Fakafiemālie ki he Fānau ʻOku Ngaohikovia Fakaefehokotaki Fakasino (Konga 4 ʻo e 4)

1-2. (a) Ko e hā ʻa e fakatātā ʻoku fakahaaʻi ai ʻoku maʻu ʻe he tangatá ha fiemaʻu fakanatula ke fakafiemālieʻi kinautolu mo ha malava ke fai pehē? (e) Kuo anga-fēfē hono uesia ʻa e fānau ʻe niʻihi?

ʻOKU maʻu ʻe he faʻahinga ʻo e tangatá ʻa e fiemaʻu fakanatula ke fakafiemālieʻi kinautolu mo e malava makehe ke fakafiemālieʻi ʻa e niʻihi kehé. Ko e fakatātaá, ʻi he tō ha kiʻi leka ʻo lavea hono tuí ʻi haʻane vaʻinga, te ne lele nai mo tangi ki heʻene mamí pe tetí. Heʻikai lava ʻe he mātuʻá ke ʻai ke sai leva ʻa e laveá, ka ʻe lava ke na fakafiemālieʻi ʻa e kiʻi tamá. Te na ʻeke ange nai pe ko e hā e meʻa naʻe hokó, holoholoʻi hono loʻimatá, fai ha ngaahi lea fakafiemālie mo anga-ʻofa, pea mahalo te na faitoʻo pe lalava ia. ʻIkai ke fuʻu fuoloa, ʻoku naʻa ʻa e kiʻi tamá pea toe hoko atu nai ʻene vaʻingá. ʻI he faai atu e taimí, ʻe sai hono laveá.

² Neongo ia, ʻi he taimi ʻe niʻihi, ko e fānaú ʻoku uesia kinautolu ʻi ha ngaahi founga kovi ʻaupito. Ko e niʻihi ʻoku ngaohikovia fakaefehokotaki fakasino kinautolu. Ko e ngaohikoviá ʻe lava ke fakahoko tuʻo taha ia, pe toutou fakahoko ia ʻi he ngaahi taʻu lahi. Pe ko e hā pē tuʻungá, ko e ngaohikoviá ʻe lava ke ne fakatupunga ʻa e maumau fakaeongo fakalilifu. ʻI he ngaahi tuʻunga ʻe niʻihi, ʻoku maʻu ʻa e tokotaha faihiá pea tauteaʻi. Ko e tuʻunga ʻe niʻihi, ko e tokotaha faihiá ʻoku hā ngali ʻoku ʻikai ke tauteaʻi ia. Ka neongo kapau ʻoku fakahoko vave ʻa e tauteá, ko e ola fakatupu maumau ʻo e ngaohikoviá ʻe lava ke ne uesia ʻa e kiʻi tamá ʻo aʻu ki heʻene fuʻu lahí.

 3. Hangē ko ia ʻoku lave ki ai ʻa e 2 Kolinitō 1:3, 4, ko e hā ʻa e finangalo ʻo Sihová, pea ko e hā ʻa e ngaahi fehuʻi te tau lāulea ki aí?

³ Kapau ʻoku kei fāinga ha Kalisitiane naʻe ngaohikovia ʻi heʻene kei siʻí mo e mamahi fakaeongó ʻi heʻene fuʻu lahí, ko e hā ʻa e tokoni ʻoku ala maʻú? (Lau ʻa e 2 Kolinitō 1:3, 4.) ʻOku hā mahino, ko e finangalo ia ʻo Sihová ke maʻu ʻe heʻene fanga sipí ʻa e ʻofa mo e fakafiemālie ʻoku nau fiemaʻú. Ko ia tau lāulea angé ki he fehuʻi ʻe tolu: (1) Ko e hā ʻoku fiemaʻu nai ai ʻe he faʻahinga naʻe ngaohikovia kinautolu ʻi heʻenau kei siʻí ha fakafiemālié? (2) Ko hai ʻe lava ke ne ʻoatu ʻa e fakafiemālie ʻoku fiemaʻú? (3) ʻE lava fēfē ke tau fakahoko ola lelei ʻa e fakafiemālié?

