Ko Hai ʻa e ʻOtuá?

1, 2. Ko e hā ʻa e ngaahi fehuʻi ʻoku faʻa ʻeke ʻe he kakaí?

KO E fānaú ʻoku nau ʻeke ha ngaahi fehuʻi lahi. ʻOkú ke fakamatalaʻi ange nai kiate kinautolu ha meʻa, ka ʻoku nau kei ʻeke pē, ‘Ko e hā hono ʻuhingá?’ Pea ʻi hoʻo feinga ke fai ha tali kiate kinautolú, te nau ʻeke nai, ‘Ka ko e hā hono ʻuhingá?’

² Pe ʻokú ke kei siʻi pe motuʻa, ko kitautolu kotoa ʻoku ʻi ai ʻetau ngaahi fehuʻi. ʻOku tau maʻu nai ha ngaahi fehuʻi fekauʻaki mo e meʻa te tau kaí pe tuí pe fakatau maí. Pe ʻoku tau maʻu nai ha ngaahi fehuʻi mahuʻinga fekauʻaki mo e moʻuí pea mo e kahaʻú. Ka ʻi he ʻikai ke tau maʻu ha tali fakafiemālie ki he ngaahi fehuʻí ni, ʻoku tuku nai ai ʻetau kumi ki ha talí.

 3. Ko e hā ʻoku fakakaukau ai ʻa e kakai tokolahi heʻikai lava ke nau maʻu ʻa e tali ki heʻenau ngaahi fehuʻi mahuʻingá?

³ ʻOku maʻu ʻe he Tohi Tapú ha tali ki he ngaahi fehuʻi mahuʻinga ʻoku tau ʻeké? ʻOku fakakaukau pehē nai ʻa e kakai ʻe niʻihi, ka ʻoku nau ongoʻi ʻoku fuʻu faingataʻa ke mahinoʻi ʻa e Tohi Tapú. ʻOku nau fakakaukau nai ko e kau faiakó pē pe ko e kau pātelé ʻoku nau maʻu ʻa e talí. Pea ʻoku mātuʻaki mā ʻa e niʻihi ia ke fakahaaʻi ʻoku ʻikai te nau ʻilo ʻa e talí. Ko e hā hoʻo fakakaukaú?

4, 5. Ko e hā ʻa e ngaahi fehuʻi mahuʻinga ʻokú ke maʻú? Ko e hā ʻoku totonu ai ke ke hanganaki kumi ki ha talí?

⁴ ʻOkú ke fiemaʻu nai ha tali ki he ngaahi fehuʻi, hangē ko ení: Ko e hā ʻoku ou ʻi heni aí? Ko e hā ʻe hoko kiate au ʻi he taimi te u mate aí? Ko e tokotaha fēfē ʻa e ʻOtuá? Ko Sīsū, ʻa e Faiako ongoongoá, naʻá ne pehē: “Hanganaki kole, pea ʻe foaki atu kiate kimoutolu; hanganaki kumi, pea te mou ʻilo; hanganaki tukituki, pea ʻe fakaava atu kiate kimoutolu.” (Mātiu 7:7) ʻOua ʻe foʻi kae ʻoua kuó ke maʻu ʻa e tali ʻoku lava ke ke falala ki aí.

⁵ ʻIo, kapau te ke “hanganaki kumi,” te ke maʻu ʻa e talí ʻi he Tohi Tapú. (Palōveepi 2:1-5) Ko e ngaahi talí ni ʻoku ʻikai fuʻu faingataʻa ke mahinoʻi. Ko e meʻa ʻokú ke akó te ne ʻoatu kiate koe ha moʻui fiefia ange he taimí ni mo ha ʻamanaki fisifisimuʻa ki he kahaʻú. Tau talanoa angé ki ha foʻi fehuʻi ʻe taha kuó ne ʻai ke puputuʻu ʻa e kakai tokolahi.

