ʻOku Moʻui ʻa e Folofola ʻa Sihová

Ngaahi Meʻa Mahuʻinga mei he Tohi Fakahaá​—II

KO E HĀ ʻoku toka mei muʻa ki he faʻahinga ʻoku lotu ki he ʻOtua ko Sihová mo e faʻahinga ʻoku ʻikaí? Ko e hā ʻa e kahaʻu ʻo Sētane mo ʻene kau tēmenioó? Ko e hā e ngaahi tāpuaki ʻe hokosia ʻe he faʻahinga talangofua ʻo e tangatá lolotonga ʻa e Pule Taʻu ʻe Taha Afe ʻa Kalaisí? Ko e tali ki heni mo e ngaahi fehuʻi mahuʻinga kehe ʻoku fakahaaʻi ia ʻi he Fakahā 13:1–22:21.a ʻOku ʻi he ngaahi vahé ni ʻa e vīsone fakamuimui ʻe 9 ʻo e vīsone ʻe 16 naʻe maʻu ʻe he ʻapositolo ko Sioné ʻi he ofi ke ngata ʻa e ʻuluaki senituli T.S.

“Monuʻiaā ka ko ia ʻoku lau, mo kinautolu ʻoku fanongo ki he ngaahi lea ʻo e palofisai ni,” ko e tohi ia ʻe Sioné, “mo tauhi ʻa e ngaahi meʻa kuo tohi ai.” (Fkh. 1:3; 22:7) Ko hono lau mo ngāueʻaki ʻa e meʻa ʻoku tau ako mei he tohi Fakahaá ʻe lava ke ne ueʻi ʻa hotau lotó, ʻai ke mālohi ʻetau tui ki he ʻOtuá pea ki hono ʻAló, ʻa Sīsū Kalaisi, pea ʻomai ha ʻamanaki fakafiefia ki he kahaʻú.b—Hep. 4:12.

LILINGI HIFO ʻA E IPU ʻE FITU ʻO E HOUHAU ʻA E ʻOTUÁ

(Fkh. 13:1–16:21)

“Naʻe ʻita ʻa e ngaahi puleʻanga,” ko e fakamatala ia ʻi he Fakahā 11:18, “pea naʻe hoko mai [e] houhau [ʻa e ʻOtuá], mo e taimi . . . ke fakaʻauha ʻakinautolu ʻoku fakaʻauha ʻa e fonua.” ʻI hono ʻomai ʻa e puipuituʻa ki he meʻá ni, ʻoku fakahaaʻi ʻi he vīsone hono valú ʻa e ngāue ʻa “ha manu fekai, naʻe nifo hongofulu pea ʻulu fitu.”—Fkh. 13:1.

ʻI he vīsone hono hivá, ʻoku sio ai ʻa Sione ki he “Lami ʻi he funga moʻunga ko Saione” pea naʻe ʻiate ia “ha toko taha kilu ma toko fa mano ma toko fa afe.” Ko kinautolu ia kuo “fakatau mei he kakai.” (Fkh. 14:1, 4) ʻOku hoko atu ai ʻa e fanongonongo fakaeʻāngelo. ʻI he vīsone hokó, ʻoku mamata ai ʻa Sione ki he “ʻangelo ʻe toko fitu ʻoku ʻiate kinautolu ʻa e ngaahi tautea ʻe fitu.” ʻOku hā mahino, ko Sihova tonu ʻokú ne fekauʻi ʻa e kau ʻāngeló ni ke nau lilingi hifo ʻa e “ngaahi ipu ʻe fitu ʻo e houhau ʻo e ʻOtua” ki he ngaahi tafaʻaki kehekehe ʻo e māmani ʻa Sētané. ʻOku ʻi he ngaahi ipú ʻa e ngaahi fanongonongo mo e fakatokanga fekauʻaki mo e fakamaau ʻa e ʻOtuá ʻa ia ʻe fakahoko. (Fkh. 15:1; 16:1) Ko e ongo vīsoné ni ʻoku ʻomai ai ʻa e ngaahi fakaikiiki ʻo e toe ngaahi fakamaau ʻa e Puleʻangá ʻoku fehokotaki mo e mala hono tolú mo hono ifi ʻa e talupite hono fitú.—Fkh. 11:14, 15.

