“Vakai, Tā ko ha Fuʻu Kakai Lahi”

 1. Ko e hā ʻa e tuʻunga ʻo e ʻapositolo ko Sioné ʻi he ngataʻanga ʻo e ʻuluaki senituli T.S.?

ʻI HE ngataʻanga ʻo e ʻuluaki senituli T.S., ko e ʻapositolo ko Sioné naʻá ne ʻi ha tuʻunga faingataʻa. Naʻá ne taʻumotuʻa, ʻo tuku pōpula ʻi he motu ko Pātimosí, pea ngalingali ko e ʻapositolo pē ia naʻe kei moʻuí. (Fkh. 1:9) Naʻá ne ʻilo naʻe tākihalaʻi ʻe he kau fakafepakí ʻa e ngaahi fakatahaʻangá pea fakatupu māvahevahe. Naʻe hā ngali ko e lotu faka-Kalisitiané naʻe vavé ni ke ngata.​—Sute 4; Fkh. 2:15, 20; 3:1, 17.

 2. Fakatatau ki he Fakahā 7:9-14, ko e hā ʻa e vīsone fakaekikite fakafiefia naʻe maʻu ʻe Sioné? (Sio ki he tā ʻi he takafí.)

² Lolotonga ʻa e ngaahi tuʻunga faingataʻa ko ení, naʻe maʻu ʻe Sione ha vīsone fakaekikite fakafiefia. ʻI he vīsoné, naʻe tala ki he kau ʻāngeló ke nau puketuʻu ʻa e ngaahi matangi ʻo e fakaʻauha ʻo e fuʻu mamahi lahí kae ʻoua ke silaʻi fakaʻosi ha kulupu ʻo e kau tamaioʻeiki. (Fkh. 7:1-3) Ko e kulupu ko iá ʻoku faʻuʻaki ʻa e toko 144,000 ʻe pule mo Sīsū ʻi hēvaní. (Luke 12:32; Fkh. 7:4) ʻOku lave leva ʻa Sione ki ha toe kulupu ʻe taha, naʻe fuʻu tokolahi ʻo ʻai ai ke ne kalanga: “Vakai”​—ko ha foʻi lea ʻoku fakahaaʻi nai ai ʻa ʻene ʻohovale ʻi he sio ki ha meʻa taʻeʻamanekina. Ko e hā ʻa e meʻa ʻoku sio ki ai ʻa Sioné? “Ko ha fuʻu kakai lahi, ʻa ia naʻe ʻikai lava ʻe ha tangata ke ne lau, mei he kotoa ʻo e ngaahi puleʻanga mo e ngaahi matakali mo e ngaahi kakai mo e ngaahi lea, ʻoku nau tuʻu ʻi he ʻao ʻo e taloní pea ʻi he ʻao ʻo e Lamí.” (Lau ʻa e Fakahā 7:9-14.) Sioloto atu ki he fiefia kuo pau naʻe maʻu ʻe Sione ke ʻilo ʻe ʻi ai ʻa e fuʻu kakai ʻe laui mano ʻi he kahaʻú te nau kau ki he lotu moʻoní!

 3. (a) Ko e hā ʻoku totonu ai ke fakaivimālohiʻi ʻetau tuí ʻe he vīsone ʻa Sioné? (e) Ko e hā te tau ako ʻi he kupu ko ení?

³ ʻOku ʻikai ha veiveiua naʻe fakaivimālohiʻi ʻe he vīsone ko iá ʻa e tui ʻa Sioné. Huanoa ange ai hono fakaivimālohiʻi ʻetau tuí, koeʻuhi ʻoku tau moʻui ʻi he taimi ʻoku fakahoko ai ʻa e vīsoné! Kuo tau sio ki hono fakatahatahaʻi ʻo e laui miliona ʻa ia ʻoku nau ʻamanaki ke hao atu ʻi he fuʻu mamahi lahí pea moʻui taʻengata ʻi he māmaní. ʻI he kupu ko ení, te tau ako ki he founga hono fakaeʻa ʻe Sihova ʻa e ʻiloʻanga ʻo e fuʻu kakai lahi ko iá ki hono kakaí ʻo laka hake ʻi he taʻu ʻe 80 kuo maliu atú. Pea te tau lāulea leva ki he tafaʻaki ʻe ua ʻo e fuʻu kakai ko iá: (1) Ko hono tokolahí (2) mo e feituʻu kehekehe ʻoku nau haʻu mei aí. Ko e ngaahi poini ko ení ʻoku totonu ke fakaivimālohiʻi ai ʻa e tui ʻa e faʻahinga kotoa ʻoku nau ʻamanaki ke kau ʻi he kulupu faitāpuekina ko iá.

