ʻOkú Ke Maʻu ʻa e Ngaahi Moʻoniʻi Meʻá?

1, 2. (a) Ko e hā ʻa e malava mahuʻinga ʻoku fiemaʻu ke tau fakatupulekiná, pea ko e hā hono ʻuhingá? (e) Ko e hā te tau lāulea ki ai ʻi he kupu ko ení?

ʻOKU fiemaʻu ke tau ʻiloʻi kotoa ʻa e founga ke fakamoʻoniʻi ai ha fakamatala pea ngāueʻaki ia ke aʻu ki ha ngaahi fakamulituku totonu. (Pal. 3:21-23; 8:4, 5) He ka ʻikai, ʻe faingofua ke mioʻi ʻe Sētane mo ʻene māmaní ʻa ʻetau fakakaukaú. (ʻEf. 5:6; Kol. 2:8) Ko e moʻoni, ke aʻu ki ha ngaahi fakamulituku totonu, kuo pau ke tau maʻu ʻa e ngaahi moʻoniʻi meʻá. ʻOku pehē ʻi he Palōveepi 18:13: “ʻI hono fai ʻe ha taha ha tali ki ha meʻa ki muʻa ke ne fanongo ki he ngaahi moʻoniʻi meʻá, ko e vale ia mo e meʻa fakamā.”

² ʻI he kupu ko ení, te tau sio ai ki he meʻa ʻe lava ke ne ʻai ke faingataʻa hono maʻu ʻa e ngaahi moʻoniʻi meʻá pea aʻu ki he ngaahi fakamulituku totonú. Te tau ako foki fekauʻaki mo e ngaahi tefitoʻi moʻoni mo e fakatātā Fakatohitapu ʻoku akoʻi mai ai ʻa e founga ke tau fakapapauʻi ai ʻa e fakamatalá.

 3. Ko e hā ʻoku fiemaʻu ai ke tau ngāueʻaki ʻa e tefitoʻi moʻoni Fakatohitapu ʻi he Palōveepi 14:15? (Sio ki he ʻuluaki fakatātā ʻi he kupú ni.)

³ ʻI he ʻahó ni, ʻoku haʻu ʻa e fakamatalá kiate kitautolu mei he tafaʻaki kotoa pē. ʻOku haʻu ia fakafou he ʻInitanetí, televīsoné, mo e mītiá. ʻOku tau toe maʻu nai ʻa e ngaahi ʻīmeili, pōpoaki he telefoní, mo e talanoa mei he ngaahi kaungāmeʻá. ʻI he taimi ʻe niʻihi ʻoku hā ngali ʻikai ha ngataʻanga ʻo e fakamatala kotoa ko ení. Ko ia ʻoku fiemaʻu ke tau tokanga. Ngalingali ʻoku maʻu ʻe hotau kaungāmeʻá ʻa e ngaahi taumuʻa lelei, ka ʻoku ʻi ai e kakai kehe ʻoku nau fakamafola ʻosi fakakaukauʻi ha fakamatala hala pe mioʻi ʻa e ngaahi moʻoniʻi meʻá. Ko e hā ʻa e tefitoʻi moʻoni Fakatohitapu ʻe lava ke ne tokoniʻi kitautolu ke tau fakapapauʻi ʻa e meʻa ʻoku tau fanongo ki aí? ʻOku pehē ʻi he Palōveepi 14:15: “Ko e tokotaha taʻefakapotopotó ʻokú ne tui ki he lea kotoa pē, ka ko e tokotaha fakapotopotó ʻokú ne fakakaukauʻi ʻene laka taki taha.”

 4. ʻE lava fēfē ke tokoniʻi kitautolu ʻe he Filipai 4:8, 9 ke filifili ʻa e meʻa ʻoku tau laú, pea ko e hā ʻoku mātuʻaki mahuʻinga ai ke maʻu ha fakamatala totonú? (Sio foki ki he puha “Meʻa ʻe Tokoni Ke Tau Maʻu Ai ʻa e Ngaahi Moʻoniʻi Meʻá.”)

