ʻOku Moʻui ʻa e Folofola ʻa Sihová
Ngaahi Meʻa Mahuʻinga mei he Ngaahi Tohi ʻa Sioné mo e Tohi Siutasí
ʻOKU ngalingali naʻe tohi ʻa e ngaahi tohi ʻe tolu ʻa e ʻapositolo ko Sioné mei ʻEfesō ʻi he 98 T.S., pea ko e ngaahi tohí ni ʻoku kau ia ʻi he ngaahi tohi fakaʻosi ʻoku faʻuʻaki ʻa e Tohi Tapu fakamānavaʻí. Ko e ʻuluaki ongo tohí ʻoku fakalototoʻaʻi ai ʻa e kau Kalisitiané ke nau hanganaki ʻaʻeva ʻi he māmá pea ke fakafepakiʻi ʻa e hūhū mai ʻa e tafoki mei he moʻoní. ʻI he tohi hono tolú, ʻoku lau ai ʻa Sione ʻo ʻikai ngata pē ʻi he ʻaʻeva ʻi he moʻoní kae toe pehē foki ki hono fakaʻaiʻai ʻa e ngāue fāitaha faka-Kalisitiané.
ʻI he tohi ʻa Siutasi naʻe fai mei Pālesitaine ʻi he 65 T.S. nai, ʻoku fakatokanga mai ai ʻa e tokoua faʻē taha ko ʻeni ʻo Sīsuú ki he kau Kalisitiané ʻo fekauʻaki mo e faʻahinga fulikivanu kuo nau hūhū mai ki he fakatahaʻangá, pea ʻokú ne ʻomi mo e faleʻi ki he founga ke talitekeʻi ai ʻa e ngaahi tākiekina koví. Ko e tokanga ki he pōpoaki ʻo e tohi ʻe tolu ʻa Sioné pea mo e ʻipiseli ʻa Siutasí ʻe lava ke tokoniʻi ai kitautolu ke tau kei mālohi ai pē ʻi he tuí neongo ʻa e ngaahi fakafaingataʻaʻiaʻangá.—Hep. 4:12.
ʻAʻEVA AI PĒ ʻI HE MĀMÁ PEA ʻI HE ʻOFA MO E TUI
ʻI hono fakataumuʻa ki he kotoa ʻo e faʻahinga ʻoku fāʻūtaha mo Kalaisí, ko e ʻuluaki tohi ʻa Sioné ʻoku ʻomi ai ʻa e akonaki ʻaonga kuo faʻufaʻu ke tokoniʻiʻaki ʻa e kau Kalisitiané ke nau talitekeʻi ʻa e tafoki mei he moʻoní pea tuʻu mālohi ai pē ʻi he moʻoní mo e māʻoniʻoní. ʻOkú ne fakamamafaʻi ʻa e fiemaʻu ke ʻaʻeva ai pē ʻi he māmá pea ʻi he ʻofa mo e tui.
“Kapau ʻoku tau fou ʻi he maama, ʻo hange ko ʻene ʻafio [ʻa e ʻOtuá] ʻi he maama,” ko e tohi ia ʻe Sioné, “pea ta ʻoku tau feohi, ʻa e taha mo e taha.” Pea koeʻuhi ko e ʻOtuá ʻa e Matavai ʻo e ʻofá, ʻoku pehē ʻe he ʻapositoló: “Ke tau feʻofaʻaki muʻa.” Lolotonga ko e “ʻofa ki he ʻOtua” ʻoku ueʻi ai kitautolu ke tau “tauhi ki heʻene ngaahi tuʻutuʻuni,” ʻoku tau ikunaʻi ʻa e māmaní fakafou ʻi heʻetau “tui” kia Sihova ko e ʻOtuá, ki heʻene Folofolá pea mo hono ʻAló.—1 Sione 1:7; 4:7; 5:3, 4.
