ʻOfa​—Ko ha ʻUlungaanga Mahuʻinga

NAʻE fakamānavaʻi ʻe Sihova ʻa e ʻapositolo ko Paulá ke ne tohi ʻo fekauʻaki mo e tafaʻaki ʻe hiva ko e fua ia ʻo e ngāue ʻa e laumālie māʻoniʻoní. (Kal. 5:22, 23) Ko e ngaahi ʻulungaanga fakaʻofoʻofa kotoa ko ení ʻoku ui ia ko e “fua ʻo e laumālié.”a (Sio ki he fakamatala ʻi lalo.) Ko e fua ko ení ko e taha ia ʻo e ngaahi “angaʻitangata foʻoú” ʻa ia kuo pau ke kofuʻaki ʻe he kau Kalisitiané. (Kol. 3:10) Hangē pē ko e fua ʻa ha fuʻu ʻakau ʻi he taimi ʻoku fuʻifuʻi taimi totonu aí, ʻe maʻu ʻe ha taha ʻa e ngaahi ʻulungaanga fakaʻofoʻofa ko ení ʻi he taimi ʻoku tafe tauʻatāina ai ʻa e laumālie māʻoniʻoní ʻi heʻene moʻuí.​—Saame 1:1-3.

Ko e ʻuluaki ʻulungaanga naʻe hiki ʻe Paulá ko e ʻofa. Ko e hā ʻoku mahuʻinga ai ʻa e ʻulungaanga ko ení? Naʻe pehē ʻe Paula ʻi he ʻikai ha ʻofá, naʻá ne hoko ko ha “meʻa noa pē.” (1 Kol. 13:2) Ka ko e hā ʻa e ʻofa, pea ʻe lava fēfē ke tau fakatupulekina mo fakahāhā ia ʻi he ʻaho kotoa pē?

Neongo ʻoku mātuʻaki faingataʻa ke fakamatalaʻi totonu pe ko e hā ʻa e ʻofá, ʻoku fakamatalaʻi ʻe he Tohi Tapú ʻa e anga ʻo e fakakaukau mo e ngāue ʻa e tokotaha ʻoku ʻofá. Ko e fakatātaá, ko e tokotaha ʻoku ʻofá ʻoku “kātaki mo anga-lelei” pea ʻokú ne “fiefia ʻi he moʻoní.” ʻI he taimi ʻoku maʻu ai ʻe ha taha ʻa e ʻofá, ʻokú ne “ʻūkuma ʻa e meʻa kotoa pē, tui ʻi he meʻa kotoa pē, ʻamanaki ʻi he meʻa kotoa pē, kātekina ʻa e meʻa kotoa pē.” ʻOkú ne ʻofa lahi ki he niʻihi kehé, ʻokú ne tokanga moʻoni kiate kinautolu pea ʻokú ne hoko ko ha kaumeʻa mateaki. Ka ʻi he taimi ʻoku ʻikai ke maʻu ai ʻe ha taha ʻa e ʻofá, ʻokú ne meheka, pōlepole, anga taʻetaau, siokita mo taʻefakamolemole. ʻI he ʻikai ke tau fakahāhā ʻa e ngaahi ʻulungaanga ʻikai lelei hangē ko ení, ʻoku tau loto ke fakahāhā ʻa e ʻofa moʻoní ki he niʻihi kehé, ko e faʻahinga ʻofa ia ʻoku “ʻikai te ne kumi ki heʻene lelei pē ʻaʻana.”​—1 Kol. 13:4-8.

“Ko e ʻOtuá ko e ʻofa.” (1 Sio. 4:8) ʻOku fakamoʻoniʻi ia ʻi he kotoa ʻo ʻene ngaahi ngāué mo ʻene ngaahi tōʻongá. Ko e fakahāhā lahi taha ʻo ʻene ʻofa ki he faʻahinga ʻo e tangatá, ko ʻene fekau mai ʻa Sīsū ki he māmaní ke ne faingataʻaʻia pea pekia maʻatautolu. Naʻe pehē ʻe he ʻapositolo ko Sioné: “Ko e meʻa ʻeni naʻe fakahaaʻi ai ʻa e ʻofa ʻa e ʻOtuá ʻi he fekauʻaki mo hotau tuʻungá, naʻe fekauʻi mai ʻe he ʻOtuá hono ʻAlo tofu-pē-taha-ne-fakatupú ki he māmaní koeʻuhi ke tau maʻu ai ʻa e moʻuí fakafou ʻiate ia. Ko e anga ʻeni ʻo e ʻofá, ʻoku ʻikai ko e pehē ne tau ʻofa ki he ʻOtuá, ka naʻá ne ʻofa ʻiate kitautolu peá ne fekauʻi mai hono ʻAló ko ha feilaulau fakatupuhōifuaʻanga maʻa ʻetau ngaahi angahalá.” (1 Sio. 4:9, 10) Koeʻuhí ko e ʻofa ʻa e ʻOtuá, ʻe lava ke fakamolemoleʻi ai ʻetau ngaahi angahalá pea ʻe lava ke tau maʻu ai ʻa e ʻamanaki mo e moʻui.

