Fakahīkihikiʻi ʻe he Fuʻu Kakai Lahi ʻo e Fanga Sipi Kehé ʻa e ʻOtuá mo Kalaisi

 1. Naʻe maongo fēfē ki ha kiʻi talavou ʻa e malanga ʻi ha fakataha-lahi ʻi he 1935?

NAʻE ʻi ai ha fāmili naʻa nau kau ʻi he Kau Ako Tohi Tapú pe ko hono ui ia ʻo e Kau Fakamoʻoni ʻa Sihová ʻi he kuohilí. Naʻe ʻi ai ha foha ʻe toko tolu ʻa e ongo mātuʻá mo e ʻofefine ʻe toko ua pea naʻá na akoʻi ke nau tauhi kia Sihova pea faʻifaʻitaki kia Kalaisi. Naʻe papitaiso hona foha ʻe taha ʻi he 1926 ʻa ia ko hono taʻu 18 ia. Hangē ko ia naʻe fai ʻe he Kau Ako Tohi Tapu loto-moʻoní ʻi he taimi ko iá, naʻe maʻu ʻinasi ʻa e kiʻi talavou ko ení ʻi he maá mo e uainé ʻi he taʻu taki taha. Kae kehe, naʻe liliu ʻa e anga ʻene vakai ki heʻene ʻamanaki ki he kahaʻú ʻi ha malanga fakatoʻoaloto naʻe fakakaveinga ko e “Fuʻu Kakai Tokolahí.” Naʻe fakahoko ʻa e malanga ko iá ʻe J. F. Rutherford ʻi ha fakataha-lahi ʻi Washington, D.C., ʻAmelika ʻi he 1935. Ko e hā naʻe ʻiloʻi ʻi he fakataha-lahi ko iá?

 2. Ko e hā ʻa e moʻoni fakafiefia naʻe fakahaaʻi ʻi he malanga ʻa Tokoua Rutherford?

² ʻI he malanga ʻa Tokoua Rutherford naʻá ne fakamatalaʻi ai ʻa e faʻahinga ʻe faʻuʻaki ʻa e “fuʻu kakai tokolahí” (King James Version), pe “fuʻu kakai lahi,” ʻoku lave ki ai ʻa e Fakahā 7:9. ʻI he aʻu mai ki he taimi ko ení, naʻe fai ʻa e vakai ki he kulupu ko ení ko ha kalasi fakahēvani hono ua ʻa ia naʻe ʻikai ke nau fuʻu faitōnunga. Naʻe fakamatalaʻi ʻe Tokoua Rutherford mei he Folofolá ko e fuʻu kakai lahí ʻoku ʻikai ke fili kinautolu ke moʻui ʻi hēvani, ka ko e fanga sipi keheb kinautolu ʻa Kalaisi ʻa ia te nau hao ʻi he “fuʻu mamahi lahí” pea moʻui taʻengata ʻi he māmaní. (Fkh. 7:14) Naʻe talaʻofa ʻe Sīsū: “ʻOku ʻi ai mo ʻeku fanga sipi kehe, ʻa ia ʻoku ʻikai ke nau kau ʻi he lotoʻā ko ení; kuo pau ke u taki mo e faʻahinga ko iá, pea te nau fanongo ki hoku leʻó, pea te nau hoko ko e tākanga pē ʻe taha pea ʻe taha pē ʻa e tauhi-sipí.” (Sione 10:16) Ko e faʻahinga ko eni hangē ha sipí ko e Kau Fakamoʻoni mateaki kinautolu ʻa Sihova ʻoku nau maʻu ʻa e ʻamanaki ke moʻui taʻengata ʻi he māmani Palataisi. (Māt. 25:31-33, 46) Tau vakai angé ki hono liliu ʻe he maama fakalaumālie ko ení ʻa e moʻui ʻa e tokolahi ʻo e kakai ʻa Sihová kau ai ʻa e tokoua taʻu 18 naʻe lave ki ai he kamatá.​—Saame 97:11; Pal. 4:18.

