“ʻOfa . . . ʻi he Ngāue mo e Moʻoni”

 1. Ko e hā ʻa e tuʻunga māʻolunga taha ʻo e ʻofá, pea ʻe fēfē haʻo fakamatalaʻi ia? (Sio ki he ʻuluaki fakatātā ʻi he kupú ni.)

KO SIHOVA ʻa e Matavai ʻo e ʻofá. (1 Sio. 4:7) Ko e tuʻunga māʻolunga taha ʻo e ʻofá ʻoku makatuʻunga ia ʻi he ngaahi tefitoʻi moʻoni totonu. ʻI he Tohi Tapú, ko e faʻahinga ʻofa ko ení ʻoku fakamatalaʻi ia ʻaki ʻa e foʻi lea faka-Kalisi ko e a·gaʹpe. Ko e ʻofa ko ení ʻoku lava ke kau ai ʻa e ongoʻi māfana ki ha taha, ka ʻoku kau ki ai ʻa e meʻa lahi ange ia ʻi he ongoʻí pē. ʻOku fakahaaʻi ia ʻaki ʻa e ngaahi ngāue taʻesiokita maʻá e lelei ʻa e niʻihi kehé. Ko e ʻofa ia ʻokú ne ueʻi kitautolu ke tau fai ʻa e ngaahi meʻa lelei maʻá e niʻihi kehé. Ko e faʻahinga ʻofa ko ení ʻokú ne ʻomi kiate kitautolu ʻa e fiefia mo e taumuʻa ʻi he moʻuí.

2, 3. Kuo anga-fēfē hono fakahāhā ʻe Sihova ʻa e ʻofa taʻesiokita ki he faʻahinga ʻo e tangatá?

² Naʻe fakahāhā ʻe Sihova ʻa e ʻofa ki he faʻahinga ʻo e tangatá naʻa mo e ki muʻa ke ne fakatupu ʻa ʻĀtama mo ʻIví. Naʻá ne ngaohi ʻa e māmaní ke ʻi ai ʻa e meʻa kotoa te tau fiemaʻu ki he moʻuí. ʻIkai ko ia pē, naʻá ne ngaohi ia ko ha ʻapi ʻa ia ʻe lava ke tau fiefia moʻoni ai ʻi he moʻuí. Naʻe ʻikai ke fai eni ia ʻe Sihová maʻana. Naʻá ne fai iá maʻatautolu. ʻI he maau pē hotau ʻapí, naʻá ne fakatupu ʻa e faʻahinga ʻo e tangatá pea ʻoange kiate kinautolu ʻa e ʻamanaki ko e moʻui taʻengata ʻi ha māmani palataisi.

³ Ki mui ai, naʻe fakahāhā ʻe Sihova ʻene ʻofa taʻesiokita ki he faʻahinga ʻo e tangatá ʻi he founga lahi taha naʻe ala lavá. Neongo naʻe angatuʻu ʻa ʻĀtama mo ʻIvi, naʻe mātuʻaki fakapapauʻi ʻe Sihova ʻe ʻofa kiate ia ʻa e niʻihi ʻo hona hakó ʻo ne fokotuʻutuʻu ai ʻa e feilaulau huhuʻi ʻa hono ʻAló ke fakahaofi kinautolu. (Sēn. 3:15; 1 Sio. 4:10) Mei he mōmeniti pē naʻe talaʻofa ai ʻe Sihova ʻa e huhuʻí, ne hangē ia kuo ʻosi fai ʻa e feilaulaú. ʻI he taʻu leva ʻe 4,000 ki mui ai, naʻe foaki mai ʻe Sihova ʻa hono ʻAlo tofu-pē-taha-ne-fakatupú koeʻuhi ko e faʻahinga ʻo e tangatá. (Sione 3:16) ʻOku tau houngaʻia lahi ʻi he ʻofa ʻa Sihová!

 4. ʻOku anga-fēfē ʻetau ʻiloʻi ʻe lava ʻe he faʻahinga taʻehaohaoa ʻo e tangatá ʻo fakahāhā ʻa e ʻofa taʻesiokitá?