Tali ki he Ngaahi Fehuʻi Fakatohitapú:

13:8—Ko e hā ʻa e takainga “tohi ʻo e moui ʻa e Lami”? Ko ha takainga tohi fakaefakatātā eni ʻoku ʻi ai ʻa e hingoa pē ʻo e faʻahinga ʻoku nau pule fakataha mo Sīsū Kalaisi ʻi hono Puleʻanga fakahēvaní. ʻOku kau ai ʻa e hingoa ʻo e kau Kalisitiane pani ʻoku nau kei ʻi māmaní, ʻa ia ʻoku nau maʻu ʻa e ʻamanaki ʻo e moʻui ʻi hēvaní.

13:11-13—ʻOku anga-fēfē ʻa e tōʻonga ʻa e manu fekai nifo uá ʻo hangē ha talākoní peá ne ʻai ke ʻalu hifo ʻa e afi mei he langí? Ko e moʻoniʻi meʻa ko ia ʻo e lea ʻa e manu fekai nifo uá—ʻa e Hau ʻi Māmaní ʻa Pilitānia mo ʻAmelika—ʻo hangē ha talākoní ʻoku fakahaaʻi ai ʻokú ne ngāueʻaki ʻa e fakamanamana, tenge, mo e fakamālohi ke fakamālohiʻi ʻaki ʻa e kakaí ke nau tali ʻa ʻene founga-pulé. ʻOkú ne ʻai ke ʻalu hifo ʻa e afi mei he langí ʻi heʻene fakangalingali ʻokú ne fakahoko ha ngafa fakapalōfita ʻaki ʻene taukaveʻi kuó ne ikunaʻi ʻa e ngaahi kongakau ʻa e koví ʻi he ongo tau ʻe ua ʻa māmani ʻi he senituli hono 20 pea kuó ne ikunaʻi ʻa e tui faka-Kominiusí.

16:17—Ko e hā ʻa e “ʻatā [pe ʻea]” ʻoku lilingi ki ai ʻa e ipu hono fitú? Ko e “ʻeá” ʻokú ne fakatātaaʻi ʻa e fakakaukau fakasētané, ʻa e “laumalie [hehema fakaefakakaukau] ʻoku lolotonga ngaue ni ʻi he hako ʻo talangataʻa.” Ko e ʻea kona ko ení ʻoku mānava ʻaki ia ʻe he fokotuʻutuʻu fulikivanu fakakātoa ʻo e ngaahi meʻa ʻa Sētané—Ef. 2:2.

Ngaahi Lēsoni kia Kitautolu:

13:1-4, 18. Ko “ha manu fekai” ʻokú ne fakatātaaʻi ʻa e ngaahi puleʻanga fakaetangatá ʻoku ʻalu hake ia “mei he tahi,” ʻa ia, ko e fuʻu tokolahi taʻemanonga ʻo e faʻahinga ʻo e tangatá. (Ai. 17:12, 13; Tan. 7:2-8, 17) Ko e manu fekai ko ení, naʻe fakatupu mo fakaivia ia ʻe Sētane, ʻokú ne maʻu ʻa e fika 666, ʻokú ne fakamamafaʻi ʻa ʻene mātuʻaki taʻehaohaoá. Ko hono mahinoʻi ʻa e manu fekaí ʻoku tokoniʻi ai kitautolu koeʻuhi ke ʻoua te tau muimui ʻi he leleiʻia ai pe lotu ki ai ʻo hangē ko ia ʻoku fai ʻe he faʻahinga tokolahi ʻo e tangatá.—Sione 12:31; 15:19.

13:16, 17. Neongo ʻa e ngaahi faingataʻa ʻoku tau fehangahangai nai mo ia ʻi hono fakahoko ʻetau ngāue fakaʻaho ko ia, hangē ko e “fakatau mai pe fakatau atu,” ʻoku ʻikai totonu ke tau fakaʻatā ke tenge kitautolu ke tuku ke puleʻi ʻe he manu fekaí ʻa ʻetau moʻuí. Ko hono tali ʻa e ‘fakaʻilonga ʻo e manu fekaí ʻi hotau nimá, pē ʻi hotau laʻé’ ʻe iku ʻo fakaʻatā ai ʻa e manu fekaí ke ne puleʻi ʻetau ngāué pe uesia ʻetau fakakaukaú.

