Lotu ʻa Ia ʻOku Hōifua ki Ai ʻa e ʻOtuá

 1. Te tau maʻu ʻaonga fēfē kapau ʻoku tau lotu ki he ʻOtuá ʻi he founga totonú?

KO Sihova ko e ʻOtuá ʻoku tokanga lahi mai kiate kitautolu pea ʻokú ne loto ke tau maʻu ʻaonga mei heʻene tataki ʻofá. Kapau ʻoku tau lotu kiate ia ʻi he founga totonú, te tau fiefia pea te tau kalofi ai ʻa e ngaahi palopalema lahi ʻi he moʻuí. Te tau toe maʻu foki ai mo ʻene tāpuakí pea mo ʻene tokoní. (Aisea 48:17) Kae kehe, ʻoku ʻi ai ʻa e ngaahi lotu ʻe laui teau ʻoku nau taukaveʻi ʻoku nau akoʻi ʻa e moʻoni fekauʻaki mo e ʻOtuá. Neongo ia, ʻoku nau kehekehe lahi ʻaupito ʻi heʻenau ngaahi akonaki fekauʻaki mo e ʻOtuá pe ko hai ia pea ko e hā ʻokú ne ʻamanekina meiate kitautolú.

 2. ʻE lava fēfē ke tau ako ʻa e founga totonu ke lotu ai kia Sihová, pea ko e hā ʻa e fakatātā ʻoku tokoniʻi ai kitautolu ke mahinoʻi ení?

² ʻE lava fēfē ke ke ʻiloʻi ʻa e founga totonu ke lotu ai kia Sihová? ʻOku ʻikai fiemaʻu ia ke ke ako pea fakahoa ʻa e ngaahi akonaki ʻa e ngaahi lotu kotoa pē. ʻOku fiemaʻu ke ke ako pē ʻa e meʻa ʻoku akoʻi moʻoni ʻe he Tohi Tapú fekauʻaki mo e lotu moʻoní. Ke fakatātaaʻi: ʻI he ngaahi fonua lahi, ʻoku ʻi ai ha palopalema ʻi he paʻanga loí. Kapau ʻoku ʻoatu kiate koe ʻa e ngāue ko hono vakaiʻi ke ʻilo ʻa e paʻanga loi peheé, ʻe anga-fēfē hoʻo fai iá? ʻAki hono ako maʻuloto ʻa e faʻahinga kotoa pē ʻo e paʻanga loí? ʻIkai. ʻE fakamoleki lelei ange ho taimí kapau te ke ako ki he paʻanga moʻoní. Hili ʻa hoʻo ʻiloʻi pe ʻoku fōtunga fēfē ʻa e paʻanga moʻoní, ʻe lava ai ke ke ʻiloʻi ha paʻanga loi. ʻI he founga meimei tatau, ʻi heʻetau ako ʻa e founga ke ʻiloʻi ai ʻa e lotu moʻoní, ʻe lava ke tau fakatokangaʻi ai ʻa e ngaahi lotu ko ia ʻoku loí.

 3. Fakatatau kia Sīsū, ko e hā kuo pau ke tau faí kapau ʻoku tau loto ke maʻu ʻa e hōifua ʻa e ʻOtuá?

³ ʻOku mahuʻinga ke tau lotu kia Sihova ʻi he founga ʻokú ne hōifua ki aí. ʻOku tui ʻa e kakai tokolahi ʻoku fakahōifua ʻa e ngaahi lotu kotoa pē ki he ʻOtuá, ka ʻoku ʻikai ke akoʻi ia ʻe he Tohi Tapú. ʻOku ʻikai feʻunga naʻa mo haʻate taukaveʻi pē ʻo pehē ko ha Kalisitiane kita. Naʻe pehē ʻe Sīsū: “ʻOku ʻikai ko ia pe ʻoku ne lau mai, ʻEī, ʻEī, te ne hū ki he Puleʻanga ʻo Hevani; ka ko ia ʻoku ne fai ʻa e finangalo ʻo ʻeku Tamai ʻoku ʻi Hevani.” Ko ia ai, ke maʻu ʻa e hōifua ʻa e ʻOtuá, kuo pau ke tau ako ʻa e meʻa ʻoku fiemaʻu ʻe he ʻOtuá meiate kitautolú pea fai ia. Naʻe ui ʻe Sīsū ʻa e faʻahinga ko ē ʻoku ʻikai ke nau fai ʻa e finangalo ʻo e ʻOtuá ko e “kau maumau lao.” (Mātiu 7:​21-23) ʻI he hangē ko e paʻanga loí, ko e lotu loí ʻoku ʻikai hano mahuʻinga moʻoni. ʻI heʻene toe kovi angé, ko e lotu peheé ʻoku fakatupu maumau moʻoni.

