ʻOku Taau ki he Kakai Fefine Kalisitiané ʻa e Fakaʻapaʻapa mo e Tokaʻi

“Ko kimoutolu ngaahi husepāniti, ke mou hokohoko hoʻomou nofo mo kinautolu ʻo fakatatau ki he ʻilo, ʻo fai kiate kinautolu ʻa e fakaʻapaʻapa ʻo taau mo ha ipu vaivai ange, ko e fefine.”​—1 PITA 3:7, NW.

 1, 2. (a) ʻOku langaʻi hake ʻa e tokanga ki he hā ʻi he fepōtalanoaʻaki ʻa Sīsū mo e fefine Samēliá ʻi he veʻe vaitupú, pea ko e hā hono ʻuhingá? (Sio foki ki he fakamatala ʻi laló.) (e) Ko e hā naʻe fakahāhaaʻi ʻe Sīsū ʻi heʻene malanga ki he fefine Samēliá?

ʻI HE taimi hoʻatā ʻe taha ʻi he fakaʻosiʻosi ʻo e 30 T.S., naʻe fakahaaʻi ai ʻe Sīsū ʻi ha vaitupu motuʻa ofi ki he kolo ko Saiká ʻa e anga ʻo ʻene ongoʻi ʻo kau ki he tōʻongafai ʻoku totonu ki he kakai fefiné. Naʻá ne fāifononga holo ʻi he pongipongí ʻi he loto-fonua moʻungaʻia ʻo Samēliá peá ne aʻu ai ki he vaitupú kuó ne helaʻia pea fiekaia mo fieinua. ʻI heʻene tangutu ʻi he veʻe vaitupú, naʻe fakaofiofi mai ha fefine Samēlia ke ʻutu vai. Naʻe lea ʻa Sīsū kiate ia: “ʻE, mai siʻaku inu.” Kuo pau pē naʻe sio fakamamaʻu ʻa e fefiné kiate ia heʻene ʻohovalé. Naʻá ne ʻeke: “Ko e toe tala inu hā e kiate au, ka ko e Siu koe, pea ko e fefine Samelia kita?” Ki mui ai, ʻi he foki mai ʻa ʻene kau ākongá mei he kumi meʻakaí, naʻa nau ʻohovale ʻo nau fifili pe ko e hā naʻe “talanoa ai mo e fefine” ʻa Sīsuú.​—Sione 4:​4-9, 27.

² Ko e hā ʻa e meʻa naʻá ne langaʻi ʻa e fehuʻi ko ʻeni ʻa e fefiné pea mo e hohaʻa ʻa e kau ākongá? Ko ha fefine Samēlia ia, pea naʻe ʻikai ha feangainga ʻe taha ʻa e kau Siú mo e kau Samēliá. (Sione 8:48) Ka ʻoku hā mahinó naʻe toe ʻi ai ʻa e ʻuhinga ia ʻe taha ki he hohaʻá. ʻI he taimi ko iá, ko e talatukufakaholo faka-Lāpaí naʻe feinga ke taʻofi ʻa e kakai tangatá mei he talanoa ki he kakai fefiné ʻi he feituʻu kakaí.a Ka neongo ia, naʻe fai fakahāhā pē ʻe Sīsū ia ʻene malanga ki he fefine loto-totonu ko ʻení, ʻo aʻu ai pē ki heʻene fakahā kiate ia ko e Mīsaiá ia. (Sione 4:​25, 26) Naʻe fakahaaʻi leva ai ʻe Sīsū ko iá ʻe ʻikai taʻofi ʻe ha ngaahi talatukufakaholo taʻefakatohitapu, ʻo kau ai ʻa e ngaahi meʻa ʻoku fakamāʻulaloʻi ai ʻa e kakai fefiné. (Maʻake 7:​9-13) ʻI hono kehé, naʻe fakahāhaaʻi ʻe Sīsū ʻi he meʻa naʻá ne faí pea mo ia naʻá ne akoʻí, ʻoku totonu ke tōʻongafai ʻaki ki he kakai fefiné ʻa e fakaʻapaʻapa mo e tokaʻi.

Ko e Tōʻongafai ʻa Sīsū ki he Kakai Fefiné

 3, 4. (a) Naʻe fēfē ʻa e tōʻonga ʻa Sīsū ki he fefine ko ia naʻe ala ki hono kofú? (e) Naʻe anga-fēfē ʻa hono fokotuʻu ʻe Sīsū ha faʻifaʻitakiʻanga lelei ki he kakai tangata Kalisitiané, tautefito ki he kau ʻovasiá?

