Hanganaki Felangaʻaki Hake

“Ke oua naa haʻu ha talanoa uli mei ho mou gutu, ka koia oku lelei o aoga ke laga aki hake.”​—EFESO 4:29, PM.

 1, 2. (a) Ko e hā ʻe totonu ai ke pehē ko e leá ko ha meʻa fakaofo? (e) Ko e hā ʻa e fakatokanga ʻoku feʻunga ʻo kau ki he anga ʻo ʻetau ngāueʻaki ʻa hotau ʻeleló?

“KO E leá ko e filo fakaemana ʻokú ne haʻi fakataha ʻa e ngaahi kaungāmeʻa, ngaahi fāmili mo e ngaahi sōsaieti . . . Mei he ʻatamai ʻo e tangatá pea mo e fāʻū ʻo ngāue fakataha ʻa e pupunga uoua [ʻo e ʻeleló], ʻoku tau fakahoko ai ha ngaahi ongo ʻokú ne fakatupu ʻa e ʻofa, meheka, ʻapasia​—ko hono moʻoní ha faʻahinga ongoʻi fakaetangata pē.”​—Hearing, Taste and Smell.

² ʻOku mahulu atu ʻa hotau ʻeleló ʻi ha ʻōkani pē ki he folo mo ʻahiʻahiʻi ʻaki ha meʻa; ko e konga ia ʻo ʻetau malava ke ʻoatu ʻa e meʻa ʻoku tau fakakaukau ki aí mo ʻetau ongoʻí. Naʻe tohi ʻe Sēmisi: “Ko e ʻelelo ko e kupu siʻi . . . Ko ia ia ʻoku tau fakamālō ʻaki ki hotau ʻEiki mo e Tamai, pea ko ia ia ʻoku tau tutukuʻi ʻaki ʻa e kakai ʻa ia ʻoku ngaohi ʻi he tatau ʻo e ʻOtua.” (Sēmisi 3:​5, 9) ʻIo, ʻoku lava ke tau ngāueʻaki ʻa hotau ʻeleló ʻi he ngaahi founga lelei, ʻo hangē ko e fakalāngilangiʻi ʻo Sihova. Ka koeʻuhi ko e taʻehaohaoá, ʻe faingofua ke tau ngāueʻaki ʻa hotau ʻeleló ke leaʻaki ʻa e ngaahi meʻa fakatupu-loto mamahi pe taʻe pau. Naʻe tohi ʻe Sēmisi: “Siʻoku kainga, ʻoku ʻikai totonu ke pehē ha meʻa.”​—Sēmisi 3:10.

 3. ʻOku totonu ke tau fai ha tokanga ki he ongo tafaʻaki fē ʻo ʻetau leá?

³ Neongo ʻoku ʻikai lava ʻe ha tangata ʻe taha ke mapuleʻi kakato ʻa hono ʻeleló, ʻoku totonu ke tau feinga moʻoni ke fakaleleiʻi ange. ʻOku ekinaki mai ʻe he ʻapositolo ko Paulá: “Ke oua naa haʻu ha talanoa uli mei ho mou gutu, ka koia oku lelei o aoga ke laga aki hake, koeuhi ke tubu ai ae tokoni ki he kau fanogo.” (ʻEfesō 4:​29, PM) Fakatokangaʻi ʻoku ʻi ai ʻa e tafaʻaki ʻe ua ʻi he fekau ko ʻení: ko e meʻa ʻoku totonu ke tau feinga ke fakaʻehiʻehi mei aí mo e meʻa ʻoku totonu ke tau feinga ke faí. Tau vakai ange ki he ongo tafaʻakí ni.

Fakaʻehiʻehi mei he Talanoa ʻUli

 4, 5. (a) Ko e hā ʻa e faitau ʻoku fai ʻe he kau Kalisitiané ʻo fekauʻaki mo e lea ʻulí? (e) Ko e hā ʻa e tuʻunga ʻe feʻungamālie nai mo e kupuʻi lea ko e “talanoa ʻuli”?

⁴ ʻOku ʻuluaki naʻinaʻi mai ʻe ʻEfesō 4:​29, PM kiate kitautolu: “Ke oua naa haʻu ha talanoa uli mei ho mou gutu.” ʻE ʻikai ke faingofua nai ia. Ko e ʻuhinga ʻe taha he ʻoku faʻa ngāueʻaki ʻa e lea fakalielia ʻi he māmani ʻokú ne takatakaiʻi kitautolú. ʻOku fanongo fakaʻaho ʻa e kau talavou Kalisitiane tokolahi ʻi he kapekape, he ʻoku fakakaukau nai ʻa e kaungāakó ia ʻoku ʻai ʻe he kapekapé ke fakamamafaʻi pe ʻokú ne ʻai ke nau hā mālohi ange ai. ʻE ʻikai te tau lava nai ke fakaʻehiʻehi fakaʻaufuli mei he fanongo ki he ngaahi lea ʻulí, ka te tau lava pea ʻoku totonu ke tau fai ha feinga fakamātoato ke ʻoua te tau tukulotoʻi ʻa e ngaahi lea ko iá. ʻOku ʻikai totonu ke nau ʻi hotau ʻatamaí pe ʻi hotau ngutú.

