Ngaahi Hokosia mei he 2011 Yearbook

Naʻe Fakahoko ʻEne Ongo Fakaʻamú

Ko Nelena, ʻa ia ʻoku taʻu 19 pea ʻoku nofo ʻi Pulukālia, naʻe ʻi ai ʻene fakaʻamu ʻe ua—ke hoko ʻo papitaiso pea ke tāimuʻa tokoni. Kae kehe, ʻokú ne moʻua ʻi he mahaki tukufakaholo ʻo e halanga neavé, ʻa ia ʻi he taimí ni ʻoku ʻikai ala faitoʻo. ʻOkú ne mānava ʻaki ʻa e tokoni ʻa ha mīsini, pea ʻoku fakangatangata ʻe he meʻá ni ʻene malava ke ngaue takai holó. Ke fakahoko ʻene ʻuluaki fakaʻamú, ʻa e papitaisó, naʻe ʻi ai ha palopalema koeʻuhi ko hono tuʻungá naʻe ʻikai fakaʻatā ai ia ke mavahe mei hono ʻapaatimení ke kau ki ha ʻasemipilií. Ko ia ʻi heʻene taʻu 18, naʻe fai ha malanga Fakatohitapu ʻi hono ʻapí, pea hili iá naʻe papitaiso ia ʻi ha topu.

Fēfē ʻene fakaʻamu ke tāimuʻa tokoní? Lolotonga ʻa e faʻahitaʻu ʻa ia ʻoku lelei ai ʻa e ʻeá, ʻokú ne lava ʻi he taimi ʻe niʻihi ʻo mānava ʻi ha houa pe ofi ki ai ʻo taʻekau ʻa e tokoni ʻa e mīsiní. ʻOkú ne kau atu leva ko ha tāimuʻa tokoni, pea ʻoku teke holo ia mei he fale ki he fale ʻi ha saliote ʻe ha tokotaha malanga. ʻOku toe fakahoko ʻe Nelena ha ako Tohi Tapu fakafou ʻi he talanoa ʻi he ʻInitanetí. ʻI he taimi ʻe niʻihi, ko e fanga tuofāfine ʻi he fakatahaʻangá ʻoku nau fakahoko ʻenau ngaahi ako Tohi Tapú ʻi he ʻapi ʻo Nelena, ʻo fakaʻatā ai ia ke kau ai. Ko ia ai, naʻe malava ʻa Nelena ke tāimuʻa tokoni tuʻo tolu lolotonga ʻa e taʻu kuo ʻosí. ʻOkú ne pehē: “ʻOku ou fiefia he kuó u fakahoko ʻeku ongo fakaʻamú. ʻI he fai peheé kuo tohoaki ai au ke ofi ange kia Sihova, ʻa hoku Tokotaha Fakatupu ʻofá.”

ʻOkú Ne Tui ha Hēkesi he Taimí Ni

Ko ha tuofefine ʻi ʻAmīnia naʻe manukiʻi ia ʻi hono ngāueʻangá ko ʻene hoko ko e taha ʻo e Kau Fakamoʻoni ʻa Sihová. Kuo angaʻaki ʻe ha kaungāngāue hono lumaʻi iá, ʻo pehē “ko e kakai ʻoku nau tui hēkesí” kuo nau fakalotoʻi ʻa e tuofefiné ke ne tali ʻenau lotú. Hili ʻa e feinga ke fakaʻuhinga mo ia tuʻo lahi kae ʻikai pe ha ola, naʻá ne fakapapauʻi ke tukunoaʻi ʻene ngaahi laú, pea, ʻi he faʻifaʻitaki kia Sīsū Kalaisí, “naʻe ʻikai te ne tali ha meʻa.” (Mt. 27:12) Faifai atu pē, naʻe fakamālōlooʻi ʻa e tokotaha ngāué ko ʻene ʻulungaanga koví mo ʻene fakatupu maumau ki hotau tuofefiné. Hili ha ngaahi māhina, naʻe ʻalu atu ha tangata ki he ʻapi ngāué ʻo fakasio ia. Ko hono kaungāngāue ko ia ki muʻa kuó ne fakatupunga ia ke loto-mamahi lahí. Ko hono fōtungá naʻe fakaʻohovale kiate ia. Neongo kuó ne lumaʻi ʻa e Kau Fakamoʻoní ʻi heʻenau tui hēkesí, ko ia eni kuó ne tui ha hēkesi pea ʻokú ne toʻo ha kato tohi. Naʻá ne tala ange ki hotau tuofefiné: “ʻOku ou kole fakamolemole atu ki he ngaahi lea fakalotomamahi naʻá ku leaʻaki kiate koé. Ko eni kuó u ʻilo ʻa e moʻoní.” Kuo ako ʻe he tangatá ʻa e Tohi Tapú mo e Kau Fakamoʻoni ʻa Sihová, pea neongo ʻa e fakafepaki mei hono fāmilí, kuó ne papitaiso pea kuó ne kau atu ko ha tāimuʻa tuʻumaʻu.

