Kumi ki he Ngaahi Koloa ʻOku Moʻoní

1, 2. ʻI he fokotuʻutuʻu lolotonga ko ení, ko e hā ʻe ʻi ai maʻu ai pē ha kakai masivá?

ʻI HE ʻahó ni, ko e fokotuʻutuʻu fakaʻekonōmiká ʻoku ʻi he tuʻunga fakamamahi mo ʻikai ha vahevahe tatau. Ko e fakatātaá, ʻoku faingataʻa ke maʻu ha ngāue ʻa e toʻutupu tokolahi. ʻOku ʻai ʻe he kakai ʻe niʻihi ke ʻi ha tuʻunga fakatuʻutāmaki ʻenau moʻuí ʻi heʻenau hiki ki he ngaahi fonua tuʻumālié. Pea naʻa mo e ngaahi fonua tuʻumālié, ʻoku tokolahi ai ʻa e kakai masivá. ʻI he māmaní takatakai, ʻoku ʻalu ke toe koloaʻia ange ʻa e kakai koloaʻiá lolotonga ia ʻoku ʻalu ke toe masiva ange ʻa e kakai masivá. Fakatatau ki he fakafuofua ki muí ni mai, ko e pēseti ʻe 1 ʻo e kakai koloaʻia tahá ʻoku nau maʻu ʻa e paʻanga lahi tatau mo hono fakatahaʻi ʻo e paʻanga ʻoku maʻu ʻe he pēseti ʻe 99 ʻo e kakai kehé. ʻOku hā mahino, lolotonga ʻoku maʻu ʻe he kakai ʻe niʻihi ʻa e paʻanga lahi fau ke tolonga ai ʻa e vahaʻa taimi kotoa ʻo ʻenau moʻuí ʻo tā tuʻo lahi, ko e laui piliona kehé ʻoku nau masiva ʻaupito. Naʻe ʻiloʻi eni ʻe Sīsū ʻi heʻene pehē: “ʻOku ʻiate kimoutolu maʻu pē ʻa e kau masivá.” (Mk. 14:7) Ko e hā ʻoku hoko ai ʻa e ʻikai ha vahevahe tatau peheé?

² Naʻe ʻiloʻi ʻe Sīsū ko e Puleʻanga pē ʻo e ʻOtuá ʻe lava ke ne liliu ʻa e fokotuʻutuʻu fakakomēsiale ʻo e māmani ko ení. ʻOku fakahaaʻi ʻe he Tohi Tapú ‘ko e kau mēsianití,’ pe ko e fokotuʻutuʻu fakakomēsialé, fakataha mo e fokotuʻutuʻu fakapolitikalé mo fakalotú, ko e konga ia ʻo e māmani ʻo Sētané. (Fkh. 18:3) ʻOku malava ke mavahe fakaʻaufuli ʻa e kakai ʻa e ʻOtuá mei he ngaahi meʻa fakapolitikalé pea mo e lotu loí. Kae kehe, ko e tokolahi taha ʻo e kakai ʻa e ʻOtuá heʻikai lava ke nau mavahe fakaʻaufili mei he konga fakakomēsiale ʻo e māmani ʻo Sētané.

 3. Ko e hā ʻa e ngaahi fehuʻi te tau lāulea ki aí?

³ ʻI he tuʻunga ko e kau Kalisitiané, ʻoku fiemaʻu ke tau sivisiviʻi ʻetau fakakaukau ki he fokotuʻutuʻu fakakomēsiale ʻa e māmaní. Ke fai iá, ʻe lava ke tau ʻeke hifo kiate kitautolu: ‘ʻE lava fēfē ke u ngāueʻaki ʻeku ngaahi meʻa fakamatelié ke fakahaaʻi ai ʻoku ou faitōnunga ki he ʻOtuá? ʻE lava fēfē ke fakasiʻisiʻi ʻeku kaunga ki he māmani fakakomēsialé? Ko e hā ʻa e ngaahi hokosia ʻoku fakahaaʻi ai ʻoku falala kakato he ʻahó ni ʻa e kakai ʻa e ʻOtuá kiate ia?’

