Kuo ʻOsi Lau ʻe Sihova “Homou Ngāhi Tuʻoni Louʻulu”

ʻE ʻikai patū ki he kelekele [ha foʻi misi ʻe] taha taʻe meʻa ki ai ʻe hoʻomou Tamai. Ka ko e meʻa kiate kimoutolu, ko homou ngāhi tuʻoni louʻulu kuo ʻosi lau fakalautelau.​—MĀTIU 10:​29, 30.

1, 2. (a) Ko e hā naʻe ongoʻi ai ʻe Siope kuo liʻaki ia ʻe he ʻOtuá? (e) Naʻe ʻuhinga ʻa e ngaahi fakalea ʻa Siopé naʻá ne fakafepaki kia Sihova? Fakamatalaʻi.

“ʻOKU OU tautapa atu, ka ʻoku ʻikai te ke tali au: ʻoku ou moʻu tuʻua pe, ka ke fakasio mai pe. Kuo ke liliu, ʻo hoko ko e taha ke fakamamahi kiate au: ʻoku ke ngaue ʻaki ʻa e ngu ʻo ho nima ke fakatangaʻi au.” Ko e tangata naʻá ne leaʻaki ʻa e ngaahi lea ko iá naʻe mamahi lahi, pea ʻoku ʻikai ha ofo ai! Ne mole ʻene maʻuʻanga moʻuí, ne toʻo ʻe ha fakatamaki anga-kehe ʻa e moʻui ʻa ʻene fānaú, pea ko eni naʻe taaʻi ia ʻe ha mahaki fakatupu tāvaivaia. Ko e hingoa ʻo e tangatá ko Siope, pea ko hono fuʻu ʻahiʻahi fakamamahí ʻoku lēkooti ia ʻi he Tohi Tapú ke ʻaonga kiate kitautolu.—Siope 30:​20, 21.

² Ko e ngaahi fakalea ʻa Siopé ʻoku ʻai nai ai ke hā naʻá ne fakafepaki ki he ʻOtuá, ka naʻe ʻikai ko e tuʻungá ia. Naʻe lea pē ʻa Siope ia mei he mamahi naʻá ne ongoʻi ʻi hono lotó. (Siope 6:​2, 3) Naʻe ʻikai te ne ʻiloʻi ko Sētane ia ʻa e tupuʻanga ʻo hono ngaahi ʻahiʻahí, ko ia ai naʻá ne fakamulituku hala ʻaki ʻo pehē kuo liʻaki ia ʻe he ʻOtuá. ʻI he taimi ʻe taha, naʻe aʻu ʻo pehē ai ʻe Siope kia Sihova: “Koeha oku ke fufu ai ho fofoga, mo ke lau au ko ho fili?”a​—Siope 13:​24, PM.

 3. ʻI he hoko ʻa e ngaahi faingataʻá, ko e hā nai ʻe haʻu ki heʻetau fakakaukaú?

³ ʻI he ʻahó ni, ʻoku tofanga ʻa e tokolahi ʻo e kakai ʻa Sihová ʻi he ngaahi faingataʻa hokohoko ko e tupu mei he ngaahi taú, ngaahi moveuveu fakapolitikale pe fakasōsiale, ngaahi fakatamaki fakanatula, taʻumotuʻa, puke, masiva ʻangoʻango, mo e ngaahi fakataputapui fakapuleʻanga. Ngalingali ʻokú ke toe tofanga mo koe foki ʻi ha ngaahi faʻahinga ʻahiʻahi. ʻI he taimi ʻe niʻihi te ke fakakaukau nai ʻoku fufū ʻe Sihova ʻa hono fofongá meiate koe. ʻOkú ke ʻiloʻi lelei ʻa e ngaahi lea ʻo e Sione 3:16: “Naʻe ʻofa pehe ʻa e ʻOtua ki māmāni, ko ia naʻa ne foaki hono ʻAlo tofu-pe-taha-ne-fakatupu.” Neongo ia, ʻi he taimi ʻokú ke faingataʻaʻia ai pea ʻikai hā mai ha fakanongá, te ke fifili nai: ‘ʻOku ʻofa moʻoni ʻa e ʻOtuá ʻiate au? ʻOkú ne fakatokangaʻi ʻa e meʻa ʻoku ou tofanga aí? ʻOkú ne tokanga fekauʻaki mo au ʻi hoku tuʻunga fakafoʻituituí?’

