“Fekuki Fakamatoato Koeuhi Koe Tui”!

“Fekuki fakamatoato koeuhi koe tui nae atu i muʻa ki he kaiga maonioni.” ​—SIUTASI 3, PM.

 1. ʻI he ʻuhinga fē ʻoku kau ai ʻa e kau Kalisitiane moʻoni ʻi he ʻaho ní ʻi ha tau?

KO E kau sōtia ʻi he taú kuo nau maʻu maʻu pē ha ʻinasi faingataʻa. Sioloto atu ki hono ʻai ʻa e naunau tau kakato pea lue ʻi he ngaahi kilomita taʻefaʻalaua ʻi he ngaahi faʻahinga kotoa ʻo e ʻeá, fuesia ʻa e feinga ako anga-kakaha ki hono ngāueʻaki ʻo e meʻa taú, pe ko hono maluʻi koe mei he faʻahinga kotoa ʻo e ngaahi fakamanamana fakamālohi ki he moʻuí mo e sinó. Kae kehe, ʻoku ʻikai ke kau ʻa e kau Kalisitiane moʻoní ia ʻi he ngaahi tau ʻa e ngaahi puleʻangá. (Aisea 2:​2-4; Sione 17:14) Ka ʻi ha ʻuhinga, kuo pau ke ʻoua ʻaupito naʻa ngalo ʻoku tau kau kotoa ʻi ha tau. ʻOku fonu ʻa Sētane ʻi he tāufehiʻa kia Sīsū Kalaisi mo hono kau muimui ʻi he māmaní. (Fakahā 12:17) Ko e faʻahinga kotoa kuo nau fili ke tauhi ʻa Sihova ko e ʻOtuá, ko hono moʻoní, ʻoku nau fakamoʻoni hingoa ai ko e kau sōtia ke faitau ʻi he tau fakalaumālie.​—2 Kolinito 10:4.

 2. ʻOku anga-fēfē hono fakamatalaʻi ʻe Siutasi ʻa e faitau ʻa e Kalisitiané, pea ʻoku anga-fēfē malava ke tokoniʻi kitautolu ʻe heʻene tohí ke tau kātakiʻi ia?

² ʻOku feʻungamālié, ʻoku tohi ʻe he tokoua faʻē-taha ʻo Sīsū ko Siutasí: “E kaiga ofeina, i he eku fai fakatootoo aubito ke tohi atu kiate kimoutolu ki he fakamoui lahi, nae totonu keu tohi kiate kimoutolu, mo eginaki ke mou fekuki fakamatoato koeuhi koe tui nae atu i muʻa ki he kaiga maonioni.” (Siutasi 3, PM) ʻI he enginaki ʻa Siutasi ki he kau Kalisitiané ke nau “fekuki fakamatoato,” ʻokú ne ngāueʻaki ha foʻi lea ʻoku felāveʻi mo e foʻi lea ki he “langa lahi.” ʻIo, ko e faitaú ni ʻe faingataʻa, ʻoku aʻu ʻo langa lahi! ʻOkú ke ʻiloʻi ʻi ha taimi ʻoku faingataʻa ke kātaki ʻi he tau ko ʻení? Ko e tohi nounou kae mālohi ʻa Siutasí ʻoku lava ke ne tokoniʻi kitautolu. ʻOku enginaki mai ai ke talitekeʻi ʻa e ʻulungaanga taʻetāú, ke tokaʻi ʻa e mafai ʻoku fokotuʻu fakaʻotuá, pea tauhi kitautolu ʻi he ʻofa ʻa e ʻOtuá. Tau sio angé ki he anga hono ngāueʻaki ʻa e akonakí ni.

Talitekeʻi ʻa e ʻUlungaanga Taʻetāú

 3. Ko e hā ʻa e tuʻunga mātuʻaki fakatuʻutāmaki naʻe fehangahangai mo e fakatahaʻanga Kalisitiane ʻi he taimi ʻo Siutasí?

