Poupouʻi ʻi he Ngaahi ʻAhiʻahi Fakalilifu

FAKAMATALA FAI ʻE ÉVA JOSEFSSON

Ko ha kiʻi kulupu siʻisiʻi ʻo kimautolu naʻe fakatahataha ʻi Újpest vahefonua ʻo Budapest, Hungali, ki ha kiʻi fakataha nounou ki muʻa ke ʻalu atu ʻi he ngāue fakafaifekau faka-Kalisitiané. Ko e 1939 ia, taimi nounou pē ki muʻa ʻi he kamata ʻa e Tau II ʻa Māmaní, pea ko e ngāue fakamalanga ʻa e Kau Fakamoʻoni ʻa Sihová naʻe tapui ia ʻi Hungali. Ko e faʻahinga ko ia naʻe kau ʻi hono akoʻi ʻi he feituʻu kakaí ʻa e Tohitapú ʻi he ngaahi ʻaho ko iá naʻe faʻa puke pōpula kinautolu.

KOEʻUHI ko hoku ʻuluaki taimi ia ke kau ai ʻi he ngāue ko ʻení, kuo pau pē naʻá ku hā kiʻi loto-moʻua mo tea. Naʻe hanga mai kiate au ha tuongaʻane Kalisitiane taʻumotuʻa ange ʻo ne pehē: “Éva, ʻoku ʻikai ʻaupito fiemaʻu ke ke manavahē. Ko e tauhi ʻo Sihová ʻa e lāngilangi lahi taha ʻoku lava ke maʻu ʻe ha tangata.” Ko e ngaahi lea anga-fakaʻatuʻi mo fakaivimālohi ko iá naʻe tokoni ia ke poupouʻi au ʻi he ngaahi ʻahiʻahi fakalilifu lahi.

Ko ha ʻĀtakai Siu

Ko e tama lahi tahá au ʻi ha fāmili Siu, fānau ʻe toko nima. Naʻe ʻikai ke fiemālie ʻa e fineʻeikí ʻi he lotu faka-Siú, peá ne kamata ke sivisiviʻi ʻa e ngaahi lotu kehé. Ko e meʻa ʻeni naʻá ne fetaulaki ai mo Erzsébet Slézinger, ko ha fefine Siu ia ʻe taha ʻa ia naʻá ne kumi mo ia foki ki he moʻoni ʻo e Tohitapú. Naʻe ʻave ʻe Erzsébet ʻa e fineʻeikí ke fetuʻutaki mo e Kau Fakamoʻoni ʻa Sihová, pea ko hono olá, naʻá ku toe hoko foki mo au ʻo mahuʻingaʻia lahi ʻi he ngaahi akonaki ʻa e Tohitapú. Naʻe vave pē ʻa ʻeku kamata vahevahe atu ki he niʻihi kehé ʻa e meʻa naʻá ku akó.

ʻI he hoko hoku taʻu 18 ʻi he faʻahitaʻu māfana ʻo e 1941, naʻá ku fakaʻilongaʻi ai ʻa ʻeku fakatapui kia Sihova ko e ʻOtuá fakafou ʻi he papitaiso ʻi he Vaitafe Danube. Naʻe papitaiso mo e fineʻeikí ʻi he taimi tatau, ka naʻe ʻikai ke kau mai ʻa e tangataʻeikí ʻi heʻema tui ʻilo foʻou faka-Kalisitiané. ʻIkai fuoloa ʻi he hili ʻa ʻeku papitaisó, naʻá ku fai ai ʻa e ngaahi palani ke tāimuʻa, ʻa ia, ke kau ʻi he ngāue fakafaifekau taimi-kakató. Naʻá ku fiemaʻu ke maʻu ha pasikala, ko ia naʻá ku kamata ngāue ʻi ha lepi ʻo ha fuʻu falengāue lālanga tupenu.

