Tauʻatāina Lāngilangiʻia ʻOku Vavé Ni ki he Fānau ʻa e ʻOtuá

“Naʻe fakamoʻulaloa ʻa Natula [“ʻa e fakatupú,” NW] ki he muna . . . ka naʻe tuku ke ne ʻamanaki pe, ʻo pehe, Naʻa mo ia, ʻa Natula [“ʻa e fakatupú,” NW], ʻe faifai pea fakaʻataʻatā mei heʻene popula ki he ʻauha, kae fakahoko ia ki he tauʻataina fakalangi ʻa e fanau ʻa e ʻOtua.”​—LOMA 8:​20, 21.

 1. Naʻe anga-fēfē ʻa e tuʻu fakaetaipe ʻa e feilaulau ʻa Sīsuú ʻi he ʻAho Fakaleleí?

NAʻE foaki mai ʻe Sihova ʻa hono ʻAlo tofu-pē-taha-ne-fakatupú ke hoko ko ha feilaulau huhuʻi ʻo fakaava ai ʻa e hala ki he moʻui fakahēvani maʻá e toko 144,000 ʻo e faʻahinga ʻo e tangatá mo e ngaahi ʻamanaki taʻengata ki he māmaní maʻá e toenga ʻo e faʻahinga ʻo e tangatá. (1 Sione 2:​1, 2) Hangē ko ia naʻe hā ʻi he kupu ki muʻá, ko e feilaulau ʻa Sīsū maʻá e kau Kalisitiane fanauʻi ʻe he laumālié naʻe tuʻu fakaetaipe ia ʻi he taimi naʻe feilaulauʻaki ai ʻe he taulaʻeiki lahi ʻIsilelí ha pulu ko ha fakamolemole angahala maʻana, ko hono fāmilí, pea mo e matakali ʻo Līvaí ʻi he ʻAho ʻo e Fakalelei fakataʻú. ʻI he ʻaho tatau pē, naʻá ne feilaulauʻaki ai ha kosi ko ha fakamolemole angahala maʻá e kau ʻIsileli kehé kotoa, ʻo hangē pē ko e feilaulau ʻa Kalaisí ʻe ʻaonga ia ki he faʻahinga ʻo e tangatá ʻi he tuʻunga fakalūkufua. Ko ha kosi moʻui naʻá ne ʻave fakaefakatātā atu ʻa e fuʻufuʻunga angahala ʻa e kakaí ʻi he taʻu kuo hili atú, ʻo pulia atu mo ia ʻi he toafá.a​—Livitiko 16:​7-15, 20-22, 26.

 2, 3. Ko e hā ʻoku ʻuhinga ki ai ʻa e fakamatala ʻa Paula ʻoku lēkooti ʻi he Loma 8:​20, 21?

² ʻI he hili ʻa hono fakamatalaʻi nounou mai ʻa e ʻamanaki ʻa e faʻahinga ʻo e tangatá ʻa ē te nau hoko ko e “ngaahi foha [fakahēvani] ʻo e ʻOtua,” naʻe pehē ʻe he ʻaposetolo ko Paulá: “Ko e ʻamanakituʻu ʻa Natula [“ʻa e fakatupú,” NW] ʻoku ne nofoʻaki tali ki he fakaeʻa ʻo e ngaahi foha ʻo e ʻOtua. He naʻe fakamoʻulaloa ʻa Natula [“ʻa e fakatupú,” NW] ki he muna: ka talaʻehai ko hono loto, ka koeʻuhi pe ko ia naʻa ne fai ʻa e fakamoʻulaloa: ka naʻe tuku ke ne ʻamanaki pe, ʻo pehe, Naʻa mo ia, ʻa Natula [“ʻa e fakatupú,” NW], ʻe faifai pea fakaʻataʻatā mei heʻene popula ki he ʻauha, kae fakahoko ia ki he tauʻataina fakalangi ʻa e fanau ʻa e ʻOtua.” (Loma 8:​14, 17, 19-21) Ko e hā ʻa e ʻuhinga ʻo e fakamatala ko ʻení?