3-4. ʻI he fakataha-lahi ʻi he 1935, ko e hā naʻe ʻiloʻi ʻe he laui afe fekauʻaki mo ʻenau ʻamanakí, pea ko e hā hono ʻuhingá?

³ ʻI he fakataha-lahi ko iá naʻe ʻeke ʻe he tokotaha malangá ki he kau fanongó: “Ko e faʻahinga kotoa ʻoku nau maʻu ʻa e ʻamanaki ke moʻui taʻengata ʻi he māmaní ʻe lava ke mou tuʻu hake?” Naʻe pehē ʻe ha tokotaha naʻe ʻi ai tonu, laka hake ʻi he vaeua ʻo e toko 20,000 naʻe ʻi aí naʻa nau tuʻu hake. Ko e meʻa fakangalongataʻa ia ʻi he fakataha-lahi ko iá. Naʻe fanongonongo leva ʻe Tokoua Rutherford: “Vakai! Ko e fuʻu kakai tokolahi!” Hili iá naʻe hoko ai ha fuʻu mavava leʻo-lahi. Naʻe ʻiloʻi ʻe he faʻahinga naʻe tuʻu haké naʻe ʻikai ke fili kinautolu ke moʻui ʻi hēvani. Naʻa nau ʻiloʻi naʻe ʻikai ke pani kinautolu ʻe he laumālie ʻo e ʻOtuá. ʻI he ʻaho hoko ʻo e fakataha-lahí, naʻe papitaiso ʻa e Kau Fakamoʻoni ʻe toko 840, ko e tokolahi taha ʻo kinautolu ko e fanga sipi kehe.

⁴ Hili ʻa e malanga ko iá, ko e kiʻi tokoua naʻe lave ki ai ki muʻá mo e laui afe kehe naʻe ʻikai ke nau toe maʻu ʻinasi ʻi he maá mo e uainé ʻi he Kai Efiafi ʻa e ʻEikí. Naʻe fakahaaʻi anga-fakatōkilalo ʻe ha tokoua ʻa e ongoʻi ʻa e tokolahi ʻi heʻene pehē: “Ko e taimi fakamuimui taha naʻá ku maʻu ʻinasi ai ʻi he maá mo e uainé ko e Fakamanatu ʻi he 1935. Naʻá ku ʻiloʻi naʻe teʻeki ke u fakamoʻoniʻi fakafou ʻi he laumālie māʻoniʻoni ʻo Sihová ʻoku ou maʻu ʻa e ʻamanaki ke moʻui ʻi hēvaní; ʻi hono kehé, naʻá ku maʻu ʻa e ʻamanaki ke moʻui ʻi he māmaní pea kau ʻi hono ʻai ia ke hoko ko ha palataisí.” (Loma 8:16, 17; 2 Kol. 1:21, 22) Talu mei ai, kuo tupulaki ʻa e tokolahi ʻo e fuʻu kakai lahí pea kuo nau ngāue fāitaha mo e toenga ʻo e kau paní.c

 5. ʻOku anga-fēfē vakai ʻa Sihova ki he faʻahinga kuo ʻikai ke nau toe maʻu ʻinasi ʻi he Fakamanatú?

⁵ ʻOku anga-fēfē vakai ʻa Sihova ki he faʻahinga kuo ʻikai ke nau toe maʻu ʻinasi ʻi he Fakamanatú hili ʻa e 1935? Kae fēfē kapau ʻoku maʻu ʻinasi ha Fakamoʻoni ʻosi papitaiso he ʻahó ni ʻi he maá mo e uainé ʻi he Kai Efiafi ʻa e ʻEikí peá ne toki ʻilo ki mui ʻoku ʻikai ke pani ia? (1 Kol. 11:28) Kuo maʻu ʻinasi ʻa e niʻihi koeʻuhi ko ʻenau maʻuhala fekauʻaki mo ʻenau ʻamanakí. Ka ʻo kapau ʻoku nau fakahaaʻi moʻoni ʻenau fehālaakí, ʻikai ke toe maʻu ʻinasi, pea tauhi faitōnunga ai pē kia Sihova, ko hono moʻoní te ne lau ʻoku nau kau ʻi he fanga sipi kehé. Neongo ʻoku ʻikai ke nau maʻu ʻinasi ʻi he maá mo e uainé, ʻoku nau kei maʻu pē ʻa e Fakamanatú koeʻuhi ko ʻenau houngaʻia lahi ʻi he meʻa kuo fai ʻe Sihova mo Sīsū maʻa kinautolú.