 4. Ko e hā ʻa e tuʻunga hokohoko naʻe pau ke kātekina ʻe Paulá, pea ʻi he ngaahi founga fē ʻe uesia nai ai kitautolu ʻi ha tuʻunga peheé?

⁴ Fakakaukau angé ki he meʻa naʻe hoko ki he ʻapositolo ko Paulá. “Nae tuku kiate au ae tolounua i he kakano, koe mea fekau [pe ʻāngelo] a Setani, ke tukiʻi au,” ko ʻene tohí ia, pea tānaki mai: “Nae liuga tolu eku kole lahi ki he Eiki, koeuhi ke mahui ia iate au.” Naʻe fanongo mai ʻa Sihova ki heʻene ngaahi kolé. Ka neongo ia, naʻá ne fakahaaʻi kia Paula ʻe ʻikai te ne kau mai fakafou ʻi ha fakaleleiʻanga fakaemana. ʻI hono kehé, naʻe pau ke falala ʻa Paula ki he mālohi ʻo e ʻOtuá ke tokoniʻi ia ke ne fekuki mo hono “tolounua i he kakano.”b (2 Kolinito 12:​7-9, PM) Hangē ko Paulá, ʻokú ke hokosia hokohoko nai ha faʻahinga ʻahiʻahi. Mahalo pē ʻokú ke fifili, ‘Ko e moʻoniʻi meʻa ko ia ʻo e hā kuo teʻeki fai ʻe Sihova ha meʻa fekauʻaki mo hoku ʻahiʻahí ʻoku ʻuhinga ai iá ʻoku ʻikai te ne lāuʻilo ki hoku tuʻungá pe ʻoku ʻikai te ne tokanga mai kiate au?’ Ko e tali ki aí ko ha ʻikai papau! Ko e tokanga loloto ʻa Sihova ki he tokotaha taki taha ʻo ʻene kau sevāniti faitōnungá ʻoku fakamamafaʻi ia ʻe he meʻa naʻe tala ʻe Sīsū ki heʻene kau ʻapositoló ʻi he taimi nounou hili ʻene fili kinautolú. Tau sio angé ki he founga ʻe lava ke fakalototoʻaʻi ai ʻe heʻene ngaahi leá ʻa kitautolu he ʻaho ní.

“ʻOua Te Mou Manavahe”—Ko e Hā Hono ʻUhingá?

5, 6. (a) Naʻe anga-fēfē ʻa e tokoniʻi ʻe Sīsū ʻa e kau ʻapositoló ke ʻoua te nau manavahē ki he meʻa naʻe toka mei muʻá? (e) Naʻe anga-fēfē hono fakahaaʻi ʻe Paula ʻa e falala pau ki he tokanga mai ʻa Sihova kiate iá?

⁵ Naʻe maʻu ʻe he kau ʻapositoló ʻa e ngaahi mālohi anga-kehe meia Sīsū, ʻo kau ai ʻa e “faʻiteliha ki he ngāhi faʻahikehe, koeʻuhi ke nau kapusi kinautolu; mo ne ʻange ʻa e mafai ke faitoʻo ʻa e faʻahinga alangamahaki kotoa pe mo e mahamahaki.” Neongo ia, naʻe ʻikai ʻuhinga ia hení ʻe ʻatā ai honau ʻalungá mei he ngaahi ʻahiʻahí mo e ngaahi faingataʻá. ʻI hono kehé, naʻe fakamatalaʻi fakaikiiki ʻe Sīsū ʻa e niʻihi ʻo e ngaahi meʻa ʻe hoko kiate kinautolú. Kae kehe, naʻá ne ekinaki kiate kinautolu: “ʻOua te mou momoʻi manavahe kiate kinautolu ʻoku tamateʻi ʻa e sino pe, ka ko e laumalie ʻoku ʻikai te nau lava ke tamateʻi: ka ke mou manavahe tuʻu kiate ia ʻoku mafai ke fakaʻauha ʻi Heli ʻa e laumalie mo e sino fakatouʻosi.”—Mātiu 10:​1, 16-22, 28.

