻa e meʻa ʻoku totonú te ne tokoniʻi kitautolu ke tauʻi ʻa e ngaahi filioʻi kākā ʻa e Tēvoló, ke talitekeʻi ʻa e ngaahi mafasia ʻo e māmaní, pea ke tauʻi ʻa e hehema ki he siokitá kuo maʻu ʻi he tukufakaholó.​—Fakafehoanaki mo ʻEfesō 6:11.

Ko e Moʻulaloa ki he Kautaha ʻa e ʻOtuá

 6. Ko hai naʻe ngāueʻaki ʻe Sihova ke fakahoko ʻa e fetuʻutakí ʻi he kuonga ki muʻa ʻi he kau Kalisitiané?

⁶ Kuo ʻikai ke tuku mai ʻe Sihova kiate kitautolu ke tau taki taha fili pē ʻa e founga te tau ngāueʻaki ai ʻa e ngaahi tefitoʻi moʻoni faka-Tohitapú ʻi heʻetau moʻuí. Talu mei he kamataʻanga ʻo e hisitōlia ʻo e faʻahinga ʻo e tangatá, kuo ngāueʻaki ʻe he ʻOtuá ʻa e kau tangata ke fakahoko ʻa e fetuʻutakí. Ko ia ai, naʻe hoko ʻa ʻĀtama ko e tokotaha fakahoko lea ʻa e ʻOtuá kia ʻIvi. Naʻe fakahā kia ʻĀtama ʻa e fekau ʻo kau ki he fuaʻiʻakau naʻe tapuí ki muʻa pea toki fakatupu ʻa ʻIví, ko ia ʻoku pau naʻe fakahā ʻe ʻĀtama kia ʻIvi ʻo fekauʻaki mo e finangalo ʻo e ʻOtuá kia ʻIví. (Sēnesi 2:​16-23) Naʻe ngāue ʻa Noa ko e palōfita ʻa e ʻOtuá ki hono fāmilí pea ki he kakai kotoa ki muʻa ʻi he Lōmakí. (Sēnesi 6:13; 2 Pita 2:5) Naʻe ngāue ʻa ʻĒpalahame ko e tokotaha fakahoko lea ʻa e ʻOtuá ki hono fāmilí. (Sēnesi 18:19) Ko Mōsesé naʻá ne hoko ko e palōfita mo e tokotaha fakahoko fetuʻutaki ʻa e ʻOtuá ki he puleʻanga ko ʻIsilelí. (ʻEkisoto 3:​15, 16; 19:​3, 7) ʻI he hili ʻa Mōsese ʻo aʻu mai kia Sione Papitaiso naʻe ngāueʻaki ʻe he ʻOtuá ʻa e kau palōfita, kau taulaʻeiki mo e ngaahi tuʻi tokolahi ke fakahoko ʻa hono finangaló ki heʻene kakaí.

 7, 8. (a) Talu mei he hoko mai ʻa e Mīsaiá, ko hai kuo ngāueʻaki ko e kau fakahoko lea ʻa e ʻOtuá? (e) Ko e hā ʻa e meʻa ʻoku fiemaʻu mei he Kau Fakamoʻoni ʻa Sihova ʻi he ʻaho ní ka nau moʻulaloa fakaʻotua?

⁷ ʻI he hoko mai ʻa e Mīsaiá, ko Sīsū Kalaisí, naʻe ngāueʻaki ia ʻe he ʻOtuá pea mo e kau ʻapositoló mo e kau ākonga naʻe feohi vāofi mo Sīsuú ke nau hoko ko ʻEne kau fakahoko lea. Ki mui mai, naʻe ngāue ʻa e kau muimui pani mo angatonu ʻo Sīsū Kalaisí ko e “tamaioeiki agatonu mo boto” ke nau fakahoko ki he kakai ʻa Sihová ʻa e founga ke ngāueʻaki ai ʻa e ngaahi tefitoʻi moʻoni faka-Tohitapú ʻi heʻenau moʻuí. Naʻe ʻuhinga ʻa e moʻulaloa fakaʻotuá ke tali ʻa e meʻangāue naʻe ngāueʻaki ʻe Sihova ko e ʻOtuá.​—Mātiu 24:​45-47, PM; ʻEfesō 4:​11-14.