³ Naʻe lava ke ʻilo ʻe Siutasi naʻe ʻikai ke ikuna ʻi he tau fakafepakiʻi ʻo Sētané ʻa e kotoa ʻo hono kaungā Kalisitiané. Naʻe fehangahangai ʻa e tākangá mo ha tuʻunga mātuʻaki fakatuʻutāmaki. Naʻe “moulu mai” ha kau tangata kovi, ko e tohi ia ʻa Siutasí. Ko e kau tangatá ni naʻa nau poupouʻi olopoto ʻa e ʻulungaanga taʻetāú. Pea naʻa nau fakamatala fakaʻatamai pōtoʻi ʻenau ngaahi ngāué, “ʻo nau liliu ʻa e kelesi ʻa hotau ʻOtua ʻo faiʻanga pauʻu fakalielia.” (Siutasi 4) Mahalo, ʻoku hangē ko e niʻihi ʻo e kau Nositika ʻo e kuonga muʻá, naʻa nau fakaʻuhinga ʻo pehē ko e lahi ange ʻa e faiangahala ʻa ha taha, ko e lahi ange ai pē ia ʻa e malava ʻe he tokotaha ko iá ke maʻu ʻa e kelesi ʻa e ʻOtuá​—ko ia, ko hono moʻoní, naʻe lelei ange ke faiangahala ke lahi ange! Pe mahalo naʻa nau fakaʻosiʻaki ʻo pehē ko ha faʻahinga ʻOtua ia ʻe ʻikai ʻaupito te ne tautea kinautolu. ʻI ha faʻahinga tuʻunga pē, naʻa nau hala.​—1 Kolinito 3:19.

 4. Ko e hā ʻa e ngaahi fakatātā Fakatohitapu ʻe tolu ʻo e ngaahi fakamaau ʻa Sihova ʻi he kuohilí ʻoku lave ki ai ʻa Siutasí?

⁴ Naʻe fakataʻeʻaongaʻi ʻe Siutasi ʻenau ngaahi fakaʻuhinga fulikivanú ʻaki hono ʻohake ʻa e ngaahi fakatātā ʻe tolu ʻo e ngaahi fakamaau ʻa Sihova ʻi he ngaahi taimi ʻi he kuohilí: naʻe fai ki he kau ʻIsileli ko ia naʻe “ʻikai tui”; ki he “kau angelo . . . [naʻa] nau liʻaki honau nofoʻanga totonu” koeʻuhi ke faiangahala mo e kakai fefine; pea mo ia naʻe fai ki he kau nofo ʻo Sōtoma mo Komolá, ʻa ia “naʻa nau tuli ki he feʻauaki, ʻo hange tofu pe ʻa e faʻahinga ko é, ʻo nau afe ki ha faʻahinga kakano kehe.” (Siutasi 5-7; Senesi 6:​2-4; 19:​4-25; Nomipa 14:35) ʻI he ngaahi meʻá ni taki taha, naʻe ʻomai ai ʻe Sihova ha fakamaau naʻe ongo ki he kau angahalá.

 5. Ko hai ʻa e palōfita ʻi he kuonga muʻá ʻoku toʻo mei ai ʻa e lea ʻa Siutasí, pea naʻe anga-fēfē ʻa hono fakahaaʻi ʻe he kikite ko iá ʻa e pau fakaʻaufuli ʻa hono fakahokó?

⁵ ʻOku lave ki mui ʻa Siutasi ki ha fakamaau ʻoku toe fuʻu lahi ʻaupito ange ia. ʻOkú ne leaʻaki ha kikite ʻa ʻĪnoke​—ko ha konga ʻoku ʻikai maʻu ia ʻi ha toe feituʻu kehe ʻi he Tohitapu fakamānavaʻí.a (Siutasi 14, 15) Naʻe tala ki muʻa ʻe ʻĪnoke ha taimi ʻe fakamāuʻi ai ʻe Sihova ʻa e kotoa ʻo e kau fakaʻotuamaté mo ʻenau ngaahi ngāue fakaʻotuamaté. Ko e meʻa ʻoku mahuʻingá, naʻe lea ʻa ʻĪnoke ʻi he taimi kuo ʻosi, he naʻe pau ʻa e ngaahi fakamaau ʻa e ʻOtuá ʻo hangē pē ne ʻosi hoko iá. Naʻe manuki nai ʻa e kakaí kia ʻĪnoke pea ki mui mai ai kia Noa, ka ko e kotoa ʻo e kau luma peheé naʻa nau melemo hifo ʻi he Lōmaki ʻi māmani lahí.

 6. (a) Ko e hā naʻe fiemaʻu ke fakamanatu ki he kau Kalisitiane ʻi he taimi ʻo Siutasí? (e) Ko e hā ʻoku totonu ai ke tau tukulotoʻi ʻa e ngaahi fakamanatu ʻa Siutasí?