4, 5. (a) Ko e hā naʻe hoko ki he tamaioʻeiki ʻi he talanoa ʻa Sīsuú? (e) Ko e hā naʻe tala ʻe Sīsū ki hono kau muimuí ke nau faí?

⁴ Lau ʻa e Luke 16:1-9. Ko e talanoa ʻa Sīsū fekauʻaki mo e tamaioʻeiki taʻemāʻoniʻoní ʻoku totonu ke ne ʻai kitautolu kotoa ke tau kiʻi tuʻu hifo ʻo fakakaukau. Naʻe tukuakiʻi ʻa e tamaioʻeikí ki heʻene tolovekaʻaki ʻa e koloá, pea naʻe fakapapauʻi ʻe hono ʻeikí ke tuli ia.a (Sio ki he fakamatala ʻi lalo.) Ka naʻe ngāueʻaki ʻe he tamaioʻeikí ʻa e “poto ʻaonga.” Ki muʻa ke ne mavahe mei heʻene ngāué, naʻá ne kumi ha ngaahi kaungāmeʻa ʻe malava ke nau tokoni kiate ia ʻamui ange. Naʻe ʻikai ke fai ʻe Sīsū ʻa e talanoá ni ko haʻane loto ke ngāue ʻene kau ākongá ʻi ha founga taʻemāʻoniʻoni ke nau moʻui ai. Ko e meʻa ia ʻoku fai ʻe he kakai ʻo e māmani ko ení. ʻI hono kehé, naʻe ngāueʻaki ʻe Sīsū ʻa e talanoá ke akoʻi kiate kitautolu ha lēsoni mātuʻaki mahuʻinga.

⁵ Naʻe ʻiloʻi ʻe Sīsū ʻi he hangē ko e tamaioʻeiki naʻe fakafokifā ʻene ʻi ha tuʻunga faingataʻá, ko e tokolahi taha ʻo hono kau muimuí te nau ʻilo ʻoku faingataʻa ʻaupito ke maʻu ha moʻui ʻi he māmani taʻefaitotonu ko ení. Ko ia naʻá ne tala ange kiate kinautolu: “Mou kumi ha ngaahi kaungāmeʻa ʻaki ʻa e ngaahi koloa taʻemāʻoniʻoní.” Ko e hā hono ʻuhingá? Koʻeuhí ʻi he taimi ʻe kaʻanga ai ʻa e ngaahi koloa peheé, ko e kaungāmeʻa ko iá, ʻa Sihova mo Sīsū, te na “tali kimoutolu ki he ngaahi nofoʻanga taʻengatá.” Ko e hā ʻoku lava ke tau ako mei he faleʻi ʻa Sīsuú?

 6. ʻOku tau ʻilo fēfē ko e fokotuʻutuʻu fakakomēsiale ʻi he ʻaho ní naʻe ʻikai ko ha konga ia ʻo e taumuʻa ʻa e ʻOtuá?