³ ʻI he taimi naʻe fakatupu ai hotau tupuʻanga ko ʻĀtamá ko ha tangata haohaoá, naʻá ne hoko ko ha “foha [pe tama] ʻo e ʻOtua.” (Luke 3:38) Koeʻuhi ko e angahalá, naʻá ne hoko ai ʻo “popula ki he ʻauha” pea fakahoko ʻa e tuʻunga ko iá ki he faʻahinga ʻo e tangatá. (Loma 5:12) Naʻe fakaʻatā ʻe he ʻOtuá ke fanauʻi mai ʻa e faʻahinga ʻo e tangatá ʻi he “muna” ʻo nau fetaulaki mo ia koeʻuhi ko ʻenau taʻehaoahaoa tukufakaholó, ka naʻá ne ʻoange ʻa e ʻamanaki fakafou ʻi he “hako,” ko Sīsū Kalaisi. (Senesi 3:15; 22:18; Kaletia 3:16) ʻOku tuhu ʻa e Fakahā 21:​1-4 ki he taimi ʻa ia ‘ʻe ʻikai toe ʻi ai ha mate, mamahi, tangi, mo e ongosia.’ Koeʻuhi ko ha talaʻofa ʻeni ki he “faʻahinga ʻo e tangata,” ʻoku fakapapauʻi mai ai kiate kitautolu ko ha sōsaieti ʻo e faʻahinga ʻo e tangatá ʻi māmani ʻe moʻui ʻi he malumalu ʻo e pule ʻa e Puleʻangá te nau hokosia ha fakafoʻou ʻo e ʻatamaí mo e sinó ki he moʻui lelei kakato mo e moʻui taʻengata ʻi he tuʻunga ko e “fanau ʻa e ʻOtua.” ʻI he lolotonga ʻo e Pule Taʻu ʻe Taha Afe ʻa Kalaisí, ʻe ‘fakaʻataʻatā mei he pōpula ki he ʻauhá’ ʻa e faʻahinga talangofua ʻo e tangatá. ʻI he hili ʻa hono fakamoʻoniʻi ʻa e mateaki kia Sihova he lolotonga ʻo ha ʻahiʻahi fakaʻosi, ʻe fakatauʻatāinaʻi taʻengata leva kinautolu mei he angahala tukufakaholó mo e maté. (Fakahā 20:​7-10) Ko e faʻahinga leva ʻi he māmaní te nau maʻu ʻa e “tauʻataina fakalangi ʻa e fanau ʻa e ʻOtua.”

ʻOku Nau Pehē “Haʻu”!

 4. ʻOku ʻuhinga ki he hā ʻa e pehē ke “toʻo taʻetotongi ʻa e Vaiola”?

⁴ Ko ha ʻamanaki fakaofo ē ʻoku fokotuʻu atu ki he faʻahinga ʻo e tangatá! Tā neʻineʻi ke taki muʻa faivelenga ʻa e kau Kalisitiane ʻoku fanauʻi ʻe he laumālié ʻa ia ʻoku nau kei ʻi he māmaní ʻi hono tala atu ia ki he niʻihi kehé! Ko e faʻahinga ko ia te nau hoko ko e konga ʻo e “taʻahine mali” ʻo e Lami kuo fakalāngilangiʻí, ʻa Sīsū Kalaisi, ʻoku kau ʻa e toenga ʻo e kau paní ʻi he fakahoko ʻo e ngaahi lea fakaekikité ni: “Ko e Laumalie mo e Taʻahine [“mali,” NW] ʻoku na pehe, Haʻu. Pea ko ia ʻoku ne fanongo ke ne pehe, Haʻu. Pea ko ia ʻoku fieinu ke ne haʻu. Pea ko ia ʻoku ne loto ki ai, ke ne toʻo taʻetotongi ʻa e Vaiola.” (Fakahā 21:​2, 9; 22:​1, 2, 17) ʻOku ʻikai ke fakangatangata pē ʻa e ngaahi ʻaonga ʻo e feilaulau huhuʻi ʻa Sīsuú ki he kau pani ʻe toko 144,000. ʻOku hanganaki ngāue ʻa e laumālie ʻo e ʻOtuá ʻi he toenga ko ia ʻo e kalasi ʻo e taʻahine malí ʻi he māmaní ʻi he pehē “Haʻu.” ʻIlonga ha taha ʻoku fanongo ʻa ia ʻokú ne fieinua ki he māʻoniʻoní ʻoku fakaafeʻi ke ne pehē “Haʻu,” ʻo ʻai ai ia ki he tokonaki hulu fau ʻa Sihova ki he fakamoʻuí.

 5. Ko hai ʻoku fiefia ʻa e Kau Fakamoʻoni ʻa Sihová ke ʻi honau lotolotongá?

⁵ ʻOku maʻu ʻe he Kau Fakamoʻoni ʻa Sihová ʻa e tui ki he tokonaki ʻa e ʻOtuá ki he moʻui fakafou ʻia Sīsū Kalaisí. (Ngāue 4:12) ʻOku nau fiefia ke ʻi honau lotolotongá ʻa e faʻahinga loto-totonu ko ia ʻoku nau loto ke ako fekauʻaki mo e ngaahi taumuʻa ʻa e ʻOtuá pea fai hono finangaló. Ko honau ngaahi Fale Fakatahaʻangá ʻoku ʻatā ia ki he tokotaha kotoa pē ʻokú ne fakaʻamu ke ‘haʻu ʻo ne toʻo taʻetotongi ʻa e Vaiolá’ ʻi he “taimi fakamui” ko ʻení.​—Taniela 12:4.