 4. Ko e hā ʻa e moʻoni Fakatohitapu ʻoku ʻikai mahinoʻi ʻe he Puleʻanga-Haʻa-Kalisitiané, ka ko e hā ʻa e mahino ia ʻa e Kau Ako Tohi Tapú?

⁴ Ko e Puleʻanga-Haʻa-Kalisitiané ʻoku ʻikai ke nau akoʻi ʻa e moʻoni Fakatohitapu ko ia ko e faʻahinga talangofua ʻo e tangatá ʻe ʻi ai ʻa e ʻaho ʻe taha te nau moʻui taʻengata ʻi he māmaní. (2 Kol. 4:3, 4) ʻI he ʻahó ni, ko e lahi taha ʻo e ngaahi lotu ʻi he Puleʻanga-Haʻa-Kalisitiané ʻoku nau akoʻi ko e kakai lelei kotoa pē ʻoku nau ʻalu ki hēvani ʻi heʻenau maté. Kae kehe, naʻe kehe ia mei he kiʻi kulupu ʻo e Kau Ako Tohi Tapú ʻa ia naʻa nau pulusi ʻa e Taua Leʻo ʻi he konga ki mui ʻo e 1800 tupú. Naʻa nau mahinoʻi ʻe fakafoki mai ʻe he ʻOtuá ʻa e Palataisi ʻi he māmaní pea ko e laui miliona ʻo e faʻahinga talangofua ʻo e tangatá te nau moʻui ʻi heni ʻi he māmaní​—ʻo ʻikai ʻi hēvani. Kae kehe, naʻe fiemaʻu kiate kinautolu ʻa e taimi ke mahinoʻi māʻalaʻala ai pe ko hai ʻa e faʻahinga talangofua ko eni ʻo e tangatá.​—Māt. 6:10.

 5. Ko e hā ʻa e tui ʻa e Kau Ako Tohi Tapú fekauʻaki mo e toko 144,000?

⁵ Ko e moʻoni, ko e Kau Ako Tohi Tapú naʻa nau ʻiloʻi foki mei he Folofolá ko e niʻihi ʻe “fakatau mei he māmaní” ke pule fakataha mo Sīsū ʻi hēvani. (Fkh. 14:3) Ko e kulupu ko iá ʻe faʻuʻaki ia ʻa e kau Kalisitiane faivelenga mo līʻoa ʻe toko 144,000 ʻa ia kuo nau tauhi faitōnunga ki he ʻOtuá lolotonga ʻenau ʻi he māmaní. Kae fēfē ʻa e fuʻu kakai lahí?

 6. Ko e hā ʻa e tui ʻa e Kau Ako Tohi Tapú fekauʻaki mo e fuʻu kakai lahí?

⁶ ʻI he vīsone ʻa Sioné, naʻá ne sio ai ki he kulupu ko iá “ʻoku nau tuʻu ʻi he ʻao ʻo e taloní pea ʻi he ʻao ʻo e Lamí.” (Fkh. 7:9) Ko e ngaahi lea ko iá naʻá ne ʻai ʻa e Kau Ako Tohi Tapú ke nau fakamulitukuʻaki, hangē ko e toko 144,000, ko e fuʻu kakai lahí te nau nofo ʻi hēvani. Kapau ʻe fakatou nofo ʻa e toko 144,000 mo e fuʻu kakai lahí ʻi hēvani, ʻe anga-fēfē ʻa e kehekehe ʻa e ongo kulupú? Naʻe fakakaukau ʻa e Kau Ako Tohi Tapú ko e fuʻu kakai lahí kuo pau ke faʻuʻaki ʻa e kau Kalisitiane naʻe ʻikai ke nau talangofua kakato ki he ʻOtuá lolotonga ʻenau ʻi he māmaní. Neongo naʻa nau muimui ki he ngaahi tuʻunga fakaeʻulungaanga ʻi he Tohi Tapú, ko e niʻihi ʻo kinautolu naʻa nau kei kau pē nai ki he ngaahi siasi ʻo e Puleʻanga-Haʻa-Kalisitiané. Naʻe fakaʻosiʻaki ʻe he Kau Ako Tohi Tapú ko e faʻahinga peheé naʻa nau fakahāhā ha faivelenga kae ʻikai taau feʻunga ke pule fakataha mo Sīsū. Koeʻuhi ko ʻenau ʻofa ki he ʻOtuá naʻe ʻikai mālohi feʻunga, ko e fuʻu kakai lahí te nau taau ke ʻi hēvani ʻi he ʻao ʻo e taloní kae ʻikai tangutu ʻi he taloní.