⁵ Ko e tefito ʻo e fakatokanga ʻa Paulá ko e foʻi lea faka-Kalisi ʻoku felāveʻi mo e ika kuo masalai pe fuaʻiʻakau kuo pala. Sio loto atu ki he meʻa ko ení: ʻOkú ke fakatokangaʻi ha tangata ʻoku taʻefaʻakātaki pea tōlili ʻaupito. Faifai atu pē pea homo atu ʻene ʻitá, pea ʻokú ke sio ʻoku haʻu mei hono ngutú ʻa e ika kuo masalai. Pea ʻokú ke toe sio ki he ngaahi fuaʻiʻakau kuo namu kū mo pala ʻoku haʻu ki tuʻa, ʻo afuhia atu ki he kakai kotoa ʻoku ofi mai ki aí. Ko hai ia? Ko e meʻa fakamā ē kapau ko e tokotaha ia ʻiate kitautolu! Ka ʻe feʻungamālie mo kitautolu ha tuʻunga pehē ʻo kapau te tau ‘tuku ha ngaahi talanoa ʻuli ke haʻu mei hotau ngutú.’

 6. ʻOku kaunga fēfē ʻa e ʻEfesō 4:29 ki he lea taʻe pau mo e fakaangá?

⁶ Ko hono ngāueʻaki ʻi ha toe founga ʻe taha ʻa e ʻEfesō 4:29 ko ʻetau fakaʻehiʻehi mei he faʻa fakaangá. ʻOku moʻoni, ʻoku tau maʻu ʻe kitautolu hono kotoa pē ʻa e ngaahi fakakaukau mo e ngaahi manako ʻo fekauʻaki mo e ngaahi meʻa ʻoku ʻikai te tau saiʻia aí pe talí, ka kuó ke feohi nai mo ha tokotaha ʻoku hangē ʻoku ʻi ai haʻane fakamatala taʻe pau (pe ngaahi fakamatala) ʻo fekauʻaki mo ha tokotaha, ha feituʻu, pe ha meʻa ʻoku fai ha lave ki ai? (Fehoanaki mo Loma 12:9; Hepelū 1:9) ʻOku fai ʻe heʻene leá ʻa e holoki hifo, mo e fakatupu loto-mamahi, pe fakaʻauha. (Sāme 10:7; 64:​2-4; Palōvepi 16:27; Sēmisi 4:​11, 12) ʻE ʻikai nai te ne fakatokangaʻi ʻa e lahi ʻo ʻene tatau mo e faʻahinga fakaanga naʻe fakamatala ki ai ʻa Malakaí. (Malakai 3:​13-15) Ko ha fuʻu ʻohovale lahi ē te ne aʻusia nai ʻo kapau ʻe tala ange ʻe ha tokotaha ʻi hono tafaʻakí ʻoku homo mai mei hono ngutú ha ika masalai pe fuaʻiʻakau pala!

 7. Ko e hā ʻa e sivi fakaekita ʻoku totonu ke fai ʻe he tokotaha taki taha ʻo kitautolu?

⁷ Neongo ʻoku faingofua ke fakatokangaʻi ʻa hono faʻa fai ʻe ha tokotaha kehe ia ʻa e ngaahi lea taʻe pau pe fakaangá, ʻeke hifo kiate koe, ‘ʻOku ou hehema ke u fai pehē? ʻOku ou pehē moʻoni?’ ʻOku fakapotopoto ke fakalaulauloto ʻi he taimi ʻe niʻihi ʻo kau ki he anga ʻo ʻetau ngaahi leá. ʻOku fakatefito pē ia ki he taʻe pau, mo fakaanga? ʻOku tau hangē nai ko e kau fakafiemālie loi ʻe toko tolu ʻo Siopé? (Siope 2:11; 13:​4, 5; 16:2; 19:2) Fēfē ke lave ki ha tafaʻaki pau? Kapau ʻoku fakatefito ha fetalanoaʻaki ki he fakaangá, fēfē ke liliu ia ki he ngaahi meʻa ʻoku fakatupu langa haké?

 8. Ko e hā ʻa e meʻa ke ako ʻoku tokonaki mai ʻe Malakai 3:16 ʻo fekauʻaki mo e leá, pea ʻe anga-fēfē ʻa ʻetau fakahā ʻoku tau ngāueʻaki ʻa e meʻa ko iá?