⁶ Neongo ʻoku ʻikai ke fakamatalaʻi ʻe Sīsū ia ʻa e ʻuhinga ʻokú ne pehē ai ʻoku ‘taʻemāʻoniʻoni’ ʻa e ngaahi meʻa fakamatelié, ʻoku fakamahinoʻi ʻe he Tohi Tapú ko e tānaki ha paʻanga lahi mei he ngaahi meʻá naʻe ʻikai ko ha konga ia ʻo e taumuʻa ʻa e ʻOtuá. Ko e fakatātaá, naʻe foaki taʻetotongi ʻe Sihova kia ʻĀtama mo ʻIvi ʻa e meʻa lahi ange ʻi he meʻa naʻá na fiemaʻú ʻi he ngoue ʻo ʻĪtení. (Sēn. 2:15, 16) Ki mui ai, ʻi he foaki ʻe he ʻOtuá ʻa hono laumālie māʻoniʻoní ki heʻene kau paní, “naʻe ʻikai naʻa mo ha taha ʻo kinautolu naʻá ne pehē, ko ha meʻa pē ʻokú ne maʻu ko e meʻa pē ia ʻaʻana, ka naʻa nau fevahevaheʻaki ʻa e meʻa kotoa pē.” (Ngā. 4:32) Naʻe pehē ʻe he palōfita ko ʻAiseá ʻe ʻi ai ʻa e taimi ʻe maʻu taʻetotongi ai ʻe he faʻahinga kotoa ʻo e tangatá ha meʻa pē ʻoku ʻomai ʻe he māmaní. (ʻAi. 25:6-9; 65:21, 22) Ka ʻi he teʻeki ai ke hoko mai ʻa e taimi ko iá, ʻe fiemaʻu ʻe he kau muimui ʻo Sīsuú ha “poto ʻaonga.” ʻE fiemaʻu ke nau ngāue ke maʻu haʻanau moʻui ʻo ngāueʻaki ʻa e ngaahi meʻa fakamatelie ʻo e māmani ko ení, pea ʻi he taimi tatau, te nau toe feinga foki ke fakahōifuaʻi ʻa e ʻOtuá.

 7. Ko e hā ʻa e faleʻi naʻe ʻomai ʻe Sīsū ʻi he Luke 16:10-13?

⁷ Lau ʻa e Luke 16:10-13. Ko e tamaioʻeiki ʻi he talanoa ʻa Sīsuú naʻá ne kumi ha ngaahi kaungāmeʻa ke ʻaonga kiate ia. Kae kehe, naʻe loto ʻa Sīsū ke kumi ʻe hono kau muimuí ha ngaahi kaungāmeʻa ʻi hēvani ʻi ha ngaahi taʻumuʻa taʻesiokita. Naʻá ne loto ke tau mahinoʻi ko e founga ʻo ʻetau ngāueʻaki ʻa ʻetau koloa taʻemāʻoniʻoní ʻe lava ke fakahaaʻi ai pe ʻoku tau faitōnunga ki he ʻOtuá. ʻE lava fēfē ke tau fai iá?

8, 9. ʻOmai ha ngaahi fakatātā ʻo e anga hono fakahāhā ʻe he niʻihi ʻa e faitōnunga ʻi heʻenau ngāueʻaki ʻenau ngaahi koloa taʻemāʻoniʻoní.

⁸ Ko e founga ʻe taha ke fakamoʻoniʻi ai ʻoku tau faitōnunga ʻi heʻetau ngaahi meʻa fakamatelié ko hono fai ha tokoni ki he ngāue fakamalanga ʻi māmani lahi ʻa ia naʻe tomuʻa tala ʻe Sīsū ʻe hoko ia. (Mātiu 24:14) Naʻe tauhi ʻe he kiʻi taʻahine ʻi ʻInitia ha kiʻi puha paʻanga peá ne tātānaki ai ha ngaahi koini. Naʻe aʻu ʻo ikai te ne toe fakatau meʻavaʻinga kae tātānaki ʻene koiní. ʻI he fonu ʻa e puhá, naʻá ne tokoni ʻaki ʻa e paʻanga kotoa naʻá ne tānakí ke ngāueʻaki ki he ngāue fakamalangá. Ko ha tokoua ʻi ʻInitia naʻe lahi ʻa e ʻulu niu ʻi heʻene ngoué. Naʻe lahi ʻaupito ʻa e niu naʻá ne foaki ki he ʻōfisi liliu lea tuʻu mavahe faka-Maleialamá. Koeʻuhi ko e fiemaʻu ʻe he ʻōfisí ke nau fakatau mai ha niú, naʻá ne ongoʻi ko ʻene tokoní ʻoku mahuʻinga ange ia ʻi haʻane foaki ha paʻanga. Ko e ‘poto ʻaongá’ ia. ʻI ha founga meimei tatau, ko e fanga tokoua ʻi Kalisí ʻoku nau fai maʻu pē ha tokoni ki he fāmili Pētelí ʻaki hono ʻave ki ai ha lolo ʻōlive, siisi, mo e ngaahi meʻakai kehe.

