FEHUʻI MEI HE KAU LAUTOHÍ

Ko e ngaahi puleʻanga lahi ʻi he kuonga muʻá naʻa nau tautea ʻa e kau faihia ʻe niʻihi ʻaki hono tutuki kinautolu ʻi ha ʻakau pe ko ha fuʻu pou. Naʻe haʻi pe tutuki ʻe he kau Lomá ha tokotaha pehē ki he meʻa faiʻanga tauteá, ʻa ia naʻá ne kei moʻui atu ai ʻi ha ngaahi ʻaho ki muʻa ke ʻikai kei matuʻuaki ʻe hono sinó ʻa e langá, fieinuá, fiekaiá mo e eʻa atu ki natulá. Naʻe lau ʻe he kau Lomá ʻa e tutukí ko ha tautea fakamā ia naʻe fai pē ia ki he kau faihia kovi tahá.

Fēfē leva ʻa e puleʻanga ʻIsileli ʻo e kuonga muʻá? Naʻe tautea ʻe he kau ʻIsilelí ʻa e kau faihiá ʻaki hono tautau kinautolu ʻi he ʻakaú? Naʻe tuʻutuʻuni ʻe he Lao ʻa Mōsesé: “Ka kuo feia ʻe ha tangata ha angahala ko hono tautea ʻi he lao ko e mate, pea ʻoku tamateʻi ia, pea ke tautau ʻi ha ʻakau; ʻe ʻikai ʻahoia hono ʻangaʻanga ʻi he ʻakau, ka kuo pau ke ke tanu ia ʻi he ʻaho pe ko ia.” (Teu. 21:22, 23) Ko ia ai, ʻoku hā mahino, lolotonga ʻa e taimi ʻo e Ngaahi Konga Tohi Tapu Faka-Hepeluú, ko ha tokotaha naʻe tuha ke mate naʻe ʻuluaki tāmateʻi ia pea toki tautau ʻi ha ʻakau pe ko ha fuʻu ʻakau.

ʻI he fekauʻaki mo e meʻá ni, ʻoku pehē ʻi he Livitiko 20:2: “ʻIlonga ʻa ia ʻi haʻa Isileli, pe ʻi haʻa muli ʻoku ʻāunofo mai ki Isileli, ʻa ia te ne ʻatu hano hako kia Moloke; ʻe mate tamateʻi ia: ʻe tolomakaʻi ʻe he kakai ʻo e fonua.” Ko e faʻahinga naʻe “fakahaʻele faʻahikehe, pe ʻoku fai ʻa e tuki fakatevolo” naʻe pau foki ke tāmateʻi. Anga-fēfē? ʻAki hono “tolomakaʻi kinautolu.”—Liv. 20:27.

ʻI he Teutalōnome 22:23, 24, ʻoku tau lau ai: “Ka ai ha fefine taupoʻou kuo poloʻi ki ha tangata, pea maʻu ia ʻi he kolo ʻe ha tangata, ʻo na mohe mo ia; pea te mou ʻomi kinaua fakatouʻosi ki he matanikolo ko ia, pea te mou tolomakaʻi kinaua ke na pekia; ko e taʻahine koeʻuhi naʻe ʻikai te ne kaila, he ʻoku ne ʻi he kolo; pea ko e tangata, koeʻuhi kuo ne fakamoʻulaloaʻi ʻa e uaifi ʻo hono kaungaʻapi: ka ke ʻave ʻa e kovi mei ho lotolotonga.” ʻI he lotolotonga leva ʻo e muʻaki kau ʻIsilelí, ko e tolomakaʻí ʻa e founga tefito ʻo hono tautea ʻa e faʻahinga naʻe halaia ʻi ha hia fakalilifu.a

ʻOku pehē ʻi he Teutalōnome 21:23, “ko ia ʻoku tautau ko e koto malaʻia ki he ʻOtua.” Ko hono fakahāhā ʻo e ʻangaʻanga ʻo ha tokotaha kovi ʻa ia ko e “koto malaʻia ki he ʻOtua” kuo pau pē naʻe ʻi ai ʻene kaunga ki he kau ʻIsilelí. Ko e moʻoni, ko hono tautau ʻi ha ʻakau pe ʻi ha fuʻu ʻakau ʻa e sino ʻo ha tokotaha pehē naʻe tauteaʻí naʻe hoko ia ko e fakatokanga ki he niʻihi kehé.