⁸ Naʻe ʻomai ʻe Malakai ʻa e faikehekehe ko ʻení: “Toki fealeleaʻaki ʻa kinautolu naʻe ʻapasia kia Sihova: pea naʻe tokanga ki ai ʻa Sihova, ʻo ne fakafanongo, pea naʻe fai ʻa e tohi fakamanatu ke feʻao mo ia, koeʻuhi ko e kakai ʻoku ʻapasia kia Sihova, mo tokaʻi hono huafa.” (Malakai 3:16) Naʻá ke fakatokangaʻi ʻa e anga ʻo e tali ʻa e ʻOtuá ki he ngaahi lea fakatupu langa haké? Ko e hā ʻa e ola nai ʻo e fetalanoaʻaki pehē ki he kaungāfeohí? ʻE lava ke tau ako fakafoʻituitui ha meʻa ʻo fekauʻaki mo ʻetau lea fakaʻahó. He toki meʻa lelei ange ē kiate kitautolu mo e niʻihi kehé kapau ko ʻetau fetalanoaʻakí ʻoku tapua mei ai ʻa ʻetau “feilaulau fakafetaʻi ki he ʻOtua.”​—Hepelū 13:15.

Ngāue ki Hono Langaʻi Hake ʻa e Niʻihi Kehé

 9. Ko e hā ko e ngaahi taimi lelei ai ʻa e ngaahi fakataha Kalisitiané ke langaʻi hake ʻa e niʻihi kehé?

⁹ Ko e ngaahi fakataha ʻa e fakatahaʻangá ko e ngaahi taimi lelei ʻaupito ia ke leaʻaki ai ʻa e meʻa ʻoku “lelei o aoga ke laga aki hake, koeuhi ke tubu ai ae tokoni ki he kau fanogo.” (ʻEfesō 4:​29, PM) ʻOku lava ke tau fai ia ʻi hano fai ha malanga faka-Tohitapu, kau ki ha fakahāhā, pe fai ha tali lolotonga ʻa e ngaahi konga ʻoku fehuʻi mo e talí. ʻI he founga ko iá ʻe lava ke tau fakamoʻoniʻi ʻa e Palōvepi 20:15: “Ka ko e teunga mahuʻinga ko e loungutu poto.” Pea ko hai ʻokú ne ʻilo ʻa e lahi ʻo e ngaahi loto kuo tau aʻu ki ai mo langaʻi haké?

10. ʻI he hili ha fakakaukau kiate kinautolu ʻa ia ʻoku tau faʻa fetalanoaʻakí, ko e hā ʻa e liliu ʻe hoko ʻo lelei nai ke fai? (2 Kolinitō 6:​12, 13)

¹⁰ ʻOku faingamālie ʻa e vahaʻa taimi ki muʻa pea ʻi he hili ʻa e ngaahi fakatahá ki hono langaʻi hake ʻa e niʻihi kehé ʻaki ʻa e fetalanoaʻaki ʻoku ʻaonga ki he kau fanongó. ʻE faingofua ke ngāueʻaki ʻa e ngaahi vahaʻa taimi ko ʻení ke fai ai ha talanoa lelei mo e ngaahi kāinga mo ha ngaahi kaungāmeʻa ʻe niʻihi ʻa ia ʻoku tau leleiʻia lahi ki aí. (Sione 13:32; 19:26) Kaekehe, fakatatau ki he ʻEfesō 4:​29, fēfē ke feinga ke lea atu ki he niʻihi kehé? (Fehoanaki mo Luke 14:​12-14) ʻE lava ke tau fakapapauʻi ki muʻa ke ʻoua ʻe ngata pē ʻetau talanoá ʻi he ngaahi lea fakafeʻiloaki anga-mahení pē pe ko ha kiʻi lea fakavavevave pē ki he kau foʻou ʻe niʻihi, faʻahinga taʻu motuʻa angé, pe tamaikí, ʻoku aʻu ki he tangutu ki lalo fakataha mo e tamaikí koeʻuhi ke ʻi he tuʻunga tatau mo kinautolu. ʻE ʻai ʻe heʻetau mahuʻingaʻia moʻoní mo e ngaahi vahaʻa taimi ʻo ʻetau lea fakatupu langa hake ki he niʻihi kehé ke nau lava ai ʻo loto-tatau mo e lea ʻa Tēvita ʻia Sāme 122:1.

11. (a) Ko e hā ʻoku angaʻaki nai ʻe he tokolahi ʻo fekauʻaki mo e tangutuʻangá? (e) Ko e hā ʻoku fakakaukau ai ʻe he niʻihi ke fetongi ʻa e feituʻu ʻoku nau tangutu aí?

