Lavakí​—Ko ha Fakaʻilonga Tamaki ʻo e Kuongá!

“Fekauʻaki mo e anga ʻo e mateaki mo e māʻoniʻoni mo e taʻehalaia ʻi heʻemau fakafeangai.”​—1 TES. 2:10.

FEINGA KE MAʻU ʻA E NGAAHI POINI TEFITO KO ENÍ:

Ko e hā ʻa e ngaahi lēsoni fakaefakatokanga ʻe lava ke tau ako mei he lavaki naʻe fakahoko ʻe Tilila, ʻApisalome, mo Siutasi ʻIsikalioté?

ʻE lava fēfē ke tau faʻifaʻitaki ki he mateaki naʻe fakahāhā fakatouʻosi ʻe Sionatane mo Pitá?

ʻE lava fēfē ke tau hanganaki tuʻumaʻu ai pē ʻi heʻetau mateaki ki hotau hoa malí pea kia Sihová?

1-3. (a) Ko e hā ko ha fakaʻilonga tamaki ʻo e kuongá, pea ko e hā ʻoku kau ki aí? (e) Ko e hā ʻa e fehuʻi ʻe tolu te tau talí?

KO E hā ha meʻa naʻe taha ai ʻa Tilila, ʻApisalome, pea mo Siutasi ʻIsikalioté? Naʻa nau taʻemateaki kotoa—ko Tilila ki he tangata naʻá ne ʻofa aí, ʻa Fakamaau Samisoni; ko ʻApisalome ki heʻene tamaí, ʻa Tuʻi Tēvita; ko Siutasi ʻIsikaliote ki hono ʻEikí, ʻa Kalaisi Sīsū. ʻI he tuʻunga taki taha, ko ʻenau ngaahi tōʻonga fakalilifú naʻe fakatupu maumau lahi ia ki he niʻihi kehé! Ka ko e hā ʻoku totonu ai ke tau tokanga fekauʻaki mo e meʻá ni?

² Ko ha faʻutohi ʻi onopooni ʻokú ne fakakau ʻa e lavakí ʻi he ngaahi ʻulungaanga kovi taha ʻi he ʻaho ní. Kuo pau pē ke ʻamanekina ia. ʻI hono ʻomai ʻa e fakaʻilonga ʻo e “fakaʻosiʻosi ʻo e fokotuʻutuʻu lolotongá,” naʻe pehē ʻe Sīsū: “Ko e tokolahi . . . te nau . . . felavakiʻaki.” (Māt. 24:3, 10) “Ke lavakí” ʻoku ʻuhingá “ko hono ʻoatu, pe tuku ki he filí ʻa e mafaí, ʻaki ʻa e kākā pe taʻemateaki.” Ko ha taʻemateaki pehē ʻoku fakapapauʻi mai ai ʻoku tau moʻui ʻi he “ngaahi ʻaho fakaʻosí” ʻi he taimi naʻe tomuʻa tala ai ʻe Paula, ko e kakaí te nau hoko ko e kau “taʻemateaki, . . . kau lavaki.” (2 Tīm. 3:1, 2, 4) Neongo ko e kau faʻutohí mo e kau faʻu faivá ʻoku nau faʻa ʻai ke hā fakafaiva mo ʻai ke fakamānako ʻa e ngaahi tōʻonga kākaá ʻi he ʻū tohí pea ʻi he ngaahi faivá, ʻi he moʻui moʻoní ia ʻoku fakatupunga ʻe he taʻemateakí mo e lavakí ʻa e mamahi mo e faingataʻaʻia. Ko e moʻoni, ko e ngaahi tōʻonga peheé ko ha fakaʻilonga tamaki ia ʻo e kuongá!

³ Ko e hā ʻa e ngaahi lēsoni ʻe lava ke tau ako mei he Tohi Tapú ʻo fekauʻaki mo e faʻahinga naʻa nau taʻemateaki ʻi he kuohilí? Ko e hā ʻa e ngaahi faʻifaʻitakiʻanga ʻa e kakai ʻa ia naʻa nau fakamoʻoniʻi ʻenau līʻoa ki he niʻihi kehé ʻe lava ke tau faʻifaʻitaki ki aí? Pea kia hai kuo pau ke tau hanganaki mateaki tuʻumaʻu ki aí? Tau sio angé ki aí.