4-5. (a) Ko e hā ʻoku mahuʻinga ai ke ʻiloʻi ko e fānaú ʻoku nau kehe mei he kakai lalahí? (e) ʻE anga-fēfē nai hano uesia ʻe he ngaohikoviá ʻa e malava ʻa ha kiʻi tama ke falala ki he niʻihi kehé?

⁴ Ko e kakai lalahi ʻe niʻihi naʻe ngaohikovia kinautolu ʻi heʻenau kei siʻí, ʻe kei fiemaʻu pē nai kiate kinautolu ʻa e fakafiemālie neongo kuo ʻosi mei ai ʻa e ngaahi taʻu lahi. Ko e hā hono ʻuhingá? Ke hoko ʻo mahinoʻi iá, kuo pau ke tau ʻuluaki ʻiloʻi ko e fānaú ʻoku nau kehe ʻaupito mei he kakai lalahí. Ko ha kiʻi tama ʻoku faʻa uesia ia ʻi he ngaahi founga mātuʻaki kehe ia mei he ngaahi founga ʻe uesia nai ai ha tokotaha lahi ʻi hano ngaohikoviʻi. Fakakaukau ki he ngaahi fakatātā ʻe niʻihi.

⁵ ʻOku fiemaʻu ʻe he fānau ke nau fakatupulekina ha vahaʻangatae vāofi mo falalaʻanga mo e faʻahinga ʻoku nau ʻohake mo tokangaʻi kinautolú. Ko e ngaahi vahaʻangatae ko iá ʻoku ʻai ai ʻa e fānaú ke nau ongoʻi malu pea akoʻi ai kinautolu ke falala ki he niʻihi ʻoku ʻofa ʻiate kinautolú. (Saame 22:9) Ko e meʻa fakamamahí, ko e ngaohikoviá ʻoku faʻa hoko lahi tahá ʻi ʻapi pea ko e ngaahi mēmipa ofi ʻo e fāmilí mo e ngaahi kaumeʻa ʻo e fāmilí ʻoku nau faʻa fakahoko iá. Ko hono maumauʻi ʻa e falala ʻa ha kiʻi tama ʻi he founga ko ení ʻe lava ke ʻai ai ke faingataʻa ki he kiʻi tamá ke falala ki he niʻihi kehé, naʻa mo e hili ha laui taʻu ki mui ai.

 6. Ko e hā ʻoku fakamamahi mo fakatupu maumau ai ʻa e ngaohikovia fakaefehokotaki fakasinó?

⁶ Ko e fānaú ʻoku ʻikai lava ke nau maluʻi kinautolu, pea ko e ngaohikovia fakaefehokotaki fakasinó ʻoku fakamamahi mo fakatupu maumau. Ko hono fakamālohiʻi ʻo e fānaú ke fai ʻa e ngaahi tōʻonga fakaefehokotaki fakasinó ʻi he ngaahi taʻu lahi ki muʻa ke nau mateuteu fakaesino, fakaeongo pe fakaʻatamai ki he fehokotaki fakasino ʻi he nofo malí ʻe lava ke fakatupu maumau lahi. Ko e ngaohikoviá ʻe lava ke ne ʻai ha kiʻi tama ke ne maʻu ha vakai hala ki he fehokotaki fakasinó. ʻE lava ke ne ʻai ʻa e kiʻi tamá ke ne ongoʻi taʻetaau pea ʻikai falala ki he niʻihi kehé.

 7. (a) Ko e hā ʻoku faingofua nai ai ki ha tokotaha ke ne kākaaʻi pea ngaohikovia ha kiʻi tama, pea ʻoku anga-fēfē nai ʻene fai peheé? (e) Ko e hā nai ʻa e nunuʻa ʻo e ngaahi loi ko iá?