¹¹ Ko e toe tokoni ʻe taha ki he fetalanoaʻaki ʻoku fakatupu langa haké ko e faʻa fetongi ʻa e feituʻu ʻoku tau tangutu ai ʻi he ngaahi fakatahá. ʻE fiemaʻu nai ki ha faʻē toutama ke tangutu ʻo ofi ki he fale mālōloó, pe ʻe fiemaʻu nai ki ha tokotaha ngāvaivai ke ne tangutu ofi ki he hala vahaʻa seá, kae fēfē ʻa kitautolu hono toé? ʻOku angaʻaki nai ke tau foki pē ki he nofoʻanga pe feituʻu tatau; naʻa mo ha manupuna ʻoku foki fakaenatula pē ia ki hono punungá. (ʻAisea 1:3; Mātiu 8:20) Ka, ke lea hangatonu, koeʻuhi ʻoku lava ke tau nofo ʻi ha feituʻu pē, fēfē ke fetongi ʻa e feituʻú​—tafaʻaki toʻomataʻu, tafaʻaki toʻohema, ofi ki muʻa, ʻo fai pehē​—pea ʻai ke maheni lelei ange leva ai mo e faʻahinga kehekehe? Neongo ʻoku ʻikai ke ʻi ai ha tuʻutuʻuni ia ke tau fai ʻeni, ka kuo ʻilo ʻe he kau mātuʻá mo e faʻahinga matuʻotuʻa fakalaumālie kehé ʻa ia ʻoku nau fetongi ʻa e feituʻu ʻoku nau tangutu aí ʻoku faingofua ange ai ke ʻoatu ʻa e meʻa ʻoku ʻaongá ki he tokolahi kae ʻikai ko e tokosiʻi ko e ngaahi kaungāmeʻa ofí pē.

Langa Hake ʻi he Founga Fakaeʻotua

12. Ko e hā ʻa e hehema taʻetotonu kuo eʻa mai ʻi he faai mai ʻa e hisitōliá?

¹² ʻOku totonu ke hanga ʻe he holi ʻa ha Kalisitiane ke langa hake ʻa e niʻihi kehé ʻo ueʻi ia ke ne faʻifaʻitaki ki he ʻOtuá ʻi he tafaʻaki ko ʻení kae ʻikai ke muimui ki he hehema fakaetangata ke ʻai ha ngaahi tuʻutuʻuni lahi.a Kuo fuoloa ʻa e hehema ʻa e faʻahinga ʻo e tangata taʻehaohaoá ke pule ki he niʻihi ʻoku takatakai kiate kinautolú, pea naʻa mo e niʻihi ʻo e kau sevāniti ʻa e ʻOtuá kuo nau tō ki he hehema ko ʻení. (Sēnesi 3:16; Koheleti 8:9) ʻI he taimi ʻo Sīsuú naʻe hanga ʻe he kau taki Siu ʻo ‘ʻai ʻa e kavenga mamafa ki he kakaí ka naʻe ʻikai loto ʻa kinautolu tonu ke nau fua ia.’ (Mātiu 23:4) Naʻa nau fulihi ʻa e ngaahi anga-fakafonua lelei pē ki he fatongia kuo pau ke fakahoko. ʻI heʻenau tokanga tōtuʻa ki he ngaahi tuʻutuʻuni ʻa e tangatá, naʻa nau liʻaki ai ʻa e ngaahi meʻa naʻe fakahaaʻi ʻe he ʻOtuá ʻoku mahuʻinga lahi angé. Naʻe ʻikai ke langaʻi hake ha taha ia ʻe heʻenau ʻai ʻa e ngaahi tuʻutuʻuni taʻefaka-Tohitapú; ko ʻenau foungá naʻe ʻikai ko e founga ia ʻa e ʻOtuá.​—Mātiu 23:​23, 24; Maʻake 7:​1-13.

13. Ko e hā ʻoku ʻikai ke feʻunga ai ke ʻai ha ngaahi tuʻutuʻuni lahi ki he kaungā-Kalisitiané?

¹³ ʻOku loto moʻoni ʻa e kau Kalisitiané ke nau piki maʻu ki he ngaahi lao faka-ʻotuá. Ka, naʻa mo kitautolu ʻe lava ke tau tō ki he hehema ke ʻai ʻa e ngaahi tuʻutuʻuni fakamafasia. Ko e hā ʻa hono ʻuhingá? Ko e meʻa ʻe taha, ʻoku kehekehe ʻa e ngaahi manakó pe ngaahi saiʻiá, ko ia ko ha niʻihi te nau saiʻia ʻi ha meʻa ʻoku fehiʻa ai ʻa e niʻihi kehe pea nau pehē ʻoku totonu ke tuku ʻaupito ia. ʻOku kehekehe foki ʻa e kau Kalisitiané ʻi heʻenau laka ki muʻa ki he matuʻotuʻa fakalaumālié. Ka ko hono ʻai nai ʻo e ngaahi tuʻutuʻuni lahí ko e founga fakaeʻotua ia ke tokoni ai ki ha taha ke fakalakalaka ki he matuʻotuʻa fakalaumālié? (Filipai 3:15; 1 Tīmote 1:19; Hepelū 5:14) Naʻa mo e taimi ʻoku fou ai ha taha ʻi ha ʻalunga ʻoku hā ʻoku fuʻu tōtuʻa pe fakatuʻutāmaki, ko e fakaleleiʻanga lelei tahá ha tuʻutuʻuni ke taʻofi ia? Ko e founga ʻa e ʻOtuá ke feinga ʻa e faʻahinga ʻoku taukeí ke nau fakafoki ʻa e tokotaha faihalá ʻaki ʻa e feinga ʻi ha founga anga-malū ke fakatupunga ʻa e tokotaha ko iá ke fakakaukau lelei.​—Kalētia 6:1.

