“Ko e Nonga ʻa e ʻOtuá . . . ʻOku Fakalaka Atu ʻi he Mahino Kotoa Pē”

1, 2. Ko e hā naʻe hoko kia Paula mo Sailosi ʻi Filipaí? (Sio ki he ʻuluaki fakatātā ʻi he kupú ni.)

SIOLOTO atu ki he meʻa naʻe hokó. Ko e tuʻapoó nai eni. Ko e ongo misinale ko Paula mo Sailosi, naʻá na ʻi he tafaʻaki taupotu taha mo fakapoʻuli taha ʻo ha pilīsone ʻi he kolo ko Filipaí. Naʻe ʻikai lava ke na ngaue he naʻe haʻi hona ongo vaʻé, pea naʻe mamahi ʻa hona tuʻá ʻi ha tā lahi naʻe toki ʻosi fai kiate kinaua. (Ngā. 16:23, 24) Ki muʻa ange ʻi he ʻaho ko iá, naʻe fakaʻohovale ʻa hono toho ʻa Paula mo Sailosi ʻe ha fuʻu kakai ki he feituʻu faiʻanga fakataú. ʻI aí, naʻa nau fakavave ʻo fakamāuʻi kinaua. Naʻa nau hae hona valá pea tā lahi kinaua ʻaki ha ngaahi vaʻakau. (Ngā. 16:16-22) Ko ha fakamaau taʻetotonu moʻoni ia! Ko Paulá ko ha tangataʻifonua Loma, pea naʻá ne tuha mo ha fakamaau ʻi ha founga totonu.a​—Sio ki he fakamatala ʻi lalo.

² Lolotonga ʻa e ʻi he pilīsoné ʻa Paulá, naʻá ne fakakaukau nai fekauʻaki mo e meʻa naʻe hoko ʻi he ʻaho ko iá pea mo e kakai naʻe nofo ʻi Filipaí. Naʻe ʻikai foki ke ʻi ai ha sinakoke ʻi honau koló, ʻo ʻikai hangē ko e ngaahi kolo lahi kehe naʻe ʻaʻahi ki ai ʻa Paulá. Ko ia naʻe pau ai ke lotu ʻa e kau Siú ʻi tuʻa ʻi he matapā ʻo e koló ofi ki ha vaitafe. (Ngā. 16:13, 14) Naʻe hoko ení he naʻe ʻikai aʻu ʻo toko hongofulu ha kau tangata Siu ʻi he koló, ʻa e tokolahi naʻe fiemaʻu kae fokotuʻu ai ha sinakoké? Ko e kakai naʻe nofo ʻi Filipaí naʻa nau mātuʻaki laukauʻaki ʻa e hoko ko e kau tangataʻifonua Lomá. (Ngā. 16:21) Mahalo pē ko e ʻuhinga ia naʻe ʻikai ai te nau fakakaukau ko Paula mo Sailosi, ʻa e ongo Siú, ko e ongo tangataʻifonua Loma foki kinaua. ʻOku ʻikai ke tau ʻiloʻi papau, ka ʻoku tau ʻiloʻi naʻe taʻetotonu hono lī ʻo Paula mo Sailosi ki he pilīsoné.