⁴ Ke fai ha ngaahi fili lelei, ʻoku tau fiemaʻu ha ngaahi moʻoniʻi meʻa alafalalaʻanga. Ko ia ai, kuo pau ke tau tokanga ʻaupito ʻi heʻetau fili ʻa e meʻa ke laú. (Lau ʻa e Filipai 4:8, 9.) ʻOku ʻikai totonu ke tau fakamoleki noaʻia hotau taimí ʻi he sio ʻi he ongoongo taʻefalalaʻanga ʻi he saiti he ʻInitanetí pe lau ʻa e ngaahi ʻīmeili ʻoku fakamafola ai ha talanoa sasala. ʻOku mahuʻinga tautefito ke tau fakaʻehiʻehi mei he uepisaiti ʻoku pouaki ai ʻa e fakakaukau ʻa e kau tafoki ʻo fakafepaki ki he moʻoní. ʻOku nau loto ke fakavaivaiʻi ʻa e tui ʻa e kakai ʻa e ʻOtuá pea mioʻi ʻa e moʻoní. Ko e fakamatala taʻefalalaʻangá ʻoku iku ia ki he ngaahi fili kovi. ʻOua ʻaupito ʻe fakakaukau heʻikai ke uesia koe ʻe he fakamatala loí.​—1 Tīm. 6:20, 21.

 5. Ko e hā ʻa e talanoa loi naʻe fanongo ki ai ʻa e kau ʻIsilelí, pea naʻe anga-fēfē ʻene uesia kinautolú?

⁵ Ko e talanoa loí ʻe lava ke iku ia ki he ola fakalilifu. ʻI he taimi ʻo Mōsesé, naʻe ʻalu atu ai ha kau asiasi ʻe toko 12 ki he Fonua ʻo e Talaʻofá. Ne foki mai ʻa e kau asiasi ʻe toko 10 ʻo tala ha ngaahi meʻa ʻoku ʻikai lelei. (Nōm. 13:25-33) Naʻa nau mioʻi ʻa e ngaahi moʻoniʻi meʻá, pea naʻe hoko ai ʻa e kakai ʻa Sihová ʻo manavahē mo loto-siʻi. (Nōm. 14:1-4) Ko e hā naʻe peheni ai ʻa e fakafeangai ʻa e kakaí? Mahalo pē naʻa nau fakakaukau naʻe moʻoni ʻa e talanoá koeʻuhí ko e tokolahi taha ʻo e kau asiasí ne nau tala ʻa e meʻa tatau. Ko ia naʻa nau fakafisi ke fanongo ki he ngaahi meʻa lelei naʻe tala ʻe he ongo asiasi ʻe toko uá fekauʻaki mo e Fonua ʻo e Talaʻofá. (Nōm. 14:6-10) ʻI he ʻikai ke maʻu ʻa e ngaahi moʻoniʻi meʻá pea falala kia Sihová, naʻe fili fakavalevale ʻa e kakaí ke tui ki he talanoa ʻikai leleí.

 6. Ko e hā ʻoku ʻikai totonu ai ke tau ʻohovale ʻi heʻetau fanongo ʻi he ngaahi talanoa fakalilifu fekauʻaki mo e kakai ʻa Sihová?

⁶ ʻOku fiemaʻu ke tau tokanga tautefito ʻi he taimi ʻoku tau fanongo ai ki ha ngaahi talanoa fekauʻaki mo e kakai ʻa Sihová. Manatuʻi ko hotau fili ko Sētané ʻoku ui “ko e tokotaha ʻokú ne tukuakiʻi hotau fanga tokouá.” (Fkh. 12:10) Naʻe fakatokanga ʻa Sīsū ko e kau fakafepakí te nau leaʻaki ha “ngaahi loi kovi kehekehe” fekauʻaki mo kitautolu. (Māt. 5:11) Kapau te tau fakakaukau fakamātoato ki he fakatokanga ko iá, heʻikai ke tau ʻohovale ʻi heʻetau fanongo ʻi he ngaahi talanoa faikehe fekauʻaki mo e kakai ʻa Sihová.