14. Ko e hā ʻa e ngaahi taumuʻa naʻe fakahoko ʻe he ngaahi lao naʻe ʻoange ʻe he ʻOtuá ki ʻIsilelí?

¹⁴ Ko e moʻoni, lolotonga ʻa hono ngāueʻaki ʻe he ʻOtuá ʻa ʻIsileli ko ʻene kakaí, naʻá ne fokotuʻu ʻa e ngaahi lao ʻe laui teau ʻo fekauʻaki mo e lotu ʻi he temipalé, ngaahi feilaulaú, pea pehē ki hono maluʻi ʻo e moʻui lelei fakasino ʻa e kakaí. Naʻe feʻunga ʻeni ia mo ha puleʻanga mavahevahe, pea naʻe ʻi ai hono ʻuhinga fakaekikite ʻa e konga lahi ʻo e ngaahi laó mo tokoni ke tataki ʻa e kau Siú ki he Mīsaiá. Naʻe tohi ʻe Paula: “Pea ta ko e Lao ko hota fakaleʻo maʻa Kalaisi, kae fakatonuhia kitaua mei he tui. Ka ʻi he hoko mai ko eni ʻa e tui, pea ʻoku ʻikai te ta kei faiekina ki ha fakaleʻo.” (Kalētia 3:​19, 23-25) ʻI he ʻosi ʻa hono tāmateʻi ʻa e Laó ʻi he ʻakau fakamamahí, naʻe ʻikai ke ʻoange ʻe he ʻOtuá ki he kau Kalisitiané ha fakahokohoko lahi ʻaupito ʻo ha ngaahi tuʻutuʻuni ʻo kau ki he ngaahi tafaʻaki lahi ʻo e moʻuí, ʻo pehē ko e founga pē ia ke ʻai ke langa hake ai kinautolu ʻi he tuí.

15. Ko e hā ʻa e tataki kuo tokonaki mai ʻe he ʻOtuá ki he kau lotu Kalisitiané?

¹⁵ Ko e moʻoni, ʻoku ʻikai ke taʻe ʻi ai ha lao kiate kitautolu. ʻOku tuʻutuʻuni mai ʻe he ʻOtuá kiate kitautolu ke fakaʻehiʻehi mei he tauhi ʻaitolí, feʻauakí mo e tonó, pea mo e ngāuehalaʻaki ʻa e totó. ʻOkú ne tapui ʻo tautefito ki he fakapō, loi, fakahaʻele faʻahikehé, mo e ngaahi angahala kehekehe. (Ngāue 15:​28, 29; 1 Kolinitō 6:​9, 10; Fakahā 21:8) Pea kuó ne ʻomai ʻi heʻene Folofolá ʻa e akonaki mahino ʻi he ngaahi meʻa lahi. Ka, ko hotau fatongia ke ako mo ngāueʻaki ʻa e ngaahi tefitoʻi moʻoni faka-Tohitapú ʻo lahi ange ia ʻi he kau ʻIsilelí. ʻE lava ke langaʻi hake ʻe he kau mātuʻá ʻa e niʻihi kehé ʻi hono tokoniʻi kinautolu ke nau maʻu mo fakakaukau ki he ngaahi tefitoʻi moʻoni ko ʻení kae ʻikai ko e kumi pe ko hono ʻai ha ngaahi tuʻutuʻuni.

Kau Mātuʻa ʻOku Fakatupu Langa Hake

16, 17. Ko e hā ʻa e sīpinga lelei naʻe fokotuʻu ʻe he kau ʻapositoló ki hono ʻai ʻo e ngaahi tuʻutuʻuni ki he kaungā-lotú?

¹⁶ Naʻe tohi ʻe Paula: “Ka neongo pe ko e ha ha meʻa kuo ta aʻu ki ai, kehe ke fou atu ai pe ʻi he hala pe ko ia.” (Filipai 3:16) Fakatatau ki he anga ʻo e fakakaukau fakaeʻotua ko iá, naʻe feangainga ʻa e ʻapositoló mo e niʻihi kehe ʻi ha founga naʻe langa hake. Hangē ko ʻení, naʻe langaʻi hake ha fehuʻi pe ʻe kai ʻa e kakanoʻi manu kuo ʻomi nai mei ha temipale tamapua. Naʻe fokotuʻu nai ʻe he tokotaha ko ʻeni ʻo e kau mātuʻá ha tuʻutuʻuni ki he faʻahinga kotoa ʻi he muʻaki ngaahi fakatahaʻangá ko e taumuʻá ke ʻai ke nau fai tatau kātoa nai pe ʻai ke faingofua? ʻIkai. Naʻá ne lāuʻilo ko e kehekehe ʻi he ʻiló mo e fakalakalaka atu ki he matuʻotuʻa fakalaumālié ʻe iku nai ai ki ha ngaahi fili kehekehe ʻe fai ʻe he kau Kalisitiane ko iá. Ka kiate ia, naʻá ne loto-ʻalovili ke fokotuʻu ha faʻifaʻitakiʻanga lelei.​—Loma 14:​1-4; 1 Kolinitō 8:​4-13.