 6. Ko e hā kuo fekauʻi ʻe Sīsū ke fai ʻe he kau ʻāngeló?

⁶ Koeʻuhi ko e vavé ni ke hoko mai ʻa e fuʻu mamahi lahí, ʻe fakalototoʻa ke tau vakai ki he meʻa ʻoku leaʻaki ʻi he Fakahā vahe 7 fekauʻaki mo e kau Kalisitiane paní mo e fuʻu kakai lahi ʻo e fanga sipi kehé. ʻOku fekauʻi ʻe Sīsū ʻa e kau ʻāngeló ke hokohoko atu ʻenau puketuʻu ʻa e matangi ʻe fā ʻo e fakaʻauhá. Heʻikai ke nau tuku ange ʻa e ngaahi matangi ko iá ki he māmaní kae ʻoua kuo silaʻi ʻa e kau Kalisitiane paní kotoa, ʻa ia, ko hono fakapapauʻi ʻe Sihova ʻoku nau faitōnungá. (Fkh. 7:1-4) Ko e pale ki he faitōnunga ʻa e fanga tokoua pani ʻo Kalaisí, ko ʻenau hoko ko e ngaahi tuʻi mo e kau taulaʻeiki fakataha mo ia ʻi hēvani. (Fkh. 20:6) Ko e faʻahinga kotoa ʻoku faʻuʻaki ʻa e fāmili fakahēvani ʻo e ʻOtuá te nau vēkeveke ke sio ki hono maʻu ʻe he kau pani ʻe toko 144,000 honau pale fakahēvaní.

 7. ʻI he Fakahā 7:9, 10, ko hai naʻe mamata ki ai ʻa Sione ʻi he vīsoné, pea ko e hā naʻa nau faí? (Sio ki he tā ʻi he takafí.)

⁷ Hili ʻa e fakamatala ʻa Sione fekauʻaki mo e ngaahi tuʻi mo e kau taulaʻeiki ko eni ʻe toko 144,000, ʻokú ne vakai ki ha meʻa fakafiefia ko ha “fuʻu kakai lahi” ʻoku nau hao atu ʻi ʻĀmaketone. ʻI he ʻikai hangē ko e kulupu ʻuluakí, ko e kulupu hono ua ko ení ʻoku nau toe tokolahi ʻaupito ange pea ʻikai lava hano lau. (Lau ʻa e Fakahā 7:9, 10.) ʻOku nau “tui ʻa e ngaahi kofu hinehina tōtōlofa,” ʻo fakahaaʻi ai kuo nau tauhi kinautolu ke “taʻehaʻila” mei he māmani ʻo Sētané pea kuo nau nofoʻaki mateaki ki he ʻOtuá mo Kalaisi. (Sēm. 1:27) ʻOku nau kalanga kuo nau hao koeʻuhi ko e meʻa kuo fai ʻe Sihova mo Sīsū, ʻa e Lami ʻa e ʻOtuá. Pea ʻoku nau toʻo foki ʻa e ngaahi vaʻa paame, ʻo fakahaaʻi ai ʻoku nau tali fiefia ʻa Sīsū, ko e Tuʻi fakanofo ʻa Sihová.​—Fakafehoanaki mo e Sione 12:12, 13.