⁷ Ko e fānaú ʻoku ʻikai ke nau maʻu ʻa e malava kakato ke fakakaukau, fakaʻuhinga pe ke ʻiloʻi pea fakaʻehiʻehi mei he fakatuʻutāmakí. (1 Kol. 13:11) Ko ia ʻoku faingofua ʻaupito ki ha tokotaha ke ne kākaaʻi pea ngaohikovia ʻa e fānaú. Ko e faʻahinga ʻoku nau fai ʻa e ngaohikoviá ʻoku nau akoʻi ki he fānaú ʻa e ngaahi loi fakatuʻutāmaki, hangē ko e ngaohikoviá ko e foʻui pē ia ʻo e kiʻi tamá, ko e ngaohikoviá kuo pau ke tauhi ke fakapulipuli, heʻikai fanongo pe tokanga ha taha kapau ʻe līpooti ʻe he kiʻi tamá ʻa e ngaohikoviá, pe ko e ngaahi tōʻonga fakaefehokotaki fakasino ʻi he vahaʻa ʻo ha tokotaha lahi mo ha kiʻi tama ko e founga anga-maheni pē ia hono fakahāhā ʻa e feʻofaʻakí. Ko e ngaahi loi ko iá ʻe lava ke uesia ai ʻa e malava fakaefakakaukau ʻa e kiʻi tamá mo ʻene vakai ki he moʻoni ʻo e ngaahi meʻa ko iá ʻi ha laui taʻu. ʻE tupu hake nai ha kiʻi tama pehē ʻo fakakaukau kiate ia ʻoku ʻikai hano ʻaonga, ongoʻi taʻemaʻa mo ʻikai taau mo e ʻofá pe fakafiemālié.

 8. Ko e hā ʻe lava ke tau fakapapauʻi ai ʻe lava ke ʻomai ʻe Sihova ʻa e fakafiemālie ki he faʻahinga kuo ngaohikoviá?

⁸ ʻOku ʻikai leva ke fakaʻohovale ʻa e lava ke fakatupunga ʻe he ngaohikovia fakaefehokotaki fakasinó ha maumau tuʻuloa. He fulikivanu ē ko e hia ko ení! Ko e mafolalahia ko ia ʻa e ngaohikoviá ʻoku fakamoʻoniʻi maʻalaʻala ai ʻoku tau moʻui ʻi he ngaahi ʻaho fakaʻosí, ko ha taimi ʻa ia ko e tokolahi ʻoku ʻikai te nau “maʻu ʻa e ʻofa fakanatulá” pea “ko e kau tangata fulikivanú mo e kau kākaá te nau ʻalu mei he kovi ki he kovi ange.” (2 Tīm. 3:1-5, 13) Ko e ngaahi fāliunga ʻa Sētané ʻoku fulikivanu moʻoni, pea ʻoku fakamamahi ʻa e taimi ʻoku fai ai ʻe he faʻahinga ʻo e tangatá ʻa e ngaahi tōʻonga ʻoku leleiʻia ai ʻa e Tēvoló. Kae kehe, ʻoku mālohi mamaʻo ange ʻa Sihova ʻia Sētane pe ko ʻene kakaí. ʻOku ʻikai ʻaupito te ne taʻeʻilo ʻa e ngaahi fāliunga ʻa Sētané. ʻE lava ke tau fakapapauʻi ʻoku ʻiloʻi lelei ʻe Sihova ʻa e mamahi ʻoku tau hokosiá pea te ne ʻomai ʻa e fakafiemālie ʻoku tau fiemaʻú. ʻOku tau monūʻia ʻi he tauhi ki he “ʻOtua ʻo e fakafiemālie kotoa pē, ʻa ia ʻokú ne fakafiemālieʻi kitautolu ʻi he kotoa ʻo hotau ngaahi ʻahiʻahí koeʻuhi ke tau malava ai ke fakafiemālieʻi ʻa e niʻihi kehé ʻi ha faʻahinga ʻahiʻahi pē ʻaki ʻa e fakafiemālie ʻoku tau maʻu mei he ʻOtuá.” (2 Kol. 1:3, 4) Ko ia ai, ko hai ʻoku ngāueʻaki ʻe Sihova ke ne ʻoatu ʻa e fakafiemālié?