14:6, 7. Ko e fanongonongo fakaeʻāngeló ʻoku akoʻi mai ai ʻoku totonu ke tau talaki fakavavevave ʻa e ongoongo lelei ʻo e Puleʻanga ʻo e ʻOtuá kuo ʻosi fokotuʻú. ʻOku totonu ke tau tokoniʻi ʻetau kau ako Tohi Tapú ke nau fakatupulekina ha manavahē lelei ki he ʻOtuá pea ke tuku kolōlia kia Sihova.

14:14-20. ʻI he kakato ʻa e ‘ututaʻu ʻo mamaní,’ ʻa ia ko e utu-taʻu ʻo e faʻahinga ʻe fakahaofí, ʻe taimi leva ki he ʻāngeló ke ne laku “ki he fuʻu tataʻonga kalepi ʻo e houhau ʻo e ʻOtua” ʻa e fakatahaʻi ʻo e “vaine [pe kālepi] ʻo mamani.” Ko e kālepi ko iá​—ʻa e fokotuʻutuʻu fakameleʻi hā mai ʻa Sētane ʻo e ngaahi puleʻanga ʻoku pule ki he faʻahinga ʻo e tangatá fakataha mo ʻenau “ngaahi fuhi” ʻo e fua koví—​ʻe fakaʻauha leva ai ʻo taʻengata. ʻOku totonu ke tau fakapapauʻi ke ʻoua ʻe tākiekina kitautolu ʻe he kālepi ʻo e māmaní.

16:13-16 (PM). Ko e ngaahi “laumalie uli” ʻoku nau fakatātaaʻi ʻa e fakamatala fakangalilelei fakatēmeniō kuo fakataumuʻa ke ne fakapapauʻi ʻoku ʻikai tākiekina ʻa e ngaahi tuʻi ʻo e māmaní ʻe he lilingi hifo ʻa e ipu ʻe fitu ʻo e houhau ʻa e ʻOtuá, ka ʻi hono kehé ʻoku faʻufaʻu ia ke fakafepaki kia Sihova.​—Mt. 24:42, 44.

16:21. ʻI he ofi ʻa e ngataʻanga ʻo e māmani ko ení, ko e fanongonongo ʻo e ngaahi fakamaau ʻa Sihova ki he fokotuʻutuʻu fulikivanu ʻa Sētané ʻe kau nai ki ai ʻa e ngaahi lea fefeka anga-kehe, ngalingali ʻoku fakatātaaʻi ʻaki ia ʻa e ʻaisi. Kae kehe, ko e tokolahi taha ʻo e faʻahinga ʻo e tangatá ʻe hokohoko atu pē ʻenau laukovi ki he ʻOtuá.

PULE ʻA E TUʻI IKUNÁ

(Fkh. 17:1–22:21)

Ko “Babilone koe Lahi,” ʻa e ʻemipaea ʻi māmani ʻo e lotu loí, ko ha konga palakū ia ʻo e māmani fulikivanu ʻo Sētané. Ko e vīsone hono 11 ʻoku fakatātaaʻi ai ia ko ha “fuʻu feʻauaki”​—ko ha fefine ʻulungāanga taʻetaau—​‘oku heka i he manu fekai oku kulaahoaho.’ ʻE fakaʻauha fakaʻaufuli ia ʻe he “nifo e hogofulu” ʻo e manu fekai pē ko ia ʻokú ne heka aí. (Fkh. 17:1, 3, 5, 16, PM) ʻI hono fakatatau ʻa e fefine feʻauakí ki ha “fuʻu kolo,” ko e vīsone hokó ʻoku fanongonongo ai ʻa ʻene toó pea ʻomai ai ha ui fakavavevave ki he kakai ʻa e ʻOtuá ke nau “hiki meiate ia.” Ko e tō ʻa e fuʻu koló ʻoku tengihia ia ʻe he tokolahi. Kae kehe, ʻoku ʻi ai ʻa e fiefia ʻi he langí, koeʻuhi ko e “taʻane ʻa e Lami.” (Fkh. 18:4, 9, 10, 15-19; 19:7) ʻI he vīsone hono 13, ko e tokotaha heka ʻi ha “hōsi hinehina” ʻokú ne ʻalu atu ke tau mo e ngaahi puleʻangá. ʻOkú ne fakangata ʻa e māmani fulikivanu ʻo Sētané.—Fkh. 19:11-16.