 3. Ko e hā nai naʻe mei puputuʻu ai ʻa Paula ʻi hono ʻave ia ki he pilīsoné, ka ko e hā ʻa e fakakaukau naʻá ne maʻú?

³ Mahalo pē naʻe toe fakakaukau ʻa Paula fekauʻaki mo e founga naʻá ne aʻu ai ki Filipaí. ʻI ha ngaahi māhina siʻi ki muʻa ange, naʻe ʻi he tafaʻaki ai ʻe taha ʻo e Tahi ʻĪsiní ʻa Paula, ʻi ʻĒsia Maina. Lolotonga ʻene ʻi aí, naʻe toutou taʻofi ʻe he laumālie māʻoniʻoní ʻa ʻene malanga ʻi he ngaahi feituʻu ʻe niʻihi. Ne hangē naʻe ueʻi ia ʻe he laumālie māʻoniʻoní ke ne ʻalu ki ha feituʻu kehe. (Ngā. 16:6, 7) Ka ki fē? Lolotonga ʻene ʻi Taloasí, naʻe sio ai ʻa Paula ki ha vīsone ʻa ia naʻe tala ange ai kiate ia: “Laka mai ki Masitōnia.” Naʻe māʻalaʻala ʻa e finangalo ʻo Sihová! Ko ia naʻe ʻalu ʻa Paula he taimi pē ko iá ki Masitōnia. (Lau ʻa e Ngāue 16:8-10.) Ka ko e hā ʻa e meʻa naʻe hoko atu aí? ʻI heʻene aʻu pē ki Masitōniá, naʻá ne iku ai ki he pilīsoné! Ko e hā naʻe fakaʻatā ai ʻe Sihova ke hoko eni kia Paulá? Ko e hā hono lōloa ʻene nofo ʻi he pilīsoné? Neongo kapau naʻe fifili ʻa Paula fekauʻaki mo e ngaahi meʻa ko iá, naʻe kei mālohi ai pē ʻene tuí pea naʻá ne kei fiefia ai pē. Ko ia mo Sailosi fakatouʻosi naʻá na kamata ‘lotu mo fakahīkihikiʻi ʻa e ʻOtuá ʻaki ha hiva.’ (Ngā. 16:25) Ko e nonga ʻa e ʻOtuá naʻá ne fakafiemālieʻi ʻa hona lotó mo e ʻatamaí.

4, 5. (a) ʻOku lava fēfē ke meimei tatau hotau tuʻungá mo e tuʻunga ʻo Paulá? (e) Naʻe anga-fēfē ʻa e liliu taʻeʻamanekina ʻa e tuʻunga ʻo Paulá?

⁴ Kuo faifai ange peá ke ongoʻi ʻo hangē ko Paulá? Mahalo pē kuo ʻi ai ha taimi ʻi hoʻo moʻuí naʻá ke kole ai ki he ʻOtuá ke ne tokoniʻi koe ke ke fai ha fili pea naʻá ke ongoʻi naʻá ke muimui ʻi he tataki ʻa e laumālie māʻoniʻoní. Ka ʻi he hili iá, naʻe lahi hoʻo ngaahi palopalemá pe naʻe pau ke ke fai ha ngaahi liliu lahi ʻi hoʻo moʻuí. (Tml. 9:11) ʻI he taimi ní, ʻi hoʻo fakakaukau atu ki he tuʻunga ko iá, ʻokú ke fifili nai pe ko e hā naʻe fakaʻatā ai ʻe Sihova ʻa e ngaahi meʻa ʻe niʻihi ke hokó. Ko e hā ʻe lava ke ne tokoniʻi koe ke hokohoko atu hoʻo kātakí, ʻo falala kakato kia Sihova? ʻE lava ke tau maʻu ʻa e talí ʻi he meʻa naʻe hoko atu kia Paula mo Sailosí.

⁵ Lolotonga ʻa e hiva ʻa Paula mo Sailosí, naʻe kamata ke hoko ʻa e ngaahi meʻa taʻeʻamanekina lahi. ʻUluakí, naʻe ʻi ai ha fuʻu mofuike mālohi. Naʻe ava ʻi he taimi pē ko iá ʻa e ngaahi matapā ʻo e pilīsoné. Pea naʻe homo ʻa e ngaahi haʻi kotoa ʻo e kau pōpulá. Ko hono hokó, naʻe taʻofi ʻe Paula ʻa e selá mei heʻene ʻai ke taonakitá, pea naʻe hoko ʻa e selá mo hono fāmilí kotoa ʻo papitaiso. Pongipongia ʻi he pongipongi hono hokó, naʻe fekauʻi atu ai ʻe he kau ʻōfisa ʻo e koló ha kau ʻōfisa ke ʻomi ki tuʻa ʻa Paula mo Sailosi mei he pilīsoné pea kole ange ke na mavahe fiemālie mei he koló. ʻI hono ʻiloʻi ʻe he kau ʻōfisá ko e ongo tangataʻifonua Loma ʻa Paula mo Sailosí, naʻa nau mahinoʻi ʻa e fuʻu fehālaaki naʻa nau faí, pea naʻa nau haʻu tonu ʻo fakafeʻao kinaua ki tuʻa. Ka ki muʻa ke mavahe ʻa Paula mo Sailosi mei he koló, naʻá na vilitaki ke na ō ʻo lea māvae kia Litia, ʻa hona tuofefine naʻe toki ʻosi papitaisó. Pea naʻá na ngāueʻaki ʻa e faingamālie ko iá ke fakaivimālohiʻi ʻa e fanga tokoua kehe ʻi Filipaí. (Ngā. 16:26-40) He vave moʻoni ē ko e liliu ʻa e meʻa kotoa!