Naʻe fakahāhā ʻe Sīsū ʻene ʻofa ʻi he faʻahinga ʻo e tangatá ʻaki ʻene feilaulauʻi ʻene moʻuí ke fai ʻa e finangalo ʻo e ʻOtuá. ʻOku tala mai ʻe he ʻapositolo ko Paulá: “Fakatatau ki he ‘finangalo’ ko eni ʻo e ʻOtuá kuo fakamāʻoniʻoniʻi ai kitautolu fakafou ʻi hono ʻoatu tā-tuʻo-taha ʻa e sino ʻo Sīsū Kalaisí.” (Hep. 10:9, 10) ʻOku ʻikai ha taha ʻe lava ke ne fakahāhā ha ʻofa lahi ange. Naʻe pehē ʻe Sīsū: “ʻOku ʻikai ha taha kuó ne maʻu ha ʻofa ʻoku lahi ange ʻi he meʻá ni, ke tuku atu ʻe ha taha ʻene moʻuí maʻa hono ngaahi kaumeʻá.” (Sione 15:13) ʻE lava ke faʻifaʻitaki ʻa e faʻahinga taʻehaohaoa ʻo e tangatá ki he ʻofa kuo fakahāhā ʻe Sihova mo Sīsuú? ʻIo! Tau vakai angé ki he founga ʻe lava ke tau fai ai ení.

ʻOku fakalototoʻaʻi kitautolu ʻe Paula: “Mou hoko ko e kau faʻifaʻitaki ki he ʻOtuá, ʻi he tuʻunga ko ʻene fānau ʻofeina, pea hokohoko atu ʻa e ʻaʻeva ʻi he ʻofá, ʻo hangē tofu pē ko e Kalaisí naʻá ne ʻofaʻi foki kitautolu peá ne foaki ʻa ia tonu maʻatautolu.” (ʻEf. 5:1, 2) Ko e hā ʻa e ʻuhinga ʻo e pehē ke “hokohoko atu ʻa e ʻaʻeva ʻi he ʻofá”? ʻOku ʻuhinga iá ke fakahāhā ʻa e ʻofá ʻi he taimi kotoa pē. ʻOku ʻikai ke tau lea pē ʻo pehē ʻoku tau ʻofa ki he niʻihi kehé. ʻOku tau fakahāhā ia ʻi he meʻa ʻoku tau faí. Naʻe tohi ʻe Sione: “Siʻi fānau, ʻoku totonu ke tau ʻofa ʻo ʻikai ʻi he lea pē, pe ʻaki ʻa e ʻeleló pē, ka ʻi he ngāue mo e moʻoni.” (1 Sio. 3:18) Ko e fakatātaá, ʻoku tau malangaʻi ʻa e ‘ongoongo lelei ʻo e Puleʻangá’ koeʻuhi ʻoku tau ʻofa kia Sihova mo hotau kaungāʻapí. (Māt. 24:14; Luke 10:27) ʻOku tau toe “hokohoko atu ʻa e ʻaʻeva ʻi he ʻofá” ʻi he taimi ʻoku tau kātaki, anga-lelei mo fakamolemole aí. ʻOku tau ngāueʻaki ʻa e akonaki ʻa e Tohi Tapú: “Hangē tofu pē ko ia ne fakamolemoleʻi loto-lelei kimoutolu ʻe Sihová, kuo pau foki ke mou fai ʻa e meʻa tatau.”​—Kol. 3:13.

Kae kehe, kapau ʻoku tau ʻoatu ha akonaki pe fakatonutonu ki he niʻihi kehé, ʻoku ʻikai ke ʻuhinga iá ʻoku tau taʻeʻofa. Ko e fakatātaá, ke taʻofi ʻa e tangi ʻenau kiʻi tamá, ko e ngaahi mātuʻa ʻe niʻihi ʻoku nau fai pē ʻa e meʻa ʻoku loto ki ai ʻa e kiʻi tamá. Ka ko e mātuʻa ʻoku ʻofa moʻoni ʻi heʻene kiʻi tamá te ne tuʻumaʻu ʻi he taimi ʻoku fiemaʻu aí. ʻI he founga meimei tatau, neongo koe ʻOtuá ko e ʻofa, “ko kinautolu ʻoku ʻofa aí ʻa Sihová ʻokú ne akonakiʻi.” (Hep. 12:6) Ko ia ko e ʻofá ia ʻa hono ʻoatu ha akonaki totonu ʻi he taimi ʻoku fiemaʻu aí. (Pal. 3:11, 12) Kae manatuʻi, ʻoku tau angahalaʻia kotoa pea ʻoku ʻikai ke tau faʻa fakahāhā ʻa e ʻofá. Neongo ia ʻe lava ke fakalahi ʻetau fakahāhā ʻa e ʻofá. ʻE lava fēfē ke tau fai eni? Tau vakai angé ki he founga ʻe tolu.