Ngaahi Liliu ʻi he ʻAlu ʻa e Taimí

 6. Kuo anga-fēfē ʻa e ngāue ʻa e laumālie ʻo e ʻOtuá ʻi he kau sevāniti ʻa Sihová ʻi he ngaahi vahaʻa taimi kehekehe?

⁶ ʻOku ʻi ai ʻa e taimi ʻa e ʻOtuá ki hono fakahoko ʻa ʻene ngaahi taumuʻá, pea ʻoku kaunga ʻeni ki heʻene ngaahi feangainga mo e faʻahinga ʻo e tangatá. (Koheleti 3:1; Ngāue 1:7) Neongo naʻe hifo ʻa e laumālie ʻo e ʻOtuá ki heʻene kau sevāniti ʻo e ngaahi taimi ki muʻa ʻi he Kalisitiané, naʻe ʻikai fanauʻi ai kinautolu ko hono ngaahi foha fakalaumālie. Kae kehe, kamata ʻia Sīsū, naʻe hoko ai ʻa e taimi kia Sihova ke ne ngāueʻaki hono laumālie māʻoniʻoní ke fanauʻi ʻaki ha kau tangata mo ha kau fefine ʻosi fakatapui, ki ha tofiʻa fakahēvani. Pea fēfē hotau taimí? Ko e laumālie tatau pē ʻoku lolotonga ngāue ʻi he “fanga sipi kehe” ʻa Sīsuú, ka ʻoku ʻikai te ne langaʻi ʻiate kinautolu ʻa e ʻamanaki mo e holi ki he moʻui fakahēvaní. (Sione 10:16) ʻI heʻenau maʻu ʻa e ʻamanaki foaki mei he ʻOtuá ko e moʻui taʻengata ʻi ha māmani palataisí, ʻoku nau poupouʻi fiefia ʻa e toenga ʻo e kau paní ʻi hono ʻoatu ʻa e fakamoʻoni he lolotonga ʻa e vahaʻa taimi ko ʻeni ʻo e fetongi mei he maama motuʻá ki he maama foʻou māʻoniʻoni ʻa e ʻOtuá.​—2 Pita 3:​5-13.

 7. Ko e hā ʻa e ngāue ututaʻu naʻe tokanga ki ai ʻa e Kau Ako Tohitapú, ka ko e hā naʻa nau ʻilo ʻo fekauʻaki mo e palataisí?

⁷ Naʻe kamata ʻe he ʻOtuá “ke ne taki ki he langilangi ha ngaahi foha tokolahi” ʻaki hono huaʻi hifo ʻa e laumālie māʻoniʻoní ʻi he Penitekosi ʻo e 33 T.S., pea ʻoku ngalingali naʻá ne fokotuʻu ha taimi ke fakakakato ai ʻa e “Isileli faka-ʻOtua” fakalaumālié ko hono fakakātoá ko e toko 144,000. (Hepelu 2:10; Kaletia 6:16; Fakahā 7:​1-8) Kamata ʻi he 1879, ko ha ngāue ututaʻu fekauʻaki mo e kau Kalisitiane paní naʻe faʻa lave ki ai ʻi he makasini ko ʻení. Ka ko e Kau Ako Tohitapú (ʻoku ui he taimí ni ko e Kau Fakamoʻoni ʻa Sihová) naʻa nau toe ʻilo ʻoku ʻomai ʻe he ngaahi Konga Tohitapú ʻa e ʻamanaki ʻo e moʻui taʻengata ʻi ha māmani palataisi. Ko e fakatātaá, ko e tatau ʻo e Watch Tower ʻo Siulai 1883 naʻe pehē ai: “ʻI hono fokotuʻu ʻe Sīsū hono puleʻangá, ʻo fakangata ʻa e koví, mo e alā meʻa peheé, ʻe hoko leva ʻa e foʻi māmani ko ʻení ko ha palataisi, . . . pea ko kinautolu kotoa ʻoku nau ʻi honau ngaahi faʻitoká te nau haʻu ki ai. Pea ʻi he hoko ʻo talangofua ki he ngaahi lao aí te nau moʻui taʻengata nai ai.” ʻI he faai atu ʻa e taimí, naʻe fakaʻau ke ʻosi atu ʻa hono tānaki ʻo e kau paní, pea naʻe faai mai ai ʻa hono tānaki ki he kautaha ʻa Sihová ʻa e faʻahinga naʻe ʻikai te nau maʻu ʻa e ʻamanaki fakahēvaní. Lolotonga iá, naʻe tuku ʻe he ʻOtuá ki heʻene kau sevāniti paní, ʻa e kau Kalisitiane fanauʻi foʻoú, ha fakamaama ʻoku taau ke tokangaʻi.​—Taniela 12:3; Filipai 2:15; Fakahā 14:​15, 16.

