Toʻutupu—​Mou Tuʻu Maʻu ʻo Fakafepakiʻi ʻa e Tēvoló

1, 2. (a) Ko e hā ʻe ikuna ai ʻa e toʻutupu Kalisitiané ʻi he tau mo Sētane mo e fanga tēmenioó? (Sio ki he ʻuluaki fakatātā ʻi he kupú ni.) (e) Ko e hā te tau lāulea ki aí?

NAʻE fakahoa ʻe he ʻapositolo ko Paulá ʻa e kau Kalisitiané ki he kau sōtiá. ʻOku tau kau ʻi ha tau, pea ko hotau ngaahi filí ko e faʻahinga moʻoni! Ka ko ʻetau faitaú ʻoku ʻikai ko e faitau mo e faʻahinga ʻo e tangatá; ko e faitau ia mo Sētane mo e fanga tēmenioó. Kuo nau hoko ko e kau pāteʻitau ʻi he taʻu ʻe laui afe pea ʻoku nau poto ʻaupito ʻi he taú. Ko ia ʻe hā ngali heʻikai nai malava ke tau ikuna ʻi he tau ko ení, tautefito kapau ʻoku tau kei siʻi. ʻE lava ke ikuna ʻa e toʻutupú ʻi ha tau mo e ngaahi fili mālohi peheé? ʻIo, te nau malava, pea te nau ikuna! Ko e hā hono ʻuhingá? Koeʻuhí ʻoku nau maʻu ʻa e mālohi meia Sihova. ʻIkai ko ia pē, ʻi he hangē ko e kau sōtia kuo akoʻi leleí, ʻoku nau “tui ʻa e teunga tau kakato mei he ʻOtuá” koeʻuhi ke nau mateuteu ai ki he taú.​—Lau ʻa e ʻEfesō 6:10-12.

² ʻI hono ngāueʻaki ʻe Paula ʻa e fakatātā ko iá, ʻoku pau pē nai naʻá ne fakakaukau ki he teunga tau naʻe tui ʻe he kau sōtia Lomá. (Ngā. 28:16) ʻI he kupu ko ení, te tau sivisiviʻi ai ʻa e fakatātā lelei ʻaupito ko iá. Te tau lāulea foki ai ki he meʻa ʻoku leaʻaki ʻe he toʻutupu ʻe niʻihi ʻo fekauʻaki mo e ngaahi faingataʻa pea mo e ʻaonga ʻo hono tui ʻa e konga taki taha ʻo hotau teunga tau fakalaumālié.

3, 4. ʻOku anga-fēfē ʻa e hangē ʻa e moʻoni mei he Tohi Tapú ko e leta ʻo ha sōtia Loma?

³ Lau ʻa e ʻEfesō 6:14. Ko e leta ʻo ha sōtia Loma naʻe ʻi ai ʻa e ngaahi lauʻi mētale ke maluʻi ʻa e kongaloto ʻo e sōtiá peá ne puke ʻa e sifa-fatafata mamafá ke ʻoua naʻa homo. Ko e ngaahi leta ʻe niʻihi ʻoku ʻi ai foki ha ngaahi meʻa fakamaʻu fefeka naʻe fakamaʻu ki ai ha heletā mo ha hele-tui. ʻI hono haʻi maʻu ʻa hono letá, naʻe lava ke loto-maʻu ai ha sōtia ʻi heʻene ʻalu ʻi he taú.

⁴ ʻI he hangē ko ha letá, ko e ngaahi moʻoni ʻoku tau ako mei he Folofola ʻa e ʻOtuá ʻokú ne maluʻi kitautolu mei he ngaahi akonaki loí. (Sione 8:31, 32; 1 Sio. 4:1) Pea ko e lahi ange ʻetau ako ke ʻofa ʻi he ngaahi moʻoni mei he Folofola ʻa e ʻOtuá, ko e faingofua ange ia kiate kitautolu ke tau moʻui ʻo fakatatau ki he ngaahi tuʻunga ʻa e ʻOtuá, pe ko ʻetau tui ia hotau “sifa-fatafata.” (Saame 111:7, 8; 1 Sio. 5:3) Pehē foki, ko e lelei ange ʻetau mahinoʻi ʻa e ngaahi moʻoni ko ení, ko e lelei ange ia ʻa e malava ke tau maluʻi ia mei hotau ngaahi filí.​—1 Pita 3:15.

