Ko e Hā ʻa e Puleʻanga ʻo e ʻOtuá? Founga ke Fakahā Ai ʻOkú Ta Fiemaʻu Iá

ʻOKÚ KE ʻilo ʻa e lotu naʻe akoʻi ʻe Sīsū ki hono kau muimuí?— Kapau ʻoku ʻikai, ʻe lava ke ta lau fakataha ia mei he Tohitapú, ʻi he Mātiu 6:​9-13. Ko e lotú ni, ʻa ia ʻoku ui ʻe he tokolahi ko e Lotu ʻa e ʻEikí, ʻoku kau ai ʻa e leá ni: “Ke hoko hoʻo Pule.” ʻOkú ke ʻilo ko e hā ʻa e pule, pe Puleʻanga ʻo e ʻOtuá?—

Sai, ko ha puleʻanga ko ha faʻahinga founga-pule ia. ʻOku ʻi ai ʻa e faʻahinga founga-pule ʻi he ngaahi fonua ʻe niʻihi ʻa ia ʻoku ui ai ʻa e tokotaha ʻoku takimuʻá ko e palesiteni, ka ko e founga-pule naʻe palōmesi ʻe he ʻOtuá ʻoku ui ko e Puleʻanga pea ko hono pulé ʻoku ui ko e Tuʻi.

ʻOkú ke ʻilo ʻa e tokotaha naʻe fili ʻe Sihova ko e ʻOtuá ke hoko ko e Tuʻi ʻo Hono puleʻangá?— Ko hono ʻAló, ʻa Sīsū Kalaisi. Ko e hā ʻoku lelei ange ai ia ʻi ha faʻahinga tokotaha pule pē ʻe fili nai ʻe he tangatá?— Koeʻuhí he ʻoku ʻofa moʻoni ʻa Sīsū ʻi heʻene Tamai, ko Sihová. Ko ia, ʻokú ne fai maʻu pē ʻa e meʻa ʻoku tonú.

Ki muʻa fuoloa pea fāʻeleʻi ʻa Sīsū ʻi Pētelihemá, naʻe fakamatala ʻa e Tohitapú ʻo kau ki hono fāʻeleʻí pea pehē ai te ne hoko ko e Pule ʻa e ʻOtuá kuó Ne fili. Ta lau angé ʻo fekauʻaki mo e meʻá ni, ʻi he Aisea 9:​6, 7 (Ai 9:​5, 6, PM). ʻOku pehē ai: “He kuo ʻaloʻi mai ha Tama, kuo tuku mai ha Foha: pea ʻe ʻi hono uma ʻa e puleʻanga. Pea ko e huafa ʻe uiʻaki . . . ko e ʻEiki ʻo e Melino. ʻE ʻikai fakangatangata ʻa e tupu o ʻene pule mo e melino.”​—⁠Fakaʻītali ʻamautolu.

ʻOkú ke ʻilo ʻa e ʻuhinga ʻoku ui ai heni ʻa e Pule ʻo e Puleʻanga ʻo e ʻOtuá “ko e ʻEiki”?— Sai, ko e ʻeiki ko ení ko e foha ia ʻo ha tuʻi. Pea ko Sīsū ko e Foha ia ʻo e Tuʻi Lahi, ko Sihová. Ka kuo toe ʻai foki ʻe Sihova ʻa Sīsū ke hoko ko e Tuʻi ʻo Hono puleʻangá, ʻa ia te ne puleʻi ʻa e māmaní ʻi he taʻu ʻe taha afe. (Fakahā 20:⁠6) ʻI he hili ʻa e papitaiso ʻa Sīsuú, naʻá ne kamata “malanga, ʻo pehe, Mou fakatomala, he kuo ofi ʻa e Puleʻanga ʻo Hevani.”—Mātiu 4:⁠17.