 4. ʻOku ʻuhinga ki he hā ʻa e ngaahi lea ʻa Sīsū fekauʻaki mo e ongo hala ʻe uá, pea ʻoku taki atu ki fē ʻa e hala taki taha?

⁴ ʻOku foaki ʻe Sihova ki he tokotaha kotoa pē ʻi he māmaní ʻa e faingamālie ke maʻu ʻa e moʻui taʻengatá. Kae kehe, ke maʻu ʻa e moʻui taʻengata ʻi Palataisí, kuo pau ke tau lotu ʻi he founga totonu ki he ʻOtuá pea moʻui he taimí ni ʻi ha founga ʻa ia ʻoku fakahōifua kiate iá. Ko e meʻa fakamamahí, he ʻoku fakafisi ʻa e tokolahi ke fai ia. Ko e ʻuhinga ia naʻe pehē ai ʻe Sīsū: “Mou hu ʻi he matapa fāsiʻi: he ʻoku fālahi ʻa e matapa, pea ʻatā ʻa e hala, ʻoku fakatau ki mala, pea toko lahi ʻa e kakai ʻoku hū atu ai: koeʻuhi ʻoku fāsiʻi ʻa e matapa, pea ʻefiʻefi ʻa e hala, ʻoku fakatau ki he moʻui; pea tokosiʻi ʻa e kakai ʻoku ʻilo ia.” (Mātiu 7:​13, 14) Ko e lotu moʻoní ʻoku taki atu ia ki he moʻui taʻengatá. Ko e lotu loí ʻoku taki atu ia ki he ʻauha. ʻOku ʻikai finangalo ʻa Sihova ke ʻauha ha taha pē ʻi he faʻahinga ʻo e tangatá, pea ko e ʻuhinga ia ʻokú ne ʻoange ai ki he kakai ʻi he feituʻu kotoa pē ha faingamālie ke ako ʻo fekauʻaki mo iá. (2 Pita 3:9) Ko ia ai, ko hono moʻoní, ko e founga ʻo ʻetau lotu ki he ʻOtuá ʻoku ʻuhinga iá ko e moʻui pe ko e mate kiate kitautolu.

 5. ʻE lava fēfē ke tau fakatokangaʻi ʻa e faʻahinga ʻoku nau tōʻongaʻaki ʻa e lotu moʻoní?

⁵ ʻE lava ke ʻiloʻi fēfē ʻa e ‘hala ki he moʻuí’? Naʻe pehē ʻe Sīsū ko e lotu moʻoní ʻe hā mahino ia ʻi he moʻui ʻa e kakai ʻoku nau tōʻongaʻaki iá. “Ko honau ngāhi fua te mou ʻilo lelei ai kinautolu,” ko ʻene leá ia. “ʻIlonga ha ʻakau lelei ʻoku ne fua ʻaonga.” (Mātiu 7:​16, 17) ʻI hono toe fakalea ʻe tahá, ko e faʻahinga ko ia ʻoku nau tōʻongaʻaki ʻa e lotu moʻoní ʻe ʻiloʻi kinautolu ʻi heʻenau ngaahi tuí mo honau ʻulungāangá. Neongo ʻoku ʻikai ke nau haohaoa pea ʻoku nau fai ʻa e ngaahi fehālaaki, ko e kau lotu moʻoní ʻi he tuʻunga ko ha kulupú ʻoku nau feinga ke fai ʻa e finangalo ʻo e ʻOtuá. Tau lāulea angé ki he tafaʻaki ʻe ono ʻokú ne fakaʻilongaʻi ʻa e faʻahinga ko ia ʻoku nau tōʻongaʻaki ʻa e lotu moʻoní.