 6. Ko e hā ʻoku fakakaukau ai ʻa e kakai ʻe niʻihi ʻoku ʻikai ke tokanga mai ʻa e ʻOtuá ki heʻenau faingataʻaʻiá?

⁶ ʻOku fakakaukau ʻa e kakai tokolahi ʻoku ʻikai ke tokanga mai ʻa e ʻOtuá kiate kitautolu. ʻOku nau fakakaukau kapau ʻoku tokanga moʻoni mai ʻa e ʻOtuá, ʻe kehe ʻaupito ʻa e māmaní. ʻOku tau sio ki he tau, tāufehiʻa, mo e mamahi ʻi he feituʻu kotoa pē. ʻOku puke ʻa e kakaí, ʻoku nau faingataʻaʻia, pea ʻoku nau mate. ʻOku fifili ai ʻa e niʻihi, ‘Kapau ʻoku tokanga mai ʻa e ʻOtuá kiate kitautolu, ko e hā ʻoku ʻikai ai te ne taʻofi ʻa e faingataʻa kotoa ko ení?’

 7. (a) Kuo anga-fēfē hono akoʻi ʻe he kau taki lotú ki he kakaí ʻoku anga-fakamamahi ʻa e ʻOtuá? (e) Ko e hā ʻoku lava ai ke tau fakapapauʻi ʻoku ʻikai totonu ke tukuakiʻi ʻa e ʻOtuá ki he hoko ʻa e ngaahi meʻa ʻoku koví?

⁷ ʻOku ʻai ʻe he kau taki lotú ʻi he taimi ʻe niʻihi ke tui ʻa e kakaí ko e ʻOtuá ʻoku anga-fakamamahi. ʻI he hoko ha meʻa fakalilifu, ʻoku nau pehē ko e finangalo ia ʻo e ʻOtuá. ʻOku nau pehē naʻá ne loto pē ke hoko ia. ʻI heʻenau leaʻaki ʻa e meʻá ni, ʻoku nau tukuakiʻi moʻoni ai ʻa e ʻOtuá. Ka ʻoku akoʻi ʻe he Tohi Tapú ko e ʻOtuá ʻoku ʻikai ʻaupito ko e tupuʻanga ia ʻo e koví. ʻOku tala mai ʻe he Sēmisi 1:13 ʻoku ʻikai ke ʻahiʻahiʻi ʻe he ʻOtuá ha taha ʻaki ʻa e ngaahi meʻa ʻoku koví. ʻOku pehē ai: “ʻI he tofanga ʻi he ʻahiʻahí, tuku ke ʻoua naʻa pehē ʻe ha taha: ‘Kuo ʻahiʻahiʻi au ʻe he ʻOtuá.’ He ʻoku ʻikai malava ke ʻahiʻahiʻi ʻa e ʻOtuá ʻaki ʻa e ngaahi meʻa ʻoku koví, pea ʻoku ʻikai te ne ʻahiʻahiʻi ʻaki ia ha taha.” ʻOku ʻuhinga ení neongo kuo ʻikai taʻofi ʻe he ʻOtuá ʻa e ngaahi meʻa ʻoku koví mei heʻene hokó, ʻoku ʻikai ʻaupito te ne ʻai ke hoko ia. (Lau ʻa e Siope 34:10-12.) Tau ngāueʻaki ha fakatātā.

8, 9. Ko e hā ʻe taʻetotonu ai ke tukuakiʻi ʻa e ʻOtuá ki heʻetau ngaahi palopalemá? ʻOmai ha fakatātā.

