Tuku ke ʻOua Naʻa ʻi Ai ha Meʻa Te Ne Toʻo Meiate Koe ʻa e Palé

1, 2. (a) Ko e hā ʻa e pale ʻoku fakatuʻotuʻa atu ki ai ʻa e kau sevāniti ʻa e ʻOtuá? (e) Ko e hā ʻokú ne tokoniʻi kitautolu ke hanganaki fakahangataha hotau matá ki he palé? (Sio ki he ʻuluaki fakatātā ʻi he kupú ni.)

KO E kau Kalisitiane paní ʻoku nau maʻu ha ʻamanaki mahuʻinga. ʻOku nau fakatuʻotuʻa atu ke moʻui ʻi hēvani. Naʻe ui ʻe he ʻapositolo ko Paulá ʻa e ʻamanaki ko ení ko e “pale ʻo e ui fakahēvani mei he ʻOtuá.” (Fil. 3:14) Te nau pule ʻi hēvani fakataha mo Sīsū Kalaisi ʻi hono Puleʻangá pea ngāue mo ia ʻi hono tokoniʻi ʻa e faʻahinga ʻo e tangatá ke nau hoko ʻo haohaoa. (Fkh. 20:6) Ko ha ʻamanaki fisifisimuʻa moʻoni eni! ʻOku fakatuʻotuʻa atu ʻa e fanga sipi kehé ki ha pale kehe. ʻOku nau ʻamanaki ke moʻui taʻengata ʻi Palataisi ʻi he māmaní, pea ko e ʻamanakí ni ʻokú ne ʻai kinautolu ke nau fiefia moʻoni!​—2 Pita 3:13.

² Naʻe loto ʻa Paula ke tokoniʻi ʻa hono kaungā-Kalisitiane paní ke nau nofoʻaki faitōnunga pea maʻu ʻa e palé. Naʻá ne tala ange kiate kinautolu: “Hanganaki fakamaʻu homou ʻatamaí ʻi he ngaahi meʻa ʻi ʻolungá.” (Kol. 3:2) Naʻe fiemaʻu ke nau tokangataha ki heʻenau ʻamanaki mahuʻinga fakahēvaní. (Kol. 1:4, 5) Ko e fakakaukau fekauʻaki mo e ngaahi tāpuaki ʻa Sihová ʻokú ne tokoniʻi ʻa e kau sevāniti kotoa ʻa e ʻOtuá ke hanganaki fakahangataha honau matá ki he palé. ʻOku feʻungamālie eni ʻo tatau ai pē pe ʻoku nau ʻamanaki ke moʻui ʻi hēvani pe ʻi māmani.​—1 Kol. 9:24.

 3. Ko e hā naʻe fakatokanga ʻa Paula fekauʻaki mo ia ki he kau Kalisitiané?

³ Naʻe toe fakatokanga ʻa Paula ki he kau Kalisitiané fekauʻaki mo e ngaahi fakatuʻutāmaki ʻe lava ke ne toʻo meiate kinautolu ʻa e palé. Ko e fakatātaá, naʻá ne tohi ki he kau Kolosé fekauʻaki mo e kau Kalisitiane loi naʻa nau feinga ke fakahōifuaʻi ʻa e ʻOtuá ʻaki ʻenau muimui ʻi he Lao ʻa Mōsesé kae ʻikai tui kia Kalaisi. (Kol. 2:16-18) Naʻe toe lāulea ʻa Paula ki he fakatuʻutāmaki ʻoku kei hoko he ʻahó ni ʻa ia ʻe lava ke ne taʻofi kitautolu foki mei hono maʻu ʻa e palé. Naʻá ne fakamatalaʻi ʻa e founga ke talitekeʻi ai ʻa e ngaahi holi taʻetāú mo e meʻa ke fai ʻi he ʻi ai ʻetau ngaahi palopalema ʻi hotau fāmilí pe mo hotau fanga tokoua ʻi he fakatahaʻangá. Ko e faleʻi mahuʻinga ʻa Paulá ʻe lava ke ne tokoniʻi kitautolu ʻi he ʻahó ni. Ko ia tau sivisiviʻi angé ʻa e niʻihi ʻo e ngaahi fakatokanga anga-ʻofa ʻoku tau maʻu ʻi heʻene tohi ki he kau Kolosé.