6, 7. ʻOku anga-fēfē ʻa e vakai ʻa e kau sevāniti ʻa e ʻOtuá ki he Tohi Tapú, pea naʻe anga-fēfē hono fokotuʻu ʻe Sīsū ʻa e faʻifaʻitakiʻanga ʻi he fekauʻaki mo e meʻá ni?

⁶ Ko e kau sevāniti ʻa e ʻOtuá ʻoku fakatuʻunga ʻenau ngaahi akonakí ʻi he Tohi Tapú. ʻOku pehē ʻe he Tohi Tapú tonu: “Ko e potu Folofola kotoa pe ne fakamanava mei he ʻOtua, ʻoku ʻaonga foki ki he akonaki, ki he fakaʻilo hala, ki he fakatonutonu, ki he ngaohia ke maʻoniʻoni: koeʻuhiā ke tuʻu kakato ʻa e tangata [pe fefine] fakaʻotua, kuo ʻosi sāuni ki he ngāue lelei fulipe.” (2 Timote 3:​16, 17) Naʻe tohi ʻa e ʻapositolo ko Paulá ki hono kaungā Kalisitiané: “ʻI hoʻomou tali ʻa e folofola ongo telinga—ʻa ia naʻe fakafofonga ʻiate kimautolu, ka ko e meʻa ʻa e ʻOtua—fakafetaʻi naʻe ʻikai ko e lea ʻa e tangata naʻa mou maʻu, ka ko e folofola ʻa e ʻOtua, he ko ia maté pe.” (1 Tesalonaika 2:13) Ko ia ai, ko e ngaahi tui mo e ngaahi tōʻongafai ʻa e lotu moʻoní ʻoku ʻikai fakatuʻunga ia ʻi he ngaahi vakai pe talatukufakaholo fakaetangatá. ʻOku nau tupu mei he Folofola fakamānavaʻi ʻa e ʻOtuá, ʻa e Tohi Tapú.

⁷ Naʻe fokotuʻu ʻe Sīsū Kalaisi ʻa e faʻifaʻitakiʻanga totonú ʻaki hono fakatuʻunga ʻene ngaahi akonakí ʻi he Folofola ʻa e ʻOtuá. ʻI he lotu ki heʻene Tamai fakahēvaní, naʻá ne pehē ai: “Ko e folofola aʻau ko e moʻoni ia.” (Sione 17:17) Naʻe tui ʻa Sīsū ki he Folofola ʻa e ʻOtuá, pea ko e meʻa kotoa pē naʻá ne akoʻí naʻe fehoanakimālie mo e Tohi Tapú. Naʻe faʻa pehē ʻe Sīsū: “Kuo tohi.” (Mātiu 4:​4, 7, 10) Pea naʻe lea leva ʻa Sīsū ʻaki ha konga Tohi Tapu. ʻI he founga meimei tatau, ko e kakai ʻa e ʻOtuá he ʻaho ní ʻoku ʻikai te nau akoʻi ʻenau ngaahi fakakaukau pē ʻanautolú. ʻOku nau tui ko e Tohi Tapú ʻa e Folofola ʻa e ʻOtuá, pea ʻoku fakatuʻunga mālohi ʻenau ngaahi akonakí ʻi he meʻa ʻoku leaʻaki aí.