 8. Ko e hā ʻoku tala mai ʻi he Fakahā 7:11, 12 fekauʻaki mo e fāmili fakahēvani ʻo Sihová?

⁸ Lau ʻa e Fakahā 7:11, 12. Ko e hā naʻe hoko ʻi hēvaní? ʻOku sio ʻa Sione ki he kotoa ʻo e fāmili fakahēvani ʻo Sihová ʻoku nau fiefia lahi ʻi heʻenau sio ki he fuʻu kakai lahí pea nau fakahīkihikiʻi ʻa e ʻOtuá. ʻE fiefia ʻa e fāmili fakahēvani ʻo Sihová ʻi hono fakahoko ʻa e vīsone ko ení ʻi he taimi ʻe hao moʻui atu ai ʻa e fuʻu kakai lahí ʻi he fuʻu mamahi lahí.

 9. Fakatatau ki he Fakahā 7:13-15, ko e hā ʻoku fai ʻe he fuʻu kakai lahí ʻi he ʻaho ní?

⁹ Lau ʻa e Fakahā 7:13-15. ʻOku tohi ʻe Sione ko e fuʻu kakai lahí kuo nau “fō honau ngaahi kofu tōtōlofá ʻo fakahinehina kinautolu ʻi he taʻataʻa ʻo e Lamí.” ʻOku ʻuhinga ení ʻoku nau maʻu ha konisēnisi maʻa mo ha tuʻunga māʻoniʻoni ʻi he ʻao ʻo Sihová. (ʻAi. 1:18) Ko e kau Kalisitiane ʻosi fakatapui mo ʻosi papitaiso kinautolu, ʻoku nau ngāueʻi ʻa e tui mālohi ki he feilaulau ʻa Sīsuú pea maʻu ha vahaʻangatae mo Sihova. (Sione 3:36; 1 Pita 3:21) Ko ia ʻoku nau taau ai ke ʻi he ʻao ʻo e taloni ʻo e ʻOtuá ʻo fai kiate ia “ʻa e ngāue toputapu ʻi he ʻaho mo e pō” ʻi hono temipale fakalaumālie ʻi he māmaní. Naʻa mo e ʻahó ni, ʻoku nau fakahoko faivelenga ʻa e konga lahi taha ʻo e ngāue malangaʻi ʻo e Puleʻangá mo e ngaohi ākongá, ʻo fakamuʻomuʻa ʻa e ngaahi meʻa ʻo e Puleʻanga ʻo e ʻOtuá ʻi haʻanautolú.​—Māt. 6:33; 24:14; 28:19, 20.

10. Ko e hā ʻoku fakapapauʻi ʻe he fuʻu kakai lahí, pea ko e hā ʻa e talaʻofa ʻe hoko moʻoní?

¹⁰ Ko e fuʻu kakai lahi te nau hao atu ʻi he fuʻu mamahi lahí ʻoku nau fakapapauʻi ʻe hokohoko atu hono tokangaʻi kinautolu ʻe he ʻOtuá, he “ko e Tokotaha ʻoku ʻafio ʻi he taloní te ne falō atu hono tēnití kiate kinautolu.” Ko e talaʻofa kuo talu e fakaʻamu ʻa e fanga sipi kehé ke fakahokó ʻe hoko moʻoni: “[Ko e ʻOtuá] te ne holoholo ʻa e loʻimata kotoa pē mei honau matá, pea ʻe ʻikai ke toe ʻi ai ha mate, pe ha mamahi pe ha tangi pe ha langa.”​—Fkh. 21:3, 4.

11-12. (a) Hangē ko ia ʻoku fakahaaʻi ʻi he Fakahā 7:16, 17, ko e hā ʻa e ngaahi tāpuaki ʻoku tuku tauhi mai ki he fuʻu kakai lahí? (e) Ko e hā ʻe lava ke fai ʻe he fanga sipi kehé ʻi he Fakamanatú, pea ko e hā hono ʻuhingá?