Kamataʻanga ʻo e Ngaahi ʻAhiʻahí

Naʻe maʻu ʻe he kau Nasí ʻa Hungali, pea ko e falengāue naʻá ku ngāue aí naʻe fakalele ia ʻi he malumalu ʻo Siamané. ʻI he ʻaho ʻe taha naʻe ui mai ai ʻa e kau ngāue kotoa pē ke hā ʻi he ʻao ʻo e kau supavaisá ke leaʻaki ha tukupā ʻo e mateaki ki he kau Nasí. Naʻe tala mai kiate kimautolu ko e ʻikai ke fai ʻení ʻe ʻi ai hono ngaahi nunuʻa mafatukituki. Lolotonga ʻa e ouau ʻa ia naʻe fiemaʻu ai ke mau tuku ʻa e fakamoʻuí kia Hitilaá, naʻá ku tuʻu anga-fakaʻapaʻapa ka naʻe ʻikai te u fakahoko ʻa e tōʻonga naʻe fiemaʻú. Naʻe ui au ki he ʻōfisí ʻi he ʻaho pē ko iá, ʻo ʻomai ʻeku vahé, pea tuku ki tuʻa. Koeʻuhi he naʻe tāiʻi pē ʻa e ngāué, naʻá ku fifili ai pe ko e hā ʻe hoko ki heʻeku ngaahi palani ke tāimuʻá. Kae kehe, ʻi he ʻaho hono hokó, naʻá ku maʻu ai ha ngāue foʻou pea naʻa mo ha vahe lelei ange.

Ko ia naʻe lava ai ke fakahoko ʻa ʻeku holi ke tāimuʻá. Naʻá ku ngāue mo e ngaahi hoa tāimuʻa ʻe niʻihi, pea ko hoku hoa ngāue fakaʻosí ko Juliska Asztalos. Naʻá ma ngāueʻaki ʻa e Tohitapú pē taha ʻi he ngāue fakafaifekaú, ʻo ʻikai ha tohi ke tufa. ʻI heʻema maʻu ʻa e kakai mahuʻingaʻiá, naʻá ma fai ʻa e ngaahi toe ʻaʻahi pea tuku atu kiate kinautolu ha tohi.

ʻI he taimi ki he taimi, ko Juliska mo aú naʻe pau ke fetongi ʻa e feituʻu naʻá ma ngāue aí. Naʻe hoko ʻení koeʻuhi ko ha pātele, ʻi heʻene ʻiloʻi pē naʻá ma ʻaʻahi ki ‘heʻene fanga sipí,’ naʻá ne fanongonongo ʻi he falelotú kapau ʻe ʻaʻahi kiate kinautolu ʻa e Kau Fakamoʻoni ʻa Sihová, kuo pau ke nau līpooti ange kiate ia pe ki he kau polisí. ʻI he taimi naʻe tala mai ai kiate kimaua ʻe he kakai anga-fakakaumeʻá fekauʻaki mo e fanongonongo peheé, naʻe pau leva ke ma hiki ki ha feituʻu ʻe taha.

ʻI he ʻaho ʻe taha ko Juliska mo au naʻá ma ʻaʻahi ai ki ha kiʻi tamasiʻi ʻa ia naʻá ne fakahāhā ʻa e mahuʻingaʻia. Naʻa mau fai ha alea ki ha toe ʻaʻahi ange ke ʻoange ʻa e meʻa ke ne lau. Ka ʻi heʻema foki atú, naʻe ʻi ai ʻa e kau polisí, pea naʻe puke kimaua ʻo ʻave ki he ʻapi polisi ʻi Dunavecse. Naʻe ngāueʻaki ʻa e kiʻi tamasiʻí ko ha tauhele ke maʻu ai kimaua. ʻI heʻema aʻu atu ki he ʻapi polisí, naʻá ma sio ai ki ha pātele ʻo ʻilo naʻe kau ki ai mo ia foki.

Ko Hoku ʻAhiʻahiʻi Kovi Tahá

ʻI ai ʻi he ʻapi polisí, naʻe tele kotoa ʻa hoku ʻulú, pea naʻe pau ke u tuʻu telefua ʻi muʻa ʻi ha tōseni nai ʻo e kau polisí. Naʻa nau fakaʻekeʻeke au, ʻi he fieʻilo pe ko hai homau taki ʻi Hungalí. Naʻá ku tali ange ʻoku ʻikai hamau taki ka ko Sīsū Kalaisi. Naʻa nau tā anga-fītaʻa au ʻaki ʻenau ngaahi vaʻakaú, ka naʻe ʻikai te u lavakiʻi ʻa hoku fanga tuongaʻane Kalisitiané.