⁶ Ko e hā naʻe tohi ai ʻa Siutasi ʻo fekauʻaki mo e ngaahi fakamaau fakaʻotua ko ʻení? Koeʻuhi naʻá ne ʻilo ko e niʻihi naʻe feohi mo e ngaahi fakatahaʻanga Kalisitiane ʻi hono taimí tonu naʻa nau fai ʻa e ngaahi angahala naʻe fakalielia pea taau ai ke valokiʻi ʻo hangē pē ko e faʻahinga ko ia naʻa nau fakatupunga ʻa e ngaahi fakamaau ʻi he kuohilí. Ko ia, ʻoku tohi ʻa Siutasi ʻo pehē ʻoku fiemaʻu ke fakamanatu ki he ngaahi fakatahaʻangá ʻa e ngaahi moʻoni fakatohitapu tefito ʻe niʻihi. (Siutasi 5) ʻOku hā mahino naʻe ngalo ʻiate kinautolu naʻe ʻafioʻi hifo ʻe Sihova ko e ʻOtuá ʻa e meʻa naʻa nau faí. ʻIo, ʻi hono maumauʻi fakakaukauʻi pē ʻe heʻene kau sevānití ʻa ʻene ngaahi laó, ʻi hono ʻuliʻi ʻo kinautolu tonu mo e niʻihi kehé, ʻokú ne ʻafio hifo ki ai. (Palovepi 15:3) ʻOku fakalaveaʻi loloto ia ʻe he ngaahi tōʻonga peheé. (Senesi 6:6; Sāme 78:40) Ko ha fakakaukau fakatoʻoaloto ia ʻa e lava ʻe kitautolu pē faʻahinga ʻo e tangatá ke ueʻi ʻa e ngaahi ongoʻi ʻa e ʻEiki Aoniu ʻo e ʻunivēsí. ʻOkú ne ʻafio mai kiate kitautolu ʻi he ʻaho kotoa pē, pea ʻi he taimi ʻoku tau fai ai ʻetau lelei tahá ke muimui ʻi he topuvaʻe ʻo hono ʻAló, ʻa Sīsū Kalaisi, ʻoku ʻai leva ai ʻe hotau ʻulungāngá ke fiefia ʻa hono lotó. Ko ia, ʻai ke ʻoua ʻaupito naʻa tau mamahi ki he ngaahi fakamanatu pehē ʻoku ʻomai ʻe Siutasí ka ke tali ia ki he lotó.​—Palovepi 27:11; 1 Pita 2:21.

 7. (a) Ko e hā ʻoku mātuʻaki mahuʻinga ai ki he faʻahinga ʻoku kau ʻi he faihala mamafá ke kumi tokoni levá? (e) ʻE lava fēfē ʻe kitautolu kotoa ʻo fakaʻehiʻehi mei he ʻulungaanga taʻetāú?

⁷ ʻOku ʻikai ke ngata pē ʻi he ʻafio hifo ʻa Sihová ka ʻokú ne fai ha meʻa. ʻI he hoko ko ha ʻOtua ʻo e fakamaau totonú, ʻokú ne fakahoko ʻa e tautea ki he kau faihalá​—ʻo vave mai, pe ʻamui ange. (1 Timote 5:24) Ko e faʻahinga ko ia ʻoku fakaʻuhinga ʻo pehē ko ʻene ngaahi fakamāú ko e ngaahi meʻa pē ia ʻo e kuohilí pea ʻoku ʻikai te ne hohaʻa mai ia ki he kovi ʻoku nau faí ʻoku nau kākaaʻi pē kinautolu. He mahuʻinga lahi ē ki ha taha pē ʻi he ʻahó ni ʻoku kau ʻi he ʻulungaanga taʻetāú ke ne kumi leva ki ha tokoni mei he kau mātuʻa Kalisitiané! (Semisi 5:​14, 15) ʻOku ʻai nai kitautolu kotoa ʻe he kovi ʻoku langaʻi ʻe he ʻulungaanga taʻetāú ʻo tau fakamātoato ai ʻi heʻetau faitau fakalaumālié. ʻI he taʻu kotoa ʻoku ʻi ai ha kau tōtau​—ko e faʻahinga tāutaha ʻoku kapusi mei hotau lotolotongá, ko e tokolahi ʻo kinautolu ko e tupu mei hono fakahoko taʻefakatomala ʻa e ngaahi tōʻonga taʻetāú. Kuo pau ke tau fakapapauʻi tuʻumaʻu ke talitekeʻi ha faʻahinga fakatauele pē ʻoku kamata ke ne taki atu kitautolu ʻi ha ʻalunga pehē.​—Fakafehoanaki mo Mātiu 26:41.