NGAAHI FAʻIFAʻITAKIʻANGA FAKAEFAKATOKANGA MEI HE KUOHILÍ

 4. Naʻe lavakiʻi fēfē ʻe Tilila ʻa Samisoní, pea ko e hā naʻe mātuʻaki fulikivanu ai ʻa e meʻa ko iá?

⁴ ʻUluakí, fakakaukau kia Tilila faʻufaʻu kākā, ʻa ia naʻe ʻofa ai ʻa Fakamaau Samisoní. Naʻe tokangataha ʻa Samisoni ʻi he takimuʻa ʻi he faitau fakafepakiʻi ʻo e kau Filisitiá koeʻuhi ko e kakai ʻa e ʻOtuá. Mahalo ʻi hono ʻiloʻi naʻe ʻikai ʻofa mateaki ʻa Tilila kia Samisoní, naʻe fakaʻaliʻali ange ai kiate ia ʻe he ngaahi ʻeiki Filisitia ʻe toko nima ha totongi fufū lahi ke nau ʻiloʻi ai ʻa e fakapulipuli ʻo hono fuʻu iví koeʻuhí ke lava ai ʻo nau tāmateʻi ia. Naʻe tali ʻe Tilila mānumanu ʻenau meʻaʻofá, ka ko ʻene ngaahi feinga ke ʻilo ʻa e fakapulipuli ʻa Samisoní naʻe taʻelavameʻa tuʻo tolu ia. Naʻá ne toutou tenge ia “ʻi heʻene lau ʻi he ʻaho kotoa pe, mo fakakina kiate ia.” Faifai atu pē, “pea ʻikai te ne meimei kataki ke moʻui.” Ko ia naʻá ne tala ange kiate ia ko hono louʻulú ne teʻeki ai ʻaupito ke kosi pea kapau naʻe kosi ia, ʻe mole leva ʻa hono mālohí.a ʻI hono ʻiloʻi pē iá, naʻe ʻai ʻe Tilila ʻa e louʻulu ʻo Samisoní ke kosi lolotonga ʻa ʻene mohe ʻi hono fungá, peá ne tuku atu leva ia ki hono ngaahi filí ke nau fai kiate ia ha meʻa pē te nau loto ki aí. (Fkm. 16:4, 5, 15-21) He fulikivanu ē ko ʻene tōʻongá! Naʻe hoko kotoa iá koeʻuhí ko ʻene mānumanú, ʻo lavakiʻi ai ʻe Tilila ʻa e tokotaha naʻe ʻofa ʻiate iá.

 5. (a) Naʻe fakamoʻoniʻi fēfē ʻe ʻApisalome ʻene taʻemateaki kia Tēvitá, pea ko e hā naʻe fakaeʻa ʻe he meʻa ko iá ʻo fekauʻaki mo iá? (e) Naʻe anga-fēfē ʻa e ongoʻi ʻa Tēvita fekauʻaki mo e tafoki ʻa ʻEhitofeli ʻo hoko ko e tokotaha lavakí?

⁵ Ko hono hokó, fakakaukau kia ʻApisalome anga-kākā. ʻI hono langaʻi ʻe he sio tuʻungá, naʻá ne fakapapauʻi ai ke faʻao ʻa e taloni ʻo ʻene tamaí, ʻa Tuʻi Tēvita. Ko ʻApisalomé naʻá ne ʻuluaki ‘kaihaʻasi ʻa e loto ʻo e kau tangata Isilelí’ ʻaki ʻene fakahekehekeʻi kinautolu, ʻo ngāueʻaki ʻa e ngaahi talaʻofa kākā mo e ngaahi fakahāhā taʻemoʻoni ʻo e ʻofá. Naʻe aʻu ʻo ne fāʻofua mo ʻuma kiate kinautolu, ʻo hangē ia naʻá ne mahuʻingaʻia moʻoni ʻia kinautolu mo ʻenau ngaahi fiemaʻú. (2 Sām. 15:2-6) Naʻe aʻu ʻo fakalotoʻi ʻe ʻApisalome ʻa e kaumeʻa fafale ʻo Tēvita ko ʻEhitofelí, ʻa ia naʻá ne hoko ko e tokotaha lavaki pea kau ʻi he angatuʻú. (2 Sām. 15:31) ʻI he Saame 3 mo e 55, ʻoku fakamatalaʻi ai ʻe Tēvita ʻa e anga hono uesia ia ʻe he taʻemateaki peheé. (Saame 3:1-8; lau ʻa e Saame 55:12-14.) Naʻe fakaeʻa ʻe ʻApisalome ʻa ʻene taʻetokaʻi taʻemā ʻa e tuʻunga-hau ʻo e ʻOtuá ʻaki ʻene faʻufaʻu sio tuʻungá mo ʻene faʻufaʻufono tekeutua ʻo fakafepaki ki he tuʻi ʻosi fakanofo ʻa Sihová. (1 Kal. 28:5) ʻI he ngataʻangá, naʻe ʻikai ke lavameʻa ʻa e angatuʻú, pea naʻe hokohoko atu ʻa Tēvita ke pule ko e tokotaha pani ʻa Sihova.