⁸ Sioloto atu ki ha talavou ʻoku nofo ʻi ʻapi mo ʻene ongo mātuʻá. ʻOku ʻofa lahi ʻaupito ʻene tamaí ʻiate ia pea kuó ne akoʻi ia ki he founga ke ne fai ai ʻa e ngaahi fili ʻoku leleí. Hili iá, ʻoku angatuʻu ʻa e talavoú ki heʻene tamaí peá ne mavahe mei ʻapi. ʻOkú ne fai ʻa e ngaahi meʻa ʻoku kovi pea tō ai ki he faingataʻa. Te ke tukuakiʻi ʻa e tamaí ki he meʻa naʻe hokó koeʻuhi ko e ʻikai te ne taʻofi hono fohá mei heʻene mavahe mei ʻapí? ʻIkai ʻaupito! (Luke 15:11-13) ʻI he hangē ko e tamai ko iá, naʻe ʻikai taʻofi ʻe he ʻOtuá ia ʻa e faʻahinga ʻo e tangatá ʻi he taimi naʻa nau fili ai ke angatuʻu mo fai ʻa e meʻa ʻoku koví. Ko ia ʻi he hoko ʻa e ngaahi meʻa ʻoku koví, ʻoku totonu ke tau manatuʻi naʻe ʻikai ʻai ʻe he ʻOtuá ke hoko ia. ʻE taʻetotonu ke tukuakiʻi ʻa e ʻOtuá.

⁹ ʻOku ʻi ai ha ʻuhinga lelei ʻaupito ki he teʻeki ai ke taʻofi ʻe he ʻOtuá ʻa e ngaahi meʻa ʻoku koví mei heʻene hokó. ʻI he Vahe 11, te ke ako ai ki he meʻa ʻoku leaʻaki ʻe he Tohi Tapú ʻo fekauʻaki mo e meʻá ni. Ka ʻoku lava ke ke fakapapauʻi ʻoku ʻofa ʻa e ʻOtuá ʻiate kitautolu pea ʻoku ʻikai ʻaupito totonu ke tukuakiʻi ia ki heʻetau ngaahi palopalemá. Ko hono moʻoní, ko ia pē ʻa e Tokotaha ʻe lava ke ne solova iá.​—ʻAisea 33:2.

10. Ko e hā ʻoku lava ai ke tau fakapapauʻi ʻe fakaleleiʻi ʻe he ʻOtuá ʻa e maumau kotoa kuo fai ʻe he kakai koví?

¹⁰ ʻOku māʻoniʻoni ʻa e ʻOtuá. (ʻAisea 6:3) Ko e meʻa kotoa pē ʻokú ne faí ʻoku ʻāsinisini, maʻa, mo lelei. Ko ia ʻoku lava ai ke tau falala kiate ia. ʻOku ʻikai ke pehē ʻa e faʻahinga ia ʻo e tangatá. ʻOku nau fai ʻi he taimi ʻe niʻihi ʻa e ngaahi meʻa ʻoku hala. Pea naʻa mo e pule faitotonu tahá ʻoku ʻikai te ne maʻu ʻe ia ha mālohi ke fakaleleiʻi ʻa e maumau kotoa ʻoku fai ʻe he kakai koví. ʻOku ʻikai ha taha ʻokú ne maʻu ʻa e mālohi lahi tatau mo ia ʻoku maʻu ʻe he ʻOtuá. ʻOkú ne malava, pea te ne fakaleleiʻi ʻa e maumau kotoa kuo fai ʻe he kakai koví. Te ne toʻo atu ʻa e kovi kotoa pē ʻo taʻengata.​—Lau ʻa e Saame 37:9-11.

11. ʻOku anga-fēfē ʻa e ongoʻi ʻa e ʻOtuá ʻo fekauʻaki mo hoʻo faingataʻaʻiá?

