Hokohoko Atu ʻa e ʻAʻeva ʻo Hangē ko e ʻAʻeva ʻa Sīsū Kalaisí
“Ko ia ia oku ne behe, oku nofo ia kiate ia [ʻOtuá], oku totonu ke ne eveeva foki o hage ko ene eveeva aana [Sīsū].”—1 SIONE 2:6, PM.
1, 2. Ko e hā ʻoku kau ki he sio fakamamaʻu kia Sīsuú?
“TAU kitaki atu ʻetau lele he fakapuepue kuo tala humaki mai kiate kitautolu,” ko e tohi ia ʻa e ʻapositolo ko Paulá, “ʻo tau sio fakamamaʻu atu ki he Takimuʻa ʻi he tui mo hono Fakaaʻu, ʻio, ʻa Sisu.” (Hepelu 12:1, 2) Ko e muimui ʻi he ʻalunga ʻo e faitōnungá ʻoku fiemaʻu ai ke tau sio fakamamaʻu kia Sīsū Kalaisi.
2 Ko e foʻi lea ʻi he muʻaki leá ki he “sio fakamamaʻu,” hangē ko ia ʻoku ngāueʻaki ʻi he Ngaahi Konga Tohi Tapu Faka-Kalisi Kalisitiané, ʻoku ʻuhingá “ke fakahanga ʻa ʻete tokangá ʻo ʻikai fakaleluʻi,” “ke sio kehe mei he meʻa ʻe taha koeʻuhí ke sio ki ha toe meʻa ʻe taha,” “ke fakahangataha ʻa e sió ki ha meʻa.” Ko ha tohi maʻuʻanga fakamatala ʻe taha ʻoku pehē ai: “Ko e miniti ko ia ʻoku toʻo ai ʻe he tokotaha lele Kalisi ʻi he sitētiumé ʻa ʻene tokangá mei he laine lová pea mo e tepí ʻa ia ʻokú ne fakavave ki aí, ʻo fakahanga ki he fuʻu kau mamatá, ʻoku tuai ai ʻa e vave ʻo ʻene lelé. ʻOku pehē pē mo e Kalisitiané.” ʻOku lava ke taʻofi ʻe he ngaahi fakalelú ʻa ʻetau fakalakalaka fakalaumālié. Kuo pau ke tau sio fakamamaʻu kia Sīsū Kalaisi. Pea ko e hā ʻoku tau fakasio ki ai ʻi he Takimuʻá? Ko e foʻi lea faka-Kalisi ʻoku liliu ko e “takimuʻá” ʻoku ʻuhingá ko e “taki tefito, ko e tokotaha ʻoku takimuʻa ʻi ha meʻa pē, pea ko ia ai ʻokú ne fokotuʻu ʻa e faʻifaʻitakiʻanga.” Ko e sio fakamamaʻu kia Sīsuú ʻoku fiemaʻu ki ai ʻa e muimui ʻi heʻene faʻifaʻitakiʻangá.
3, 4. (a) Ko e ʻaʻeva ʻo hangē ko e ʻaʻeva ʻa Sīsū Kalaisí ʻoku fiemaʻu ki ai ʻa e hā ʻi heʻetau tafaʻakí? (e) Ko e hā ʻa e ngaahi fehuʻi ʻoku tuha mo ʻetau tokangá?
3 “Ko ia ia oku ne behe, oku nofo ia kiate ia [ʻOtuá], oku totonu ke ne eveeva foki o hage ko ene eveeva aana [Sīsū],” ko e lau ia ʻa e Tohi Tapú. (1 Sione 2:6, PM) Kuo pau ke tau nofo maʻu ʻi he ʻOtuá ʻaki ʻa e tauhi ki he ngaahi tuʻutuʻuni ʻa Sīsuú ʻo hangē ko ʻene tauhi ʻa e ngaahi tuʻutuʻuni ʻa ʻene Tamaí.—Sione 15:10.
4 Ko ia ai, ko e ʻaʻeva ʻo hangē ko e ʻaʻeva ʻa Sīsuú ʻoku fiemaʻu ai ke tau siofi lelei ia ʻi he tuʻunga ko e Takimuʻa Tefito pea tau muimui ofi ki heʻene laká. Ko e ngaahi fehuʻi mahuʻinga ke lāulea ki ai ʻi he fekauʻaki mo ení: ʻOku anga-fēfē hono tataki kitautolu ʻe Kalaisi ʻi he ʻaho ní? ʻOku totonu ke fēfē hono laveʻi kitautolu ʻe he faʻifaʻitaki ki heʻene tōʻongá? Ko e hā ʻa e ngaahi ʻaonga ʻo e fai pau ki he sīpinga naʻe fokotuʻu ʻe Sīsū Kalaisí?