 7. Ko e hā ʻoku totonu ke tau ʻeke hifo ki muʻa ke tau ʻave ha ʻīmeili pe ko ha pōpoaki he telefoní?

⁷ ʻOkú ke saiʻia he ʻīmeili mo e ʻave pōpoaki he telefoní ki ho ngaahi kaungāmeʻá? ʻI hoʻo sio ʻi ha talanoa mālie ʻi he ongoongó pe fanongo ʻi ha hokosia makehe, ʻokú ke ongoʻi ʻo hangē ko ha faiongoongo ʻokú ne loto ke vahevahe atu ia ʻi he taimi pē ko iá? Ki muʻa ke ke ʻīmeili pe ʻave pōpoaki he telefoní, ʻeke hifo: ‘ʻOku ou fakapapauʻi ʻoku moʻoni ʻa e talanoa ko ení? ʻOku ou maʻu kotoa ʻa e ngaahi moʻoniʻi meʻá?’ Kapau ʻoku ʻikai te ke fakapapauʻi, te ke fakamafola nai ai ha ngaahi loi. Ko ia kapau ʻoku ʻikai te ke ʻiloʻi pe ʻoku moʻoni ha talanoa, ʻoua ʻe ʻave iá. Tāmateʻi ia!

 8. Ko e hā kuo fai ʻe he kau fakafepakí ʻi he ngaahi fonua ʻe niʻihi, pea ʻe lava fēfē ke tau poupouʻi kinautolu taʻeʻilo ki ai?

⁸ ʻOku ʻi ai ha ʻuhinga ʻe taha ʻoku fakatuʻutāmaki ai ke toe ʻave takai taʻefakakaukauʻi ha ngaahi ʻīmeili pe pōpoaki he telefoní. ʻI he fonua ʻe niʻihi, ʻoku fakangatangata pe aʻu ʻo tapui ai ʻetau ngāué. Ko hotau kau fakafepaki ʻi he ngaahi fonua ko ení ʻoku nau fakamafola ʻosi fakakaukauʻi nai ha ngaahi talanoa kuo faʻufaʻu ke fakailifiaʻi ʻaki kitautolu pe ʻai ke tau tauʻaki huʻuhuʻu pē ʻiate kitautolu. Fakakaukau atu ki he meʻa naʻe hoko ʻi he Sovieti ʻIunioni ki muʻá. Ko e kau polisi fufū, ne ʻiloa ko e KGB, naʻa nau fakamafola ha ngaahi talanoa sasala ʻo pehē naʻe lavakiʻi ʻe ha fanga tokoua tuʻu-ki-muʻa ʻa e kakai ʻa Sihová.a (Sio ki he fakamatala ʻi lalo.) Ko e meʻa fakamamahí, naʻe tui ʻa e fanga tokoua tokolahi ki he ngaahi talanoa loí ni pea nau mavahe mei he kautaha ʻa Sihová. Ko e tokolahi ʻo kinautolu naʻa nau toe foki mai ki mui, ka naʻe ʻikai ʻaupito ke toe foki mai ʻa e niʻihi. Naʻa nau fakaʻatā ʻa e ngaahi talanoa loi ko iá ke ne fakaʻauha ʻenau tuí. (1 Tīm. 1:19) ʻE lava fēfē ke tau fakaʻehiʻehi mei ha fakatamaki pehē? Fakafisi ke fakamafola ʻa e ngaahi talanoa ʻikai leleí pe taʻefakapapauʻí. ʻOua ʻe tui ki he meʻa kotoa ʻokú ke fanongo ki aí. ʻI hono kehé, fakapapauʻi ʻokú ke maʻu ʻa e ngaahi moʻoniʻi meʻá.

