Ngaahi Fehuʻi mei he Kau Lautohí

ʻI he ʻuhinga fē naʻe maʻu pē ai ʻe he tokotaha fakatahatahaʻí “ha tangata ʻe toko taha ʻi he toko afe” kae ʻikai “ha fefine ʻi he fuʻu tokolahi pehe”?​—Koheleti 7:28.

Ke mahinoʻi totonu ʻa e ngaahi lea fakamānavaʻi ko ʻení, kuo pau ke tau ʻuluaki mahinoʻi ʻa e anga ʻo e vakai ʻa e ʻOtuá ki he kakai fefiné. ʻOku lave ʻa e Tohi Tapú ki he ʻofefine-ʻi-he-fono ʻo e uitou ko Nāomí, ʻa Lute “koe fefine agalelei.” (Lute 3:​11, PM) Fakatatau ki he Palovepi 31:​10, ko ha uaifi lelei “ko hono mahuʻinga ʻoku hulu ʻi he makakula koloa.” Ko e hā leva naʻe ʻuhinga ki ai ʻa Tuʻi Solomone ʻo ʻIsileli ʻo e kuonga muʻá heʻene pehē: “Kuo u maʻu . . . ʻa e tangata moʻoni ʻe taha ʻi ha toko afe, ka naʻe ʻikai ʻaupito ha fefine moʻoni”?—Moffatt.

ʻOku fakahaaʻi ʻe he potutohí kuo pau pē naʻe lotolotoi ha ngaahi tuʻunga fakaeʻulungāanga maʻulalo ʻi he lotolotonga ʻo e kau fefine ʻi he taimi ʻo Solomoné. (Koheleti 7:26) Naʻe hoko lahi nai ʻeni mei he tākiekina ʻa e kau fefine muli ko ia naʻa nau fai ʻa e lotu Pēalí. Naʻa mo Tuʻi Solomone naʻe tō ki he tākiekina mei hono ngaahi uaifi muli tokolahí. ʻOku pehē ʻe he Tohi Tapú: “Naʻa ne maʻu ha uaifi ʻe fitungeau naʻe ʻeiki, mo e sinifu ʻe toko tolungeau: pea naʻe fakaafe hono loto ʻe hono ngaahi uaifi” ke lotu ki he ngaahi ʻotua loí. (1 Tuʻi 11:​1-4) Naʻe toe maʻulalo mo e ngaahi tuʻunga fakaeʻulungāanga ʻo e kakai tangatá—he naʻe tātātaha ke ʻi ai ha tokotaha māʻoniʻoni ʻi ha toko taha afe, ʻo meimei ʻikai ala fakatokangaʻi. ʻOku fakaʻosiʻaki ʻe Solomone: “Ko eni pe meʻa kuo u maʻu; naʻe ngaohi ʻa e tangata ʻe Elohimi ko e tonusika; ka kuo feingaʻi ʻe he faʻahinga ko ia ha faliunga lahi.” (Koheleti 7:29) Ko ha fakamulituku ʻeni fekauʻaki mo e faʻahinga ʻo e tangatá—ko e tangatá ʻi he tuʻunga ko e faʻahinga ʻo e tangatá, ʻikai ko e tangatá ʻi hono fakahoa ki he fefiné. Ko ia ai, ko e ngaahi lea ʻoku hā ʻi he Koheleti 7:28 ʻoku totonu ke vakai ki ai ko ha fakamatala ia ki he tuʻunga fakaeʻulungāanga fakalūkufua ʻo e kakaí ʻi he taimi ʻo Solomoné.

Kae kehe, ʻoku malava ke toe ʻi ai ʻa e ʻuhinga ʻe taha ki he vēsí ni. ʻOku lava nai ke toe ʻuhinga fakaekikite, he kuo ʻikai ʻaupito ha fefine te ne fai ha talangofua haohaoa kia Sihova. Ka kuo ʻosi ʻi ai ha tangata pehē ia—ko Sīsū Kalaisi.—Loma 5:​15-17.

[Fakatātā ʻi he peesi 31]

“Tangata ʻe toko taha ʻi he toko afe”