Founga Hono Tataki ʻe Kalaisi ʻa Hono Kau Muimuí
5. Ki muʻa heʻene ʻalu hake ki hēvaní, ko e hā ʻa e talaʻofa naʻe fai ʻe Sīsū ki hono kau muimuí?
5 Ki muʻa ke ʻalu hake ki hēvaní, naʻe hā ai ʻa Sīsū Kalaisi ne toetuʻú ki heʻene kau ākongá ʻo vaheʻi ange kiate kinautolu ha ngāue mahuʻinga. Naʻá ne pehē: “Ko ia mou ō ʻo ngaohi ʻa e kakai ʻo e ngaahi puleʻanga kotoa pē ko e kau ākonga.” ʻI he taimi ko iá ko e Takimuʻa Tefitó naʻá ne toe talaʻofa te ne ʻiate kinautolu ʻi heʻenau fakahoko ʻa e ngāue ko ení, ʻi heʻene pehē: “Vakai! ʻoku ou ʻiate kimoutolu ʻi he ngaahi ʻaho kotoa pē ʻo aʻu ki he fakaʻosiʻosi ʻo e fokotuʻutuʻu ʻo e ngaahi meʻá.” (Mātiu 28:19, 20, NW) ʻOku anga-fēfē ʻa e ʻi hono kau muimuí ʻa Sīsū Kalaisi ʻi he taimi ko eni ʻo e fakaʻosiʻosi ʻo e fokotuʻutuʻu ʻo e ngaahi meʻá?
6, 7. ʻOku anga-fēfē hono tataki kitautolu ʻe Sīsū fakafou ʻi he laumālie māʻoniʻoní?
6 “Ko e Taukapo, ko e Laumālie Māʻoniʻoni, ʻa ia ʻe fekau mai ʻe he Tamai ʻi hoku hingoa,” ko e lea ia ʻa Sīsuú, “ko e Toko Taha ko ia te ne ako kiate kimoutolu ʻa e meʻa kotoa pē, pea te ne fakamanatu kiate kimoutolu ʻa e meʻa kotoa pē kuo u lea ʻaki kiate kimoutolu.” (Sione 14:26) Ko e laumālie māʻoniʻoní, naʻe fekauʻi mai ʻi he huafa ʻo Sīsuú, ʻokú ne tataki mo fakaivimālohiʻi kitautolu he ʻaho ní. ʻOkú ne fakamaama fakalaumālie kitautolu pea tokoniʻi kitautolu ke tau mahinoʻi “ʻa e ngaahi [meʻa] loloto ʻo e ʻOtua.” (1 Kolinito 2:10) ʻIkai ngata aí, ko e ngaahi ʻulungāanga fakaʻotua ko e “ʻofa, fiefia, melino, kātaki-fuoloa, anga-lelei, lelei, tui, anga-malū mo e mapuleʻi-kita” ʻa e “fua ʻo e laumālié.” (Kaletia 5:22, 23, NW) ʻI he tokoni ʻa e laumālie māʻoniʻoní, ʻe lava ke tau fakatupulekina ʻa e ngaahi ʻulungāangá ni.