¹⁷ ʻOku fakahā ʻe he Konga Tohitapu Faka-Kalisi Kalisitiané naʻe tokonaki ʻe he kau ʻapositoló ha fakahinohino ʻaonga ʻi ha ngaahi meʻa fakataautaha ʻe niʻihi, ʻo hangē ko e meʻa fekauʻaki mo e valá mo e anga ʻo e teuteú, ka naʻe ʻikai te nau hanga ʻo ʻai ha ngaahi tuʻutuʻuni ke ngāueʻaki ʻi he ngaahi tuʻunga kotoa pē. Ko e faʻifaʻitakiʻanga lelei ia ki he kau ʻovasia Kalisitiane ʻi he ʻaho ní, ʻa ia ʻoku nau mahuʻingaʻia ʻi hono langaʻi hake ʻa e tākangá. Pea ko hono moʻoní ʻoku ʻomai ai ʻa e founga feangainga naʻe ngāueʻaki ʻe he ʻOtuá ʻi he fekauʻaki mo ʻIsileli ʻo e kuonga muʻá.

18. Ko e hā ʻa e ngaahi tuʻutuʻuni naʻe ʻoange ʻe Sihova ki ʻIsileli ʻo fekauʻaki mo e valá?

¹⁸ Naʻe ʻikai ke ʻoange ʻe he ʻOtuá ki he kau ʻIsilelí ha ngaahi lao fakaʻāuliliki ʻo fekauʻaki mo e valá. ʻOku ngalingali naʻe ngāueʻaki ʻe he kau tangata mo e kau fefine ʻa e pulupulu, pe ngaahi kofu tuʻa meimei tatau, neongo ʻe fakasanisani ange pe toe lahi ange ʻa hono lanú ki he kakai fefiné. Naʻe fakatou ʻai ʻe he kakai tangatá mo e kakai fefiné ʻa e sa·dhinʹ, pe kofu-loto. (Fakamaau 14:​12, PM; Palōvepi 31:24; ʻAisea 3:23) Ko e hā ʻa e ngaahi lao naʻe ʻoange ʻe he ʻOtuá ʻo fekauʻaki mo e valá? Naʻe totonu ke ʻoua ʻe tui ʻe he kau tangatá ha vala fakafefine pe ko e fefiné ha ngaahi vala fakatangata, ko e taumuʻa mahino ia ki he fehokotaki fakasino ʻi honau faʻahinga pē. (Teutalōnome 22:5) Ke fakahā ʻa ʻenau mavahe mei he ngaahi puleʻanga takatakaí, naʻe ʻai ʻe he kau ʻIsilelí ha pao ʻi he tapa taupotu ki lalo ʻo honau kofú, mo ha loufau lanu pulū ʻi he funga paó, pea ko ha ngaahi pao ʻe niʻihi naʻe haʻihaʻi nai ʻi he ngaahi tuliki ʻe fā ʻo e ngaahi pulupulú. (Nōmipa 15:​38-41) Ko e fakahinohino pē eni naʻe ʻomai ʻe he Laó ʻo fekauʻaki mo e ngaahi sīpinga ʻo e valá.

19, 20. (a) Ko e hā ʻa e tataki ʻoku ʻomai ʻe he Tohitapú ki he kau Kalisitiané ʻo kau ki he valá mo e anga ʻo e teuteú? (e) Ko e hā ʻa e anga ʻo e fakakaukau ʻoku totonu ke maʻu ʻe he kau mātuʻá ʻo fekauʻaki mo hono ʻai ha ngaahi tuʻutuʻuni ʻo fekauʻaki mo e fōtunga hā mai fakafoʻituituí?

¹⁹ Neongo ʻoku ʻikai ke ʻi he malumalu ʻo e Laó ʻa e kau Kalisitiané, ʻoku tau maʻu nai ha ngaahi lao fakaʻāuliliki kehe ʻo fekauʻaki mo e valá pe teuteú kuo fokotuʻu mai kiate kitautolu ʻi he Tohitapú? ʻIkai. Naʻe tokonaki mai ʻe he ʻOtuá ʻa e ngaahi tefitoʻi moʻoni mafamafatatau ʻe lava ke tau ngāueʻaki. Naʻe tohi ʻe Paula: “Pehe foki, ko hoku loto ki he kau fefine, ke nau teuʻaki kinautolu ʻa e kofu ʻoku ngali ke ʻai, pea ō mo e angamā mo e angafakamaʻumaʻu: ʻo ʻoua ʻe fai ʻaki ʻa e fafatu ʻo e louʻulu, pe ko e koula mo e mataʻitofe mo e kofu mahuʻinga.” (1 Tīmote 2:9) Naʻe naʻinaʻi mai ʻe Pita ke ʻoua ʻe tokanga taha pē ki he teuteu fakasinó, ka ʻoku totonu ki he kau fefine Kalisitiané ke nau tokanga taha ki he “tangata fufū ʻo e loto, ʻio, ʻaki ʻa e meʻa taʻe ʻauha ko e angavaivai mo e angamalū.” (1 Pita 3:​3, 4) Koeʻuhi naʻe hiki ʻa e akonaki peheé, ʻoku fakahā ai naʻe fiemaʻu nai ki ha kau Kalisitiane ʻe niʻihi ʻi he ʻuluaki senitulí ke nau fakanānā mo fakamaʻumaʻu ange ʻo kau ki honau valá mo e anga ʻo e teuteú. Ka, ʻi he ʻikai ke fakapapauʻi​—pe tapui​—ʻa e ngaahi ākenga ʻe niʻihi, naʻe tokonaki mai pē ʻe he kau ʻapositoló ha faleʻi fakatupu langa hake.