 6. Ko e hā te tau lāulea mo vakai ki ai he taimi ní?

⁶ Ko e hā ʻoku tau ako mei he ngaahi meʻa ko ia naʻe hokó? ʻOku lava ke fai ʻe Sihova ha meʻa taʻeʻamanekina, ko ia ʻoku ʻikai fiemaʻu ia ke tau loto-moʻua ʻi heʻetau fehangahangai mo e ngaahi ʻahiʻahí. ʻOku tau ʻilo naʻe maongo lahi ʻa e lēsoni ko iá kia Paula koeʻuhi ko ʻene tohi naʻe fai ki mui ki he fanga tokoua ʻi Filipaí fekauʻaki mo e loto-moʻuá pea mo e nonga ʻa e ʻOtuá. ʻI he kupu ko ení te tau lāulea ai ki he lea ʻa Paula ʻi he Filipai 4:6, 7. (Lau.) Pea te tau vakai leva ki he ngaahi talanoa kehe ʻi he Tohi Tapú ʻa ia naʻe fai ai ʻe Sihova ha meʻa taʻeʻamanekina. Fakaʻosí, te tau lāulea ki he founga ʻe lava ke tokoniʻi ai kitautolu ʻe he “nonga ʻa e ʻOtuá” ke tau kātekina ʻa e ngaahi ʻahiʻahí mo e falala kakato kia Sihova.

 7. Ko e hā ʻa e lēsoni naʻe akoʻi ʻe Paula ʻi heʻene tohi ki he fanga tokoua ʻi Filipaí, pea ko e hā ʻoku lava ke tau akó?

⁷ ʻI he taimi naʻe lau ai ʻe he fanga tokoua ʻi Filipaí ʻa e tohi ʻa Paula kiate kinautolú, ko e hā naʻa nau fakakaukau ki aí? Ko e tokolahi taha ʻo kinautolú ʻoku ngalingali naʻa nau manatuʻi ʻa e meʻa naʻe hoko kia Paula mo Sailosí mo e founga taʻeʻamanekina ʻo hono tokoniʻi kinaua ʻe Sihová. Ko e hā ʻa e lēsoni naʻe akoʻi ʻe Paula kiate kinautolu ʻi heʻene tohí? Ko e lēsoní eni: ʻOua ʻe hohaʻa. Lotu, pea te ke maʻu leva ai ʻa e “nonga ʻa e ʻOtuá ʻa ia ʻoku fakalaka atu ʻi he mahino kotoa pē.” Ko e hā ʻa e ʻuhinga ʻo e kupuʻi lea ko iá? ʻOku pehē ʻi he ngaahi liliu Tohi Tapu ʻe niʻihi ko e “fakalaka atu ʻi he kotoa ʻo ʻetau ngaahi misí” pe “mahulu atu ʻi he palani kotoa ʻa e tangatá.” Ko ia naʻe pehē ʻe Paulá “ko e nonga ʻa e ʻOtuá” ʻoku fakaofo ange ia ʻi he meʻa ʻoku lava ke tau sioloto atu ki aí. Lolotonga ʻoku ʻikai te tau ʻiloʻi ʻi he taimi ʻe niʻihi ʻa e fakaleleiʻanga ki heʻetau ngaahi palopalemá, ʻoku ʻiloʻi ia ʻe Sihova. Pea ʻe lava ke ne fai ha meʻa taʻeʻamanekina.​—Lau ʻa e 2 Pita 2:9.