 9. Ko e hā ha toe meʻa ʻokú ne ʻai ke faingataʻa hono maʻu ʻa e fakamatala totonú?

⁹ ʻOku tau fanongo ʻi he taimi ʻe niʻihi ki he ngaahi talanoa ʻoku moʻoni fakakonga pē. Ko e talanoa ʻe niʻihi ʻoku ʻikai ke ʻomai ai ʻa e kotoa ʻo e ngaahi moʻoniʻi meʻá. ʻOku ʻai ʻe he meʻá ni ke faingataʻa ʻa e aʻu ki ha ngaahi fakamulituku totonu. Heʻikai ʻaupito lava ke tau falala ki ha talanoa ʻoku moʻoni fakakonga pē! Ko e hā ʻe lava ke tau fai koeʻuhi ke ʻoua ʻe kākaaʻi kitautolu ʻe he ngaahi talanoa peheé?​—ʻEf. 4:14.

10. Ko e hā naʻe mei faitau ai ʻa e kau ʻIsileli ʻe niʻihi mo honau fanga tokouá, pea ko e hā naʻá ne tokoniʻi kinautolu ke fakaʻehiʻehi mei aí?

¹⁰ ʻOku lava ke tau ako mei he meʻa naʻe hoko ki he kau ʻIsileli naʻa nau nofo ʻi he tafaʻaki fakahihifo ʻo e Vaitafe Sioataní ʻi he ngaahi ʻaho ʻo Siosiuá. (Sios. 22:9-34) Naʻa nau fanongo naʻe langa ʻe he kau ʻIsileli ʻi he tafaʻaki fakahahake ʻo Sioataní ha fuʻu ʻōlita ofi ki he vaitafé. Ko e konga ko ia ʻo e talanoá naʻe moʻoni, ka naʻe ʻikai ko e talanoa kakató ia. Pea naʻe ʻai ai ke fakakaukau ʻa e kau ʻIsileli ʻi he tafaʻaki fakahihifó kuo angatuʻu kia Sihova ʻa honau fanga tokoua ʻi he tafaʻaki fakahahaké, ko ia naʻa nau fakatahataha ke kamata faitau mo kinautolu. (Lau ʻa e Siosiua 22:9-12.) Ka ki muʻa ke nau ʻohofí, naʻe fekauʻi atu ʻe he kau ʻIsileli mei he tafaʻaki fakahihifó ha kau tangata ke vakaiʻi ʻa e ngaahi moʻoniʻi meʻá. Ko e hā naʻe ʻilo ʻe he kau tangatá? Ko e kau ʻIsileli ʻi he tafaʻaki fakahahaké naʻe ʻikai te nau langa ʻa e ʻōlitá ke fai ai ha ngaahi feilaulau ki he ngaahi ʻotua loí. Ne nau langa ia ko ha fakamanatu ke ʻiloʻi ai ʻe he tokotaha kotoa ʻoku nau lotu kia Sihova. Kuo pau pē naʻe fiefia ʻa e kau ʻIsilelí ʻi he ʻikai te nau faitau mo honau fanga tokouá, ka nau vaheʻi ʻa e taimi ke maʻu ai ʻa e kotoa ʻo e ngaahi moʻoniʻi meʻá.

11. (a) Naʻe anga-fēfē ʻa e fakafeangai taʻetotonu kia Mefipōsetí? (e) Naʻe mei lava fēfē ke fakafeangai totonu ʻa Tēvita kia Mefipōseti?

¹¹ ʻE hoko mai nai ha taimi ʻa ia te tau mamahi fakafoʻituitui ai koeʻuhi ko hano fakamafola ʻe he kakaí ha ngaahi talanoa fekauʻaki mo kitautolu ʻa ia ʻoku moʻoni fakakonga pē. Ko e meʻa eni naʻe hoko kia Mefipōsetí. Naʻe foaki nima-homo ʻe Tuʻi Tēvita kia Mefipōseti ʻa e kelekele kotoa ʻa ʻene kui-tangata ko Saulá. (2 Sām. 9:6, 7) Ka ki mui ai naʻe fanongo ʻa Tēvita ʻi ha talanoa ʻikai lelei fekauʻaki mo Mefipōseti. Naʻe ʻikai te ne vakaiʻi pe naʻe moʻoni ʻa e talanoá, pea naʻá ne toʻo kotoa ʻa e koloa ʻa Mefipōsetí. (2 Sām. 16:1-4) ʻI he talanoa ki mui ʻa Tēvita mo iá, naʻe ʻiloʻi ai ʻe Tēvita naʻá ne fai ha fehālaaki. Naʻá ne fakafoki leva ha konga ʻo e koloá kia Mefipōseti. (2 Sām. 19:24-29) Kapau naʻe vaheʻi ʻe Tēvita ha taimi ke maʻu ai ʻa e ngaahi moʻoniʻi meʻá kae ʻikai fakafeangai fakavave ki he fakamatala fakakongá, ne ʻikai ʻaupito mei tofanga ai ʻa Mefipōseti ʻi he fakamaau taʻetotonu ko ení.

