Tōʻongafai ki ha Tokotaha Kuo Tuʻusi

Ko e ngaahi meʻa siʻi pē ʻoku lava ke ne fakalotomamahiʻi kitautolu ʻo lahi ange ʻi he mamahi ʻoku tau tofanga ai ʻi he taimi ʻoku kapusi ai ha kāinga pe ko ha kaumeʻa ofi mei he fakatahaʻangá ʻi haʻane angahala taʻefakatomala. Ko e founga ʻo ʻetau tali ki he fakahinohino Fakatohitapu ki he meʻá ni ʻoku lava ke fakahaaʻi ai ʻa e lahi ʻo ʻetau ʻofa ki he ʻOtuá pea mo ʻetau mateaki ki heʻene fokotuʻutuʻú.a Fakakaukau angé ki he ngaahi fehuʻi ʻoku malanga hake ʻi he kaveinga ko ení.

ʻOku totonu ke fēfē ʻetau tōʻongafai ki ha tokotaha kuo tuʻusi? ʻOku pehē ʻe he Tohi Tapú: “Ka ai ha toko taha ʻi he kau lotu ʻoku feʻauaki, pe manumanu, pe lotu ki he aitoli, pe kapekape, pe faʻa konā, pe fai fakamalohi, ke ʻoua te mou feʻiloaki mo ha toko taha pehe, ʻio, pea ʻoua naʻa keinanga mo ia.” (1 Kolinito 5:11) ʻI he fekauʻaki mo e tokotaha kotoa ʻoku “ʻikai te ne nofo maʻu ʻi he tokateline ʻa Kalaisi,” ʻoku tau lau: “ʻOua te mou tali ia ki homou fale, pea ʻoua te mou pehe kiate ia, Siʻotoʻofa: he ko ia ʻoku ne pehe kiate ia Siʻotoʻofa ʻoku ne kau ʻi heʻene ngaahi ngaue kovi.” (2 Sione 9-11) ʻOku ʻikai ke tau feohi fakalaumālie pe fakasōsiale mo e faʻahinga kuo tuʻusí. Ko e Watchtower ʻo Sepitema 15, 1981, peesi 25, naʻe pehē ai: “Ko ha kiʻi ‘mālō e lelei’ ki ha taha ʻoku lava ke hoko ko e ʻuluaki sitepu ia ʻoku hoko atu ai ki ha fetalanoaʻaki pea naʻa mo ha kaumeʻa nai. Te tau loto ke fou ʻi he ʻuluaki sitepu ko iá ki ha tokotaha kuo tuʻusi?”

ʻOku fiemaʻu moʻoni ʻa e fakaʻehiʻehi mālohi? ʻIo, ʻi he ngaahi ʻuhinga lahi. ʻUluakí, ʻoku fakahāhā ai ʻa e mateaki ki he ʻOtuá mo ʻene Folofolá. ʻOku tau talangofua kia Sihova ʻo ʻikai ʻi he taimi faingamālié pē kae toe pehē foki ʻi he taimi ʻoku hoko moʻoni ai ʻa e ngaahi palopalema ʻi he fai peheé. Ko e ʻofa ki he ʻOtuá ʻoku ueʻi ai kitautolu ke tau talangofua ki he kotoa ʻo ʻene ngaahi fekaú, ʻo ʻiloʻi ʻokú ne faitotonu mo ʻofa pea ko ʻene ngaahi laó ʻoku pouaki ai ʻa e lelei tahá. (Aisea 48:17; 1 Sione 5:3) Ko hono uá, ko hono toʻo ʻo ha tokotaha faihala taʻefakatomalá ʻoku maluʻi ai kitautolu mo e toenga ʻo e fakatahaʻangá mei he ʻuli fakalaumālié mo fakaeʻulungāangá pea pouaki ai ʻa e ongoongo ʻo e fakatahaʻangá. (1 Kolinito 5:6, 7) Tolú, ko ʻetau tuʻu mālohi ki he ngaahi tefitoʻi moʻoni Fakatohitapú ʻe aʻu nai ʻo ʻaonga ki he tokotaha kuo tuʻusí. ʻI hono poupouʻi ʻa e fili ʻa e kōmiti fakamāú, te tau ʻai nai ai ke aʻu ki he loto ʻo ha tokotaha faihala ʻa ia kuo ʻikai ʻaupito te ne tali ʻa e ngaahi feinga ʻa e kau mātuʻá ke tokoniʻi iá. Ko e mole ʻa e feohi mahuʻinga mo e faʻahinga ʻofeiná ʻe tokoniʻi nai ai ia ke “foki mai hono loto,” ʻo sio ki he mafatukituki ʻa ʻene faihalá, pea fou ʻi ha ngaahi sitepu ke foki kia Sihova.—Luke 15:17.

Fēfē kapau ʻoku tuʻusi ha kāinga? ʻI ha tuʻunga pehē, ko e haʻi vāofi ʻi he vahaʻa ʻo e ngaahi mēmipa ʻo e fāmilí ʻe lava ke hoko ai ha ʻahiʻahiʻi moʻoni ʻo e mateakí. ʻOku totonu ke fēfē ʻetau tōʻongafai ki ha kāinga kuo tuʻusi? Heʻikai lava ke tau lāulea heni ki he tuʻunga kotoa pē nai ʻe malanga hake, ka tau tokangataha angé ki ha meʻa tefito ʻe ua.