“ʻOkú Ke ʻIlo ʻa Mrs. Nadia?”

Ko Nadia ko ha tāimuʻa ʻi ha fakatahaʻanga ʻi he fakatokelau ʻo ʻĪtalí. ʻI Sepitema kuo ʻosí naʻá ne lea ai fakafou he maika fetuʻutakí ki ha tangata ʻa ia naʻá ne taʻofi leva ia ke tala ange ko hono uaifí kuo toki mālōlō pea ʻoku ʻikai te ne loto ke talanoa mo ia. ʻI he Sāpate hokó, naʻe toe foki atu ʻa Nadia ke fakahaaʻi ʻene fie kaungāmamahí pea ke fakahanga ʻene tokangá ki he ʻamanaki ʻo e toetuʻú ʻoku ʻi he Tohi Tapú, ka naʻe tali tatau ai pē ʻa e tangatá. Ko e Ako Taua Leʻo naʻe fai ʻi he hoʻatā tatau ko iá naʻe kau ai ʻa e hokosia ʻa ha tuofefine naʻá ne fai ha tohi ki ha taha kuo mole atu hano ʻofaʻanga ʻi he maté. Naʻe ʻai ʻe he meʻá ni ʻa Nadia ke fakakaukau ki he tangata kuó ne talanoa mo ia fakafou ʻi he maika fetuʻutakí, ko ia naʻá ne fakapapauʻi ke fai ha tohi ʻo e fie kaungāmamahi pea fakakau ai mo e ngaahi fakaikiiki fekauʻaki mo e ʻamanaki ʻo e toetuʻú. Hili ha ʻaho ʻe ua, naʻá ne tuku ʻa e tohí ʻi he puha meili ʻa e tangatá.

Hili ha ngaahi ʻaho lahi, naʻe kau atu ai ʻa Nadia ʻi he ngāue halá peá ne taʻofi ha tangata ʻoku taʻu 70 tupu ke lau ha veesi Tohi Tapu ki ai. Naʻe ʻeke ange ʻe he tangatá pe ko e taha ia ʻo e Kau Fakamoʻoni ʻa Sihová, pea naʻe tali ange ʻe Nadia ʻio. Naʻe hoko atu ʻa e tangatá ke fakamatala naʻe ʻaʻahi ange kiate ia ha taha ʻo e Kau Fakamoʻoni ʻa Sihová, ʻa ia naʻá ne ʻoange kiate ia ha tohi fakaʻofoʻofa naʻá ne ueʻi moʻoni ia. Naʻá ne ʻeke leva, “ʻOkú ke ʻilo ʻa Mrs. Nadia?” ʻI he ʻohovale lahi ʻi heʻena tafaʻakí fakatouʻosi, naʻe fakafeʻiloaki atu ʻe Nadia ia pea fai mo e ngaahi fokotuʻutuʻu ke ʻaʻahi mo hono husepānití kiate ia. Naʻe ʻikai ngata pē ʻi he kamata ke ako ʻe he tangatá ʻa e Tohi Tapú ka ʻokú ne maʻu tuʻumaʻu he taimí ni ʻa e ngaahi fakatahá.

