Maʻu ʻe he Kau Maʻu Tohi Fakamoʻoni Ako Kiliatí ʻa e Fakahinohino ʻOku Aʻu ki he Lotó

ʻI SEPITEMA 9, 2006, naʻe fakahoko ai ʻa e maʻu tohi fakamoʻoni ako ʻa e kalasi hono 121 ʻo e Akoʻanga Tohi Tapu Taua Leʻo ko Kiliatí ʻi he Senitā Fakaeako Taua Leʻó ʻi Patterson, Niu ʻIoke. Ko ha polokalama fakalototoʻa moʻoni.

Ko Geoffrey Jackson, ko ha mēmipa ʻo e Kulupu Pule ʻo e Kau Fakamoʻoni ʻa Sihová, naʻá ne kamata ʻa e polokalamá ʻaki hono talitali lelei ʻa e toko 56 ʻo e kau maʻu tohi fakamoʻoni akó pea mo e kau fanongo fakavahaʻapuleʻanga ʻe toko 6,366. Naʻá ne lāulea ki he Sāme 86:11 (PM), ʻa ia ʻoku pehē: “E Jihova, ako kiate au ho hala; teu eveeva i hoo mooni: gaohi ke taha be hoku loto ke manavahe ki ho huafa.” Naʻe fakahaaʻi ʻe Tokoua Jackson ʻa e ngaahi meʻa ʻe tolu ʻoku fakamamafaʻi ʻi he veesi ko iá. Naʻá ne pehē: “ʻI he ʻuluaki sētesí, ko e fakahinohino ia; ʻi he sētesi hono uá, ngāueʻaki; pea ʻi hono tolú, ko e fakaueʻiloto. ʻOku tautefito ʻa e mahuʻinga ʻa e meʻa ʻe tolu ko ʻení kiate kimoutolu kau misinalé ʻi hoʻomou ʻalu atu ki homou ngaahi vāhenga-ngāué.” Naʻá ne fakahoko mai leva ha fakahokohoko ʻo e ngaahi malanga mo e ngaahi fakaʻekeʻeke naʻe fakamamafaʻi ai ʻa e meʻa kotoa ʻe tolú.

Ngaahi Lea Fakalotomāfana ʻo e Fakahinohino

Ko William Malenfant, ko ha mēmipa ʻo e kau ngāue ʻo e ʻuluʻi ʻapitangá, naʻá ne lāulea ki he kaveinga “Ko e Moʻui Lelei Taha ʻOku Ala Maʻú.” Naʻá ne fakahanga ʻa e tokangá ki he faʻifaʻitakiʻanga ʻa Mele, ko e tokoua ʻo Māʻatá. ʻI he taimi ʻe taha naʻe ʻaʻahi atu ai ʻa Sīsū ki honau ʻapí, naʻe fili ʻa Mele ke tangutu ʻi hono veʻe vaʻé ke fanongo kiate ia, ʻo ne ʻai ia ko e meʻa muʻomuʻa kiate iá. Naʻe tala ange ʻe Sīsū kia Māʻata: “Kuo fili ʻe Mele ʻa e ngafa ʻoku lelei, ʻa ia foki ʻe ʻikai toʻo meiate ia.” (Luke 10:​38-42) “Fakakaukau atu ā ki ai,” ko e lea ia ʻa e tokotaha-malangá. “ʻE manatuʻi ʻa Mele ʻo laui ʻitāniti naʻá ne tangutu ʻi he veʻe vaʻe ʻo Sīsuú ʻo fanongo tonu ki he ngaahi moʻoni fakaofo fakalaumālié—koeʻuhi pē naʻá ne fai ha fili lelei.” ʻI he hili hono fakaongoongoleleiʻi ʻo e kau maʻu tohi fakamoʻoni akó ki heʻenau ngaahi fili lelei fakalaumālié, naʻá ne pehē: “Ko hoʻomou ngaahi filí kuó ne taki kimoutolu ki he moʻui lelei taha ʻoku ala maʻú.”