Fēfē ʻa e “Ngata ʻo onoʻaho, ʻa ia ko e Tevolo foki mo Setane”? ʻE hoko ʻafē hono “li ia ki he ano afi”? Ko e taha ia ʻo e ngaahi kaveinga ʻo e vīsone hono 14. (Fkh. 20:2, 10) Ko e ongo vīsone fakamuimuí ʻoku fakaʻali mai ai ʻa e moʻui lolotonga ʻa e Taʻu ʻe Taha Afé. ʻI he ngata ʻa e “meʻa fakaha,” ʻoku sio ai ʻa Sione ki ha ‘vaitafe oe vai moui oku haʻu i he loto hala lahí,’ mo ha fakaafe fakaofo ʻoku fakaaʻu mai ki ha taha pē ʻoku “fieinua.”​—Fkh. 1:1; 22:1, 2, 17, PM.

Tali ki he Ngaahi Fehuʻi Fakatohitapú:

17:16; 18:9, 10—Ko e hā ʻoku tengihia ai ʻe he “ngaahi tuʻi ʻo mamani” ʻa e meʻa tofu pē ko ia naʻa nau fakaʻauhá? Ko e ʻuhinga ʻo ʻenau tengihiá ko e siokita ʻataʻatā. Hili ʻa e fakaʻauha ʻo Pāpilone ko e Lahí, ʻoku hoko moʻoni ai ʻo ʻiloʻi ʻe he ngaahi tuʻi ʻo māmaní ʻa ʻene ʻaonga lahi kia kinautolú. Naʻá ne ʻai ke tali ʻi he tuʻunga fakalotú ʻa ʻenau ngaahi ngāue fakafeʻātungiá. Naʻe toe tokoniʻi kinautolu ʻe Pāpilone ko e Lahi ʻi hono ui ʻa e toʻutupú ke nau kau ʻi he taú. ʻIkai ngata aí, naʻá ne fakahoko ha konga mahuʻinga ʻi hono ʻai ke moʻulaloa ʻa e kakaí.

19:12—ʻOku anga-fēfē ʻa e ʻikai ʻiloʻi ʻe ha taha ka ko Sīsū pē ʻa hono hingoa ʻoku ʻikai fakahāʻí? Ko e hingoá ni ʻoku hā ngali ʻuhinga ia ki he tuʻunga mo e ngaahi monū makehe, hangē ko e ngaahi hingoa ko ia ʻoku hā ʻi he Aisea 9:6 (9:5, PM), ʻa ia ʻoku maʻu ʻe Sīsū lolotonga ʻa e ʻaho ʻo e ʻEikí. ʻOku ʻikai ʻiloʻi ʻe ha taha ʻa e hingoá ni ka ko ia pē koeʻuhi ko e makehe ʻa hono ngaahi monuú pea ko ia pē taha ʻe lava ke ne mahinoʻi ʻa e ʻuhinga ʻo ʻene maʻu ʻa e tuʻunga māʻolunga peheé. Kae kehe, ʻoku vahevahe ʻe Sīsū ʻa e niʻihi ʻo e ngaahi monū ko ení mo e kau mēmipa ʻo ʻene kalasi taʻahine malí, ko hono moʻoní ‘ʻo tohi ʻia kinautolu ʻa e hingoa foʻou ʻoʻoná.’​—Fkh. 3:12.

19:14—Ko hai ʻe heka fakataha mo Sīsū ʻi ʻĀmaketoné? ʻE kau ʻi he lotolotonga ʻo e ‘ngaahi matatau ʻi he langí’ ʻa ia ʻoku kau mo Sīsū ʻi he tau ʻa e ʻOtuá ʻa e kau ʻāngeló pea pehē ki he kau ikuna pani kuo nau ʻosi maʻu ʻa honau pale fakahēvaní.—Mt. 25:31, 32; Fkh. 2:26, 27.