Tokaʻi ʻa e Mafai Kuo Fokotuʻu Fakaʻotuá

 8. Ko hai ʻa e “faʻahinga langilangiʻia” ʻoku lave ki ai ʻi he Siutasi 8?

⁸ Ko e toe palopalema ʻe taha ʻoku lea ki ai ʻa Siutasí ko e ʻikai ke tokaʻi ʻa e mafai kuo fokotuʻu fakaʻotuá. Hangē ko ʻení, ʻi he veesi 8 ʻokú ne tukuakiʻi ai ʻa e kau tangata fulikivanu tatau pē ʻi he “talalakulaku ki he faʻahinga langilangiʻia.” Ko hai ʻa e “faʻahinga langilangiʻia” ko ʻení? Ko e kau tangata taʻehaohaoa pē, ka naʻa nau maʻu ʻa e ngaahi fatongia naʻe ʻoange kiate kinautolu ʻe he laumālie māʻoniʻoni ʻo Sihová. Ko e fakatātaá, naʻe maʻu ʻe he ngaahi fakatahaʻangá ʻa e kau mātuʻa, ʻa ia naʻe fakafatongia ʻaki ʻa hono tauhi ʻa e tākanga ʻa e ʻOtuá. (1 Pita 5:2) Naʻa nau hoko foki ko e kau ʻovasia fefonongaʻaki, hangē ko e ʻapositolo ko Paulá. Pea naʻe ngāue ʻa e kulupu ʻo e kau mātuʻa ʻi Selusalemá ko ha kulupu pule, ʻo fai ʻa e ngaahi fili ʻoku kaunga ki he fakatahaʻanga Kalisitiané fakalūkufua. (Ngāue 15:6) Naʻe hohaʻa lahi ʻa Siutasi ki he faʻahinga ʻe niʻihi ʻi he ngaahi fakatahaʻangá naʻa nau leakovi, pe lea taʻefakaʻapaʻapa, ki he kau tangata peheé.

 9. Ko e hā ʻa e ngaahi fakatātā fekauʻaki mo e taʻefakaʻapaʻapa ki he mafaí ʻoku lave ki ai ʻa Siutasi?

⁹ Ke tala hono kovi ʻo e talanoa taʻefakaʻapaʻapa peheé, ʻi he veesi 11, ʻoku lave ai ʻa Siutasi ki ha ngaahi fakatātā ʻe tolu ko ha fakamanatu: Keini, Pēlami, mo Kola. Naʻe fakataleʻi ʻe Keini ʻa e akonaki anga-ʻofa ʻa Sihová pea tuli loto-lelei pē ʻi hono ʻalunga ʻoʻona ko e tāufehiʻa loto-fakapō. (Senesi 4:​4-8) Naʻe maʻu ʻe Pēlami ha ngaahi toutou fakatokanga ʻoku ʻikai toe ala fehuʻia naʻe haʻu mei ha matavai mahulu hake fakaenatula​—naʻa mo ʻene ʻasí tonu naʻe lea hake kiate ia! Ka naʻe hokohoko siokita atu pē ʻa Pēlami ia ke faʻufaʻufono fekauʻaki mo e kakai ʻa e ʻOtuá. (Nomipa 22:​28, 32-34; Teutalonome 23:5) Ko Kola naʻe ʻosi ʻi ai pē hono tuʻunga fakafatongia, ka naʻe ʻikai fiemālie ai. Naʻá ne langaʻi ʻa e angatuʻu ki he tangata anga-vaivai taha ʻi he māmaní, ʻa Mōsese.​—Nomipa 12:3; 16:​1-3, 32.

10. ʻOku anga-fēfē nai ʻa e tō ʻa e niʻihi ʻi he ʻahó ni ki he tauhele ko e “talalakulaku ki he faʻahinga langilangiʻia,” pea ko e hā ʻoku totonu ai ke fakaʻehiʻehi mei he talanoa peheé?

¹⁰ He mataʻāʻā ē ka ko e ngaahi fakatātaá ni ke ne akoʻi kitautolu ke fanongo ki he akonakí pea tokaʻi ʻa e faʻahinga ʻoku ngāueʻaki ʻe Sihova ʻi he ngaahi tuʻunga fakafatongiá! (Hepelu 13:17) ʻOku fuʻu faingofua ke sio ki he tōnounou ʻa e kau mātuʻa kuo fakanofó, he ʻoku nau taʻehaohaoa, ʻo hangē tofu pē ko kitautolú ʻoku tau taʻehaohao kātoa. Ka ʻo kapau ʻoku tau nōfoʻi ʻi heʻenau ngaahi halá pea fakavaivai hono tokaʻi ʻo kinautolú, te tau hoko nai ʻo “talalakulaku ki he faʻahinga langilangiʻia”? ʻI he veesi 10, ʻoku lave ai ʻa Siutasi ki he faʻahinga ʻoku “ʻilonga ha meʻa ʻoku ʻikai te nau ʻilo ki ai ʻoku nau laukovi ki ai.” ʻI he taimi lahi, ko e niʻihi te nau fakaangaʻi ha fili naʻe fai ʻe ha kulupu ʻo e kau mātuʻá, pe ko ha kōmiti fakamaau. Ka, ʻoku ʻikai fakaʻatā kinautolu ke nau ʻilo ki he kotoa ʻo e ngaahi fakaikiiki ko ia naʻe pau ke vakai ki ai ʻa e kau mātuʻá kae toki fai ai ha filí. Ko ia, ko e hā ke leakovi ai ʻo fekauʻaki mo e ngaahi meʻa ʻoku ʻikai moʻoni te nau ʻilo ki ai? (Palovepi 18:13) Ko e faʻahinga ʻoku kīvoi ʻi he talanoa fakaʻikai peheé ʻoku lava ke fakatupunga ai ʻa e ngaahi fakafaʻafaʻahi ʻi he fakatahaʻangá pea ʻoku aʻu ʻo fakatatau ki he “ngaahi hakau ʻoku tuʻu” fakatuʻutāmaki ʻi he ngaahi fakatahataha ʻa e ngaahi kaungātuí. (Siutasi 12, 16, 19) ʻOua ʻaupito naʻa tau loto ke tau fakalanga ha fakatuʻutāmaki fakalaumālie ki he niʻihi kehé. Kae kehe, ʻai ke tau fakapapau taki taha ke tau houngaʻia ʻi he kau tangata faifatongiá koeʻuhi ko ʻenau ngāue mālohí mo e līʻoa ki he tākanga ʻa e ʻOtuá.​—1 Timote 5:17.