 7. Fakatatau ki he Kau Ako Tohi Tapú, ko hai ʻe moʻui ʻi he māmaní lolotonga e Taʻu ʻe Taha Afé, pea ko e hā ʻa e tui ʻa e Kau Ako Tohi Tapú fekauʻaki mo e kau tangata faitōnunga ʻi he kuohilí?

⁷ Ko hai leva ʻe nofo he māmaní? Naʻe tui ʻa e Kau Ako Tohi Tapú ʻi he hili hono tānaki ʻa e toko 144,000 mo e fuʻu kakai lahí ki hēvaní, ko e laui miliona kehe ʻoku toé te nau maʻu ʻa e moʻui ʻi he māmaní pea hokosia ʻa e ngaahi tāpuaki ʻo e Pule Taʻu ʻe Taha Afe ʻa Kalaisí. Naʻe ʻikai ʻamanekina ʻe he Kau Ako Tohi Tapú ʻa e laui miliona ko iá ke nau tauhi kia Sihova ki muʻa ʻa e kamata ʻa e Pule ʻa Kalaisí. ʻI hono kehé, naʻa nau fakakaukau ko e kulupu ko ení ʻe akoʻi ʻo fekauʻaki mo e ngaahi founga ʻa Sihová lolotonga ʻa e Taʻu ʻe Taha Afé. Hili iá, ko e faʻahinga te nau talangofua ki he ngaahi tuʻunga ʻa Sihová ʻe tāpuakiʻi ʻaki ʻenau maʻu ʻa e moʻui taʻengata ʻi he māmaní, pea ko e faʻahinga angatuʻú ʻe fakaʻauha. Naʻe toe fakakaukau ʻa e Kau Ako Tohi Tapú mahalo ko e niʻihi te nau ngāue ko e “ngaahi ʻeiki” ʻi he māmaní​—kau ai ʻa e faʻahinga toetuʻu mei he kuohilí (kau tangata faitōnunga naʻe mate ki muʻa ʻia Kalaisí)—​te nau maʻu honau pale fakahēvaní ʻi he ngataʻanga ʻo e Taʻu ʻe Taha Afé.​—Saame 45:16.

 8. Ko e hā ʻa e kulupu ʻe tolu naʻe hā ngali ʻoku nau kau ʻi he taumuʻa ʻa e ʻOtuá?

⁸ Ko ia, naʻe tui ʻa e Kau Ako Tohi Tapú naʻe ʻi ai ʻa e kulupu ʻe tolu: (1) Ko e toko 144,000, ʻa ia te nau pule fakataha mo Sīsū ʻi hēvani; (2) fuʻu kakai lahi ʻo e kau Kalisitiane ʻikai fuʻu faivelenga, ʻa ia te nau tuʻu ʻi he ʻao ʻo e taloni ʻo Sīsū ʻi hēvaní; pea (3) ko e laui miliona ʻo e kakai ʻe akoʻi ki he ngaahi founga ʻa Sihová ʻi he māmaní lolotonga ʻa e Pule Taʻu ʻe Afe ʻa Kalaisí.b Ka, ʻi he taimi kotofa ʻa Sihová, ko e maama ʻo e moʻoni fekauʻaki mo e kaveinga ko ení naʻe kamata ke ulo ʻo toe maama ange.​—Pal. 4:18.

 9. (a) ʻI he founga fē ʻe lava ai ke tuʻu “ʻi he ʻao ʻo e taloní pea ʻi he ʻao ʻo e Lamí” ʻa e fuʻu kakai lahi ʻi he māmaní? (e) Ko e hā ʻoku ʻuhinga lelei ai ʻa e mahino ko eni ʻi he Fakahā 7:9?