12, 13. (a) Ko e hā naʻe fai ʻe Sīsū ʻi he talanoa loi ʻa e kakaí fekauʻaki mo iá? (e) Ko e hā ʻe lava ke tau fai kapau ʻoku talanoa loi ha taha fekauʻaki mo kitautolu?

¹² Ko e hā ʻe lava ke ke faí kapau ʻoku fakamafola ʻe ha taha ha ngaahi loi fekauʻaki mo koe? Naʻe hoko eni fakatouʻosi kia Sīsū mo Sione Papitaiso. (Lau ʻa e Mātiu 11:18, 19.) Ko e hā naʻe fai ʻe Sīsuú? Naʻe ʻikai te ne ngāueʻaki ʻa e kotoa ʻo hono taimí mo e iví ke fakatuipauʻi ki he kakaí naʻe loi ʻa e talanoá. ʻI hono kehé, naʻá ne fakalototoʻaʻi ʻa e kakaí ke nau sio ki he ngaahi moʻoniʻi meʻá. Naʻá ne loto ke nau tokangataha ki he meʻa naʻá ne faí mo e meʻa naʻá ne akoʻí. Naʻe pehē ʻe Sīsū: “ʻOku fakatonuhiaʻi ʻa poto ʻe heʻene ngaahi ngāué.”​—Māt. 11:19, fakamatala ʻi lalo.

¹³ ʻE lava ke tau ako ha lēsoni mahuʻinga meia Sīsū. ʻE leaʻaki nai he taimi ʻe niʻihi ʻe he kakaí ha meʻa taʻetotonu pe ʻikai lelei fekauʻaki mo kitautolu, pea te tau hohaʻa nai naʻa maumauʻi ʻe he meʻá ni ʻa hotau ongoongó. Ka ko ʻetau founga moʻuí ʻe lava ke fakahaaʻi ai ki he niʻihi kehé ʻa hotau tuʻunga totonú. Hangē ko ia ʻoku tau ako mei he faʻifaʻitakiʻanga ʻa Sīsuú, ko ʻetau ʻulungaanga leleí ʻe lava ke ne fakamoʻoniʻi ʻoku hala ha ngaahi moʻoni fakakonga pē pe tukuakiʻi loi.

14, 15. Ko e hā ʻoku ʻikai totonu ai ke tau falala ki heʻetau mahino pē ʻa kitautolú?

¹⁴ Kuo tau sio ʻoku lava ke faingataʻa hono maʻu ha ngaahi moʻoniʻi meʻa alafalalaʻanga. Ko e toe palopalema ʻe taha ko ʻetau taʻehaohaoá tonu. Kuo tau tauhi nai kia Sihova ʻi he ngaahi taʻu lahi pea hoko nai ai ʻo poto ʻi he ngaahi founga ʻe niʻihi. ʻOku fakaʻapaʻapaʻi nai kitautolu ʻe he niʻihi kehé ko e malava ke tau fakakaukau leleí. ʻE lava ke hoko eni ko ha palopalema kiate kitautolu?