 8. Naʻe anga-fēfē ʻa e tupulaki ʻa e mahino fekauʻaki mo e ʻamanaki ki he māmaní ʻi he muʻaki ngaahi taʻu 1930 tupú?

⁸ Tautefito talu mei he 1931 ʻa e feohi ai ʻa e faʻahinga ʻoku nau maʻu ʻa e ʻamanaki ki he māmaní mo e fakatahaʻanga Kalisitiané. ʻI he taʻu ko iá, naʻe fakamāmaʻi ai ʻe Sihova ʻa e toenga ʻo e kau Kalisitiane fanauʻi ʻe he laumālié ke nau ʻilo ko e ʻIsikeli vahe 9 ʻoku ʻuhinga ia ki he kalasi ko ʻeni ʻi he māmaní, ʻa ia ʻoku fakaʻilongaʻi ke hao moʻui atu ki he maama foʻou ʻa e ʻOtuá. Naʻe fakaʻosiʻaki ʻi he 1932 ʻo pehē, ko e faʻahinga ko ia hangē ha sipí ʻi onopōní naʻe tomuʻa fakatātaaʻi mai ia ʻe he feohi ʻa Sehu mo Sionatapí (Sihonatapi). (2 Tuʻi 10:​15-17) ʻI he 1934 naʻe fakamaʻalaʻala mai ai ko e “kau Sionatapí” ʻoku totonu ke “fakatoputapuʻi” pe fakatapui, kinautolu ki he ʻOtuá. ʻI he 1935, ko e “fuʻu kakai tokolahí,” pe “fuʻu kakai lahi”​—naʻe tomuʻa fakakaukau ki ai ko ha konga hono ua ʻo e kalasi fakalaumālie ko ia ʻe hoko ko e “takanga” ʻo e taʻahine mali ʻo Kalaisi ʻi hēvaní—naʻe ʻilo fakapapauʻi ko e fanga sipi kehe ia ʻoku nau maʻu ha ʻamanaki ki he māmaní. (Fakahā 7:​4-15; 21:​2, 9; Sāme 45:​14, 15) Pea tautefito talu mei he 1935 mo e takimuʻa ʻa e kau paní ʻi ha kumi ki he kakai loto-totonu ʻoku nau fakaʻamu ke moʻui taʻengata ʻi ha māmani palataisí.

 9. ʻI he hili ʻa e 1935, ko e hā naʻe tuku ai ʻe he kau Kalisitiane ʻe niʻihi ʻa e maʻu ʻinasi ʻi he mā mo e uaine ʻi he Kai Efiafi ʻa e ʻEikí?

⁹ ʻI he hili ʻa e 1935 ko e kau Kalisitiane ko ia ʻe niʻihi naʻa nau maʻu ʻinasi ʻi he maá mo e uainé ʻi he Kai Efiafi ʻa e ʻEikí naʻe ʻikai te nau toe maʻu ʻinasi ai. Ko e hā hono ʻuhingá? Koeʻuhí naʻa nau fakatokangaʻi ko ʻenau ʻamanakí ki he māmaní, ʻikai ki hēvani. Naʻe pehē ʻe ha fefine ʻe taha naʻe papitaiso ʻi he 1930: “Neongo [ko e maʻu ʻinasi aí] naʻe fakakaukau ki ai ko e meʻa totonu ke fai, tautefito ki he kau faifekau faivelenga taimi-kakató, naʻe ʻikai ʻaupito ke u tuipau naʻá ku maʻu ha ʻamanaki fakahēvani. Ko ia, ʻi he 1935, naʻe fakamaʻalaʻala mai ai kiate kimautolu kuo fai hano fakatahatahaʻi ʻo ha fuʻu kakai lahi ʻi he ʻamanaki ki he moʻui taʻengata ʻi he māmaní. Naʻe fiefia ʻa e tokolahi ʻo kimautolu ʻi he mahino ko e konga kimautolu ʻo e fuʻu kakai lahi ko iá, pea naʻe tuku leva ʻemau maʻu ʻinasi ʻi he maá mo e uainé.” Naʻa mo e ngaahi tohi faka-Kalisitiané naʻe liliu mo hono natulá. Lolotonga ko e ngaahi tohi ʻo e ngaahi taʻu ki muʻá naʻe faʻufaʻu tefito ia ki he kau muimui fanauʻi fakalaumālie ʻo Sīsuú, mei he 1935 ʻo faai mai naʻe tokonaki mai ai ʻi he Taua Leʻo mo e ngaahi tohi kehe ʻa e ‘tamaioeiki agatonú’ ʻa e meʻakai fakalaumālie naʻe feʻungamālie mo e ngaahi fiemaʻu fakatouʻosi ʻa e kau paní mo honau takanga ʻoku nau maʻu ʻa e ʻamanaki ki he māmaní.​—Mātiu 24:​45-47, PM.

