Ko e Liliu ʻa e Natula ʻo e “Lotu Faka-Kalisitiané”—ʻOku Ala Tali ʻe he ʻOtuá?

PEHĒ pē ʻokú ke fekauʻi ha tokotaha tā-valivali ke ne tā ha fakatātā ʻoʻou. ʻI heʻene fakaʻosi iá, ʻokú ke fiefia; ʻoku haohaoa ʻa e ʻīmisí. ʻOkú ke fakakaukau atu ki hoʻo fānaú, fanga makapuná, pea mo honau fanga makapuná te nau sio ʻi he fakatātaá mo e ongoʻi laukau lahi.

Kae kehe, hili ha ngaahi toʻutangata ki mui mei ai, ʻoku fakakaukau ʻa e taha ia ʻo ho hakó ʻoku ʻikai ke hā lelei ʻa e mei ʻosi ia ʻa e muʻalaʻe ʻi he fakatātaá, ko ia ʻokú ne tānaki atu ki ai ha fulufuluʻiʻulu. ʻOku ʻikai ke saiʻia mo e tokotaha ia ʻe taha ʻi he fuo ʻo e ihú, ko ia ʻokú ne liliu mo ia. ʻOku hokohoko mai ʻa e “ngaahi fakaleleiʻi” kehe ʻi he taufetongi mai ʻa e ngaahi toʻutangatá, ko ia ʻoku faai atu pē ʻo ke kiʻi faitatau siʻisiʻi pē mo e fakatātaá. Kapau naʻá ke ʻilo naʻe pau ke hoko ʻa e meʻá ni, te ke ongoʻi fēfē? ʻOku pau ko e ongoʻi fisiʻia moʻoni.

Ko e meʻa fakamamahí, ko e talanoa ki he fakatātā ko ʻení, ʻi hono tefitó, ko e talanoa ia ki he lotu faka-Kalisitiane lau peé. ʻOku fakahaaʻi ʻe he hisitōliá ʻo pehē ʻi he hili pē mate ʻa e kau ʻapositolo ʻa Kalaisí, naʻe kamata leva ke liliu ʻa e tuʻunga totonu ʻo e “lotu faka-Kalisitiané,” ʻo hangē tofu pē ko ia naʻe tomuʻa tala ʻe he Tohitapú.—Mātiu 13:​24-30, 37-43; Ngāue 20:30.a

Ko hono moʻoní, ʻoku totonu ʻaupito ke ngāueʻaki ʻa e ngaahi tefitoʻi moʻoni ʻa e Tohitapú ki he ngaahi anga fakafonua mo e ngaahi kuonga kehekehe. Ko ha meʻa mātuʻaki kehe ʻaupito ʻa e liliu ia ʻo e ngaahi akonaki ʻa e Tohitapú ke feʻunga mo e fakakaukau ʻoku manakoá. Ka, ko e meʻa tofu pē ia kuo hokó. Ko e fakatātaá, fakakaukau atu ki he ngaahi liliu kuo fai ʻi ha ngaahi tafaʻaki mahuʻinga.

Ko e Fāʻūtaha ʻa e Siasí mo e Puleʻangá

Naʻe akoʻi ʻe Sīsū ko hono tuʻunga-pulé, pe Puleʻangá, ko ha meʻa fakahēvani ia, ʻa ia ʻi he taimi tukupau, te ne fakaʻauha ʻa e ngaahi tuʻunga-pule fakaetangata kotoa pē pea pule ia ki he māmaní fakakātoa. (Taniela 2:44; Mātiu 6:​9, 10) ʻE ʻikai ke pule mai ia ʻo fakafou ʻi he ngaahi fokotuʻutuʻu fakapolitikale fakaetangatá. “Ko hoku puleʻanga ʻoku ʻikai ʻo e maama ko eni,” ko e lea ia ʻa Sīsuú. (Sione 17:16; 18:36) Ko ia, ko e kau ākonga ʻa Sīsuú, lolotonga ʻenau tauhi-laó, naʻa nau fakaʻehiʻehi mei he ngaahi meʻa fakapolitikalé.