 6. Naʻe anga-fēfē hono lavakiʻi ʻe Siutasi ʻa Sīsuú, pea kuo hoko ʻa e hingoa ʻo Siutasí ʻo ʻuhinga tatau mo e hā?

⁶ Fakakaukau he taimí ni ki he meʻa naʻe fai ʻe Siutasi ʻIsikaliote anga-lavaki ki he Kalaisí. ʻI he Pāsova fakamuimui naʻe kātoangaʻi ʻe Sīsū mo ʻene kau ʻapositolo ʻe toko 12, naʻá ne tala ange kiate kinautolu: “ʻOku ou tala moʻoni atu kiate kimoutolu: Ko e toko taha ʻiate kimoutolu te ne lavakiʻi au.” (Māt. 26:21) Ki mui ai ʻi he pō ko iá, naʻe tala ange ʻe Sīsū kia Pita, Sēmisi, mo Sione ʻi he ngoue ko Ketisemaní: “Vakai! Kuo fakaofi mai ʻa hoku tokotaha lavakí.” Tuaiekemo, naʻe hā ʻa Siutasi ʻi he ngoué fakataha mo hono ngaahi kaungāfaʻufaʻufonó, “pea ʻi heʻene hangatonu atu kia Sīsuú, naʻá ne pehē: ‘Mālō e lelei, Lāpai!’ peá ne ʻuma lolomi kiate ia.” (Māt. 26:46-50; Luke 22:47, 52) Naʻe hanga ʻe Siutasi ʻo “lavakiʻi ʻa e toto māʻoniʻoní” peá ne tuku atu ʻa Sīsū ki he ngaahi fili ʻo Kalaisí. Pea naʻe fai ia ʻe Siutasi mānumanu paʻangá ki he hā? Ki ha ngaahi konga siliva pē ʻe 30! (Māt. 27:3-5) Ko e hingoa Siutasí kuo ʻuhinga tatau ia mo e “tokotaha lavaki” talu mei ai, tautefito ki ha taha ʻokú ne lavakiʻi ha taha kehe ʻi haʻane fakangalileleiʻaki ʻa e anga-fakakaumeʻá.b

 7. Ko e hā ʻa e ngaahi lēsoni kuo tau ako mei he moʻui ʻa (a) ʻApisalome mo Siutasí pea mo (e) Tililá?

⁷ Ko e hā kuo tau ako mei ngaahi fakatātā fakaefakatokanga ko ení? Ko ʻApisalome mo Siutasí naʻá na fakatou hokosia ha ikuʻanga fakamā koeʻuhi ko ʻena tafoki ʻo hoko ko e tokotaha lavakiʻi ʻo e pani ʻa Sihová. (2 Sām. 18:9, 14-17; Ngā. 1:18-20) Ko e hingoa ʻo Tililá ʻe fekauʻaki taʻengata ia mo e faʻufaʻu kākaá mo e ʻofa fakangalingalí. (Saame 119:158) He mātuʻaki mahuʻinga ē ke tau talitekeʻi ha faʻahinga hehema pē nai ʻoku tau maʻu ke ʻoho kui ai ki he sio tuʻungá pe mānumanú, ʻa ia ʻe fakatupunga ai ke mole meiate kitautolu ʻa e hōifua ʻa Sihová! ʻE malava ke toe ʻi ai ha ngaahi lēsoni ʻe toe mālohi ange heni ke ne tokoniʻi kitautolu ke tau talitekeʻi ʻa e tōʻonga fakalielia ʻo e taʻemateakí?

FAʻIFAʻITAKI KI HE FAʻAHINGA KUO NAU FAKAMOʻONIʻI ʻENAU MATEAKÍ

8, 9. (a) Ko e hā naʻe tukupā ai ʻa Sionatane ke ne mateaki kia Tēvitá? (e) ʻE lava fēfē ke tau faʻifaʻitaki kia Sionatane?