10. ʻE anga-fēfē nai hano fetongi ʻo ha tokotaha pani taʻeangatonu?

¹⁰ Pehē pē ne hoko ha tokotaha pani ʻo taʻeangatonu. ʻE ʻi ai hano fetongi? Naʻe fakahā ʻe Paula ʻa e konga lahi ʻi heʻene fakamatala fekauʻaki mo e fuʻu ʻōlive fakaefakatātaá. (Loma 11:​11-32) Kapau ʻoku fiemaʻu ke fetongi ha tokotaha fanauʻi ʻe he laumālié, ngalingali ʻe ʻoange ʻe he ʻOtuá ʻa e ui fakahēvaní ki ha taha ko ʻene tuí kuo hoko ko e faʻifaʻitakiʻanga ʻi hono fai ʻa e ngāue toputapu kiate iá he ngaahi taʻu lahi.​—Fakafehoanaki mo Luke 22:​28, 29; 1 Pita 1:​6, 7.

Ngaahi ʻUhinga Lahi ke Loto-Houngaʻia Ai

11. Tatau ai pē pe ko e hā ʻa e natula ʻo ʻetau ʻamanakí, ko e hā ʻoku fakapapauʻi mai ʻe he Semisi 1:17 kiate kitautolú?

¹¹ Pe ko fē pē ha feituʻu ʻoku tau tauhi anga-tonu ai ʻa Sihova, te ne fakalato ʻa e ngaahi fiemaʻu kiate kitautolú mo ʻetau ngaahi holi totonú. (Sāme 145:16; Luke 1:​67-74) Tatau ai pē pe ʻoku tau maʻu moʻoni ha ʻamanaki fakahēvaní pe ko ʻetau ʻamanakí ʻa kitautolu ki he māmaní, ʻoku tau maʻu ʻa e ngaahi ʻuhinga lelei ke loto-houngaʻia ai ki he ʻOtuá. ʻOkú ne fai maʻu pē ʻa e ngaahi meʻa ʻoku lelei taha ki he faʻahinga ʻoku nau ʻofa ʻiate iá. Naʻe pehē ʻe he ākonga ko Sēmisí “ʻilonga ha foaki lelei, pea ʻilonga ha meʻaʻofa haohaoa, ko e ʻalu hifo pe ia mei he Tamai ʻa e ngaahi maama,” ko Sihova ko e ʻOtuá. (Semisi 1:17) Tau tokanga ange ki ha niʻihi ʻo e ngaahi foaki mo e ngaahi tāpuaki ko ʻení.

12. Ko e hā ʻoku lava ai ke tau pehē kuo foaki ʻe Sihova ki heʻene sevāniti anga-tonu taki taha ha ʻamanaki fakaofó?

¹² Kuo foaki ʻe Sihova ki heʻene sevāniti anga-tonu taki taha ha ʻamanaki fakaofo. Kuó ne ui ha niʻihi ki he moʻui fakahēvaní. Ki heʻene kau fakamoʻoni ki muʻa he Kalisitiané, naʻe foaki ki ai ʻe Sihova ʻa e ʻamanaki fisifisimuʻa ko ha toetuʻu ke moʻui taʻengata ʻi he māmaní. Hangē ko ʻení, naʻe tui ʻa ʻĒpalahame ki he toetuʻú pea fakatatali “ki he kolo ʻoku oʻona ʻa e ngaahi tuʻunga”​—ko e Puleʻanga fakahēvaní ʻa ia ko hono malumalú ʻe fokotuʻu mai ai ia ki he moʻui ʻi he māmaní. (Hepelu 11:​10, 17-19) Pehē foki, ʻi he taimi ko ʻeni ʻo e ngataʻangá, ʻoku tuku ai ʻe he ʻOtuá ki he laui miliona ʻa e ʻamanaki ko e moʻui taʻengata ʻi ha māmani palataisi. (Luke 23:43; Sione 17:3) Ko hono moʻoní, ko ha taha pē kuo foaki ki ai ʻe Sihova ha ʻamanaki maʻongoʻonga pehē ʻoku totonu ke ne houngaʻia loloto ai.