11. Ko e hā naʻe fakaʻehiʻehi ai ʻa Maikeli mei hono ʻoatu ha fakamaau ʻi ha ngaahi lea lauʻikovi kia Sētané?

¹¹ ʻOku lave ʻa Siutasi ki ha faʻifaʻitakiʻanga ʻo e tokotaha ʻokú ne tokaʻi totonu ʻa e mafai kuo fokotuʻú. ʻOkú ne tohi: “Ko Maikeli, ko e angelo-pule, ʻi heʻene fakakikihi mo e Tevolo, heʻena tālangaʻi ʻa e sino ʻo Mosese, talaʻehai naʻa ne taʻeʻapasia, ʻo lea ʻasi ke lau ʻene kovi; ka naʻa ne meʻa, Ke lōmia koe ʻe he ʻEiki.” (Siutasi 9) Ko e fakamatala fakatoʻoalotó ni, ko Siutasi pē naʻá ne hiki ia ʻi he ngaahi Konga Tohitapu fakamānavaʻí, ʻoku akoʻi mai ai ha ongo lēsoni kehekehe ʻe ua. ʻI he tafaʻaki ʻe taha, ʻokú ne akoʻi kitautolu ke tuku ʻa e fakamāú ia kia Sihova. ʻOku hā mahino naʻe loto ʻa Sētane ke ngāuehalaʻaki ʻa e sino ʻo e tangata anga-tonu ko Mōsesé koeʻuhi ke pouaki ʻaki ʻa e lotu loí. He anga-fulikivanu lahi ē! Ka neongo ia, naʻe anga-fakatōkilalo ʻa Maikeli ʻo fakaʻehiʻehi mei hano ʻoatu ha fakamaau, he ko Sihova pē naʻá ne maʻu ʻa e mafai ko iá. Ko ia, huanoa hake ai ʻa e totonu kiate kitautolu ke tau fakaʻehiʻehi mei hono fakamāuʻi ʻa e kau tangata anga-tonu ko ia ʻoku nau feinga ke tauhi ʻa Sihová.

12. Ko e hā ʻoku lava ke ako ʻe he faʻahinga ʻoku ʻi he ngaahi tuʻunga fakafatongia ʻi he fakatahaʻanga Kalisitiané mei he faʻifaʻitakiʻanga ʻa Maikelí?