 9. Fakatatau ki he lea ʻa Tuʻi Tēvita ʻi he Saame 27:10, ko e hā ʻe fai ʻe Sihova ki he faʻahinga ʻoku liʻaki kinautolu ʻe honau fāmilí tonu?

⁹ Ko e faʻahinga kuo liʻaki ʻe he mātuʻá pe ngaohikovia ʻe he faʻahinga ofi kiate kinautolú ʻoku tautefito ʻenau fiemaʻu ʻa e fakafiemālié. Naʻe ʻiloʻi ʻe he tokotaha-tohi-saame ko Tēvitá ko Sihova ʻa e tokotaha falalaʻanga taha ke ne ʻomai ʻa e fakafiemālié. (Lau ʻa e Saame 27:10.) Naʻe tui ʻa Tēvita ko Sihova te ne tokangaʻi ʻa e faʻahinga kuo liʻaki ʻe honau ngaahi ʻofaʻangá. ʻOku anga-fēfē hono fai ia ʻe Sihová? ʻOkú ne ngāueʻaki ʻene kau sevāniti faitōnungá. Ko hotau kaungālotu kia Sihová ʻa hotau fāmili fakalaumālié. Ko e fakatātaá, naʻe lea ʻa Sīsū fekauʻaki mo e faʻahinga naʻe kau fakataha mo ia ʻi he lotu kia Sihová ko hono fanga tokoua, fanga tuofāfine mo e faʻē.​—Māt. 12:48-50.

10. Naʻe anga-fēfē hono fakamatalaʻi ʻe he ʻapositolo ko Paulá ʻene ngāue ko ha mātuʻá?

¹⁰ Fakakaukau ki he fakatātā ʻo e hoko ʻa e fakatahaʻanga Kalisitiané ʻo hangē ko ha fāmilí. Ko e ʻapositolo ko Paulá ko ha tokotaha mātuʻa ngāue mālohi mo faitōnunga. Naʻá ne fokotuʻu ha faʻifaʻitakiʻanga lelei, pea naʻe aʻu ʻo fakamānavaʻi ia ke ne tala ki he niʻihi kehé ke nau faʻifaʻitaki kiate ia ʻo hangē ko ʻene faʻifaʻitaki kia Kalaisí. (1 Kol. 11:1) Fakatokangaʻi ʻa e anga hono fakamatalaʻi ʻe Paula ʻene ngāue ko ha mātuʻá: “Naʻa mau anga-fakaalaala ʻi homou lotolotongá, ʻo hangē ko hono tokangaʻi manavaʻofa ʻe ha faʻē toutama ʻa ʻene fānaú tonu.” (1 Tes. 2:7) Ko e kau mātuʻa mateaki he ʻaho ní ʻe lava foki ke nau ngāueʻaki ʻa e ngaahi lea manavaʻofa mo anga-fakaalaala ʻi heʻenau ʻoatu ʻa e fakafiemālie Fakatohitapu ki he faʻahinga ʻoku nau fiemaʻu iá.

