Mahinoʻi ʻa e Taumuʻa ʻo e Akonakí

KO E HĀ ʻoku haʻu ki hoʻo fakakaukaú ʻi he taimi ʻokú ke fanongo ai ki he foʻi lea “akonakí”? ʻOku fakamatalaʻi ʻe ha tikisinale ʻe taha ʻa e akonakí ko e “tōʻonga ʻo hono ʻai ʻa e kakaí ke nau talangofua ki he ngaahi tuʻutuʻuní pe ngaahi tuʻunga ʻo e ʻulungāngá, pea mo hono tautea kinautolu ʻi he taimi ʻoku ʻikai ai te nau fai ki aí.” Neongo ʻoku ʻikai ʻaupito ko e fakamatala pē eni ʻoku talí, ko e kakai tokolahi he ʻaho ní ʻoku nau fakahaaʻi ha ʻuhinga ʻikai lelei tatau ki ha meʻa pē ʻoku kau ki ai ʻa e akonakí.

Kae kehe, ko e Tohitapú ʻokú ne fakahaaʻi ʻa e akonakí ʻi ha tuʻunga kehe. “Tama, ʻoua te ke vaʻingaʻaki ho ako[naki] ʻoku fai ʻe he ʻEiki,” ko e tohi ia ʻa e poto ko Tuʻi Solomoné. (Palovepi 3:11) Ko e ngaahi leá ni ʻoku ʻuhinga ia, ʻikai ki he akonakí fakalūkufua, ka ki he ‘akonaki ʻa Sihová,’ ʻa ia ko e akonaki ʻoku makatuʻunga ʻi he ngaahi tefitoʻi moʻoni māʻolunga ʻa e ʻOtuá. Ko e ngaahi akonaki peheé pē ʻoku fua lahi mo ʻaonga fakalaumālié—naʻa mo ʻene taau ke holi ki ai. ʻI hono kehé, ko e akonaki ʻoku makatuʻunga ʻi he fakakaukau fakaetangatá ʻa ia ʻoku fepaki mo e ngaahi tefitoʻi moʻoni māʻolunga ʻa Sihová ʻoku faʻa mele ia mo fakatupu mamahi. Ko e ʻuhinga ia ʻoku maʻu ai ʻe he tokolahi ha fakakaukau ʻikai lelei ki he akonakí.

Ko e hā ʻoku fakaʻaiʻai ai kitautolu ke tau tali ʻa e akonaki ʻa Sihová? ʻI he ngaahi Konga Tohitapú, ko e akonaki fakaʻotuá ʻoku fakamatalaʻi ia ko ha fakahāhā ʻo e ʻofa ʻa e ʻOtuá ki heʻene ngaahi meʻa fakatupu fakaetangatá. Ko ia ai, naʻe hoko atu ʻa Solomone ʻo pehē: “Ko ia ʻoku ʻofa ki ai ʻa e ʻEiki ʻa ia ʻoku ne kinisi; ʻio, hange ko e fai ʻe ha tamai ki hono foha pele.”—Palovepi 3:12.

Akonaki pe Tautea—Ko Fē?

Ko e akonakí hangē ko ia ʻoku fakahaaʻi ʻi he Tohitapú ʻoku lahi hono ngaahi tafaʻakí—ko e tataki, fakahinohino, akoʻi, valoki, fakatonutonu, pea naʻa mo e tautea. Kae kehe, ʻi he tuʻunga taki taha, ko e akonaki ʻa Sihová ʻoku ueʻi ia ʻe he ʻofá, pea ko ʻene taumuʻá ke maʻu ʻaonga ʻa e tokotaha ʻoku maʻu iá. Ko e akonaki fakaefakatonutonu ʻa Sihová ʻoku ʻikai ʻaupito ki he taumuʻa ʻataʻatā pē ʻo e tauteá.