Ko hono hokó ko Anthony Morris, ko ha mēmipa ʻo e Kulupu Pulé, naʻá ne fakahoko ʻa e kaveinga “Mou ʻAi Muʻa ʻa e ʻEiki ko Sisu Kalaisi,” makatuʻunga ʻi he Loma 13:14. ʻE lava fēfē ke tau fai ʻeni? Naʻe fakahaaʻi ʻe Tokoua Morris: “Ko hono ʻai ʻa e ʻEiki ko Sīsū Kalaisí ʻoku kau ki ai ʻa e faʻifaʻitaki ki he ngaahi anga ʻo e ʻEikí.” ʻA ia ʻoku ʻuhinga ʻení ke faʻifaʻitaki ki he faʻifaʻitakiʻanga ʻa Sīsuú mo hono angá. Naʻe pehē ʻe he tokotaha-malangá: “Naʻe ʻai ʻe Sīsū ʻa e faʻahinga tāutaha ke nau ongoʻi fiemālie koeʻuhi naʻá ne mahuʻingaʻia moʻoni ʻiate kinautolu, pea naʻe malava ke nau ongoʻi ia.” Naʻe lāulea leva ʻa e tokotaha-malangá ki he founga kuo maʻu ai ʻe he kau akó ʻa e ʻilo lahi ʻi heʻenau ngaahi koosi ʻi Kiliatí ‘ke laveʻi hono māukupu, mo hono loloa, mo hono maʻolunga mo hono loloto’ ʻo e moʻoní, ʻo hangē ko ia ʻoku leaʻaki ʻi he Efeso 3:18. Ka naʻá ne fakamanatu kiate kinautolu ʻa e Efeso vahe 3 veesi 19, ʻa ia ʻoku hoko atu ʻo pehē: “ʻIo, ke ʻilo ʻa e ʻofa ʻa Kalaisi, ʻa ia ʻoku hulu atu ʻi he ngataʻanga ʻo e ʻilo.” Naʻe naʻinaʻi ʻa Tokoua Morris ki he kau akó: “ʻI hoʻomou hokohoko atu ʻi hoʻomou ako fakafoʻituituí, fakakaukauloto atu ki he founga ʻe lava ke mou faʻifaʻitaki ai ki he manavaʻofa ʻa Kalaisí pea ‘ʻai moʻoni ʻa e ʻEiki ko Sīsū Kalaisí.’”

Akonaki Fakaʻosi mei he Kau Faiako Kiliatí

Ko e malanga hono hokó naʻe fai ia ʻe he faiako Kiliati ko Wallace Liverance, ʻa ia ko ʻene kaveingá naʻe makatuʻunga ʻi he Palovepi 4:7 (PM). Naʻá ne pehē neongo ʻoku mātuʻaki mahuʻinga ʻa e poto fakaʻotuá, kuo pau ke tau toe “maʻu moe ilo [pe mahinó],” ʻa ia ʻoku kau ki ai ʻa hono fakatahaʻi ʻo e ngaahi moʻoniʻi meʻa kehekehe pea sio leva ki he anga ʻenau felāveʻiʻakí ke maʻu ai ʻa e ʻuhinga ʻo ha meʻa. Naʻe fakahaaʻi ʻe he tokotaha-malangá ko hono maʻu ʻa e mahinó ʻoku maʻu ai ʻa e fiefia. Ko e fakatātaá, ʻi he taimi ʻo Nehemaiá, ko e kau Līvaí ‘naʻa nau ʻai ke ʻuhinga ʻa e Laó’ mo ʻai ke “matala” pe mahino. ʻI he hili iá, naʻe hokohoko atu ʻa e kakaí ʻi he “fakafiefia lahi, koeʻuhi naʻe ʻuhinga [pe mahino] kiate kinautolu ʻa e ngaahi meʻa naʻe fakamatala mai.” (Fakaʻītali ʻamautolu; Nehemaia 8:​7, 8, 12) Naʻe fakaʻosiʻaki ʻe Tokoua Liverance: “Ko e fiefiá ko ha ola ia ʻo hono mahinoʻi ʻa e Folofola fakamānavaʻi ʻe he laumālie ʻo e ʻOtuá.”