⁸ ʻOku fakahā ʻe he ngaahi moʻoniʻi meʻá ko e “tamaioeiki agatonu mo boto” ʻi he ʻaho ní ʻokú ne fekauʻaki mo e Kau Fakamoʻoni ʻa Sihová pea ʻoku fakafofongaʻi ia ʻe he Kulupu Pule ʻa e Kau Fakamoʻoni ko iá. Pehē foki, ko e kulupu ko ení ʻoku nau fakanofo ʻa e kau ʻovasia ki he ngaahi ngāue kehe​—ʻo hangē ko e kau mātuʻá pea mo e kau fakafofonga fefonongaʻakí—​ke nau tataki ʻa e ngāue ʻi he tuʻunga fakalotofonuá. Ke moʻulaloa fakaʻotua ʻoku fiemaʻu mei he tokotaha Fakamoʻoni fakatapui taki taha ke nau moʻulaloa ki he kau ʻovasia ko ení ʻo fetāiaki mo e Hepelū 13:17: “Mou tuitala ki he kau tuʻukimuʻa ʻomoutolu, pea fakavaivai kiate kinautolu; he ko kinautolu ia ʻoku nau ʻā ke leʻohi homou laumalie, he ko kinautolu te nau fakamatala kimoutolu ʻamui; koeʻuhiā ke nau fai fiefia ʻenau ngaue ko ia, ʻo ʻikai fai mo e toʻe: he ʻe taʻeʻaonga ia kiate kimoutolu.”

Ko Hono Tali ʻa e Akonakí

 9. Ko e hā ʻoku faʻa kau ki he moʻulaloa fakaʻotuá?

⁹ ʻOku faʻa kau ki he moʻulaloa fakaʻotuá ʻa hono tali ʻa e akonakí mei he faʻahinga ʻoku nau ngāue ko e kau ʻovasiá. Kapau ʻoku ʻikai te tau fai kiate kitautolu ʻa e akonaki ʻoku fiemaʻú, ʻe fiemaʻu nai ke akonakiʻi kitautolu ʻe he faʻahinga ʻoku nau maʻu ʻa e taukei pea mo e mafai ke fai iá, ʻo hangē ko e kau mātuʻa ʻi he fakatahaʻangá. Ko e ʻalunga fakapotopoto ia ke tali ʻa e akonaki peheé.​—Palōvepi 12:15; 19:20.

10. Ko e hā ʻa e fatongia ʻoku ʻi he faʻahinga ʻoku nau fakahoko akonakí?

¹⁰ Ko hono moʻoní, ʻoku totonu ki he kau mātuʻa ʻoku nau fai ʻa e akonakí ke nau hoko ko e faʻifaʻitakiʻanga ʻi he moʻulaloa fakaʻotuá. ʻO anga-fēfē? ʻI he fakatatau ki he Kalētia 6:1, ʻoku totonu ke ʻoua ʻe ngata pē ʻi heʻenau fai akonaki ʻi ha founga leleí ka ʻoku totonu ke nau alafaʻifaʻitakiʻanga foki: “Kainga, neongo pe ʻe puke nima ha taha lolotonga ʻene fai ha kovi; ka ko kimoutolu, ʻa e kau fakalaumalie, mou faitoʻo ki ha taha pehe ʻo angafakaalaala; pea ke vakai kiate koe naʻa ʻiloange ʻe ʻahiʻahiʻi mo koe foki.” Ko hono fakalea ʻe tahá, kuo pau ke fetāiaki ʻa e akonaki ʻa ha mātuʻa mo e faʻifaʻitakiʻanga ʻokú ne fokotuʻú. ʻOku fehoanaki eni mo e akonaki ʻoku fai ʻi he 2 Tīmote 2:​24, 25 pea mo e Taitusi 1:9. ʻIo, ko kinautolu ʻoku nau fai ʻa e valokí pe fakatonutonú, kuo pau ke nau mātuʻaki tokanga ke ʻoua ʻaupito ʻe anga-fefeka. ʻOku totonu ke nau anga-malū, mo anga-lelei maʻu pē pea piki maʻu ki he ngaahi tefitoʻi moʻoni ʻi he Folofola ʻa e ʻOtuá. ʻOku totonu ke nau hoko ko e kau fanongo taʻefilifilimānako, ʻo fakatupu ivi foʻou ki he faʻahinga ʻoku fakaongosia mo mafasiá.​—Fakafehoanaki mo Mātiu 11:​28-30.