13. Kuo anga-fēfē ʻa e ngāue ʻa e laumālie māʻoniʻoni ʻo e ʻOtuá ʻi heʻene kakaí?

¹³ ʻOku tuku mai ʻe Sihova ʻa hono laumālie māʻoniʻoní ko ha meʻaʻofa ki heʻene kakaí. Ko e kau Kalisitiane kuo foaki ki ai ha ʻamanaki fakahēvaní ʻoku pani ʻaki ʻa e laumālie māʻoniʻoní. (1 Sione 2:20; 5:​1-4, 18) Ka neongo ia, ʻoku maʻu ʻe he kau sevāniti ʻa e ʻOtuá ʻa ē ʻoku nau maʻu ʻa e ngaahi ʻamanaki ki he māmaní ʻa e tokoni mo e tataki ʻa e laumālié. Naʻe kau ʻi he faʻahingá ni ʻa Mōsese, ʻa ia naʻá ne maʻu ʻa e laumālie ʻo Sihová, ʻo hangē pē ko e kau tangata ʻe toko 70 naʻe fakanofo ke nau tokoni kiate iá. (Nomipa 11:​24, 25) ʻI he malumalu ʻo e tākiekina ʻa e laumālie māʻoniʻoní, naʻe ngāue ai ʻa Pesalili ko ha tufunga fakasanisani mataotao ia ʻi he fekauʻaki mo e tāpanekale ʻo ʻIsilelí. (Ekisoto 31:​1-11) Naʻe hifo ʻa e laumālie ʻo e ʻOtuá kia Kitione, Sēfita, Samisoni, Tēvita, ʻIlaisiā, ʻIlaisa, mo e niʻihi kehe. Neongo ko e faʻahinga tāutahá ni ʻo e kuonga muʻá ʻe ʻikai ʻaupito ke ʻohake kinautolu ki he lāngilangi fakahēvaní, naʻe tataki kinautolu mo tokoniʻi ʻe he laumālie māʻoniʻoní, ʻo hangē ko e fanga sipi kehe ʻa Sīsū ʻi he ʻaho ní. Ko ia ai, ko hono maʻu ʻa e laumālie ʻo e ʻOtuá ʻoku ʻikai ʻuhinga ai ia ʻoku pau ke tau maʻu ʻa e ui fakahēvaní. Kae kehe, ʻoku tokonaki mai ʻe he laumālie ʻo Sihová ʻa e tataki, tokoniʻi kitautolu ke malanga mo fakahoko ʻa e ngaahi ngāue kehe kuo foaki mai ʻe he ʻOtuá, ʻomai kiate kitautolu ʻa e mālohi ʻoku makehe atu ia mei he tuʻunga anga-mahení, pea fakatupu ʻiate kitautolu ʻa hono fua ko e ʻofa, fiefia, melino, kātaki-fuoloa, anga-ʻofa, anga-lelei, tui, anga-malū, mo e mapuleʻi-kita. (Sione 16:13; Ngāue 1:8; 2 Kolinito 4:​7-10; Kaletia 5:​22, 23) ʻIkai ʻoku totonu ke tau fakamālōʻia ʻa e meʻaʻofa anga-ʻofa ko ʻeni mei he ʻOtuá?

14. ʻOku anga-fēfē ʻetau maʻu ʻa e ʻaonga mei he meʻaʻofa ʻa e ʻOtuá ko e ʻiló mo e potó?

¹⁴ Ko e ʻiló mo e potó ko e meʻaʻofa mei he ʻOtuá ʻa ia ʻoku totonu ke tau loto-houngaʻia ai tatau ai pē pe ko ʻetau ʻamanakí ki hēvani pe ki he māmaní. ʻOku tokoniʻi kitautolu ʻe he ʻilo totonu kia Sihová ke tau “sivi ʻo ʻilo ʻa e ngaahi meʻa ʻoku lelei lahi” pea ‘ke tāu ʻetau laká pea mo e ʻEikí, ʻo huʻu ki he meʻa kotoa pe te ne hōifua aí.’ (Filipai 1:​9-11; Kolose 1:​9, 10) ʻOku ngāue ʻa e poto fakaʻotuá ko ha maluʻi mo ha tataki ʻi he moʻuí. (Palovepi 4:​5-7; Koheleti 7:12) Ko e ʻilo mo e poto moʻoní ʻoku makatuʻunga ia ʻi he Folofola ʻa e ʻOtuá, pea ʻoku tautefito ki he kiʻi toenga ʻo e kau paní ʻa hono tohoaki ki he meʻa ʻokú ne leaʻaki ʻo kau ki heʻenau ʻamanaki fakahēvaní. Kae kehe, ʻoku ʻikai ko e ʻofa ki he Folofola ʻa e ʻOtuá pea mo hono mahinoʻi lelei iá ʻoku maʻu ai ʻa e founga ʻa e ʻOtuá ki hono fakahaaʻi kuo ui kitautolu ki he moʻui fakahēvaní. Ko e kau tangata hangē ko Mōsese mo Tanielá naʻa nau tohi foki ha ngaahi konga ʻo e Tohitapú, ka ʻe fokotuʻu mai kinautolu ke moʻui ʻi he māmaní. Tatau ai pē pe ko ʻetau ʻamanakí ki hēvani pe ki he māmaní, ko kitautolu kotoa ʻoku tau maʻu ʻa e meʻakai fakalaumālié fakafou mai ʻi he “tamaioeiki agatonu mo boto” fakahōifua ʻa Sihová. (Mātiu 24:​45-47, PM) He loto-houngaʻia lahi ē ka ko kitautolu kotoa ki hono maʻu ʻa e ʻilo ko iá!