ʻUluakí, kole ki he ʻOtuá ke ne ʻoatu kiate koe hono laumālie māʻoniʻoní, he ʻoku tupu mei ai ʻa e ʻofá. Naʻe pehē ʻe Sīsū ʻoku foaki ʻe Sihova ʻa e “laumālie māʻoniʻoní ki he faʻahinga ʻoku kole kiate iá.” (Luke 11:13) Ko ia ʻoku lava ke tau fakapapauʻi kapau te tau lotu ʻo kole ʻa e laumālie māʻoniʻoní pea fakaʻatā ia ke ne tokoniʻi kitautolu, ʻe toe lahi ange ai ʻetau ʻofá. (Kal. 5:16) Ko e fakatātaá, kapau ko ha tokotaha mātuʻa koe, ʻe lava ke ke kole ʻa e laumālie māʻoniʻoní ke ne tokoniʻi koe ke ke hoko ʻo anga-ʻofa ʻi he taimi ʻoku fiemaʻu ai ke ke akonakiʻi ʻa e niʻihi kehé mei he Tohi Tapú. Pe kapau ko ha mātuʻa tauhi fānau koe, ʻe lava ke ke kole ʻa e laumālie ʻo e ʻOtuá ke ne tokoniʻi koe ke akonekina hoʻo fānaú ʻo ʻikai fai ʻi he ʻita ka ʻi he ʻofa.

Uá, fakakaukau fakamātoato fekauʻaki mo e founga naʻe fakahaaʻi ai ʻe Sīsū ʻa e ʻofá neongo hono ngaohikovia ia ʻe he niʻihi kehé. (1 Pita 2:21, 23) Kapau ʻe fakalotomamahiʻi koe ʻe ha taha pe te ke hokosia ha fakamaau taʻetotonu, ʻeke hifo kiate koe, ‘Ko e hā naʻe mei fai ʻe Sīsuú?’ Ko ha tuofefine ko Leigh naʻá ne ʻiloʻi naʻe tokoniʻi ia ʻi heʻene ʻeke ʻa e fehuʻi ko ʻení ke ne fakakaukau ki muʻa ke ne fai ha meʻa. ʻOkú ne pehē: “ʻI he taimi ʻe taha, naʻe ʻave ai ʻe ha kaungāngāue ha ʻīmeili laukovi ki he faʻahinga ʻoku mau ngāué ʻo fekauʻaki mo au mo e ngāue ʻoku ou faí. Naʻe fakalotomamahiʻi lahi ai au. Ka naʻá ku ʻeke hifo pē kiate au, ‘ʻE lava fēfē ke u faʻifaʻitaki kia Sīsū ʻi heʻeku fakafeangai ki he tokotaha ko eni?’ Hili ʻeku fakakaukauloto atu ki he meʻa naʻe mei fai ʻe Sīsuú, naʻá ku fili leva ke tukunoaʻi ia pea ʻoua ʻe tokanga ki ai. Ki mui aí, naʻa ku ʻiloʻi ai ko hoku kaungāngāué naʻe fekuki mo ha mahamahaki mafatukituki pea naʻá ne loto-mafasia lahi. Naʻá ku fakamulitukuʻaki mahalo pē naʻe ʻikai ke ne ʻuhingaʻi moʻoni ʻa e meʻa naʻá ne tohí. ʻI he fakakaukauloto atu ki he faʻifaʻitakiʻanga ʻa Sīsū ʻi hono fakahāhā ʻa e ʻofá naʻa mo e taimi naʻe fakaʻitaʻi aí naʻe tokoniʻi ai au ke u fakahāhā ʻa e ʻofa meimei tatau ki hoku kaungāngāué.” Kapau ʻoku tau faʻifaʻitaki kia Sīsū, te tau fakahāhā maʻu pē ʻa e ʻofa ki he niʻihi kehé.