7 ʻI heʻetau ako ʻa e Tohi Tapú pea feinga ke ngāueʻaki ʻa e meʻa ʻoku tau akó, ʻoku tokoniʻi ai kitautolu ʻe he laumālie ʻo Sihová ke tupulekina ʻi he potó, ʻiloʻiló, mahinó, ʻiló, fakafuofuá mo e malava fakaefakakaukaú. (Palovepi 2:1-11) ʻOku toe tokoniʻi kitautolu ʻe he laumālie māʻoniʻoní ke kātekina ʻa e ngaahi fakatauelé mo e ʻahiʻahí. (1 Kolinito 10:13; 2 Kolinito 4:7; Filipai 4:13) ʻOku ekinaki ki he kau Kalisitiané ke nau ‘fakamaʻa kinautolu mei he ʻuli kotoa pe ʻo e kakanó mo e lotó, ʻo nau fakakakato ʻenau maʻoniʻoní.’ (2 Kolinito 6:19 [2Ko 7:1, PM]) ʻE lava moʻoni ke tau moʻui ʻo fehoanaki mo e fiemaʻu ʻe he ʻOtuá ʻa e tuʻunga māʻoniʻoní, pe maʻá, ʻo ʻikai kau ai ʻa e tokoni ʻa e laumālie māʻoniʻoní? Ko e taha ʻo e ngaahi founga ʻoku ngāueʻaki ʻe Sīsū ke tatakiʻaki kitautolu he ʻaho ní ko e laumālie māʻoniʻoní, ʻa ia kuo fakamafaiʻi ʻe Sihova ko e ʻOtuá ʻa hono ʻAló ke ne ngāueʻakí.—Mātiu 28:18.
8, 9. ʻOku anga-fēfē hono ngāueʻaki ʻe Kalaisi ʻa e “tamaioeiki agatonu mo boto” ke ne ʻomai ʻa e tuʻunga takí?
8 Vakai angé ki he toe ngaahi founga ʻoku tatakiʻaki ʻe Kalaisi ʻa e fakatahaʻangá he ʻaho ní. ʻI he fakamatala ki heʻene ʻi aí mo e fakaʻosiʻosi ʻo e fokotuʻutuʻu ʻo e ngaahi meʻá, naʻe pehē ʻe Sīsū: “Kohai ae tamaioeiki agatonu mo boto, kuo fakanofo e he ene eiki ke bule ki hono kaugaabi, mo tufaki kiate kinautolu ae mea kai i hono taimi totonu? Oku monuia ae tamaioeiki koia, oka haʻu a ene eiki, o ilo ia oku ne fai behe. Ko eku tala mooni atu kiate kimoutolu, te ne fakanofo ia ke ne buleʻi ene mea kotoabe.”—Mātiu 24:3, 45-47, PM.
9 Ko e “eiki” ko Sīsū Kalaisi. Ko e “tamaioeiki” ko e kulupu ʻo e kau Kalisitiane pani ʻi he māmaní. Ko e kalasi tamaioeiki ko ení ʻoku tuku ki ai ke ne tokangaʻi ʻa e ngaahi meʻa ʻa Sīsū ʻi he māmaní mo hono tokonaki mai ʻa e meʻakai fakalaumālie taimi totonú. Ko ha kiʻi kulupu ʻo e kau ʻovasia taau mei he lotolotonga ʻo e “tamaioeiki agatonu mo boto” faʻu fetuiakí ʻoku faʻuʻaki ʻa e Kulupu Pulé, ʻo nau ngāue ko e fakafofonga ʻo e kalasi tamaioʻeikí. ʻOku nau tataki ʻa e ngāue malangaʻi ʻo e Puleʻangá ʻi māmani lahí mo hono tokonaki mai ʻo e meʻakai fakalaumālié ʻi he taimi totonú. Ko ia ai, ʻoku tataki ʻe Kalaisi ʻa e fakatahaʻangá fakafou ʻi he “tamaioeiki agatonu mo boto” pani ʻe he laumālié mo ʻene Kulupu Pulé.
10. Ko e hā ʻoku totonu ke hoko ko ʻetau fakakaukau ia ki he kau mātuʻá, pea ko e hā hono ʻuhingá?
10 Ko e toe fakahāhā ʻe taha ʻo e tuʻunga taki ʻo Kalaisí ko e “ngaahi meʻaʻofa ʻi he kau tangata”—ko e kau mātuʻá, pe kau ʻovasia Kalisitiané. Kuo foaki kinautolu “mo ha fakakaukau ki hono fakatonutonu ʻo e faʻahinga māʻoniʻoní, ki he ngāue fakafaifekaú, ki hono langa hake ʻo e sino ʻo Kalaisí. (Efeso 4:8, 11, 12, NW) ʻI he fekauʻaki mo kinautolú, ʻoku pehē ʻe he Hepelu 13:7: “Fakamanatu hake ki he kakai naʻe takimuʻa kiate kimoutolu, ʻa e faʻahinga naʻe tala kiate kimoutolu ʻa e folofola ʻa e ʻOtua: pea mou fakatokangaʻi ʻa e ikuʻanga o ʻenau moʻui, ʻo faʻifaʻitaki ki heʻenau tui.” Ko e kau mātuʻá ʻoku nau takimuʻa ʻi he fakatahaʻangá. Koeʻuhi ʻoku nau faʻifaʻitaki kia Kalaisi Sīsū, ʻoku hoko ai ʻenau tuí ʻo taau ke faʻifaʻitaki ki ai. (1 Kolinito 11:1) ʻE lava ke tau fakahaaʻi ʻetau houngaʻia ki he fokotuʻutuʻu fakaemātuʻá ʻaki ʻa e talangofua mo anganofo ki he “ngaahi meʻaʻofa ʻi he kau tangata” ko ení.—Hepelu 13:17.