¹¹ ʻOku anga-fēfē ʻa e ongoʻi ʻa e ʻOtuá ʻi heʻene sio ki he meʻa ʻoku hoko ʻi he māmaní pea mo e meʻa ʻokú ke hokosiá? ʻOku akoʻi mai ʻe he Tohi Tapú ko e ʻOtuá ʻokú ne ‘manako ki he fakamaau totonú.’ (Saame 37:28) Ko ia ʻokú ne mātuʻaki tokanga ʻo fekauʻaki mo e meʻa ʻoku tonú mo ia ʻoku halá. ʻOkú ne fehiʻa ʻi he faingataʻaʻia ʻa e kakaí. ʻOku pehē ʻe he Tohi Tapú “naʻe mamahi hono lotó” ʻi heʻene sio ki he fonu ʻa e māmaní ʻi he koví ʻi he kuohilí. (Sēnesi 6:5, 6) Kuo ʻikai liliu ʻa e ʻOtuá. (Malakai 3:6) ʻOku pehē ʻe he Tohi Tapú ʻoku tokanga moʻoni mai ʻa e ʻOtuá kiate koe.​—Lau ʻa e 1 Pita 5:7.

12, 13. (a) Ko e hā ʻoku tau ʻofa mo tokanga ai ki he niʻihi kehé, pea ʻoku anga-fēfē ʻetau ongoʻi fekauʻaki mo e faingataʻa ʻi he māmaní? (e) Ko e hā ʻoku lava ai ke tau fakapapauʻi ʻe toʻo atu ʻe he ʻOtuá ʻa e faingataʻá mo e fakamaau taʻetotonú kotoa?

¹² ʻOku toe pehē foki ʻe he Tohi Tapú naʻe fakatupu kitautolu ʻe he ʻOtuá ʻi hono ʻīmisí. (Sēnesi 1:26) ʻOku ʻuhinga ení naʻe ngaohi kitautolu ʻe he ʻOtuá fakataha mo e ngaahi ʻulungaanga lelei tatau mo ia ʻokú ne maʻú. Ko ia kapau ʻokú ke ongoʻi kovi ʻi hoʻo sio ki he faingataʻaʻia ʻa e kakai tonuhiá, kuo pau pē ʻoku toe ongoʻi kovi ange ʻa e ʻOtuá ʻi heʻene vakai mai ki aí! ʻOku anga-fēfē ʻetau ʻiloʻi ení?

¹³ ʻOku akoʻi mai ʻe he Tohi Tapú ko e “ʻOtuá ko e ʻofa.” (1 Sione 4:8) Ko e meʻa kotoa pē ʻoku fai ʻe he ʻOtuá ʻoku ueʻi ia ʻe he ʻofá. Ko ia ʻoku tau ʻofá koeʻuhí ʻoku ʻofa ʻa e ʻOtuá. Fakakaukau fekauʻaki mo e meʻá ni: Kapau naʻá ke maʻu ha mālohi, te ke toʻo atu ʻa e faingataʻa mo e fakamaau taʻetotonu kotoa ʻi he māmaní? Ko e moʻoni te ke fai pehē, koeʻuhí ʻokú ke ʻofa ʻi he kakaí. Fēfē ʻa e ʻOtuá? ʻOkú ne maʻu ʻa e mālohi, pea koeʻuhi ko ʻene ʻofa ʻiate kitautolú, te ne toʻo atu ʻa e faingataʻá mo e fakamaau taʻetotonú kotoa. ʻOku lava ke ke fakapapauʻi ko e ngaahi talaʻofa kotoa ʻa e ʻOtuá naʻe lave ki ai ʻi he kamataʻanga ʻo e tohí ni ʻe hoko moʻoni! Ka ke malava ke falala ki he ngaahi talaʻofá ni, ʻoku fiemaʻu ke ke ʻilo lahi ange ʻo fekauʻaki mo e ʻOtuá.