 4. Ko e hā ʻe lava ai ke taʻofi kitautolu ʻe he holi taʻetāú mei hono maʻu ʻa e palé?

⁴ Hili ʻa e fakamanatu ʻa Paula ki hono fanga tokouá fekauʻaki mo ʻenau ʻamanaki fakaofó, naʻá ne tohi: “Ko ia ai, mou ʻai ke mate ʻa e ngaahi kupu ʻo homou sinó ʻa ia ʻoku ʻi he māmaní ʻi he fekauʻaki mo e fehokotaki fakasino taʻetāú, taʻemaʻá, holi taʻemapuleʻi fakaefehokotaki fakasinó, holi pangó, mo e mānumanú.” (Kol. 3:5) Ko e ngaahi holi taʻetāú ʻe lava ke mātuʻaki mālohi pea ʻe lava ke ne ʻai ke mole hotau vahaʻangatae mo Sihová mo ʻetau ʻamanaki ki he kahaʻú. Ko e tokoua ʻe taha ʻa ia naʻá ne tukulolo ki heʻene ngaahi holi taʻetāú pea foki ki mui ki he fakatahaʻangá ʻokú ne pehē naʻe hoko ʻa e ngaahi holí ni ʻo mālohi ʻaupito ʻo ne “toki foki mai ai kuo fuʻu tōmui.”

 5. ʻE lava fēfē ke tau maluʻi kitautolu ʻi he ngaahi tuʻunga fakatuʻutāmakí?

⁵ ʻOku fiemaʻu ke tautefito ʻetau tokangá kapau ʻoku tau ʻi ha tuʻunga ʻe lava ke ne taki kitautolu ke tau talangataʻa ki he ngaahi tuʻunga fakaeʻulungaanga ʻa Sihová. Ko e fakatātaá, ʻoku fakapotopoto ki ha ongo meʻa ʻokú na faisō ke fokotuʻu ha fakangatangata ʻi he kamataʻangá pē fekauʻaki mo e ngaahi meʻa hangē ko e fealaʻakí, ʻumá, mo e nofo toko uá. (Pal. 22:3) ʻE lava ke hoko ʻa e ngaahi tuʻunga fakatuʻutāmaki kehe ʻi heʻetau ʻalu ʻi ha folau fakapisinisi pe ʻi he taimi ʻoku tau ngāue ai mo ha fefine pe ko ha tangata. (Pal. 2:10-12, 16) Ko e hā ʻe lava ke ke fai ke maluʻi ai koé? Fakahaaʻi ko koé ko e taha ʻo e Kau Fakamoʻoni ʻa Sihová. Tōʻongaʻaki ʻa e ʻulungaanga tāú, pea ʻoua ʻaupito naʻa ngalo ko e fakamalingá ʻe lava ke iku ia ki he fakatamaki. ʻOku toe fiemaʻu foki ke tau tokanga kapau ʻoku tau loto-mamahi pea taʻelata. Te tau fiemaʻu nai ha taha ke ne ʻai ke tau ongoʻi ʻoku fiemaʻu kitautolu. Te tau ongoʻi mātuʻaki feifeingavale nai ʻo tau tali ai ha tokanga ʻoku fai mai mei ha taha. ʻOku fakatuʻutāmaki eni. Kapau ʻe faifai ange peá ke ongoʻi pehē, ʻoua ʻe fai ha meʻa te ne taʻofi koe mei hono maʻu ʻa e palé. Hanga kia Sihova mo ho fanga tokouá mo e fanga tuofāfiné ki ha tokoni.​—Lau ʻa e Saame 34:18; Palōveepi 13:20.

 6. Ko e hā ʻoku totonu ke tau manatuʻi ʻi heʻetau fili ʻa e fakafiefiá?

⁶ Ke ʻai ke mate ʻa e ngaahi holi taʻetāú, ʻoku fiemaʻu ke tau siʻaki ʻa e fakafiefia taʻetāú. ʻI he ʻahó ni ko e lahi ʻo e fakafiefia ʻoku ala maʻú ʻoku fakamanatu mai ai ʻa e ngaahi meʻa naʻe hoko ʻi Sōtoma mo Komolá. (Sute 7) Ko e faʻahinga ʻoku nau faʻu ʻa e fakafiefiá ʻoku nau ʻai ʻa e fehokotaki fakasino taʻetāú ke hā ngali nōmolo mo ʻikai hano maumau. Ko ia ʻoku fiemaʻu maʻu pē ke tau tokanga. Heʻikai lava ke tau tali ha faʻahinga fakafiefia pē ʻoku tuʻuaki mai ʻe he māmaní. ʻI hono kehé, ʻoku fiemaʻu ke tau fili ʻa e fakafiefia ʻe ʻikai taʻofi ai kitautolu mei hono maʻu ʻa e pale ko e moʻuí.​—Pal. 4:23.