⁶ Ke tokoniʻi ʻene kau ʻapositoló ke nau mahinoʻi ʻa e ʻuhinga ʻoku ʻikai fiemaʻu ai ke nau manavaheé, naʻe hoko atu ʻa Sīsū ʻo fai ha ongo talanoa fakatātā. Naʻá ne tala ange kiate kinautolu: “ʻIkai ʻoku fakatau ha ongo kiʻi misi ʻe toko ua ki ha konga seniti pe? ka ʻe ʻikai patū ki he kelekele hana taha taʻe meʻa ki ai ʻe hoʻomou Tamai. Ka ko e meʻa kiate kimoutolu, ko homou ngāhi tuʻoni louʻulu kuo ʻosi lau fakalautelau. Ko ia ʻoua te mou manavahe: ʻoku mou mahuʻinga kimoutolu ʻi ha fanga misi tokolahi.” (Mātiu 10:​29-31) Fakatokangaʻi naʻe fakafehokotaki ʻe Sīsū ʻa e ʻikai ke manavahē ʻi he fehangahangai mo e faingataʻá mo e falala pau ʻoku tokanga mai ʻa Sihova kiate kitautolu fakafoʻituituí. ʻOku hā mahino, naʻe maʻu ʻe he ʻapositolo ko Paulá ʻa e falala pau pehē. Naʻá ne tohi: “Kapau ʻoku kau ʻa e ʻOtua maʻatautolu, pea ko hai tu ʻe taʻofi mai? Seuke, kapau naʻe ʻikai mamae ʻe he ʻEne ʻAfio ki hono ʻAlo moʻoni, ka ka tukuange ia ke pekia koeʻuhi ko kitautolu fulipe, pea fefe ai haʻane mamae ke foaki mai mo ia ʻa e meʻa kotoa pe.” (Loma 8:​31, 32) Tatau ai pē pe ko e hā ʻa e ngaahi faingataʻa ʻokú ke fehangahangai mo iá, ko koe foki ʻe lava ke ke fakapapauʻi ʻoku tokanga mai ʻa Sihova kiate koe fakafoʻituitui kapau te ke kei mateaki ai pē kiate ia. ʻE hoko eni ʻo toe hā mahino ange ʻi heʻetau vakai ofi ange ki he ekinaki ʻa Sīsū ki heʻene kau ʻapositoló.

Ko e Mahuʻinga ʻo ha Foʻi Misí

7, 8. (a) Naʻe anga-fēfē ʻa e vakai ki he fanga misí ʻi he ʻaho ʻo Sīsuú? (e) Hangē ko ia ʻoku hā mahinó, ko e hā ʻoku ngāueʻaki ai ʻe he Mātiu 10:29 ʻa e faʻunga ʻo e foʻi lea kiʻí ki he foʻi lea faka-Kalisi ko ia ki he “ongo kiʻi misi”?

⁷ Ko e lea fakatātā ʻa Sīsuú ʻokú ne fakamatalaʻi ola lelei ʻa e tokanga ʻa Sihova ki Heʻene kau sevānití taki taha. ʻUluaki fakakaukau angé ki he meʻa fekauʻaki mo e fanga misí. ʻI he ʻaho ʻo Sīsuú, naʻe ngāueʻaki ai ʻa e fanga misí ki he meʻakaí, ka koeʻuhí ko ʻenau maumauʻi ʻa e ngoué, naʻe vakai lahi ai kiate kinautolu ko e fanga manupuna maumau. Naʻe lahi fau mo maʻamaʻa ʻa e fanga misí pea naʻe lava ke fakatau mai ha ongo foʻi misi ʻe ua ʻo siʻi hifo ʻi he tatau ʻo e sēniti ʻe nima ʻi he mahuʻinga ʻi onopōní. Ko e liunga ua ʻa e lahi ko iá ʻe fakatau mai ʻaki ʻo ʻikai ko e fā ka ko e ngaahi foʻi misi ʻe nima—ʻo lī mai pē ki ai ʻa e foʻi manupuna ia ʻe tahá, ʻo hangē pē naʻe ʻikai ʻaupito hano mahuʻingá!—Luke 12:6.