Kae kehe, ʻi he aʻu mai ki he taimi ʻo e ʻEmipola Loma ko Konisitanitainé ʻi he senituli hono faá, ko e tokolahi ʻo e faʻahinga naʻe taku ko e kau Kalisitiané naʻa nau hoko ʻo taʻefaʻakātaki ʻi he tatali ki he foki mai ʻa Kalaisí pea mo hono fokotuʻu ʻo e Puleʻanga ʻo e ʻOtuá. Naʻe faai mai pē, ʻo liliu ʻenau fakakaukau ki he ngaahi meʻa fakapolitikalé. “Ki muʻa ʻia Konisitanitainé,” ko e lau ia ʻa e tohi ko e Europe​—A History, “naʻe ʻikai feinga ʻa e kau Kalisitiané ia ke maʻu ha mafai [fakapolitikale] ko ha founga ia ke fakalahi ai ʻenau taumuʻá. ʻI he hili ʻa Konisitanitainé, naʻe fetakinima leva ʻa e lotu faka-Kalisitiané mo e kau politiki māʻolungá.” Naʻe hoko leva ʻa e lotu faka-Kalisitiane fakafōtunga foʻoú ko e lotu fakapuleʻanga “fakaleveleva,” pe “katolika,” ʻa e ʻEmipaea Lomá.

ʻOku fakahā ʻe he ʻenisaikolopētia Great Ages of Man ʻo pehē, koeʻuhi ko e fekoekoeʻi ko ʻeni ʻa e Siasí mo e Puleʻangá, “ʻi he aʻu mai ki he 385 T.S., ko e taʻu pē ia ʻe 80 hili ʻa e foʻi peau lahi fakamuimui ʻo e fakatangaʻi ʻo e kau Kalisitiané, naʻe kamata leva ʻa e Siasí ʻiate ia ke ne tāmateʻi ʻa e kau tui tokāteline kehé, pea ko ʻene kau faifekaú naʻa nau ngāueʻaki ʻa e mafai ʻo meimei tatau pē mo e kau ʻemipolá.” Naʻe kamata leva ai ha kuonga ʻa ia naʻe fetongi ai ʻe he heletaá ʻa e fakalotoʻí ko e founga ia ʻo e fakatafokiʻi maí, pea ko e haʻa faifekau maʻu hingoa fakalakanga, mo maʻu-mafaí naʻá ne fetongi ʻe ia ʻa e kau malanga anga-fakatōkilalo ʻo e ʻuluaki senitulí. (Mātiu 23:​9, 10; 28:​19, 20) Ko e faihisitōlia ko H. G. Wells naʻá ne tohi ʻo fekauʻaki mo e “ngaahi faikehekehe loloto ʻi he vahaʻa” ʻo e lotu faka-Kalisitiane ʻi he senituli hono faá “pea mo e akonaki ʻa Sīsū ʻo Nasaletí.” Ko e “ngaahi faikehekehe loloto” ko ʻení naʻe aʻu ʻo ne uesia ʻa e ngaahi akonaki tefito fekauʻaki mo e ʻOtuá mo Kalaisí.

Ko e Toe Fakafōtunga Foʻou ʻo e ʻOtuá

Naʻe akoʻi ʻe Kalaisi mo ʻene kau ākongá “ʻoku taha pe ʻa e ʻOtua, ko e Tamai,” ʻo fakafaikehekeheʻi ʻaki hono huafa fakaeia, ko e Sihová, ʻa ia ʻoku hā meimei tuʻo 7,000 ʻi he ngaahi muʻaki maniusikilipi Tohitapú. (1 Kolinito 8:6; Sāme 83:18) Naʻe fakatupu ʻe he ʻOtuá ʻa Sīsū; ko iá “ko e ʻuluaki fanauʻi ʻi he meʻa fakatupu kotoa pē,” ko e lau ia ʻa e Catholic Douay Version ʻo e Tohitapú ʻi he Kolose 1:15. Ko ia ai, ʻi he tuʻunga ko ha tokotaha naʻe fakatupú, naʻe fakahaaʻi hangatonu ʻe Sīsū: “ʻOku lahi ʻa e Tamai ʻiate au.”—Sione 14:28.