⁴ ʻE lava ke tau fakahāhā ʻa e ʻofa taʻesiokitá, neongo ʻetau taʻehaohaoá? ʻIo, te tau lava. Naʻe fakatupu kitautolu ʻe Sihova ʻi hono ʻīmisí, ʻa ia, fakataha mo e malava ke faʻifaʻitaki kiate ia. ʻOku ʻikai faingofua maʻu pē kiate kitautolu ke fakahāhā ʻa e ʻofa taʻesiokitá, ka ʻe malava. Naʻe fakahāhā ʻe ʻĒpeli ʻa e ʻofa ki he ʻOtuá ʻi heʻene foaki taʻesiokita ʻa e lelei taha ʻo e meʻa naʻá ne maʻú. (Sēn. 4:3, 4) Naʻe fakahāhā ʻe Noa ʻa e ʻofa taʻesiokita ʻi he hokohoko atu ʻene malangaʻi ʻa e pōpoaki ʻa e ʻOtuá ʻi he ngaahi taʻu lahi neongo naʻe ʻikai ke fanongo ʻa e kakaí. (2 Pita 2:5) Pea naʻe fakahāhā ʻe ʻĒpalahame naʻe mālohi ange ʻa ʻene ʻofa ki he ʻOtuá ʻi ha toe meʻa pē ʻaki ʻene loto-lelei ke feilaulauʻi ʻa hono foha ʻofeina ko ʻAisaké. (Sēm. 2:21) ʻI he hangē ko e kau tangata faitōnunga ko iá, ʻoku fiemaʻu foki ke tau fakahāhā ʻa e ʻofá naʻa mo e taimi ʻoku ʻikai ai ke faingofuá.

 5. ʻI he ngaahi founga fē ʻe lava ke tau fakahāhā ai ʻa e ʻofa moʻoní?

⁵ ʻOku tala mai ʻe he Tohi Tapú ke tau fakahāhā ʻa e ʻofa moʻoní “ʻo ʻikai ʻi he lea pē, pe ʻaki ʻa e ʻeleló pē, ka ʻi he ngāue mo e moʻoni.” (1 Sio. 3:18) ʻOku ʻuhinga ení heʻikai lava ke tau fakahāhā ʻa e ʻofá ʻi he meʻa ʻoku tau leaʻakí? ʻIkai. (1 Tes. 4:18) ʻOku ʻuhinga iá ʻoku ʻikai feʻunga maʻu pē ke pehē “ʻOku ou ʻofa ʻiate koe.” ʻOku fiemaʻu ke tau fakahāhā ʻoku tau ʻuhingaʻi ia. Ko e fakatātaá, kapau ʻoku ʻikai maʻu ʻe hotau fanga tokouá mo e fanga tuofāfiné ha meʻakai pe vala feʻunga, ʻoku nau fiemaʻu ʻa e meʻa lahi ange ʻi he lea anga-ʻofá pē. (Sēm. 2:15, 16) ʻI ha founga meimei tatau, koeʻuhi ko ʻetau ʻofa kia Sihova mo hotau kaungāʻapí, ʻoku ʻikai ngata pē ʻi heʻetau lotu ke ʻi ai ha kakai tokolahi ange ke nau malanga mo kitautolú ka ʻoku tau toe ngāue mālohi foki ʻi he ngāue fakamalangá.​—Māt. 9:38.

6, 7. (a) Ko e hā ʻa e “ʻofa ʻoku ʻikai mālualoi”? (e) Ko e hā ha fakatātā ʻo e ʻofa loí?