¹² ʻI he tafaʻaki ʻe tahá, ko e faʻahinga ʻoku ʻi ai ha fatongia ʻi he fakatahaʻangá ʻokú ne toe ako nai ha lēsoni meia Maikeli. Kaeʻumaʻā, neongo ko Maikelí naʻe “angelo-pule,” ko e pule ʻo e kau ʻāngelo kotoa pē, naʻe ʻikai te ne ngāuehalaʻaki hono tuʻunga mafaí, naʻa mo e ʻi he tuʻunga fakatupu ʻitá. Ko e kau mātuʻa anga-tonú ʻoku nau muimui ofi ʻi he faʻifaʻitakiʻanga ko iá, ʻi hono ʻiloʻi ko hono ngāuehalaʻaki honau mafaí ʻoku taʻefakaʻapaʻapaʻi ai ʻa e tuʻunga-hau ia ʻo Sihová. Naʻe lahi ʻa e meʻa naʻe leaʻaki ʻe he tohi ʻa Siutasí ʻo fekauʻaki mo e kau tangata naʻa nau maʻu ʻa e ngaahi tuʻunga fakaʻapaʻapaʻia ʻi he ngaahi fakatahaʻangá ka naʻa nau hoko ʻo ngāuehalaʻaki honau mafaí. Hangē ko ʻení, ʻi he veesi 12 ki he 14, ʻoku hiki ai ʻe Siutasi ha fakahalaiaʻi mamafa ʻo e ‘kau tauhi ʻoku keinanga taʻeʻapasia, mo nau tauhi kinautolu pē.’ (Fakafehoanaki mo Isikeli 34:​7-10.) ʻI hono fakalea ʻe tahá, naʻa nau ʻuluaki mahuʻingaʻia pē ʻi he lelei kiate kinautolú, ʻikai ki he tākanga ʻa Sihová. ʻOku lava ke ako lahi ʻa e kau mātuʻa ʻi he ʻaho ní mei he ngaahi faʻifaʻitakiʻanga kovi peheé. Ko hono moʻoní, ko e ngaahi lea ko ʻeni ʻa Siutasí ʻokú ne fakaeʻa lelei mai ha fakatātā ʻo e meʻa ʻoku ʻikai te tau loto ke hoko ʻo pehē. ʻI he taimi ʻoku tau tō ai ki he siokitá, ʻoku ʻikai te tau malava ke hoko ai ko e kau sōtia ʻa Kalaisi; ʻoku tau moʻumoʻua pē he faitau maʻatá. Ko ia ai, ʻai ke tau moʻuiʻaki kotoa ʻa e ngaahi lea ʻa Sīsuú: “ʻOku te monuʻia lahi [“fiefia ange,” NW] ʻi he fai ha foaki atu, ʻi heʻete maʻu ha foaki mai.”​—Ngāue 20:35.

“Tauhi Ai Kimoutolu ʻi he ʻOfa ʻa e ʻOtua”

13. Ko e hā ʻoku totonu ai ke tau holi tōtōivi kotoa ke kei nofo ai pē ʻi he ʻofa ʻa e ʻOtuá?

¹³ Fakaofiofi ki he ngataʻanga ʻo ʻene tohí, ʻoku ʻomai ai ʻe Siutasi ʻa e akonaki fakalotomāfana ko ʻení: “Tauhi ai kimoutolu ʻi he ʻofa ʻa e ʻOtua.” (Siutasi 21) ʻOku halaʻatā ha meʻa ʻe lahi ange ʻene tokoniʻi kitautolu ke faitau ʻi he tau faka-Kalisitiané ʻi he meʻa ko ʻení ʻe taha, nofo ai pē ko e ngaahi fakamaʻungaʻanga ʻo e ʻofa ʻa Sihova ko e ʻOtuá. ʻOku ʻosi angé, ko e ʻofá ko e ʻulungaanga tuʻu-ki-muʻa ia ʻo Sihová. (1 Sione 4:8) Naʻe tohi ʻa Paula ki he kau Kalisitiane ʻi Lomá: “ʻOku te tui, ʻe ʻikai lava ʻe he mate, pe ko e moʻui, pe ko ha kau angelo, pe ko ha kau pule, pe ko ha ngaahi meʻa ʻoku lolotonga ni, pe ko ha ngaahi meʻa ka hoko mai, pe ko ha ngaahi malohi, pe ko ha maʻolunga, pe ko ha loloto pe ko ha meʻa ʻe taha ʻi Natula, ʻe ʻikai te ne lava ke motuhi kitautolu mei he ʻofa ʻa e ʻOtua, ʻa ia ʻoku ʻia Kalaisi Sisu ko hotau ʻEiki.” (Loma 8:​38, 39) Ko ia, ʻe anga-fēfē ke tau kei nofo ʻi he ʻofa ko iá? Fakatokangaʻi ʻa e tolu ʻo e ngaahi laka ke tau faí, fakatatau kia Siutasi.

14, 15. (a) ʻOku ʻuhinga ki he hā ʻa e pehē ke langa hake kitautolu ʻi heʻetau ‘meʻa toputapu ʻoku tau tui ki aí’? (e) ʻE anga-fēfē nai ʻetau sivisiviʻi ʻa e tuʻunga ʻoku ʻi ai hotau teunga-tau fakalaumālié?