⁹ Ko e tokoua ʻe taha kuó ne fakafaingamālieʻi ʻa hono konga ʻapi mo e fale ʻi Suli Langikā ki he ngaahi fakatahá mo e ngaahi ʻasemipilií pea ke nofo ai ʻa e kau sevāniti taimi-kakató. Ko ha feilaulau fakapaʻanga ia ki he tokouá, ka ko ha tokoni lahi ia ki he kau malanga ʻi aí, ʻa ē ʻoku ʻikai lahi ʻenau paʻangá. ʻI ha fonua ʻa ia ʻoku fakangatangata ai ʻa e ngāué, ʻoku ngāueʻaki ʻe he fanga tokouá honau ngaahi ʻapí ko e ngaahi Fale Fakatahaʻanga. ʻOku fakaʻatā ai ʻa e kau tāimuʻa mo e niʻihi kehe ʻoku ʻikai ke lahi ʻenau paʻangá ke nau maʻu ha feituʻu faiʻanga fakataha ʻo ʻikai fiemaʻu ke totongi ha holo.

10. Ko e hā ʻa e ngaahi ʻaonga ʻoku tau maʻu ʻi heʻetau foaki nima-homó?

¹⁰ Ko e ngaahi fakatātā peheé ʻoku fakahaaʻi ai ko e kakai ʻa e ʻOtuá ʻoku nau “anga-tonu ʻi he meʻa ʻoku siʻí.” (Luke 16:10) ʻOku nau ngāueʻaki ʻenau ngaahi meʻa fakamatelié ke maʻu ʻaonga mei ai ʻa e niʻihi kehé. ʻOku fēfē ʻa e ongoʻi ʻa e ngaahi kaumeʻa ko ia ʻo Sihová fekauʻaki mo hono fai ʻa e ngaahi feilaulau peheé? ʻOku nau fiefia ʻaupito ʻi hono ʻiloʻi ʻi he taimi ʻoku nau nima-homo aí, ʻoku nau maʻu ai ʻa e ngaahi koloa “moʻoní” ʻi hēvani. (Luke 16:11) ʻOku pehē ʻe ha tuofefine ʻe taha ʻoku tokoni fakapaʻanga maʻu pē ki he ngāue ʻo e Puleʻangá, kuo hoko ha meʻa makehe kiate ia ʻi he faai mai ʻa e ngaahi taʻú. Ko ʻene fakamatalá eni: “ʻOku ou ʻiloʻi ko e lahi ange ʻeku nima-homo ʻi he meʻa fakamatelié, ko e lahi ange ia ʻeku fakakaukau ke nima-homo ki he niʻihi kehé. ʻOku ou nima-homo ange ʻi he hoko ʻo fakamolemolé, ʻi he kātakiʻi ʻa e niʻihi kehé, pea ʻi he malava ke tali ʻa e fakalotomamahí mo e akonakí.” Kuo ʻilo ʻe he tokolahi ʻoku ʻaonga fakafoʻituitui kiate kinautolu ʻa e nima-homó.—Saame 112:5; Pal. 22:9.

11. (a) ʻOku fakahaaʻi fēfē ʻi heʻetau nima-homó ʻa e “poto ʻaonga”? (e) Ko e hā ʻoku hoko ʻi he lotolotonga ʻo e kakai ʻa e ʻOtuá he ʻaho ní? (Sio ki he ʻuluaki fakatātā ʻi he kupú ni.)