ʻI he tafaʻaki ʻe tahá, ko e ngaahi ngāue tautea ʻa e ʻOtuá ʻoku ʻikai fakataumuʻa maʻu pē ia ki hono fakatonutonu pe akoʻi ʻa e tokotaha ʻokú ne maʻu iá. Ko e fakatātaá, mei he ʻaho pē ko ia naʻe faiangahala ai ʻa ʻĀtama mo ʻIví, naʻá na kamata ai ke fuesia ʻa e ngaahi nunuʻa ʻo ʻena talangataʻá. Naʻe kapusi ʻe Sihova kinaua mei he ngoue palataisi ko ʻĪtení, pea naʻá na tō ai ki he ngaahi nunuʻa ʻo e taʻehaohaoá, puké, mo e taʻumotuʻá. Hili ʻa e ngaahi taʻu ʻe laui teau ʻo e ʻi ai ʻi he mamahí, naʻá na ʻauha atu ʻo taʻengata. Ko e meʻá ni kotoa ko e tautea fakaʻotua moʻoni ia, ka naʻe ʻikai ko ha akonaki fakaefakatonutonu. ʻI he loto-fiefai mo e taʻefakatomalá, naʻe ʻikai lava ai ke toe fakatonutonu ʻa ʻĀtama mo ʻIvi.

Ko e ngaahi fakamatala kehe ʻo e ngāue tautea ʻa Sihová ʻoku kau ai ʻa e Lōmaki ʻi he ʻaho ʻo Noá, ko e fakaʻauha ʻo Sōtoma mo Komolá, pea mo e fakangata ʻosi ʻo e kau tau ʻIsipité ʻi he Tahi Kulokulá. Ko e ngaahi ngāue ko eni ʻa Sihová naʻe ʻikai fakataumuʻa ia ke ne ʻomai ʻa e tataki, fakahinohino, pe ko e ako ki he faʻahinga ʻoku nau maʻu iá. ʻI he fekauʻaki mo e ngaahi ngāue pehē ʻo e tautea ʻe he ʻOtuá, naʻe tohi ʻa e ʻapositolo ko Pitá: “Naʻe ʻikai te ne maemaeʻekina ʻa e maama motuʻa, ka ne tauhi pe ha toko fitu, pea valu ʻaki ʻa Noa, ʻa ia naʻa ne malangaʻaki ʻa e maʻoniʻoni, ʻi heʻene ʻomi ʻa e Lōmaki ki he maama ʻo e kau fakaʻotuamate: mo ne tutu ke efu ʻa e ongo kolo ko Sotoma mo Komola, mo ne fakamāu ke nofo ko e koto lusa, ʻo ne tuku ai ha taipe ki he kau fakaʻotuamate ʻo e ʻamui.”—2 Pita 2:​5, 6.

ʻI he ʻuhinga fē naʻe hoko ai ʻa e ngaahi ngāue ko eni ʻo e tauteá ʻo “tuku ai ha taipe ki he kau fakaʻotuamate ʻo e ʻamui”? ʻI he tohi ʻa Paula ki he kau Tesalonaiká, naʻá ne tuhu mai ki hotau ʻahó ko e taimi ia ʻa ia ʻe ʻomai ai ʻe he ʻOtuá, fakafou ʻi hono ʻAló, ko Sīsū Kalaisi, ʻa e “fai sauni ki he kau taʻeʻilo ʻOtua, pea ki he kau taʻetalangofua ki he Kosipeli.” ʻOku tānaki mai ʻe Paula: “Ko e faʻahinga ia te nau kai hono nunuʻa ko e fakaʻauha taʻengata.” (2 Tesalonaika 1:​8, 9) ʻOku hā mahino, ko e tautea peheé ʻoku ʻikai faʻufaʻu ia ke ne akoʻi pe fakaleleiʻi ʻa e faʻahinga ʻoku nau maʻu iá. Kae kehe, ʻi he taimi ʻoku fakaafeʻi ai ʻe Sihova ʻa ʻene kau lotú ke nau tali ʻa ʻene akonakí, ʻoku ʻikai te ne ʻuhingá ki he tautea ʻo e kau faiangahala taʻefakatomalá.

ʻOku mahuʻinga he ʻoku ʻikai ke fakamatalaʻi tefito ʻe he Tohitapú ʻa Sihova ko ha tokotaha faitautea. ʻI hono kehé, ʻoku faʻa fakamatalaʻi lahi ia ko ha faiako ʻofa pea ko ha tokotaha faiako anga-kātaki. (Siope 36:22; Sāme 71:17; Aisea 54:13) ʻIo, ko e akonaki fakaʻotua ʻa ia ʻoku fakahoko ko ha taumuʻa fakaefakatonutonú ʻoku faʻa ō fakataha ia mo e ʻofa pea mo e anga-kātaki. ʻI hono mahinoʻi ʻa e taumuʻa ʻo e akonakí, ʻoku ʻi he tuʻunga lelei ange ai ʻa e kau Kalisitiané ke nau tali pea fakahoko ʻa e akonakí ʻaki ʻa e fakakaukau totonu.