 7. Ko e hā ʻa e ngaahi palopalema ʻe lava ke malanga hake ʻi he fakatahaʻanga Kalisitiané?

⁷ ʻOku tau fiefia ʻi he hoko ko e konga ʻo e fakatahaʻanga Kalisitiané. ʻOku tau ako ʻa e Folofola ʻa e ʻOtuá ʻi he ngaahi fakatahá, pea ʻoku tau fetokoniʻaki anga-ʻofa. ʻOku tokoni eni kiate kitautolu ke hanganaki fakahangataha hotau matá ki he palé. Ka ʻi he taimi ʻe niʻihi ʻoku ʻi ai ha ngaahi taʻefemahinoʻaki ʻa ia ʻe lava ke ne fakatupunga ha ngaahi palopalema mo hotau fanga tokouá mo e fanga tuofāfiné. Kapau ʻoku ʻikai ke tau fakaleleiʻi ʻa e ngaahi palopalema ko ení, ʻe lavangofua ke iku ia ki he loto-ʻita.​—Lau ʻa e 1 Pita 3:8, 9.

8, 9. (a) Ko e hā ʻa e ongo ʻulungaanga te na tokoniʻi kitautolu ke tau maʻu ʻa e palé? (e) Ko e hā ʻe lava ke ne tokoniʻi kitautolu ke tau tauhi ʻa e melinó kapau ʻoku fakalotomamahiʻi kitautolu ʻe ha kaungā-Kalisitiane?

⁸ Heʻikai lava ke tau fakaʻatā ʻa e loto-ʻitá ke ne taʻofi kitautolu mei hono maʻu ʻa e palé. Naʻe fakamatalaʻi ʻe Paula ʻa e meʻa ʻoku fiemaʻu ke fai ʻe he kau Kalisitiané: “ʻI he tuʻunga ko e kakai fili ʻa e ʻOtuá, ʻa ia ʻoku māʻoniʻoni mo ʻofeiná, mou kofuʻaki kimoutolu ʻa e manavaʻofa kaungāongoʻi loloto, anga-lelei, anga-fakatōkilalo, anga-malū, mo e kātaki. Hokohoko atu ʻa e fekātakiʻaki mo e fefakamolemoleʻaki loto-lelei neongo ai pē ʻo kapau ʻoku ʻi ai ha taha ʻokú ne maʻu ha ʻuhinga ke lāunga ai fekauʻaki mo ha taha. Hangē tofu pē ko ia ne fakamolemoleʻi loto-lelei kimoutolu ʻe Sihová, kuo pau foki ke mou fai ʻa e meʻa tatau. Kae tuku kehe ʻa e ngaahi meʻá ni kotoa, mou kofuʻaki kimoutolu ʻa e ʻofá, he ko ha fakamaʻu haohaoa ia ʻo e fāʻūtahá.”​—Kol. 3:12-14.

⁹ Ko e ʻofá mo e anga-leleí ʻe lava ke na tokoniʻi kitautolu ke tau fakamolemoleʻi ʻa e niʻihi kehé. Kapau ʻoku tau ongoʻi loto-mamahi ʻi ha meʻa naʻe leaʻaki pe fai ʻe ha taha, ʻe lava ke tau fakakaukau ki he ngaahi taimi naʻa tau leaʻaki ai pe fai ha meʻa taʻeʻofa ki he niʻihi kehé pea nau fakamolemoleʻi kitautolu. He houngaʻia ē ko kitautolu ʻi heʻenau ʻofá mo e anga-leleí! (Lau ʻa e Tangata Malanga 7:21, 22.) ʻOku tau fakamālō ʻi hono fakafāʻūtahaʻi ʻi he anga-lelei ʻe Kalaisi ʻa e kau lotu moʻoní. (Kol. 3:15) ʻOku tau ʻofa kotoa ʻi he ʻOtua tatau, malangaʻi ʻa e pōpoaki tatau, pea maʻu ʻa e ngaahi palopalema tatau. Kapau ʻoku tau anga-lelei mo anga-ʻofa pea fefakamolemoleʻaki, ʻe toe fāʻūtaha ange ai ʻa e fakatahaʻangá pea ʻe lava ke tau nofoʻaki tokangataha ki he palé.