¹¹ ʻOku tau toe fakahāhā ʻa e “poto ʻaonga” ʻi heʻetau ngāueʻaki ʻetau ngaahi meʻa fakamatelié ke poupouʻiʻaki ʻa e niʻihi kehé ʻi he ngāue fakafaifekaú. Pea neongo kapau heʻikai lava ke tau ngāue taimi-kakato pe hiki ki he feituʻu ʻoku lahi ange ai ʻa e fiemaʻú, te tau kei malava pē ke hoko ʻo ʻaonga ki he niʻihi kehé. (Pal. 19:17) Ko e fakatātaá, ʻoku tokoni ʻetau ngaahi meʻaʻofá ke tokonaki mai ai ʻa e ʻū tohí pea poupouʻi ʻa e ngāue fakamalangá ʻi he ngaahi feituʻu masiva ʻaupito ʻa ia ʻoku tokolahi ai ʻa e faʻahinga ʻoku haʻu ki he moʻoní. ʻI he ngaahi fonua hangē ko Kongo, Luanitā, mo Matakesikaá, ʻoku lava ke mamafa ʻaupito ai ʻa e Tohi Tapú. ʻI he taimi ʻe niʻihi ʻoku totongi mamafa tatau ha Tohi Tapu mo ha vāhenga ʻi ha uike pe māhina. ʻI he laui taʻu, naʻe pau ke fili hotau fanga tokouá pe te nau fakatau ha meʻakai maʻa honau fāmilí pe ko hono fakatau mai ha Tohi Tapu. ʻI he taimí ni, koeʻuhi ko e ngaahi tokoni ʻa e niʻihi kehé mo e “vahevahe tatau” ʻo e paʻangá, ʻoku liliu ai pea tufaki taʻetotongi ʻa e Tohi Tapú ʻe he kautaha ʻa Sihová ki he mēmipa taki taha ʻo e fāmilí pea pehē foki ki he kau ako Tohi Tapú. (Lau ʻa e 2 Kolinitō 8:13-15.) Ko ia ʻe lava fakatouʻosi ke hoko ko e ngaahi kaumeʻa ʻo Sihova ʻa e faʻahinga ʻoku nau fai ʻa e foakí mo e faʻahinga ʻoku nau maʻu ʻa e foakí.

12. Naʻe anga-fēfē hono fakahaaʻi ʻe ʻĒpalahame naʻá ne falala ki he ʻOtuá?

¹² ʻOku toe lava foki ke tau hoko ko e ngaahi kaumeʻa ʻo Sihova ʻi he fakasiʻisiʻi ʻetau kaunga ki he māmani fakakomēsialé pea kumi ki he ngaahi koloa “moʻoní.” Ko e meʻa ia naʻe fai ʻe he tangata faitōnunga ko ʻĒpalahamé. Naʻá ne talangofua kia Sihova pea liʻaki ʻa e kolo tuʻumālie lahi ko ʻUá ka ne nofo tēniti he naʻá ne loto ke hoko ko e kaumeʻa ʻo Sihova. (Hep. 11:8-10) Naʻá ne falala maʻu pē ki he ʻOtuá kae ʻikai ko e ngaahi meʻa fakamatelié. (Sēn. 14:22, 23) Naʻe fakalototoʻaʻi ʻe Sīsū ʻa e niʻihi kehé ke nau faʻifaʻitaki ki he faʻahinga tui ko iá. ʻI he taimi ʻe taha, naʻá ne tala ange ai ki ha talavou koloaʻia: “Kapau ʻokú ke fie haohaoa, ʻalu ʻo fakatau atu hoʻo ngaahi koloá pea foaki ia ki he masivá, pea te ke maʻu ai ha koloa ʻi hēvani; peá ke haʻu ʻo muimui ʻiate au.” (Māt. 19:21) Ko e talavou ko iá naʻe ʻikai te ne maʻu ʻa e tui hangē ko ia naʻe maʻu ʻe ʻĒpalahamé. Ka naʻe ʻi ai ʻa e kakai kehe naʻa nau falala ki he ʻOtuá.