⁹ ʻI he 1935 ko e mahino fekauʻaki mo e fuʻu kakai lahi ʻi he vīsone ʻa Sioné naʻe māʻalaʻala. Naʻe toki ʻiloʻi ʻe he Kau Fakamoʻoni ʻa Sihová ko e fuʻu kakai lahí ʻoku ʻikai ke fiemaʻu moʻoni ia ke nau tuʻu “ʻi he ʻao ʻo e taloní pea ʻi he ʻao ʻo e Lamí” ʻi hēvani. Ka ʻi hono kehé, ʻoku nau fai eni ʻi ha founga fakaefakatātā. Neongo te nau nofo ʻi he māmaní, ko e fuʻu kakai lahí ʻoku lava ke nau tuʻu “ʻi he ʻao ʻo e taloní” fakafou ʻi heʻenau lāuʻilo ki he mafai ʻo Sihová pea fakamoʻulaloa ki hono tuʻunga-haú. (ʻAi. 66:1) ʻE lava ke nau tuʻu “ʻi he ʻao ʻo e Lamí” ʻaki ʻenau ngāueʻi ʻa e tui ki he feilaulau huhuʻi ʻa Sīsuú. ʻI he tuʻunga meimei tatau, ʻi he Mātiu 25:31, 32, ko e “ngaahi puleʻanga kotoa pē”​—kau ai ʻa e kau fulikivanú—​ʻoku pehē te nau ‘fakatahataha ki he ʻao,’ ʻo Sīsuú ʻi hono taloni lāngilangiʻiá. ʻOku hā mahino, ko e kotoa ʻo e ngaahi puleʻanga ko ení, ʻoku ʻikai ʻi hēvani, ka ʻi he māmaní. Ko e fakatonutonu ko eni ʻo e mahinó ʻoku ʻuhinga lelei. ʻOku fakamatalaʻi ai ʻa e ʻuhinga ʻoku ʻikai lave ai ʻa e Tohi Tapú ki he fuʻu kakai lahí ʻoku ʻohake ki hēvani. Ko e kulupu pē ʻe taha kuo talaʻofa mai te nau maʻu ʻa e moʻui taʻengata ʻi hēvaní​—ko e toko 144,000, ʻa ia te nau “pule ko e ngaahi tuʻi ki he māmaní” fakataha mo Sīsū.​—Fkh. 5:10.

10. Ko e hā ʻe fiemaʻu ai ki he fuʻu kakai lahí ke akoʻi kinautolu fekauʻaki mo e ngaahi founga ʻa Sihová ki muʻa he Taʻu ʻe Taha Afé?

¹⁰ Talu mei he 1935, kuo mahinoʻi ʻe he Kau Fakamoʻoni ʻa Sihová ko e fuʻu kakai lahi ʻi he vīsone ʻa Sioné ʻoku faʻuʻaki ia ha kulupu ʻo e kau Kalisitiane faitōnunga ʻa ia ʻoku nau maʻu ʻa e ʻamanaki ʻo e moʻui taʻengata ʻi he māmaní. Koeʻuhi ke hao ʻi he fuʻu mamahi lahí, ko e fuʻu kakai lahí kuo pau ke akoʻi kinautolu fekauʻaki mo e ngaahi founga ʻa Sihová ki muʻa ke kamata ʻa e Taʻu ʻe Taha Afé. ʻE fiemaʻu ke nau fakahaaʻi ʻa e tui mālohi kae malava ke nau “hao ʻi he ngaahi meʻa kotoa pē ko eni kuo pau ke hokó” ki muʻa ʻi he Pule Taʻu ʻe Taha Afe ʻa Kalaisí.​—Luke 21:34-36.