¹⁵ ʻIo. ʻE lava ke tau kamata ke falala ki heʻetau mahino pē ʻa kitautolú. Te tau tuku nai ʻetau ongoʻí mo e palaní tonu ke ne puleʻi ʻa e anga ʻo ʻetau fakakaukaú. Te tau kamata nai ke tui ʻoku tau mahinoʻi ha tuʻunga neongo ʻoku ʻikai ke tau maʻu ʻa e ngaahi moʻoniʻi meʻá kotoa. ʻOku fakatuʻutāmaki ʻaupito eni! ʻOku fakatokanga mahino mai ʻa e Tohi Tapú ʻoku ʻikai totonu ke tau falala ki heʻetau mahino pē ʻa kitautolú.​—Pal. 3:5, 6; 28:26.

16. ʻI he fakatātā ko ení, ko e hā naʻe hoko ʻi ha falekai, pea ko e hā naʻe fakakaukau ki ai ʻa Tomú?

¹⁶ Ko e fakatātaá, sioloto atu ki ha efiafi ʻe taha naʻe ʻalu ha mātuʻa taukei ko Tomu ki ha falekai peá ne sio ai ki ha mātuʻa ʻe taha, ko Sione, ʻokú ne tangutu ʻi ha tēpile mo ha fefine ʻa ia ʻoku ʻikai ko hono uaifí. ʻOku hā ngali ʻokú na maʻu ha taimi fiefia. ʻOku sio atu ʻa Tomu ʻokú na kakata mo fāʻofua. ʻOkú ne hohaʻa ʻaupito mo fifili: ‘ʻE vete koā ʻa Sione ia mo hono uaifí? Fēfē ʻa ʻena fānaú?’ Kuo sio ʻa Tomu ʻi he ngaahi meʻa meimei tatau naʻe hoko ki muʻa. ʻE fēfē hoʻo ongoʻí kapau ko Tomu koe?

17. ʻI he fakatātā ko ení, ko e hā naʻe toki ʻilo ki mui ʻe Tomú, pea ko e hā ʻe lava ke tau ako mei hení?

¹⁷ Kae tatali angé. Neongo ʻoku fakamahalo ʻa Tomu ʻoku taʻefaitōnunga ʻa Sione ki hono uaifí, ʻokú ne maʻu ʻa e moʻoniʻi meʻá kotoa? Ki mui ʻi he efiafi ko iá, ʻoku tā ʻa Tomu kia Sione ʻo ne ʻiloʻi ai ko e fefiné ko e tuofefine ʻo Sione, ʻa ia ʻokú ne ʻaʻahi mai mei ha feituʻu mamaʻo. Kuo ʻikai ke fesiofaki ʻa Sione mo hono tuofefiné ʻi he ngaahi taʻu lahi. Pea koeʻuhí te ne ʻi ai pē ʻi ha ngaahi houa siʻi, ko e taimi feʻunga pē eni naʻe maʻu ʻe Sioné ke na fetaulaki ʻo kai ʻi ha falekai. Naʻe ʻikai malava ke nau ʻalu mo hono uaifí. Naʻe fiefia ʻa Tomu ʻi he ʻikai te ne tala ki ha toe taha ʻa e meʻa naʻá ne fakakaukau ki aí! Ko e hā ʻoku tau ako mei hení? Tatau ai pē pe ko e hā hono fuoloa ʻo ʻetau tauhi kia Sihová, ʻoku kei fiemaʻu pē ke tau maʻu ʻa e ngaahi moʻoniʻi meʻá ki muʻa ke tau aʻu ki ha fakamulituku totonu.