14. Ko hai ʻa e huafa ʻo e ʻOtuá, pea ʻoku anga-fēfē ʻetau ʻiloʻi ʻoku totonu ke tau ngāueʻaki iá?

¹⁴ Kapau ʻokú ke loto ke hoko ko ha kaumeʻa ʻo ha taha, ko e hā ʻa e ʻuluaki meʻa ʻoku angamaheniʻaki te ke tala ange kiate iá? Ko ho hingoá. ʻOku ʻi ai ha huafa ʻo e ʻOtuá? ʻOku pehē ʻe he ngaahi lotu lahi ko hono huafá ko e ʻOtua pe ʻEiki, ka ʻoku ʻikai ko ha ongo hingoa eni. Ko e ongo hingoa fakalakanga pē ia, ʻo hangē ko e “tuʻí” pe “palesitení.” Kuo tala mai ʻe he ʻOtuá ko hono huafá ko Sihova. ʻOku pehē ʻe he Saame 83:18: “ʻOfa ke ʻilo ʻe he kakaí ko koe, ʻa ia ko ho huafá ko Sihova, ko koe pē toko taha ʻa e Fungani Māʻolunga ʻi he māmaní kotoa.” Naʻe ngāueʻaki ʻe he kau hiki Tohi Tapú ʻa e huafa ʻo e ʻOtuá ʻo tuʻo laui afe. ʻOku fiemaʻu mai ʻe Sihova ke ke ʻiloʻi hono huafá pea ngāueʻaki ia. ʻOkú ne tala atu kiate koe ʻa hono huafá koeʻuhí ke lava ʻo ke hoko ai ko hono kaumeʻa.

15. Ko e hā ʻa e ʻuhinga ʻo e huafa Sihová?

¹⁵ Ko e huafa ʻo e ʻOtuá, ʻa e Sihová, ʻoku loloto ʻa hono ʻuhingá. ʻOku ʻuhinga iá ʻe lava ke fakahoko ʻe he ʻOtuá ha talaʻofa pē ʻokú ne fai pea ʻe lava ke ne fakahoko ʻa ʻene taumuʻá. Heʻikai lava ke taʻofi ia ʻe ha meʻa. Ko Sihova pē taha ʻoku lava ke ne maʻu ʻa e huafa ko ení.a

16, 17. Ko e hā ʻa e ʻuhinga ʻo e (a) “Māfimafi-Aoniú”? (e) “Tuʻi ʻo ʻitāniti”? (f) “Tokotaha-Fakatupú”?

¹⁶ Hangē ko ia naʻa tau lau ki muʻá, ʻoku pehē ʻe he Saame 83:18 ʻo fekauʻaki mo Sihova: “Ko koe pē toko taha ʻa e Fungani Māʻolunga.” Pehē foki, ʻoku pehē ʻe he Fakahā 15:3: “ʻOku lahi mo fakaofo ʻa hoʻo ngaahi ngāué, ʻe Sihova ko e ʻOtuá, ʻa e Māfimafi-Aoniú. ʻOku māʻoniʻoni mo moʻoni ʻa ho ngaahi ʻalungá, Tuʻi ʻo ʻitāniti.” Ko e hā ʻa e ʻuhinga ʻo e hingoa fakalakanga ko e “Māfimafi-Aoniú”? ʻOku ʻuhinga iá ko Sihová ʻoku mālohi ange ia ʻi ha toe taha pē ʻi he ʻunivēsí. Pea ko e hingoa fakalakanga ko e “Tuʻi ʻo ʻitāniti” ʻoku ʻuhinga iá ʻokú ne ʻi ai maʻu pē. ʻOku fakamatala ʻi he Saame 90:2 ko iá ʻoku mei ʻitāniti ki ʻitāniti. ʻIkai ʻoku fakaofo ia!

¹⁷ Ko Sihova pē ʻa e Tokotaha-Fakatupú. ʻOku pehē ʻe he Fakahā 4:11: “ʻOku taau mo koe ʻe Sihova ko homau ʻOtua, ke ke maʻu ʻa e ngeiá mo e lāngilangí pea mo e mālohí, koeʻuhí naʻá ke fakatupu ʻa e ngaahi meʻa kotoa pē, pea koeʻuhi ko ho finangaló naʻa nau hoko ai ʻo ʻi ai pea naʻe fakatupu ai kinautolu.” ʻIo, mei he kau ʻāngelo ʻi hēvaní ki he ngaahi fetuʻu ʻi he langí, ki he fuaʻiʻakau ʻi he ʻuluʻakaú pea ki he fanga ika ʻi he tahí​—naʻe ngaohi ʻe Sihova ʻa e meʻa kotoa pē ʻoku lava ke ke fakakaukau atu ki aí!