Hili iá, naʻa nau haʻi fakataha hoku ongo vaʻé pea hiki hoku nimá ʻi hoku funga ʻulú ʻo toe haʻi fakataha mo kinaua foki. Naʻa nau tohotohoʻi taha taha kotoa leva au, tuku kehe pē ʻa e polisi ʻe taha. Naʻe fuʻu haʻi maʻu au he naʻe kei ʻilonga pē ia ʻi hoku kiaʻi nimá ʻi he taʻu ʻe tolu ki mui ai. Naʻe fuʻu ngaohi anga-fakamanuʻi au ʻo tuku ai au ʻi ha loki he lalo falé ʻi ha uike ʻe ua kae ʻoua ke moʻui ʻa hoku ngaahi lavelavea lalahí.

Ko ha Vahaʻa Taimi ʻo e Fiemālie

Ki mui ai naʻe ʻave au ki ha pilīsone ʻi Nagykanizsa, ʻa ia naʻe tokolahi ai ʻa e Kau Fakamoʻoni ʻa Sihová. Naʻe hoko atu ai ha taʻu ʻe ua naʻe kiʻi fakafiefia neongo ʻa homau tuku pilīsoné. Naʻa mau fai fakapulipuli ʻemau ngaahi fakatahá kotoa, pea naʻa mau fai ia ʻo hangē pē ko ha fakatahaʻangá. Naʻe toe ʻi ai foki mo homau ngaahi faingamālie lahi ki he malanga ʻikai ʻi he founga anga-mahení. Naʻá ku fetaulaki ʻi he pilīsone ko ʻení mo Olga Slézinger, ko ha tokoua fakakakano ʻo Erzsébet Slézinger, ʻa e fefine naʻá ne fakafeʻiloaki mai ki heʻeku fineʻeikí mo au ʻa e moʻoni ʻo e Tohitapú.

ʻI he aʻu mai ki he 1944 naʻe fakapapauʻi ai ʻe he kau Nasi ʻi Hungalí ke fakaʻauha ʻa e kau Siu Hungalí, ʻo aʻu ki heʻenau tāmateʻi fakaʻāuliliki kinautolu ʻi he ngaahi feituʻu nofoʻi kehe. ʻI he ʻaho ʻe taha naʻa nau omi ai kia Olga mo au. Naʻe fakafonu kimautolu ʻi he ngaahi lēlue uta fanga pulu, pea hili ha fononga mātuʻaki faingataʻa fou atu ʻi Sekisolovākia, naʻa mau aʻu ai ki homau feituʻu kuo teú ʻi he fakatonga ʻo Pōlaní​—ko e kemi ʻo e maté ko Auschwitz.

Hao ʻi Auschwitz

Naʻá ku ongoʻi malu ʻi heʻeku feʻao mo Olga. Naʻá ne anga-fakakata naʻa mo e ʻi he ngaahi tuʻunga faingataʻá. ʻI heʻemau aʻu ki Auschwitz, naʻa mau ʻasi ai ki he tokotaha anga-kovi ko Dr. Mengele, ʻa ia ko ʻene ngāué ko hono fakamavaheʻi ʻa e kau aʻu foʻou atu ʻa ē naʻe ʻikai te nau feʻunga ke ngāué mei he kau sino mālohí. Ko e faʻahinga ki muʻá naʻe tuku atu kinautolu ki he ngaahi loki kasá. ʻI heʻene hoko mai ki homa taimí, naʻe ʻeke ange ʻe Mengele kia Olga, “Ko ho taʻu fiha ʻeni?”

ʻI he loto-toʻa, pea mo ha fakakuitaha fakakata, naʻá ne tali ange, “20.” Ko hono moʻoní, naʻe liunga ua ai hono taʻú. Ka naʻe kata ʻa Mengele ʻo tuku ia ki he tafaʻaki toʻomataʻú peá ne moʻui ai.