Ka ʻi he aʻu mai ki he senituli hono tolú, naʻe ʻi ai ʻa e kau faifekau fakatupu tākiekina pau, naʻa nau manako ʻi he akonaki fakaetolutahaʻiʻotua ʻa e filōsefa Kalisi lotu pangani ko Palató, ʻo nau kamata ke fakafōtunga foʻou ʻa e ʻOtuá ke feʻunga mo e fakamatala tui Tolu-Tahaʻi-ʻOtuá. ʻI he ngaahi senituli hoko atu aí, naʻe hiki taʻefakatohitapu hake ai ʻe he tokāteline ko ʻení ʻa Sīsū ke tatau mo Sihova pea ʻai ʻa e laumālie māʻoniʻoni ʻo e ʻOtuá, pe ivi ngāué, ʻo hoko ko ha tokotaha.

ʻI he fekauʻaki mo e ohi ʻe he siasí ʻa e foʻi fakakaukau fakapangani fekauʻaki mo e Tolu-Tahaʻi-ʻOtuá, ʻoku pehē ʻe he New Catholic Encyclopedia: “Ko e fakamatala ko ia ‘ʻOtua ʻe taha ʻi he Toko tolú’ naʻe ʻikai ke fokotuʻu fefeka ia, ko hono moʻoní naʻe ʻikai ke hū kakato ia ki he moʻui ʻa e Kalisitiané mo ʻene fakahāhā ʻa e tuí, ki muʻa ʻi he ngataʻanga ʻo e senituli hono 4. Ka ko e fakamatala matematē ko ení kuó ne ʻuluaki taukaveʻi ʻa e hingoa fakalakanga ko e tokāteline tui Tolu-Tahaʻi-ʻOtua. ʻI he lotolotonga ʻo e ngaahi Tamai Fakaʻapositoló, naʻe halaʻatā ke ofiofi mai ha kiʻi fakakaukau pe vakai pehē.”

ʻI he tuʻunga meimei tatau, ʻoku pehē ʻe he The Encyclopedia Americana: “Naʻe ʻikai ke tapua totonu mai ʻe he tui Tolu-Tahaʻi-ʻOtua ʻo e senituli hono faá ʻa e muʻaki akonaki faka-Kalisitiane fekauʻaki mo e natula ʻo e ʻOtuá; ka, ʻi hono kehé, ko ha mavahe ia mei he akonaki ko ʻení.” ʻOku ui ʻe he The Oxford Companion to the Bible ʻa e Tolu-Tahaʻi-ʻOtuá ko e taha ʻo ha “ngaahi fakamatala fakaetui ki mui.” Ka, naʻe ʻikai ko e Tolu-Tahaʻi-ʻOtuá pē ʻa e foʻi fakakaukau fakapangani naʻe hū ki he siasí.

Ko e Fakafōtunga Foʻou ʻo e Soulú

ʻOku tui lahi ki ai he ʻahó ni ʻoku maʻu ʻe he faʻahinga ʻo e tangatá ha soulu taʻefaʻamate ʻa ia ʻoku hao atu ia ʻi he mate ʻa e sinó. Ka naʻá ke ʻilo ko e akonaki fakalotu ko ʻení ko ha toe tānaki mai mo ia ki mui? Naʻe fakapapauʻi ʻe Sīsū ʻa e moʻoni faka-Tohitapu ko ia ko e kau maté “ʻoku ʻikai te nau ʻilo ha momoʻi meʻa,” ʻo hangē pē ʻoku nau mohé. (Koheleti 9:5 [Tagata Malaga, PM]; Sione 11:​11-13) ʻE toe fakafoki mai ʻa e moʻuí fakafou ʻi ha toetuʻu—‘ko ha tuʻu hake’ mei he mohe ko e maté. (Sione 5:​28, 29) Ko ha soulu taʻefaʻamate, kapau ʻoku ʻi ai, ʻe ʻikai fiemaʻu ki ai ha toetuʻu, koeʻuhi he ʻoku taʻofi ʻe he taʻefaʻamaté ʻa e maté.