Ko e hā ʻokú ke fakakaukau ai naʻe pehē ʻe Sīsū kuo ofi ʻa e Puleʻangá?— Koeʻuhí ko e Tuʻí, ʻa ia te ne pule ʻamui ʻi hēvaní, naʻe ʻi ai tonu mo kinautolu! Ko e ʻuhinga ia naʻe tala ange ai ʻe Sīsū ki he kakaí: “Ko e Puleʻanga ʻo e ʻOtua ʻoku ʻi homou lotolotonga ni.” (Luke 17:21) ʻIkai te ke saiʻia ke ofi ʻaupito atu ʻa e Tuʻi ʻa Sihová kia koe ʻo aʻu nai ki haʻo lava ʻo ala kiate ia?—

Ko ia, tala mai angé, ko e hā ʻa e ngāue mahuʻinga naʻe haʻu ʻa Sīsū ki he māmaní ke faí?— Naʻe tali ʻe Sīsū ʻa e fehuʻi ko iá, ʻi heʻene pehē: “Kuo pau ke u ʻave ʻa e ongoongolelei ki he ngaahi kolo kehe foki, ʻo tala ʻa e Puleʻanga ʻo e ʻOtua; he naʻe fekau mai au ki he meʻa ko ia.” (Fakaʻītali ʻamautolu; Luke 4:43) Naʻe ʻiloʻi ʻe Sīsū ʻe ʻikai lava ke ne fai tokotaha pē ʻa e malangá kotoa. Ko ia, ko e hā ʻokú ke fakakaukau naʻá ne faí?—

Naʻe ʻave ʻe Sīsū ʻa e kakaí ʻo ne fakahā ange kia kinautolu ʻa e founga ke fai ai ʻa e ngāue fakamalangá. Ko e ʻuluaki faʻahinga naʻá ne akoʻí ko e toko 12 naʻá ne fili ko e kau ʻapositoló. (Mātiu 10:​5, 7) Ka ko ʻene kau ʻapositoló pē naʻe akoʻi ʻe Sīsū ke nau fai ʻa e ngāué ni? ʻIkai, ʻoku pehē ʻe he Tohitapú naʻe toe akoʻi ʻe Sīsū mo e tokolahi kehe ke nau malanga. Faifai atu pē, naʻá ne fekau atu ʻa e kau ākonga kehe ʻe toko 70 ʻo tautau toko ua ke nau muʻomuʻa ʻiate ia. Pea ko e hā naʻa nau akoʻi ki he kakaí?— Naʻe pehē ʻe Sīsū: “Mou pehē kiate kinautolu, Kuo ofi mai kiate kimoutolu ʻa e Puleʻanga ʻo e ʻOtua.” (Luke 10:⁠9) ʻI he foungá ni naʻe ako ai ʻa e kakaí ʻo fekauʻaki mo e puleʻanga ʻo e ʻOtuá.

Ki muʻa fuoloa ʻi ʻIsileli, ko e ngaahi tuʻi foʻoú naʻa nau faʻa heka ki he koló ʻi ha ʻuhikiʻi ʻasi ke fakahā kinautolu ki he kakaí. Sai, ko e meʻa eni naʻe fai ʻe Sīsū ʻi heʻene ʻaʻahi fakaʻosi ki Selusalemá. ʻOkú ke ʻilo foki, ʻe hoko ʻa Sīsū ko e Pule ʻo e Puleʻanga ʻo e ʻOtuá. ʻOku loto ʻa e kakaí ke ne hoko ko e Tuʻi?—

Sai, ʻi heʻene heka atú, ʻoku kamata ke folahi ʻe he tokolahi taha ʻo e fuʻu kakaí honau ngaahi pulupulú ʻi he halá ʻi muʻa ʻiate ia. ʻOku fesi hifo ʻe he niʻihi ʻa e ʻakaú pea faliki ia ʻi he halá. ʻI hono fai ʻa e meʻa ko ení ʻoku nau fakahā ai ʻoku nau loto ke hoko ʻa Sīsū ko honau Tuʻi. ʻOku nau kaila: ‘Monuʻia ʻa e Tuʻi ʻoku haʻele mai ʻi he huafa ʻo Sihová.’ Ka ʻoku ʻikai ke fiefia ʻa e tokotaha kotoa pē. Ko hono moʻoní, naʻe aʻu ʻo pehē ʻe he kau taki lotu ʻe niʻihi kia Sīsū, ‘Tala ki hoʻo kau ākongá ke nau fakalongolongo.’—Luke 19:​28-40, PM.