¹⁴ ʻUluakí, ʻoku tala mai ʻe Siutasi kiate kitautolu ke hokohoko atu hono langa hake kitautolu ʻi heʻetau ‘meʻa toputapu ʻoku tau tui ki aí.’ (Siutasi 20) Hangē ko ia naʻa tau vakai ki ai ʻi he kupu ki muʻá, ko ha hoko atu ʻeni ʻo ia. ʻOku tau hangē ha ngaahi fale ʻoku langa ʻa ia ʻoku fiemaʻu ke toe fakamālohiʻi ange ke nau matuʻuaki ʻa e faʻaki mai fakatupu maumau lahi ʻa e ngaahi ʻelemēnití. (Fakafehoanaki mo Mātiu 7:​24, 25.) Ko ia, ʻai ke ʻoua ʻaupito naʻa tau hoko ʻo falala tōtuʻa. Ka, ke tau sio ki he meʻa ʻoku totonu ke tau langa hake ai kitautolu ʻi he makatuʻunga ʻo ʻetau tuí, ke hoko ko e kau sōtia mālohi ange, mo anga-tonu ange ʻa Kalaisi. Ko e fakatātaá, te tau fakakaukau nai ki he ngaahi konga ʻo e teunga-tau fakalaumālie ʻoku fakamatalaʻi ʻi he Efeso 6:​11-18.

¹⁵ Ko e hā ʻa e tuʻunga ʻoku ʻi ai hotau teunga-tau fakalaumālie ʻo kitautolú? ʻOku mālohi ʻetau “pa ko e tui” ʻo hangē ko ia ʻoku fiemaʻu ke ʻi aí? ʻI heʻetau sio atu ki mui ki he ngaahi taʻu kuo toki ʻosí, ʻoku tau fakatokangaʻi ai ha ngaahi fakaʻilonga ʻe niʻihi ʻo e fakavaivai hifó, hangē ko e hōloa ʻa e maʻu fakatahá, mole ʻa e faivelenga ki he ngāue fakafaifekaú, pe ko e mōlia atu ʻa e loto-māfana ki he ako fakafoʻituituí? ʻOku mafatukituki ʻa e ngaahi fakaʻilonga peheé! ʻOku fiemaʻu ke tau ngāue he taimí ni ke langa hake mo ʻai ke mālohi kitautolu ʻi he moʻoní.​—1 Timote 4:15; 2 Timote 4:2; Hepelu 10:​24, 25.

16. ʻOku ʻuhinga ki he hā ʻa e lotu ʻi he laumālie māʻoniʻoní, pea ko e hā ʻa e meʻa ʻe taha ʻoku totonu ke kole maʻu pē kia Sihová?

¹⁶ Ko ha founga hono ua ke kei nofo ai ʻi he ʻofa ʻa e ʻOtuá ko e hokohoko atu ʻi he “lotu ʻi he Laumalie Maʻoniʻoni.” (Siutasi 20) ʻOku ʻuhinga iá ke lotu ʻi he malumalu ʻo e tataki ʻa e laumālie ʻo Sihová pea fehoanaki mo ʻene Folofola fakamānavaʻi ʻe he laumālié. Ko e lotú ko ha founga mātuʻaki mahuʻinga ia ʻo e ʻunu ofi fakafoʻituitui kia Sihová pea mo hono fakahaaʻi ʻetau līʻoa kiate iá. ʻOua ʻaupito naʻa tau siʻaki ʻa e monū maʻongoʻongá ni! Pea ʻi he taimi ʻoku tau lotu aí, ʻoku lava ke tau kole​—ko hono moʻoní, hanganaki kole—ʻa e laumālie māʻoniʻoní. (Luke 11:13) Ko e ivi mālohi lahi taha ia ʻoku ʻatā mai kiate kitautolu. ʻAki ʻa e tokoni peheé, ʻoku tau malava maʻu pē ai ke nofo ai pē ʻi he ʻofa ʻa e ʻOtuá pea kītaki ʻi he tuʻunga ko e kau sōtia ʻa Kalaisi.

17. (a) Ko e hā ʻoku fakaofo fau ai ʻa e faʻifaʻitakiʻanga ʻa Siutasi ʻi he meʻa fekauʻaki mo e mēsí? (e) ʻE anga-fēfē nai ke hokohoko atu ʻe kitautolu taki taha hono fakahāhā ʻa e mēsí?