⁸ Fakakaukau atu foki, fekauʻaki mo e lahi ʻo e foʻi manupuna anga-maheni ko ení. ʻI hono fakahoa ki he fanga manupuna kehe tokolahi, naʻa mo ha foʻi misi kuo ʻosi fuʻu lahi ʻoku kei siʻisiʻi ʻaupito pē ia. Neongo ia, ko e foʻi lea faka-Kalisi naʻe liliu ko e “ongo kiʻi misi” ʻi he Mātiu 10:29 ʻoku lave fakahangatonu ia ki he ngaahi foʻi misi īkí. ʻOku hā mahino naʻe fiemaʻu ʻe Sīsū ke fakakaukauloto atu ʻa ʻene kau ʻapositoló ki ha foʻi manupuna ʻoku mātuʻaki siʻisiʻi taha hono mahuʻingá. Hangē ko ia ko e lau ʻa ha maʻuʻanga fakamatala ʻe taha, “ʻoku lave ʻa Sīsū ki ha foʻi manupuna siʻisiʻi ʻaupito pea toe ngāueʻaki ki ai ʻa e foʻi lea kiʻí!”

 9. Ko e hā ʻa e poini mālohi ʻoku maʻu ʻi he talanoa fakatātā ʻa Sīsū fekauʻaki mo e fanga misí?

⁹ Ko e fakafehoanaki ko ia ʻa Sīsū fekauʻaki mo e fanga misí ʻoku maʻu ai ha foʻi poini mālohi: Ko e meʻa ʻoku hā ngali taʻemahuʻinga ki he tangatá ʻoku mahuʻinga ia kia Sihova ko e ʻOtuá. Naʻe toe fakamamafaʻi ʻe Sīsū ʻa e foʻi moʻoni ko ení ʻaki hono tānaki mai ki ai ʻe ʻikai “patū ki he kelekele” ha kiʻi foʻi misi ʻo ʻikai taʻefakatokangaʻi ʻe Sihova.c ʻOku māʻalaʻala ʻa e lēsoní. Kapau ʻoku fakatokangaʻi ʻe Sihova ko e ʻOtuá ʻa e kiʻi manupuna siʻisiʻi taha mo taʻemahuʻinga tahá, huanoa ange ai ʻa ʻene tokanga fekauʻaki mo e tuʻunga ʻo ha tangata ʻa ia kuó ne fili ke tauhi kiate ia!

10. Ko e hā ʻa e ʻuhinga ʻo e fakamatala: “Ko homou ngāhi tuʻoni louʻulu kuo ʻosi lau fakalautelau”?

¹⁰ Tānaki atu ki heʻene talanoa fakatātā fekauʻaki mo e fanga misí, naʻe pehē ʻe Sīsū: “Ko homou ngāhi tuʻoni louʻulu kuo ʻosi lau fakalautelau.” (Mātiu 10:30) Ko e fakamatala nounou kae loloto ko ení ʻoku fakalahiʻi ai ʻa e foʻi poini ʻo e talanoa fakatātā ʻa Sīsū fekauʻaki mo e fanga misí. Fakakaukau angé: Ko e fakaʻavalisi ʻo e foʻi ʻulu ʻo e tangatá ʻoku ʻi ai ʻa e fulufuluʻi ʻulu ʻe 100,000 nai. ʻI he tuʻunga lahi tahá, ko e fulufuluʻi ʻulu ʻe tahá ʻoku hā ngali tatau tofu pē ia mo e fulufuluʻi ʻulu hokó, pea ʻoku ʻikai ha fulufuluʻi ʻulu ʻe hā ngali ʻoku taau ke tau siofi makehe. Neongo ia, ko e fulufuluʻi ʻulu taki taha ʻoku fakatokangaʻi mo lau ia ʻe Sihova ko e ʻOtuá. Koeʻuhi ko e tuʻungá eni, ʻoku ʻi ai nai ha fakaikiiki ʻo ʻetau moʻuí ʻoku ʻikai lava ke ʻafioʻi ʻe Sihova? Ko e moʻoni ʻoku mahinoʻi ʻe Sihova ʻa e faʻunga makehe taki taha ʻo ʻene kau sevānití. Ko e moʻoni, ʻokú ne ‘afioʻi ae lotó.’—1 Samiuela 16:​7, PM.