 5. Ko e hā ʻoku totonu ai ke tau lea moʻoni maʻu peé?

⁵ Koeʻuhi ʻoku mahuʻinga kiate kitautolu ʻa e ngaahi moʻoni mei he Folofola ʻa e ʻOtuá, ʻoku tau talangofua ki he meʻa ʻoku leaʻaki ʻe he Tohi Tapú pea tau leaʻaki maʻu pē ʻa e moʻoní. Ko e loí ko e taha ia ʻo e ngaahi meʻatau lavameʻa taha ʻa Sētané. ʻOku fakatupu maumau ʻa e loí ki he tokotaha ʻokú ne leaʻaki iá mo e tokotaha ʻoku tui ki aí. (Sione 8:44) Ko ia neongo ʻoku ʻikai ke tau haohaoa, ʻoku tau feingaʻaki hotau lelei tahá ke ʻoua ʻaupito ʻe loi. (ʻEf. 4:25) ʻOku lava ke faingataʻa eni. ʻOku pehē ʻe Abigail, ʻa ia ʻokú ne taʻu 18: “Ko e leaʻaki ʻa e moʻoní ʻoku ʻikai nai ke hā ngali tuha maʻu pē ke fai pehē, tautefito kapau ko e leaʻaki ʻa e loí ʻe lava ke ke hao ai ʻi ha faingataʻa.” Ko ia ko e hā ʻokú ne feinga ai ke lea moʻoni maʻu peé? ʻOkú ne pehē: “ʻI heʻeku lea moʻoní, ʻoku ou maʻu ai ha konisēnisi maʻa ʻi he ʻao ʻo Sihová. Pea ʻoku ʻiloʻi ʻe heʻeku ongo mātuʻá mo hoku ngaahi kaumeʻá ʻe lava ke nau falala mai kiate au.” ʻOku pehē ʻe Victoria, ʻa ia ʻokú ne taʻu 23: “ʻI hoʻo leaʻaki ʻa e moʻoní pea tuʻu ʻo taukapoʻi hoʻo tuí, ʻe ngaohikoviʻi nai ai koe. Ka ʻokú ke maʻu maʻu pē ha ngaahi ʻaonga lahi: ʻOkú ke maʻu ai ʻa e loto-maʻu, ʻokú ke ongoʻi ofi ange ai kia Sihova, pea ʻokú ke maʻu ai ʻa e fakaʻapaʻapa ʻa e faʻahinga ʻoku nau ʻofa ʻiate koé.” ʻOkú ke sio ki he ʻuhinga ʻoku mahuʻinga ai ke tui ʻi he taimi kotoa pē ʻa e “leta ko e moʻoní”?

6, 7. Ko e hā ʻoku fakahoa ai ʻa e māʻoniʻoní ki ha sifa-fatafatá?

⁶ Ko e sifa-fatafata ʻo ha sōtia Loma naʻe faʻa ngaohiʻaki ia ʻa e ngaahi lauʻi ukamea lele lōloa naʻe pikoʻi ke feʻunga lelei takatakai ʻi hono fatafatá. Ko e ngaahi lauʻi ukameá naʻe fakapipiki ia ki he ngaahi lauʻi leta naʻe ʻi ai hono ngaahi meʻa fakamaʻu mētale mo e pākolo. Ko hono umá naʻe ʻi ai ʻa e ngaahi lauʻi ukamea lahi ange naʻe fakapipiki foki ki ha lauʻi leta. Naʻe taʻotaʻofi ʻe he sifa-fatafatá ʻene ngaue holó, pea naʻe fiemaʻu ai ke ne vakaiʻi maʻu pē pe ʻoku tuʻu lelei ʻa e ngaahi lauʻi ukameá. Ka ko e sifa-fatafata ko iá naʻá ne maluʻi ʻa hono mafú mo e ngaahi ʻōkani kehé mei he mata ʻo e heletaá pe ko ha mataʻi-ngahau!

⁷ Ko e ngaahi tuʻunga māʻoniʻoni ʻa Sihová, ʻa ia ʻokú ne maluʻi hotau “lotó,” pe ko e tangata ʻi lotó, ʻoku lava ke fakahoa ia ki he sifa-fatafatá. (Pal. 4:23) Heʻikai ʻaupito fakafetongi ʻe ha sōtia ʻa hono sifa-fatafata ukameá ʻaki ha sifa-fatafata naʻe ngaohi mei ha mētale vaivai ange. ʻI he founga tatau, heʻikai ʻaupito ke tau fakafetongi ʻa e ngaahi tuʻunga ʻa Sihova ki he meʻa ʻoku totonú ʻaki ʻetau ngaahi fakakaukau pē ʻatautolu ki he meʻa ʻoku totonú. ʻOku ʻikai ʻaupito ke tau poto feʻunga ke maluʻi hotau lotó tonu. (Pal. 3:5, 6) Ko e ʻuhinga ia kuo pau ai ke tau vakaiʻi maʻu pē pe ʻoku kei maluʻi ʻe hotau “sifa-fatafata” ʻa hotau lotó.