10, 11. (a) Ko e hā ʻoku fakatuʻutāmaki ai ʻa e meheká? (e) ʻE lava fēfē ke tau fakapapauʻi ʻoku ʻikai ke taʻofi kitautolu ʻe he meheká mei hono maʻu ʻa e palé?

¹⁰ Ko e meheká ʻe lava ke ne taʻofi kitautolu mei hono maʻu ʻa e palé. ʻOku fakahaaʻi ʻi he ngaahi fakatātā ʻi he Tohi Tapú ʻa e fakatuʻutāmaki ʻo e meheká. Ko e fakatātaá, naʻe meheka ʻa Keini kia ʻĒpeli peá ne tāmateʻi ia. Naʻe meheka ʻa Kola, Tētani, mo ʻApilami kia Mōsese pea nau angatuʻu kiate ia. Naʻe meheka ʻa Tuʻi Saula kia Tēvita peá ne feinga ke tāmateʻi ia. ʻOku moʻoni ʻaupito ʻa e meʻa ʻoku leaʻaki ʻe he Folofola ʻa e ʻOtuá: “Ko e feituʻu pē ʻoku ʻi ai ʻa e meheká mo e loto-fekeʻikeʻí, ʻe ʻi ai foki ʻa e māveuveú mo e meʻa fulikivanu kotoa pē.”​—Sēm. 3:16.

¹¹ Kapau ʻoku tau ngāue mālohi ke hoko ʻo anga-ʻofa mo anga-lelei moʻoni, ʻe ʻikai faingofua haʻatau hoko ʻo meheka. ʻOku pehē ʻe he Folofola ʻa e ʻOtuá: “Ko e ʻofá ʻoku kātaki mo anga-lelei. Ko e ʻofá ʻoku ʻikai te ne meheka.” (1 Kol. 13:4) Ke fakapapauʻi heʻikai hoko ʻa e meheká ko e konga ʻo hotau angaʻitangatá, ʻoku fiemaʻu ke tau feinga ke sio ki he ngaahi meʻá ʻi he anga ʻo e sio ki ai ʻa Sihová. ʻOku fiemaʻu ke tau vakai ki hotau fanga tokouá mo e fanga tuofāfiné ko e ngaahi mēmipa kinautolu ʻo e sino tatau, ʻa ia ko e fakatahaʻangá. ʻOku pehē ʻe he Tohi Tapú: “Kapau ʻoku fakalāngilangiʻi ha kupu ʻe taha, ʻoku kaungā-fiefia mo ia ʻa e ngaahi kupu kehé kotoa.” (1 Kol. 12:16-18, 26) Kapau ʻoku hoko ha meʻa lelei ki ha taha ʻo hotau fanga tokouá, te tau fiefia ʻiate ia, ʻo ʻikai meheka. Fakakaukau angé ki he faʻifaʻitakiʻanga lelei ʻa e foha ʻo Tuʻi Saula ko Sionatané. Naʻe ʻikai ke meheka ʻa Sionatane ʻi hono fili ʻo Tēvita ke hoko ko e tuʻi kae ʻikai ko iá. Naʻe aʻu ʻo ne fakalototoʻaʻi mo tokoniʻi ʻa Tēvita. (1 Sām. 23:16-18) ʻE lava ke tau hoko ʻo anga-lelei mo anga-ʻofa hangē ko Sionatané?

12. Ko e hā ʻa e faleʻi mei he Tohi Tapú te ne tokoniʻi hotau fāmilí ke maʻu ʻa e palé?

¹² ʻI hono ngāueʻaki ʻe he mēmipa kotoa ʻo hotau fāmilí ʻa e ngaahi tefitoʻi moʻoni Fakatohitapú, ʻe melino ai mo fiefia ʻa hotau fāmilí pea te tau maʻu ʻa e palé. Naʻe ʻomai ʻe Paula ʻa e faleʻi fakapotopoto ko ení ki he ngaahi fāmilí: “Ko kimoutolu ngaahi uaifi, mou anganofo ki homou ngaahi husepānití, he ʻoku taau ia ʻi he vakai mai ʻa e ʻEikí. Ko kimoutolu ngaahi husepāniti, mou hanganaki ʻofa ki homou ngaahi uaifí pea ʻoua te mou ʻita tōlili kiate kinautolu. Ko kimoutolu fānau, mou talangofua ki hoʻomou mātuʻá ʻi he meʻa kotoa pē, he ʻoku fakahōifua eni ki he ʻEikí. Ko kimoutolu ngaahi tamai, ʻoua te mou fakaʻitaʻi hoʻomou fānaú, koeʻuhi ke ʻoua te nau hoko ʻo loto-mafasia.” (Kol. 3:18-21) ʻE lava ke ke sio ki ha founga ʻe lava ke tokoni ai ʻa e faleʻi ko ení ki ho fāmilí?