Tolú, ako ke fakahāhā ʻa e ʻofa feilaulauʻi-kita. Ko e faʻahinga ʻofa eni ʻokú ne fakaʻilongaʻi ʻa e kau muimui moʻoni ʻa Sīsuú. (Sione 13:34, 35) Naʻe maʻu ʻe Sīsū ʻa e faʻahinga ʻofa ko ení, pea naʻá ne fokotuʻu ʻa e faʻifaʻitakiʻanga haohaoa maʻatautolu. Anga-fēfē? ʻI heʻene mavahe mai mei hēvaní, “naʻá ne fakamasivesivaʻi ʻa ia tonu” koeʻuhi ko kitautolu, “ʻo aʻu ki he tuʻunga ʻo e maté.” (Fil. 2:5-8) ʻI he taimi ʻoku tau faʻifaʻitaki ai ki he ʻofa feilaulauʻi-kita ʻa Sīsuú, ʻe hoko ai ʻetau ngaahi fakakaukaú mo ʻetau ongoʻí ʻo hangē ko iá, pea te tau fakamuʻomuʻa ai ʻa e fiemaʻu ʻa e niʻihi kehé ʻiate kitautolu.

ʻOku lahi ʻa e ngaahi ʻaonga ʻo hono fakahāhā ʻa e ʻofá. Tau lāulea ki ha fakatātā ʻe ua:

• FETOKOUAʻAKI FAKAVAHAʻAPULEʻANGA: Koeʻuhi ko ʻetau feʻofaʻakí, ʻoku tau ʻiloʻi ai ko fē pē ha fakatahaʻanga te tau ʻaʻahi ki ai ʻi he māmaní ʻe talitali māfana kitautolu ʻe hotau fanga tokouá mo e fanga tuofāfiné. Ko ha tāpuaki moʻoni ia ʻa hono ʻiloʻi ʻoku ʻofaʻi koe “ʻe he haʻohaʻonga kotoa ʻo homou fanga tokouá ʻi māmaní”! (1 Pita 5:9) ʻOku lava ke tau toki maʻu pē ʻa e ʻofa ko iá ʻi he haʻohaʻonga ʻo e kakai ʻa e ʻOtuá.

• MELINO: ʻI heʻetau “fekātakiʻaki ʻi he ʻofa” ʻoku fakaʻatā ai kitautolu ke tau fiefia “ʻi he haʻi fāʻūtaha ko e melinó.” (ʻEf. 4:2, 3) ʻOku tau hokosia ʻa e melino ko ení ʻi heʻetau ngaahi fakatahá, ʻasemipilií mo e ngaahi fakataha-lahí. ʻIkai ʻokú ke loto-tatau ko e laumālie fakamelino peheé ʻoku makehe moʻoni ia ʻi he māmani māvahevahe ʻo e ʻaho ní? (Saame 119:165; ʻAi. 54:13) ʻI he taimi ʻoku tau feinga ai ke melino mo e niʻihi kehé, ʻoku fakahaaʻi ai ʻoku tau ʻofa moʻoni ʻiate kinautolu, pea ʻoku tau fakahōifuaʻi ai ʻetau Tamai fakahēvaní.​—Saame 133:1-3; Māt. 5:9.

Naʻe tohi ʻe Paula: “Ko e ʻofá ʻoku langa hake.” (1 Kol. 8:1) Ko e hā ʻoku ʻuhinga ki aí? ʻI he 1 Kolinitō vahe 13, ʻa ia ʻoku ʻe he niʻihi ko e “Saame ʻo e ʻOfá,” ʻokú ne fakamatalaʻi ai ʻa e langa hake ʻa e ʻofá. Ko ʻofa ʻokú ne kumi ki he lelei ʻa e tokotaha kehé. Ko ʻofa ʻoku tokanga ki he ngaahi fiemaʻu ʻa e niʻihi kehé. (1 Kol. 10:24; 13:5) Pea koeʻuhí ko e ʻofá ʻoku faʻa fakakaukau, anga-fakaʻatuʻi, kātaki mo anga-lelei, ʻokú ne faʻu ai ha ngaahi fāmili ʻofa pea mo e ngaahi fakatahaʻanga fāʻūtaha.​—Kol. 3:14.

ʻOku lahi ʻa e ngaahi founga ke fakahāhā ai ʻa e ʻofá ki he niʻihi kehé, ka ko ʻetau ʻofa ki he ʻOtuá ko e ʻofa ia ʻoku mahuʻinga taha mo fakatupu langa haké. Ko e hā hono ʻuhingá? Koeʻuhí ko ʻetau ʻofa kiate iá ʻoku fakafāʻūtahaʻi ai kitautolu! Ko e kakai mei he puipuituʻa, matakali mo e lea kotoa pē ʻoku nau lotu fakataha kia Sihova pea tauhi kiate ia “uma ki he uma.” (Sēf. 3:9) ʻOfa ke tau fakapapauʻi ke fakahāhā ʻi he ʻaho kotoa pē ʻa e tafaʻaki mahuʻinga ko ʻeni ʻo e fua ʻo e laumālie māʻoniʻoni ʻo e ʻOtuá.