Ko e Akonaki ʻa e Ngaahi Mātuʻa ʻOfá

ʻI loto ʻi he siakale fakafāmilí pea ʻi he loto fakatahaʻanga Kalisitiané, ʻoku ʻi ai ha fiemaʻu ki he tokotaha kotoa ke nau mahinoʻi ʻa e taumuʻa ʻo e akonakí. ʻOku tautefito ʻene moʻoni ení ʻi he faʻahinga ʻoku nau ʻi he ngaahi tuʻunga ʻo e mafaí, hangē ko e ngaahi mātuʻá. ʻOku pehē ʻi he Palovepi 13:24: “Ko ia ʻoku ne angakoviʻi ʻa e meʻa kinisi ʻoku ne fehiʻa ki heʻene tamasiʻi: ka ko ia ʻoku ne ʻofa ki ai ʻoku ne tautea [“akonakiʻi,” NW] kei siʻi.”

Ko e hā ʻa e founga ke fakahoko ai ʻe he ngaahi mātuʻá ʻa e akonakí? ʻOku fakamatala ʻa e Tohitapú: “Ko kimoutolu ʻa e ngaahi tamai, ʻoua te mou fakaʻitaʻi hoʻomou fānaú, kae hanganaki tauhi hake kinautolu ʻi he akonaki mo e fakatonutonu-fakaʻatamai ʻa Sihová.” (Efeso 6:4, NW) Ko e ekinaki ko ení ʻoku toe fakalea ia ʻi he ngaahi leá ni: “ʻA e ngaahi tamai, ʻoua te mou fakahohaʻasi hoʻomou fanau, naʻa faifai pea nau loto kina.”—Kolose 3:21.

Ko e ngaahi mātuʻa Kalisitiane ʻa ia ʻoku nau mahinoʻi ʻa e taumuʻa ʻo e akonakí ʻe ʻikai te nau tōʻonga fefeka. Ko e tefitoʻi moʻoni ʻoku fakahaaʻi ʻi he 2 Timote 2:​24 ʻe lava ke ngāueʻaki ia ki he founga ʻa ia ʻoku fakahoko ai ʻe he ngaahi mātuʻá ʻa e akonakí. Naʻe tohi ʻe Paula: “Ko e tamaioʻeiki ʻa e ʻEiki ʻoku ʻikai tāu ke ne fakakikihi, kaekehe ke ne angalelei ki he kakai kotoa pe, ke ne poto ʻi he faiako.” Ko e ʻita lahi taʻemapuleʻí, ngaahi kaikailá, mo e ngaahi lea fakalotomamahi pe tuku hifó ʻoku ʻikai ʻaupito ko ha akonaki ʻofa ia pea ʻoku taʻefeʻunga ia ʻi ha moʻui ʻa ha Kalisitiane.​—Efeso 4:​31; Kolose 3:8.

Ko e fakatonutonu fakaemātuʻá ʻoku kau ki ai ʻa e meʻa lahi mamaʻo ange ʻi he ngāue pē ʻo e tautea ʻoku fakahoko fakavave mo ʻosi fakapapauʻí. Ko e tokolahi taha ʻo e fānaú ʻoku fiemaʻu ki ai ʻa e toutou ekinaki ki muʻa ke fakatonutonu ʻenau fakakaukaú. Ko ia ai, ko e ngaahi mātuʻá kuo pau ke nau fakamoleki ʻa e taimi, ngāueʻaki ʻa e kātakí, pea fai ha fakakaukau lahi ki he founga ʻa ia ʻoku nau fakahoko ai ʻa e akonakí. Kuo pau ke nau manatuʻi ko e fānaú kuo pau ke ʻohake kinautolu ʻi he “akonaki mo e fakatonutonu fakaʻatamai ʻa Sihová.” ʻOku ʻuhinga ení ko e ʻalunga ʻo e akoʻi ʻa ia ʻe toki ʻosi ʻi he laui taʻu.