13. ʻE lava fēfē ke tokoniʻi ʻe ha tuofefine Kalisitiane ʻa hono husepāniti taʻetuí ke ne loto ke tauhi kia Sihova?

¹³ Mahalo pē ko ha tuofefine koe ʻoku ʻikai ke tauhi ho husepānití kia Sihova. Ko e hā te ke faí kapau ʻokú ke ongoʻi ʻoku ʻikai te ne fai atu ʻa e tōʻonga ʻoku totonu ke ne faí? Te ke ʻita nai ai pea fakakikihi mo ia, ka ʻe ʻai ʻe he meʻa ko iá ke lelei ange ai ʻa e tuʻungá? Neongo kapau te ke mālohi ʻi he fakakikihí, te ke ʻai ai ia ke ne loto ke tauhi kia Sihova? Mahalo pē ʻikai. Ka ʻo kapau te ke fakahāhā ʻa e fakaʻapaʻapa ki hono ngafa ko e ʻulu ʻo e fāmilí, ʻe lava ke ke tokoni ai ki ho fāmilí ke toe melino ange pea te ke ʻoatu ai ʻa e lāngilangi kia Sihova. Ko hoʻo faʻifaʻitakiʻanga leleí ʻe aʻu ʻo ne ʻai ke loto ho husepānití ke ne tauhi kia Sihova, pea ʻe lava leva ai ke mo fakatou maʻu ʻa e palé.​—Lau ʻa e 1 Pita 3:1, 2.

14. Ko e hā ʻoku totonu ke fai ʻe ha husepāniti Kalisitiane kapau ʻoku ʻikai ke fakaʻapaʻapaʻi ia ʻe hono uaifi taʻetuí?

¹⁴ Mahalo pē ko ha tokoua koe ʻoku ʻikai ke tauhi ho uaifí kia Sihova. Ko e hā ʻe lava ke ke faí kapau ʻokú ke ongoʻi ʻoku ʻikai te ne fakaʻapaʻapaʻi koe? Kapau naʻá ke feinga ke fakahaaʻi kiate ia pe ko hai ʻoku pulé ʻaki hono kailangakiʻi, te ne fakaʻapaʻapa atu ai kiate koe? ʻIkai ʻaupito! ʻOku ʻamanekina mai ʻe he ʻOtuá te ke hoko ko ha husepāniti ʻofa ʻoku faʻifaʻitaki kia Sīsū. (ʻEf. 5:23) Ko Sīsū, ʻa e ʻulu ʻo e fakatahaʻangá, ʻokú ne kātaki maʻu pē mo anga-ʻofa. (Luke 9:46-48) Kapau ʻokú ke faʻifaʻitaki kia Sīsū, ʻe loto nai ʻi ha taimi ho uaifí ke ne tauhi foki mo ia kia Sihova.

15. ʻOku anga-fēfē hono fakahāhā ʻe ha tangata Kalisitiane ki hono uaifí ʻokú ne ʻofa ʻiate ia?

¹⁵ ʻOku fakahinohinoʻi ʻe Sihova ʻa e ngaahi husepānití: “Mou hanganaki ʻofa ki homou ngaahi uaifí pea ʻoua te mou ʻita tōlili kiate kinautolu.” (Kol. 3:19) Ko ha husepāniti anga-ʻofa ʻokú ne fakahāhā ʻa e fakaʻapaʻapa ki hono uaifí. Anga-fēfē? ʻOkú ne fanongo ki heʻene fakakaukaú pea ʻai ke ne ʻilo ko e meʻa ʻokú ne leaʻakí ʻoku mahuʻinga kiate ia. (1 Pita 3:7) Neongo kapau ʻoku ʻikai lava ke ne fai maʻu pē ʻa e meʻa ʻokú ne fiemaʻú, ko e fanongo kiate iá ʻe lava ke tokoniʻi ai ia ke ne fai ha ngaahi fili lelei ange. (Pal. 15:22) Ko ha husepāniti anga-ʻofa ʻoku ʻikai te ne kounaʻi ʻa hono uaifí ke ne fakaʻapaʻapa kiate ia. ʻI hono kehé, ʻokú ne feinga ke maʻu ʻa ʻene fakaʻapaʻapá. ʻI he ʻofa ha husepāniti ki hono uaifí mo e fānaú, ʻoku ngalingali ange ai te nau fiefia ʻi heʻenau tauhi kia Sihová pea maʻu ʻa e pale ko e moʻuí.