8, 9. (a) Neongo naʻe faingataʻaʻia ʻa Paula ʻi ha fakamaau taʻetotonu ʻi Filipai, ko e hā ʻa e lelei naʻe hoko koeʻuhi ko e ngaahi meʻa ko iá? (e) Ko e hā naʻe lava ai ke maʻu ʻe he fanga tokoua ʻi Filipaí ʻa e falala kakato ki he lea ʻa Paulá?

⁸ Ko e tohi ʻa Paulá kuo pau pē naʻá ne fakaivimālohiʻi ʻa e fanga tokoua ʻi Filipaí ʻi heʻenau fakakaukau fekauʻaki mo e meʻa naʻe fai ʻe Sihova maʻanautolu ʻi he taʻu ʻe hongofulu fakamuimuí. Neongo naʻe fakaʻatā ʻe Sihova ʻa Paula mo Sailosi ke na faingataʻaʻia ʻi ha fakamaau taʻetotonu, ko e ngaahi meʻa ko ia naʻe hoko ki muʻá naʻe iku ai ki hono “taukapoʻi mo fokotuʻu fakalao ʻa e ongoongo leleí.” (Fil. 1:7) Ko e kau ʻōfisa ko ia ʻo e koló ʻi Filipaí naʻe ʻikai te nau maʻu ha loto-toʻa ke fakatangaʻi ʻa e fakatahaʻanga Kalisitiane foʻoú. Mahalo pē koeʻuhí ko e lave ʻa Paula ki hono tuʻunga ko e tangataʻifonua Lomá, naʻe malava ai ke nofo ai pē ʻa e ākonga ko Luké ʻi Filipai ʻi he hili ʻa e mavahe ʻa Paula mo Sailosí. Naʻe lava leva ke fai ʻe Luke ha tokoni lahi ki he kau Kalisitiane foʻou ʻi Filipaí.

⁹ ʻI hono lau ʻe he fanga tokoua ko ia ʻi Filipaí ʻa e tohi ʻa Paulá, naʻa nau ʻiloʻi ko ʻene leá naʻe ʻikai ko haʻane fakakaukau fakafoʻituitui pē. Naʻe hokosia ʻe Paula ʻa e ngaahi ʻahiʻahi lahi fau. Naʻa mo e taimi naʻá ne tohi ai ki he fanga tokoua ko iá, ko ha pōpula ia ʻi hono fale ʻi Lomá. Ka naʻá ne kei fakahāhā pē naʻá ne maʻu “ʻa e nonga ʻa e ʻOtuá.”​—Fil. 1:12-14; 4:7, 11, 22.

10, 11. Ko e hā ʻoku fiemaʻu ke tau fai ʻi he taimi ʻoku tau hohaʻa ai fekauʻaki mo ha palopalema, pea ko e hā ʻe lava ke tau ʻamanekiná?

¹⁰ Ko e hā ʻe lava ke ne tokoniʻi kitautolu ke ʻoua te tau hoko ʻo “loto-moʻua ʻi ha faʻahinga meʻa” ka ʻi hono kehé te tau maʻu “ʻa e nonga ʻa e ʻOtuá”? Ko e lea ʻa Paula ki he kau Filipaí ʻoku fakahaaʻi ai ʻi he taimi ʻoku tau hohaʻa ai fekauʻaki mo ha palopalema, ko e fakaleleiʻangá ko e lotu. Ko ia ʻi he taimi ʻoku tau ongoʻi loto-moʻua aí, ʻoku fiemaʻu ke tau ʻohake ʻetau ngaahi hohaʻá ʻi he lotu. (Lau ʻa e 1 Pita 5:6, 7.) ʻI hoʻo lotu kia Sihová, hoko ʻo tuipau kakato ʻokú ne tokanga mai kiate koe. Fakamālō maʻu pē kiate ia ʻi he tāpuaki kotoa ʻokú ke maʻú. Pea ʻoua ʻaupito naʻa ngalo ko Sihová ʻoku lava ke ne “fai ʻa e meʻa ʻoku mahulu lahi atu ia ʻi he ngaahi meʻa kotoa pē ʻoku tau kole pe fakakaukau ki aí.”​—ʻEf. 3:20.

