Fehuʻi mei he Kau Lautohí

ʻI he 2 Kolinitō 12:2, 3, naʻe lave ai ʻa Paula ki ha tangata naʻe ‘hamusi hake ki he langi hono tolú.’ Ko hai ʻa e tangata ko iá? ʻI he tohi ki he fakatahaʻanga ʻi Kolinitoó, naʻe fakamamafaʻi ʻe Paula naʻe ngāueʻaki ia ʻe he ʻOtuá ko ha ʻapositolo. (2 Kol. 11:5, 23) Naʻá ne lave leva ki he “ngaahi vīsone fakaofo mo e ngaahi meʻa fakahā ʻa e ʻEikí.” Naʻe ʻikai lave ʻa Paula ʻi he potutohi ko iá ki ha tokoua kehe. Ko ia, ʻoku hā mahino naʻá ne lave kiate ia tonu ko e tangata naʻá ne maʻu ʻa e ngaahi vīsoné mo e ngaahi meʻa fakahaá.​—2 Kol. 12:1, 5.

Ko ia ko Paula ʻa e tokotaha naʻe ‘hamusi hake ki he langi hono tolú’ pea “hamusi ʻo ʻave ki palataisi.” (2 Kol. 12:2-4) Naʻá ne ngāueʻaki ʻa e kupuʻi lea ko e “ngaahi meʻa fakahā,” ʻa ia ʻoku fakahuʻunga ai ko hono fakaeʻa ʻo e meʻa ʻe hoko ʻi he kahaʻú.

Ko e hā ʻa e meʻa naʻe sio ki ai ʻa Paula ko e “langi hono tolú”?

ʻI he Tohi Tapú, ʻoku lava ke ʻuhinga ʻa e “langí” ki he langi fakamatelié. (Sēn. 11:4; 27:28; Māt. 6:26) Ka ʻoku lava ke toe ngāueʻaki ʻa e “langí” ki he ngaahi tuʻunga kehe. ʻI he taimi ʻe niʻihi ʻoku ʻuhinga ia ki he tuʻunga-pule fakaetangata. (Tan. 4:20-22) Pe ʻe lava ke ʻuhinga ki he tuʻunga-pule fakaʻotua, hangē ko e Puleʻanga ʻo e ʻOtuá.​—Fkh. 21:1.

Naʻe sio ʻa Paula ki he “langi hono tolú.” Naʻá ne ʻuhinga ki he hā? ʻOku faʻa toutou lave tuʻo tolu ʻa e Tohi Tapú ki ha meʻa ke fakafofongaʻi ʻa e fakamamafaʻi, lahi, pe mālohi ʻoku toe tānaki atu ki ai. (ʻAi. 6:3; ʻIsi. 21:27; Fkh. 4:8) ʻOku ngalingali ʻi he lave ki he “langi hono tolú,” naʻe fakamamafaʻi ʻe Paula ʻa e founga-pule lelei taha mo māʻolunga tahá​—ʻa e Puleʻanga Faka-Mīsaia fakafou ʻia Sīsū Kalaisi mo hono kaungāpule ʻe toko 144,000. (Sio ki he Insight on the Scriptures, Vol. 1, p. 1059, 1062.) Hangē ko ia naʻe tohi ʻe he ʻapositolo ko Pitá, ʻoku tau tatali ki ha “ngaahi langi foʻou” ʻo fakatatau ki he talaʻofa ʻa e ʻOtuá.​—2 Pita 3:13.

Kae fēfē ʻa e lave ʻa Paula ki he “palataisi”?

Ko e foʻi lea “palataisi” ʻoku lava ke toe ʻuhinga ki he ngaahi meʻa kehekehe: (1) ʻI he vakai ki he muʻaki ʻapi ʻo e tangatá, ko e “palataisi” ʻoku lava ke ʻuhinga moʻoni ia ki he māmani Palataisi ʻoku hanga mei muʻá. (2) ʻOku lava ke ʻuhinga ki he tuʻunga fakalaumālie ʻe fiefia ai ʻa e kakai ʻa e ʻOtuá ʻi he māmani foʻoú. (3) Tānaki atu ki ai, ʻoku lava ke ʻuhinga ia ki he ngaahi tuʻunga fakaofo ʻi hēvani, ko e “palataisi ʻa e ʻOtuá” ʻoku lave ki ai ʻi he Fakahā 2:7.​—Sio ki he Taua Leʻo, Siulai 15, 2015, p. 8. pal. 8.

ʻOku lava ke pehē naʻe lave ʻa Paula ki he tafaʻaki kotoa ʻe tolu ko iá ʻi he 2 Kolinitō 12:4 ʻi heʻene fakamatala ki heʻene hokosiá.

ʻI hono fakanounoú:

Ko e “langi hono tolú” naʻe lave ki ai ʻi he 2 Kolinitō 12:2 ngalingali ʻoku ʻuhinga ki he Puleʻanga Faka-Mīsaia ʻi he nima ʻo Sīsū Kalaisí mo e toko 144,000, ʻa e “ngaahi langi foʻou.”​—2 Pita 3:13.

Ko e “langi hono tolú” ia koeʻuhi ko e Puleʻangá ʻa e founga-pule lelei taha mo māʻolunga tahá.

Ko e “palataisi” ʻa ia naʻe “hamusi hake” ki ai ʻa Paula ʻi he vīsoné ʻoku ngalingali ʻoku ʻuhinga ia ki he (1) māmani Palataisi ʻoku hanga mei muʻá, (2) palataisi fakalaumālie ʻe toki hokó, ʻa ia ʻe lahi mamaʻo ange ia ʻi he palataisi fakalaumālie ʻi he taimi ní, pea (3) “ko e “palataisi ʻa e ʻOtuá” ʻi hēvaní ʻa ia ʻe hoko fakataha mai mo e māmani foʻoú.

Fakatatau ki aí, ko e palataisí ko hono fakatahaʻi ia ʻo e ngaahi langi foʻoú mo e māmani foʻoú. ʻE hoko ia ko ha fokotuʻutuʻu foʻou, ʻo kau fakatouʻosi ai ʻa e Puleʻanga fakahēvaní mo e faʻahinga ʻo e tangatá ʻoku nau tauhi kia Sihova ʻi ha māmani palataisi.