 8. Ko e hā ʻoku kau ʻi he lotu kia Sihová?

⁸ Ko e faʻahinga ʻoku nau tōʻongaʻaki ʻa e lotu moʻoní ʻoku nau lotu kia Sihova pē pea ʻai hono huafá ke ʻiloa. Naʻe fakahaaʻi ʻe Sīsū: “Ko e ʻEiki [Sihova] ko ho ʻOtua te ke lotu ki ai, pea ko ia pe toko taha te ke ʻotuaʻaki.” (Mātiu 4:10) Ko ia ai, ko e kau sevāniti ʻa e ʻOtuá ʻoku nau lotu ʻo ʻikai ki ha toe taha kehe ka ko Sihova pē. Ko e lotu ko ení ʻoku kau ki ai hono ʻai ke ʻiloʻi ʻe he kakaí ʻa e huafa ʻo e ʻOtua moʻoní mo ʻiloʻi pe ʻokú Ne fēfē. ʻOku fakahaaʻi ʻe he Sāme 83:18 (PM): “Ko koe, ko ho huafa oou ko Jihova, koe Fugani Maoluga i mamani kotoabe.” Naʻe fokotuʻu ʻe Sīsū ʻa e sīpinga ʻi hono tokoniʻi ʻa e niʻihi kehé ke nau hoko ʻo ʻiloʻi ʻa e ʻOtuá, ʻo hangē ko ia naʻá ne leaʻaki ʻi heʻene lotú: “Kuo u fakamahino ho huafa ki he kakai naʻa ke foaki kiate au mei mamani.” (Sione 17:6) ʻI he founga meimei tatau, ko e kau lotu moʻoni he ʻaho ní ʻoku nau akoʻi ʻa e niʻihi kehé fekauʻaki mo e huafa ʻo e ʻOtuá, ko ʻene ngaahi taumuʻá, mo hono ngaahi ʻulungāangá.

9, 10. ʻI he ngaahi founga fē ʻoku fakahaaʻi ai ʻe he kau Kalisitiane moʻoní ʻa e feʻofaʻakí?

⁹ Ko e kakai ʻa e ʻOtuá ʻoku nau fakahāhā ʻa e feʻofaʻaki moʻoni mo taʻesiokita. Naʻe pehē ʻe Sīsū: “Ko e meʻa kó é ʻe ʻilo ai ʻe he kakai kotoa pē ko e kau ako kimoutolu aʻaku, ʻo kapau ʻe ai haʻamou feʻofaʻaki.” (Sione 13:35) Ko e muʻaki kau Kalisitiané naʻa nau maʻu ʻa e feʻofaʻaki pehē. Ko e ʻofa fakaʻotuá ʻokú ne ikuʻi ʻa e ngaahi ʻā vahevahe fakamatakalí, fakasōsialé, mo e fakafonuá, pea tohoakiʻi fakataha ʻa e kakaí ʻi ha haʻi taʻemamotu ʻo e fetokouaʻaki moʻoni. (Kolose 3:14) Ko e kau mēmipa ʻo e ngaahi lotu loí ʻoku ʻikai te nau maʻu ha fetokouaʻaki ʻofa pehē. ʻOku anga-fēfē ʻetau ʻiloʻi iá? ʻOku nau fetāmateʻaki koeʻuhi ko e ngaahi faikehekehe fakafonuá pe fakafaʻahingá. Ko e kau Kalisitiane moʻoní ʻoku ʻikai te nau toʻo meʻatau ke tāmateʻi ʻaki honau fanga tokoua Kalisitiané pe ko ha taha kehe pē. ʻOku fakahaaʻi ʻe he Tohi Tapú: “Ko e meʻa ko ia ʻoku mahino ai ʻa e fanau ʻa e ʻOtua pea mo e fanau ʻa e Tevolo: ko ia ʻoku ʻikai ke fai maʻoniʻoni ʻoku ʻikai mei he ʻOtua ia, kaeʻumaʻā ʻa ia ʻoku ʻikai ke ʻofa ki hono tokoua. . . . Ke tau feʻofaʻaki. He ko e pehe koā ke tau hange ko Keini ʻa ia ko e tupu-mei-he-Fili, ʻo ne tamateʻi hono tokoua.”—1 Sione 3:​10-12; 4:​20, 21.

¹⁰ Ko e moʻoni, ko e ʻofa moʻoní ʻoku ʻuhinga ia ki he meʻa lahi ange ʻi he ʻikai pē ke tāmateʻi ʻa e niʻihi kehé. Ko e kau Kalisitiane moʻoní ʻoku nau ngāueʻaki taʻesiokita honau taimí, iví, mo e koloá, ke fetokoniʻaki mo fefakalototoʻaʻaki ai. (Hepelu 10:​24, 25) ʻOku nau fetokoniʻaki ʻi he ngaahi taimi ʻo e faingataʻá, pea ʻoku nau fakafeangai faitotonu ki he niʻihi kehé. Ko hono moʻoní, ʻoku nau ngāueʻaki ʻi heʻenau moʻuí ʻa e akonaki ʻa e Tohi Tapú ke “ngaue ʻaonga ki he kakai kotoa pe.”—Kaletia 6:10.