Naʻe aʻu ʻo fakahāhaaʻi ʻe Sīsū ʻa e akonaki faka-Tohitapu fekauʻaki mo e toetuʻú ʻaki hono fokotuʻu hake ʻa e kakaí mei he maté. Fakatātāʻaki ʻa Lasalosi, ʻa ia naʻá ne mate he ʻaho ʻe fā. ʻI hono fokotuʻu hake ia ʻe Sīsuú, naʻe hū mai ʻa Lasalosi ki tuʻa mei he fonualotó ko ha tangata moʻui, ʻoku mānava. Naʻe ʻikai ha soulu taʻefaʻamate ia naʻe moulu hifo mei ha palataisi fakahēvani ʻo hū ki hono sinó ʻi he ofo hake ʻa Lasalosi mei he maté. Kapau naʻe ʻi ai ha meʻa pehē, heʻikai mei fai ʻe Sīsū ia ha meʻa lelei maʻana ʻaki hono fokotuʻu mai iá!—Sione 11:​39, 43, 44.

Ko ia, ko e hā ʻa e matavai ʻo e foʻi fakakaukau ki he soulu-taʻefaʻamaté? ʻOku pehē ʻe he The Westminster Dictionary of Christian Theology ko e foʻi fakakaukaú “ko e tupu lahi mei he filosofia faka-Kalisí ʻikai mei he fakahā fakatohitapú.” ʻOku fakamatala ʻi he The Jewish Encyclopedia: “Ko e tui ko ia ʻoku hokohoko atu ʻa e moʻui ʻa e soulú ʻi he hili ʻa e mate ʻa e sinó ko ha meʻa ia ʻoku fekauʻaki mo ha foʻi fakamahalo fakafilosofia pe fakateolosia kae ʻikai ʻi he tui faingofuá, pea ko ia ai, ʻoku ʻikai akoʻi fakapatonu mai ia ʻi ha feituʻu ʻi he Tohitapu Māʻoniʻoní.”

ʻOku faʻa hoko, ʻo taki atu ʻa e loi ʻe taha ki ha toe loi ʻe taha, pea ʻoku hoko moʻoni ia ʻi he akonaki ʻo e soulu-taʻefaʻamaté. Naʻá ne fakaava ai ʻa e matapā ki he foʻi fakakaukau fakapangani ʻo e fakamamahiʻi taʻengata ʻi ha afi ko helí.b Ka, ʻoku fakahā mahino mai ʻe he Tohitapú “koe totogi oe agahala koe mate”—ʻikai ko e fakamamahiʻi taʻengata. (Loma 6:​23, PM) Ko ia ai, ʻi hono fakamatalaʻi ʻa e toetuʻú, ʻoku fakahaaʻi ʻe he King James Version: “Naʻe tuku hake ʻe he tahí ʻa e kau mate naʻe ʻi aí; pea tuku hake ʻe mate mo heli ʻa e kau mate naʻe ʻiate kinauá.” Pehē foki, ʻoku pehē ʻe he Tohitapu Douay ko e “tahí . . . mo mate mo heli naʻa nau tuku hake ʻenau kau maté.” ʻIo, ʻi hono ʻai mahinó, ko e faʻahinga ʻi helí ʻoku nau mate, “mohe,” ʻo hangē ko ia naʻe leaʻaki ʻe Sīsuú.—Fakahā 20:13.

ʻOkú ke tui loto-moʻoni ko e akonaki ko ia ʻo e fakamalaʻia taʻengata ʻi helí ʻokú ne tohoaki ʻa e kakaí ki he ʻOtuá? ʻIkai ʻaupito. ʻI he ʻatamai ʻo e kakai faitotonu mo ʻofá, ko ha foʻi fakakaukau ia ke talitekeʻi! ʻI he tafaʻaki ʻe tahá, ʻoku akoʻi ʻe he Tohitapú ko e “ʻOtua ko e ʻOfa” pea ko e anga-fakamamahi ko iá, naʻa mo hono fai ki he fanga manú, ʻoku fakalilifu ia kiate ia.—1 Sione 4:8; Palovepi 12:10 (Lea Fakatātā, PM); Selemaia 7:31; Siona 4:11.