¹¹ Lau ʻa e Fakahā 7:16, 17. ʻI he taimí ni, ko e niʻihi ʻo e kakai ʻa Sihová ʻoku nau fiekaia koeʻuhi ko e palopalema fakaʻekonōmiká pe ko e moveuveu fakapolitikalé mo e taú. Ko e niʻihi ʻoku tuku pilīsone koeʻuhi ko ʻenau tuí. Kae kehe, ʻoku fiefia ʻa e fuʻu kakai lahí ke ʻiloʻi ʻi heʻenau hao atu ʻi hono fakaʻauha ʻa e fokotuʻutuʻu fulikivanu ko ení, te nau maʻu maʻu pē ʻa e meʻakai hulu fau fakamatelie mo fakalaumālie. ʻI hono fakaʻauha ʻa e fokotuʻutuʻu ko eni ʻa Sētané, ko e fuʻu kakai lahí te nau hao ʻi hono lilingi hifo ʻe Sihova ʻene houhaú ʻo hangē ha “meʻa fakatupu velahia” ki he ngaahi puleʻangá. ʻI he ngataʻanga ʻo e fuʻu mamahi lahí, ʻe taki atu ʻe Sīsū ʻa e faʻahinga ʻe hao moʻui ʻi he māmaní ki he ‘vai ʻo e moʻui taʻengatá.’ Fakakaukau atu ki ai: Ko e fuʻu kakai lahí ʻoku nau maʻu ha ʻamanaki makehe. ʻI he kotoa ʻo e laui piliona kuo faifai ange pea nau moʻuí, heʻikai ʻaupito nai ke nau mate!​—Sione 11:26.

¹² ʻOku maʻu ʻe he fanga sipi kehé ha ʻamanaki fakaofo ʻa ia ʻoku nau fakamālō ai kia Sihova mo Sīsū! Naʻe ʻikai ke fili kinautolu ke moʻui ʻi hēvani, ka ʻoku ʻikai ke siʻi ai honau mahuʻingá kia Sihova. Ko e faʻahinga ʻoku nau kau ʻi he ongo kulupú fakatouʻosi ʻe lava ke nau fakahīkihikiʻi ʻa e ʻOtuá mo Kalaisi. Ko e founga ʻe taha ʻe lava ke nau fai ai eni ko hono maʻu ʻa e Kai Efiafi ʻa e ʻEikí.

13-14. Ko e hā ʻoku totonu ai ke maʻu ʻe he tokotaha kotoa ʻa e Fakamanatu ʻo e pekia ʻa Kalaisí?

¹³ ʻI he ngaahi taʻu ki mui ní, ʻoku fakafuofua ki he toko 1 ʻi he toko 1,000 kotoa ʻoku nau maʻu ʻa e Fakamanatú ʻokú ne maʻu ʻinasi ʻi he maá mo e uainé. Ko e lahi taha ʻo e ngaahi fakatahaʻangá ʻoku ʻikai ha taha ai ʻe maʻu ʻinasi. Ko e tokolahi taha ʻoku nau maʻu ʻa e Fakamanatú ʻoku nau maʻu ʻa e ʻamanaki ke moʻui ʻi he māmaní. Ko e hā leva ʻoku nau maʻu ai ʻa e Kai Efiafi ʻa e ʻEikí? Hangē pē ko e ʻalu ʻa e kakaí ki ha mali hanau kaumeʻa. Ko ʻenau maʻu iá koeʻuhi ʻoku nau loto ke fakahaaʻi ʻenau ʻofa mo e poupou ki he ongo meʻa malí. Ko ia ko e ʻuhinga tatau ʻoku maʻu ai ʻe he fanga sipi kehé ʻa e Fakamanatú, koeʻuhi ʻoku nau loto ke fakahaaʻi ʻenau ʻofa mo e poupou kia Kalaisi mo e kau paní. Ko e toe ʻuhinga ʻoku maʻu ai ʻe he fanga sipi kehé ʻa e Fakamanatú, ke fakahaaʻi ʻenau houngaʻia ʻi he feilaulau ʻa Sīsuú, ko ha feilaulau ʻokú ne ʻai ke malava kiate kinautolu ke moʻui taʻengata ʻi he māmaní.