Ko e Moʻulaloa ki he Kau Maʻu Mafai Māʻolungá

11. Ko e hā ʻa e meʻa ʻoku fiemaʻu mei he kau Kalisitiané ʻi heʻenau feangainga mo e kau maʻu mafai fakaemāmaní?

¹¹ ʻOku fiemaʻu ke tau talangofua ki he kau maʻu mafai fakamāmani ka tau moʻulaloa fakaʻotua. ʻOku akonakiʻi kitautolu ʻi he Loma 13:1: “Ke anganofo [“moʻulaloa,” NW] ʻa e tangata kotoa pe ki he ngaahi pule ʻoku maʻolunga: he ʻoku ʻikai ha pule, ka ʻoku mei he ʻOtua pe; pea ko e ngaahi pule ʻoku ʻi ai ni ko e fokotuʻu ʻe he ʻOtua.” ʻOku fiemaʻu ʻo makatuʻunga ʻi he ngaahi leá ni ke tau talangofua ki he ngaahi lao ʻo e ʻalu he halá pea ke tau loto-tōnunga ʻi hono totongi ʻa e ngaahi tukuhaú mo e tuté, ʻo hangē ko ia naʻe lave ki ai ʻa e ʻapositolo ko Paulá ʻi he Loma 13:7.

12. ʻI he ʻuhinga fē ʻoku fakangatangata ai ʻa ʻetau moʻulaloa kia Sisá?

¹² Kaekehe, ʻoku hā mahino kuo pau ke fakangatangata ʻa e moʻulaloa pehē kia Sisá. Kuo pau ke tau manatuʻi maʻu pē ʻa e tefitoʻi moʻoni naʻe fakahā ʻe Sīsū Kalaisí, ʻa ia ʻoku hiki ʻi he Mātiu 22:21: “Peʻi ʻange kia Sisa ʻa e ngāhi meʻa ʻa Sisa; pea ki he ʻOtua ʻa e ngāhi meʻa ʻa e ʻOtua.” ʻOku fakatokangaʻi ʻe ha fakamatala ʻi lalo ki he Loma 13:1 ʻi he Oxford NIV [New International Version] Scofield Study Bible: “ʻOku ʻikai ke ʻuhinga ení kuo pau ke ne talangofua ki he ngaahi tuʻutuʻuni ʻoku taʻetaau pe ʻoku fepaki mo e tuʻunga faka-Kalisitiané. ʻI he ngaahi tuʻunga peheé ko hono fatongiá ke talangofua ki he ʻOtuá kae ʻikai ko e tangatá (Ngāue 5:29; fakafehoanaki mo Tāniela 3:​16-18; 6:10ff).”

Ko e Moʻulaloa Fakaʻotua ʻi Loto he Fāmilí

13. Ko e hā ʻa e meʻa ʻoku fiemaʻu ke fai ʻe he kau memipa ʻi loto he fāmilí ka nau moʻulaloa fakaʻotua?

¹³ ʻI he lotolotonga ʻo e fāmilí ʻoku ngāue ai ʻa e husepānití mo tamaí ko e ʻulu. ʻOku fiemaʻu ʻi he meʻá ni ke tokanga ʻa e ngaahi uaifí ki he akonaki ʻoku fai mai ʻi he ʻEfesō 5:​22, 23: “ʻA e kau fefine, mou anganofo ki siʻomou ngaahi husepaniti, ʻo hange ki he ʻEiki. He ko e husepaniti ko e ʻulu ʻo e uaifi, ʻo hange foki ko Kalaisi ko e ʻulu ʻo e Siasi.”a ʻI he fekauʻaki mo e fānaú, ʻoku ʻikai te nau fokotuʻu ʻe kinautolu pē haʻanau ngaahi lao ka ʻoku totonu ke nau fakahā ʻa e moʻulaloa fakaʻotuá fakatouʻosi ki he tamaí mo e faʻeé, ʻo hangē ko ia ʻoku fakamatalaʻi ʻe Paula ʻi he ʻEfesō 6:​1-3: “ʻA e fanau, mou talangofua ʻi he ʻEiki ki hoʻomou matuʻa: he ko hono totonu ia. “Fakaʻapaʻapa ki hoʻo tamai mo hoʻo faʻe”, (ko e ʻuluaki fekau ia ʻoku ʻi ai hano talaʻofa.) “ka ke monuʻia, pea ke nofo fuoloa ʻi mamani.””