³ Ko e manavaʻofa ʻa Sīsū ki he kakaí naʻe tapua ia ʻi he founga ʻo ʻene feangainga mo e kakai fefiné. ʻI he taimi ʻe taha naʻe kumi mai ai kia Sīsū ʻi he fuʻu kakaí ha fefine ʻa ia naʻe faingataʻaʻia lahi mei heʻene ʻau toto ʻi he taʻu ʻe 12. ʻI hono tuʻungá, naʻe ʻai ai ia ke ne taʻemaʻa fakaeouau, ko ia ai, naʻe ʻikai totonu ke ne ʻi ai. (Livitikō 15:25-27) Ka naʻá ne moulu atu ki ai ʻi he tuʻa ʻo Sīsuú he naʻá ne faingatāmaki ʻaupito. ʻI heʻene ala ki hono kofú, naʻá ne moʻui ai ʻi he taimi pē ko iá! Neongo ko ʻene fononga ʻeni ki he ʻapi ʻo Siailosí, ʻa ia naʻe puke lahi ʻa hono ʻofefiné, naʻe tuʻu ʻa Sīsū. ʻI heʻene ongoʻi kuo mole meiate ia ha mālohí, naʻá ne fakasio takai holo ki he tokotaha naʻe ala ange ki aí. Naʻe toki haʻu leva ʻa e fefiné ʻo tō ʻi he tetetete ʻi muʻa ʻia Sīsū. Naʻe tafuluʻi nai ia ʻe Sīsū ko ʻene ʻi he fuʻu kakaí pe ko ʻene ala ange ki hono kofú ʻo ʻikai te ne fakangofuá? ʻI hono kehé, naʻe ʻiloʻi ʻe he fefiné ʻoku māfana ʻaupito mo anga-ʻofa ʻa Sīsū. Naʻe pehē ange ʻe Sīsū: “Ofefine, kuo fakamoui koe e hoo tui.” Ko ʻeni pē ʻa e taimi naʻe lea fakahangatonu ai ʻa Sīsū ki ha fefine ko ha “ofefine.” Kuo pau ko ha toki lea ē naʻá ne fakafiemālieʻi ia!​—Mātiu 9:​18-22; Maʻake 5:​21-34, PM.

⁴ Naʻe sio fakalaka atu ʻa Sīsū ia mei he ngaahi lea ʻo e Laó. Naʻá ne sio ki he ʻuhinga moʻoni ʻoku ʻi aí pea mo e fiemaʻu ki ha meesi pea mo e manavaʻofa. (Fakafehoanaki mo Mātiu 23:23.) Naʻe fakatokangaʻi ʻe Sīsū ʻa e ngaahi tuʻunga faingatāmaki fakaemahaki ʻo e fefiné pea naʻe ʻi heʻene fakakaukaú naʻe ueʻi ʻa e fefiné ʻe he tui. Naʻá ne fokotuʻu leva ai ha faʻifaʻitakiʻanga lelei ki he kakai tangata Kalisitiané, tautefito ki he kau ʻovasiá. Kapau ʻoku fehangahangai ha tuofefine Kalisitiane mo ha ngaahi palopalema fakafoʻituitui pe ʻoku mātuʻaki ʻi ha tuʻunga faingataʻa pe fonu ʻahiʻahi, ʻoku totonu ki he kau mātuʻá ke nau sio fakalaka atu ʻi he ngaahi lea pe tōʻonga ʻi he taimi ko iá pea fai ha fakakaukau ki he ngaahi tuʻungá pea mo e ngaahi ʻuhinga naʻe fai ai iá. Ko e fakapotopoto peheé ʻokú ne fakahā nai ʻoku fiemaʻu ʻa e anga-kātaki, mahino, pea mo e manavaʻofa kae ʻikai ko e akonakiʻi mo e fakatonutonu.​—Palōvepi 10:19; 16:23; 19:11.

 5. (a) ʻI he founga fē naʻe fakangatangata ai ʻi he ngaahi talatukufakaholo faka-Lāpaí ʻa e kakai fefiné? (Sio ki he fakamatala ʻi laló.) (e) Ko hai naʻa nau ʻuluaki sio pea mo fai fakamoʻoni fekauʻaki mo e toetuʻu ʻa Sīsuú?

⁵ ʻI hono fakafihiaʻi ʻe he ngaahi talatukufakaholo faka-Lāpaí, naʻe fakangatangata ai ʻa e kakai fefine naʻe moʻui ʻi he taimi naʻe ʻi māmani ai ʻa Sīsuú mei he ngāue ko ha kau fakamoʻoni fakalao.b Fakakaukau ange ki he meʻa naʻe hoko ʻi he hili ha taimi nounou ʻi hono fokotuʻu ʻa Sīsū mei he maté ʻi he pongipongi ʻo Nīsani 16, ʻi he 33 T.S. Ko hai naʻe ʻuluaki mamata kia Sīsū kuo toetuʻú pea fai fakamoʻoni ki he kau ākonga kehé kuo toetuʻu honau ʻEikí? Naʻe hoko ia ʻi he kau fefine ʻa ē naʻa nau nofo ofi ke lava ʻo sio ki he feituʻu faiʻanga tutukí ʻo aʻu ki heʻene pekiá.​—Mātiu 27:​55, 56, 61.

 6, 7. (a) Ko e hā naʻe tala ʻe Sīsū ki he kau fefine naʻe omi ki he fonualotó? (e) Naʻe anga-fēfē ʻa e ʻuluaki tali ʻa e kau ākonga tangata ʻa Sīsuú ki he fakamoʻoni ʻa e kau fefiné, pea ko e hā ʻe lava ke ako mei hení?

⁶ ʻI he hengihengi ʻo e ʻuluaki ʻaho ʻo e uiké, naʻe ʻalu ai ʻa Mele Makitala pea mo e ongo fefine kehe ki he fonualotó mo e ngaahi ʻakau kakala ke ngaohi ʻaki ʻe sino ʻo Sīsuú. ʻI hono ʻiloʻi ʻoku ʻikai ha taha ʻi he fonualotó, naʻe lele ʻosi ʻa Mele ke tala kia Pita mo Sione. Naʻe nofo pē ʻa e ongo fefiné. Taimi siʻi pē, naʻe hā ha ʻāngelo kiate kinaua ʻo talaange kuo ʻosi fokotuʻu hake ʻa Sīsū. Naʻe fakahinohino ange ʻe he ʻāngeló: “Mo ō ke vave ʻo tala ki heʻene kau ako.” ʻI he lolotonga ʻo e fakavavevave ʻa e ongo fefiné ke ʻave ʻa e ngaahi ongoongó, naʻe hā mai ʻa Sīsū tonu kiate kinaua. Naʻá ne tala kiate kinaua: “Mole pe ʻo fakaha ki siʻoku ngāhi tokoua.” (Mātiu 28:​1-10; Maʻake 16:​1, 2; Sione 20:​1, 2) ʻI he taʻeʻilo ki he ʻaʻahi ʻa e ʻāngeló pea mo hono lōmekina ia ʻe he mamahí, naʻe toe foki ʻa Mele Makitala ki he fonualotó. Naʻe hā ʻa Sīsū kiate ia ʻi ai, pea ʻi he hili ʻene toki ʻiloʻi iá, naʻá ne talaange: “ʻAlu ki siʻoku ngaahi tokoua, ʻo lea ki ai ʻo pehē, Ko ʻeku ʻalu hake ʻeni ki heʻeku Tamai pea ko hoʻomou Tamai, pea ki hoku ʻOtua pea ko homou ʻOtua.”​—Sione 20:​11-18; fakafehoanaki mo Mātiu 28:​9, 10.

⁷ Naʻe mei malava pē ke tomuʻa hā ʻa Sīsū kia Pita, Sione pe ko ha taha ʻi he kau ākonga tangata kehé. Ka naʻe ʻikai, naʻá ne fili ke fakahā ʻa e hōifua ki he kau fefiné ni ʻaki hono ʻai kinautolu ke nau hoko ko e kau ʻuluaki fakamoʻoni sio pau ʻo ʻene toetuʻú pea ʻi hono fekauʻi kinautolu ke nau fai fakamoʻoni fekauʻaki mo ia ki heʻene kau ākonga tangatá. Naʻe ʻuluaki tali fēfē ki ai ʻa e kau tangatá? ʻOku pehē ʻe he fakamatalá: “Naʻe ha ʻa e ngaahi lea ko ia kiate kinautolu o hangē ko e muna; pea naʻe ʻikai te nau tui ki he kau fefine.” (Luke 24:11) ʻE malava nai ke pehē naʻa nau ʻilo naʻe faingataʻa ke tali ʻa e fakamoʻoní koeʻuhi ko ʻene haʻu mei he kakai fefiné? Kapau ko ia, naʻa nau maʻu taimi totonu ʻa e fakamoʻoni lahi ʻaupito ko Sīsuú kuo ʻosi fokotuʻu ia mei he maté. (Luke 24:​13-46; 1 Kolinitō 15:​3-8) ʻI he ʻahó ni, ʻoku fai fakapotopoto ʻa e kakai tangata Kalisitiané ʻi he taimi ʻoku nau fakakaukau ai ki he ngaahi fakamatala ʻa honau tuofāfine Kalisitiané.​—Fakafehoanaki mo Sēnesi 21:12.

 8. Ko e hā naʻe fakahaaʻi ʻe Sīsū ʻi he founga ʻo ʻene feangainga mo e kakai fefiné?

⁸ ʻOku mātuʻaki fakalotomāfana moʻoni ʻa hono fakatokangaʻi ʻa e founga ʻo e feangainga ʻa Sīsū mo e kakai fefiné. Naʻá ne manavaʻofa maʻu pē mo kakato ʻa ʻene mafamafatatau ʻi he feangainga mo e kakai fefiné, naʻe ʻikai te ne fakamāʻolungaʻi pe tuku hifo kinautolu. (Sione 2:​3-5) Naʻá ne talitekeʻi ʻa e ngaahi talatukufakaholo faka-Lāpaí ʻa ia naʻá ne toʻo meiate kinautolu honau molumalú pea ko ia naʻe fakataʻeʻaongaʻi ai ʻa e Folofola ʻa e ʻOtuá. (Fakafehoanaki mo Mātiu 15:​3-9.) ʻI he tōʻongafai ki he kakai fefiné ʻaki ʻa e fakaʻapaʻapá mo e tokaʻí, naʻe fakahaaʻi fakahangatonu ai ʻe Sīsū ʻa e tōʻongafai ʻoku totonu kiate kinautolú ʻi he anga ʻo e ongoʻi ʻa Sihová. (Sione 5:19) ʻOku toe fokotuʻu ai heni ʻe Sīsū ha faʻifaʻitakiʻanga lelei ke faʻifaʻitaki ki ai ʻa e kakai tangata Kalisitiané.​—1 Pita 2:21.

Ko e Ngaahi Akonaki ʻa Sīsū ʻo Fekauʻaki mo e Kakai Fefiné

 9, 10. Naʻe anga-fēfē hono fakataʻeʻaongaʻi ʻe Sīsū ʻa e ngaahi talatukufakaholo faka-Lāpaí fekauʻaki mo e kakai fefiné, pea ko e hā ʻene lea ʻi he hili hono langaʻi hake ha fehuʻi ʻe he kau Fālesí fekauʻaki mo e vete malí?

⁹ Naʻe fakataʻeʻaongaʻi ʻe Sīsū ʻa e ngaahi talatukufakaholo faka-Lāpaí peá ne fakamolumaluʻi ʻa e kakai fefiné ʻo ʻikai ngata pē ʻi heʻene ngaahi tōʻongá kae pehē foki ʻi heʻene ngaahi akonakí. Ko e fakatātaá, fakakaukau atu ki he meʻa naʻá ne akoʻi ʻo kau ki he vete malí mo e tonó.

¹⁰ Fekauʻaki mo e vete malí, naʻe ʻeke ai kia Sīsū ʻa e fehuʻí ni: “ʻOku ngofua koā ke tukuange hoto uaifi ʻi ha meʻa pē?” Fakatatau ki he fakamatala ʻa Maʻaké, naʻe pehē ʻe Sīsū: “Ka ai ha taha te ne tukuange hono uaifi [ʻo ʻikai ʻi haʻane feʻauaki] pea ne toki mali mo ha fefine kehe, ʻoku ne feʻauaki mo e fefine ko ia [“ʻokú ne fai ʻa e tono ʻo fakafepaki kiate ia,” NW]. Pea ka tukuange ʻe he fefine hono husepāniti, ʻo ne toki mali mo ha tangata kehe, ʻoku ne feʻauaki.” (Maʻake 10:​10-12; Mātiu 19:​3, 9) ʻOku fakahaaʻi ʻe he ngaahi lea mahinongofua ko iá ʻa hono tokaʻi ʻo e molumalu ʻo e kakai fefiné. ʻO anga-fēfē?

11. Ko e lea ʻa Sīsū “ʻo ʻikai ʻi haʻane feʻauaki” ʻokú ne fakahaaʻi ai ʻa e hā fekauʻaki mo e haʻi ʻo e nofo malí?

¹¹ ʻUluakí, ʻi he ngaahi lea “ʻo ʻikai ʻi haʻane feʻauaki” (ʻoku ʻi he fakamatala ʻi he Kōsipeli ʻa Mātiú), naʻe fakahaaʻi ai ʻe Sīsū ʻoku ʻikai tonu ke fakamaʻamaʻaʻi ʻa e vakai ki he haʻi ʻo e nofo malí pe maumauʻi ngofua. Naʻe fakangofua ʻe he akonaki faka-Lāpai mālohí ha vete mali ʻi he ngaahi tuʻunga iiki hangē ko ha maumauʻi ʻe ha uaifi ha tisi meʻakai pe ko haʻane talanoa ki ha tangata kehe. Ko ē, naʻe toe fakangofua ʻa e veté kapau naʻe ʻiloʻi ʻe ha husepāniti ia ha fefine ʻoku toe fakaʻofoʻofa ange ia ʻi heʻene vakaí! Naʻe pehē ʻe ha mātaotao ʻe taha ʻi he Tohitapú: “I he lea ʻa Sīsū ʻo hangē ko ia naʻá ne faí naʻá ne . . . fai ai ha poupou ki he kakai fefiné ʻaki ʻa ʻene feinga ke fakafoki ʻa e nofo malí ki he tuʻunga ʻoku totonu ke ne maʻú.” Ko e moʻoni, ʻoku totonu ke hoko ʻa e nofo malí ko ha fāʻūtaha tuʻumaʻu ʻa ia ʻe malava ke ongoʻi malu ai ha fefine.​—Maʻake 10:​6-9.

12. Ko e hā ʻa e fakakaukau ʻoku fokotuʻu mai ʻe Sīsū ʻi he lea “ʻokú ne fai ʻa e tono ʻo fakafepaki kiate ia”?

¹² Ko hono uá, ʻi he kupuʻi lea “ʻokú ne fai ʻa e tono ʻo fakafepaki kiate ia” naʻe muʻaki fokotuʻu ai ʻe Sīsū ha fakakaukau naʻe ʻikai ke fakatokangaʻi ia ʻi he ngaahi fakamaauʻanga faka-Lāpaí​—ʻa e fakakaukau ko ia ki ha husepāniti ʻoku fai ʻa e tonó ʻoku fakafepaki ki hono uaifí. ʻOku fakamatalaʻi ʻe he Expositor’s Bible Commentary: “ʻI he lotu faka-Siu faka-Lāpaí naʻe malava pē ki ha fefine ʻi heʻene taʻeangatonú ʻe lava ke ne fai ʻa e tonó ʻa ia ʻoku fakafepaki ia ki hono husepānití; pea ko ha tangata, ʻi heʻene fai fehokotaki fakasino mo e uaifi ʻo ha tangata kehe, naʻe malava pē ke ne fai ʻa e tonó ʻa ia ʻoku fakafepaki ki he tangata ko iá. Ka ki ha tangata neongo pe ko e hā pē ha meʻa naʻá ne fai, heʻikai ʻaupito te ne fai ʻa e tonó ʻa ia ʻoku fakafepaki ki hono uaifí. Ko Sīsū, ʻi heʻene ʻai ʻa e husepānití ʻi he malumalu ʻo e fatongia fakaeʻulungaanga tatau pē mo e uaifí, naʻá ne langaʻi hake ai ʻa e tuʻunga pea mo e molumalu ʻo e kakai fefiné.”

13. Naʻe fēfē hono fakahā ʻe Sīsū ʻo pehē ʻi he malumalu ʻo e fokotuʻutuʻu faka-Kalisitiané ʻe taha pē ʻa e tuʻunga ki he kakai tangatá mo e kakai fefiné fakatouʻosi ʻi he fekauʻaki mo e veté?

¹³ Ko hono tolú, ʻi he kupuʻi lea “pea ka tukuange ʻe ha fefine hono husepāniti,” naʻe fakahanga ai ʻe Sīsū ʻa e tokangá ki he totonu ʻa ha fefine ke veteʻi ha husepāniti taʻeangatonu​—ko ha tōʻonga ʻoku ngalingali naʻe ʻiloʻi ka naʻe ʻikai ke failahia ia ʻi he lao faka-Siú ʻi he ʻaho ko iá.c Naʻe leaʻaki ʻo pehē “ʻe malava ke veteʻi ha fefine ʻaki ʻene loto pe taʻeloto ki ai, ka ki ha tangata ʻe toki fai pē ʻi heʻene loto ki ai.” Ka neongo ia, fakatatau kia Sīsū, ʻi he malumalu ʻo e fokotuʻutuʻu faka-Kalisitiané, ʻe ngāueʻaki fakatouʻosi ki he kakai tangatá mo e kakai fefiné ʻa e tuʻunga tatau.

14. Ko e hā naʻe tapua mai ʻe Sīsū ʻi heʻene ngaahi akonakí?

¹⁴ ʻOku fakahaaʻi mahino ʻi he ngaahi akonaki ʻa Sīsuú ha tokanga loloto ki he lelei ʻa e kakai fefiné. Ko ia ai, ʻoku ʻikai faingataʻa ke mahinoʻi ʻa e ʻuhinga naʻe ongoʻi ʻofa pehē ai ha kakai fefine ʻe niʻihi kia Sīsū ʻo nau tauhi ai ki heʻene ngaahi fiemaʻú mei he koloa ʻanautolú. (Luke 8:​1-3) “Ko ʻeku tokāteline ʻoku ʻikai aʻaku,” ko e lea ia ʻa Sīsuú “ka ʻoku aʻana naʻa ne fekau mai au.” (Sione 7:16) ʻI he meʻa naʻá ne akoʻí, naʻe tapua mai ai ʻe Sīsū ʻa e tokanga anga-ʻofa ʻa Sihova tonu ki he kakai fefiné.

“Fai Kiate Kinautolu ʻa e Fakaʻapaʻapa”

15. Ko e hā naʻe tohi ʻe he ʻaposetolo ko Pitá ʻo fekauʻaki mo e founga ʻoku totonu ke tōʻongafai ʻaki ʻe he ngaahi husepānití ki honau ngaahi uaifí?

¹⁵ Naʻe mamata tonu ʻa e ʻaposetolo ko Pitá ʻi he founga ʻo e feangainga ʻa Sīsū mo e kakai fefiné. ʻI he taʻu nai ʻe 30 ki mui ai, naʻe ʻoange ʻe Pita ki he ngaahi uaifí ʻa e akonaki anga-ʻofa pea hili iá naʻá ne tohi: “Pehē foki, ko kimoutolu ngaahi husepānití, ke mou hokohoko hoʻomou nofo mo kinautolú ʻo fakatatau ki he ʻilo, ʻo fai kiate kinautolu ʻa e fakaʻapaʻapa ʻo taau mo ha ipu vaivai ange, ko e fefiné, he ʻoku mou kaungāʻea foki mo kinautolu ki he meʻaʻofa maʻataʻatā ʻo e moʻuí, koeʻuhi ke ʻoua ʻe hoko ʻo taʻofia hoʻomou ngaahi lotú.” (1 Pita 3:7, NW) Naʻe ʻuhinga ki he hā ʻa Pita ʻi heʻene ngaahi lea ʻo pehē ke “fai kiate kinautolu ʻa e fakaʻapaʻapa”?

16. (a) Ko e hā hono ʻuhinga ʻo e foʻi nauna faka-Kalisi ʻoku liliu ko e “fakaʻapaʻapa”? (e) Naʻe anga-fēfē ʻa hono fakaʻapaʻapaʻi ʻe Sihova ʻa Sīsū he lolotonga ʻa e fakakehé, pea ko e hā ʻoku tau ako mei hení?

¹⁶ Fakatatau ki he lau ʻa e ʻētita ʻo ha tikisinale ʻe taha, ko e foʻi nauna faka-Kalisi naʻe liliu ko e “fakaʻapaʻapa” (ti·meʹ) ʻoku ʻuhingá ko e “totongi, mahuʻinga, fakaʻapaʻapa mo e tokaʻi.” Ko e foʻi lea faka-Kalisi ko ʻení ʻi hono ngaahi foungá naʻe ngāueʻaki ko e “gaahi foaki” mo e “mahuʻinga.” (Ngāue 28:​10, PM; 1 Pita 2:​7) ʻOku tau maʻu ʻa e mahino fekauʻaki mo e ʻuhinga ʻo hono fakaʻapaʻapaʻi ha tahá ʻo kapau te tau sivisiviʻi ʻa hono ngāueʻaki ʻe Pita ha founga ʻo e foʻi lea tatau ʻi he 2 Pita 1:17. ʻI aí naʻá ne lea ʻo kau ki he fakakehe ʻa Sīsuú: “He naʻa ne maʻu mei he ʻOtua ko e Tamai ʻa e fakaʻapaʻapa mo e fakalangilangiʻi, he ʻomai kiate ia ʻa e leʻo ko ia naʻe pehe fau ʻe he Sikaina nāunauʻia, ʻo pehe, Ko hoku ʻAlo Pele ʻena, ʻa ia kuo toka ki ai ʻeku hōifua.” ʻI he fakakehe ʻa Sīsuú, naʻe fakaʻapaʻapaʻi ai ʻe Sihova ʻa hono ʻAló ʻaki hono fakahaaʻi ʻa ʻene hōifua ʻia Sīsuú, pea naʻe fai ʻeni ʻe he ʻOtuá ʻi he fanongo ki ai ʻa e niʻihi kehé. (Mātiu 17:​1-5) Ko ia ai, ko e tangata ʻokú ne fakaʻapaʻapaʻi hono uaifí, ʻoku ʻikai ke ne fakamaaʻi pe tuku hifo ia. ʻI hono lelei angé, ʻokú ne fakahāhaaʻi ia ʻaki ʻene ngaahi leá pea mo ʻene ngaahi ngāué​—ʻi he ʻikai ʻi ai ha tahá, pea ʻi he feituʻu kakaí—​ʻokú ne fakahīkihikiʻi ia.​—Palōvepi 31:​28-30.

17. (a) Ko e hā ʻoku ʻi ai ai ʻa e totonu ʻa e uaifi Kalisitiané ke fakaʻapaʻapaʻí? (e) Ko e hā ʻoku ʻikai totonu ai ki ha tangatá ke ne ongoʻi kuo mahuʻinga lahi ange ia ʻi he fefiné ʻi he vakai mai ʻa e ʻOtuá?

¹⁷ ʻOku pehē ʻe Pita, ko e fakaʻapaʻapa ko ʻení, kuo pau ke ‘fai’ ia ʻe he ngaahi husepāniti Kalisitiané ki honau ngaahi uaifí. ʻOku pau ke fai ange ia, ʻo ʻikai ko ha fai pē ʻo ha anga-ʻofa, ka ko e meʻa pē ia ʻa honau ngaahi uaifí ʻoku totonu ke nau maʻu. Ko e hā ʻoku ʻi ai ai ʻa e totonu ʻa e ngaahi uaifí ki he fakaʻapaʻapa peheé? Koeʻuhí he ʻoku fakamatalaʻi ʻe Pita: “ʻOku mou kaungāʻea foki mo kinautolu ki he meʻaʻofa maʻataʻatā ʻo e moʻui.” ʻI he ʻuluaki senitulí T.S., naʻe ui kotoa ai ʻa e kau tangata mo e kau fefine ʻa ia naʻa nau maʻu ʻa e tohi ʻa Pitá ke nau hoko ʻo kaungāʻea fakataha mo Kalaisi. (Loma 8:16, 17; Kalētia 3:28) Naʻe ʻikai ke nau maʻu ʻa e ngaahi fatongia tatau ʻi he fakatahaʻangá, ka ʻe faifai atu pē ʻo nau kau ʻi he pule mo Kalaisi ʻi hēvaní. (Fakahā 20:6) ʻI he ʻahó ni foki, koeʻuhi ko e tokolahi taha ʻo e kakai ʻa e ʻOtuá ʻoku nau maʻu ha ʻamanaki ki he māmaní, ʻe hoko ia ko ha hala lahi ki ha tangata Kalisitiane pē ke ne ongoʻi ʻo pehē koeʻuhí ko e ngaahi fatongia ʻokú ne maʻu nai ʻi he fakatahaʻangá, ʻoku lahi ange ʻa hono mahuʻingá ʻona ʻi he vakai mai ʻa e ʻOtuá ʻi he kakai fefiné. (Fakafehoanaki mo Luke 17:10.) Ko e kakai tangatá mo e fefiné ʻoku nau maʻu ha tuʻunga fakalaumālie tatau ki he ʻOtuá, he naʻe fakaʻatā ʻe he pekia fakaefeilaulau ʻa Sīsuú ki he kakai tangatá mo e kakai fefiné fakatouʻosi ʻa e faingamālie tatau​—ʻa ia ko e hoko ʻo tauʻatāina mei he fakahalaia ʻa e angahalá mo e maté, ʻo hanga atu ai ki he moʻui taʻengatá.​—Loma 6:23.

18. Ko e hā ʻa e ʻuhinga mālohi ʻoku tala ai ʻe Pita ki ha husepāniti ke fakaʻapaʻapaʻi hono uaifí?

¹⁸ ʻOku toe ʻomai ʻe Pita ʻa e ʻuhinga mālohi ʻa ia ʻoku totonu ai ki ha husepāniti ke ne fakaʻapaʻapaʻi hono uaifí, “koeuhi ke ʻoua ʻe hoko ʻo taʻofia [ʻa ʻene] ngaahi lotu.” Ko e fakamatala ko e “hoko ʻo taʻofia” ko e haʻu ia mei he foʻi veape faka-Kalisi ko e (en·koʹpto) ʻa ia ko hono ʻuhinga fakafoʻileá ia “ke tuʻusi ʻi loto.” Fakatatau ki he Expository Dictionary of New Testament Words ʻa Vine, naʻe “ngāueʻaki ia ʻi hono ʻai ke fakafaingataʻaʻiaʻi ʻa e kakaí ʻaki hono maumauʻi ʻo e halá, pe ʻi hono fokotuʻu ha fakafaingataʻaʻiaʻanga ʻi ai tonu ʻi he halá.” Ko ia ai, ko e husepāniti ʻoku ʻikai ke ne fai ki hono uaifí ʻa e fakaʻapaʻapá ʻe malava ke ne ʻiloʻi ʻoku ʻi ai ha fakafaingataʻaʻiaʻanga ʻi he vahaʻa ʻo ʻene ngaahi lotú pea mo e fanongo ki ai ʻa e ʻOtuá. ʻE ongoʻi nai ʻe he tangatá ʻoku ʻikai taau ia ke lotu ki he ʻOtuá, pe ʻe ʻikai nai fie fanongo ki ai ʻa Sihova. ʻOku hā mahino, ʻoku tokanga lahi ʻaupito ʻa Sihova ki he founga ʻo e tōʻongafai ʻa e kakai tangatá ki he kakai fefiné.​—Fakafehoanaki mo Tangilāulau 3:44.

19. ʻE malava fēfē nai ke ngāue fakataha ʻa e kakai tangatá mo e kakai fefine ʻi he fakatahaʻangá mo fefakaʻapaʻapaʻaki?

¹⁹ Ko e fatongia ko ia ke fakahā ʻa e fakaʻapaʻapá ʻoku ʻikai ke tuku ʻataʻatā pē ia ki he ngaahi husepānití. Neongo ʻoku totonu ki ha husepāniti ke ne fakaʻapaʻapaʻi ʻa hono uaifí ʻaki ʻa e tōʻongafai anga-ʻofa fakataha mo e molumalu kiate ia, ʻoku totonu foki ki ha uaifi ke ne fakaʻapaʻapaʻi ʻa hono husepānití ʻaki ʻa ʻene hoko ʻo anga-nofo mo fakahāhaaʻi ʻa e ʻapasia loloto. (1 Pita 3:​1-6) ʻIkai ngata aí, naʻe enginakiʻi ʻe Paula ʻa e kau Kalisitiané ke ‘nau fefakaabaabaaki ʻiate kinautolu.’ (Loma 12:​10, PM) Ko ha fekau ʻeni ki he kakai tangata mo e kakai fefine ʻi he fakatahaʻangá ke nau ngāue fakataha mo e fefakaʻapaʻapaʻaki. ʻI he ʻi ai ha laumālie peheé, ʻe ʻikai leva ke lea ʻa e kakai fefine Kalisitiané ʻi ha founga ʻa ia te ne fakavaivaiʻi ai ʻa e mafai ʻo kinautolu ʻoku nau fai ʻa e tatakí. Ko hono kehé, te nau poupouʻi ʻa e kau mātuʻá pea ngāue fakataha mo kinautolu. (1 Kolinitō 14:34, 35; Hepelū 13:17) ʻI heʻenau tafaʻakí, ko e kau ʻovasia Kalisitiané te nau fai ‘ki he kau fineʻeiki ʻo hange ko ʻenau faʻe; ki he kau finemui ʻo hange ko honau tuofefine, ʻo matuʻaki angamaʻa.’ (1 Tīmote 5:​1, 2) ʻI he fakapotopoto, ʻe fai ʻe he kau mātuʻá ʻa e tokanga anga-ʻofa ki he leʻo ʻo honau tuofāfine Kalisitiané. ʻI heʻene peheé, ʻi he taimi ʻoku fakahaaʻi ai ʻe ha tuofefine ʻa ʻene tokanga ki he tuʻunga-ʻulu fakateokalatí pea fehuʻi anga-fakaʻapaʻapa pe te ne fakahaaʻi ha meʻa ʻoku fiemaʻu ki ai ha tokanga, ʻe fiefia ʻa e kau mātuʻá ke fai ha fakakaukau ki heʻene fehuʻí pe palopalemá.

20. Fakatatau ki he lēkooti Fakatohitapú, ʻoku totonu ke fēfē ʻa e tōʻongafai ki he kakai fefiné?

²⁰ Talu mei hono kamata ʻo e angahalá ʻi ʻĪtení, kuo tuku hifo ai ʻa e kakai fefiné ʻi he ngaahi sivilaise lahi ki ha tuʻunga taʻefakaʻapaʻapaʻi. Ka ʻoku ʻikai ko e faʻahinga tōʻongafai ia naʻe muʻaki fakahangahanga ʻe Sihova kiate kinautolu ke nau aʻusiá. Tatau ai pē pe ko e hā nai ʻa e ngaahi fakakaukau fakasivilaise ki he kakai fefiné ʻoku kei ʻi aí, ʻoku fakahaaʻi mahino ʻi he Konga Tohitapu Faka-Hepelū mo e Konga Tohitapu Faka-Kalisi Kalisitiané ʻoku totonu ke tōʻongafai ʻaki ki he kakai fefine anga-fakaʻotuá ʻa e fakaʻapaʻapa mo e tokaʻi. Ko ʻenau totonu ia kuo foaki kiate kinautolu ʻe he ʻOtuá.

[Fakamatala ʻi lalo]

Ko e Hā Haʻo Tali?

◻ Ko e hā ʻa e ngaahi fakatātā ʻokú ne fakahaaʻi naʻe fakaʻapaʻapaʻi mo tokaʻi ʻe Sīsū ʻa e kakai fefiné ʻi heʻene tōʻongafaí?

◻ Naʻe anga-fēfē hono fakahā ʻa e tokaʻi ʻo e molumalu ʻo e kakai fefiné ʻi he ngaahi akonaki ʻa Sīsuú?

◻ Ko e hā ʻoku totonu ai ke fai ʻe ha husepāniti ʻa e fakaʻapaʻapá ki hono uaifi Kalisitiané?

◻ Ko e hā ʻa e fatongia ke fakahaaʻi ai ʻa e fakaʻapaʻapá ʻa ia ʻoku maʻu ʻe he Kalisitiane kotoa pē?

[Fakatātā ʻi he peesi 29]

Ki heʻenau fiefiá, ko e kakai fefine anga-fakaʻotuá naʻa nau ʻuluaki sio ki he toetuʻu ʻa Sīsuú, ʻa ia naʻá ne ʻai ai kinautolu ke nau fai- fakamoʻoni ki hono ngaahi tokouá