Ko e kau pōpula kotoa pē ʻi Auschwitz naʻe fakaʻilongaʻiʻaki kinautolu ʻa e ngaahi fakaʻilonga ʻi honau teunga pōpulá​—ko e kau Siú ko e Fetuʻu ʻa Tēvitá, pea ko e Kau Fakamoʻoni ʻa Sihová ko ha tulaiʻengikolo vāleti. ʻI he taimi naʻa nau loto ai ke tuitui ʻa e Fetuʻu ʻa Tēvitá ki homa valá, naʻá ma fakamatala ange naʻá ma kau ki he Kau Fakamoʻoni ʻa Sihová pea ʻokú ma fiemaʻu ʻa e tulaiʻengikolo vāletí. Naʻe ʻikai koeʻuhi naʻá ma maaʻi ʻa homa tupuʻanga faka-Siú, ka naʻá ma hoko ʻi he taimi ko iá ʻo kau ki he Kau Fakamoʻoni ʻa Sihová. Naʻa nau feinga ke fakamālohiʻi kimaua ke tali ʻa e fakaʻilonga faka-Siú ʻaki hono ʻaka mo hono tā kimaua. Ka naʻá ma tuʻumaʻu mālohi kae ʻoua kuo nau fakahaaʻi ʻokú ma kau ki he Kau Fakamoʻoni ʻa Sihová.

Faifai atu pē, naʻá ku fetaulaki mo hoku tehina ko Elvira, ʻa ia naʻá ne siʻisiʻi hifoʻaki e taʻu ʻe tolu ʻiate au. Naʻe ʻave kotoa ʻa homau fāmilí ʻe toko fitu ki Auschwitz. Ko Elvira pē mo au naʻe tali ʻokú ma feʻunga ki he ngāué. Ko e tangataʻeikí, fineʻeikí, mo ʻemau kiʻi toko tolú naʻa nau mate ʻi he ngaahi loki kasá. Naʻe ʻikai ko ha Fakamoʻoni ʻa Elvira ʻi he taimi ko iá, pea naʻe ʻikai te ma nofo ʻi he feituʻu tatau ʻo e kemí. Naʻá ne hao, ʻo hiki ki he ʻIunaite Seteté, peá ne hoko ai ko ha Fakamoʻoni ʻi Pittsburgh, Pennsylvania, peá ne toki mate ki mui ʻi ai he 1973.

Hao ʻi he Ngaahi Kemi Kehe

ʻI he faʻahitaʻu momoko ʻo e 1944/1945, naʻe fakapapauʻi ai ʻe he kau Siamané ke fetukutuku ʻosi ʻa Auschwitz, koeʻuhi he naʻe fakaofi mai ki ai ʻa e kau Lūsiá. Ko ia naʻe fetuku kimautolu ki Bergen-Belsen ʻi he konga fakatokelau ʻo Siamané. ʻIkai fuoloa mei heʻemau aʻu ki aí, naʻe ʻave ʻa Olga mo au ki Braunschweig. ʻI hení naʻe fiemaʻu ai ke ma tokoni ki hono fakamaʻa ʻa e ngaahi maumau hili ʻa e laku pomu lahi ʻa e ngaahi kongakau Fakatahatahá. Naʻe lāulea ai ʻa Olga mo au ʻo kau ki he meʻá. Koeʻuhi naʻe ʻikai ke pau kiate kimaua pe ʻe maumauʻi ʻa ʻema tuʻuʻataá ʻi hono fai ʻo e ngāue ko ʻení, naʻá ma fakatou fili ke ʻoua ʻe kau ai.

Naʻe fakatupunga ha vālau ʻi heʻema filí. Naʻe tāʻaki kimaua ʻa e ngaahi uipi leta pea ʻave leva ki ha kau sōtia fana tautea. Naʻe tuku mai kiate kimaua ʻa e miniti ʻe taha ke fakakaukau ai fekauʻaki mo e meʻá, pea tala mai kapau heʻikai liliu ʻema fakakaukaú, ʻe fanaʻi kimaua. Naʻá ma tala ange ʻoku ʻikai te ma fiemaʻu ʻe kimaua ha toe taimi ke fakakaukau ai fekauʻaki mo ia koeʻuhi kuó ma ʻosi fakapapauʻi ia. Kae kehe, koeʻuhi he naʻe ʻikai ke ʻi ai ʻa e komanitā ʻo e kemí pea ko ia pē toko taha naʻá ne maʻu ʻa e mafai ke fai ha tuʻutuʻuni fakahoko tautea, naʻe pau ai ke toloi ʻa homa tautea maté.