13. (a) Ko e hā ʻa e faleʻi naʻe fai ʻe Paula kia Tīmoté? (e) ʻE lava fēfē ke tau ngāueʻaki ʻa e faleʻi ʻa Paulá ʻi he ʻahó ni?

¹³ Ko Tīmoté ko ha tangata ia ʻo e tuí. ʻI he hili hono ui ʻa Tīmote “ko ha sōtia lelei ʻa Kalaisi Sīsuú,” naʻe tala ange ʻe Paula kiate ia: “ʻOku ʻikai ha tangata ʻoku ngāue ko ha sōtia te ne fakakau ia ʻi he ngaahi meʻa fakapisinisí, koeʻuhí ke ne maʻu ai ʻa e hōhōʻia ʻa e tokotaha ko ia naʻá ne fakahū ia ke hoko ko ha sōtiá.” (2 Tīm. 2:3, 4) Ko e kau muimui ʻo Sīsū he ʻaho ní, ʻo kau ai ʻa e kau faifekau taimi-kakato laka hake he taha milioná, ʻoku nau fai ʻenau lelei tahá ʻi hono ngāueʻaki ʻa e faleʻi ʻa Paulá. ʻOku nau talitekeʻi ʻa e ngaahi tuʻuaki fakatauele ʻa e māmani mānumanu ko ení. ʻOku nau manatuʻi ʻa e tefitoʻi moʻoni: “Ko e tokotaha noó ko ha tamaioʻeiki ia ki he tokotaha tali noó.” (Pal. 22:7) ʻOku fiemaʻu ʻe Sētane ke tau fakamoleki ʻa e kotoa ʻo hotau taimí mo e iví ʻi he ngāue ki heʻene māmani fakakomēsialé. ʻOku lahi ʻa e ngaahi fuʻu nō ke tā ʻe he niʻihi koeʻuhi ko ha ʻapi, kā, ako, pe naʻa mo ha mali. Kapau heʻikai ke tau tokanga, te tau iku ʻo tā moʻua nai ai ʻi he ngaahi taʻu lahi. ʻOku tau fakahaaʻi ʻa e poto ʻaongá ʻi he taimi ʻoku tau fakafaingofuaʻi ai ʻetau moʻuí, fakaʻehiʻehi mei he moʻuá, pea fakasiʻisiʻi ʻa e fakamolé. ʻI he founga ko iá te tau ʻataʻatā ai ke tauhi ki he ʻOtuá kae ʻikai ngāue fakatamaioʻeiki ki he fokotuʻutuʻu fakakomēsiale ʻo e ʻaho ní.—1 Tīm. 6:10.

14. Ko e hā kuo pau ke tau fakapapauʻi ke faí? ʻOmai ha ongo fakatātā.

¹⁴ Ke tauhi ke faingofua ʻetau moʻuí, kuo pau ke tau fakamuʻomuʻa ʻa e Puleʻanga ʻo e ʻOtuá. Ko e husepāniti mo e uaifi ʻe taha naʻá na maʻu ha fuʻu pisinisi naʻe tupu lahi. Kae kehe, naʻá na loto ke toe foki ki he ngāue fakafaifekau taimi-kakató. Ko ia naʻe fakatau atu ai ʻe he ongo meʻá ni ʻena pisinisí, ko hona vaká, mo e ngaahi meʻa fakamatelie kehe. Naʻá na pole leva ke tokoni ʻi he langa ʻo e ʻuluʻiʻapitanga ʻi he māmaní ʻi Warwick, Niu ʻIoke. Naʻe makehe ʻaupito ʻa e meʻá ni kiate kinaua koeʻuhí naʻe ʻuhinga iá te na ngāue ʻi Pēteli mo hona ʻofefiné mo e foha-ʻi-he-fonó, pea ʻi ha ngaahi uike mo e ongo mātuʻa ʻa e husepānití, ʻa ia naʻá na ngāue foki mo kinaua ʻi he langa ʻi Warwick. Naʻe maʻu ʻe ha tuofefine tāimuʻa ʻi Colorado, ʻAmelika, ha ngāue konga taimi ʻi ha pangikē. Naʻe leleiʻia ʻaupito ʻa hono kau pule ngāué ʻi heʻene ngāué ʻo tuʻuaki ange kiate ia ha lakanga taimi-kakato ʻo liunga tolu ʻene vahé. Kae kehe, koeʻuhi ʻe ʻikai fakaʻatā ia ʻe he ngāué ke ne tokangataha ki he ngāue fakafaifekaú, naʻe ʻikai te ne tali ʻa e tuʻuaki fakatauele ko ení. Ko e ngaahi fakatātā siʻi pē eni ʻo e ngaahi feilaulau lahi kuo fai ʻe he kau sevāniti ʻa Sihová. ʻI heʻetau fakapapauʻi ke fakamuʻomuʻa ʻa e ngaahi meʻa ʻo e Puleʻangá, ʻoku fakahaaʻi ai ʻoku tau fakamahuʻingaʻi ʻa e kaumeʻa mo e ʻOtuá pea mo e ngaahi koloa moʻoní ʻo laka ange ia ʻi he ngaahi meʻa fakamatelié.