“Ko Hai Moʻoni Ho Filí?” ʻa e kaveinga naʻe lāulea ki ai ʻa Mark Noumair, ko ha toe faiako Kiliati ʻe taha. ʻI he taú, ʻoku mate ai ha kau sōtia tokolahi mei heʻenau faʻahí pē, ʻi he tau ai e fana ʻenau ngaahi kongakaú pē. “Fēfē ʻa e tau fakalaumālie ʻoku tau kau ki aí?” ko ʻene fehuʻí ia. “Kapau heʻikai ke tau tokanga, ʻe lava ke tau puputuʻu pe ko hai moʻoni hotau filí pea tau fakalaveaʻi ʻetau kau tau pē ʻatautolú.” ʻE fakapuputuʻuʻi nai ʻe he meheká ʻa e niʻihi. Naʻá ne fakatupunga ʻa Tuʻi Saula ke ne feinga ke tāmateʻi ʻa Tēvita, ko hono kaungā lotú, lolotonga iá ko hono moʻoní ko e kau Filisitiá ʻa e filí. (1 Samiuela 18:​7-9; 23:​27, 28) Naʻe hoko atu leva ʻa e tokotaha-malangá: “Fēfē kapau ʻoku mou ngāue fakataha mo ha misinale ʻoku mahulu hake ia ʻi he ngaahi founga lahi? Te mou fakalaveaʻi homou kaungā sōtiá ʻaki ha ngaahi lau fakaanga, pe te mou tali lelei ʻa e moʻoniʻi meʻa ko ia ʻe lakasi kimoutolu ʻe he niʻihi kehé ʻi ha ngaahi founga kehekehe?” Ko e nōfoʻi ʻi he ngaahi taʻehaohaoa ʻa e niʻihi kehé te ne fakapuputuʻuʻi pē nai ai kitautolu fekauʻaki pe ko hai ʻa e fili moʻoní. Tauʻi ʻa e fili moʻoní, ko Sētane.”

Ngaahi Hokosia Fakafiefia mo e Ngaahi Fakaʻekeʻeke Fakatupu ʻIlo

Ko e konga hono hokó, “Fai ʻa e Ngāue ʻa ha ʻEvangeliō,” naʻe fai ia ʻe he faiako Kiliati ko Lawrence Bowen pea naʻe kau ki ai ʻa e ngaahi fakaʻekeʻeke mo e ngaahi hokosia. Naʻá ne fakamatalaʻi: “Ko e ngāue tefito ʻa ha misinale naʻe akoʻi ʻi Kiliatí ko hono fakamafola atu ʻa e ongoongo leleí, pea ko e kalasí ni kuo nau fai pehē ʻi ha feituʻu pē naʻe lava ke nau maʻu ai ha kakai.” Naʻe fakatātaaʻi ai ʻa e niʻihi ʻo e ngaahi meʻa fakafiefia naʻe hokosia tonu.

Ko e konga hono hoko ʻi he polokalamá ko ha ongo konga naʻe fai ʻe Michael Burnett mo Scott Shoffner, ko ha ongo mēmipa fakatouʻosi ʻo e fāmili Pētelí. Naʻá na fakaʻekeʻeke ha kau mēmipa Kōmiti Vaʻa mei Kōlea, Papetosi, ʻAositelēlia mo ʻIukanitā. Naʻe hā mei he ngaahi fakamatala ʻa e kau mēmipa ʻo e kōmití ʻa hono lahi ʻo e feinga ʻoku fai ki hono tokangaʻi ʻa e ngaahi fiemaʻu ʻa e kau misinalé, ʻo kau ai hono tokonaki maʻanautolu ha nofoʻanga mo ha tokangaʻi fakafaitoʻo feʻunga. Naʻe fakamamafaʻi ʻe he kau mēmipa ʻo e kōmití ko e kau misinale lavameʻá ʻoku nau loto-lelei ke liliu ki he ngaahi tuʻunga fakalotofonuá.

Ko ha Fakamulituku Fakalotomāfana mo Fakaueʻiloto

Ko e malanga tefito ʻo e polokalamá ko e “Manavahē ki he ʻOtua, pea Tuku Kololia Kiate Ia,” naʻe fai ʻe John E. Barr, ko ha mēmipa fuoloa ʻo e Kulupu Pulé. Naʻá ne lāulea ki he Fakahā 14:​6, 7, ʻa ia ʻoku pehē hono laú: “Pea u vakai ha angelo ʻe taha, ʻoku ne puna ʻi he loto langi, pea ʻoku ne ʻalu mo ia ʻa e Kosipeli taʻengata ke malangaʻaki kiate kinautolu ʻoku nofo ʻi he fonua, pea ki he puleʻanga kotoa pē, mo e matakali, mo e lea, mo e faʻahinga; ʻo ne lea leʻo lahi ʻo pehē, Mou manavahē ki he ʻOtua, pea tuku kololia kiate ia; he kuo hokosia ʻa e taimi oʻene fakamāu.”