Lolotonga ʻa e taimi ko iá naʻe fakamālohiʻi kimaua ke tuʻu ʻi he loto ʻataʻatā ʻo e kemí ʻi he ʻahó kotoa. Naʻe leʻohi kimaua ʻe ha ongo sōtia toʻo meʻafana, ʻa ia naʻe fetongi fakahoua ua. Naʻe ʻikai ʻomai ha meʻakai ʻe taha kiate kimaua, pea naʻá ma faingataʻaʻia lahi ʻaupito ʻi he momokó, koeʻuhi he naʻe hoko ia ʻi Fepueli. Naʻe ʻosi ha uike mei he tōʻongafai ko ʻení, ka naʻe ʻikai pē ke haʻu ʻa e komanitaá ia. Ko ia naʻe tuku kimaua ki mui ʻi ha loli, pea ʻi heʻema ʻohovalé, naʻá ma toe foki ai ki Bergen-Belsen.

ʻI he taimi ko iá ko Olga mo au naʻá ma ʻi ha tuʻunga kovi ʻaupito. Naʻe ngangana ʻa e konga lahi taha ʻo hoku fulufuluʻi ʻulú pea naʻá ku mofi lahi. Ko e feinga mālohi tahá pē naʻe lava ai ke u kiʻi ngāué. Naʻe ʻikai feʻunga ʻa e meʻi supo kāpisi taʻehanoiví mo e kiʻi meʻi maá ʻi he ʻaho taki taha. Ka naʻe fiemaʻu ia ke mau ngāue koeʻuhi naʻe tāmateʻi ʻa e faʻahinga naʻe ʻikai te nau lava ʻo ngāué. Ko e fanga tokoua Siamane naʻa nau ngāue mo au ʻi he peitó naʻa nau tokoniʻi au ke u kiʻi mālōlō. ʻI he taimi naʻe haʻu ai ʻa e kau kaʻate ʻaʻahí, naʻe fakatokanga mai ʻa e fanga tokouá kiate au, koeʻuhi ke u tuʻu ʻi he tēpile ngāué, ʻo hā ʻoku ou ngāue mālohi.

ʻI he ʻaho ʻe taha naʻe ʻikai toe ʻi ai ha ivi ʻo Olga ke ʻalu ai ki hono feituʻu ngāué, pea ʻi he hili iá naʻe ʻikai te mau toe sio kiate ia. Naʻe mole ai ʻa hoku kaumeʻa mo ha kaungāfeohi loto-toʻa, ko e tokotaha naʻe fuʻu tokoni lahi kiate au lolotonga ʻa e ngaahi māhina faingataʻa ʻi he ngaahi kemí. ʻI hono tuʻunga ko ha tokotaha muimui pani ʻa hotau ʻEiki ko Sīsū Kalaisí, kuo pau kuó ne maʻu ʻi he taimi pē ko iá ʻa hono pale fakahēvaní.​—Fakahā 14:13.

Tuku Ange mo e Moʻui Hili Iá

ʻI he ngata ʻa e taú ʻi Mē 1945 pea hoko mai ʻa e fakatauʻatāiná, naʻá ku mātuʻaki fuʻu vaivai ʻo ʻikai ai ke u fiefia ʻi he faifai pea laiki ʻa e ʻioke ʻa e kau fakafeʻātungiá; pea ʻikai lava ke u kau ʻi he ngaahi vaka fakafeʻao naʻe ʻave ai ʻa e faʻahinga kuo fakatauʻatāinaʻí ki he ngaahi fonua naʻa nau loto-lelei ke tali kinautolú. Naʻá ku nofo ʻi ha falemahaki ʻi he māhina ʻe tolu koeʻuhi ke toe foki mai ʻa hoku iví. Hili iá naʻe ʻave au ki Suēteni, ʻa ia naʻe hoko ia ko hoku ʻapi foʻou. ʻI he taimi pē ko iá, naʻá ku fakafetuʻutaki ai ki hoku fanga tokoua mo e tuongaʻane Kalisitiané pea naʻá ku toʻo ai ʻi ha taimi ʻa e koloa maʻongoʻonga ko e ngāue fakamalangá.