¹¹ ʻI he hangē ko Paula mo Sailosí, te tau ʻohovale nai ʻi he meʻa ʻoku fai ʻe Sihova ke tokoniʻi ai kitautolú. ʻE ʻikai nai ko ha meʻa fakatoʻoaloto ia, ka ʻe hoko maʻu pē ko e meʻa ia ʻoku tau fiemaʻú. (1 Kol. 10:13) ʻOku ʻikai ʻuhinga iá ke tau tangutu pē, ʻo ʻikai fai ha meʻa, pea tatali kia Sihova ke ne fakatonutonu ʻa e tuʻungá pe fakaleleiʻi ʻa ʻetau palopalemá. ʻOku fiemaʻu ke tau ngāue ʻo fehoanaki mo ʻetau ngaahi lotú. (Loma 12:11) Ko ʻetau ngaahi ngāué ʻe fakamoʻoniʻi ai ʻoku tau loto-moʻoni pea ʻe tāpuakiʻi ai kitautolu ʻe Sihova. ʻOku ʻikai totonu ke ngalo ʻiate kitautolu ʻoku lava ke fai ʻe Sihova ʻa e meʻa lahi ange ʻi he meʻa ʻoku tau kole pe ʻamanekina ke ne faí. ʻI he taimi ʻe niʻihi ʻokú ne fakaʻohovaleʻi kitautolu ʻi heʻene fai ha meʻa taʻeʻamanekina. Ko ia tau vakai angé ki ha ngaahi fakatātā ʻa ia ʻe fakaivimālohiʻi ai ʻetau falala ki he malava ʻa Sihova ke ne fai ha meʻa taʻeʻamanekina maʻatautolu.

12. (a) Ko e hā naʻe fai ʻe Tuʻi Hesekaia ʻi he taimi naʻe fakamanamanaʻi ai ia ʻe Tuʻi Senakalipé? (e) Ko e hā ʻoku tau ako mei he founga ʻo hono fakaleleiʻi ʻe Sihova ʻa e palopalemá?

¹² ʻI he Tohi Tapú, te tau maʻu ai ʻa e ngaahi fakatātā lahi ʻo hono fai ʻe Sihova ʻa e meʻa taʻeʻamanekiná. Ko e fakatātaá, ʻi he taimi naʻe tuʻi ai ʻa Hesekaia ʻi Siutá, naʻe ʻohofi ʻe Senakalipe, ko e tuʻi ʻo ʻAsīliá, ʻa Siuta peá ne hamu ʻa e kotoa ʻo hono ngaahi koló tuku kehe pē ʻa Selusalema. (2 Tuʻi 18:1-3, 13) Pea naʻe ʻalu leva ʻa Senakalipe ke ʻohofi ʻa Selusalema. Ko e hā naʻe fai ʻe Tuʻi Hesekaiá? ʻUluakí, naʻá ne lotu kia Sihova ʻo kole ha tokoni peá ne kole faleʻi ki he palōfita ʻa Sihova ko ʻAiseá. (2 Tuʻi 19:5, 15-20) Ko hono hokó, naʻe fakahāhā ʻe Hesekaia naʻá ne fakapotopoto ʻi heʻene totongi ʻa e moʻua naʻe kounaʻi ʻe Senakalipé. (2 Tuʻi 18:14, 15) Fakaʻosí, naʻe teuʻi ʻe Hesekaia ʻa e koló ki ha ʻākoloʻi ʻi ha taimi lōloa. (2 Kal. 32:2-4) Naʻe iku ʻa e tuʻunga ko ení ki he hā? Naʻe fekauʻi mai ʻe Sihova ha ʻāngelo ke ne fakaʻauha ʻa e kau sōtia ʻa Senakalipe ʻe toko 185,000 ʻi ha pō pē ʻe taha. Naʻa mo Hesekaia naʻe ʻikai te ne ʻamanekina ʻe hoko ʻa e meʻa ko iá!​—2 Tuʻi 19:35.