Ko Hono Fakamatamatakoviʻi ʻa e “Fakatātaá” ʻi he Ngaahi Taimi ʻi Onopōní

ʻOku hokohoko atu ʻi he ʻahó ni ʻa hono fakamatamatakoviʻi ʻo e ʻOtuá mo e lotu faka-Kalisitiané. Ko ha palōfesa ʻo e lotú naʻá ne fakamatalaʻi ki muí ni mai ʻa e fefāingaʻaki ʻe taha ʻi hono siasi Palotisaní, ʻi he “mafai ʻo e Tohitapú mo e tuí ʻa ʻene fepaki mo e mafai ʻo e kehekehe ʻi he natulá mo e ngaahi fakakaukau fakaetangatá, ʻi he vahaʻa ʻo e anga-tonu ʻa e siasí ki he tuʻunga-ʻeiki ʻo Kalaisí ʻa ʻene fepaki mo ha ʻai ke feʻunga pea mo e liliu ʻo e lotu faka-Kalisitiané ki he fakakaukau ʻo e kuongá. Ko e ʻīsiu ʻeni ʻoku ʻi he tuʻunga fakatuʻutāmakí: Ko hai ʻokú ne fokotuʻutuʻu ʻa e ʻasenita ki he siasí . . . Tohitapu Māʻoniʻoní pe ko e fakakaukau tefito ʻo e taimi ní?”

Ko e meʻa fakamamahí, “ko e fakakaukau tefito ʻo e taimi ní” ʻoku kei hehema ia ki he ikuna. Hangē ko ʻení, ʻoku ʻikai fakapulipuli, kuo liliu ʻe he ngaahi siasi lahi honau tuʻungá ʻi he ngaahi ʻīsiu kehekehe koeʻuhí ke hā laka ki muʻa mo taʻefilifilimānako. Tautefito ki he ngaahi meʻa fakaeʻulungāngá, kuo hoko ai ʻa e ngaahi siasí ʻo tauʻatāina lahi ʻaupito, ʻo hangē ko ia naʻe lave ki ai ʻi he kupu kamatá. Ka, ʻoku fakahaaʻi mahino ʻe he Tohitapú ko e feʻauakí, tonó, mo e fakasōtomá ko e ngaahi angahala mamafa ia ʻi he ʻafio mai ʻa e ʻOtuá pea ko e faʻahinga ko ia ʻoku nau fai ʻa e ngaahi angahala peheé “ʻe ʻikai hanau tofiʻa ʻi he Puleʻanga ʻo e ʻOtua.”—1 Kolinito 6:​9, 10; Mātiu 5:​27-32; Loma 1:​26, 27.

ʻI he taimi naʻe tohi ai ʻe he ʻapositolo ko Paulá ʻa e ngaahi lea ʻoku lave ki ai ʻi ʻolungá, ko e māmani ʻo Kalisi-Loma naʻe takatakai ʻiate iá naʻe lahi fau ai ʻa e ngaahi founga kotoa ʻo e anga-fulikivanú. Naʻe mei lava pē ke fakaʻuhinga ʻa Paula: ‘ʻIo, naʻe tuku hifo ʻe he ʻOtuá ʻa Sōtoma mo Komola ki he efuefu koeʻuhi ko e ngaahi angahala fakaefehokotaki fakasino lahi fau aí, ka ko e taʻu ia ʻe 2,000 kuo maliu atú! Ko ia ai, ʻoku ʻikai kaunga ia ki he kuonga fakamaama ko ʻení.’ Kae kehe, naʻe ʻikai te ne fakaʻuhinga; naʻá ne fakafisi ke fakameleʻi ʻa e moʻoni ʻa e Tohitapú.—Kaletia 5:​19-23.