15. Ko e hā ʻa e taha ʻo e ngaahi meʻaʻofa lahi taha ʻa e ʻOtuá, pea ʻoku anga-fēfē hoʻo vakai ki aí?

¹⁵ Ko e taha ʻo e ngaahi meʻaʻofa lahi taha ʻa e ʻOtuá ko e tokonaki anga-ʻofa mai ʻo e feilaulau huhuʻi ʻa Sīsuú, ʻa ia ʻoku ʻaonga kiate kitautolu ʻo tatau ai pē pe ko ʻetau ʻamanakí ki hēvani pe ki māmani. Naʻe ʻofa ʻa e ʻOtuá ki he māmani ʻo e faʻahinga ʻo e tangatá “ko ia naʻa ne foaki hono ʻAlo tofu-pe-taha-ne-fakatupu, koeʻuhi ko ia kotoa pe ʻoku tui pikitai kiate ia ke ʻoua naʻa ʻauha, kae maʻu ʻa e moʻui taʻengata.” (Sione 3:16) Pea naʻe ueʻi ʻe he ʻofa ʻa Sīsuú ʻa ia “ke tuku ʻene moʻui ke huhuʻiʻaki ha tokolahi, heʻene fetongi kinautolu.” (Mātiu 20:28) Hangē ko ia naʻe fakamatalaʻi ʻe he ʻaposetolo ko Sioné, ko Sīsū Kalaisí “ko e fakatupuhōifuaʻanga foki ia koeʻuhi ko ʻetau ngaahi hia [ngaahi hia ʻa e kau paní]; pea talaʻehai ko ʻetau ngaahi hia ʻatautolu pe, ka koeʻuhi foki ko e ngaahi hia ʻa mamani katoa.” (1 Sione 2:​1, 2) Ko ia ai, ko kitautolu kotoa pē ʻoku totonu ke tau loto-houngaʻia loloto ki he tokonaki anga-ʻofa ko ʻeni ki he fakamoʻui ki he moʻui taʻengatá.b

Te Ke ʻI Ai?

16. Ko e hā ʻa e meʻa ongoongoa ʻe fakamanatu ʻi he hili ʻa e tō ʻa e laʻaá ʻi ʻEpeleli 11, 1998, pea ko hai ʻoku totonu ke ʻi aí?

¹⁶ Ko e loto-houngaʻia ki he huhuʻi naʻe tokonaki ʻe he ʻOtuá ʻo fakafou mai ʻi hono ʻAló ʻoku totonu ke ne ueʻi kitautolu ke tau ʻi ai ʻi he ngaahi Fale Fakatahaʻangá pe ngaahi feituʻu kehe ʻe fakatahataha ki ai ʻa e Kau Fakamoʻoni ʻa Sihová ʻi he hili ʻa e tō ʻa e laʻaá ʻi ʻEpeleli 11, 1998, ke fakamanatu ʻa e pekia ʻa Kalaisí. ʻI he taimi naʻá ne fokotuʻu ai ʻa e ouau ko ʻení mo ʻene kau ʻaposetolo anga-tonú ʻi he pō fakaʻosi ʻo ʻene moʻui ʻi he māmaní, naʻe pehē ʻe Sīsū: “Mou fai ʻeni mōku fakamanatu.” (Luke 22:​19, 20; Mātiu 26:​26-30) Ko e kiʻi toenga ko ia ʻo e kau paní te nau maʻu ʻinasi ʻi he mā taʻelēvaní, ʻokú ne fakafofongaʻi ʻa e sino fakaetangata taʻeangahala ʻo Sīsuú, mo e uaine kulokula taʻehuʻi, ʻokú ne fakahaaʻi ʻa hono taʻataʻa naʻe lilingi ʻi he feilaulaú. Ko e kau Kalisitiane pē ʻoku fanauʻi ʻe he laumālié ʻoku totonu ke nau maʻu ʻinasí koeʻuhi he ko kinautolu pē ʻoku nau ʻi he fuakava foʻoú pea ʻi he fuakava ki he Puleʻangá pea maʻu ʻa e fakamoʻoni taʻealafakaʻikaiʻi ʻa e laumālie māʻoniʻoni ʻo e ʻOtuá ko haʻanautolú ʻamanaki ko ha ʻamanaki fakahēvani. Ko e laui miliona kehe ʻe ʻi aí te nau hoko pē ko e kau mamata anga-fakaʻapaʻapa ʻa ia ʻoku nau loto-houngaʻia ki he ʻofa kuo fakahāhā ʻe he ʻOtuá mo Kalaisi ʻi he fekauʻaki mo e feilaulau ʻa Sīsuú ʻoku malava ai ʻa e moʻui taʻengatá.​—Loma 6:23.