11. Ko e hā nai naʻe fakakaukau ai ʻa e Kau Ako Tohi Tapú ʻe ʻohake ʻa e niʻihi ki hēvani hili ʻa e Taʻu ʻe Taha Afé?

¹¹ Kae fēfē ʻa e fakakaukau ko ia ʻe ʻohake ki hēvani ʻa e niʻihi faʻifaʻitakiʻanga lelei ʻi he māmaní hili ʻa e Taʻu ʻe Taha Afé? Ko e foʻi fakakaukau ko iá naʻe fakahaaʻi ʻi he laui taʻu kuo maliu atú ʻi he ʻīsiu ʻo e Watch Tower ʻo Fepueli 15, 1913. ʻE lava ke fakaʻuhinga ʻa e niʻihi, ‘Ko e hā ʻe maʻu pē ai ʻe he kau tangata faitōnunga ʻi he kuohilí ha tofiʻa ʻi he māmaní kae maʻu ʻe he kau Kalisitiane naʻa nau fakataʻetaʻetokangá ʻa e pale ke moʻui ʻi hēvaní?’ Ko e moʻoni, ko e fakakaukau ko iá naʻe tākiekina ʻe ha fakamahamahalo hala ʻe ua: (1) Ko e fuʻu kakai lahí te nau moʻui ʻi hēvani pea (2) ko e fuʻu kakai lahí ʻe faʻuʻaki ʻa e kau Kalisitiane ʻoku ʻikai ke nau fuʻu faivelenga.

12-13. Ko e hā ʻoku ʻiloʻi ʻe he kau paní mo e fuʻu kakai lahí fekauʻaki mo honau palé?

¹² Kae kehe, hangē ko ia kuo tau vakai ki aí, talu mei he 1935, ko e Kau Fakamoʻoni ʻa Sihová kuo nau mahinoʻi māʻalaʻala ko e kau hao atu ʻi ʻĀmaketoné ko e fuʻu kakai lahi ʻi he vīsone ʻa Sioné. Te nau “hao mei he fuʻu mamahi lahí” ʻi heni tonu ʻi he māmaní, pea te nau “toutou kalanga leʻo-lahi, ʻo pehē: ‘Ko hotau fakamoʻuí ʻoku mei he ʻOtuá, ʻa ia ʻokú ne ʻafio ʻi he taloní, pea mei he Lamí.’” (Fkh. 7:10, 14) ʻIkai ngata aí, ʻoku akoʻi mai ʻi he Folofolá ko e faʻahinga ʻoku fokotuʻu hake ki he moʻui fakahēvaní ʻoku nau maʻu “ha meʻa lelei ange” ʻi he faʻahinga faitōnunga ʻo e tangatá ʻi he kuohilí. (Hep. 11:40) ʻI he fehoanaki mo iá naʻe kamata vēkeveke hotau fanga tokouá ke fakaafeʻi ʻa e kakaí ke tauhi kia Sihova fakataha mo e ʻamanaki ke moʻui taʻengata ʻi he māmaní.

¹³ Ko e fuʻu kakai lahí ʻoku nau fiefia ʻi heʻenau ʻamanakí. ʻOku nau mahinoʻi ʻoku fili ʻe Sihova ʻa e feituʻu ʻe ngāue ai kiate ia ʻene kau lotu faitōnungá, tatau ai pē ʻi hēvani pe ʻi māmani. Ko e kau paní mo e fuʻu kakai lahí ʻoku nau ʻiloʻi ʻoku malava ke nau maʻu honau palé koeʻuhi pē ko e ʻofa maʻataʻatā ʻa Sihová ʻa ia ʻoku fakahaaʻi fakafou ʻi he feilaulau huhuʻi ʻa Sīsū Kalaisí.​—Loma 3:24.

14. Hili ʻa e 1935, ko e hā naʻe fifili ai ʻa e tokolahi pe ʻe fakahoko fēfē ʻa e kikite fekauʻaki mo e fuʻu kakai lahí?

¹⁴ Hili hono fakatonutonu ʻa e mahino ʻa e kakai ʻa Sihová ʻi he 1935, naʻe kei fifili pē ʻa e tokolahi pe ʻe anga-fēfē ʻa e hoko ʻo fuʻu tokolahi ʻa e faʻahinga ʻoku ʻamanaki ke moʻui ʻi he māmaní. Ko e fakatātaá, ko Ronald Parkin naʻe taʻu 12 ʻi hono fakamāʻalaʻala ʻa e mahino fekauʻaki mo e fuʻu kakai lahí. “ʻI he taimi ko iá,” ko ʻene manatú ia, “naʻe toko 56,000 nai ʻa e kau malangá, pea ko e tokolahi, mahalo ko e tokolahi taha ʻo kinautolú, ko e kau pani. Ko ia naʻe hā ngali ko e fuʻu kakai lahí naʻe ʻikai fuʻu tokolahi.”