²⁰ ʻOku totonu pea ʻoku faʻa fakatokangaʻi ʻoku fōtunga fakanānā ʻa e Kau Fakamoʻoni ʻa Sihová. Ka neongo ia, ʻoku faikehekehe ʻa e ngaahi ākenga ʻi he fonua taki taha pe naʻa mo e ʻi he lotolotonga ʻo ha feituʻu pe ha fakatahaʻanga. Ko e moʻoni, ko ha tokotaha ʻo e kau mātuʻá ʻa ia ʻoku ʻi ai ʻa ʻene ngaahi fakakaukau mālohi pe ko haʻane saiʻia ki he valá mo e anga ʻo e teuteú te ne fai nai ha fili ʻo fakatatau ki ai kiate ia pea ki hono fāmilí. Ka ʻi he fekauʻaki mo e tākangá, ʻoku fiemaʻu ke manatuʻi ʻa e fakamatala ʻa Paulá: “Ka ʻoku ʻikai ko ʻeku pehe ʻoku ʻamautolu ke pule ki hoʻomou tui: kae kehe ko e kau tokoni pe kimautolu ki he langaʻi ʻo hoʻomou fiefia. Seuke, ko e meʻa ki he tui ʻoku mou tuʻu.” (2 Kolinitō 2:2; [1:​24, PM] ʻIo, ʻoku talitekeʻi ʻe he kau mātuʻá haʻanau feinga ke fokotuʻu ha ngaahi tuʻutuʻuni ki he fakatahaʻangá, ka ʻoku nau ngāue ke langa hake ʻa e tui ʻa e niʻihi kehé.

21. ʻE anga-fēfē ke tokonaki ʻe he kau mātuʻá ha tokoni fakatupu langa hake ʻo kapau kuo tōtuʻa ha taha ʻo fekauʻaki mo e valá?

²¹ Hangē pē ko ia naʻe hoko ʻi he ʻuluaki senitulí, ʻi he taimi ʻe niʻihi ko ha tokotaha foʻou pe vaivai fakalaumālie ʻe fou nai ʻi ha ʻalunga ʻoku fehuʻia pe taʻefakapotopoto ʻi he meʻa fekauʻaki mo e valá pe ko hono ngāueʻaki ʻa e meʻa vali-matá pe ko e ngaahi kahoa, vesa, mama mo e hau. Ko e hā ʻa e meʻa ʻe faí? ʻOku toe ʻomai ʻe Kalētia 6:1 ʻa e fakahinohino ki he kau mātuʻa Kalisitiane ʻa ia ʻoku nau loto-moʻoni ke tokoní. Ki muʻa ke fili ʻe ha taha ʻo e kau mātuʻá ke ne fai ha akonaki, ʻe fakapotopoto nai ke ne fealeaʻaki mo ha taha kehe ʻo e kau mātuʻá, ka ʻoku lelei ange ke ʻoua te ne ʻalu ki ha tokotaha ʻo e kau mātuʻá ʻa ia ʻokú ne ʻilo ʻoku tatau ʻene saiʻiá mo ʻene fakakaukau ʻaʻana. Kapau ʻoku uesia nai ʻa e tokolahi ʻi he fakatahaʻangá ʻe he anga fakaemāmani ki he valá mo e anga ʻo e teuteú, ʻe lava ke fai ha fetalanoaʻaki ʻa e kulupu ʻo e kau mātuʻá ʻo kau ki ha founga lelei taha te nau fai ai ha tokoni, ʻo hangē ko hono fai ia ʻo fakafou mai ʻi ha konga ʻi he fakatahá kae fai ʻi he anga-ʻofa mo fakatupu langa hake, pe ko hono fai ʻo e tokoni fakafoʻituitui. (Palōvepi 24:6; 27:17) Ko ʻenau taumuʻá ke nau fakaʻaiʻai ʻa e anga ʻo e vakai ʻoku hā ʻi he 2 Kolinitō 6:3: “Kaeʻumaʻā ʻoku mau tokanga ke ʻoua naʻa ai ha tūkiaʻanga ʻe tupu ʻi haʻamau meʻa, naʻa lauʻi ʻa e lakanga.”