11. ʻI he ngaahi founga fē ʻoku tataki ai ʻe Kalaisi ʻa hono kau muimuí he ʻaho ní, pea ko e hā ʻoku kau ki he ʻaʻeva ʻo hangē ko ʻene ʻaʻevá?
11 ʻIo, ʻoku tataki ʻe Sīsū Kalaisi ʻa hono kau muimuí he ʻahó ni fakafou ʻi he laumālie māʻoniʻoní, ko e “tamaioeiki agatonu mo boto,” mo e kau mātuʻa ʻo e fakatahaʻangá. Ko ʻetau ʻaʻeva ʻo hangē ko e ʻaʻeva ʻa Kalaisí ʻoku kau ki ai ʻa hono mahinoʻi ʻa ʻene founga takimuʻá pea fakamoʻulaloa ki ai. ʻOku toe fiemaʻu ke tau faʻifaʻitaki ki he anga ʻo ʻene ʻaʻevá. “Ko e meʻa ia naʻe ui kimoutolu ki ai,” ko e tohi ia ʻa e ʻapositolo ko Pitá, “he naʻe kataki mamahi ʻa Kalaisi foki koeʻuhi ko kimoutolu, ʻo ne tuku ha faʻifaʻitakiʻanga kiate kimoutolu, ke mou muimui ofi, ʻo topuvaʻe taha mo ia.” (1 Pita 2:21) ʻI he founga fē ʻoku totonu ke kaunga ai kiate kitautolu ʻa e muimui ki he faʻifaʻitakiʻanga haohaoa ʻa Sīsuú?
Fakaʻatuʻi ʻi Hono Ngāueʻi ʻa e Mafaí
12. Ko e hā ʻa e tafaʻaki ʻo e faʻifaʻitakiʻanga ʻa Kalaisí ʻoku mahuʻinga tefito ki he kau mātuʻa ʻi he fakatahaʻangá?
12 Neongo naʻe maʻu ʻe Sīsū ʻa e mafai taʻehanotatau mei heʻene Tamaí, naʻá ne fakaʻatuʻi ʻi he founga naʻá ne ngāueʻaki ai iá. Ko e faʻahinga kotoa ʻi he fakatahaʻangá—tautefito ki he kau ʻovasiá—ʻoku totonu ke nau tuku ‘ke ʻilo ʻe he kakai kotoa pē ʻenau anga-fakaʻatuʻí.’ (Filipai 4:5, NW; 1 Timote 3:2, 3) Koeʻuhi ʻoku maʻu ʻe he kau mātuʻá ha tuʻunga ʻo e mafai ʻi he fakatahaʻangá, ʻoku fiemaʻu ke nau muimui ʻi he topuvaʻe ʻo Kalaisí ʻi hono ngāueʻi iá.
13, 14. ʻI he founga fē ʻe lava ke faʻifaʻitaki ai ʻa e kau mātuʻá kia Kalaisi ʻi heʻenau fakalototoʻaʻi ʻa e niʻihi kehé ke tauhi ki he ʻOtuá?