Tali ki he Ngaahi Fehuʻi Fakatohitapú:
2:2; 4:10—ʻOku anga-fēfē ʻa e hoko ʻa Sīsū ko ha feilaulau “fakatupuhōifuaʻanga”? Ke fakatupu hōifua ʻoku ʻuhingá ke “fakalolou ha ʻita,” pe ke “fakanonga.” Naʻe foaki ʻe Sīsū ʻa ʻene moʻuí ko ha feilaulau fakatupuhōifuaʻanga ʻi he ʻuhinga ko hono fai iá, ʻokú ne fakalolou ai pe fakanonga, ʻa e fiemaʻu ko ia ki ha fakamaau totonu haohaoá. Makatuʻunga ʻi he feilaulau ko iá, ʻe lava ke fakahāhā ai ʻe he ʻOtuá ʻa e mēsí, pea ʻe lava ke ne fakamolemoleʻi ai ʻa e angahala ʻo e faʻahinga ʻoku nau ngāueʻi ʻa e tui kia Sīsuú.—Sione 3:16; Loma 6:23.
2:7, 8—Ko e hā ʻa e tuʻutuʻuni naʻe lave ki ai ʻa Sione ʻoku “fuoloa” pea ʻoku toe “foʻou”? ʻOku lave ʻa Sione ʻo fekauʻaki mo e tuʻutuʻuni fekauʻaki mo e ʻofa feilaulauʻi-kita fakatokouá. (Sione 13:34) ʻOkú ne lave ki ai ʻoku “fuoloa” koeʻuhi naʻe fakahaaʻi ia ʻe Sīsū ʻi he taʻu ʻe 60 ki muʻa ʻi hono hiki ia ʻe Sione ʻi heʻene ʻuluaki tohi fakamānavaʻí. Ko ia ai, kuo maʻu ia ʻe he kau tuí talu “mei he kamataʻanga” ʻo ʻenau moʻui ko e kau Kalisitiané. ʻOku toe “foʻou” ʻa e tuʻutuʻuní koeʻuhi ʻoku mahulu atu ia ʻi he ‘ʻofa ki he kaungaʻapí ʻo hange ko ʻete ʻofa kiate kitá,’ he ʻoku fiemaʻu ki ai ʻa e ʻofa feilaulauʻi-kitá.—Liv. 19:18; Sione 15:12, 13.
3:2 (PM)—Ko e hā ʻa e meʻa kuo “teeki ai ha mai” ki he kau Kalisitiane paní, pea ko hai te nau “mamata totonu” ki aí? Ko e meʻa kuo teʻeki ai ke hā kiate kinautolú ko e tuʻunga te nau hoko ki ai ʻi he taimi ʻe fokotuʻu hake ai kinautolu ki hēvani ʻi ha ngaahi sino fakalaumālié. (Fili. 3:20, 21) Kae kehe, ko e meʻa ʻoku nau ʻiloʻí “oka ha mai [ʻa e ʻOtuá], te [nau] tatau be mo ia; he te [nau] mamata totonu kiate ia,” ʻa ia ko ʻenau mamata kiate ia ʻi hono tuʻunga ko e “Laumalie.”—2 Kol. 3:17, 18.
5:5-8—ʻOku anga-fēfē ʻa e fakamoʻoni ʻa e vaí, taʻataʻá mo e laumālié ki he moʻoni ko ia ko “Sisu ko e ʻAlo [ia] ʻo e ʻOtua”? Naʻe fakamoʻoni ʻa e vaí koeʻuhi ʻi he taimi naʻe papitaiso ai ʻa Sīsū ʻi he vaí, naʻe fakahāhā ai ʻe Sihova tonu ʻa ʻEne hōifua kiate ia ʻi hono tuʻunga ko Hono ʻAló. (Mt. 3:17) Ko e taʻataʻa pe moʻui ʻa Sīsuú, ʻa ia kuo ʻomi ko ha “fetongi huhuʻi ʻo e kakai kotoa pe,” naʻe toe hā ai ko Sīsū ko e ʻAlo ia ʻo e ʻOtuá. (1 Tim. 2:5, 6) Pea naʻe fakamoʻoni ʻa e laumālie māʻoniʻoní ko Sīsū ko e ʻAlo ia ʻo e ʻOtuá ʻi he taimi naʻe ʻalu hifo ai kiate ia ʻi heʻene papitaisó, ʻo fakamafeia ai ke “ʻalu atu ia mo ngaue ʻaonga, mo ne faitoʻo ʻa kinautolu ʻoku fakapopulaʻi ʻe he Tevolo.”—Sione 1:29-34; Ng. 10:38.