16, 17. ʻI he tuʻunga ko ha tokotaha kei siʻí, ʻe lava fēfē ke ke fakaʻehiʻehi mei he hoko ʻo loto-mamahi tōtuʻa ʻi hoʻo ongo mātuʻá?

¹⁶ Mahalo pē ko ha tokotaha taʻu hongofulu tupu koe pea ʻokú ke ongoʻi ʻoku ʻikai ke mahinoʻi koe ʻe hoʻo ongo mātuʻá pe ʻokú na fuʻu fefeka. Te ke mātuʻaki loto-mamahi nai heni ʻo ke fifili ai pe ʻokú ke kei loto koā ke tauhi kia Sihova. Ka ʻo kapau te ke liʻaki ʻa Sihova, te ke ʻiloʻi ai ʻoku ʻikai ha taha ʻi he māmaní ʻe ʻofa lahi ʻiate koe ʻo hangē ko hoʻo ongo mātuʻa Kalisitiané mo ho ngaahi kaumeʻa ʻi he fakatahaʻangá.

¹⁷ Fakakaukau ki he meʻá ni: Kapau naʻe ʻikai ʻaupito ke fakatonutonu koe ʻe hoʻo ongo mātuʻá, te ke ʻiloʻi fēfē pe ʻokú na tokanga moʻoni kiate koe? (Hep. 12:8) Ko e moʻoni, ʻoku ʻikai te na haohaoa, ko ia ko e founga ʻo ʻena akonakiʻi koé te ke loto-mamahi nai ai. Kae ʻoua ʻe tokangataha ki he meʻa ko iá. ʻI hono kehé, feinga ke mahinoʻi ʻa e ngaahi ʻuhinga ʻo e meʻa ʻokú na faí mo leaʻakí. Hanganaki anga-mokomoko, pea feinga ke ʻoua ʻe hohaʻa tōtuʻa. ʻOku pehē ʻe he Folofola ʻa e ʻOtuá: “Ko ha tangata ʻokú ne maʻu ʻa e ʻiló ʻokú ne mapuleʻi ʻa ʻene leá, pea ko ha tangata ʻiloʻilo te ne anga-mokomoko ai pē.” (Pal. 17:27) ʻAi ko hoʻo taumuʻá ia ke hoko ko ha tokotaha matuʻotuʻa ʻokú ne tali ʻa e akonakí pea ako mei ai ʻo tatau ai pē pe ʻoku fēfē ʻa hono fai maí. (Pal. 1:8) ʻOua ʻaupito naʻa ngalo ko hono maʻu ʻa e ongo mātuʻa ʻokú na ʻofa kia Sihová ko ha meʻaʻofa mahuʻinga ia. ʻOkú na loto ke tokoniʻi koe ke ke moʻui taʻengata.

18. Ko e hā ʻokú ke fakapapauʻi ai ke hanganaki fakahangataha ho matá ki he palé?

¹⁸ Pe ʻoku tau ʻamanaki ke moʻui taʻengata ʻi hēvani pe ʻi ha māmani palataisi, ko kitautolu taki taha ʻe lava ke tau fakatuʻotuʻa atu ki ha kahaʻu fisifisimuʻa. Ko ʻetau ʻamanakí ʻoku moʻoni. ʻOku makatuʻunga ia ʻi he talaʻofa ʻa e Tokotaha-Fakatupu ʻo e ʻunivēsí, ʻa ia ʻokú ne pehē: “ʻE fonu moʻoni ʻa e māmaní ʻi he ʻiloʻi ʻo Sihová.” (ʻAi. 11:9) Kuo vavé ni ke akoʻi ʻe he ʻOtuá ʻa e tokotaha kotoa pē ʻi he māmaní. Ko ha pale ia ʻoku tuha ke ngāue ki ai. Ko ia manatuʻi maʻu pē ʻa e meʻa kuo talaʻofaʻaki ʻe Sihova kiate koé, pea ʻoua naʻa tuku ke taʻofi koe ʻe ha meʻa mei hono maʻu ʻa e palé!