13. (a) Ko e hā ʻa e lēsoni ʻoku tau ako mei he meʻa naʻe hoko kia Siosifá? (e) Ko e hā ʻa e meʻa taʻeʻamanekina naʻe hoko kia Selá?

¹³ Fakakaukau angé ki he meʻa naʻe hoko ki he talavou ko Siosifá. Lolotonga ʻene tangutu ʻi ha foʻi luo pilīsone ʻi ʻIsipite, naʻe ʻikai lava ke fakakaukau atu ʻa Siosifa te ne hoko ko e tokotaha maʻu mafai mālohi taha fika ua ʻi ʻIsipité pe ʻe ngāueʻaki ia ʻe Sihova ke ne fakahaofi ʻa hono fāmilí mei he hongé. (Sēn. 40:15, fakamatala ʻi lalo; 41:39-43; 50:20) ʻOku ʻikai ha veiveiua naʻe mahulu atu ʻa e ngaahi meʻa naʻe fai ʻe Sihová ʻi he meʻa kotoa naʻe ʻamanekina ʻe Siosifá. Fakakaukau atu foki fekauʻaki mo e kui-ua ʻa Siosifa ko Selá. Naʻe ʻamanekina ʻe he taʻumotuʻa ko Selá ʻe fakaʻatā ia ʻe Sihova ke ne fanauʻi haʻane tama, ʻo ʻikai ko hono maʻu pē ʻa e tama ʻa ʻene kaunangá? Ko e fanauʻi ʻo ʻAisaké naʻe mahulu atu ia ʻi he meʻa naʻe lava ke faifai ange pea sioloto atu ki ai ʻa Selá.​—Sēn. 21:1-3, 6, 7.

14. Ko e hā ʻa e falala pau kia Sihova ʻoku lava ke tau maʻú?

¹⁴ ʻOku ʻikai te tau ʻamanekina ʻe toʻo fakaemana ʻe Sihova ʻa ʻetau ngaahi palopalemá kotoa ki muʻa ke hoko mai ʻa e māmani foʻoú. Pea ʻoku ʻikai te tau kounaʻi ke fai ʻe Sihova ha ngaahi meʻa fakatoʻoaloto ki heʻetau moʻuí. Ka ʻoku tau ʻiloʻi naʻe tokoniʻi ʻe Sihova ʻa ʻene kau sevāniti faitōnunga ʻi he kuohilí ʻi he ngaahi founga fakaofo. Pea kuo ʻikai ke ne liliu. (Lau ʻa e ʻAisea 43:10-13.) ʻOku ʻai ʻe he meʻa ko iá ke tau falala pau kiate ia. ʻOku lava ke tau fakapapauʻi te ne ʻomai kiate kitautolu ʻa e mālohi ʻoku tau fiemaʻú koeʻuhi ke tau fai ʻa hono finangaló. (2 Kol. 4:7-9) Ko e hā ʻoku tau ako mei he fakatātā fekauʻaki mo Hesekaia, Siosifa, mo Selá? ʻE lava ke tokoniʻi kitautolu ʻe Sihova naʻa mo e taimi ʻoku tau ʻi he ngaahi tuʻunga faingataʻa taha aí kapau te tau faitōnunga ai pē kiate ia.

15. Ko e hā te ne tokoniʻi kitautolu ke tau maʻu ʻa e “nonga ʻa e ʻOtuá” naʻa mo e taimi ʻoku tau maʻu ai ha ngaahi palopalemá, pea ʻoku malava fēfē ke hoko ʻa e meʻá ni?