ʻI he 1949, naʻá ku mali ai mo Lennart Josefsson, ʻa ia naʻá ne ngāue ʻi ha ngaahi taʻu ko ha ʻovasia fefonongaʻaki ʻa e Kau Fakamoʻoni ʻa Sihová. Naʻe tuku pilīsone mo ia foki lolotonga ʻa e Tau II ʻa Māmaní ko e tupu mei heʻene tauhi maʻu ʻene tuí. Naʻá ma kamata ha moʻui fakataha ʻi he tuʻunga ko e ongo tāimuʻa ʻi Sepitema 1, 1949, pea naʻe vaheʻi mai ke ma ngāue ʻi he kolo ko Borås. Lolotonga ʻa homa ʻuluaki ngaahi taʻu ʻi aí, naʻá ma fai maʻu pē ʻa e ako Tohitapu ʻe hongofulu ʻi he uike taki taha mo e faʻahinga mahuʻingaʻiá. Naʻá ma fiefia ʻi he sio ki he hoko ʻo tolu ʻa e fakatahaʻanga ʻi Borås ʻi he taʻu pē ʻe hiva, pea ʻoku ʻi ai ʻa e nima ʻi he taimí ni.

Naʻe ʻikai te u malava ke kei tāimuʻa ʻi ha taimi lōloa koeʻuhi ʻi he 1950 naʻá ma hoko ai ko ha ongo mātuʻa ʻa ha ʻofefine, pea ʻi he taʻu ʻe ua ki mui ai, ki ha foha. Ko ia naʻá ku maʻu ai ʻa e monū fakafiefia ko hono akoʻi ki heʻema fānaú ʻa e moʻoni maʻongoʻonga naʻe akoʻi kiate au ʻe he siʻi tuongaʻane ʻi Hungalí ʻi he taimi naʻá ku taʻu 16 pē aí, ʻo pehē: “Ko e tauhi ʻo Sihová ʻa e lāngilangi lahi taha ʻoku lava ke maʻu ʻe ha tangata.”

ʻI he sio atu ki heʻeku moʻuí, naʻá ku ʻiloʻi ai kuó u hokosia ʻa e moʻoni ʻo e meʻa naʻe tohi ʻe he ʻapositolo ko Sēmisí ʻi heʻene fakamanatu kiate kitautolu ʻa e kātaki ʻa Siopé: “ʻOku ʻofa uʻuuʻu ʻa e ʻEiki [“Sihova, NW], mo ʻofangofua.” (Semisi 5:11) Neongo naʻá ku faingataʻaʻia foki ʻi he ngaahi ʻahiʻahi fakalilifu, kuo tāpuakiʻi lahi ʻaki au ʻa e fānau ʻe toko ua, ko hona ongo hoá, mo e makapuna ʻe toko ono​—ko e kau lotu kotoa kia Sihova. Tuku kehe ia, ʻoku tokolahi ʻaupito ʻaupito, ʻa ʻeku fānau mo e makapuna fakalaumālie, ko e niʻihi ai ʻoku nau ngāue ko e kau tāimuʻa mo e kau misinale. ʻI he taimi ní ko ʻeku ʻamanaki lahí ke feʻiloaki mo siʻi faʻahinga ʻoku nau mohe ʻi he maté pea ke fāʻofua mo kinautolu ʻi he taimi te nau tuʻu hake ai mei honau ngaahi fonualoto fakamanatú.​—Sione 5:​28, 29.

[Fakatātā ʻi he peesi 31]

ʻI he ngāue fakafaifekau ʻi Suēteni hili ʻa e Tau II ʻa Māmaní

[Fakatātā ʻi he peesi 31]

Mo hoku husepānití