Sio ki he Muʻaki “Fakatātaá”

ʻI he lea ki he kau taki lotu Siu ʻo hono taimí, naʻe pehē ʻe Sīsū ko ʻenau lotú naʻe ‘kula noa koeʻuhi naʻa nau ako ʻaki ha ngāhi tokateline ʻa ia ko e ngāhi tuʻutuʻuni pe ʻa e tangatá.’ (Mātiu 15:9) Ko e kau faifekau ko iá naʻa nau fai ʻa e meʻa tatau pē ki he Lao ʻa Sihova naʻe fakafou ʻia Mōsesé ʻa ia naʻe fai ʻe he haʻa faifekau ʻo Puleʻanga-Haʻa-Kalisitiané, pea ʻoku nau kei fai pehē, ki he akonaki ʻa Kalaisí—ʻo nau afuhi ʻa e “vali” ko e talatukufakaholó ki he moʻoni fakaʻotuá. Ka naʻe tatala ʻe Sīsū ʻa e ngaahi loi kotoa pē maʻá e lelei ʻa e kakai loto-totonú. (Maake 7:​7-13) Naʻe leaʻaki ʻe Sīsū ʻa e moʻoní, tatau ai pē pe naʻe manakoa ia pe ʻikai. Naʻe hoko maʻu pē ʻa e Folofola ʻa e ʻOtuá ko hono tuʻunga mafaí ia.—Sione 17:17.

Ko ha kehekehe lahi ē ʻoku fokotuʻu ʻe Sīsū ki he tokolahi taha ʻo e faʻahinga ʻoku taku ko e kau Kalisitiané! Ko e moʻoni, naʻe kikiteʻi ʻe he Tohitapú: “ʻE vēkeveke ʻa e kakaí ki he ngaahi meʻa foʻou fakamuimui tahá pea tānaki . . . ʻa e kau faiakó ʻo fakatatau ki heʻenau saiʻia pē ʻa kinautolú; pea hili iá, ʻi he ʻikai ke fanongo ki he moʻoní, te nau hanga ki he ngaahi talatupuʻá.” (2 Timote 4:​3, 4, The Jerusalem Bible) Ko e “ngaahi talatupuʻa” ko ʻení, ʻa ia kuo tau lave ki ha niʻihi siʻi, ʻoku nau fakaʻauha fakalaumālie, ka ko e moʻoni ia ʻo e Folofola ʻa e ʻOtuá ʻoku fakatupu langa hake, pea ʻoku taki atu ia ki he moʻui taʻengatá. Ko e moʻoni ʻeni ʻoku fakalototoʻaʻi kimoutolu ʻe he Kau Fakamoʻoni ʻa Sihová ke mou sivisiviʻí.—Sione 4:24; 8:32; 17:3.

[Fakamatala ʻi lalo]

[Puha/​Fakatātā ʻi he peesi 7]

Ko e Tupuʻanga ʻo e Hingoa Kalisitiané

ʻIkai toe siʻi hifo ʻi he taʻu ʻe hongofulu hili ʻa e pekia ʻa Sīsuú, naʻe ʻiloa ai ʻa ene kau ākongá ʻoku nau kau ki he “ʻalunga kó é.” (Ngāue 9:2; 19:​9, 23; 22:4) Ko e hā hono ʻuhingá? Koeʻuhi ko ʻenau founga moʻuí naʻe fakatefito takataki ia ʻi he tui kia Sīsū Kalaisí, ʻa ia ko iá “ko e Hala, pea mo e Moʻoni mo e Moʻui.” (Sione 14:6) ʻI ha taimi leva, hili ʻa e 44 T.S., ʻi ʻAniteoke ʻi Sīliá, naʻe hoko ai ʻa e kau ākonga ʻa Sīsuú ʻo “ui . . . ko e kau Kalisitiani.” (Ngāue 11:26) Naʻe tali vave ʻa e hingoá ni, ʻo aʻu ki he lotolotonga ʻo e kau ōfisa fakapuleʻangá. (Ngāue 26:28) Naʻe ʻikai ke liliu ʻe he hingoa foʻoú ia ʻa e founga moʻui ʻa e Kalisitiané, ʻa ia naʻe hokohoko atu ʻene faʻifaʻitaki ki he founga ʻa Kalaisí.​—1 Pita 2:21.

[Fakatātā ʻi he peesi 7]

ʻI heʻenau ngāue fakafaifekau fakahāhaá, ʻoku fakahanga ai ʻe he Kau Fakamoʻoni ʻa Sihová ʻa e kakaí ki he Folofola ʻa e ʻOtuá, ko e Tohitapú

[Maʻuʻanga ʻo e Tā ʻi he peesi 4]

Ko hono tolu mei toʻohemá: United Nations/Photo by Saw Lwin