 8. Ko e hā ʻoku totonu ai ke tau talangofua ki he ngaahi tuʻunga ʻa Sihová?

⁸ ʻOkú ke ongoʻi ʻi he taimi ʻe niʻihi ʻoku toʻo ʻe he ngaahi tuʻunga ʻa Sihová ʻa hoʻo tauʻatāiná pe taʻofi koe mei hono fai ʻo e ngaahi meʻa ʻokú ke loto ke faí? ʻOku pehē ʻe Daniel, ʻa ia ʻokú ne taʻu 21: “Naʻe fakakataʻaki au ʻe he kau faiakó mo e kaungāakó koeʻuhi ko ʻeku moʻuiʻaki ʻa e ngaahi tuʻunga Fakatohitapú. ʻI ha taimi, naʻe mole ai ʻeku loto-maʻú peá u ongoʻi loto-mafasia.” Ka ʻoku fēfē ʻene ongoʻí he taimí ni? ʻOkú ne pehē: “Naʻe faifai pē peá u ʻiloʻi ʻa e ʻaonga ʻo e moʻuiʻaki ʻa e ngaahi tuʻunga ʻa Sihová. Ko e niʻihi ʻo hoku ‘ngaahi kaumeʻá’ naʻe kamata ke nau ngāueʻaki ʻa e faitoʻo kona tapú; ko e niʻihi naʻa nau nofo mei he akó. Naʻe fakamamahi ʻa e sio ki he ikuʻanga ʻenau moʻuí. ʻOku maluʻi moʻoni kitautolu ʻe Sihova.” ʻOku pehē ʻe Madison, ʻa ia ʻokú ne taʻu 15: “Ko ha fāinga lahi kiate au ʻa e feinga ke pipiki ki he ngaahi tuʻunga ʻa Sihová ʻo ʻikai kau ʻi he ngaahi meʻa ʻoku fakakaukau ʻa hoku toʻumeʻá ʻoku tika pe fakalatá.” Ko ia ai, ko e hā ʻokú ne faí? “ʻOku ou fakamanatu kiate au ʻoku uiʻaki au ʻa e huafa ʻo Sihová pea ko e fakatauelé ko e founga pē ia ʻo hono fanaʻi au ʻe Sētané. ʻI heʻeku ikuna ʻi ha fāinga, ʻoku ou ongoʻi lelei ange ai.”

9-11. (a) Ko e hā ʻa e sū fakaefakatātā ʻoku tui ʻe he kau Kalisitiané? (e) Ko e hā ʻe lava ke ne tokoniʻi kitautolu ke tau ongoʻi fiemālie ange ai ʻi heʻetau malangá?

⁹ Lau ʻa e ʻEfesō 6:15. Naʻe ʻikai lava ke ʻalu ha sōtia Loma ʻi he taú ʻo ʻikai tui ʻa hono suú. Naʻe ngaohiʻaki ia ha leta naʻe ʻotu tolu, ko ia naʻe fefeka ʻaupito ia. Ka ko e sū ko ení naʻe toe molū foki, ko ia naʻe lava ai ke lue ha sōtia ʻi he loto-maʻu ʻo ʻikai te ne hekea.

¹⁰ Lolotonga naʻe tokoni ʻa e sū naʻe tui ʻe he kau sōtia Lomá ke nau lavameʻa ʻi he taú, ko e sū fakaefakatātā ʻoku tau tuí ʻokú ne tokoniʻi kitautolu ke tau “talaki ʻa e ongoongo lelei ʻo e melinó.” (ʻAi. 52:7; Loma 10:15) Kae kehe, ʻoku fiemaʻu ʻi he taimi ʻe niʻihi ha loto-toʻa lahi ki he malangá. ʻOku pehē ʻe Bo, ʻa ia ʻokú ne taʻu 20: “Naʻá ku ilifia ke faifakamoʻoni ki hoku kaungāakó. ʻOku ou tui naʻá ku mā. ʻI he vakai atu ki aí, ʻoku ʻikai te u ʻiloʻi pe ko e hā naʻá ku pehē aí. ʻOku ou fiefia he taimí ni ʻi he faifakamoʻoni ki hoku toʻumeʻá.”