⁶ Naʻe pehē ʻe he ʻapositolo ko Sioné kuo pau ke tau ʻofa “ʻi he ngāue mo e moʻoni.” Ko ia ko ʻetau ʻofá kuo pau ke “taʻemālualoi,” pe “ʻikai mālualoi.” (Loma 12:9; 2 Kol. 6:6) ʻI he taimi ʻe niʻihi ʻe fakahāhā fakangalingali nai ai ʻe ha tokotaha ʻa e ʻofá. Ka ʻoku moʻoni mo totonu ʻa ʻene ʻofá? Ko e hā ʻene ngaahi taumuʻá? ʻOku ʻikai ha meʻa ko e ʻofa fakataha mo e mālualoi. Ko e ʻofa loí ʻoku ʻikai hano ʻaonga.

⁷ Tau lāulea angé ki ha fakatātā ʻo e ʻofa loí. ʻI he talanoa ʻa Sētane kia ʻIvi ʻi he ngoue ʻo ʻĪtení, ko e meʻa naʻá ne leaʻakí naʻe ʻai ai ʻo hā ngali naʻá ne loto ke maʻu ʻe ʻIvi ʻa e lelei tahá. Ka ko ʻene ngaahi ngāué naʻe fakahaaʻi ai naʻe ʻikai. (Sēn. 3:4, 5) ʻI he taimi naʻe tuʻi ai ʻa Tēvitá, naʻe ʻi ai hono kaumeʻa ko ʻEhitofeli. Ka naʻe lavakiʻi ʻe ʻEhitofeli ʻa Tēvita ke ne maʻu ʻaonga mei ai. Ko ʻene ngaahi ngāué naʻe fakahaaʻi ai naʻe ʻikai ko ha kaumeʻa moʻoni ia. (2 Sām. 15:31) ʻI he ʻahó ni, ko e kau tafoki ʻo fakafepaki ki he moʻoní mo e niʻihi kehe ʻoku nau fakatupunga ʻa e māvahevahe ʻi he fakatahaʻangá ʻoku nau ngāueʻaki ʻa e “lea momole-ʻolunga mo e lea fakahekeheké.” (Loma 16:17, 18) ʻOku nau fakangalingali nai ʻoku nau tokanga fekauʻaki mo e niʻihi kehé, ka ko hono moʻoní, ʻoku nau siokita.

 8. Ko e hā ʻa e fehuʻi ʻoku totonu ke tau ʻeke hifó?

⁸ ʻOku fakamā ʻa e ʻofa loí tautefito he ʻoku ngāueʻaki ia ke kākaaʻi ʻa e kakaí. Te tau malava nai ke kākaaʻi ʻa e tangatá, ka heʻikai lava ke tau kākaaʻi ʻa Sihova. Naʻe pehē ʻe Sīsū ko e faʻahinga ʻoku nau tōʻonga mālualoí ʻe tauteaʻi kinautolu “ʻaki ʻa e tautea kakaha tahá.” (Māt. 24:51) ʻI he tuʻunga ko e kau sevāniti ʻa Sihová, ʻoku ʻikai ʻaupito te tau loto ke mālualoi. Ko ia ʻoku totonu ke tau ʻeke hifo, ‘ʻOku moʻoni ʻa ʻeku ʻofá, pe ʻoku ou siokita mo taʻefaitotonu?’ Tau lāulea angé ki ha founga ʻe hiva ʻe lava ke tau fakahāhā ai ʻa e ʻofa ʻa ia ʻoku “ʻikai mālualoi.”