Ngaahi Lēsoni kia Kitautolu:
2:9-11; 3:15. Kapau ʻoku fakaʻatā ʻe ha Kalisitiane ha meʻa pe ko ha tokotaha ke ne maumauʻi ʻa ʻene ʻofa fakatokouá, ʻokú ne ʻaʻeva leva ai ʻi he fakapoʻuli fakalaumālie, ʻo ʻikai haʻane ʻilo pe ko ʻene ʻalú ki fē.
HANGANAKI “LAKA ʻI HE MOʻONI”
ʻOku kamataʻaki ʻe Sione ʻene tohi hono uá ʻi heʻene pehē: “Tū ko au ko e Faifekau, ko ʻeku tohi ki siʻi fefine fili . . . pea mo ʻene fanau.” ʻOkú ne fakahāhā ʻa e fiefia ʻi heʻene ʻiloʻi ʻa e “niʻihi ʻi [heʻene] fanau ʻoku nau laka ʻi he moʻoni.”—2 Sione 1, 4.
Hili hono ʻoange ʻa e fakalototoʻa ke fakatupulekina ʻa e ʻofá, ʻoku tohi ʻa Sione: “Koe ofa eni, koeuhi ke tau aeva i he ene gaahi fekau.” ʻOku toe fakatokanga ʻa Sione fekauʻaki mo e faʻahinga “kākā . . . moe fili o Kalaisi.”—2 Sione 5-7, PM.
Tali ki he Ngaahi Fehuʻi Fakatohitapú:
1, 13—Ko hai ʻa e “fefine fili”? ʻOku lava pē ke pehē ko e tohi ʻa Sioné ki ha fefine ʻe toko taha ʻo lave ki ai ko Kulia, ʻa ia ko e faka-Kalisi ia ki he “fefiné.” Pe ko haʻane ngāueʻaki fakaefakatātā pē nai ke ne tohi ai ki ha fakatahaʻanga pau koeʻuhí ke ʻoua ʻe ʻiloʻi ʻe he kau fakatangá. Kapau ko e tuʻungá ia, ko ʻene fānaú ko e ʻuhinga ia ki he ngaahi mēmipa ʻo e fakatahaʻanga ko iá pea ko e “fanau ʻa siʻi fefine . . . ko [hono] tokoua” ko e ʻuhinga ia ki he ngaahi mēmipa ʻo ha fakatahaʻanga ʻe taha.
7 (PM)—Ko e hā ʻa e “haʻu” ʻa Sīsū ʻoku lave ki ai heni ʻa Sioné, pea ʻoku anga-fēfē ʻa e ʻikai ke “fakaha” ia ʻe he kau kākaá? Ko e “haʻu” ʻoku ʻikai ko e haʻu taʻehāmai ia ʻa Sīsū ʻi he kahaʻú. Ka ko ʻene haʻu ia ʻi he kakanó pea mo hono pani ia ko e Kalaisí. (1 Sione 4:2) ʻOku ʻikai ke tui ʻa e kau kākaá ki he haʻu ko ʻeni ʻi he kakanó. Mahalo pē ʻoku nau fakaʻikaiʻi ʻo pehē naʻe ʻikai moʻui ʻa Sīsū pe ko ʻenau fakafisingaʻi ʻo pehē naʻe ʻikai ke pani ia ʻaki ʻa e laumālie māʻoniʻoní.
Ngaahi Lēsoni kia Kitautolu:
2, 4. Ko ʻetau hoko ʻo ʻiloʻi ʻa e “moʻoni”—ʻa ia ko e kotoa ia ʻo e ngaahi akonaki faka-Kalisitiane kuo hoko ko e konga ʻo e Tohi Tapú—pea pipiki ki aí ʻoku fiemaʻu tefito ia ki hotau fakamoʻuí.—3 Sione 3, 4.
8-11. Kapau ʻoku ʻikai ke tau loto ke mole meiate kitautolu ʻa e “kelesi mo e meesi mo e melino, mei he ʻOtua ko e Tamai, pea meia Sisu Kalaisi,” pea pehē foki ki he feohiʻanga ʻofa ʻo e kaungātuí, ʻoku totonu ke tau “tokanga” fakalaumālie kiate kitautolu pea talitekeʻi ʻa e faʻahinga ʻoku “ʻikai te [nau] nofo maʻu ʻi he tokateline ʻa Kalaisi.”—2 Sione 3.