13 Naʻe fakaʻatuʻi ʻe Sīsū ʻa e ngaahi ngataʻanga ʻo ʻene kau ākongá. Naʻe ʻikai te ne kounaʻi meiate kinautolu ha meʻa lahi ange ʻi he meʻa naʻe lava ke nau foakí. (Sione 16:12) ʻI he ʻikai tenge kinautolú, naʻe fakalototoʻaʻi ʻe Sīsū ʻa hono kau muimuí ke nau “tōtōivi” ʻi hono fai ʻa e finangalo ʻo e ʻOtuá. (Luke 13:24) Naʻá ne fai eni ʻaki ʻene takimuʻá pea ʻi heʻene ueʻi honau lotó. ʻI he founga meimei tatau, ko e kau mātuʻa Kalisitiane he ʻaho ní ʻoku ʻikai te nau fakailifiaʻi ʻa e niʻihi kehé ke nau tauhi ki he ʻOtuá ʻi ha ongoʻi mā pe halaia. ʻI hono kehé, ʻoku nau fakalototoʻaʻi kinautolu ke tauhi kia Sihova ʻi he ʻofa kiate ia pea kia Sīsū, pea pehē foki ki honau kaungā faʻahinga ʻo e tangatá.—Mātiu 22:37-39.
14 Naʻe ʻikai ngāuekoviʻaki ʻe Sīsū ʻa e mafai kuo tuku kiate iá ʻaki hono puleʻi ʻa e moʻui ʻa e kakaí. Naʻe ʻikai te ne fokotuʻu ha ngaahi tuʻunga ʻoku taʻealamaaʻusia pe fokotuʻu ha ngaahi tuʻutuʻuni lahi fau. Ko ʻene foungá ko hono ueʻi ʻa e niʻihi kehé ʻaki ʻa e aʻu ki honau lotó mo e ngaahi tefitoʻi moʻoni ʻi mui ʻi he ngaahi lao naʻe ʻomai fakafou ʻia Mōsesé. (Mātiu 5:27, 28) ʻI he faʻifaʻitaki kia Sīsū Kalaisí, ʻoku fakaʻehiʻehi ai ʻa e kau mātuʻá mei hano fai ʻa e ngaahi tuʻutuʻuni fakaaoao, pe vilitaki ʻi heʻenau ngaahi fakakaukau fakafoʻituituí. ʻI he ngaahi meʻa fekauʻaki mo e valá mo e teuteú pe vaʻingá mo e fakafiefiá, ʻoku feinga ʻa e kau mātuʻá ke aʻu ki he ngaahi lotó ʻi hono ngāueʻaki ʻa e ngaahi tefitoʻi moʻoni fakaʻotuá, hangē ko ia ʻoku fakahaaʻi ʻi he Maika 6:8; 1 Kolinito 10:31-33; mo e 1 Timote 2:9, 10.
Kaungāongoʻi mo Fakamolemole
15. Naʻe anga-fēfē ʻa e tali ʻa Sīsū ki he ngaahi taʻemalava ʻa ʻene kau ākongá?
15 Naʻe tuku mai ʻe Kalaisi ha faʻifaʻitakiʻanga kiate kitautolu ke muimui ki ai ʻi he founga ʻo ʻene tōʻongafai ki he ngaahi taʻemalava mo e fehālaaki ʻa ʻene kau ākongá. Fakakaukau ki he ongo meʻa ʻe ua naʻe hoko ʻi hono pō fakaʻosi ʻi māmani ʻi he tuʻunga ko ha tangatá. Hili ʻa e aʻu ʻa Sīsū ki Ketisemaní, naʻá ne “ʻalu mo ia ʻa Pita mo Semisi mo Sione” pea naʻá ne tala ange ke nau “leʻo.” Pea naʻá ne “ʻunuʻunu siʻi atu, ʻo ne toutou mapeʻe ki he kelekele, ʻo lotu.” ʻI heʻene foki maí, naʻá ne “ʻilo ʻa kinautolu ʻoku nau mohe.” Naʻe anga-fēfē ʻa e tali ʻa Sīsuú? Naʻá ne pehē: “ʻOku loto pē ʻa laumālie ke fai, ka ʻoku vaivai ʻa kakano.” (Maake 14:32-38) ʻI he ʻikai valokiʻi fefeka ʻa Pita, Sēmisi mo Sioné, naʻá ne fakahāhā ʻa e kaungāongoʻi! ʻI he pō tatau, naʻe fakafisingaʻi tuʻo tolu ai ʻe Pita ʻa Sīsū. (Maake 14:66-72) Naʻe anga-fēfē ʻa e tōʻongafai ʻa Sīsū kia Pita ʻi he hili iá? “Kuo toetuʻu moʻoni ʻa e ʻEiki, pea kuo ha kia Saimone [Pita].” (Luke 24:34) “Naʻa ne ha kia Kifasi,” ko e lau ia ʻa e Tohi Tapú, “pea hili ia ki he kau Hongofulumaua.” (1 Kolinito 15:5) ʻI he ʻikai ongoʻi ʻitá, naʻe fakamolemoleʻi ʻe Sīsū ʻa e ʻapositolo fakatomalá pea fakaivimālohiʻi ia. Ki mui ai, naʻe ʻoange ʻe Sīsū kia Pita ʻa e ngaahi fatongia lahi.—Ngāue 2:14; 8:14-17; 10:44, 45.