ʻI he hili ʻa e ʻaho ʻe nima mei ai ʻoku puke ai ʻa Sīsū ʻo ʻave ki ha palasi ke hā ki he kōvaná, ko Ponitō Pailato. ʻOku pehē ʻe he ngaahi fili ʻo Sīsuú ʻoku taukaveʻi ʻe Sīsū ko ha tuʻi ia pea ʻokú ne fakafepaki ki he puleʻanga Lomá. Ko ia, ʻoku ʻeke ʻe Pailato ʻa e meʻá ni kia Sīsū. ʻOku fakahā ʻe Sīsū ʻoku ʻikai te ne feinga ke faʻao ʻa e puleʻangá. ʻOkú ne tala ange kia Pailato: “Ko hoku puleʻanga ʻoku ʻikai ʻo e maama ko eni.”—Sione 18:⁠36.

ʻOku ʻalu atu leva ʻa Pailato ki tuʻa ʻo ne tala ki he kakaí ʻoku ʻikai te ne ʻilo ha kovi ʻa Sīsū. Ka ʻoku ʻikai ke fiemaʻu ʻe he kakaí he taimí ni ke hoko ʻa Sīsū ko honau Tuʻi. ʻOku ʻikai te nau loto ke tukuange ia. (Sione 18:​37-40) ʻI he hili ha toe talanoa mo Sīsū, ʻoku fakapapauʻi ʻe Pailato kuo ʻikai te ne fai ha meʻa ʻoku hala. Ko ia, ʻi hono fakaʻosí, hili ia hono ʻomai fakaʻosi ʻa Sīsū ki tuʻá, ʻoku pehē ʻe Pailato: “Vakai ko ho mou Tuʻi!” Ka ʻoku kaila ʻa e kakaí: ‘ʻAve ia, ʻave ia, tutuki ia ki he ʻakaú.’

ʻOku fehuʻi ʻe Pailato: ‘Teu tutuki ho mou Tuʻí ki he ʻakaú?’ ʻOku tali atu ʻa e kau taulaʻeiki lahí: ‘ʻOku ʻikai ha mau tuʻi ka ko Sisa pe.’ Fakakaukau atu ā ki ai. Naʻe malava ke fakatafokiʻi ʻe he kau taulaʻeiki kovi ko iá ʻa e kakaí meia Sīsū!—Sione 19:​1-16, PM.

ʻOku tatau pē ʻa e ʻahó ni mo e taimi ko iá. Ko e tokolahi taha ʻo e kakaí ʻoku ʻikai moʻoni te nau loto ke hoko ʻa Sīsū ko honau Tuʻi. Te nau pehē nai ʻoku nau tui ki he ʻOtuá, ka ʻoku ʻikai te nau loto ke tala ange ʻe he ʻOtuá pe ko Kalaisi kia kinautolu ʻa e meʻa ke nau faí. ʻOku nau fiemaʻu honau ngaahi puleʻanga pē ʻo kinautolu ʻi heni tonu ʻi he māmaní.

Fēfē kitaua? ʻI heʻeta ako ʻo fekauʻaki mo e Puleʻanga ʻo e ʻOtuá mo e ngaahi meʻa fakaofo kotoa te ne fai maí, ʻoku fēfē ai ʻeta ongoʻi ʻo kau ki he ʻOtuá?— ʻOkú ta ʻofa kiate ia, ʻikai ʻoku pehē?— ʻE lava fēfē leva ke ta fakahā ki he ʻOtuá ʻokú ta ʻofa ʻiate ia pea ʻokú ta fiemaʻu ke puleʻi kitaua ʻe hono Puleʻangá?—