18. Ko e hā nai ʻoku fakakaukau ai ʻa e kakai ʻe niʻihi heʻikai ʻaupito lava ke nau hoko ko ha kaumeʻa ʻo e ʻOtuá? Ko e hā ʻa e lau ʻa e Tohi Tapú ʻo fekauʻaki mo e meʻá ni?

¹⁸ ʻI he lautohi ʻa e kakai ʻe niʻihi ʻo fekauʻaki mo e ngaahi ʻulungaanga fakaueʻiloto ʻo Sihová, ʻoku nau ongoʻi ilifia pea fakakaukau, ‘ʻOku fuʻu mālohi ʻa e ʻOtuá, ʻo fuʻu mahuʻinga, pea ʻokú ne mamaʻo ʻaupito, ko e hā ka ne tokanga mai ai kiate au?’ Ka ʻoku fiemaʻu mai ʻe he ʻOtuá ke tau ongoʻi pehē? ʻIkai ʻaupito. ʻOku fiemaʻu ʻe Sihova ke ne ofi kiate kitautolu. ʻOku pehē ʻe he Tohi Tapú ko e ʻOtuá ʻoku “ʻikai te ne mamaʻo mei ha taha ʻo kitautolu.” (Ngāue 17:27) ʻOku fiemaʻu ʻe he ʻOtuá ke ke ʻunuʻunu ofi ange kiate ia, pea ʻokú ne talaʻofa mai “te ne ʻunuʻunu ofi mai kiate kimoutolu.”​—Sēmisi 4:8.

19. (a) ʻE lava fēfē ke ke hoko ko ha kaumeʻa ʻo e ʻOtuá? (e) Ko fē ʻi he ngaahi ʻulungaanga ʻo Sihová ʻokú ke saiʻia taha aí?

¹⁹ ʻE lava fēfē ke ke hoko ko ha kaumeʻa ʻo e ʻOtuá? Naʻe pehē ʻe Sīsū: “Ko ʻeni ia ʻe maʻu ai ʻa e moʻui taʻengatá, ko ʻenau hoko ʻo ʻiloʻi koe, ko e ʻOtua moʻoni pē taha, pea mo e tokotaha ko ia naʻá ke fekau maí, ʻa Sīsū Kalaisi.” (Sione 17:3) Hanganaki ako, pea te ke hoko ai ʻo ʻiloʻi ʻa Sihova mo Sīsū. Pea ʻe lava leva ai ke ke maʻu ʻa e moʻui taʻengatá. Ko e fakatātaá, kuo tau ʻosi ako ʻo ʻilo ko e “ʻOtuá ko e ʻofa.” (1 Sione 4:16) Ka ʻokú ne toe maʻu mo e ngaahi ʻulungaanga fakaʻofoʻofa lahi kehe. ʻOku tala mai ʻe he Tohi Tapú ko Sihová ʻoku “mohu meesi mo manavaʻofa, tuai ki he houhau pea fonu ʻi he ʻofa mateaki mo e moʻoni.” (ʻEkisoto 34:6) Ko Sihová ʻoku “lelei mo mateuteu ke fakamolemole.” (Saame 86:5) Ko e ʻOtuá ʻoku anga-kātaki mo mateaki. (2 Pita 3:9; Fakahā 15:4) Te ke ako ʻa e meʻa lahi ange ʻo fekauʻaki mo hono ngaahi ʻulungaanga fakaʻofoʻofá ʻi hoʻo lau fekauʻaki mo ia ʻi he Tohi Tapú.