Akonaki ʻa e Kau Tauhi-Sipi Kalisitiané ʻAki ʻa e Anga-Malū

Ko e ngaahi tefitoʻi moʻoni tatau ʻoku ngāueʻaki ki he kau mātuʻa Kalisitiané. ʻI he tuʻunga ko e kau tauhi-sipi ʻofá, ʻoku nau feinga ke langa hake ʻa e tākangá ʻaki hono ʻomai ʻa e fakahinohino, tataki, mo e valoki ʻi he taimi ʻoku fiemaʻu aí. ʻI hono fai iá, ʻoku nau manatuʻi ai ʻa e taumuʻa moʻoni ʻo e akonakí. (Efeso 4:​11, 12) Kapau ʻoku nau fakahangataha pē ki hono fakahoko ʻo e tauteá, te nau tauteaʻi pē ʻa e tokotaha faihalá pea ngata pē ai. Ko e akonaki fakaʻotuá ʻoku kau ki ai ʻa e meʻa lahi ange ia. ʻI hono ueʻi ʻe he ʻofá, ʻoku muia atu pea muimuiʻi ʻe he kau mātuʻá ke aʻu ʻenau akonakí. Koeʻuhi ʻoku nau tokanga moʻoni, ʻoku nau faʻa fakataimitēpileʻi ʻa e ngaahi taimi lahi ʻo e fakalototoʻa mo e akoʻi.

Fakatatau ki he ekinaki ʻoku maʻu ʻi he 2 Timote 2:​25, 26, naʻa mo e taimi ʻo e feangainga mo e faʻahinga ʻoku ʻikai te nau tali lelei ʻa e akonakí, ʻoku fiemaʻu ʻa e kau mātuʻá ke nau fakahinohino ʻi he “angamalū.” ʻOku fakamatalaʻi leva ʻe he konga Tohitapú ʻa e taumuʻa ʻo e akonakí: “Heiʻilo ʻe faifai pea ʻange ʻe he ʻEiki ʻa e fakatomala ke nau tafoki ki he ʻiloʻi totonu ʻo e moʻoni; pea ke nau ʻa mei heʻenau kona ke fai hono finangalo, ʻo hao mei he tauhele ʻa e Tevolo.”

ʻI he taimi ʻe niʻihi, ʻoku fiemaʻu ai ke tuʻusi ʻa e kau faihala taʻefakatomalá mei he fakatahaʻangá. (1 Timote 1:​18-​20) Naʻa mo e ngāue mafatukituki ko iá ʻoku totonu ke vakai ki ai ko e akonaki, ʻo ʻikai ko e tautea pē. ʻI he taimi ki he taimi, ʻoku feinga ai ʻa e kau mātuʻá ke ʻaʻahi ki he faʻahinga ʻoku tuʻusí ʻa ia ʻoku ʻikai te nau kau longomoʻui ʻi he faihalá. Lolotonga ʻa e ngaahi ʻaʻahi ko iá, ʻoku ngāue ai ʻa e kau mātuʻá ʻo fehoanaki mo e taumuʻa moʻoni ʻo e akonakí ʻaki hono fokotuʻu ʻa e ngaahi sitepu ʻoku fiemaʻu ki ha tokotaha ke ne foki ai ki he fakatahaʻanga Kalisitiané.

Ko Sihova ʻa e Fakamaau Haohaoá

Ko e ngaahi mātuʻá, kau tauhi-sipi Kalisitiané, mo e niʻihi kehe ʻoku nau maʻu ʻa e mafai Fakatohitapu ke fakahoko ʻa e akonakí ʻoku totonu ke nau fua fakamātoato ha fatongia pehē. Kuo pau ke ʻoua te nau fakahuʻuhuʻu ke fakamāuʻi ko e niʻihi kehé ʻe ʻikai ʻaupito toe lava ke fakatonutonu. Ko ia ai, ko ʻenau akonakí ʻoku totonu ke ʻoua ʻaupito ʻe ʻi he founga ʻo e tautea faisāuni pe fakafili.

Ko e moʻoni, ʻoku lave ʻa e Tohitapú kia Sihova ko e tokotaha ia ʻa ia te ne fakahoko ʻa e tautea kakaha mo aofangatukú. Ko hono moʻoní, ʻoku pehē ʻe he ngaahi Konga Tohitapú “ko e meʻa fakailifia ke te to ki he nima ʻo e ʻOtua ʻoku Moʻui.” (Hepelu 10:31) Ka ʻoku ʻikai totonu ke faifai ange pea feinga ha tangata ke fakahoa ia tonu kia Sihova ʻi he meʻá ni pe ʻi ha toe tafaʻaki pē. Pea ʻoku ʻikai totonu ke maʻu ʻe ha taha ʻa e ʻuhinga ke ongoʻi ai ko ha meʻa fakailifia ke tō ki he nima ʻo ha mātuʻa tauhi fānau pe ko ha tokotaha mātuʻa pau ʻi he fakatahaʻangá.