ʻE lava ke ta fakahā ki he ʻOtuá ʻa e anga ʻo ʻeta ongoʻí ʻaki ʻa e muimui ʻi he faʻifaʻitakiʻanga ʻa Sīsuú. Pea ko e hā ʻa e meʻa naʻe fai ʻe Sīsū ke fakahā ai naʻá ne ʻofa ʻia Sihová?— ‘ʻOku ou fai maʻu ai pe ʻa e ngaahi meʻa ʻoku leleiʻia ai iá,’ ko e fakamatala ia ʻa Sīsuú. (Sione 8:​29, PM) ʻIo, naʻe haʻu ʻa Sīsū ki he māmaní ‘ke fai ʻa e finangalo ʻo e ʻOtuá’ pea ke ‘fakaʻosi ʻene ngaué.’ (Hepelu 10:​7, PM; Sione 4:​34, PM) Fakakaukau ki he meʻa naʻe fai ʻe Sīsū ki muʻa peá ne kamata ʻene ngāue fakamalangá.

Naʻe ʻalu ʻa Sīsū kia Sione Papitaiso ki he Vaitafe Sioataní. Hili ʻena aʻa atu ki he loto vaí, ʻoku fakauku kakato ʻe Sione ʻa Sīsū ʻi he loto vaí pea toe fokotuʻu hake ia. ʻOkú ke ʻilo ʻa e ʻuhinga naʻe papitaiso ai ʻe Sione ʻa Sīsuú?—

Naʻe kole ange ʻe Sīsū kia Sione ke ne fai ia. Ka ʻoku anga-fēfē ʻeta ʻilo naʻe fiemaʻu ʻe he ʻOtuá ke papitaiso ʻa Sīsuú?— ʻOkú ta ʻilo ia koeʻuhí ʻi he taimi naʻe ʻalu hake ai ʻa Sīsū mei he vaí, naʻá ne fanongo ki he leʻo ʻo e ʻOtuá mei hēvani ʻokú ne pehē: “Ko hoku ʻAlo Pele koe; ko koe kuo u hōifua ai.” Naʻe aʻu ʻo fekau hifo ʻe he ʻOtuá ʻa hono laumālie māʻoniʻoní kia Sīsū ʻi ha lupe. Ko ia ʻi heʻene papitaisó, naʻe fakahā ai ʻe Sīsū ʻokú ne loto ke tauhi ʻa Sihova ʻi he kotoa ʻo ʻene moʻuí, ʻio, ʻo taʻengata.—Maake 1:​9-11.

ʻOkú ke kei tupu hake he taimí ni. Ka ko e hā ʻa e meʻa te ke fai ʻamuí?— Te ke hangē ko Sīsuú ʻo papitaiso?— ʻOku totonu ke ke faʻifaʻitaki kiate ia, he ʻoku pehē ʻe he Tohitapú naʻá ne tuku kiate koe ‘ha faʻifaʻitakiʻanga ke ke muimui ofi, ʻo topuvaʻe taha mo ia.’ (1 Pita 2:21) ʻI he taimi te ke papitaiso aí, te ke fakahā ai ʻokú ke fiemaʻu moʻoni ke puleʻi koe ʻe he Puleʻanga ʻo e ʻOtuá. Ka ʻoku ʻikai ke feʻunga pē ʻa e papitaisó.

ʻOku fiemaʻu ke ta talangofua ki he ngaahi meʻa kotoa pē naʻe akoʻi ʻe Sīsuú. Naʻe pehē ʻe Sīsū ʻoku ʻikai totonu ke ta “ʻo māmāni.” Te ta talangofua kiate ia kapau te ta hoko ʻo kau ʻi he ngaahi meʻa ʻo e māmaní? Ko Sīsū mo ʻene kau ʻapositoló naʻa nau fakamamaʻo mei he ngaahi meʻa peheé. (Sione 17:14) Ka ko e hā ʻa e meʻa ia naʻa nau faí?— Naʻa nau talanoa ki he kakai kehé ʻo fekauʻaki mo e Puleʻanga ʻo e ʻOtuá. Ko e ngāue ia naʻe mahuʻinga ʻi heʻenau moʻuí. ʻE lava ke ta fai ia?— ʻIo, pea te ta fai ia kapau ʻoku ʻuhinga kia kitaua ʻa e meʻa ʻokú ta leaʻaki ʻi heʻeta lotu ke hoko mai ʻa e Puleʻanga ʻo e ʻOtuá.