16. ʻE lava fēfē ke tau ʻaʻeva ʻo hangē ko e ʻaʻeva ʻa Sīsuú ʻi he taimi ʻoku fakalotomamahi pe faihala mai ai ʻi ha founga ʻa hotau ngaahi kaungātuí kiate kitautolú?
16 ʻI he taimi ʻoku fakalotomamahi pe faihala mai ai ʻi ha founga hotau ngaahi kaungātuí, koeʻuhi ko e taʻehaohaoa fakaetangatá, ʻikai ʻoku totonu ke tau toe kaungāongoʻi mo fakamolemole foki ʻo hangē ko Sīsuú? Naʻe ekinaki ʻa Pita ki hono ngaahi kaungātuí: “Ke mou uouanga taha, ke mou tauʻaki kaungāmamahi, ke mou feʻofaʻaki fakalotu, ke mou manavaʻofa, ke mou angavaivai: ʻo ʻoua te mou totongi ʻa e kovi ʻaki ʻa e kovi, pe ko e leakovi ʻaki ʻa e leakovi, kaekehe mou tapuakiʻi.” (1 Pita 3:8, 9) Fēfē kapau ʻoku ʻikai lava ha tokotaha ʻe taha ke tōʻongafai kiate kitautolu ʻo hangē ko ia naʻe fai ʻe Sīsuú, ʻo ne fakafisi ke kaungāongoʻi pe fakamolemole? Naʻa mo ia ʻoku tau ʻi he malumalu ʻo e fatongia ko e feinga ke faʻifaʻitaki kia Sīsū pea tali ʻo hangē ko ia naʻá ne mei faí.—1 Sione 3:16.
Fakamuʻomuʻa ʻa e Ngaahi Meʻa ʻo e Puleʻangá
17. Ko e hā ʻokú ne fakahaaʻi naʻe fakamuʻomuʻa ʻe Sīsū ʻi heʻene moʻuí ʻa hono fai ʻa e finangalo ʻo e ʻOtuá?
17 ʻOku toe ʻi ai ha founga ʻe taha ʻoku fiemaʻu ai ke tau ʻaʻeva ʻo hangē ko e ʻaʻeva ʻa Sīsū Kalaisí. Ko hono talaki ʻa e ongoongo lelei ʻo e Puleʻanga ʻo e ʻOtuá naʻe ʻi he tuʻunga tefito ʻi he moʻui ʻa Sīsuú. Hili ʻa e malanga ki he fefine Samēliá ofi ki he kolo ko Saika ʻi Samēliá, naʻe tala ange ʻe Sīsū ki heʻene kau ākongá: “Ko ʻeku meʻakai e, ko e tuli ke fai ʻa e finangalo ʻo ia naʻa ne fekau mai au, pea ke fakaʻosi haʻána ngaue.” (Sione 4:34) Ko hono fai ʻa e finangalo ʻa ʻene Tamaí naʻá ne fakaivia ʻa Sīsuú; naʻe fakamākona, fakafiemālie, mo fakaivifoʻou ia kiate ia ʻo hangē ko e meʻakaí. ʻE iku ʻa e faʻifaʻitaki kia Sīsū ʻaki ʻa e tokangataha ai pē ki hono fai ʻa e finangalo ʻo e ʻOtuá ki ha moʻui ʻoku ʻikai mohu ʻuhinga mo fakafiemālie moʻoni?