¹⁴ Ko ha toe ʻuhinga mahuʻinga ʻe taha ʻoku maʻu ai ʻe he fanga sipi kehé ʻa e Fakamanatú ko ʻenau talangofua ki he fekau ʻa Sīsuú. ʻI hono fokotuʻu ʻe Sīsū ʻa e houa kai makehe ko iá mo ʻene kau ʻapositolo faitōnungá, naʻá ne tala ange: “Hanganaki fai eni ko hoku fakamanatu.” (1 Kol. 11:23-26) Ko ia ʻoku hokohoko atu ʻenau maʻu ʻa e Kai Efiafi ʻa e ʻEikí ʻi he kei moʻui ʻi he māmaní ʻa e niʻihi ʻo e kau paní. Ko hono moʻoní, ʻoku fakaafeʻi ʻe he fanga sipi kehé ʻa e tokotaha kotoa ke nau maʻu fakataha ʻa e Fakamanatú.

15. ʻE lava fēfē ke tau fakahīkihikiʻi ʻa e ʻOtuá mo Kalaisi ʻi he Fakamanatú?

¹⁵ ʻI he Fakamanatú, ʻoku tau maʻu ʻa e faingamālie ke fakahīkihikiʻi ʻa e ʻOtuá mo Kalaisi ʻi he hiva mo e lotu. Ko e malanga ʻe fakahoko ʻi he taʻu ní, ko e “Houngaʻia ʻi he Meʻa Kuo Fai ʻe he ʻOtuá mo Kalaisi Maʻaú!” ʻE fakalahi ai ʻetau houngaʻia kia Sihova mo Kalaisí. ʻI hono paasi ʻa e maá mo e uainé, te tau manatuʻi ai ʻa e meʻa ʻokú na fakatātaaʻí​—ʻa e sino mo e taʻataʻa ʻo Sīsuú. Te tau fakakaukau ai ki hono foaki mai ʻe Sihova hono ʻAló ke pekia koeʻuhi ke tau maʻu ai ʻa e moʻuí. (Māt. 20:28) Ko e tokotaha kotoa ʻoku nau ʻofa ki heʻetau Tamai fakahēvaní mo hono ʻAló te nau loto ke maʻu ʻa e Fakamanatú.

16. Ko e hā ʻa e ngaahi founga ʻoku tatau ai ʻa e kau paní mo e fanga sipi kehé?

¹⁶ ʻI ha ʻuhinga, ko e kau paní mo e fanga sipi kehé ʻokú na tatau. ʻOku ʻikai ke ʻofa lahi ange ʻa Sihova ʻi he kulupu ʻe taha ʻi he taha. ʻOkú na fakatou mahuʻinga pē ki he ʻOtuá. He ko ē, naʻá ne totongi ʻa e mahuʻinga tatau, ʻa e moʻui ʻa hono ʻAlo ʻofeiná, ke fakatau mai ʻaki ʻa e kau paní mo e fanga sipi kehé. Ko e kehekehe pē ʻo e ongo kulupú ko ʻena ʻamanakí. Ko e ongo kulupú fakatouʻosi kuo pau ke na nofoʻaki mateaki ki he ʻOtuá mo Kalaisi. (Saame 31:23) Pea manatuʻi ko e laumālie ʻo e ʻOtuá ʻoku tatau pē ʻa e ngāue hono mālohí ʻiate kitautolu kotoa. ʻOku ʻuhinga ení ʻoku tokonaki mai ʻe Sihova hono laumālie māʻoniʻoní ki he tokotaha taki taha ʻo fakatatau ki he meʻa ʻoku fiemaʻú.