¹⁷ Ko hono tolú, ʻoku enginaki mai ʻa Siutasi kiate kitautolu ke hokohoko atu hono fakahāhā ʻa e mēsí. (Siutasi 22, NW) ʻOku fakaofo ʻa ʻene faʻifaʻitakiʻanga ʻaʻaná ʻi he meʻá ni. He ko ē, naʻe totonu ʻa ʻene hohaʻa koeʻuhi ko e faikākā, ʻulungaanga taʻetaau, mo e tafoki mei he moʻoní naʻe moulu ki he loto fakatahaʻanga Kalisitiané. Ka neongo ia, naʻe ʻikai te ne tō ki he loto-moʻua fakavalevale, ʻo fakakaukau ko e ngaahi tuʻunga ko iá ia naʻe ngali fuʻu fakatuʻutāmaki ke fakahāhā ai ha anga “malū” hangē ko e mēsí. ʻIkai, naʻá ne enginaki ki hono ngaahi tokouá ke hokohoko atu hono fakahāhā ʻa e mēsí ʻi ha taimi pē ʻoku malava ai, fakaʻuhinga anga-ʻofa mo e faʻahinga ʻoku faingataʻaʻia tupu mei he tālaʻá pea aʻu ʻo ‘hamusi mei he afí’ ʻa e faʻahinga ʻoku hē ofi atu ki he angahala mamafá. (Siutasi 23; Kaletia 6:1) He akonaki lelei ē ki he kau mātuʻá ʻi he ngaahi taimi faingataʻa ko ʻení! ʻOku nau feinga mo kinautolu ke fakahāhā ʻa e mēsí ʻi ha tuʻunga pē ʻoku ʻi ai ha makatuʻunga ki ai, lolotonga iá ʻe kei tuʻumaʻu pē ʻo ka fiemaʻu. ʻOku pehē pē mo kitautolu kotoa ʻoku tau loto ke fefakahāhāʻaki ʻa e mēsí. Ko e fakatātaá, ʻi he ʻikai ke tukulotoʻi ʻa e fanga kiʻi loto-ʻingoʻingó, ʻoku lava ke tau loto-fiefoaki ʻaki ʻetau fakamolemolé.​—Kolose 3:13.

18. ʻOku lava fēfē ke tau fakapapauʻi ʻa e ikuna ʻi heʻetau faitau fakalaumālié?

¹⁸ Ko e tau ʻoku tau faí ʻoku ʻikai ko ha tau faingofua. Hangē ko e lau ʻa Siutasí, ko ha “fekuki fakamatoato.” (Siutasi 3, PM) Ko hotau ngaahi filí ʻoku mālohi. ʻOku ʻikai ko Sētane pē ka ko ʻene māmani fulikivanú pea mo ʻetau ngaahi taʻehaohaoá tonu ʻoku nau tuʻu fakafepaki kotoa mai kiate kitautolu. Neongo ia, ʻoku malava ke tau falala fakaʻaufuli ki he ikuna! Ko e hā hono ʻuhingá? Koeʻuhí ʻoku tau ʻi he tafaʻaki ʻa Sihová. ʻOku fakaʻosi ʻe Siutasi ʻa ʻene tohí ʻaki ha fakamanatu mai ko Sihová ʻoku totonu ke tuku ki ai ʻa e “kololia mo e langilangiʻia mo e māfimafi mo e pule, mei itaniti, pea ʻi onopōni, pea ke ʻosiʻosingamalie ʻa e ngaahi kuonga.” (Siutasi 25) ʻIkai ko ha fakakaukau fakatoʻoaloto ia? Ko ia, ʻoku lava ke toe fehuʻia, ko e ʻOtua tatau pē ʻeni “ʻoku mafai ke tauhi kimoutolu ke ʻoua ʻe humu”? (Siutasi 24) ʻIkai ʻaupito! ʻAi ke tau taki taha fakapapauʻi kotoa ke hokohoko atu hono talitekeʻi ʻa e ʻulungaanga taʻetāú, ke tokaʻi ʻa e mafai kuo fokotuʻu fakaʻotuá, pea hanganaki tauhi kitautolu ʻi he ʻofa ʻa e ʻOtuá. ʻI he founga ko iá, te tau fiefia ai ʻi ha ikuna lāngilangiʻia fakataha.

[Fakamatala ʻi lalo]

Ngaahi Fehuʻi ke Fakamanatu

◻ ʻOku anga-fēfē hono akoʻi kitautolu ʻe he tohi ʻa Siutasí ke talitekeʻi ʻa e ʻulungaanga taʻetāú?

◻ Ko e hā ʻoku mātuʻaki mahuʻinga ai ke tokaʻi ʻa e mafai kuo fokotuʻu fakaʻotuá?

◻ Ko e hā ʻoku mātuʻaki mafatukituki fekauʻaki mo hono ngāuehalaʻaki ʻa e mafai fakaefakatahaʻangá?

◻ ʻE anga-fēfē ke tau ngāue ke kei nofo ai pē ʻi he ʻofa ʻa e ʻOtuá?

[Fakatātā ʻi he peesi 15]

ʻI he ʻikai ke hangē ko e kau sōtia Lomá, ʻoku fai ʻe he kau Kalisitiané ia ha faitau fakalaumālie

[Fakatātā ʻi he peesi 18]

ʻOku ngāue ʻa e kau tauhi-sipi Kalisitiané, ʻikai ʻi he siokita, ka ʻi he ʻofa