11. Ko e hā ʻoku mahuʻinga ai ke tali ʻa Sīsū Kalaisi ko e founga ia ʻa e ʻOtuá ki he fakamoʻuí?

¹¹ ʻOku tali ʻe he kau Kalisitiane moʻoní ʻa Sīsū Kalaisi ko e founga ia ʻa e ʻOtuá ki he fakamoʻuí. ʻOku pehē ʻe he Tohi Tapú: “ʻOku ʻikai ke tuʻu ʻi ha taha kehe ʻa e fakamoʻui; he talaʻehai ʻoku ʻi ai mo ha hingoa kehe ʻi he lalo langi kuo fokotuʻu ʻi he lotolotonga ʻo e kakai, ʻa ia kuo tuʻutuʻuni ke tau moʻui ai.” (Ngāue 4:12) Hangē ko ia naʻa tau ʻiloʻi ʻi he Vahe 5, naʻe foaki ʻe Sīsū ʻa ʻene moʻuí ko ha huhuʻi maʻá e faʻahinga talangofua ʻo e tangatá. (Mātiu 20:28) Tānaki atu ki ai, ko Sīsū ʻa e Tuʻi fakanofo ʻa e ʻOtuá ʻi he Puleʻanga fakahēvaní ʻa ia ʻe pule mai ki he māmaní fakakātoa. Pea ʻoku fiemaʻu ʻe he ʻOtuá ke tau talangofua kia Sīsū pea ngāueʻaki ʻa ʻene ngaahi akonakí kapau ʻoku tau fiemaʻu ʻa e moʻui taʻengatá. Ko e ʻuhinga ia ʻoku pehē ai ʻe he Tohi Tapú: “Ko ia ʻoku ne tui pikitai ki he ʻAlo ʻoku ne maʻu ʻa e moʻui taʻengata: ka ko ia ʻoku ʻikai te ne talangofua ki he ʻAlo ʻe ʻikai te ne mamata ia ki he moʻui.”—Sione 3:36.

12. Ko e hā ʻoku kau ki he ʻikai hoko ko e konga ʻo e māmaní?

¹² Ko e kau lotu moʻoní ʻoku ʻikai ko e konga kinautolu ʻo e māmaní. ʻI hono fakamāuʻi ʻi he ʻao ʻo e pule Loma ko Pailató, naʻe pehē ai ʻe Sīsū: “Ko hoku puleʻanga ʻoku ʻikai ʻo e maama ko eni.” (Sione 18:36) Tatau ai pē pe ko fē ʻa e fonua ʻoku nau nofo aí, ko e kau muimui moʻoni ʻo Sīsuú ʻa e faʻahinga ʻe pule mai ki ai ʻa hono Puleʻanga fakahēvaní pea ko ia ai, ʻoku nau tauhi maʻu ʻa e tuʻu-ʻatā mālohi ʻi he ngaahi meʻa fakapolitikale ʻa e māmaní. ʻOku ʻikai te nau kau ʻi heʻene ngaahi fepakí. Kae kehe, ko e kau lotu ʻa Sihová ʻoku ʻikai te nau kaunoa ʻi he meʻa ʻoku fili ʻe he niʻihi kehé ke fai fekauʻaki mo e kau ki ha faʻahi fakapolitikalé, kau ʻi ha kanititeiti fakapolitikale, pe kau ʻi ha fili. Pea lolotonga ko e kau lotu moʻoni ʻa e ʻOtuá ʻoku nau tuʻu-ʻatā ʻi he fekauʻaki mo e ngaahi meʻa fakapolitikí, ʻoku nau tauhi lao. Ko e hā hono ʻuhingá? Koeʻuhí ʻoku fekauʻi kinautolu ʻe he Folofola ʻa e ʻOtuá ke nau “anganofo” ki he “ngaahi pule ʻoku maʻolunga” fakapuleʻangá. (Loma 13:1) ʻI he taimi ʻoku hoko ai ha fepaki ʻi he vahaʻa ʻo e meʻa ʻoku fiemaʻu ʻe he ʻOtuá mo e meʻa ʻoku fiemaʻu ʻe ha fokotuʻutuʻu fakapolitikalé, ko e kau lotu moʻoní ʻoku nau muimui ʻi he faʻifaʻitakiʻanga ʻa e kau ʻapositoló, ʻa ia naʻa nau pehē: “ʻOku totonu pe ke fai ki he pule ʻa e ʻOtua ʻi he pule ʻa e tangata.”—Ngāue 5:29; Maake 12:17.