11. Naʻe anga-fēfē hono fakamatalaʻi ʻe Tēvita ʻa ʻene falala pau ki he tokanga ʻa Sihova kiate ia fakafoʻituituí?

¹¹ Ko Tēvita, ʻa ia naʻe ʻikai ke sola ki he faingataʻá, naʻá ne falala pau naʻe fakatokangaʻi ia ʻe Sihova. “ʻE Sihova, kuo ke hakule au, ʻo ʻiloā,” ko ʻene tohí ia. “Ko ʻeku nofo hifo mo tuʻu hake ʻoku ke ʻilo, ʻoku ke vavanga ki heʻeku fakakaukau kei mamaʻo.” (Sāme 139:​1, 2) Ko koe foki ʻe lava ke ke fakapapauʻi ʻoku ʻafioʻi fakafoʻituitui koe ʻe Sihova. (Selemaia 17:10) ʻOua ʻe vave ke pehē ʻokú ke fuʻu taʻemahuʻinga ke fakatokangaʻi ʻe he fofonga tokaimaʻananga ʻo Sihová!

“Ke Ke ʻAi Hoku Loʻimata ki Hoʻo Hina”

12. ʻOku anga-fēfē ʻetau ʻiloʻi ʻoku lāuʻilo kakato ʻa Sihova ki he ngaahi faingataʻa ʻoku fuesia ʻe hono kakaí?

¹² ʻOku ʻikai ke ngata pē ʻi hono ʻafioʻi ʻe Sihova ʻa ʻene kau sevānití tāutaha ka ʻokú ne toe lāuʻilo kakato fekauʻaki mo e ngaahi faingataʻa ʻoku nau taki taha fuesiá. Ko e fakatātaá, ʻi he taimi naʻe ngaohikoviʻi ai ʻa e kau ʻIsilelí ko e kau pōpulá, naʻe folofola ʻa Sihova kia Mōsese: “Kuo u matuʻaki mamata ki he ngaohikoviʻi ʻo hoku kakai ʻoku ʻi Isipite, pea kuo ongo mai ʻenau tautapa koeʻuhi ko honau kau ofisa; he ʻoku ou ʻiloʻi ʻenau ngaahi mamahi.” (Ekisoto 3:7) He fakafiemālie moʻoni ia ke ʻiloʻi ʻi he taimi ʻoku tau kātekina ai ha ʻahiʻahí, ʻoku ʻafioʻi ʻe Sihova ʻa e meʻa ʻoku hokó pea fanongo mai ki heʻetau ngaahi tautapá! ʻOku ʻikai moʻoni te ne taʻetokanga mai ki heʻetau faingataʻaʻiá.

13. Ko e hā ʻokú ne fakahaaʻi ʻoku ongoʻi moʻoni ʻe Sihova ʻa ʻene kau sevānití?

¹³ Ko e tokanga ko ia ʻa Sihova ki he faʻahinga kuo nau kau ki ha vahaʻangatae mo iá ʻoku toe hā ia ʻi heʻene ngaahi ongoʻi ki he kau ʻIsilelí. Neongo ko ʻenau faingataʻaʻiá naʻe faʻa tupu pē ia mei heʻenau ongongataʻá, naʻe tohi ʻe ʻAisea ʻo fekauʻaki mo Sihova: “ʻI he mamahi kotoa naʻe hoko kiate kinautolu naʻe hoko ha mamahi ki Heʻene ʻAfio.” (Aisea 63:9) ʻI he tuʻunga ko ha sevāniti faitōnunga ʻa Sihová, ʻe lava leva ke ke fakapapauʻi ai, ko e taimi ko ia ʻokú ke mamahi aí, ʻoku mamahi ʻa Sihova. ʻIkai ʻoku ueʻi koe ʻe he meʻa ko iá ke ke fehangahangai taʻemanavahē mo e faingataʻá pea ke hokohoko atu hoʻo fai ʻa hoʻo lelei tahá ke tauhi kiate ia?—1 Pita 5:​6, 7.