15. Ko e hā ʻa e koloa ʻokú ne ʻomai ʻa e fiemālie lahi tahá?

¹⁵ Ko hono maʻu ʻa e koloa fakamatelié ʻoku ʻikai ʻaupito ʻuhinga iá ʻoku tau maʻu ʻa e hōifua ʻa e ʻOtuá. ʻOku tāpuakiʻi ʻe Sihova ʻa e faʻahinga ʻoku nau ‘hulu atu ʻi he ngaahi ngāue leleí.’ (Lau ʻa e 1 Tīmote 6:17-19.) Ko e fakatātaá, naʻe ʻiloʻi ʻe ha tuofefine ko Lucia naʻe fiemaʻu ha kau faifekau ki ʻAlipēnia. Ko ia naʻá ne hiki mei ʻĪtali ki ai ʻi he 1993. Naʻe ʻikai haʻane ngāue ka naʻá ne falala ʻe tokonaki ʻa Sihova maʻana. Naʻá ne ako ʻa e lea faka-ʻAlipēniá pea kuó ne tokoniʻi ʻa e kakai ʻe toko 60 tupu ke nau fai ha fakatapui. ʻOku ʻikai nai ke tau maʻu ʻa e ngaahi ola tatau mei he malanga ʻi hotau feituʻu ngāué. Ka ko ha meʻa pē ʻoku tau fai ke tokoniʻi ʻa e niʻihi kehé ke nau ako fekauʻaki mo Sihova pea hoko ko hono kaumeʻá te tau koloaʻaki ʻa e meʻa ko iá ʻo taʻengata.—Māt. 6:20.

16. (a) Ko e hā ʻe hoko ki he fokotuʻutuʻu fakakomēsiale ʻo e ʻaho ní? (e) ʻOku totonu ke kaunga fēfē ia ki heʻetau vakai ki he ngaahi meʻa fakamatelié?