⁸ ʻOku toe fakamatala ʻa e Tohi Tapú ki he faʻahinga mateaki tokolahi. Tau lāulea angé ki he toko ua ʻo e faʻahingá ni pea sio pe ko e hā ʻe lava ke tau ako meiate kinauá, ʻo kamataʻaki ha tangata naʻá ne fakamoʻoniʻi ʻa ʻene mateakí kia Tēvita. Ko Sionatane, ʻa e foha lahi taha ʻo Tuʻi Saulá, ʻa ia naʻe ngalingali te ne hoko ko e eʻa ki he taloni ʻo ʻIsilelí—tuku kehe ʻa e meʻa ʻe taha. Naʻe fili ʻe Sihova ia ʻa Tēvita ke hoko ko e tuʻi hono hoko ʻo ʻIsilelí. Naʻe tokaʻi ʻe Sionatane ʻa e fili ʻa e ʻOtuá. Naʻe ʻikai te ne vakai ʻi he meheka kia Tēvita ʻi he tuʻunga ko ha tokotaha feʻauhi ange kiate ia. ʻI hono kehé, ko Sionatané naʻe ‘pikitai ʻa hono lotó ki he loto ʻo Tevitá’ ʻi heʻene tukupā te ne mateaki kiate ia. Naʻe aʻu ʻo ne ʻoange kia Tēvita ʻa hono ngaahi kofú, heletaá, kaufaná, mo hono noʻó, ʻo ne tuku ai kiate ia ʻa e ngaahi lāngilangi fakatuʻí. (1 Sām. 18:1-4) Naʻe fai ʻe Sionatane ʻa e meʻa kotoa naʻá ne malavá ke ‘ne poupou ʻa e nima ʻo Tēvitá,’ ʻo aʻu ki he tuʻunga ko ʻene ʻai ʻene moʻuí tonu ke ʻi he tuʻunga fakatuʻutāmaki kae tuʻu maʻa Tēvita ʻi he ʻao ʻo Saulá. Naʻe mateaki ʻa Sionatane ʻo ne tala kia Tēvita: “Te ke Tuʻi Isileli koe, kau palemia au.” (1 Sām. 20:30-34; 23:16, 17) ʻOku ʻikai ha ofo, ʻi he hili ko ia ʻa e mate ʻa Sionatané, naʻe fakahaaʻi ʻe Tēvita ʻene ongoʻi mamahi pea mo ʻene ʻofa kiate iá ʻi ha hiva ʻo e tengihia.—2 Sām. 1:17, 26.

⁹ Naʻe ʻikai toe ʻi ai ha meʻa naʻá ne fakaʻalongauaʻi ʻa e mateakí ʻi he tafaʻaki ʻa Sionatané. Naʻá ne fakamoʻulaloa kakato ki he Haú, ʻa Sihova, pea naʻá ne poupou kakato kia Tēvita ʻi he tuʻunga ko e pani ʻa e ʻOtuá. ʻOku pehē pē ʻi he ʻahó ni, neongo kapau ʻoku ʻikai nai ke ʻomai kiate kitautolu ha monū makehe ʻi he fakatahaʻangá, ʻoku totonu ke tau poupou loto-lelei ki he fanga tokoua kuo fakanofo ke nau taki muʻa ʻi hotau haʻohaʻongá.—1 Tes. 5:12, 13; Hep. 13:17, 24.

10, 11. (a) Ko e hā naʻe nofo mateaki ai pē ʻa Pita kia Sīsuú? (e) ʻE lava fēfē ke tau faʻifaʻitaki kia Pita, pea ko e hā ʻoku totonu ke ne ueʻi kitautolu ke tau faí?