ʻI he ngaahi tuʻunga ʻe niʻihi, ko e mēmipa ʻo e fāmilí kuo tuʻusí ʻoku nau kei nofo pē nai ʻi he ʻapi tatau ko e konga ʻo e fāmilí tonu. Koeʻuhi ko hono tuʻusí ʻoku ʻikai tuʻusi ʻosi ai ʻa e ngaahi haʻi fakafāmilí, ʻe hokohoko atu pē nai ʻa e ngaahi ngāue fakaʻaho anga-maheni ʻa e fāmilí. Neongo ia, ʻi hono ʻalungá, kuo fili ai ʻa e tokotahá ke veteki ʻa e haʻi fakalaumālie ʻiate ia mo hono fāmili ʻi he tuí. Ko ia ai ko e ngaahi mēmipa mateaki ʻo e fāmilí heʻikai lava ke nau kei feohi fakalaumālie mo ia. Ko e fakatātaá, kapau ʻoku ʻi ai ʻa e tokotaha kuo tuʻusí, heʻikai te ne kau ʻi he taimi ʻoku fakatahataha ai ʻa e fāmilí ke ako Tohi Tapú. Kae kehe, kapau ko e tokotaha tuʻusí ko ha kiʻi leka, ʻoku kei fakafatongiaʻaki pē ʻa e ongo mātuʻá ke na fakahinohinoʻi mo akonakiʻi ia. Ko ia ai, ko e ngaahi mātuʻa ʻofá te nau fokotuʻutuʻu nai ke fai ha ako Tohi Tapu mo e kiʻi leká.b—Palovepi 6:20-22; 29:17.

ʻI he ngaahi tuʻunga kehé, ko e kāinga kuo tuʻusí ʻoku nofo nai ia ʻi tuʻa mei he fāmilí tonu pea mo ʻapi. Neongo ʻe ʻi ai nai ha fiemaʻu ki ha fetuʻutaki fakangatangata ʻi ha kiʻi taimi ʻi hono tokangaʻi ha meʻa fakafāmili ʻoku fiemaʻu, ko ha fetuʻutaki pehē ʻoku totonu ke tauhi ia ke ʻi he tuʻunga siʻisiʻi tahá. Ko e ngaahi mēmipa mateaki ʻo e fāmili Kalisitiané ʻoku ʻikai ke nau kumi ki ha ngaahi kalofanga ke feohi ai mo ha kāinga kuo tuʻusi ʻoku ʻikai ke nofo ʻi ʻapi. ʻI hono kehé, ko e mateaki kia Sihova mo ʻene kautahá ʻoku ueʻi ai kinautolu ke nau pouaki ʻa e fokotuʻutuʻu Fakatohitapu fekauʻaki mo e tuʻusí. ʻI honau ʻalunga mateakí ko ʻenau tokanga ia ki he lelei taha maʻá e tokotaha faihalá pea ʻe tokoniʻi nai ai ia ke ne maʻu ʻaonga mei he kinisi kuó ne maʻú.c—Hepelu 12:11.

[Fakamatala ʻi lalo]

Pūlou—Taimi Fē pea ko e Hā Hono ʻUhingá?

Ko e taimi fē pea ko e hā ʻoku totonu ai ki ha fefine Kalisitiane ke ne tui ha pūlou ʻi he fekauʻaki mo ʻene lotú? Tau vakai angé ki he fakamatala fakamānavaʻi ʻa e ʻapositolo ko Paulá fekauʻaki mo e kaveinga ko ení. ʻOkú ne ʻomai ʻa e tataki ʻoku tau fiemaʻú koeʻuhi ke fai ai ha ngaahi fili lelei, ʻa e ngaahi fili ʻa ia ʻe fakalāngilangiʻi ai ʻa e ʻOtuá. (1 Kolinito 11:3-16) ʻOku fakahaaʻi mai ʻe Paula ʻa e meʻa tefito ʻe tolu ke fakakaukau ki ai: (1) ko e ngaahi ngāue ʻa ia ʻoku fiemaʻu ai ke tui ʻe ha fefine ha pūloú, (2) ko e ngaahi tuʻunga ʻa ia ʻoku totonu ai ke ne fai peheé, pea mo e (3) ko e ngaahi fakaueʻiloto ke ne ngāueʻaki ai ʻa e tuʻunga ko ení.

Ko e ngaahi ngāué. ʻOku lave ʻa Paula ki he ngāue ʻe ua: ko e lotu mo e palofisai. (Veesi 4, 5) Ko e moʻoni, ko e lotú ko ha lea ia ʻo fetuʻutaki kia Sihova. ʻI he ʻahó ni ko e palofisaí ʻe ngāueʻaki ia ki ha akonaki pē makatuʻunga ʻi he Tohi Tapú ʻoku faiakoʻaki ʻe ha faifekau Kalisitiane. Ko e fakahuʻunga mai koā ʻa Paulá ʻoku totonu ke pūlou ha fefine ʻi ha taimi pē ʻokú ne lotu ai pe faiakoʻaki ʻa e moʻoni Fakatohitapú? ʻIkai. Ko e tuʻunga ʻa ia ʻoku lotu ai pe faiako ha fefiné ʻoku kehekehe.

Ko e ngaahi tuʻungá. Ko e ngaahi lea ʻa Paulá ʻoku fakahuʻunga ai ʻa e ongo tuʻunga, pe tafaʻaki ʻe ua ʻo e ngāué—ko e fāmilí mo e fakatahaʻangá. ʻOkú ne pehē: “Ko e ʻulu ʻo e fefine ko e tangata . . . ʻilonga ha fefine ʻoku fai ha lotu, pe ha malanga palofisai, taʻe ʻufiʻufi hono ʻulu, ʻoku ne fakatokilaloʻi ai hono ʻulu.” (Veesi 3, 5) ʻI he