17. Ko e hā ʻoku totonu ke tau manatuʻi fekauʻaki mo e pani ʻe he laumālié?

¹⁷ Ko e ngaahi maʻu fakalotu ki muʻá, ko e ngaahi ongoʻi mālohi ʻoku tupu hake mei he mate ʻa ha taha ʻokú te ʻofa ai, ko e ngaahi faingataʻa ʻoku feʻao he taimí ni mo e moʻui ʻi he māmaní, pe ko e ongoʻi ʻo hono maʻu ha tāpuaki makehe meia Sihová ʻoku taki nai ai ha niʻihi ke nau maʻuhala ko e moʻui fakahēvaní ʻoku ʻo kinautolu ia. Ka ʻoku totonu kiate kitautolu kotoa ke tau manatuʻi ʻoku ʻikai ke fekau mai ʻe he ngaahi Konga Tohitapú ia ke tau maʻu ʻinasi ʻi he mā mo e uaine ʻo e Fakamanatú ke fakahaaʻi ai ʻoku tau loto-houngaʻia ki he feilaulau huhuʻi ʻa Kalaisí. ʻIkai ko ia pē, ko e pani ʻe he laumālié “ʻoku ʻikai tuʻunga ki heʻete loto ki ai, pe ki heʻete lele ki ai, ka ki he . . . ʻOtua,” ʻa e Tokotaha naʻá ne fanauʻi ʻa Sīsū ko ha ʻAlo fakalaumālié pea taki ʻa e toko 144,000 pē ko e ngaahi foha kehe ki he lāngilangí.​—Loma 9:16; Aisea 64:8.

18. Ki he tokolahi taha ʻoku nau tauhi ʻa Sihova ʻi he ʻaho ní, ko e hā ʻa e ngaahi tāpuaki ʻoku hanga mai mei muʻá?

¹⁸ Ko e moʻui taʻengata ʻi ha māmani palataisí ko e ʻamanaki foaki faka-ʻOtua ia ki he fuʻu tokolahi ʻo e faʻahinga ʻo e tangatá ʻoku nau tauhi ʻa Sihova ʻi he ngaahi ʻaho fakaʻosí ni. (2 Timote 3:​1-5) ʻOku vavé ni, ke nau fiefia ʻi he palataisi fakaofo ko ʻení. ʻE tokangaʻi leva ʻe ha kau pilinisi ʻa e ngaahi meʻa ʻi he māmaní ʻi he malumalu ʻo e pule fakahēvaní. (Sāme 45:16) ʻE ʻi ai ʻa e ngaahi tuʻunga melino ʻi he talangofua ʻa e kau nofo ʻi he māmaní ki he ngaahi lao ʻa e ʻOtuá mo ako lahi ange ʻo fekauʻaki mo e ngaahi founga ʻa Sihová. (Aisea 9:​6, 7; Fakahā 20:12) ʻE lahi ʻaupito ʻa e ngaahi ngāue ke faí, ʻi hono langa ʻa e ngaahi ʻapí pea ikuʻi ʻa e māmaní. (Aisea 65:​17-25) Pea fakakaukau atu ki he toe fakatahataha ko e fāmili fiefia ʻi he toe foki mai ʻa e kau maté ki he moʻuí! (Sione 5:​28, 29) ʻI he hili ha ʻahiʻahi fakaʻosi, ʻe mole kotoa atu ʻa e anga-fulikivanú. (Fakahā 20:​7-10) ʻI he hili iá ʻo taʻengata, ʻe fonu ʻa e māmaní ʻi he faʻahinga haohaoa ʻo e tangatá ʻa ia ʻoku “fakaʻataʻatā mei heʻene popula ki he ʻauha, kae fakahoko ia ki he tauʻataina fakalangi ʻa e fanau ʻa e ʻOtua.”

[Fakamatala ʻi lalo]

Ko e Hā Haʻo Tali?

◻ ʻOku ʻuhinga ki he hā ʻa e pehē ke “toʻo taʻetotongi ʻa e Vaiola”?

◻ Tatau ai pē pe ko ʻetau ʻamanakí ki hēvani pe ki māmani, ko e hā ʻa e ngaahi ʻuhinga ʻoku tau maʻu ke tau loto-houngaʻia ai ki he ʻOtuá?

◻ Ko e hā ʻa e ouau fakataʻu ʻoku totonu kiate kitautolu kotoa ke tau maʻú?

◻ Ki he tokolahi taha ʻo e kakai ʻa Sihová, ko e hā ʻoku tuku tauhi mai ʻe he kahaʻú?

[Fakatātā ʻi he peesi 18]

Ko e laui miliona kuo nau kamata ke “toʻo taʻetotongi ʻa e Vaiola.” ʻOkú ke ʻi honau lotolotongá?