¹⁰ Ko e faʻifaʻitakiʻanga lelei ʻe taha te tau lāulea ki aí ʻoku fekauʻaki ia mo e ʻapositolo ko Pitá, ʻa ia naʻá ne fakahāhā ʻene mateakí kia Sīsū. ʻI he taimi naʻe ngāueʻaki ai ʻe Sīsū ʻa e lea fakaefakatātā mahino ke fakamamafaʻiʻaki ʻa e mahuʻinga ʻo hono ngāueʻi ʻa e tui ki heʻene feilaulau ʻaki hono sinó mo hono totó naʻe tuʻunuku maí, ko e tokolahi ʻo ʻene kau ākongá naʻa nau ʻilo naʻe oʻo ʻene ngaahi leá, pea nau liʻaki ia. (Sione 6:53-60, 66) Ko ia naʻe hanga hake ʻa Sīsū ki heʻene kau ʻapositolo ʻe toko 12 ʻo ne ʻeke: “ʻOku ʻikai koā ke mou fie ō mo kimoutolu ia?” Naʻe tali ange ʻe Pita: “ʻEiki, ko hai koā te mau ʻalu ki aí? ʻOkú ke maʻu ʻa e ngaahi lea ʻo e moʻui taʻengatá; pea kuo mau ʻosi tui mo ʻilo ko koe ʻa e Tokotaha Māʻoniʻoni ʻa e ʻOtuá.” (Sione 6:67-69) Naʻe ʻuhinga ení naʻe mahinoʻi kakato ʻe Pita ʻa e ngaahi meʻa kotoa naʻe toki leaʻaki ʻe Sīsū fekauʻaki mo ʻEne feilaulau naʻe ʻamanaki ke hokó? Mahalo pē ʻikai. Neongo ia, naʻe fakapapauʻi ʻe Pita ke hoko ʻo mateaki ki he ʻAlo pani ʻo e ʻOtuá.

¹¹ Naʻe ʻikai ke fakaʻuhinga ʻa Pita ʻo pehē kuo pau naʻe maʻu ʻe Sīsū ha fakakaukau hala fekauʻaki mo e ngaahi meʻá pea kapau naʻe toe tuku atu ha taimi, naʻá Ne mei toe fakafoki ʻa e meʻa naʻá Ne leaʻakí. ʻIkai, naʻe ʻiloʻi anga-fakatōkilalo ʻe Pita naʻe maʻu ʻe Sīsū “ʻa e ngaahi lea ʻo e moʻui taʻengatá.” ʻOku pehē pē ʻi he ʻahó ni, ʻoku fēfē ʻetau fakafeangaí kapau te tau fakatokangaʻi hifo ha poini ʻi heʻetau ʻū tohi faka-Kalisitiane mei he “tamaioʻeiki anga-tonú” ʻoku faingataʻa ke mahinoʻi pe ʻoku ʻikai ke feʻungamālie ia mo ʻetau fakakaukaú? ʻOku totonu ke tau feinga mālohi ke maʻu ʻa e ʻuhinga ki aí kae ʻikai ko e ʻamanekina pē ʻe ʻi ai ha liliu ke feʻungamālie mo ʻetau fakakaukaú.—Lau ʻa e Luke 12:42.

MATEAKI AI PĒ KI HO HOA MALÍ

12, 13. ʻOku hoko fēfē nai ʻa e lavakí ʻi ha nofo mali, pea ko e hā ʻoku ʻikai ko ha kalofanga ai ha taʻumotuʻa ʻo ha taha ki he hoko ʻa e meʻa ko iá?

¹² Ko e lavakí ʻi ha faʻahinga founga pē ko ha tōʻonga fakalielia ia kuo pau ke ʻoua ʻe fakaʻatā ke ne maumauʻi ʻa e melino mo e fāʻūtaha ʻa e fāmili Kalisitiané pea mo e fakatahaʻangá. ʻI he fakakaukau atu ki he meʻa ko iá, tau lāulea angé ki he founga ʻe lava ke tau hoko ai ʻo tuʻumaʻu ʻi heʻetau mateaki ki hotau hoa malí pea ki hotau ʻOtuá.