 9. Ko e hā ʻe ueʻi kitautolu ʻe he ʻofa moʻoní ke tau faí?

⁹ Fiefia ke ngāue neongo kapau ʻoku ʻikai ke fakatokangaʻi ʻe ha taha ʻa e meʻa ʻokú ke faí. ʻOku totonu ke tau loto-lelei ke fai ha ngaahi meʻa ʻi he anga-ʻofa mo e anga-lelei ki he niʻihi kehé, ko e ngaahi meʻa ʻe ʻikai ʻaupito ke ʻilo ki ai ha taha. (Lau ʻa e Mātiu 6:1-4.) Naʻe kehe ʻa e fakakaukau ʻa ʻAnanaia mo Sāfailá. ʻI he taimi naʻá na fai ai ha foakí, naʻá na loto ke ʻilo ki ai ʻa e niʻihi kehé. Naʻá na loi fekauʻaki mo e lahi ʻo e meʻa naʻá na foakí, pea naʻe tauteaʻi kinaua ʻi heʻena mālualoí. (Ngā. 5:1-10) Ka ʻo kapau ʻoku tau ʻofa moʻoni ʻi hotau fanga tokouá, te tau fiefia ke fai maʻanautolu ha ngaahi meʻa ʻi he anga-lelei ʻo ʻikai loto ke ʻilo ʻe he niʻihi kehé ʻa e meʻa kuo tau faí. ʻE lava ke tau ako mei he fanga tokoua ʻoku nau tokoni ki he Kulupu Pulé ʻi hono teuteu ʻa e meʻakai fakalaumālié. ʻOku ʻikai te nau tohoakiʻi mai ʻa e tokangá kiate kinautolu, pea ʻoku ʻikai te nau ʻai ke ʻiloʻi ʻe he kakaí ʻa e ngaahi meʻa naʻa nau ngāue ki aí.

10. ʻE lava fēfē ke tau fakahāhā ʻa e fakaʻapaʻapa ki he niʻihi kehé?

¹⁰ Fakahāhā ʻa e fakaʻapaʻapa ki he niʻihi kehé. (Lau ʻa e Loma 12:10.) Naʻe fakahāhā ʻe Sīsū ʻa e fakaʻapaʻapa ki heʻene kau ʻapositoló ʻi heʻene fufulu honau vaʻé. (Sione 13:3-5, 12-15) ʻOku totonu ke tau ngāue mālohi ke hoko ʻo anga-fakatōkilalo hangē ko Sīsuú pea ngāue maʻá e niʻihi kehé. Naʻe ʻikai ke mahinoʻi kakato ʻe he kau ʻapositoló ʻa e meʻa naʻe fai ʻe Sīsuú ka ʻi ha toki taimi ki mui ʻaupito, ʻi heʻenau maʻu ʻa e laumālie māʻoniʻoní. (Sione 13:7) ʻOku tau fakahāhā ʻa e fakaʻapaʻapa ki he niʻihi kehé ʻi he ʻikai fakakaukau ʻoku tau lelei ange ʻiate kinautolu he naʻa tau ako lelei ange, pe tuʻumālie ange, pe maʻu ha ngaahi vāhenga-ngāue makehe. (Loma 12:3) ʻOku ʻikai ke tau meheka ʻi hono fakahīkihikiʻi ʻa e niʻihi kehé, ka ʻoku tau fiefia fakataha mo kinautolu neongo ai pē kapau ʻoku tau ongoʻi ʻoku totonu ke fakahīkihikiʻi foki mo kitautolu.

11. Ko e hā kuo pau ai ke fai ʻi he loto-moʻoni ʻetau fakaongoongoleleí?

¹¹ Fai ha fakaongoongolelei loto-moʻoni. Kumi ki ha ngaahi faingamālie ke fakaongoongoleleiʻi ai ʻa e niʻihi kehé. ʻOku tau ʻiloʻi kotoa ko e fakaongoongoleleí ʻoku ‘lelei ki he langa haké.’ (ʻEf. 4:29) Ka ʻoku tau loto ke fakapapauʻi ko e meʻa ʻoku tau leaʻakí ʻoku moʻoni pea ʻoku ʻikai ko e leaʻakí pē ke fakahekeheke ki he niʻihi kehé. ʻOku ʻikai totonu ke tau leaʻaki ha meʻa ʻoku ʻikai ke tau ʻuhingaʻi pe fakaʻehiʻehi mei hotau fatongia ke fai ha akonaki ʻoku fiemaʻu. (Pal. 29:5) Te tau hoko ko e kau mālualoi kapau ʻoku tau fakaongoongoleleiʻi ʻa e niʻihi kehé pea fakaangaʻi leva ki mui ʻo ʻikai te nau ʻiloʻi. Ko e ʻofa ʻa e ʻapositolo ko Paulá naʻe moʻoni. ʻI heʻene tohi ki he kau Kalisitiane ʻi Kolinitoó, naʻá ne fakaongoongoleleiʻi kinautolu ʻi he meʻa lelei naʻa nau faí. (1 Kol. 11:2) Ka ʻi he taimi naʻe fiemaʻu ai kiate kinautolu ʻa e akonakí, naʻá ne fakamatalaʻi anga-lelei mo mahino kiate kinautolu ʻa e ʻuhingá.​—1 Kol. 11:20-22.