ʻOku ʻIkai Lava Ke Nau Ako mo Kinautolu Kotoa

ʻOku nofo ha Kau Fakamoʻoni ʻe toko fā ʻi he kolo ko Bujanovac ʻi he fakatonga ʻo Sēpiá. Ko e kau fanongonongo ko eni ʻo e puleʻangá naʻa nau fiefia lahi ʻi hono maʻu ʻe he toko 460 ʻa e Fakamanatú ʻi he 2010! Kuo fokotuʻutuʻu ʻe he kau mātuʻa ʻo ha fakatahaʻanga ofi mai ha ngaahi fakataha tuʻumaʻu ʻi Bujanovac ʻi ha fale kuo totongi. Ko e fakaʻavalisí, laka hake he toko 50 ʻoku maʻu fakatahá—ko e tokolahi tahá ko e kau tupuʻi Roma. Koeʻuhi ko e talilahia ʻo e pōpoaki ʻo e Puleʻangá, ko e kau tāimuʻa makehe kuo vaheʻi ki he feituʻu ngāue ko ení ʻoku ʻikai lava ke nau fakahoko ha ngaahi ako Tohi Tapu mo e kotoa ʻo e faʻahinga kuo nau fakahāhā ʻa e mahuʻingaʻiá. Ko ia ai, ʻoku nau ako mo e faʻahinga pē ʻoku nau haʻu ʻosi mateuteu lelei ki he kotoa ʻo e ngaahi fakatahá.

Ko ha Taʻu Teau pea lahi ange!

Ko Elin, ko e tokotaha malanga motuʻa taha ia ʻi Suēteni, ʻoku taʻu 110—ʻa e taʻu naʻe aʻu ki ai ʻa Siosiuá. (Sios. 24:29) ʻOkú ne nofo ʻi ha ʻapi maʻá e kau vaivaí pea ʻokú ne puke ʻa e faingamālie kotoa pē ke lea ai ki he kau ʻaʻahí mo e tokotaha kotoa ʻokú ne fetaulaki mo ia aí. ʻOkú ne tuku atu ʻa e ngaahi tohi lahi. ʻI he taimi naʻe malanga atu ai ʻi he kaungāʻapí ha mātuʻa mo hano ʻofefine, naʻá na fetaulaki ai mo ha finemui naʻá ne pehē kuo ʻosi malanga ange ki ai ʻa Elin pea kuó ne tuku ange ha tohi. Naʻe iku eni ki ha fetalanoaʻaki lelei.a

Naʻá Ne Maʻu ʻa e Ongo Tohí he Fale Lotú

Ko Tatyana, ʻa ia ʻokú nofo ʻi Pelālasi, naʻá ne ʻohovale ke maʻu ha telefoni ange ʻi he ʻaho ʻe taha mei ha finemui ʻa ia ʻoku ʻikai te ne ʻiloʻi. Naʻe fiemaʻu ʻe he fefiné ha ngaahi tali Fakatohitapu ki heʻene ngaahi fehuʻí. Naʻe hoko atu ai ha fetalanoaʻaki māfana. Naʻe anga-fēfē ʻene maʻu ʻa e fika telefoni ʻo Tatyana? Naʻe fakamatala ʻa e fefiné ʻo pehē lolotonga ʻene ʻaʻahi ki ha fale lotu, naʻá ne maʻu ai ha tohi Akoʻi mo ha New World Translation ʻi ha lalo sea pea ko e fika telefoni ʻo Tatyana naʻe hiki ʻi he ongo tohí. Naʻe anga-fēfē iku ʻa e ongo tohí ʻi he fale lotú? Naʻe ʻave ia ki ai ʻe he faʻē ʻa ha kiʻi taʻahine naʻe ako Tohi Tapu mo Tatyana. ʻOku hā mahino, ko e taumuʻa ʻa e faʻeé ke ne vakaiʻi mo e pātelé ke sio pe ʻoku totonu ki heʻene tamá ke lau kinaua pe ʻikai. ʻI ha faʻahinga ʻuhinga, naʻe tuku ʻa e ongo tohí he lalo seá. Naʻe sio ki ai ʻa e fefiné ʻo ne pehē ʻe ʻalu ia mo ia ki ʻapi. Ko e telefoní naʻe taki atu ia ki he ngaahi fetalanoaʻaki Fakatohitapu lahi ange.