20:11-15—Ko e ngaahi hingoa ʻo hai ʻoku hiki ʻi he “tohi ʻo e moʻui”? Ko e tohi eni ʻoku ʻi ai ʻa e hingoa ʻo e faʻahinga kotoa te nau maʻu ʻa e moʻui taʻengatá—ʻa e kau Kalisitiane paní, ko e ngaahi mēmipa ʻo e fuʻu kakai lahí, mo e kau sevāniti faitōnunga ʻa e ʻOtuá ʻa ia te nau hokosia ʻa e “toetuʻu ʻa e angatonu.” (Ng. 24:15; Fkh. 2:10; 7:9) Ko e faʻahinga ʻa ia te nau moʻui ʻi he ‘toetuʻu ʻa e angahalá’ ʻe tohi honau hingoá ʻi he “tohi ʻo e moʻui” ʻo kapau pē te nau ngāue ʻo fehoanaki mo e “meʻa ʻoku tuʻu ʻi he ngaahi tohi” ʻo e fakahinohino naʻe fakaava lolotonga ʻa e Taʻu ʻe Taha Afé. Kae kehe, ʻoku ʻikai tohi ʻa e ngaahi hingoá ʻaki ha vaitohi ʻe taʻealatāmateʻi. ʻOku hoko ʻo tuʻumaʻu ʻa e hingoa ʻo e kau paní ʻi heʻenau fakamoʻoniʻi tonu ʻa e faitōnunga ʻo aʻu ki he maté. (Fkh. 3:5) Ko e hingoa ʻo e faʻahinga ʻoku nau maʻu ʻa e moʻui ʻi he māmaní ʻe hoko ʻo tuʻuloa ʻi he taimi te nau lavaʻi ai ʻa e ʻahiʻahi fakaʻosi ʻi he ngataʻanga ʻo e taʻu ʻe taha afé.—Fkh. 20:7, 8.

Ngaahi Lēsoni kia Kitautolu:

17:3, 5, 7, 16 (PM). Ko e “poto ʻoku mei ʻolunga” ʻoku tokoniʻi ai kitautolu ke tau mahinoʻi “ae mea fakalilolilo oku kau ki he fefine, moe manu fekai [kulaʻahoʻaho] oku ne fua ia.” (Sem. 3:17) Ko e manu fekai fakaefakatātā ko ení naʻe kamata ia ko e Kautaha ʻa e Ngaahi Puleʻangá pea naʻe fakaake ki mui ʻo hoko ko e Ngaahi Puleʻanga Fakatahatahá. ʻIkai ʻoku totonu ke ueʻi kitautolu ʻi hono tatala ʻa e meʻa fakalilolilo ko ení ke tau faivelenga ʻi hono malangaʻi ʻa e ongoongo lelei ʻo e Puleʻanga ʻo e ʻOtuá mo fanongonongo ʻa e ʻaho ʻo e fakamaau ʻa Sihová?

21:1-6. ʻOku lava ke tau fakapapauʻi fakaʻaufuli ko e ngaahi tāpuaki naʻe tomuʻa tala ʻi he malumalu ʻo e pule ʻa e Puleʻangá ʻe hoko moʻoni. Ko e hā hono ʻuhingá? Koeʻuhi ʻoku pehē fekauʻaki mo ia: “Kuo fai!”

22:1, 17 (PM). Ko e “vaitafe maa oe vai moui” ʻokú ne fakafofongaʻi ʻa e ngaahi tokonaki ʻa Sihova ki hono fakaakeake ʻa e faʻahinga talangofua ʻo e tangatá mei he angahalá mo e maté. ʻOku ala maʻu he taimí ni ha konga ʻo e vai ko ení. ʻOfa ke ʻoua ʻe ngata pē ʻi heʻetau tali loto-houngaʻia ʻa e fakaafe ke haʻu ʻo ‘too taetotogi ae vai oe mouí’ kae toe vēkeveke foki ke fakaaʻu atu ia ki he niʻihi kehé!

[Fakamatala ʻi lalo]

[Fakatātā ʻi he peesi 5]

Ko ha ngaahi tāpuaki fakaofo moʻoni ē ʻe aʻusia ʻe he faʻahinga talangofua ʻo e tangatá ʻi he malumalu ʻo e pule ʻa e Puleʻangá!