20-22. (a) ʻE lava fēfē ke tau ongoʻi ofi ki he ʻOtuá kapau ʻoku ʻikai lava ke tau sio kiate ia? (e) Ko e hā ʻoku totonu ke ke faí kapau ʻoku loto ha niʻihi kehe ke tuku ʻa hoʻo ako ʻa e Tohi Tapú?

²⁰ ʻE lava fēfē ke ke ongoʻi ofi ki he ʻOtuá kapau ʻoku ʻikai lava ke ke sio kiate ia? (Sione 1:18; 4:24; 1 Tīmote 1:17) ʻI hoʻo lau fekauʻaki mo Sihova ʻi he Tohi Tapú, ʻokú ke hoko ai ʻo ʻiloʻi ia ko ha Tokotaha moʻoni. (Saame 27:4; Loma 1:20) ʻI hoʻo ako lahi ange ʻo fekauʻaki mo Sihová, te ke ʻofa ai kiate ia ʻo toe lahi ange pea te ke ongoʻi ofi ange ai kiate ia.

²¹ Te ke mahinoʻi ai ko Sihova ʻa ʻetau Tamaí. (Mātiu 6:9) Naʻá ne foaki mai kiate kitautolu ʻa e moʻuí, pea ʻokú ne fiemaʻu foki ke tau maʻu ʻa e moʻui lelei taha ʻe ala lavá. Ko e meʻa ia ʻe fiemaʻu ʻe ha tamai ʻofa ki heʻene fānaú. (Saame 36:9) ʻIo, ʻoku akoʻi mai ʻe he Tohi Tapú ʻe lava ke ke hoko ko ha kaumeʻa ʻo Sihova. (Sēmisi 2:23) Sioloto atu ki he meʻa ko iá. Ko Sihova, ʻa e Tokotaha-Fakatupu ʻo e ʻunivēsí, ʻokú ne fiemaʻu mai koe ke ke hoko ko hono kaumeʻa!

²² ʻE loto nai ha kakai ʻe niʻihi ke tuku ʻa hoʻo ako ʻa e Tohi Tapú. ʻOku nau manavasiʻi nai naʻa liliu ʻa e lotu ʻokú ke kau ki aí. Kae ʻoua naʻa tuku ke taʻofi koe ʻe ha taha mei hoʻo hoko ko e kaumeʻa ʻo Sihová. Ko ia ʻa e Kaumeʻa lelei taha ʻe lava ke faifai ange peá ke maʻú.

23, 24. (a) Ko e hā ʻoku totonu ai ke ke hanganaki ʻeke ha ngaahi fehuʻí? (e) Ko e hā te tau lāulea ki ai ʻi he vahe hono hokó?

²³ ʻI hoʻo ako ʻa e Tohi Tapú, ʻe ʻi ai ʻa e ngaahi meʻa heʻikai te ke mahinoʻi. ʻOua ʻe mā ke ʻeke ha ngaahi fehuʻi pe kole ki ha tokoni. Naʻe pehē ʻe Sīsū ʻoku totonu ke tau anga-fakatōkilalo, ʻo hangē ko e fānau īkí. (Mātiu 18:2-4) Pea ʻoku lahi ʻa e ngaahi fehuʻi ʻoku ʻeke ʻe he fānaú. ʻOku fiemaʻu ʻe he ʻOtuá ke ke maʻu ʻa e talí. Ko ia ako fakalelei ʻa e Tohi Tapú ke fakapapauʻi ko e meʻa ʻokú ke akó ko e moʻoní ia.​—Lau ʻa e Ngāue 17:11.

²⁴ Ko e founga lelei taha ke ako ai fekauʻaki mo Sihová ko hono ako ʻa e Tohi Tapú. ʻI he vahe hono hokó, te tau ʻilo ai ʻa e ʻuhinga ʻoku kehe ai ʻa e Tohi Tapú mei he tohi kehe kotoa pē.