12. ʻE lava fēfē ke tau fakahāhā ʻa e ʻofa moʻoní ʻi heʻetau anga-talitali kakaí?

¹² Anga-talitali kakai. ʻOku fekauʻi kitautolu ʻe Sihova ke tau nima-homo ki hotau fanga tokouá mo e fanga tuofāfiné. (Lau ʻa e 1 Sione 3:17.) Ka kuo pau ke tau maʻu ʻa e fakaueʻiloto totonu ki he hoko ʻo anga-talitali kakaí. ʻE lava ke tau ʻeke hifo: ‘ʻOku ou fakaafeʻi ki hoku ʻapí ʻa hoku ngaahi kaumeʻa ofí pē pe ko e faʻahinga pē ʻoku ou fakakaukau ʻoku nau mahuʻinga ʻi he fakatahaʻangá? ʻOku ou fakaafeʻi pē ʻa e kakai ʻoku ou fakakaukau te nau fai mai ha meʻa maʻaku? Pe ʻoku ou nima-homo ki he fanga tokoua mo e fanga tuofāfine ʻoku ʻikai te u ʻiloʻi leleí pe heʻikai lava ke nau fai ha meʻa maʻaku?’ (Luke 14:12-14) Sioloto atu ki he ongo tuʻunga ko ení: Fēfē kapau ʻe fiemaʻu ʻe ha tokoua ha tokoni koeʻuhí ko ha ngaahi fili taʻefakapotopoto naʻá ne fai? Pe fēfē kapau naʻe ʻikai ʻaupito ke fakamālō mai ha taha naʻa tau fakaafeʻi ki hotau ʻapí? ʻOku tala mai ʻe Sihova: “Hoko ʻo fetalitalikakaiʻaki taʻeʻiai ha lāunga.” (1 Pita 4:9) Te tau fiefia ʻi heʻetau fai ha foaki fakataha mo e fakaueʻiloto totonú.—Ngā. 20:35.

13. (a) Ko fē nai ʻa e taimi ʻe fiemaʻu ai kiate kitautolu ʻa e kātaki lahi angé? (e) Ko e hā ʻe lava ke tau fai ke tokoniʻi ʻa e faʻahinga ʻoku vaivaí?

¹³ Tokoniʻi ʻa e faʻahinga ʻoku vaivaí. Ko e fekau ʻa e Tohi Tapú ke “poupou ki he kau vaivaí, mou kātaki ʻi he feangainga mo e tokotaha kotoa” ʻe lava ke siviʻi ai pe ʻoku moʻoni ʻa ʻetau ʻofá. (1 Tes. 5:14) Ko e fanga tokoua tokolahi naʻa nau vaivaí naʻa nau hoko ki mui ʻo mālohi ʻi he tuí. Ka ʻoku hokohoko atu hono fiemaʻu ʻe he niʻihi ʻa ʻetau kātakí mo e tokoni anga-ʻofá. ʻE lava fēfē ke tau tokoni kiate kinautolu? ʻE lava ke tau ngāueʻaki ʻa e Tohi Tapú ke fakalototoʻaʻi kinautolu, ʻe lava ke tau fakaafeʻi kinautolu ke tau malanga, pe ʻe lava ke tau fanongo pē kiate kinautolu. Pehē foki, ʻoku ʻikai totonu ke tau fakakaukau fekauʻaki mo hotau fanga tokouá mo e fanga tuofāfiné ʻoku nau “mālohi” pē pe “vaivai.” ʻI hono kehé, ʻoku totonu ke tau ʻiloʻi ʻoku tau maʻu kotoa ʻa e ngaahi mālohinga mo e ngaahi vaivaiʻanga. Naʻa mo e ʻapositolo ko Paulá naʻá ne fakahaaʻi naʻe ʻi ai hono ngaahi vaivaiʻanga. (2 Kol. 12:9, 10) ʻOku fiemaʻu kiate kitautolu kotoa ʻa e fetokoniʻaki mo e fefakalototoʻaʻaki.