HOKO KO E “KAUNGĀNGAUE MO KINAUTOLU KI HE MOʻONI”
Ko e tohi hono tolu ʻa Sioné ko e fai ia ki hono kaungāmeʻa ofi ko Keió. “ʻOku ʻikai haʻaku toe fiefia ʻoku lahi ʻi he meʻa ni,” ko ʻene tohí ia, “ʻa ʻeku fanongo ki heʻeku fanau, ʻoku nau laka ʻi he moʻoni.”—3 Sione 4.
ʻOku fakaongoongoleleiʻi ʻe Sione ʻa Keio ʻi heʻene “ngaue ngali lotu” ʻo tokoniʻi ʻa e fanga tokoua ʻoku ʻaʻahi atú. “ʻOku totonu ke tau tauhi ʻe kitautolu ʻa e faʻahinga pehe,” ko e lau ia ʻa e ʻapositoló, “koeʻuhi ke tau hoko ko e kaungāngaue mo kinautolu ki he moʻoni.”—3 Sione 5-8.
Tali ki he Ngaahi Fehuʻi Fakatohitapú:
11—Ko e hā ʻoku fai ai ʻe he niʻihi ʻa e tōʻonga koví? ʻI he ʻikai lelei ʻa e tuʻunga fakalaumālié, ʻoku ʻikai ke vakai ai ʻa e niʻihi ki he ʻOtuá ʻaki ʻa e mata ʻo e mahinó. Koeʻuhi ko e ʻikai lava ke nau sio kiate ia ʻaki honau mata fakaekakanó, ʻoku nau tōʻonga ai ʻo hangē ʻoku ʻikai ke ne ʻafio mai kiate kinautolú.—Isi. 9:9.
Ngaahi Lēsoni kia Kitautolu:
4. Ko e faʻahinga matuʻotuʻa fakalaumālie ʻi he fakatahaʻangá ʻoku nau maʻu ʻa e fiefia lahi ʻi heʻenau sio ki he kau mēmipa kei siʻi angé ʻoku nau “laka ʻi he moʻoni.” Pea ko e fiefia taʻefakatataua ē ʻoku aʻusia ʻe he ngaahi mātuʻá ʻi heʻenau lavameʻa ʻi hono tokoniʻi ʻenau fānaú ke nau hoko ko e fānau ʻoku nau hehema ki he ngaahi meʻa fakalaumālié!
5-8. ʻOku kau ʻi he faʻahinga ʻoku nau ngāue mālohi maʻa honau fanga tokouá ʻi heʻenau ʻofa kiate kinautolu pea mo Sihová ʻa e kau ʻovasia fefonongaʻaki, kau misinale, faʻahinga ʻoku nau ngāue ʻi he ngaahi ʻapi Pētelí pe ngaahi ʻōfisi vaʻá, pea mo e faʻahinga ʻi he ngāue tāimuʻá. Ko ʻenau tuí ʻoku tuha ke faʻifaʻitaki ki ai, pea ʻoku nau tuha mo ʻetau poupou anga-ʻofá.
9-12. ʻOku totonu ke tau faʻifaʻitaki ki he faʻifaʻitakiʻanga ʻa e faitōnunga ko Temetelió kae ʻikai ko e ngutu faʻa lea ko Taiotifí, ʻa ia naʻá ne hoko ko ha tokotaha lauʻikovi loi.
‘TAUHI KIMOUTOLU ʻI HE ʻOFA ʻA E ʻOTUÁ’
ʻOku fakamatalaʻi ʻe Siutasi ʻa e faʻahinga kuo nau hūhū mai ki he fakatahaʻangá ko e kakai “koto lāunga, ko e taʻetoliʻa ʻi honau tufakanga kuo to, ʻoku nau fou ʻi he ngaahi holi ʻanautolu.” ʻOku “lau meʻa lalahi honau ngutu, ʻo nau filifilimanako.”—Siutasi 4, 16.
ʻE lava fēfē ke talitekeʻi ʻe he kau Kalisitiané ʻa e ngaahi tākiekina koví? “Ko kimoutolu, siʻi ʻofaʻanga,” ko e tohi ia ʻe Siutasí, “ke mou manatu ki he ngaahi lea naʻe leaʻaki ʻi muʻa ʻe he kau Aposetolo ʻa hotau ʻEiki ko Sisu Kalaisi.” ʻOkú ne tānaki mai: “Tauhi . . . kimoutolu ʻi he ʻofa ʻa e ʻOtua.”—Siutasi 17:-21.