17. Ko e hā ʻoku fakatuʻotuʻa atu ki ai ʻa e toenga ʻo e kau paní?

¹⁷ Ko e kau Kalisitiane paní ʻoku ʻikai ke fanauʻi mai kinautolu mo e ʻamanaki fakahēvaní. Kuo pau ke ʻai ia ʻe he ʻOtuá ki honau lotó. ʻOku nau fakakaukau ki heʻenau ʻamanakí, lotu fekauʻaki mo ia, pea ʻoku nau vēkeveke ke maʻu honau pale ʻi hēvaní. ʻOku ʻikai lava ʻo aʻu ʻo nau fakaʻuta atu pe ʻe fēfē honau sino fakalaumālié. (Fil. 3:20, 21; 1 Sio. 3:2) Neongo ia, ʻoku nau fakatuʻotuʻa atu ke fetaulaki mo Sihova, Sīsū, kau ʻāngeló mo e toenga ʻo e kau paní. ʻOku nau fakaʻamu ke nau ʻi ai fakataha mo kinautolu ʻi he Puleʻanga fakahēvaní.

18. Ko e hā ʻoku fakatuʻotuʻa atu ki ai ʻa e fanga sipi kehé?

¹⁸ Ko e fanga sipi kehé ʻoku nau koloaʻaki ha ʻamanaki ʻoku fakanatula pē hono maʻu ʻe he faʻahinga ʻo e tangatá, ko e ʻamanaki ke moʻui taʻengata ʻi he māmaní. (Tml. 3:11) ʻOku nau fakatuʻotuʻa atu ki he ʻaho te nau tokoni ai ki hono ʻai ʻa e māmaní kotoa ke hoko ko ha palataisi. ʻOku nau fakaʻamu ke aʻu ki he ʻaho ʻe lava ke nau langa ai honau fale, tō ʻenau ngoue pea ʻohake ʻenau fānaú ʻi he moʻui lelei haohaoa. (ʻAi. 65:21-23) ʻOku nau fakatuʻotuʻa atu ke ʻeva ki he ʻotu moʻungá, vaotaá mo e tahí pea ke ako ki he ngaahi meʻa hulu fau kuo fakatupu ʻe Sihová. Hiliō he meʻa kotoa, ʻoku nau fiefia ke ʻiloʻi ko honau vahaʻangatae mo Sihová ʻe tupu ke toe mālohi ange pea vāofi ange.

19. Ko e Fakamanatú ʻokú ne ʻomai ʻa e faingamālie kiate kitautolu ke fai ʻa e hā, pea ʻe fakahoko fakakū ʻa e Fakamanatu ʻi he taʻu ní?

¹⁹ Kuo ʻoange ʻe Sihova ki heʻene sevāniti fakatapui taki taha ha ʻamanaki fakaofo ki he kahaʻú. (Sel. 29:11) Ko e Fakamanatu ʻo e pekia ʻa Kalaisí ʻoku ʻomai ai kiate kitautolu taki taha ha faingamālie lahi ke fakahīkihikiʻi ʻa e ʻOtuá mo Kalaisi ki he meʻa kuó na fai maʻa kitautolu ke malava ʻo tau maʻu ai ʻa e moʻui taʻengatá. ʻOku ʻikai ha veiveiua ko e Fakamanatú ʻa e fakataha mahuʻinga taha ke maʻu ʻe he kau Kalisitiane moʻoní. ʻE fakahoko ia ʻi he hili ʻa e tō ʻa e laʻaá ʻi he Tokonaki, Maʻasi 27, 2021. ʻI he taʻú ni ko e tokolahi te nau tauʻatāina ke maʻu ʻa e fakataha mahuʻinga ko ení. ʻE maʻu ia ʻe he niʻihi neongo ʻa e fakafepakí. ʻE fehangahangai ʻa e niʻihi mo e pole ʻi hono fakahoko ʻa e fakamanatú ʻi pilīsone. Lolotonga ʻa e vakai hifo ʻa Sihova, Sīsū, mo e fāmili fakahēvani ʻo e ʻOtuá, ʻofa ke maʻu ʻe he fakatahaʻanga kotoa, kulupu mo e tokotaha taki taha ha Fakamanatu fakafiefia!