11. Ko e hā ʻoku fakahaaʻi heni ʻoku ʻikai ko e kau mātuʻá pē ʻe lava ke nau ʻoatu ʻa e fakafiemālié?

¹¹ Ko e kau mātuʻá pē ʻa e faʻahinga ʻe lava ke nau ʻoatu ʻa e fakafiemālie ki he faʻahinga ʻoku ngaohikoviá? ʻIkai. Ko kitautolu kotoa ʻoku tau maʻu ha fatongia ke “hanganaki fefakafiemālieʻaki.” (1 Tes. 4:18) Ko e fanga tuofāfine Kalisitiane matuʻotuʻá ʻe lava ke tautefito ʻenau fakalototoʻaʻi ʻa e fanga tuofāfine ʻoku nau fiemaʻu ʻa e fakafiemālié. ʻOku feʻungamālie hono fakahoa ʻe Sihova ko e ʻOtuá ʻa ia tonu ki ha faʻē ʻokú ne fakafiemālieʻi ʻa ʻene tamá. (ʻAi. 66:13) ʻI he Tohi Tapú ʻoku fakakau ai ʻa e fakatātā ʻo e kau fefine naʻa nau ʻoatu ʻa e fakafiemālie ki he faʻahinga mamahí. (Siope 42:11) He fiefia ē ko Sihova ʻi he vakai hifo ki he kau fefine Kalisitiane he ʻahó ni ʻoku nau ʻoatu ʻa e fakafiemālie ki he fanga tuofāfine ʻoku nau fāinga mo e mamahi fakaeongó! ʻI he ngaahi tuʻunga ʻe niʻihi, ʻe kole nai ʻe ha mātuʻa ʻe toko taha pe toko ua ʻi he founga fakapotopoto ki ha tuofefine matuʻotuʻa pe ʻe malava ke ne tokoni ki ha tuofefine ʻoku faingataʻaʻia ʻi he founga ko iá.b

12. Ko e hā ʻoku tau tokanga ke ʻoua te tau faí?

¹² Ko e moʻoni, ʻoku tau tokanga ke ʻoua te tau feinga ke fieʻilo ki he ngaahi meʻa ʻoku loto hotau kaungā-Kalisitiané ke tauhi ke fakapulipulí. (1 Tes. 4:11) Kae kehe, ko e hā ʻe lava ke tau fai maʻá e faʻahinga ʻoku nau fiemaʻu ʻa e tokoni mo e fakafiemālié? Tau lāulea angé ki he founga Fakatohitapu ʻe nima ʻa ia te tau ʻoatu nai ai ʻa e fakafiemālié.

13. Hangē ko ia ʻoku lave ki ai ʻa e 1 Tuʻi 19:5-8, ko e hā naʻe fai ʻe he ʻāngeló maʻa ʻIlaisiaá, pea ʻe anga-fēfē nai ʻetau faʻifaʻitaki ki he ʻāngeló?

¹³ ʻOatu ʻa e tokoni ʻaonga. ʻI he hola ʻa e palōfita ko ʻIlaisiaá telia ʻene moʻuí, naʻá ne loto-siʻi ʻaupito ʻo ne fakaʻamu ke ne mate. Naʻe fekauʻi atu ʻe Sihova ha ʻāngelo mālohi ke ʻaʻahi ki he tangata loto-siʻi ko iá. Naʻe ʻoange ʻe he ʻāngeló ha tokoni ʻaonga moʻoni. Naʻá ne ʻoange kia ʻIlaisiā ha meʻakai kei mafana pea tala ange anga-ʻofa ke ne kai. (Lau ʻa e 1 Tuʻi 19:5-8.) ʻOku fakatātaaʻi ʻi he fakamatala ko iá ha moʻoni ʻaonga: ʻI he taimi ʻe niʻihi ko ha foʻi ngāue anga-lelei ʻe taha ʻe lava ke ʻaonga lahi. Mahalo ko ha houa kai, ko ha kiʻi meʻaʻofa, pe ko ha kaati ʻosi fakakaukauʻi lelei ʻe fakapapauʻi ai ki ha tokoua pe tuofefine loto-mafasia ʻetau ʻofá mo e tokangá. Kapau ʻoku ʻikai ke tau ongoʻi fiemālie ke talanoa fekauʻaki mo e ngaahi meʻa fakafoʻituitui pe pelepelengesi, mahalo ʻe lava ke tau kei ʻoatu ʻa e tokoni ʻaonga.