18. Ko e hā ʻa e ngaahi tāpuaki kuo hoko mei hono fakalototoʻaʻi ʻa e fānaú ke nau fai ʻa e ngāue taimi-kakató?
18 ʻI he taimi ʻoku fakalototoʻaʻi ai ʻe he ngaahi mātuʻá ʻenau fānaú ke nau fai ʻa e ngāue taimi-kakató, ko kinautolu pea pehē foki ki heʻenau fānaú ʻoku nau maʻu ʻa e ngaahi tāpuaki lahi. Ko ha tamai ʻa ha ongo foha māhanga naʻá ne fokotuʻu kiate kinaua ʻa e ngāue tāimuʻá ko ha taumuʻa ia mei heʻena kei īkí. ʻI he ʻosi ʻena ako fakaemāmaní, naʻe hoko ai ʻa e ongo māhangá ko ha ongo tāimuʻa. ʻI he fakakaukauloto atu ki he ngaahi fiefia kuó ne hokosia tupu mei aí, ʻoku tohi ʻa e tamai ko ení ʻo pehē: “Kuo ʻikai fakalotomamahiʻi kimaua ʻe heʻema ongo tamaiki tangatá. ʻI he houngaʻiá ʻoku lava ke ma pehē, ‘koe fānau koe tofia mei a Jihova.’” (Sāme 127:3, PM) Pea ʻoku anga-fēfē ʻa e maʻu ʻaonga ʻa e fānaú mei he tuli ki he ngāue taimi-kakató? ʻOku pehē ʻe he faʻē ʻa e toko nima: “Kuo tokoniʻi ʻe he ngāue tāimuʻá ʻeku fānaú kotoa ke nau fakatupulekina ha vahaʻangatae mātuʻaki vāofi ange mo Sihova, kuó ne fakaleleiʻi ʻenau tōʻonga ako fakafoʻituituí, pea kuo tokoniʻi ai kinautolu ke nau ako ke fakamuʻomuʻa ʻa e ngaahi meʻa fakalaumālié ʻi heʻenau moʻuí. Neongo ko kinautolú kotoa naʻe pau ke nau fai ha ngaahi feʻunuʻaki lahi, ʻoku halaʻatā ha taha ʻiate kinautolu ʻe fakaʻiseʻisa ʻi he hala kuo nau fili ke fou aí.”
19. Ko e hā ʻa e ngaahi palani ki he kahaʻú ʻoku totonu ke fakakaukau fakapotopoto ki ai ʻa e toʻutupú?
19 Toʻutupu, ko e hā hoʻomou ngaahi palani ki he kahaʻú? ʻOku mou feinga ke māʻolunga ʻi ha malaʻe fakapalōfesinale? Pe ʻoku mou feinga ke ngāue ʻi he ngāue taimi-kakató? “Mou hanganaki tokanga lahi ki he anga hoʻomou ʻaʻevá ke ʻoua te mou taʻefakapotopoto ai ka ke mou hoko ko e faʻahinga ʻoku fakapotopoto,” ko e naʻinaʻi ia ʻa Paulá, “ʻo fakatau mai ʻa e taimi faingamālié maʻa moutolu, koeʻuhi ʻoku kovi ʻa e ngaahi ʻahó.” ʻOkú ne tānaki mai: “ʻI he meʻá ni ʻoua te mou hoko ʻo taʻefaituʻunga, kae hokohoko atu ʻi hono ʻiloʻi ʻa e finangalo ʻo Sihová.”—Efeso 5:15-17, NW.
Hoko ʻo Mateaki
20, 21. ʻI he founga fē naʻe mateaki ai ʻa Sīsuú, pea ʻe lava fēfē ke tau faʻifaʻitaki ki heʻene mateakí?
20 Ko e ʻaʻeva ʻo hangē ko e ʻaʻeva ʻa Sīsuú ʻoku fiemaʻu ki ai ʻa e faʻifaʻitaki ki heʻene mateakí. ʻI he fekauʻaki mo e mateaki ʻa Sīsuú, ʻoku pehē ʻe he Tohi Tapú: “I he ene i he tatau moe Otua, nae ikai behe eia ko ha faaoa ke na taha moe Otua: Ka naa ne fakamajivejivai eia ia o ne too kiate ia ae tatau moe tamaioeiki, bea fanauʻi ia i he tatau oe tagata: Bea kuo ilo ia i he tatau oe tagata, naa ne fakamoulaloaʻi ia, bea talagofua ki he mate, io, ae mate i he akau.” Naʻe poupou mateaki ʻa Sīsū ki he tuʻunga-hau ʻo Sihová ʻaki ʻene fakamoʻulaloa ki he finangalo ʻo e ʻOtuá kiate iá. Naʻá ne hoko ʻo talangofua ʻo aʻu ki he faingataʻaʻia ʻi he pekia ʻi ha ʻakau fakamamahi. Kuo pau ke ‘iate kitautolu ae lotó ni’ pea fakamoʻulaloa mateaki ki hono fai ʻa e finangalo ʻo e ʻOtuá.—Filipai 2:5-8, PM.