14. Ko e hā ʻa e ngaahi tuʻunga takatakai ʻi hono faʻu ʻo e Sāme 56?

¹⁴ Ko e falala pau ʻa Tuʻi Tēvita naʻe tokanga mai ʻa Sihova kiate ia mo ongoʻi iá ʻoku ʻai ʻo hā mahino ia ʻi he Sāme 56, ʻa ia naʻe faʻu ʻe Tēvita lolotonga ʻene hola mei he tuʻi anga-fakapō ko Saulá. Naʻe hola ʻa Tēvita ki Kati, ka naʻá ne ilifia naʻa puke ia ʻo ka fakatokangaʻi ʻe he kau Filisitiá. Naʻá ne tohi: “ʻOku fie folo au ʻe hoku ngaahi fili ʻi he ngaahi ʻaho kotoa: he ʻoku toko lahi ʻoku fai tau mai, ʻo ta mei ʻolunga.” Koeʻuhi ko hono tuʻunga fakatuʻutāmakí, naʻe hanga ai ʻa Tēvita kia Sihova. “Ko e ʻaho kotoa ʻoku nau nofo ko e pikoʻi ʻeku fai,” ko ʻene leá ia. “Ko ʻenau ngaahi fakakaukau kiate au, ha meʻa pe ke u kovi ai.”—Sāme 56:​2, 5.

15. (a) Ko e hā naʻe ʻuhinga ki ai ʻa Tēvita ʻi heʻene kole kia Sihova ke ʻai hono loʻimatá ʻi ha hina pe ʻi ha tohí? (e) ʻI he taimi ʻoku tau kātekina ai ha tuʻunga ʻokú ne poleʻi ʻa e tuí, ko e hā ʻe lava ke tau fakapapauʻí?

¹⁵ Pea hangē ko ia ʻoku lēkooti ʻi he Sāme 56:​8, ʻoku fai ai ʻe Tēvita ʻa e ngaahi fakamatala fakatoʻoaloto ko ení: “Ko ʻeku ʻaunoa ni ʻoku fakalau ʻe he ʻAfiona—ʻe, ke ke ʻai hoku loʻimata ki hoʻo hina na—ʻikai ʻoku tuʻu ʻi hoʻo tohi na?” Ko ha fakamatala fakaueʻiloto moʻoni ē ʻo e tokanga ʻofa ʻa Sihová! ʻI he taimi ʻoku tau ʻi he malumalu ai ʻo e faingataʻá, ʻoku tau tangi ʻa loʻimata nai ai kia Sihova. Naʻa mo e tangata haohaoa ko Sīsuú naʻá ne fai pehē. (Hepelu 5:7) Naʻe falala pau ʻa Tēvita naʻe siofi ia ʻe Sihova pea te ne manatuʻi ʻene mamahí, ʻo hangē ia ko hono tauhi ʻa hono loʻimatá ʻi ha hina pe tohi ʻi ha tohí.d Mahalo pē ʻokú ke ongoʻi ʻe fakafonu ʻe ho loʻimatá ha konga lahi ʻo e foʻi hina ko iá pe ko e ngaahi peesi lahi ʻo ha tohi pehē. Kapau ko e tuʻungá ia, ʻe lava ke ke fiemālie. ʻOku fakapapauʻi mai ʻe he Tohi Tapú kiate kitautolu: “Ko e loto lavea ʻoku ofi ki ai ʻa e ʻEiki, pea ʻoku ne fakamoʻui ʻakinautolu ʻoku laumalie mafesi.”—Sāme 34:18.

Hoko ko ha Kaungāmeʻa Fekoekoeʻi ʻo e ʻOtuá

16, 17. (a) ʻOku anga-fēfē ʻetau ʻiloʻi ʻoku ʻikai taʻetokanga ʻa Sihova ki he ngaahi palopalema ʻoku fehangahangai mo hono kakaí? (e) Ko e hā kuo fai ʻe Sihova ke fakaʻatā ai ʻa e kakaí ke nau maʻu ha tuʻunga fekoekoeʻi mo iá?

¹⁶ Ko e moʻoniʻi meʻa ko ia hono lau ʻe Sihova ‘hotau ngāhi tuʻoni louʻulú’ ʻoku ʻomai ai kiate kitautolu ha fakakaukau fekauʻaki mo e faʻahinga ʻOtua fakatokanga meʻa mo tokanga ʻoku tau monūʻia ke lotu ki aí. Neongo ʻe pau ke tau tatali kae ʻoua ke aʻu ki he māmani foʻou kuo talaʻofá ke mole ai ʻa e langá mo e mamahí kotoa, ʻoku fai ʻe Sihova ʻa e meʻa fakaofo maʻa hono kakaí he taimí ni. Naʻe tohi ʻe Tēvita: “Koe finagalo fufu [“fekoekoeʻi mo,” NW] Jihova oku iate kinautolu oku manavahe kiate ia; bea te ne fakaha kiate kinautolu ene fuakava.”—Sāme 25:​14, PM.