14. Ko e hā ʻoku totonu ke tau loto-lelei ke fai ke tauhi maʻu ai ʻa e melino mo hotau fanga tokouá?

¹⁴ Fakamelino. Ko e melino mo hotau fanga tokouá ʻoku mahuʻinga ʻaupito. Neongo kapau ʻoku tau ongoʻi kuo ʻikai ke mahinoʻi kitautolu ʻe he niʻihi kehé pe fai mai ha fakafeangai taʻetotonu, ʻoku totonu ke tau fai ʻa e meʻa kotoa pē te tau malavá ke fakamelino. (Lau ʻa e Loma 12:17, 18.) Kapau kuo tau ʻai ke ongoʻi loto-mamahi ha taha, ʻe fiemaʻu pē nai ke tau kole fakamolemole. Ka kuo pau ke tau loto-moʻoni. Ko e fakatātaá, ʻi he ʻikai ke pehē, “ʻOku ou kole fakamolemole atu ʻi hoʻo ongoʻi peheé,” ʻe lelei ange ke fakahaaʻi ʻetau halá ʻaki ʻa e pehē, “ʻOku ou kole fakamolemole atu ʻi heʻeku fakalotomamahiʻi koe ʻi he meʻa naʻá ku leaʻakí.” ʻOku tautefito ʻa e mahuʻinga ʻo e melinó ʻi ha nofo mali. ʻE hala ki ha husepāniti mo ha uaifi ke na tōʻongaʻaki ʻo hangē ʻokú na feʻofaʻakí ʻi he sio ʻa e niʻihi kehé lolotonga ia ʻi heʻena toko uá ʻokú na fakafisi ke feleaʻaki, leaʻaki ʻiate kinaua ʻa e ngaahi meʻa fakalotomamahi, pe aʻu ʻo anga-fakamālohi.

15. ʻE lava fēfē ke tau fakahāhā ʻoku moʻoni ʻa ʻetau fakamolemolé?

¹⁵ Fakamolemoleʻi loto-lelei. Kapau ʻoku fakalotomamahiʻi kitautolu ʻe ha taha, ʻoku tau fakamolemoleʻi ia pea tuku ange ʻa e ongoʻi mamahí. ʻOku totonu ke tau fai eni neongo kapau ʻoku ʻikai te ne ʻiloʻi naʻá ne fakalotomamahiʻi kitautolu. ʻOku tau fakamolemoleʻi loto-lelei ʻaki ʻa e “fekātakiʻaki ʻi he ʻofa, ʻo feinga tōtōivi ke tauhi maʻu ʻa e laumālie taha ʻi he haʻi fāʻūtaha ko e melinó.” (ʻEf. 4:2, 3) Koeʻuhi ke fakamolemoleʻi loto-moʻoni, kuo pau ke tuku ʻetau fakakaukau ki he meʻa naʻe fai ʻe he tokotahá. Ko e ʻofá “ʻoku ʻikai te ne hanganaki fakalau ʻa e koví.” (1 Kol. 13:4, 5) Ko hono moʻoní, kapau naʻa tau tukulotoʻi ha ʻita, ʻe lava ke tau maumauʻi ai hotau vahaʻangatae mo hotau tokouá pe tuofefiné pea pehē foki kia Sihova. (Māt. 6:14, 15) ʻOku tau fakamoʻoniʻi ʻoku moʻoni ʻa ʻetau fakamolemolé ʻi heʻetau lotu maʻá e tokotaha naʻá ne fakalotomamahiʻi kitautolú.​—Luke 6:27, 28.