15. Kuo anga-fēfē ʻa e hokohoko atu ke laka ki muʻa hono fakatahatahaʻi ʻo e fuʻu kakai lahí?

¹⁵ Kae kehe, ʻi he ngaahi hongofuluʻi taʻu ki mui aí, naʻe vaheʻi ʻa e kau misinalé ki he ngaahi fonua lahi, pea ko e tokolahi ʻo e Kau Fakamoʻoni ʻa Sihová naʻe tupulaki vave. Pea ʻi he 1968, naʻe kamata ha polokalama ako Tohi Tapu ʻo ngāueʻaki ʻa e tohi Ko e Moʻoni ʻa ia ʻoku fakatau ki he Moʻui Taʻengata. Ko hono fakamatalaʻi faingofua ai ʻa e moʻoni Fakatohitapú naʻe tohoakiʻi ai ʻa e kakai anga-vaivai tokolahi ange ʻi ha toe taimi ki muʻa. ʻI loto ʻi he taʻu ʻe fā, laka hake ʻi he vaeua milioná ʻa e kau ākonga foʻou naʻa nau papitaiso. ʻI he kamata ke mole ʻa e mālohi ʻo e Siasi Katoliká ʻi ʻAmelika Latina mo e ngaahi fonua kehé pea toʻo mo e fakangatangata ʻo ʻetau ngāué ʻi ʻIulope Hahake mo e ngaahi feituʻu ʻi ʻAfilika, naʻe toe papitaiso ʻa e laui miliona. (ʻAi. 60:22) ʻI he ngaahi taʻu ki muí ni maí, kuo tokonaki ʻe he kautaha ʻa Sihová ʻa e ngaahi meʻangāue ola lelei kehe ke tokoni ki he kakaí ke nau ako fekauʻaki mo e Tohi Tapú. ʻOku ʻikai ha veiveiua ko ha fuʻu kakai lahi​—laka hake ʻi he toko valu milioná he taimí ni—​kuo fakatahatahaʻi.

16. Ko fē ʻe fakatahatahaʻi mei ai ʻa e fuʻu kakai lahí?

¹⁶ ʻI hono hiki ʻe Sione ʻene vīsoné, naʻá ne ʻiloʻi ko e fuʻu kakai lahí te nau haʻu mei he “kotoa ʻo e ngaahi puleʻanga mo e ngaahi matakali mo e ngaahi kakai mo e ngaahi lea.” Naʻe tomuʻa tala ʻe he palōfita ko Sākalaiá ki muʻa ange ha meʻa meimei tatau. Naʻá ne tohi ʻo pehē: “ʻI he ngaahi ʻaho ko iá ʻe ʻi ai ha kau tangata ʻe toko hongofulu mei he ngaahi lea kotoa ʻo e ngaahi puleʻangá te nau piki, ʻio, te nau piki maʻu ki he kofu ʻo ha Siu, mo pehē: ‘ʻOku mau loto ke mau ō mo kimoutolu, he kuo mau fanongo ko e ʻOtuá ʻoku ʻi he kakai ko kimoutolú.’”​—Sāk. 8:23.

17. Ko e hā kuo fakahoko ke tokoni ai ki he kakai ʻo e ngaahi puleʻanga kotoa pē mo e leá?

¹⁷ ʻOku ʻiloʻi ʻe he Kau Fakamoʻoni ʻa Sihová ke fakatahatahaʻi fakataha ʻa e kakai mei he kotoa ʻo e ngaahi leá, ko e ongoongo leleí kuo pau ke malangaʻi ʻi he ngaahi lea lahi. Kuo tau liliu ʻa e naunau ki he ako Tohi Tapú ʻo laka hake ʻi he taʻu ʻe 130 tupu, ka ʻi he taimí ni ʻoku tau fakahoko ʻa e liliu-lea lahi taha kuo faifai ange pea fakahokó ʻi he lea ʻe lauingeau. ʻOku hā mahino, ʻoku fakahoko ʻe Sihova ha mana ʻi onopooni​—ʻo fakatahatahaʻi ha fuʻu kakai lahi mei he ngaahi puleʻanga kotoa pē. ʻOku tau fakamālō ʻi hono ala maʻu ʻa e meʻakai fakalaumālie ʻi he ngaahi lea lahi ange, ko e kulupu kehekehe ko ení ʻoku nau fāʻūtaha ʻi he lotú. Pea ko e Kau Fakamoʻoní ʻoku nau ʻiloa ʻi heʻenau malanga faivelengá mo ʻenau ʻofa fakatokouá. He fakaivimālohi ē ko ia!​—Māt. 24:14; Sione 13:35.