¹⁶ Naʻe fakamahinoʻi ʻe Sīsū ʻe ngata ʻa e fokotuʻutuʻu fakakomēsiale ʻi he ʻaho ní. Naʻá ne pehē: ‘ʻI he taimi ʻe kaʻanga ai ʻa e ngaahi koloa fakamatelie ko iá’, ʻo ʻikai ko e pehē ‘kapau ʻe kaʻanga.’ (Luke 16:9) ʻI he ngaahi ʻaho fakaʻosi ko ení, kuo kaʻanga ʻa e ngaahi pangikē ʻe niʻihi pea ko e ngaahi fonua ʻe niʻihi kuo hoko ai ha ngaahi palopalema fakaʻekonōmika mafatukituki. Ka ʻi he kahaʻu ofi maí, ʻe hoko ai ʻa e ngaahi meʻá ʻo toe kovi ange. ʻE kaʻanga ʻa e fokotuʻutuʻu fakapolitikale, fakalotu, mo fakakomēsiale ʻa ia ko e konga ʻo e fokotuʻutuʻu ʻa Sētané. Naʻe tomuʻa tala ʻe he ongo palōfita ko ʻIsikeli mo Sēfanaiá ko e koulá mo e silivá, ʻa ia ʻoku mahuʻinga maʻu pē ki he fokotuʻutuʻu fakakomēsialé, ʻe hoko ʻo taʻeʻaonga. (ʻIsi. 7:19; Sēf. 1:18) ʻE fēfē ʻetau ongoʻí kapau te tau aʻu ki he ngataʻanga ʻo ʻetau moʻui ʻi he māmani ko ení pea ʻiloʻi ai naʻa tau feilaulauʻi ʻa e ngaahi koloa moʻoní kae maʻu ʻa e ngaahi meʻa fakamatelie taʻemāʻoniʻoni ʻo e māmaní? Te tau ongoʻi nai ai ʻo hangē ko e tangata naʻá ne ngāue ʻi he kotoa ʻo ʻene moʻuí ke maʻu ha paʻanga lahi, ʻo ne toki ʻilo hake pē ko e paʻanga loi kotoa ia. (Pal. 18:11) Ko e ngaahi meʻa fakamatelie ʻi he māmani ko ení ʻe kaʻanga. Ko ia ʻoua ʻe tuku ke mole ʻa e faingamālie ke ngāueʻaki hoʻo ngaahi meʻa fakamatelié ke kumi ha ngaahi kaungāmeʻa ʻi hēvani. Ko e meʻa ʻoku tau fai maʻa Sihova mo hono Puleʻangá te ne ʻai kitautolu ke tau fiefia moʻoni.

17, 18. Ko e hā ʻoku fakatuʻamelie atu ki ai ʻa e ngaahi kaumeʻa ʻo e ʻOtuá?

¹⁷ ʻI he hoko mai ʻa e Puleʻanga ʻo e ʻOtuá, ʻe ʻikai pau ai ki ha taha ke totongi ʻene nofó pe kole nō. ʻE taʻetotongi ʻa e meʻakaí pea ʻe lahi fau, pea heʻikai fiemaʻu ke totongi ha kau toketā pe faitoʻo. ʻE maʻu ʻe he ngaahi kaumeʻa ʻo Sihová ʻa e lelei taha ʻi he ngaahi meʻa ʻe ʻomai ʻe he māmaní. ʻE ngāueʻaki ʻa e koulá, silivá, mo e maka koloá koeʻuhi ko ʻenau fakaʻofoʻofá, kae ʻikai ko e ʻai ke koloaʻia ai ha taha. Ko e ngaahi naunau tuʻunga lelei ʻo e papá, maká, mo e mētalé ʻe maʻu taʻetotongi ia ke langa ʻaki ha ngaahi ʻapi fakaʻofoʻofa. ʻE tokoniʻi kitautolu ʻe hotau ngaahi kaumeʻá koeʻuhí ʻoku nau loto ki ai, ʻo ʻikai koeʻuhí ko haʻatau totongiʻi kinautolu. Te tau vahevahe ʻa e ngaahi meʻa kotoa pē ʻe ʻomai ʻe he māmaní.

¹⁸ Ko e konga pē eni ʻo e pale mahuʻinga taʻehanotatau maʻá e faʻahinga ʻoku nau kumi ha ngaahi kaungāmeʻa ʻi hēvaní. Ko e kau lotu ʻa Sihova ʻi māmaní te nau kaila fiefia ʻi heʻenau fanongo ki he lea ʻa Sīsuú: “Haʻu, ʻa kimoutolu kuo tāpuekina ʻe heʻeku Tamaí, ʻo maʻu ʻa e Puleʻanga kuo teuteu maʻamoutolu talu mei he tanupou ʻo e māmaní.”—Māt. 25:34.