14. Ko e hā ʻa e lēsoni ʻe lava ke tau ako mei he fakamatala fekauʻaki mo ʻIlaisiā?

¹⁴ ʻAi ʻa e faʻahinga mamahí ke nau ongoʻi malu mo fiemālie. ʻE lava ke tau ako ha toe lēsoni ʻe taha mei he fakamatala fekauʻaki mo ʻIlaisiaá. Naʻe ʻoange fakaemana ʻe Sihova ki he palōfitá ʻa e tokoni naʻá ne fiemaʻú ke ne fononga ai ki Moʻunga Hōlepi. Mahalo naʻe ongoʻi malu ʻa ʻIlaisiā ʻi he feituʻu mamaʻo ko ení, ʻa ia naʻe fai ai ʻe Sihova ʻene fuakava mo ʻene kakaí ʻi he laui senituli ki muʻá. Kuo pau pē ko ʻene toki ongoʻi malú nai eni ʻi heʻene mamaʻo ʻaupito mei he faʻahinga naʻa nau kumi ke tāmateʻi iá. Ko e hā ʻa e lēsoni ʻe lava ke tau ako mei aí? Kapau ʻoku tau loto ke ʻoatu ha fakafiemālie ki he faʻahinga ngaohikoviá, te tau ʻuluaki fiemaʻu nai ke tokoniʻi kinautolu ke nau ongoʻi malu. Ko e fakatātaá, ʻoku totonu ke manatuʻi ʻe he kau mātuʻá ko ha tuofefine ʻoku mamahi te ne ongoʻi malu mo fiemālie ange nai ʻi he talanoa ʻi ha ʻātakai nonga ʻi hono ʻapí ʻi ha talanoa ʻi he Fale Fakatahaʻangá. ʻE saiʻia nai ha taha ia ke talanoa ʻi he Fale Fakatahaʻangá.

15-16. Ko e hā ʻoku kau ki he hoko ko ha tokotaha fanongo leleí?

¹⁵ Hoko ko ha tokotaha fanongo lelei. ʻOku ʻomai ʻe he Tohi Tapú ʻa e faleʻi mahino ko ení: “Ko e tokotaha kotoa pē kuo pau ke ne vave ki he fanongo, fakatuotuai ki he lea.” (Sēm. 1:19) Ko ha kau fanongo lelei kitautolu? Mahalo te tau fakakaukau ko e hoko ko ha tokotaha fanongo leleí ko ʻetau sio pē ki he tokotaha ʻe tahá ʻo ʻikai toe lea. Ka ko e fanongo leleí ʻoku kau ki ai ʻa e meʻa lahi ange. Ko e fakatātaá, naʻe faifai pē pea huaʻi atu ʻe ʻIlaisiā ʻene ngaahi ongoʻi loto-mamahí kia Sihova, pea naʻe fanongo lelei ʻa Sihova kiate ia. Naʻe mahinoʻi ʻe Sihova naʻe ilifia ʻa ʻIlaisiā, ongoʻi tuēnoa mo fakakaukau ko e kotoa ʻene ngāué naʻe taʻeʻaonga. Naʻe tokanga anga-ʻofa ʻa Sihova ki he meʻa taki taha naʻá ne hohaʻa ki aí. Naʻá ne fakahaaʻi naʻá ne fanongo lelei kia ʻIlaisiā.​—1 Tuʻi 19:9-11, 15-18.