14. Ko e hā ʻa e meʻa ʻoku fiemaʻu mei he ngaahi ʻulu ʻo e ngaahi fāmilí ka nau moʻulaloa fakaʻotua?

¹⁴ Ko hono moʻoní, ʻi he fakahā ʻe he ngaahi husepānití mo e ngaahi tamaí tonu ʻa e moʻulaloa fakaʻotuá ʻoku faingofua ange ai ki he ngaahi uaifí mo e fānaú ke nau fakahā ʻa e moʻulaloa fakaʻotua peheé. ʻOku nau fai ení ʻaki ʻenau ngāueʻaki honau tuʻunga-ʻulú ʻo fehoanaki mo e ngaahi tefitoʻi moʻoni faka-Tohitapú, ʻo hangē ko ia ʻoku ʻi he ʻEfesō 5:​28, 29 mo e 6:4: “ʻOku totonu ke pehe foki ʻa e ʻofa ʻa e ngaahi husepaniti ki siʻonau ngaahi uaifi, he ko siʻonau sino kinautolu. Ko ia ʻoku ne ʻofa ki hono uaifi ʻoku ne ʻofa kiate ia. Seuke, ʻanefē ia ʻa e fehiʻa ʻa ha taha ki hono kakano oʻona; kaekehe ʻoku ne fafanga mo tauhi ia, ʻo hangē foki ko e fai ʻa Kalaisi ki he Siasi.” “Pea ko kimoutolu ʻa e ngaahi tamai, ʻoua te mou fakaʻitaʻi hoʻomou fanau; kae akonekina ʻaki ʻa e tautea mo e valoki ʻa e ʻEiki.”

Ngaahi Tokoni ki Hono Fakahāhā ʻa e Moʻulaloa Fakaʻotuá

15. Ko e hā ʻa e fua ʻo e laumālié te ne tokoniʻi kitautolu ke fakahāhā ʻa e moʻulaloa fakaʻotuá?

¹⁵ Ko e hā te ne tokoniʻi kitautolu ke tau fakahā ʻa e moʻulaloa fakaʻotuá ʻi he ngaahi tafaʻaki kehekehe ko ení? ʻUluaki, ko e ʻofa taʻesiokita​—ko e ʻofa kia Sihova ko e ʻOtuá pea ki he faʻahinga kuó ne tuku ke pule kiate kitautolú. ʻOku tala mai kiate kitautolu ʻi he 1 Sione 5:3: “Ko eni ia ʻa e ʻofa ki he ʻOtua, ʻa ʻetau tauhi ki heʻene ngaahi tuʻutuʻuni. Pea ʻoku ʻikai ke fakamafasia ʻene ngaahi tuʻutuʻuni.” Naʻe lave ʻa Sīsū ki he meʻa tatau ʻi he Sione 14:15: “Kapau ʻoku mou ʻofa kiate au, te mou tauhi ʻeku ngaahi fekau aʻaku.” Ko e moʻoni, ko e ʻofá​—ko e fua tuʻu-ki-muʻa ia ʻo e laumālié—​te ne tokoniʻi kitautolu ke tau houngaʻia ʻi he meʻa kotoa pē kuo fai ʻe Sihova maʻatautolú pea te ne tokoniʻi kitautolu ke fakahāhā ʻa e moʻulaloa faka-ʻotuá.​—Kalētia 5:22.