18. (a) ʻI he ʻAisea 46:10, 11, ko e hā ʻoku ʻikai ai ke tau ʻohovale ʻi hono fakahoko ʻe Sihova ʻa e kikite fekauʻaki mo e fuʻu kakai lahí? (e) Ko e hā ʻoku ʻikai ongoʻi ai ʻe he faʻahinga ʻoku ʻamanaki ke moʻui ʻi he māmaní ʻoku nau tō mei ha meʻá?

¹⁸ ʻOku tau maʻu ʻa e ʻuhinga lelei kotoa pē ke fiefia ʻi he kikite fekauʻaki mo e fuʻu kakai lahí! ʻOku ʻikai ke tau ʻohovale ʻi hono fakahoko ʻe Sihova ʻa e kikite ko iá ʻi ha founga fakaofo. (Lau ʻa e ʻAisea 46:10, 11.) Ko e fuʻu kakai lahí ʻoku nau houngaʻia koeʻuhi ko e ʻamanaki kuo ʻoange ʻe Sihová. ʻOku ʻikai ke nau ongoʻi ʻoku nau tō mei ha meʻa koeʻuhi ʻoku ʻikai pani kinautolu ʻe he laumālie ʻo e ʻOtuá ke ngāue mo Sīsū ʻi hēvani. ʻI he kotoa ʻo e Folofolá, ʻoku tau lau ai ʻo fekauʻaki mo e kau tangata mo e kau fefine ʻo e tuí naʻe tataki kinautolu ʻe he laumālie māʻoniʻoní; neongo ia ʻoku ʻikai ke nau kau ʻi he toko 144,000. Ko e fakatātā ʻe taha ko Sione Papitaiso. (Māt. 11:11) Ko Tēvita ʻa e tokotaha. (Ngā. 2:34) Ko kinaua mo e faʻahinga taʻefaʻalaua kehe ʻe fokotuʻu hake ke moʻui ʻi ha māmani palataisi. Ko kinautolu kotoa​—kau ai mo e fuʻu kakai lahí—​te nau maʻu ʻa e faingamālie ke fakahāhā ʻenau mateaki kia Sihova mo hono tuʻunga-haú.

19. ʻOku anga-fēfē hono fakamamafaʻi ʻe he vīsone ʻa Sione fekauʻaki mo e fuʻu kakai lahí ʻa e fakavavevave ʻo e taimi ʻoku tau moʻui aí?

¹⁹ ʻOku teʻeki ai ha taimi ki muʻa ʻi he hisitōlia ʻo e faʻahinga ʻo e tangatá kuo fakafāʻūtahaʻi ai ʻe he ʻOtuá ʻa e kakai ʻe laui miliona mei he kotoa ʻo e ngaahi puleʻangá. Pe ʻoku tau ʻamanaki ke moʻui ʻi hēvani pe ʻi māmani, ʻoku fiemaʻu ke tau tokoniʻi ʻa e tokolahi taha ʻe ala lavá ke nau hoko ko e konga ʻo e fuʻu kakai lahi ʻo e “fanga sipi kehe.” (Sione 10:16) ʻOku vavé ni ke ʻomai ʻe Sihova ʻa e fuʻu mamahi lahi naʻe tomuʻa talá ʻa ia ʻe fakaʻauha ai ʻa e ngaahi puleʻanga mo e ngaahi lotu kuo nau fakamamahiʻi ʻa e faʻahinga ʻo e tangatá. He monū makehe ē ʻoku toka mei muʻa ki he kau mēmipa kotoa ʻo e fuʻu kakai lahí​—ke tauhi kia Sihova ʻi he māmaní ʻo taʻengata!​—Fkh. 7:14.