Naʻe enginaki ʻa Tokoua Barr ki he kau akó ke nau manatuʻi ʻa e ngaahi meʻa ʻe tolu fekauʻaki mo e ʻāngelo ko iá. ʻUluakí, naʻe pau ke ne talaki ʻa e ongoongo lelei taʻengata ʻa ia kuo pule he taimí ni ʻa Kalaisi ʻi he mafai kakato ʻo e Puleʻangá. Naʻe pehē ʻe he tokotaha-malangá: “ʻOku tau tuipau fakaʻaufuli naʻe hoko hono fakanofo taloni iá ʻi he 1914. Ko ia, ko e ngaahi ongoongo lelei ko ʻení kuo pau ke fanongonongo ia ki he kotoa ʻo e māmaní.” Ko hono uá, naʻe pehē ʻe he ʻāngeló: “Manavahē ki he ʻOtua.” Naʻe fakamatalaʻi ʻe he tokotaha-malangá ʻoku fiemaʻu ki he kau maʻu tohi fakamoʻoni akó ke nau tokoniʻi ʻenau kau ako Tohi Tapú ke nau fakatupulekina ha ʻapasia ki he ʻOtuá koeʻuhi ke ʻoua naʻa nau fai ha meʻa ʻoku taʻefakahōifua kiate ia. Ko hono tolú, naʻe tuʻutuʻuni mai ʻe he ʻāngeló: ‘Tuku kololia ki he ʻOtuá.’ Naʻe naʻinaʻi ki he kau akó: “ʻOua ʻaupito naʻa ngalo ʻoku tau ngāue maʻá e kolōlia ʻo e ʻOtuá, ʻikai ko haʻatautolú.” Pea ʻi he lāulea ki he “taimi oʻene fakamāu,” naʻe pehē ʻe Tokoua Barr: “ʻOku tā mo laka ʻa e taimí ki hono talaki ʻa e fakamaau fakaʻosí. Ko e tokolahi ʻi hotau feituʻu ngāué ʻoku kei fiemaʻu ke nau fanongo ki he pōpoaki ʻo e ongoongo leleí ki muʻa ke fuʻu tōmui.”

ʻI he ongona atu ʻa e ngaahi leá ni ki honau telingá, naʻe ʻoatu ai ki he toko 56 ʻo e kau maʻu tohi fakamoʻoni akó honau tipilomá pea fekauʻi atu ki he ngaahi ngataʻanga ʻo e māmaní. Naʻe maongo loloto ki he loto ʻo e kau maʻu tohi fakamoʻoni akó pea mo e kotoa ʻo e niʻihi kehe naʻe ʻi aí ʻa e akonaki fakaueʻiloto naʻa nau maʻu ʻi he ʻaho fakafiefia ko iá.

[Puha ʻi he peesi 17]

ʻŪ FIKA ʻO E KALASÍ

Lahi ʻo e fonua naʻe fakafofongaʻí: 6

Lahi ʻo e ngaahi fonua naʻe vaheʻi ki aí: 25

Tokolahi ʻo e kau akó: 56

ʻAvalisi ʻo e taʻumotuʻá: 35.1

ʻAvalisi ʻo e taʻu he moʻoní: 18.3

ʻAvalisi ʻo e taʻu he ngāue fakafaifekau taimi-kakató: 13.9

[Fakatātā ʻi he peesi 18]

Kalasi Maʻu Tohi Fakamoʻoni Ako Hono 121 ʻa e Akoʻanga Tohi Tapu Taua Leʻo ko Kiliatí

ʻI he lisi ʻi laló, ko e ngaahi ʻotú ʻoku fakafika ia mei muʻa ki mui, ko e ngaahi hingoá ʻoku fakahokohoko ia mei he toʻohemá ki he toʻomataʻú ʻi he ʻotu taki taha.

(1) Fox, Y.; Kunicki, D.; Wilkinson, S.; Kawamoto, S.; Consolandi, G.; Mayen, C. (2) Santiago, N.; Clancy, R.; Fischer, M.; de Abreu, L.; Davis, E. (3) Hwang, J.; Hoffman, D.; Wridgway, L.; Ibrahim, J.; Dabelstein, A.; Bakabak, M. (4) Peters, M.; Jones, C.; Ford, S.; Parra, S.; Rothrock, D.; Tatlot, M.; Perez, E. (5) de Abreu, F.; Kawamoto, S.; Ives, S.; Burdo, J.; Hwang, J.; Wilkinson, D. (6) Fox, A.; Bakabak, J.; Cichowski, P.; Forier, C.; Mayen, S.; Consolandi, E.; Wridgway, W. (7) Parra, B.; Perez, B.; Tatlot, P.; Santiago, M.; Ibrahim, Y.; Kunicki, C. (8) Burdo, C.; Cichowski, B.; Ives, K.; Ford, A.; Rothrock, J.; Hoffman, D.; Davis, M. (9) Peters, C.; Dabelstein, C.; Jones, K.; Clancy, S.; Fischer, J.; Forier, S.