16. Ko e hā ʻa e tokoni ʻa e manavahē ʻotuá ki he fakahāhā ʻo e moʻulaloa fakaʻotuá?

¹⁶ Ko hono uá, ko e manavahē ʻotua. Ko e manavahē naʻa taʻefakahōifua kia Sihova ko e ʻOtuá te ne tokoniʻi kitautolu koeʻuhi ʻoku ʻuhinga ia ke “fehiʻa ki he kovi.” (Palōvepi 8:13) ʻOku ʻikai toe fehuʻia, ʻe taʻofi kitautolu ʻe he manavahē naʻa taʻefakahōifua kia Sihová mei hono fakangaloku ʻetau tuí koeʻuhi ko ha manavahē ki he tangatá. Te ne toe tokoniʻi kitautolu ke tau talangofua ki he ngaahi fakahinohino ʻa e ʻOtuá tatau ai pē pe ko e hā ʻa e ngaahi faingataʻa ʻoku fiemaʻu ke lavaʻi. ʻIkai ngata ai, ʻe taʻofi ai kitautolu ke ʻoua ʻe ʻulutukua ki he ngaahi fakatauele pe ngaahi hehema ke faihalá. ʻOku fakahā ʻe he Tohitapú ko e manavahē kia Sihová naʻá ne tokoniʻi ʻa ʻĒpalahame ke ne feinga ke feilaulauʻaki hono foha ʻofeina ko ʻAisaké pea ko e manavahē naʻa taʻefakahōifua kia Sihová naʻá ne tokoniʻi ʻa Siosifa ke ne lavameʻa ʻi hono talitekeʻi ʻa e ngaahi feinga taʻetaau ʻa e uaifi ʻo Pōtifá.​—Sēnesi 22:12; 39:9.

17. Ko e hā ʻa e kaunga ʻa e tuí ki heʻetau fakahā ʻa e moʻulaloa fakaʻotuá?

¹⁷ Ko e tokoni hono tolú ko e tui kia Sihova ko e ʻOtuá. ʻE tokoni ʻa e tuí kiate kitautolu ke tau tokanga ki he akonaki ʻi he Palōvepi 3:​5, 6: “Falala ki he ʻEiki ʻaki ʻa e kotoa ʻo ho loto, ʻo ʻouae fāki ki ho poto oʻou: ke ke fakaongo kiate ia ʻi ho hala kotoa pe, pea ʻe fakatonutonu ʻe ia ho ngaahi ʻalunga.” ʻE tautefito ʻa e tokoni kiate kitautolu ʻa e tuí ʻi he taimi ʻoku ngalingali ʻoku tau faingataʻaʻia taʻetotonu ai pe ʻoku tau fakakaukau kuo fakafaikehekeheʻi kitautolu koeʻuhi ko hotau matakali pe fonua ʻoku tau kau ki aí pe ko e fepaki hotau angá mo e anga ʻo ha taha kehe. ʻE fakakaukau nai ʻa e niʻihi kuo hala ʻa hono taʻefakatokangaʻi kinautolu ʻi he ʻikai ke fokotuʻu ke nau hoko ko e taha ʻo e kau mātuʻá pe ko ha sevāniti. Kapau ʻoku tau maʻu ʻa e tuí, te tau tatali kia Sihova ke ne fakatonutonu ʻa e ngaahi meʻa ko iá ʻi heʻene taimi tukupau. ʻI he lolotonga iá ʻoku fiemaʻu nai ke tau fakatupulekina ʻa e faʻa kātaki.​—Tangilaulau 3:26.

18. Ko e hā ʻa e tokoni hono fā ke tau hoko ʻo fakahā ʻa e moʻulaloa fakaʻotuá?

¹⁸ Ko e tokoni hono faá ko e anga-fakatōkilalo. ʻOku ʻikai faingataʻa ki he tokotaha anga-fakatōkilaló ke ne fakahā ʻa e moʻulaloa fakaʻotuá koeʻuhi ‘ʻi heʻene loto taʻehikí, ʻokú ne lau ʻoku lelei hake ʻa e niʻihi kehé ʻiate ia.’ Ko ha tokotaha anga-fakatōkilalo ʻokú ne loto-lelei ke “nofo kimui ʻaupito.” (Filipai 2:​2-4; Luke 9:48) Ka ʻoku fisiʻia ke moʻulaloa ʻa e tokotaha loto-mahikihikí pea ʻokú ne ongoʻi ʻita ai. Kuo pehē ʻo fekauʻaki mo ha tokotaha pehē ʻoku ʻikai te ne fiefanongo ki ha fakaanga fekauʻaki mo ia ʻa ia ʻoku fakahā ai ʻa e hala ʻo ʻene ngaahi foungá neongo ʻe fakahaofi ai ʻene moʻuí.

19. Ko e hā ʻa e faʻifaʻitakiʻanga lelei ʻi he anga-fakatōkilaló naʻe fokotuʻu ʻe ha palesiteni ki muʻa ʻo e Watch Tower Society?