13. ʻOku anga-fēfē ʻa e vakai ʻa e kau muimui moʻoni ʻo Sīsuú ki he Puleʻanga ʻo e ʻOtuá, pea ko ia ai, ko e hā ʻa e ngāue ʻoku nau faí?

¹³ Ko e kau muimui moʻoni ʻo Sīsuú ʻoku nau malangaʻi ko e Puleʻanga ʻo e ʻOtuá ʻa e ʻamanakiʻanga pē ʻe taha ki he faʻahinga ʻo e tangatá. Naʻe tomuʻa tala ʻe Sīsū: “Koe ogoogolelei ni oe buleaga e malaga aki i mamani kotoabe, koe mea fakamooni ki he buleaga kotoabe, bea e toki hoko mai ae ikuaga.” (Mātiu 24:​14, PM) ʻI he ʻikai fakalototoʻaʻi ʻa e kakaí ke nau hanga ki he kau pule fakaetangatá ke nau solova ʻenau ngaahi palopalemá, ko e kau muimui moʻoni ʻo Sīsū Kalaisí ʻoku nau fanongonongo ko e Puleʻanga fakahēvani ʻo e ʻOtuá ʻa e ʻamanakiʻanga pē ʻe taha ki he faʻahinga ʻo e tangatá. (Sāme 146:3) Naʻe akoʻi ʻe Sīsū ke tau lotu ki he founga-pule haohaoa ko iá ʻi heʻene pehē: “Ke hoko mai ho Puleʻangá. Ke fai ho finangaló ʻi māmani, ʻo hangē ko ia ʻoku fai ʻi Hēvaní.” (Mātiu 6:​10, KF ) Naʻe tomuʻa tala ʻi he Folofola ʻa e ʻOtuá ʻo pehē ko e Puleʻanga fakahēvani ko ení “te ne laiki mo fakaʻauha ʻa e ngaahi puleʻanga ko ia [ʻoku lolotonga ʻi ai ní], kae tuʻu pe ia ʻo taʻengata.”—Taniela 2:44.

14. Ko e hā ʻa e kulupu fakalotu ʻokú ke tui ʻokú ne aʻusia ʻa e ngaahi fiemaʻu ki he lotu moʻoní?

¹⁴ Makatuʻunga ʻi he meʻa kuo tau toki ʻosi lāulea ki aí, ʻeke hifo kiate koe: ‘Ko e hā ʻa e kulupu fakalotu ʻoku fakatuʻunga ʻa e kotoa ʻo ʻene ngaahi akonakí ʻi he Tohi Tapú pea ʻai ke ʻiloa ʻa e huafa ʻo Sihová? Ko e hā ʻa e kulupu ʻokú ne tōʻongaʻaki ʻa e ʻofa fakaʻotuá, ngāueʻi ʻa e tui kia Sīsuú, ʻikai hoko ko e konga ʻo e māmaní, pea fanongonongo ʻo pehē ko e Puleʻanga ʻo e ʻOtuá ʻa e ʻamanakiʻanga moʻoni pē taha ki he faʻahinga ʻo e tangatá? ʻI he kotoa ʻo e ngaahi kulupu fakalotu ʻi he māmaní, ko fē ʻa e taha ʻokú ne aʻusia ʻa e ngaahi fiemaʻu kotoa ko ení?’ ʻOku fakahaaʻi mahino ʻe he ngaahi moʻoniʻi meʻá ko e Kau Fakamoʻoni ʻa Sihová.—Aisea 43:​10-12.