Fakaava ʻa e Halá ʻe ha Kote Mole

Ko Elena, ko ha tuofefine tāimuʻa makehe, naʻá ne fakatokangaʻi ha kote fakaʻofoʻofa ʻoku lī ʻi ha hala ʻi Minsk, Pelālasi. Ko e koté naʻe maʻa pea ʻoku ʻikai ke hā ia hangē kuo liʻakí. ʻI hono toʻo haké, naʻá ne ʻilo ha $1,200 (ʻAmelika) ʻi he kató. ʻI heʻene fakasio ki he kakai naʻa nau fakalaka haké, naʻá ne ʻiloʻi vave atu ʻa e tangata kuo pau pē kuó ne fakamoleki ʻa e koté. Naʻá ne lele vavale holo hangē ʻokú ne kumi ha meʻá. Naʻe pau kia Elena ke lele ke maʻu ia. Ko ha tangata pisinisi ia mei Pengikolotesi, nofo ʻi Mosikou. Naʻá ne fiefia ke maʻu hono koté fakataha mo e paʻangá. Naʻá ne toe fieʻilo ki he ʻuhinga naʻe fakafoki ange ai ʻe he tuofefiné ʻa e koté, naʻa mo ʻene lele ʻo tulimui ki ai ke fai iá. Naʻá ne fakamatala ko e taha ia ʻo e Kau Fakamoʻoni ʻa Sihová. Naʻá ne pehē ʻi he ngaahi ʻaho siʻi ki muʻá, naʻá ne talanoa mo ha ongo Fakamoʻoni. ʻI he miniti nai ʻe 30, naʻá ne fakafekiki mo kinaua mo taukapoʻi ʻene ngaahi tui fakalotú. Naʻe ʻeke ange leva ʻe he tangatá kia Elena pe ʻe lava fēfē haʻane fakahāhā ange ʻene houngaʻia ʻi kote kuo fakafoki angé. Naʻá ne pehē ʻoku ʻikai te ne loto ke ʻai ʻa e meʻa naʻe hokó ke ne maʻu ai ha meʻa ka ko e founga lelei taha ke ne fakahāhaaʻi ai ʻene houngaʻiá ko e ako ʻa e Tohi Tapú mo e Kau Fakamoʻoni ʻa Sihová ʻi heʻene foki ki Mosikoú. Naʻá ne loto-lelei ke fai pehē.

Fekuki mo ha Faingataʻaʻia ʻo e Leá

Ko Hamish, ko ha tokoua taʻu 23 ʻoku nofo ʻi ʻAositelēlia, ʻokú ne moʻua ʻi ha mahaki faingataʻaʻia ʻo e leá ʻa ia ʻokú ne fakatupunga ʻene ngaahi leá ke taʻemaau mo taʻemahino pe ʻikai ongo mai. Kae kehe, ko e faingataʻaʻia ko ení, kuo ʻikai te ne fakahōloa ʻene faivelenga ʻi he malanga maʻá e kakaí pe ʻi he malaʻe fakafaifekaú. Ko e fakatātaá, ke fakahoko ha malanga ʻi he Fale Fakatahaʻangá, ʻoku ʻuluaki taipeʻi ʻe Ham­ish ʻene malangá ki ha mīsini fakaʻilekitulōnika toʻotoʻo ʻokú ne liliu ʻa e mataʻitohi kuo tohí ki he leʻo. ʻI he taimi ʻokú ne fakahoko ai ʻene malangá, ʻokú ne hili ʻa e mīsiní ʻi he tuʻuʻanga malangá pea lomi ʻa e kīpōtí ke filiʻi pea toe fakalea ʻa e ngaahi foʻi sētesí. Ko e lea fakaʻilekitulōnika ko ení ʻoku puke ia ʻe ha maika pea fakaleʻolahi fakafou ʻi he meʻa fakaleʻolahí. ʻI he taimi ʻoku fiemaʻu ai heʻene kongá ke kau mai ʻa e kau fanongó, ʻokú ne tali ʻa e ngaahi poupoú ʻaki ʻene taipeʻi ia ki he mīsiní. ʻI he malaʻe ngāué ʻokú ne fetuʻutaki ʻi he founga mātuʻaki hangē ko iá, ʻo ngāueʻaki e tuifio ʻo e ngaahi sētesi kuo teuteú, ngaahi konga Tohi Tapú, mo e taipe vavé! Ko hono olá, kuó ne maʻu ha ngaahi toe ʻaʻahi lelei tokolahi. Talu mei he 2007, ʻi hono fakanofo ʻa Hamish ko ha sevāniti fakafaifekaú, kuó ne ngāue ko ha tāimuʻa tokoni tā tuʻo lahi ʻi he taʻu taki taha.

[Fakamatala ʻi lalo]