22. (a) Ko e hā ʻoku ʻikai ke totonu ai ke hoko ha mamahi ʻo kapau ʻoku ʻi ai ha kehekehe ʻi he anga ʻo e fakakaukaú? (e) Ko e hā ʻa e faʻifaʻitakiʻanga lelei naʻe fokotuʻu mai ʻe Paulá?

²² ʻOku lelei ki he kau mātuʻa Kalisitiane ʻoku nau ‘tauhi ʻa e fanga sipi ʻa e ʻOtuá ʻoku ʻiate kinautolú’ ke nau fai ʻa ia kuo fokotuʻu mai ʻe Pitá, ke ‘ʻoua ʻe fakafieʻeiki kiate kinautolu ko e tofiʻa ʻo e ʻOtuá.’ (1 Pita 5:​2, 3) ʻI he lolotonga ʻo ʻenau ngāue anga-ʻofá, ʻe hoko nai ha ngaahi fehuʻi ʻo kau ki ha ngaahi meʻa ʻa ia ʻe faikehekehe nai ai ʻa e saiʻiá. Mahalo pē ko ha anga fakalotofonua ke tuʻu ʻo lau ai ʻa e ngaahi palakalafí he lolotonga ʻo e Ako Taua Leʻo. Ko e ngaahi fokotuʻutuʻu ki he ngaahi kulupu ʻoku fakataha ki he ngāue fakamalangá pea mo e ngaahi meʻa kehe lahi ʻo fekauʻaki mo e ngāue fakamalangá tonu ʻe fakahoko nai ia ʻo fakatatau mo e anga-fakafonua ʻo e feituʻu ko iá. Ka neongo ia, ʻoku kovi nai kapau ʻe ʻi ai ha tokotaha ia ʻoku kiʻi kehe ʻene foungá? ʻOku loto ʻa e kau ʻovasia anga-ʻofá “ko e meʻa kotoa pe ke fai ke tāu mo māu,” ʻa ia naʻe ngāueʻaki ʻe Paula ʻa e kupuʻi leá ni ʻo fekauʻaki mo e ngaahi meʻaʻofa fakaemaná. Ka ʻoku hā ʻi he potutohí ko e mahuʻingaʻia tefito ʻa Paulá ko e “langa hake ai ʻa e siasi.” (1 Kolinitō 14:​12, 40) Naʻe ʻikai te ne fakahā ha hehema ke ʻai ha ngaahi tuʻutuʻuni fuʻu lahi ʻaupito, ʻo pehē ko ʻene taumuʻa tefitó ko e tuʻunga tatau matematē pe ko e tuʻunga taau mo maau fakaʻaufuli. Naʻá ne tohi: “Kuo tuku ʻe he ʻEiki kiate kimautolu [ʻa e mafai]: (ʻa ia naʻe tuku mai moʻomou langa hake, ʻo ʻikai moʻomou holoki).”​—2 Kolinitō 10:8.

23. Ko e hā ʻa e ngaahi founga ʻe niʻihi ʻe lava ke tau faʻifaʻitaki ai ki he faʻifaʻitakiʻanga ʻa Paula ʻi hono langaʻi hake ʻa e niʻihi kehé?

²³ ʻOku ʻikai ke toe fehuʻia naʻe ngāue ʻa Paula ke langaʻi hake ʻa e niʻihi kehé ʻaki ʻa e lea mo fakalototoʻa pau. ʻI he ʻikai te ne feohi mo e kaungāmeʻa tokosiʻi pē, naʻá ne fai mo ha feinga makehe ke ʻaʻahi ki he ngaahi tokoua mo e ngaahi tuofāfine tokolahi, fakatouʻosi kiate kinautolu naʻe mālohi fakalaumālié pea tautautefito kiate kinautolu naʻe fiemaʻu ke langaʻi haké. Pea naʻá ne fakamamafaʻi ʻa e ʻofa​—kae ʻikai ko e ngaahi tuʻutuʻuni​—he ko e “ʻofa ko e meʻa langa hake.”​—1 Kolinitō 8:1.

[Fakamatala ʻi lalo]

Ngaahi Poini Ke Fakamanatu

◻ Ko e hā ʻoku feʻunga ai ke liliu kapau ʻoku tau hehema ki he lea taʻepau pe fakaanga?

◻ Ko e hā ʻe lava ke tau fai ke tau fakatupu langa hake lahi ange ai ʻi loto ʻi he fakatahaʻangá?

◻ Ko e hā ʻa e sīpinga fakaeʻotua ʻo fekauʻaki mo e ʻai ha ngaahi tuʻutuʻuni lahi ki he niʻihi kehé?

◻ Ko e hā ʻe tokoni ki he kau mātuʻá ke fakaʻehiʻehi mei he ʻai ʻo e ngaahi tuʻutuʻuni fakaetangata ki he tākangá?