15. Ko e hā ʻoku fiemaʻu ʻe he ʻOtuá ʻo tānaki atu ki he tui pē ʻokú ne ʻi aí?

¹⁵ ʻOku ʻikai feʻunga ʻa e tui pē ki he ʻOtuá ke fakahōifuaʻi ai ia. He ko ē, ʻoku pehē ʻe he Tohi Tapú naʻa mo e kau tēmenioó ʻoku nau tui ʻoku ʻi ai ʻa e ʻOtua. (Semisi 2:19) Ko ia ai, ʻoku hā mahino, ʻoku ʻikai te nau fai ʻa e finangalo ʻo e ʻOtuá pea ʻoku ʻikai te nau maʻu ʻa ʻene hōifuá. Ke hoko ʻo fakahōifua ki he ʻOtuá, ʻoku ʻikai ngata pē ʻi he pau ke tau tui ki heʻene ʻi aí ka kuo pau ke tau toe fai foki ʻa hono finangaló. Kuo pau ke tau mavahe foki mei he lotu loí pea koloaʻaki ʻa e lotu moʻoní.

16. Ko e hā ʻoku totonu ke fai fekauʻaki mo e kau ʻi he lotu loí?

¹⁶ Naʻe fakahaaʻi ʻe he ʻapositolo ko Paulá kuo pau ke ʻoua te tau kau ki he lotu loí. Naʻá ne tohi: “Mou hiki mei honau lotolotonga, pea mavahe kimoutolu, pea ʻoua te mou ala ki he meʻa taʻemaʻa—ko e folofola é ʻa e ʻEiki⁠—Pea te u maʻu kimoutolu ʻe au.” (2 Kolinito 6:​17, 18a; Aisea 52:11) Ko ia ai, ko e kau Kalisitiane moʻoní ʻoku nau fakaʻehiʻehi mei ha meʻa pē ʻa ia ʻoku felāveʻi mo e lotu loí.

17, 18. Ko e hā ʻa “Babilone koe Lahi,” pea ko e hā ʻoku fiemaʻu fakavavevave ai ke “hiki meiate ia”?

¹⁷ ʻOku fakahaaʻi ʻe he Tohi Tapú ko e ngaahi founga kotoa pē ʻo e lotu loí ko e konga ia ʻo “Babilone koe Lahi.”a (Fakahā 17:​5, PM) Ko e hingoa ko iá ʻoku fakamanatu mai ai ʻa e kolo motuʻa ko Pāpiloné, ʻa ia naʻe kamata hake ai ʻa e lotu loí ʻi he hili ʻa e Lōmaki he ʻaho ʻo Noá. Ko e ngaahi akonaki mo e ngaahi tōʻongafai lahi ʻoku failahia he ʻahó ni ʻi he lotu loí naʻe tupu fuoloa ʻaupito ia ʻi Pāpilone. Ko e fakatātaá, naʻe lotu ʻa e kau Pāpiloné ki he ngaahi tolu-tahaʻi-ʻotua, pe ngaahi ʻotua-tautau-toko-tolu. ʻI he ʻahó ni, ko e tokāteline tefito ʻa e ngaahi lotu lahi ko e Tolu-Tahaʻi-ʻOtuá. Ka ko e Tohi Tapú ʻokú ne akoʻi māʻalaʻala ʻoku ʻi ai ʻa e ʻOtua moʻoni pē taha, ko Sihova, pea ko Sīsū Kalaisi ʻa hono ʻAló. (Sione 17:3) Naʻe toe tui foki ʻa e kau Pāpiloné ko e faʻahinga ʻo e tangatá ʻoku nau maʻu ha soulu taʻefaʻamate ʻa ia ʻoku hao moʻui atu mei he sinó hili ʻa e maté pea ʻe lava ke faingataʻaʻia ʻi ha feituʻu ʻo e fakamamahi. ʻI he ʻahó ni, ko e tui ki he soulu pe laumālie taʻefaʻamate ʻa ia ʻe lava ke faingataʻaʻia ʻi ha afi ko helí ʻoku akoʻi ia ʻe he lahi taha ʻo e ngaahi lotú.