21 Naʻe toe fakahaaʻi ʻe Sīsū ʻa e mateaki ki heʻene kau ʻapositolo faitōnungá. Neongo ʻenau ngaahi vaivaí mo e taʻehaohaoá, naʻe ʻofa ʻa Sīsū ʻiate kinautolu “o aʻu ki he gataaga.” (Sione 13:1, PM) ʻI he tuʻunga meimei tatau, ʻoku totonu ke ʻoua te tau tuku ʻa e ngaahi taʻehaohaoa ʻa hotau fanga tokouá ke ne fakatupunga ke tau maʻu ai ha fakakaukau fakaanga.
Pipiki ki he Sīpinga Naʻe Fokotuʻu ʻe Sīsuú
22, 23. Ko e hā ʻa e ngaahi ʻaonga ʻo e fai pau ki he sīpinga naʻe fokotuʻu ʻe Sīsuú?
22 Ko e moʻoni, ʻi he tuʻunga ko e faʻahinga taʻehaohaoa ʻo e tangatá, ʻoku ʻikai lava ke tau ʻaʻeva tofu pē ai ʻi he topuvaʻe ʻa hotau Faʻifaʻitakiʻanga haohaoá. Kae kehe, ʻoku lava ke tau feinga ke muimui ofi ʻi hono topuvaʻé. Ko hono fai iá ʻoku fiemaʻu ai ke tau mahinoʻi pea fakamoʻulaloa ki he founga takimuʻa ʻa Kalaisí pea fai pau ki he sīpinga naʻá ne fokotuʻú.
23 Ko e hoko ko e kau faʻifaʻitaki kia Kalaisí ʻoku taki atu ia ki he ngaahi tāpuaki lahi. ʻOku hoko ai ʻetau moʻuí ʻo mohu ʻuhinga mo fakafiemālie ange koeʻuhí ʻoku tau tokangataha ki hono fai ʻa e finangalo ʻo e ʻOtuá kae ʻikai ko hotau lotó. (Sione 5:30; 6:38) ʻOku tau maʻu ai ha konisēnisi lelei. ʻOku hoko ai ʻetau founga ʻaʻevá ʻo alafaʻifaʻitakiʻanga. Naʻe fakaafeʻi ʻe Sīsū ʻa e faʻahinga kotoa naʻe ongosia mo mafasiá ke nau haʻu kiate ia ʻo maʻu ʻa e fakaivifoʻou ʻi honau laumālié. (Mātiu 11:28-30) ʻI he taimi ʻoku tau muimui ai ʻi he faʻifaʻitakiʻanga ʻa Sīsuú, te tau lava ai mo kitautolu foki ke fakaivifoʻou ʻa e niʻihi kehé ʻi heʻetau feohí. Ko ia, tau hokohoko atu ke ʻaʻeva ʻo hangē ko e ʻaʻeva ʻa Sīsuú.
ʻOkú Ke Manatuʻi?
• ʻOku anga-fēfē hono tataki ʻe Kalaisi ʻa hono kau muimuí he ʻaho ní?
• ʻE lava fēfē ke muimui ʻa e kau mātuʻá ʻi he takimuʻa ʻa Kalaisí ʻi hono ngāueʻi honau mafai kuo ʻoange ʻe he ʻOtuá?
• ʻE lava fēfē ke tau muimui ʻi he faʻifaʻitakiʻanga ʻa Sīsuú ʻi he fekuki mo e ngaahi tōnounou ʻa e niʻihi kehé?
• ʻE lava fēfē ke fakamuʻomuʻa ʻe he toʻutupú ʻa e ngaahi meʻa ʻo e Puleʻangá?
[Fakatātā ʻi he peesi 23]
ʻOku tokoniʻi kitautolu ʻe he kau mātuʻa Kalisitiané ke tau muimui ʻi he tuʻunga taki ʻa Kalaisí
[Fakatātā ʻi he peesi 24, 25]
Toʻutupu, ko e hā ʻa e ngaahi palani ʻoku mou fai ke maʻu ai ha moʻui faka-Kalisitiane fiemālié?