¹⁶ ʻE lava fēfē ke tau fakahāhā ʻa e kaungāongoʻi mo e manavaʻofa​—ʻa ia ko hono fakahāhā ia ʻa e ʻofá—​lolotonga ʻetau fanongó? ʻI he taimi ʻe niʻihi, ko ha ngaahi lea fakapotopoto mo loto-māfana ʻe fakahaaʻi nai ai ʻa e anga ʻo ʻetau ongoʻí. Te ke pehē nai: “ʻOku ou ongoʻi moʻoni ʻa e meʻa naʻe hoko kiate koé! ʻOku ʻikai totonu ke fai eni ki ha kiʻi tama!” Mahalo ʻe lava ke ke ʻeke ha fehuʻi ʻe taha pe ua ke fakapapauʻi ʻokú ke mahinoʻi ʻa e meʻa ʻoku leaʻaki ʻe ho kaumeʻa ʻoku loto-mamahí. Te ke ʻeke nai, “Kātaki muʻa ko e hā koā hoʻo ʻuhingá?” pe “ʻI he taimi naʻá ke pehē ai, . . . ʻOku tonu koā ʻeku maʻú?” Ko e ngaahi kupuʻi lea anga-ʻofa peheé ʻe fakapapauʻi nai ai ki he tokotahá ʻokú ke fanongo lelei pea feinga moʻoni ke mahinoʻi hono tuʻungá.​—1 Kol. 13:4, 7.

17. Ko e hā ʻoku totonu ai ke tau anga-kātaki mo “fakatuotuai ki he lea”?

¹⁷ Kae tokanga, ke hanganaki “fakatuotuai ki he lea.” ʻOua ʻe feinga ke ʻoatu ha faleʻi pe fakatonutonu ʻa e fakakaukau ʻa e tokotahá lolotonga ʻene leá. Pea anga-kātaki! ʻI hono huaʻi atu ʻe ʻIlaisiaá hono lotó kia Sihová, naʻá ne ʻoatu ʻa e ngaahi lea mālohi ʻo fakahaaʻi ʻaki ʻene loto-mamahí. Ki mui ai, hili hono fakaivimālohiʻi ʻe Sihova ʻa e tui ʻa ʻIlaisiaá, naʻe toe huaʻi atu ʻe he tangatá ʻene ngaahi ongoʻí ʻo ngāueʻaki ʻa e ngaahi lea tatau pē. (1 Tuʻi 19:9, 10, 13, 14) Ko e hā ʻa e lēsoní? ʻI he taimi ʻe niʻihi ʻoku fiemaʻu ʻe he faʻahinga loto-mamahí ke toutou huaʻi atu honau lotó. Hangē ko Sihová, ʻoku tau loto ke fanongo anga-kātaki. ʻI he ʻikai feinga ke ʻoatu ha fakaleleiʻangá, ʻoku tau fakahāhā ʻa e kaungāongoʻi mo e manavaʻofa.​—1 Pita 3:8.

18. ʻE lava fēfē ke hoko ʻetau ngaahi lotú ʻo fakafiemālie ki he faʻahinga ʻoku mamahí?

¹⁸ Lotu tōtōivi fakataha mo e tokotaha mamahí. Ko e faʻahinga ʻoku nau loto-mafasia lahí te nau ongoʻi nai ʻoku ʻikai malava ke nau lotu. ʻOku ongoʻi taʻefeʻunga nai ʻa e tokotahá ke fakaofiofi kia Sihova. Kapau ʻoku tau loto ke fakafiemālieʻi ha tokotaha pehē, te tau fai nai ha lotu mo e tokotahá ʻo lave ki hono hingoá. ʻE lava ke tau fakahaaʻi kia Sihova ʻa e lahi ʻo ʻetau ʻofeina mo e fakatahaʻangá ʻa e tokotaha loto-mafasiá. Te tau kole nai kia Sihova ke ne fakafiemālieʻi ʻene sipi mahuʻinga ko iá. Ko e ngaahi lotu peheé ʻe lava ke fakafiemālie.​—Sēm. 5:16.