¹¹ Kuo ʻiloʻi ʻe he toʻutupu Kalisitiane tokolahi ʻoku nau ongoʻi fiemālie ange ʻi heʻenau malangá kapau naʻa nau teuteu ki muʻa. Ko e hā ʻe lava ke ke fai ʻi hoʻo teuteú? ʻOku pehē ʻe Julia, ʻa ia ʻokú ne taʻu 16: “ʻOku ou faʻo ha ʻū tohi ʻi heʻeku kato naunaú, pea ʻoku ou fanongo ki he anga ʻo e fakakaukau mo e tui ʻoku fakahāhā ʻe hoku kaungāakó. Pea ʻoku ou malava ai ke fakakaukau ki he meʻa ʻe tokoni kiate kinautolú. ʻI heʻeku mateuteú, ʻoku lava ke u talanoa ai mo kinautolu fekauʻaki mo e meʻa tofu pē ʻe ʻaonga kiate kinautolú.” ʻOku pehē ʻe Makenzie, ʻa ia ʻokú ne taʻu 23: “Kapau ʻokú ke anga-lelei pea fanongo lelei, ʻe lava ke ke maʻu ai ha mahino fekauʻaki mo e meʻa ʻoku fekuki mo ho toʻumeʻá. ʻOku ou fakapapauʻi ke lau ʻa e fakamatala kotoa pē kuo pulusi maʻá e toʻutupú. ʻI he founga ko iá ʻoku lava ke u tataki ai hoku toʻumeʻá ki ha meʻa ʻi he Tohi Tapú pe ʻi he jw.org ʻa ia ʻe tokoni kiate kinautolu.” Ko e mateuteu lelei ki he malangá ʻoku hangē ia ko hono tui ʻa e “sū” ʻoku feʻunga lelei ʻi ho vaʻé.

12, 13. Ko e hā ʻa e niʻihi ʻo e “ngaahi ngahau vela” ʻa Sētané?

¹² Lau ʻa e ʻEfesō 6:16. Naʻe toʻo ʻe ha sōtia Loma ha fuʻu pā tapafā-loloa. Naʻe maluʻi ai ia mei hono umá ki hono tuí pea maluʻi ai mei he ngaahi heletaá, taó, mo e ngahaú.

¹³ Ko e hā ʻa e “ngaahi ngahau vela” ʻoku lava ke fanaʻi ʻaki koe ʻe Sētané? Mahalo pē ʻokú ne ʻohofi koe ʻaki ʻa e ngaahi loi fekauʻaki mo Sihova. ʻOku loto ʻa Sētane ke ke ongoʻi ʻoku ʻikai ke ʻofa ʻa Sihova ʻiate koe pea ʻoku ʻikai ke tokanga atu ha taha kiate koe. ʻOku pehē ʻe Ida, ʻa ia ʻokú ne taʻu 19: “ʻOku ou faʻa ongoʻi ʻoku ʻikai ke ofi mai ʻa Sihova kiate au pea ʻoku ʻikai te ne loto ke hoko ko hoku Kaumeʻa.” Ko e hā ʻokú ne fai ʻi heʻene ongoʻi peheé? “Ko e ngaahi fakatahá ko ha tokoni lahi moʻoni ia ki heʻeku tuí. Naʻá ku faʻa tangutu ai ʻo ʻikai ʻaupito ke u fai ha tali, ʻi he fakakaukau heʻikai ke fiefanongo mai ha taha ki he meʻa ʻoku ʻamanaki ke u leaʻakí. Neongo ia, ʻi he taimi ní ʻoku ou teuteu ki he ngaahi fakatahá pea feinga ke fai ha tali ʻe ua pe tolu. ʻOku faingataʻa, ka ʻoku ou ongoʻi lelei ange ʻi heʻeku fai iá. Pea ʻoku mātuʻaki fakalototoʻa ʻa e fanga tokouá mo e fanga tuofāfiné. ʻOku ou mavahe maʻu pē mei he ngaahi fakatahá mo ʻiloʻi ʻoku ʻofaʻi au ʻe Sihova.”