¹⁵ ʻE lava fēfē ke tau maʻu ʻa e “nonga ʻa e ʻOtuá” naʻa mo e taimi ʻoku tau maʻu ai ha ngaahi palopalemá? ʻOku fiemaʻu ke tau tauhi hotau vahaʻangatae mo Sihová ke mālohi. Ko ha vahaʻangatae pehē ʻoku malava pē iá koeʻuhi ko e feilaulau huhuʻi ʻa Kalaisi Sīsuú. Ko e huhuʻí ʻa e taha ʻo e ngaahi ngāue fakaofo ʻa Sihová. Koeʻuhi ko e huhuʻí, ʻoku lava ai ke ne fakamolemoleʻi ʻetau ngaahi angahalá, pea ʻoku lava ke tau maʻu ai ha konisēnisi maʻa pea ʻunuʻunu ofi kiate ia.​—Sione 14:6; Sēm. 4:8; 1 Pita 3:21.

16. Ko e hā ʻe hoko ʻi he taimi ʻoku tau maʻu ai ʻa e “nonga ʻa e ʻOtuá”? Fakatātaaʻi.

¹⁶ Ko e hā ʻe hoko ʻi heʻetau maʻu ʻa e “nonga ʻa e ʻOtuá ʻa ia ʻoku fakalaka atu ʻi he mahino kotoa pē”? ʻOku pehē ʻe he Tohi Tapú te ne “maluʻi” hotau lotó mo hotau ʻatamaí. (Fil. 4:7) Ko e muʻaki foʻi lea ki he “maluʻi” ko ha kupuʻi lea fakakautau ʻa ia naʻe ʻuhingá ki ha kulupu ʻo ha kau sōtia naʻe vaheʻi ke nau maluʻi ha kolo. Ko e kakai naʻe nofo ʻi he kolo ko Filipaí naʻe maluʻi kinautolu ʻe ha kulupu pehē. Naʻe lava ke nau mohe lelei ʻi he poʻulí ʻi hono ʻiloʻi naʻe malu ʻa honau koló. ʻI ha founga meimei tatau, ʻi heʻetau maʻu ʻa e “nonga ʻa e ʻOtuá,” ʻoku ʻikai ke tau hohaʻa pea ʻoku lava ke fiemālie ʻa hotau lotó mo e ʻatamaí. ʻOku tau ʻiloʻi ʻoku tokanga mai ʻa Sihova kiate kitautolu pea ʻokú ne loto ke tau lavameʻa. (1 Pita 5:10) Pea ʻoku maluʻi ʻe he meʻa ko iá kitautolu mei he ongoʻi lōmekina ʻe he loto- moʻuá pe loto-siʻí.

17. Ko e hā te ne tokoniʻi kitautolu ke tau falala kia Sihova ʻi he lolotonga ʻa e mamahi lahí?

¹⁷ Kuo vavé ni ke hoko mai ʻa e mamahi lahí ki he faʻahinga kotoa ʻo e tangatá. (Māt. 24:21, 22) ʻOku ʻikai ke tau ʻiloʻi ʻa e meʻa tofu pē ʻe hoko fakafoʻituitui mai kiate kitautolú. Kae kehe, ʻoku ʻikai fiemaʻu ke tau loto-moʻua tōtuʻa fekauʻaki mo e taimi ko iá. Neongo ʻoku ʻikai te tau ʻiloʻi ʻa e meʻa kotoa pē ʻe fai ʻe Sihová, ʻoku tau ʻiloʻi hotau ʻOtuá. ʻOku tau ʻiloʻi ʻa e meʻa kuó ne fai ʻi he kuohilí maʻa ʻene kau sevāniti faitōnungá. ʻOku tau ʻiloʻi tatau ai pē pe ko e hā ʻoku hokó, ʻe fakapapauʻi ʻe Sihova ʻe hoko moʻoni ʻa ʻene taumuʻá. Pea te ne fai ia ʻi ha founga taʻeʻamanekina! Ko ia ai, ʻi he taimi taki taha ʻoku fai ai ʻe Sihova ha meʻa maʻatautolu, ʻoku tau hokosia ai ʻi ha founga foʻou ʻa e “nonga ʻa e ʻOtuá ʻa ia ʻoku fakalaka atu ʻi he mahino kotoa pē.”