ʻOku maʻu ʻe Sihova ʻa e malava ke aʻusia ʻa e mafamafatatau haohaoa ʻi he taimi ʻo ʻene fakahoko akonakí. ʻOku ʻikai maʻu ia ʻe he tangatá. ʻOku lava ke ʻafioʻi ʻe he ʻOtuá ʻa e lotó pea fakapapauʻi ʻa e taimi ʻoku ʻikai lava ke toe fakatonutonu ai ha taha pea tuha ai ki he tautea ʻosi fakapapauʻi mo aofangatukú. Ko e tangatá, ʻi he tafaʻaki ʻe tahá, ʻoku ʻikai lava ke nau fakahoko ha fakamaau pehē. ʻI he ʻuhinga ko iá, ʻi he taimi ʻoku ʻi ai ai ha fiemaʻu ke fakahoko ʻa e akonakí, ko e faʻahinga ʻi ha tuʻunga ʻo e mafaí ʻoku totonu ke nau fakahoko maʻu pē ia mo e taumuʻa ʻo e fakatonutonú.

Tali ʻa e Akonaki ʻa Sihová

ʻOku tau fiemaʻu kotoa ʻa e akonaki ʻa Sihová. (Palovepi 8:​33) Ko hono moʻoní, ʻoku totonu ke tau holi ki he akonaki ʻa ia ʻoku makatuʻunga ʻi he Folofola ʻa e ʻOtuá. ʻI heʻetau ako ʻa e Folofola ʻa e ʻOtuá, ʻe lava ke tau tali ʻa e akonaki ʻa ia ʻoku haʻu hangatonu meia Sihova fakafou ʻi he ngaahi Konga Tohitapú. (2 Timote 3:​16, 17) Kae kehe, ʻi he taimi ʻe niʻihi, te tau maʻu ai ʻa e akonaki mei he kaungā Kalisitiané. Ko hono ʻiloʻi ʻa e taumuʻa moʻoni ʻa ia ʻoku fakahoko ai ʻa e akonaki ko iá ʻe tokoniʻi ai kitautolu ke tau tali loto-lelei ia.

Naʻe fakahaaʻi ʻe he ʻapositolo ko Paulá: “Pea ko eni, ka fai ha kinisi [“akonaki,” NW], talaʻehai ʻoku tau ongoʻi leva ko e meʻa fakafiefia ia, kaekehe, ko e meʻa fakamamahi.” Naʻá ne tānaki mai leva: “Ka ʻe faifai pea tupu ai kiate kinautolu kuo ʻosi ʻa ako ai, ha fua ʻoku hoa mo e melino, ko e koto maʻoniʻoni.” (Hepelu 12:11) Ko e akonaki ʻa Sihová ko ha fakahāhā ia ʻo ʻene ʻofa loloto kia kitautolú. Pe ʻoku tau maʻu pe fakahoko ʻa e akonakí, tau manatuʻi maʻu ʻa e taumuʻa ʻo e akonaki fakaʻotuá pea tokanga ki he akonaki fakapotopoto ʻa e Tohitapú: “Pukenima ʻa e akonaki; ʻoua ʻe tukuange: tauhi ke maʻu; he ko hoʻo moʻui ia.”—Palovepi 4:13.

[Fakatātā ʻi he peesi 21]

Ko e kau angahala taʻefakatomalá ʻoku nau maʻu ʻa e tautea fakaefakamaau ʻa e ʻOtuá, ʻo ʻikai ko ʻene akonaki fakaefakatonutonú

[Fakatātā ʻi he peesi 22]

ʻI hono ueʻi ʻe he ʻofá, ʻoku fakamoleki ai ʻe he kau mātuʻá ʻa e taimi ʻi hono fai ʻa e fekumí mo hono tokoniʻi ʻa e faʻahinga faihalá

[Fakatātā ʻi he peesi 23]

Ko e ngaahi mātuʻá ʻoku nau fakahoko anga-kātaki mo anga-ʻofa ʻa e “akonaki mo e fakatonutonu fakaʻatamai ʻa Sihová”