¹⁹ Naʻe fokotuʻu ʻe Joseph Rutherford, ko e palesiteni hono ua ʻo e Watch Tower Bible and Tract Society, ha faʻifaʻitakiʻanga lelei ʻi he anga-fakatōkilaló mo e moʻulaloa fakaʻotuá. ʻI he taimi naʻe tapui ai ʻe Hitilā ʻa e ngāue ʻa e Kau Fakamoʻoni ʻa Sihová ʻi Siamané, naʻe tohi ʻa e ngaahi tokoua ʻi aí kiate ia ʻo ʻeke pe ko e hā ʻoku totonu ke nau fai koeʻuhi ko hono tapui ʻa ʻenau ngaahi fakatahá mo ʻenau ngāue fakamalangá. Naʻá ne fakahā ʻa e meʻá ni ki he fāmili Pētelí pea tala moʻoni ʻoku ʻikai te ne ʻilo ʻa e meʻa ke tala ki he ngaahi tokoua ʻi Siamané, tautautefito koeʻuhi ko e ngaahi tautea mamafa naʻe fai ʻe he puleʻangá. Naʻá ne pehē kapau ʻe ʻilo ʻe ha taha ʻa e meʻa ke tala kiate kinautolú, te ne fiefia ke fanongo ki ai. Ko ha faʻahinga laumālie anga-fakatōkilalo lahi ē!b

Ngaahi ʻAonga mei Hono Fakahā ʻa e Moʻulaloa Fakaʻotuá

20. Ko e hā ʻa e ngaahi tāpuaki ʻoku hoko mai mei hono fakahā ʻa e moʻulaloa fakaʻotuá?

²⁰ Ko ia ʻe ʻeke nai: Ko e hā ʻa e ngaahi ʻaonga mei hono fakahā ʻa e moʻulaloa fakaʻotuá? Ko e moʻoni, ʻoku lahi ʻaupito ʻa e ngaahi ʻaongá. ʻOku tau hao ai mei he ngaahi loto-moʻua mo e ngaahi meʻa fakatupu ongoʻi kulanoa ʻoku tofanga ai ʻa e faʻahinga ʻoku nau ngāue tauʻatāina. ʻOku tau maʻu ai ha vahaʻangatae lelei mo Sihova ko e ʻOtuá. ʻOku tau maʻu ai ʻa e feohi lelei taha mo hotau ngaahi tokoua Kalisitiané. ʻIkai ngata ai, ʻi heʻetau talangofua ki he ngaahi laó, ʻoku tau fakaʻehiʻehi ai mei he ngaahi faingataʻa ʻikai pau ke hoko mei he kau maʻu mafai fakaemāmaní. ʻOku tau maʻu foki ʻa e moʻui fiefia fakafāmili ʻi he tuʻunga ko e ngaahi husepāniti mo e ngaahi uaifi, ko e ngaahi mātuʻa mo e fānau. ʻIkai ngata ai, ʻi heʻetau tauhi maʻu ʻa e moʻulaloa fakaʻotuá, te tau ngāue ai ʻo fehoanaki mo e akonaki ʻi he Palōvepi 27:​11, PM: “E hoku foha, ke ke boto koe, bea ke fakafiefiaʻi hoku loto, koeuhi keu faa tali ia aia oku manuki kiate au.”

[Fakamatala ʻi lalo]

Ngaahi Fehuʻi Fakamanatu

◻ Ko hai ʻa e kau tangata naʻe ngāueʻaki ʻe he ʻOtuá ke fakahoko ʻa e fetuʻutakí, pea ko e hā naʻe moʻuaʻaki ʻe heʻene kau sevānití ke fai ange kiate kinautolú?

◻ Ko e hā ʻa e ngaahi vā kehekehe ʻoku kaungatonu ki ai ʻa e moʻulaloa fakaʻotuá?

◻ Ko e hā ʻa e ngaahi ʻulungaanga te nau tokoniʻi kitautolu ke fakahāhā ʻa e moʻulaloa fakaʻotuá?

◻ Ko e hā ʻa e ngaahi tāpuaki ʻoku hoko mai mei he moʻulaloa fakaʻotuá?

[Fakatātā ʻi he peesi 16]

Naʻe ngāueʻaki ʻe he ʻOtuá ʻa e fokotuʻutuʻu ki he temipale ʻi Selusalemá ke fakahā hono finangaló ki heʻene kakaí

[Fakatātā ʻi he peesi 18]

Ngaahi tafaʻaki ʻoku malava ke tau fakahā ai ʻa e moʻulaloa fakaʻotuá