16. ʻOku totonu ke fēfē ʻetau ongoʻi fekauʻaki mo e ngaahi vāhenga-ngāue makehe ʻi he ngāue ʻa Sihová?

¹⁶ Feilaulauʻi ʻa e ngaahi lelei fakafoʻituituí. ʻI heʻetau maʻu ha vāhenga-ngāue makehe ʻi he ngāue ʻa Sihová, ʻe lava ke tau fakamoʻoniʻi ʻoku moʻoni ʻa ʻetau ʻofá ʻaki ʻa e “kumi, ʻo ʻikai ki he lelei pē [ʻatautolú], ka ki he lelei ʻa e tokotaha kehé.” (1 Kol. 10:24) Ko e fakatātaá, ʻi heʻetau ngaahi ʻasemipilií mo e fakataha-lahí, ʻoku hū ai ʻa e kau fakanofonofó ki he falé ki muʻa ʻi he niʻihi kehé pea ʻe lava ke fakataueleʻi ai kinautolu ke nau taʻofi ʻa e ngaahi nofoʻanga lelei tahá maʻanautolu mo honau fāmilí. ʻI hono kehé, ko e tokolahi taha ʻo kinautolú ʻoku nau fili ʻa e ngaahi nofoʻanga ʻoku ʻikai loko leleí ʻi he feituʻu ʻoku vaheʻi kinautolu ke nau ngāue aí. ʻI he fai peheé, ʻoku nau fakahāhā ai ʻa e ʻofa taʻesiokita. ʻE lava fēfē ke ke faʻifaʻitaki ki heʻenau faʻifaʻitakiʻanga leleí?

17. Kapau ʻoku fai ʻe ha Kalisitiane ha angahala mamafa, ko e hā ʻe ueʻi ia ʻe he ʻofa moʻoní ke ne faí?

¹⁷ Vetehia pea tuku ʻa e faiangahala fakapulipulí. Kuo feinga ʻa e kau Kalisitiane ʻe niʻihi kuo nau fai ha angahala mafatukitukí ke fufū ia. Mahalo pē ʻoku nau mā pe ʻikai loto ke fakalotomamahiʻi ʻa e niʻihi kehé. (Pal. 28:13) Ka ko hono fufū ʻa e angahalá ko ha taʻeʻofa ia he ʻoku fakatupu ai ʻa e maumau ki he tokotaha faiangahalá mo e niʻihi kehé. Anga-fēfē? ʻE taʻofi nai ai ʻe Sihova hono tāpuakiʻi ʻa e fakatahaʻangá ʻaki hono laumālie māʻoniʻoní pea heʻikai maʻu ai ʻe he fakatahaʻangá ʻa e melinó. (ʻEf. 4:30) Ko ia kapau ʻoku faiangahala mamafa ha Kalisitiane, ko e ʻofa moʻoní ʻe ueʻi ai ia ke ne lea ki he kau mātuʻá pea maʻu ʻa e tokoni ʻokú ne fiemaʻú.​—Sēm. 5:14, 15.

18. ʻOku mahuʻinga fēfē ʻa e ʻofa moʻoní?

¹⁸ Ko e ʻofá ʻoku mahuʻinga taha ʻi he ngaahi ʻulungāngá kotoa. (1 Kol. 13:13) ʻOkú ne tokoniʻi ʻa e kakaí ke nau ʻiloʻi ʻa e kau muimui moʻoni ʻo Sīsuú pea ke nau ʻiloʻi ʻa e faʻahinga ʻoku nau faʻifaʻitaki moʻoni kia Sihova, ʻa e Matavai ʻo e ʻofá. (ʻEf. 5:1, 2) Naʻe pehē ʻe Paula kapau naʻe ʻikai te ne maʻu ʻa e ʻofá, te ne hoko ko e meʻa noa pē. (1 Kol. 13:2) ʻOfa ke tau hokohoko atu hono fakahāhā ʻetau ʻofá, ʻo ʻikai “ʻi he lea” pē kae pehē foki “ʻi he ngāue mo e moʻoni.”