Hanganaki Mateaki kia Sihova

ʻOku fakapapauʻi ʻe he kau Kalisitiane moʻoní ke ʻoua ʻaupito naʻa fakaʻatā ha meʻa pe ko ha taha ke taʻofi kinautolu mei heʻenau lotu kia Sihová. Ko e moʻoni, ko e anga ia hoʻo ongoʻí. ʻOku fakamahuʻingaʻi ʻe Sihova hoʻo mateakí. (Lau ʻa e 1 Kalonikali 28:9.) Ko e hā ha meʻa ʻe lava ke ne ʻai ke faingataʻa kiate koe ke hanganaki faitōnunga kiate ia, pea ko e hā ʻe lava ke ne tokoniʻi koé?

1. ʻE lava fēfē ʻa e niʻihi kehé ʻo ʻai ke faingataʻa ʻetau hanganaki mateaki kia Sihová?

ʻE feinga nai ʻa e niʻihi ke taʻofi kitautolu mei he tauhi kia Sihová. Ko hai ia te ne fai ha meʻa pehē? Ko e kakai ʻe niʻihi ʻoku ʻikai ke nau toe tauhi kia Sihova ʻoku nau tala ʻa e ngaahi loi fekauʻaki mo ʻene kautahá koeʻuhí ʻoku nau loto ke fakaʻauha ʻetau tuí. ʻOku ui kinautolu ko e kau tafoki ʻo fakafepaki ki he moʻoní. Pehē foki, ko e kau taki lotu ʻe niʻihi ʻoku nau fakamafola ʻa e ngaahi fakamatala loi fekauʻaki mo kitautolu ke ʻai ʻa e faʻahinga ʻoku tui vaivaí ke mavahe mei he moʻoní. ʻOku fakatuʻutāmaki kiate kitautolu ke talanoa mo ha taha pē ʻoku fakafepaki, pe lau ʻenau ʻū tohí, lau ha meʻa ʻoku nau hiki ʻi heʻenau uepisaití pe sio ʻi heʻenau ngaahi vitioó. ʻI he fekauʻaki mo e faʻahinga ʻoku nau feinga ke taʻofi ʻa e niʻihi mei heʻenau tauhi mateaki kia Sihová, naʻe pehē ʻe Sīsū: “Tuku ai pē ʻa kinautolu ia. Ko e kau takimuʻa kui kinautolu. Kapau leva ʻoku taki ʻe ha tangata kui ha tangata kui, te na fakatou tō ʻi ha luo.”​—Mātiu 15:14.

2. ʻOku hā mei heʻetau fili fakafoʻituituí pe ʻoku tau faitōnunga kia Sihova?

Ko e ʻofa kia Sihová te ne ueʻi kitautolu ke fakaʻehiʻehi mei ha meʻa pē ʻoku fekauʻaki mo e lotu loí. ʻOku ʻikai totonu ke ʻi ai haʻatau pīkinga ki he lotu loí, tatau ai pē pe ʻi he ngāué pe ko ha kautaha ʻoku tau kau ki ai pe ko ha faʻahinga meʻa pē ʻoku tau fai. ʻOku fakatokanga mai ʻa Sihova: Hiki mei Pāpilone ko e Lahi, ʻe hoku kakai.​—Fakahā 18:2, 4.

KELI LOLOTO ANGE

3. Tokanga ki he kau faiako loí

ʻOku totonu ke fēfē ʻetau fakafeangai ʻi heʻetau fanongo ki ha talanoa ʻikai lelei fekauʻaki mo e kautaha ʻa Sihová? Lau ʻa e Palōveepi 14:15, pea lāulea leva ki he fehuʻi ko ení:

• Ko e hā ʻoku tau tokanga ai ke ʻoua ʻe tui ki he meʻa kotoa ʻoku tau fanongo aí?

Lau ʻa e 2 Sione 9-11, pea lāulea leva ki he ngaahi fehuʻi ko ení:

• ʻOku totonu ke fēfē ʻetau fakafeangai ki he kau tafoki ʻo fakafepaki ki he moʻoní?

• Neongo ʻoku ʻikai ke tau lea hangatonu ki he kau tafoki ʻo fakafepaki ki he moʻoní, ʻi he founga fē ʻe tākiekina nai ai kitautolu ʻe heʻenau ngaahi akonakí?

• ʻE fēfē ʻa e ongoʻi ʻa Sihová kapau ʻoku tau fanongo ki heʻenau ngaahi lea ʻikai lelei fekauʻaki mo ia mo ʻene kautahá?