¹³ Ko e tonó ko e taha ia ʻo e ngaahi founga fakatupu maumau lahi taha ʻo e lavakí. Ko e tokotaha tonó kuó ne maumauʻi ʻene mateaki ki hono hoa malí pea hiki ʻene tokangá ki ha tokotaha kehe. Ko e hoa kuo lavakiʻí ʻoku fakafokifā pē ʻene toe toko tahá—fakataha mo ha moʻui ʻoku mafuli fakaʻaufuli. ʻOku anga-fēfē ʻa e hoko eni ʻi he vahaʻa ʻo e ongo meʻa ʻe toko ua naʻá na feʻofaʻaki ki muʻá? ʻOku faʻa hoko, ko ha ʻuluaki sitepu ʻoku huʻu atu ki he tuʻunga ko iá ko e fevāmamaʻoʻaki fakaeongo ʻa e ongo meʻa malí. ʻOku fakamatalaʻi ʻe he palōfesa fekauʻaki mo e saienisi ʻo e nofo fakasōsaietí ko Gabriella Turnaturi ʻo ne pehē ko e fetōʻaki ko ia ʻoku hoko “ʻi he vahaʻa ʻo ʻete kau kakato ki ha vahaʻangataé mo e ʻikai ke te kau kakato ki aí ʻoku hoko ai ʻa e lavakí.” Ko e mamaʻo ko eni ʻa ha tokotaha mei ha hoa malí kuo hoko ia ki he niʻihi naʻa mo e lolotonga ʻa e taʻumotuʻa lotolotó. Ko e fakatātaá, ko ha tangata ʻosi mali taʻu 50 ʻokú ne veteʻi hono uaifi faitōnunga ʻi he taʻu ʻe 25 koeʻuhí ka ne nofo fakataha mo ha fefine kehe ʻa ia kuó ne manako ai. ʻOku kalofangaʻaki eni ʻe he niʻihi ʻo pehē ko ha haʻahaʻa ʻo e taʻumotuʻa lotolotó. Kae kehe, ʻi he ʻikai ke ʻai ia ke ongo ʻo hangē naʻe ʻikai lava ke toe kalofí, tau ui ia ʻi hono tuʻunga moʻoní—ko ha lavaki ʻi he taʻumotuʻa lotolotó.c

14. (a) ʻOku anga-fēfē ʻa e ongoʻi ʻa Sihova fekauʻaki mo e anga-kākā ʻi ha nofo mali? (e) Ko e hā naʻe leaʻaki ʻe Sīsū ʻo fekauʻaki mo e mateaki ʻi he nofo malí?

¹⁴ ʻOku anga-fēfē ʻa e ongoʻi ʻa Sihova ʻo fekauʻaki mo e faʻahinga ʻoku nau liʻaki honau ngaahi hoá ʻo ʻikai ʻi ha ʻuhinga Fakatohitapú? Ko hotau ʻOtuá ‘ʻoku fehiʻa ki he veté,’ pea kuó ne folofolaʻaki ʻa e ngaahi lea mālohi ki he faʻahinga ʻoku nau ngaohikoviʻi mo liʻaki honau ngaahi hoa malí. (Lau ʻa e Malakai 2:13-16.) ʻI he loto-tatau mo ʻene Tamaí, naʻe akoʻi ʻe Sīsū heʻikai lava ʻe ha tokotaha ke ne tukuange pe liʻaki ha hoa tonuhia peá ne fakafeangai ʻo hangē ia kuo ʻikai ha meʻa ne hokó.—Lau ʻa e Mātiu 19:3-6, 9.

15. ʻE lava fēfē ʻe he faʻahinga kuo malí ʻo fakaivimālohiʻi ʻenau mateaki ki honau ngaahi hoá?

¹⁵ ʻE lava fēfē ʻe he faʻahinga kuo ʻosi malí ke nau mateaki ai pē ki honau ngaahi hoá? ʻOku pehē ʻe he Folofola ʻa e ʻOtuá: “Ke maʻu fiefia mei ho uaifi [pe husepāniti] fakatalavou,” pea “Fai atu hoʻo nofo mo ho uaifi [pe husepāniti] ʻoku ke ʻofa ki ai.” (Pal. 5:18; Koh. 9:9) ʻI he fakaʻau ke motuʻa ange ʻa e ongo meʻá, kuo pau ke na “kau kakato” ki hona vahaʻangataé, fakatouʻosi ʻi he fakaesino mo e fakaeongó. ʻOku ʻuhinga iá ke na hoko ʻo tauʻaki fetokangaʻaki, tauʻaki vaheʻi ha taimi maʻanaua, peá na tauʻaki ʻunuʻunu ke na vāofi ange. Kuo pau ke na tokangataha ke tauhi maʻu ʻena nofo malí pea mo hona vahaʻangatae mo Sihová. ʻI he ʻuhinga ko iá, ʻoku fiemaʻu ki he ongo meʻa malí ke na ako fakataha ʻa e Tohi Tapú, ngāue fakataha maʻu pē ʻi he ngāue fakafaifekaú, peá na lotu fakataha ki he tāpuaki ʻa Sihová.

MATEAKI AI PĒ KIA SIHOVA

16, 17. (a) ʻOku anga-fēfē hono ʻahiʻahiʻi ʻetau mateaki ki he ʻOtuá ʻi he fāmilí mo e fakatahaʻangá? (e) Ko e hā ʻa e faʻifaