Ko e Faʻahinga Fakakaukau Faʻa Tatali Fēfē ʻOkú Ke Maʻú?

ʻI HE māmani he ʻaho ní, ʻoku tokosiʻi ai ʻa e kakai ʻoku nau fiefia ʻi he tatali ki ha taha pe ko ha meʻá. ʻOku ʻahiʻahiʻi ai ʻenau kātakí. Kae kehe, ʻoku fakalototoʻaʻi mai ʻe he Tohi Tapú ʻa e kakai ʻa e ʻOtuá ke nau fakatupulekina ha “fakakaukau faʻa tatali.” ʻI he kehe mei he kakai takatakai ʻiate iá, naʻe fakahaaʻi ʻe he palōfita ko Maiká: “Teu fakahāhā ha fakakaukau faʻa tatali ki he ʻOtua ʻo hoku fakamoʻuí.”—Maika 7:​7, NW; Tangilaulau 3:26.

Kae kehe, ko e hā ʻa e ʻuhinga ke tatali ai kia Sihová? ʻOku totonu ke fēfē ʻa e tatali ʻa ha Kalisitiane ki he ʻOtuá? ʻOku ʻi ai ha ngaahi founga totonu mo taʻetotonu ke fai ai eni? Ko e meʻa naʻe hokosia ʻe he palōfita ko Sioná ʻi he senituli hono hiva K.M. ʻoku ʻomai ai ha lēsoni ʻi he meʻá ni.

Ko ha Tuʻunga ʻo e Tatali Takihalaʻi

Naʻe fakahinohino ʻe Sihova ko e ʻOtuá kia Siona ke ʻalu ʻo malanga ki he kakai ʻo Ninivé, ʻa e kolomuʻa ʻo e ʻEmipaea ʻAsīliá. Naʻe ʻiloa ʻa Ninive ko e “kolo totoʻia” koeʻuhi ko ʻene anga-fakamanu mo e anga-fakamamahi fefeká, ko ha moʻoniʻi meʻa naʻe fakapapauʻi lelei ʻe he kau faihisitōliá mo e kau ʻākeolosiá. (Nehumi 3:1) Naʻe ʻuluaki feinga ʻa Siona ke fakaʻehiʻehi mei he vāhenga-ngāue ko ení, ka naʻe fakapapauʻi ʻe Sihova ʻe iku ʻo ʻalu ʻa e palōfitá ki Ninive.​—Siona 1:3–3:2.

“Pea kamata ʻe Siona ʻene hu ki he kolo ko e vaʻihala ʻo e ʻaho ʻe taha, mo ʻene kalanga ʻo pehe, toe fangofuluʻi ʻaho, pea kuo fulihi ʻa Ninive!” (Siona 3:4) Ko e ngaahi ngāue ʻa Sioná naʻe fakatupunga ai ha tali mahuʻinga: “Pea tui ʻa e kakai Ninive ki he ʻOtua, ʻo nau fanongonongo ha ʻaukai, mo nau ʻai tauangaʻa, mei he lahi ki he siʻi.” (Siona 3:5) Fakatatau ki ai, ko Sihová, ko ha ʻOtua ʻa ia ʻoku “ʻikai te ne finangalo ke ʻauha ha taha, ka ke aʻusia ʻa e fakatomala ʻe he kakai kotoa pe,” naʻá ne fakahaofi ʻa e koló.—2 Pita 3:9.

Ko e hā ʻa e tali ʻa Sioná? ʻOku pehē ʻe he fakamatalá: “Ka naʻe koviʻia lahi ai ʻa Siona, pea ne ʻita.” (Siona 4:1) Ko e hā hono ʻuhingá? Mahalo pē naʻe ongoʻi ʻe Siona ko ʻene fanongonongo taʻefakahoko ʻo e fakaʻauha ʻi ha ʻaho paú naʻe ʻai ai ke mole ʻa e tui ange kiate ia ʻi hono tuʻunga ko ha palōfitá. ʻOku hā mahino naʻá ne hoko ʻo hohaʻa lahi ange ki hoʻoná ongoongo ʻo laka ia ʻi he meesi mo e fakamoʻui ki he niʻihi kehé.

Ko e moʻoni, naʻe ʻikai ke aʻu ʻa Siona ki he tuʻunga ʻo e fakafisi ke hoko ko ha palōfitá. Ka neongo ia, naʻá ne tatali ke “vakai pe ko e ha ʻe hoko ki he kolo.” ʻIo, naʻá ne fakatupu ha fakakaukau toumoua ʻo tatali ke sio pe ko e hā ʻe hokó. ʻI hono ʻiloʻi naʻe ʻikai ke hoko ʻa e ngaahi meʻá ʻi he founga naʻá ne ʻamanekiná, naʻá ne langa ha fakahekeheke, peá ne tangutu ʻi he malumalú, ʻo tatali fakamāmāhuʻi ai ke sio pe ko e hā ʻe hokó. Kae kehe, naʻe ʻikai hōifua ʻa Sihova ki he fakakaukau ʻa Sioná, ko ia naʻá ne fakatonutonu anga-ʻofa ai ʻa e fakakaukau ʻa ʻene palōfita fakakaukau fehālaakí.—Siona 4:​5, 9-11.

ʻUhinga ʻOku Kātaki Ai ʻa Sihová

Neongo naʻe fakatomala ʻa Ninive pea naʻe fakahaofi, naʻe toe foki ia ki mui ai ki he ngaahi founga fulikivanú. Fakafou he ongo palōfita ko Nēhumi mo Sēfanaiá, naʻe tomuʻa tala ai ʻe Sihova ʻa hono fakaʻauhá. ʻI he lau ki he “kolo totoʻia,” naʻe talaki ʻe Sihova te ne fakaʻauha ʻa ʻAsīlia pea ʻai ʻa Ninive ko ha tuʻunga lala. (Nehumi 3:1; Sefanaia 2:13) ʻI he 632 K.M., naʻe fakaʻauha ai ʻa Ninive, ke ʻoua ʻaupito ʻe toe mahiki hake.

ʻI ha founga meimei tatau, ko e māmani ʻo e ʻaho ní ʻoku halaia ia ʻi he lingitoto fakamamahi ʻi ha tuʻunga lahi mamaʻo ange ʻi he tuʻunga ko ia ʻo Ninive he kuonga muʻá. ʻI he meʻá ni mo e ngaahi ʻuhinga kehe, kuo tuʻutuʻuni ai ʻe Sihova ko e fokotuʻutuʻu fulikivanu ʻo e ngaahi meʻa lolotongá ʻe hoko ia ki hono ngataʻangá ʻi ha “mamahi lahi” taʻehanotatau.—Mātiu 24:​21, 22.

Neongo ia, kuo taʻotaʻofi ʻe Sihova ʻa e fakaʻauha naʻe talaʻofá koeʻuhi ke lava ai ʻa e kakai loto-moʻoni he ʻaho ní, hangē ko e faʻahinga fakatomala ʻi Ninivé, ʻo fakatomala pea hoko ʻo fakahaofi. ʻOku lave ʻa e ʻapositolo ko Pitá ki he kātaki ʻa e ʻOtuá ʻi he ngaahi leá ni: “Talaʻehai ko ʻene fai tuai ʻa e ʻEiki ʻi heʻene talaʻofa, ʻo hange ko e lau tuai ʻe he niʻihi, ka ko ʻene angamokomoko pe kiate kimoutolu, mo e ʻikai te ne finangalo ke ʻauha ha taha, ka ke aʻusia ʻa e fakatomala ʻe he kakai kotoa pe.”—2 Pita 3:​9, 10, 13.

Tatali ʻi he Founga Totonú

ʻOku hoko atu ʻa Pita ʻo pehē: “Koia i he ene bau be ke auha ae gaahi mea ni kotoabe, koeha ae aga oku tāu mo kimoutolu i he ulugaaga maonioni moe aga faka-Otua; O amanaki [pe tatali] mo holi atu ki he hoko mai oe aho oe Otua!” (2 Pita 3:​11, 12, PM) Fakatokangaʻi lolotonga ʻa e tatali ki he ʻaho ʻo Sihová, ʻoku totonu ke tau fakahāhā ʻa e “ulugaaga maonioni moe aga faka-Otua”​—ko e ngāue, ʻikai ko e taʻengāue, ʻoku feʻungamālié.

ʻIo, ko ha fakakaukau faʻa tatali totonu ʻoku fakahaaʻi ai ʻa e tuipau kakato ko e ʻaho ʻo Sihová ʻe hoko mai ia ʻo ʻikai tōmui ʻi he meʻa kuo fakataumuʻa ki ai ʻe Sihová. Ko e tui peheé ʻoku ʻomai ai ʻa e ngaahi ʻulungāanga māʻoniʻoni mo e anga-fakaʻotua, pea ʻoku tuʻu-ki-muʻa ʻi honau lotolotongá ʻa hono malangaʻi ʻo e ongoongo lelei ʻo e Puleʻanga ʻo e ʻOtuá. Naʻe fokotuʻu ʻe Sīsū ha faʻifaʻitakiʻanga lelei ʻi he malangá, pea naʻá ne fakahinohino ki hono kau muimui paní: “Ko kimoutolu ke maʻu huke homou kofu, pea tutu ai pe hoʻomou māma; pea mou tatau mo ha kau tangata ʻoku talitali hoʻónautolu ʻeiki, haʻane foki mei he taʻane; koeʻuhi ka aʻu mai ia, ʻo tukituki, pea nau toʻo leva ki ai. Monuʻiaā ka ko e kau tamaioʻeiki ko ia, ʻa ia ʻe ʻiloa kinautolu ʻe he ʻeiki ʻi heʻene haʻele mai ʻoku nau leʻo pē.”—Luke 12:​35-37.

Ko e kau tamaioʻeiki ʻi he ʻuluaki senitulí naʻa nau ‘huke honau kofú’ ʻaki hono tānaki hake ʻa e tapa ʻo honau ngaahi kofu tuʻá ʻo ʻai ki honau noʻó koeʻuhi ke faingofua ai ʻa e ngāue faingataʻa fakaesinó. Ko ia ai, ʻoku fiemaʻu ki ha Kalisitiane ke iviivi pea faivelenga ʻi he ngaahi ngāue leleí. ʻOku totonu ke ne tauʻi ha hehema pē ke “fakapikopiko” ʻi he ʻikai longomoʻui fakalaumālié, ʻi hono afeʻi nai ʻa hono iví ki he ngaahi mālié pe ki he ngaahi ngāue fakamatelié. ʻI hono kehé, ʻoku totonu ke ne ‘tupulekina ʻi he ngaue ʻa e ʻEikí’ lolotonga ʻa ʻene tatali ki he ʻaho lahi mo fakamanavahē ʻo Sihová.—Loma 12:11; 1 Kolinito 15:58.

Longomoʻui Lolotonga ʻa e Tatalí

Kuo hanganaki femoʻuekina ʻa e Kau Fakamoʻoni ʻa Sihová lolotonga ʻa e tatali ki he ʻaho ʻo Sihová. Hangē ko ení, ʻi he taʻu fakangāue 2003, naʻa nau fakamoleki ai ha ʻavalisi ko e houa ʻe 3,383,000 ʻi he ʻaho taki taha ʻi hono malangaʻi ʻo e folofola ʻa Sihová. Fakaʻuta atu, ʻe pau ki ha tokotaha ke ne malanga taʻetuku feʻunga mo e taʻu ʻe 386 ke lavaʻi ai ʻa e meʻa naʻe fai ʻi he ʻaho ʻe tahá!

Kae kehe, ʻoku lelei ke tau ʻeke hifo kia kitautolu, ‘Ko e hā ʻa e faʻahinga fakakaukau faʻa tatali ʻoku ou maʻu fakafoʻituituí?’ Naʻe fai ʻe Sīsū ha pealapeli ʻoku fakamatala ai ki he faʻa ngāue ʻoku ʻamanekina mei he kau Kalisitiane pani faitōnungá. Naʻá ne lea ai fekauʻaki mo e kau tamaioʻeiki ʻe toko tolu: “Ko e toko taha naʻa ne ʻange ki ai [ʻe he ʻeikí] ʻa e taleniti ʻe nima, pea ua ki he toko taha, pea taha ki he toko taha; ʻo fakatatau ki heʻenau mafai taki taha; pea ne ʻalu leva ki muli. Pea ʻalu ʻa ia naʻa ne maʻu ʻa e taleniti ʻe nima, ʻo ne ngaueʻaki ia, ʻo ne fakatupuʻaki ha nima kehe. Pehe foki mo ia naʻe aʻana ʻa e ua, naʻa ne maʻu mo ha ua kehe. Ka ko ia naʻa ne maʻu ʻa e taha, naʻa ne ʻalu leva ʻo keli ha luo, ʻo ne fufū ai ʻa e paʻanga a ʻene ʻeiki. Pea fuoloa fuoloa pea haʻu ʻa e ʻeiki ʻa e kau tamaioʻeiki ko ia, ʻo ne sivi ʻenau tohi.”—Mātiu 25:​15-19.

Ko e tamaioʻeiki kotoa ʻe toko tolú naʻa nau tatali ki he foki mai ʻa e ʻeikí. Ko e toko ua naʻá na hanganaki femoʻuekina lolotonga ʻena tatali ki hona ʻeikí naʻe tala ange kia kinaua ʻi heʻene aʻu maí: “Malo, siʻi tamaioʻeiki lelei mo lototō.” Kae kehe, ko e tokotaha naʻá ne tatali taʻefai ha meʻá naʻe kehe ʻa e tōʻongafai kiate iá. Naʻe pehē ʻe he ʻeikí: “Mou li ʻa e tamaioʻeiki taeʻaonga ki he poʻuli ʻo tuaʻā.”—Mātiu 25:​20-30.

Neongo ʻoku ngāueʻaki ʻa e pealapeli ko ení ki he kau Kalisitiane paní, ʻoku ʻi ai ha lēsoni kia kitautolu kotoa ʻo tatau ai pē pe ko e hā ʻetau ʻamanakí. Ko e ʻEikí, ʻa Sīsū Kalaisi, ʻokú ne ʻamanekina mei he tokotaha taki taha ʻo kitautolú ke ngāue tōtōivi ʻi heʻene ngāué lolotonga ʻetau tatali ki heʻene aʻu mai ʻi he ʻaho lahi ʻo Sihová. ʻOkú ne fakamahuʻingaʻi ʻa e ngāue ʻa e tokotaha taki taha “ʻo fakatatau ki heʻenau mafai” mo e ngaahi tuʻunga. He meʻa fakafiefia ē ko ia ke fanongo ki ha “malo” mei he ʻEikí ʻi he iku ʻo ʻosi ʻa e tatalí!

Ko e Kātaki ʻa Hotau ʻEikí ʻOku ʻUhinga Ia ko e Fakamoʻui

Fēfē kapau ko e fokotuʻutuʻu ko eni ʻo e ngaahi meʻá kuo lōloa ange ia ʻi he meʻa naʻa tau fakakaukau ki ai ki muʻá pe ʻamanaki ʻe hokó? ʻOku ʻi ai ha ʻuhinga tefito ʻo e meʻá ni. Naʻe tohi ʻe he ʻapositolo ko Pitá: “Mou lau ʻa e kataki fuoloa ʻa hotau ʻEiki ko e koto fakamoʻui.” (2 Pita 3:15) Ko e ʻilo totonu ʻo e taumuʻa ʻa e ʻOtuá mo ha lāuʻilo anga-fakatōkilalo ki hotau tuʻunga taʻemahuʻingá te ne ʻai ke tau malava ai ʻo kātaki lolotonga ʻa e vakai ʻa Sihova ʻoku kei feʻunga ke kātakiʻi ʻa e fokotuʻutuʻu motuʻa ko ení.

Ke fakalototoʻaʻi ʻa e kau Kalisitiané ke nau kātakí, ko e tokotaha-tohi Tohi Tapu ko Sēmisí naʻá ne ʻomai ai ha fakatātā. Naʻá ne tohi: “Vakai ʻoku nofoʻaki tali ʻa e faʻa ki he fua mahuʻinga ʻo e kelekele; pea ʻoku ne kataki hono tauhi, kaeʻoua ke to ki ai ʻa e ʻuha muʻa mo e ʻuha mui. Ke mou kataki mo kimoutolu; poupou homou loto: he kuo ofi ʻa e hoko mai ʻa e ʻEiki.”—Semisi 5:​7, 8.

Ko Sihova ko e ʻOtuá ʻoku ʻikai te ne loto ke tau helaʻia pe foʻi lolotonga ʻetau tatalí. ʻOku ʻi ai ʻene ngāue kia kitautolu ke tau fai pea ʻokú ne hōifua kapau ʻoku tau ngāueʻaki ʻa e taimi tatalí ke ngāue mālohi ai ʻi he ngāue ko iá. ʻOkú ne loto ke tau ʻi he haʻohaʻonga ʻo e faʻahinga ʻa ia ʻoku fakamatalaʻi ʻe he ʻapositolo ko Paulá ʻi heʻene tohi ki he kau Hepeluú: “ʻOku mau fakaʻamu ke ha ʻiate kimoutolu taki taha ha feinga [pe ngāue mālohi] hange ko ia, ke fakamaʻumaʻuluta hoʻomou fakatuʻamelie, ʻo aʻu ki he ngataʻanga. Koeʻuhi ke ʻoua te mou hoko ko e kau fakapikopiko, ka ko e kau faʻifaʻitaki ʻo e kakai kuo nau hokosi ʻa e ngaahi talaʻofa ʻi heʻenau tui mo e kitaki.”—Hepelu 6:​11, 12.

Ko ia ʻoua te tau hoko ʻo ongosiá. ʻI hono kehé, ʻofa ke hoko ʻa hotau vahaʻangatae fakafoʻituitui mo Sihova ko e ʻOtuá, ko ʻetau tui ki he feilaulau huhuʻi ʻa Sīsuú pea mo ʻetau ʻamanaki fiefia ki he fokotuʻutuʻu foʻou ʻo e ngaahi meʻá ko e ngaahi mālohi fakatupu longomoʻui ia ʻi heʻetau moʻuí. Hangē ko e kau tamaioʻeiki “lelei mo lototō” ʻo e pealapeli ʻa Sīsuú, ʻofa ke tau fakamoʻoniʻi ʻetau taau mo e fakaongoongoleleí pea mo e palé ʻaki ʻetau hanganaki femoʻuekina ʻi hono fakahīkihikiʻi ʻa hotau ʻOtuá, hangē ko ia naʻe fai ʻe he tokotaha-tohi-sāmé ʻa ia naʻá ne fakamatala: “Ka ko au te u ʻamanaki ai pe; pea ʻe fakautuutu ʻeku fakamālō kiate koe.”—Sāme 71:14.

[Fakatātā ʻi he peesi 21]

ʻI he siva ʻa e ʻamanakí, naʻe tatali ʻa Siona ke sio pe ko e hā ʻe hoko ki Ninivé

[Fakatātā ʻi he peesi 22, 23]

Tau fakahāhā ʻa e anga-līʻoa fakaʻotuá lolotonga ʻa e tatali ki he ʻaho ʻo Sihová