¹⁸ Koeʻuhi ko e lotu faka-Pāpilone motuʻá ʻoku mafola ia ʻi he kotoa ʻo e māmaní, ko Pāpilone ko e Lahi ʻi onopōní ʻe lava moʻoni ke ʻiloʻi ko e ʻemipaea fakaemāmani ia ʻo e lotu loí. Pea kuo tomuʻa tala ʻe he ʻOtuá ʻo pehē ko e ʻemipaea ko eni ʻo e lotu loí ʻe hoko ia ʻo ngata fakafokifā. (Fakahā 18:8) ʻOkú ke sio ki he ʻuhinga ʻoku mātuʻaki mahuʻinga ai ke ke fakamavaheʻi ʻa koe tonu mei he konga kotoa pē ʻo Pāpilone ko e Lahí? ʻOku fiemaʻu ʻe Sihova ko e ʻOtuá ke ke “hiki [fakavavevave] meiate ia” lolotonga ʻoku kei ʻi ai ʻa e taimí.—Fakahā 18:4.

19. Ko e hā te ke maʻu ʻi he tauhi kia Sihová?

¹⁹ Ko e ola ʻo hoʻo fili ke liʻaki hono tōʻongaʻaki ʻa e lotu loí, ʻe fili nai ai ʻa e niʻihi ke tuku ʻenau feohi mo koé. Kae kehe, ʻi he tauhi kia Sihova fakataha mo ʻene kakaí, te ke maʻu ai ʻa e meʻa lahi mamaʻo ange ʻi he meʻa ʻe faifai pea lava ke ke fakamolekí. ʻI he hangē ko e muʻaki kau ākonga ʻa Sīsuú ʻa ia naʻa nau tukuange ʻa e ngaahi meʻa kehé kae muimui ʻiate iá, te ke hoko ai ʻo maʻu ʻa e fanga tokoua mo e fanga tuofāfine fakalaumālie tokolahi. Te ke hoko ai ko e konga ʻo ha fuʻu fāmili ʻi māmani lahi ʻo e laui miliona ʻo e kau Kalisitiane moʻoní, ʻa ia ʻoku nau fakahāhā kiate koe ʻa e ʻofa moʻoni. Pea te ke maʻu ai ʻa e ʻamanaki fakaofo ʻo e moʻui taʻengata “ʻi he maama ka haʻu.” (Maake 10:​28-30) Mahalo pē ʻi he faai atu ʻa e taimí, ko e faʻahinga naʻa nau liʻaki koe koeʻuhi ko hoʻo ngaahi tuí te nau vakai ki he meʻa ʻoku akoʻi ʻe he Tohi Tapú pea hoko ai ko e kau lotu kia Sihova.

20. Ko e hā ʻoku tuku tauhi mai ʻi he kahaʻú maʻá e faʻahinga ʻoku nau tōʻongaʻaki ʻa e lotu moʻoní?

²⁰ ʻOku akoʻi ʻe he Tohi Tapú kuo vavé ni ke ʻomai ʻe he ʻOtuá ha ngataʻanga ki he fokotuʻutuʻu fulikivanu ko eni ʻo e ngaahi meʻá pea fetongi ia ʻaki ha māmani foʻou māʻoniʻoni ʻi he malumalu ʻo e tuʻunga-pule ʻa hono Puleʻangá. (2 Pita 3:​9, 13) Ko ha māmani fakaofo ē ko ia ʻe hokó! Pea ʻi he fokotuʻutuʻu foʻou māʻoniʻoni ko iá, ʻe ʻi ai ʻa e lotu pē taha, ko e founga lotu moʻoni pē ʻe taha. ʻIkai ko e ʻalunga ia ʻo e potó ke ke fou ʻi he ngaahi sitepu ʻoku fiemaʻú ke hoko ai ʻo feohi mo e kau lotu moʻoní ʻi he taimí ni pē?