4. Hanganaki mateaki ki he ʻOtuá ʻi he faiangahala ha tokoua

Kapau ʻoku tau ʻilo kuo fakahoko ʻe ha taha ʻi he fakatahaʻangá ha angahala mamafa, ko e hā ʻoku fiemaʻu ke tau faí? Sio ki ha tefitoʻi moʻoni mei he Lao ʻa e ʻOtuá ki he kau ʻIsileli ʻo e kuonga muʻá. Lau ʻa e Livitiko 5:1.

Hangē ko ia ʻoku fakahinohino mai ʻi he vēsí, kapau ʻoku tau ʻilo ha tokotaha kuó ne fakahoko ha angahala mamafa, ʻoku totonu ke tau tala ia ki he kau mātuʻá. Kae kehe, ki muʻa ke fai iá, ko ha anga-lelei ia ke fakaʻaiʻai ʻa e tokotaha faihalá ke ne ʻalu ki he kau mātuʻá pea vete ʻene angahalá. Kapau heʻikai ke ne fai ia, ʻe ueʻi kitautolu ʻe heʻetau ʻofa kia Sihová ke tala ia ki he kau mātuʻá. ʻI hono fai iá, ʻoku anga-fēfē hā mei ai ʻoku tau mateaki . . .

• kia Sihova ko e ʻOtuá?

• ki he tokotaha kuó ne faiangahalá?

• ki he faʻahinga ʻi he fakatahaʻangá?

5. Mavahe ʻaupito mei Pāpilone ko e Lahi

VITIŌ: Hiki mei Pāpilone ko e Lahi! (5:06)

Lau ʻa e Luke 4:8 mo e Fakahā 18:4, 5, pea tali ʻa e ngaahi fehuʻi ko ení:

• ʻOku kei tuʻu pē hoku hingoá ko ha mēmipa ʻi ha lotu loi?

• ʻOku ou kau ki ha kautaha ʻoku fekauʻaki mo ha lotu kehe?

• ʻOku poupouʻi ʻe heʻeku ngāué ʻi ha faʻahinga founga pē ʻa e lotu loí?

• ʻOku toe ʻi ai ha tafaʻaki ʻi heʻeku moʻuí ʻa ia ʻoku fiemaʻu ke u mavahe mei he lotu loí?

• Kapau naʻá ku tali ʻio ki ha taha ʻo e ngaahi fehuʻi ko ení, ko e hā ʻa e ngaahi liliu ʻoku fiemaʻu ke u faí?

ʻI he meʻa kotoa, fai ha fili te ke maʻu ai ha konisēnisi maʻa pea fakamoʻoniʻi ai hoʻo mateaki kia Sihová.

FAKANOUNOU

Ke hanganaki faitōnunga kia Sihova, ʻoku fiemaʻu ke tau fakaʻehiʻehi mei he feohi mo e faʻahinga ʻoku nau feinga ke takihalaʻi kitautolú.

Fakamanatu

• Ko e hā ʻoku ʻikai totonu ai ke tau fanongo ki he ngaahi fakakaukau ʻa e kau tafoki ʻo fakafepaki ki he moʻoní?

• Kapau ʻoku tau ʻiloʻi kuo fakahoko ʻe ha tokoua ha angahala mamafa, ko e hā ʻoku totonu ke tau faí?

• ʻOku lava fēfē ke tau talangofua ki he fakatokanga ke hola mei he lotu loí?

AKO LAHI ANGE

Ako ki he meʻa ke fai ʻi he taimi ʻoku fakamafola ai ʻe he niʻihi kehé ʻa e ngaahi talanoa loi fekauʻaki mo e Kau Fakamoʻoni ʻa Sihová.

“ʻOkú Ke Maʻu ʻa e Ngaahi Moʻoniʻi Meʻá?” (Ko e Taua Leʻo, ʻAokosi 2018)

ʻOku lava fēfē ke ke ʻilo ʻa e ngaahi kautaha pe ngaahi ngāue ʻoku poupou ki Pāpilone ko e Lahí?

“Hanganaki Femoʻuekina ʻi he ‘Fakaʻosiʻosi ʻo e Ngaahi ʻAhó’” (Ko e Taua Leʻo, ʻOkatopa 2019, palakalafi 16-18)

Ko e hā kuo fai ʻe he kau fakafepaki ʻe niʻihi ke feinga ke fakavaivaiʻi ʻetau tuí?

Fakaʻehiʻehi mei he Kākaá (9:32)

ʻI he talanoa “Naʻá Ku Kumi ki he ʻOtuá Talu ʻEku Kei Siʻí,” lau fekauʻaki mo ha faifekau Sinitō kuó ne fakamavaheʻi ia mei he lotu loí.

“Liliu ʻe he Tohi Tapú ʻa e Moʻuí” (Toʻo mei he Ko e Taua Leʻo)