18. Ko e hā ʻe lava ke ne ʻai kitautolu ke tau tui ki ha meʻa ʻoku kovi fekauʻaki mo hotau tokouá?

¹⁸ ʻOku lava foki ke faingataʻa hono fakapapauʻi pe ʻoku tonu ha meʻa ʻi he taimi ʻoku fekauʻaki ai mo ha tokoua ʻoku ʻikai te tau fetaulaki lelei mo ia. Kapau ʻoku tau hanganaki fakakaukau ki heʻetau fetōkehekeheʻakí, te tau hoko nai ai ʻo huʻuhuʻu fekauʻaki mo hotau tokouá. Pea kapau ʻoku tau fanongo ʻi ha meʻa ʻoku ʻikai lelei fekauʻaki mo ia, te tau loto nai ke tui ki ai, neongo ʻoku ʻikai ha fakamoʻoni ʻoku moʻoni ʻa e meʻa ko iá. Ko e hā ʻa e lēsoni kiate kitautolú? Kapau ʻoku tau fakaʻatā ke maʻu ha ngaahi ongoʻi ʻikai lelei fekauʻaki mo hotau fanga tokouá, ʻe lava ke ne ʻai ke tau aʻu ki ha ngaahi fakamulituku hala ʻoku ʻikai makatuʻunga ʻi ha ngaahi moʻoniʻi meʻa. (1 Tīm. 6:4, 5) ʻOku ʻikai totonu ke tau fakaʻatā ha ngaahi ongoʻi kovi hangē ko e loto-koví mo e meheká ke nofo ʻi hotau lotó. ʻOua ʻaupito naʻa ngalo ʻoku fiemaʻu ʻe Sihova ke tau ʻofa ʻi hotau fanga tokouá pea fakamolemoleʻi kinautolu mei he lotó.​—Lau ʻa e Kolose 3:12-14.

19, 20. (a) Ko e hā ʻa e ngaahi tefitoʻi moʻoni Fakatohitapu ʻe tokoni kiate kitautolu ke fakapapauʻi ʻoku tonu ʻa e fakamatalá? (e) Ko e hā te tau lāulea ki ai ʻi he kupu hoko maí?

¹⁹ ʻI he ʻahó ni, ʻoku mātuʻaki faingataʻa ke maʻu ha ngaahi moʻoniʻi meʻa alafalalaʻanga pea ke fakapapauʻi ʻoku tonu. Ko e hā hono ʻuhingá? Ko e lahi ʻo e fakamatala ʻoku ala maʻú ʻoku taʻekakato pe moʻoni fakakonga pē, pea ʻoku tau taʻehaohaoa. Ko e hā ʻe lava ke ne tokoniʻi kitautolú? Ko e tefitoʻi moʻoni ʻoku tau maʻu ʻi he Folofola ʻa e ʻOtuá! Ko e fakatātaá, ʻoku tala mai ʻi he tefitoʻi moʻoni ʻe taha ʻoku fakavalevale ke fai ha tali ki muʻa ke tau fanongo ki he ngaahi moʻoniʻi meʻá. (Pal. 18:13) Ko e tefitoʻi moʻoni ʻe taha ʻoku tokoniʻi ai kitautolu ke tau ʻiloʻi ʻoku ʻikai totonu ke tau tui ki he meʻa kotoa pē ʻoku tau fanongo ki aí ʻo ʻikai vakaiʻi pe ʻoku moʻoni. (Pal. 14:15) Pea tatau ai pē pe ko e hā hono fuoloa ʻetau tauhi kia Sihová, heʻikai lava ke tau falala ki he mahino pē ʻatautolú. (Pal. 3:5, 6) ʻE maluʻi kitautolu ʻe he ngaahi tefitoʻi moʻoni Fakatohitapú kapau ʻoku tau ngāueʻaki ʻa e ngaahi moʻoniʻi meʻa alafalalaʻangá ke aʻu ki ha fakamulituku totonu pea ke fai ha ngaahi fili fakapotopoto.

²⁰ Ka ʻoku ʻi ai ha toe ʻuhinga ʻoku tau ʻilo nai ai ʻoku faingataʻa ke maʻu ʻa e moʻoni ʻo ha meʻa. ʻI he tuʻunga ko e faʻahinga ʻo e tangatá, ʻoku tau fakavave ke fakamāuʻi ʻa e ngaahi meʻá makatuʻunga ʻi he meʻa ʻoku lava ke tau sio ki aí. ʻI he kupu hokó, te tau lāulea ai ki he ngaahi tafaʻaki ʻa ia ʻe lava ke tau fai ai ʻa e fehālaaki ko ení pea ako ʻa e founga ke fakaʻehiʻehi ai mei hení.