¹⁷ ‘Fekoekoeʻi mo Jihova.’ Ko e moʻoni, ko e foʻi fakakaukau tofu pē ko iá ʻoku hā ngali taʻealamakupusi ia ki he faʻahinga taʻehaohaoa ʻo e tangatá! Neongo ia, ʻoku fakaafeʻi ʻe Sihova ʻa e faʻahinga ʻoku manavahē kiate iá ke nau hoko ko e kau fakaafe ʻi hono tēnití. (Sāme 15:​1-5) Pea ko e hā ʻoku fai ʻe Sihova maʻa ʻene kau fakaafé? ʻOkú ne fakatupunga ke nau ʻiloʻi ʻa ʻene fuakavá, ʻo fakatatau ki he lau ʻa Tēvitá. ʻOku falala ʻa Sihova kiate kinautolu, ʻo fakahaaʻi ʻa ʻene “meʻa fakapulipulí” ki he kau palōfitá koeʻuhi ke lava ʻo nau ʻiloʻi ʻa ʻene ngaahi taumuʻá mo e meʻa kuo pau ke nau fai ke moʻui ai ʻo fehoanaki mo iá.—Emosi 3:​7, NW.

18. ʻOku anga-fēfē ʻetau ʻiloʻi ʻoku fiemaʻu mai ʻe Sihova ke tau maʻu ha vahaʻangatae vāofi mo iá?

¹⁸ Ko e moʻoni, ʻoku fakalotomāfana ke ʻiloʻi ko kitautolu faʻahinga taʻehaohaoa ʻo e tangatá ʻe lava ke tau hoko ko e ngaahi kaungāmeʻa fekoekoeʻi ʻo e Fungani Māʻolungá, ʻa Sihova ko e ʻOtuá. Ko hono moʻoní, ʻokú ne fakaʻaiʻai kitautolu ke fai ʻa e meʻa tofu pē ko iá. “ʻUnuʻunu atu ki he ʻOtua, pea ʻe ʻunuʻunu mai ia kiate kimoutolu,” ko e lau ia ʻa e Tohi Tapú. (Semisi 4:8) ʻOku fiemaʻu ʻe Sihova ke tau maʻu ha vahaʻangatae vāofi mo ia. Ko hono moʻoní, kuó ne ʻosi fou ʻi ha ngaahi sitepu ke ʻai ke malava ha vahaʻangatae pehē. Ko e feilaulau huhuʻi ʻa Sīsuú kuo fakaava ai ʻa e matapā kiate kitautolu koeʻuhí ke lava ʻo tau maʻu ai ha tuʻunga kaumeʻa mo e ʻOtua Māfimafi-Aoniú. ʻOku pehē ʻe he Tohi Tapú: “ʻOku tau ʻofa ʻe kitautolu, koeʻuhi naʻe tomuʻa ʻofa ʻe he ʻEne ʻAfio kiate kitautolu.”—1 Sione 4:19.

19. ʻE lava fēfē ke fakaivimālohiʻi ʻe he kātakí ʻa hotau vahaʻangatae mo Sihová?

¹⁹ Ko e vahaʻangatae vāofi ko iá ʻoku fakaivimālohiʻi ia ʻi he taimi ʻoku tau kātaki ai ʻi he malumalu ʻo e ngaahi tuʻunga faingataʻá. Naʻe tohi ʻe he ākonga ko Sēmisí: “Tuku ke fai ʻe kataki ʻene ngaue ke haohaoa, koeʻuhi ke mou haohaoa, mo tuʻu kakato, ʻo taʻe masiva ʻi ha meʻa.” (Semisi 1:4) Ko e hā ʻa e “ngaue” ʻoku fakahoko ʻi hono kātakiʻi ʻa e faingataʻá? Manatuʻi ʻa e “tolounua i he kakano” ʻo Paulá. Ko e hā naʻe fakahoko ʻe he kātakí ʻi hono tuʻungá? Naʻe leaʻaki eni ʻe Paula fekauʻaki mo hono ngaahi ʻahiʻahí: “Pea ka ko ia, pea ta te u fili muʻa ke fai ʻeku pole vaivai ni, koeʻuhi ke hifo mai ʻa e ivi ʻo Kalaisi, ʻo fokotuʻu hono tapanekale ʻiate au. Ko hono ʻuhinga ia ʻoku ou hohóʻia ai ʻi hoku ngaahi vaivaiʻanga, ʻi he faʻa paʻusia, ʻi he faʻa faingataʻaʻia, ʻi he faʻa fakatangaʻi, ʻi he faʻa efituʻua, koeʻuhi ko Kalaisi: he kau ka vaivai, ko ʻeku toki malohi é.” (2 Kolinito 12:​9, 10) Ko e meʻa naʻe hokosia ʻe Paulá ko e pehē ʻe tokonaki mai ʻe Sihova ʻa e mafai naʻe fiemaʻú​—“ʻa e makehe atu ʻo e mafai” kapau naʻe fiemaʻu—koeʻuhi ke lava ai ʻo ne kātaki. Ko e meʻa ko iá naʻe iku, ʻo ne tohoakiʻi ai ia ke ne ofi ange kia Kalaisi pea kia Sihova ko e ʻOtuá.—2 Kolinito 4:7; Filipai 4:​11-13.

20. ʻE lava fēfē ke tau fakapapauʻi ʻe poupouʻi mo fakafiemālieʻi kitautolu ʻe Sihova ʻi he fehangahangai mo e faingataʻá?

²⁰ Mahalo pē kuo fakaʻatā ʻe Sihova ke hokohoko atu homou ngaahi ʻahiʻahí. Kapau ko ia, manatuʻi ʻa ʻene talaʻofa ki he faʻahinga ʻoku manavahē kiate iá: “ʻE ʻikai siʻi te u mahuʻi meiate koe, kaeʻumaʻā haʻaku momoʻi liʻaki koe.” (Hepelu 13:5) ʻE lava ke mou hokosia ʻa e poupou mo e fakafiemālie pehē. Kuo lau ʻe Sihova “homou ngāhi tuʻoni louʻulu.” ʻOkú ne ʻafioʻi ʻa hoʻomou kātakí. ʻOkú ne ongoʻi hoʻomou mamahí. ʻOkú ne tokanga moʻoni mai kiate kimoutolu. Pea ʻe ʻikai ʻaupito “ke ne fakangaloʻi hoʻomou ngaue, mo e ʻofa ki hono huafa naʻe ha ʻiate kimoutolu.”—Hepelu 6:10.

[Fakamatala ʻi lalo]

ʻOkú Ke Manatuʻi?

• Ko e hā ʻa e ngaahi moʻoniʻi meʻa ʻe lava ke ne fakatupunga ha tokotaha ke ne ongoʻi kuo liʻaki ia ʻe he ʻOtuá?

• Ko e hā ʻa e lēsoni ʻoku tau ako mei he ongo talanoa fakatātā ʻa Sīsū ki he fanga misí pea mo hono lau ʻa e ngaahi tuʻoni louʻulu ʻo hotau ʻulú?

• ʻOku ʻuhinga ki he hā ʻa hono ʻai hoto loʻimatá ki he “hina” ʻa Sihová pe ki heʻene “tohi”?

• ʻE lava fēfē ke tau hoko ʻo maʻu ʻa e ‘fekoekoeʻi mo Jihova’?

[Fakatātā ʻi he peesi 22]

Ko e hā naʻe ʻikai toʻo ai ʻe Sihova ʻa e “tolounua i he kakano” ʻo Paulá?

[Fakatātā ʻi he peesi 23]

Ko e hā ʻoku lava ke tau ako mei he talanoa fakatātā ʻa Sīsū ki he fanga misí?

[Maʻuʻanga]

© J. Heidecker/VIREO

[Fakatātā ʻi he peesi 25]

ʻI hono lau tuʻumaʻu ʻa e Tohi Tapú, ʻe lava ke tau maʻu ai ʻa e fakafiemālie ʻoku tokanga mai ʻa e ʻOtuá kiate kitautolu fakafoʻituitui