14. Ko e hā ʻoku tau ʻilo mei he hokosia ʻa Ida?

¹⁴ ʻOku lahi tatau maʻu pē ʻa e pā ʻa ha sōtia. Kae hangē ko ia kuo tau ʻilo mei he hokosia ʻa Ida, ʻoku ʻikai ke pehē ʻa ʻetau tuí. Ko ʻetau tuí ʻoku lava ke tupu pe holo, hoko ʻo mālohi ange pe vaivai ange. Ko e fili pē ia ʻatautolu. (Māt. 14:31; 2 Tes. 1:3) Ke maluʻi kitautolu ʻe heʻetau ‘pā ko e tuí,’ kuo pau ke tau hanganaki ʻai ia ke lahi ange mo mālohi ange!

15, 16. ʻOku anga-fēfē ʻa e hangē ʻa ʻetau ʻamanakí ko ha tataá?

¹⁵ Lau ʻa e ʻEfesō 6:17. Naʻe tui ʻe ha sōtia Loma ha tatā ke maluʻi ʻa hono ʻulú, kiá, mo e matá. ʻI he taimi ʻe niʻihi naʻe ʻi ai ha meʻa ʻi he tataá koeʻuhi ke lava ʻo toʻotoʻo ia ʻe he sōtiá.

¹⁶ Hangē pē ko hono maluʻi ʻe ha tatā ʻa e ʻuto ʻo ha sōtia, ko ʻetau “ʻamanaki ʻo e fakamoʻuí” ʻokú ne maluʻi ʻetau fakakaukaú. (1 Tes. 5:8; Pal. 3:21) ʻOku tokoniʻi kitautolu ʻe he ʻamanakí ke tau tokangataha ki he ngaahi talaʻofa ʻa e ʻOtuá pea ʻoua ʻe loto-siʻi koeʻuhi ko ʻetau ngaahi palopalemá. (Saame 27:1, 14; Ngā. 24:15) Ka ʻo kapau ʻoku tau loto ke maluʻi kitautolu ʻe heʻetau ʻamanakí, kuo pau ke moʻoni ia kiate kitautolu. Kuo pau ke tau tui hotau ‘tataá,’ ʻo ʻikai ke toʻotoʻo ia!

17, 18. (a) ʻOku lava fēfē ke kākaaʻi kitautolu ʻe Sētane ke ʻoua te tau tui hotau tataá? (e) ʻE lava fēfē ke tau fakamoʻoniʻi kuo ʻikai ke kākaaʻi kitautolu ʻe Sētane?

¹⁷ ʻE lava fēfē ke kākaaʻi kitautolu ʻe Sētane ke ʻoua te tau tui hotau tataá? Fakakaukau fekauʻaki mo e meʻa naʻá ne feinga ke fai kia Sīsuú. Naʻe ʻiloʻi ʻe Sētane ʻe hoko ʻa Sīsū ko e pule ʻo e faʻahinga ʻo e tangatá. Ka kuo pau ke ʻuluaki faingataʻaʻia pea pekia ʻa Sīsū. Pea ʻe pau ke ne tatali ke toki hoko ko e Tuʻi ʻi he taimi ʻa Sihová. Ko ia naʻe tuʻuaki ange ʻe Sētane kiate ia ʻa e faingamālie ke vave ange ai ʻene hoko ʻo pulé. Naʻe palōmesi ange ʻe Sētane kapau ʻe lotu tuʻo taha ange pē ʻa Sīsū, ʻe lava ke ne hoko ko e pule ʻo e māmaní ʻi he taimi pē ko iá. (Luke 4:5-7) ʻOku ʻiloʻi foki ʻe Sētane kuo talaʻofa mai ʻe Sihova te ne ʻomai kiate kitautolu ha ngaahi meʻa lelei ʻaupito ʻi he māmani foʻoú. Ka kuo pau ke tau tatali ke toki hoko moʻoni ʻa e talaʻofa ko ení, pea ʻi he lolotonga ní ʻoku lahi nai ai ʻetau ngaahi palopalemá. Ko ia ʻoku tuʻuaki mai ʻe Sētane ha faingamālie ke tau maʻu ha moʻui fiemālie he taimí ni. ʻOkú ne loto ke tau fakamuʻomuʻa ʻetau fiemālié pea toki fika ua ʻa e Puleʻanga ʻo e ʻOtuá.​—Māt. 6:31-33.