19. Ko e hā ʻe tokoni nai kiate kitautolu ke mateuteu ke fakafiemālieʻi ha taha?

¹⁹ Fili ʻa e ngaahi lea ʻe hoko ko ha faitoʻo mo fakafiemālie. Fakakaukau ki muʻa ke ke lea. Ko e ngaahi lea taʻefakakaukauʻí ʻe lava ke fakamamahi. Ko e ngaahi lea anga-ʻofá ʻe lava ke hoko ko ha faitoʻo. (Pal. 12:18) Ko ia lotu kia Sihova ki ha tokoni ke ke maʻu ha ngaahi lea anga-ʻofa mo fakafiemālie. Manatuʻi ʻoku ʻikai ha lea ʻe toe mālohi ange ʻi he ngaahi foʻi folofola ʻa Sihova ʻoku ʻi he Tohi Tapú.​—Hep. 4:12.

20. ʻE anga-fēfē nai ʻa e fakakaukau ʻa e faʻahinga ngaohikoviá fekauʻaki mo kinautolú, pea ko e hā ʻoku fiemaʻu ke tau fakamanatu kiate kinautolú?

²⁰ Ko ha ngaohikovia ʻi he kuohilí te ne ʻai nai ʻa e niʻihi ke nau ongoʻi taʻemaʻa, ʻikai hanau ʻaonga pe ʻikai ʻofaʻi kinautolu​—ʻo aʻu ki heʻenau ongoʻi ʻoku ʻikai ke nau taau mo ha ʻofa. He loi fakalilifu ē ko ia! Ko ia ngāueʻaki ʻa e Folofolá ke fakamanatu kiate kinautolu ʻoku nau mahuʻinga moʻoni ʻi he vakai ʻa Sihová. (Sio ki he puha “Fakafiemālie mei he Folofolá.”) Manatuʻi ʻa e anga hono fakaivimālohiʻi anga-ʻofa ʻe ha ʻāngelo ʻa e palōfita ko Tanielá ʻi heʻene ongoʻi vaivai mo loto-mafasiá. Naʻe loto ʻa Sihova ke ʻiloʻi ʻe he tangata ʻofeina ko iá naʻá ne mahuʻinga ʻaupito. (Tan. 10:2, 11, 19) Pehē foki, ko hotau fanga tokoua mo e fanga tuofāfine loto-mamahí ʻoku nau mahuʻinga kia Sihova!

21. Ko e hā ʻa e kahaʻu ʻoku fakatatali mai ki he kau faihala taʻefakatomala kotoa pē, ka ko e hā ʻoku tau fakapapauʻi kotoa ke fai ʻi he lolotonga ní?

²¹ ʻI he taimi ʻoku tau fakafiemālieʻi ai ʻa e niʻihi kehé, ʻoku tau fakamanatu kiate kinautolu ʻa e ʻofa ʻa Sihová. Pea kuo pau ke ʻoua ʻaupito naʻa ngalo ko Sihova ko e ʻOtua foki ia ʻo e fakamaau totonú. ʻOku ʻikai ha tōʻonga fulikivanu ʻo e ngaohikoviá ʻe puli meiate ia. ʻOku ʻafioʻi ʻe Sihova ʻa e meʻa kotoa, pea heʻikai ke ne tuku taʻetauteaʻi ha tokotaha faihala taʻefakatomala. (Nōm. 14:18) Lolotonga iá, tau fai ʻa e meʻa kotoa te tau malavá ke fakahāhā ʻa e ʻofa ki he faʻahinga kuo ngaohikovia kinautolú. ʻIkai ko ia pē, he fakafiemālie ē ke ʻiloʻi ko Sihova te ne ʻomi ʻa e fakalelei tuʻuloa ki he faʻahinga kotoa kuo ngaohikovia ʻe Sētane mo hono māmaní! Ko e ngaahi meʻa fakamamahi ko ení ʻoku vavé ni ke ʻikai ʻaupito toe ʻalu hake ia ʻi he ʻatamaí pe ʻi he lotó.​—ʻAi. 65:17.