Tali ki he Ngaahi Fehuʻi Fakatohitapú:
3, 4 (PM)—Ko e hā naʻe ekinaki ai ʻa Siutasi ki he kau Kalisitiané ke nau “fekuki fakamatoato [pe faitau mālohi] koeuhi koe tui”? Koeʻuhí kuo hūhū mai ki he fakatahaʻangá ha “kau tagata taelotu.” Ko e kau tangatá ni naʻa nau ‘liliu ae ofa a e Otuá’ ko ha kalofanga ia ‘ki he agahalá.’
20, 21—ʻE lava fēfē ke tau ‘tauhi kitautolu ʻi he ʻofa ʻa e ʻOtuá’? ʻE lava ke tau fai ʻeni ʻi he ngaahi founga ʻe tolu: (1) ʻaki hono langa hake kitautolu ʻi heʻetau ‘tui toputapú’ ʻo fakafou ʻi he ako tōtōivi ʻa e Folofola ʻa e ʻOtuá pea kau faivelenga ʻi he ngāue fakamalangá; (2) ʻaki ʻa e lotu “ʻi he Laumalie Maʻoniʻoni,” pe lotu ʻo fehoanaki mo ʻene tākiekiná; pea ko e (3) ʻaki hono ngāueʻi ʻa e tui ki he meʻa ʻokú ne ʻai ke malava ʻo hoko ʻa e moʻui taʻengatá—ʻa ia ko e feilaulau huhuʻi ʻa Sīsū Kalaisí.—Sione 3:16, 36.
Ngaahi Lēsoni kia Kitautolu:
5-7. ʻE malava nai ke hao ʻa e kau fulikivanú mei he fakamaau ʻa Sihová? Fakatatau ki he ngaahi fakatātā fakaefakatokanga ʻe tolu naʻe hiki fakahokohoko ʻe Siutasí, ʻe ʻikai malava ia.
8-10. ʻOku totonu ke tau muimui ki he faʻifaʻitakiʻanga ʻa Maikeli ko e ʻāngelo-pulé pea fakahāhā ʻa e fakaʻapaʻapa ki he ngaahi tuʻunga mafai kuo fokotuʻu fakaʻotuá.
12. Ko e kau tafoki mei he moʻoní ʻa ia ʻoku nau fakangalingali mai ʻaki ʻa e ʻofá ʻoku nau fakatuʻutāmaki ki heʻetau tuí ʻo hangē pē ko e fakatuʻutāmaki ʻa e ngaahi hakau pulipulia ʻi he tahí ki he ngaahi vaká pe ko kinautolu ko ia ʻoku kakaú. ʻOku hā mai nai ʻoku loto-fiefoaki ʻa e kau faiako loí, ka ʻoku nau hangē ha ngaahi ʻao taʻeʻiai ha vaí he ʻoku nau halaʻatā fakalaumālie. Ko e faʻahinga ko iá ʻoku nau taʻefua ʻo hangē pē ko e ngaahi ʻakau ʻoku mate ʻi he konga ki mui ʻo e taimi fakatōlaú. ʻOku nau hanga atu ki he fakaʻauha, ʻo hangē ha ngaahi ʻakau kuo taʻakifuʻú. He fakapotopoto ē ke tau talitekeʻi ʻa e kau tafoki mei he moʻoní.
22, 23. ʻOku fehiʻa ʻa e kau Kalisitiane moʻoní ʻi he koví. ʻI he feinga ke fakahaofi ʻa e faʻahinga ʻoku “fakakikihi mai” mei he afi ko e fakaʻauha taʻengatá, ko e faʻahinga matuʻotuʻa ʻi he fakatahaʻangá—tautautefito ki he kau ʻovasia kuo fakanofó—ʻoku nau ʻoatu ʻa e tokoni fakalaumālie kiate kinautolu.
[Fakatātā ʻi he peesi 28]
Naʻe fakamoʻoni ʻa e vaí, laumālié mo e taʻataʻá ko ‘Sisu ko e ʻAlo ia ʻo e ʻOtuá’