¹⁸ Kuo ʻikai lava ke kākaaʻi ʻe Sētane ʻa e toʻutupu Kalisitiane tokolahi. Ko e fakatātaá, ʻoku pehē ʻe Kiana, ʻa ia ʻokú ne taʻu 20: “ʻOku ou ʻiloʻi ko e ʻamanakiʻanga pē ʻe taha ki hono solova ʻa e kotoa ʻo ʻetau ngaahi palopalemá ko e Puleʻanga ʻo e ʻOtuá.” ʻOku anga-fēfē hono tākiekina ʻe heʻene ʻamanakí ʻa e anga ʻo ʻene fakakaukaú mo ʻene founga moʻuí? ʻOku tokoniʻi ai ia ke ne manatuʻi ko e ngaahi meʻa ʻi he māmani ko ení ʻoku fakataimi pē. ʻI he ʻikai tāfataha ʻene ngaahi feingá ki hono maʻu ha ngāue ʻi he fokotuʻutuʻu ko ení, ʻoku ngāueʻaki ʻe Kiana ʻa hono taimí mo e iví ke ngāue maʻa Sihova.

19, 20. ʻE lava fēfē ke tau hoko ʻo toe pōtoʻi ange ʻi hono ngāueʻaki ʻa e Folofola ʻa e ʻOtuá?

¹⁹ Naʻe ngāueʻaki ʻe he kau sōtia Lomá ʻa e ngaahi heletā ʻa ia naʻe senitimita nai ʻe 50 (ʻinisi ʻe 20) hono lōloá. Ko e kau sōtia ko iá naʻa nau pōtoʻi ʻaupito ʻi hono ngāueʻaki ʻenau heletaá he naʻa nau ako ki hono ngāueʻaki iá ʻi he ʻaho kotoa pē.

²⁰ Naʻe pehē ʻe he ʻapositolo ko Paulá ko e Folofola ʻa e ʻOtuá ʻoku hangē ko ha heletaá. Kuo ʻomai ia ʻe Sihova kiate kitautolu. Ka kuo pau ke tau ako ke ngāueʻaki pōtoʻi ia ʻi hono taukapoʻi ʻetau tuí pe fakatonutonu ʻa e anga ʻo ʻetau fakakaukaú. (2 Kol. 10:4, 5; 2 Tīm. 2:15) ʻE lava fēfē ke ke fakaleleiʻi hoʻo pōtoʻí? ʻOku pehē ʻe Sebastian, ʻa ia ʻokú ne taʻu 21: “Kuó u tohiʻi ʻa e foʻi veesi ʻe taha mei he vahe kotoa pē ʻi heʻeku lau Tohi Tapú. ʻOku ou tānaki ha lisi ʻo ʻeku ngaahi veesi manakó.” ʻOku tokoniʻi ia ʻe he meʻá ni ke ne mahinoʻi lelei ange ʻa e anga ʻo e fakakaukau ʻa Sihová. ʻOku toe pehē ʻe Daniel: “ʻI heʻeku fai ʻeku lau Tohi Tapú, ʻoku ou filifili ʻa e ngaahi veesi ʻoku ou tui ʻe tokoni ki he kakai te u fetaulaki mo ia ʻi he ngāue fakafaifekaú. Kuó u ʻiloʻi ʻoku lelei ʻa e fakafeangai ʻa e kakaí ʻi heʻenau sio mai ʻokú ke loto-māfana fekauʻaki mo e Tohi Tapú pea ʻokú ke fai hoʻo lelei tahá ke tokoniʻi kinautolu.”

21. Ko e hā ʻoku ʻikai totonu ai ke tau ilifia ʻia Sētane mo e fanga tēmenioó?

²¹ ʻI heʻetau ako mei he ngaahi faʻifaʻitakiʻanga ʻa e toʻutupu ʻi he kupu ko ení, ʻoku ʻikai fiemaʻu ke tau ilifia ʻia Sētane mo e fanga tēmenioó. Ko e moʻoni ʻoku nau mālohi, ka ʻoku ʻikai ke nau mālohi ange ʻia Sihova. Pea heʻikai te nau moʻui taʻengata. ʻE tuku pilīsone kinautolu pea heʻikai malava ke nau fai ha kovi ki ha taha pē lolotonga ʻa e Pule Taʻu ʻe Taha Afe ʻa Kalaisí, pea ʻi he hili iá ʻe fakaʻauha kinautolu. (Fkh. 20:1-3, 7-10) ʻOku tau ʻiloʻi hotau filí, ko ʻene ngaahi kākaá, mo ʻene taumuʻá. ʻI he tokoni ʻa Sihová, ʻe lava ke tau tuʻu maʻu ʻo fakafepakiʻi ia!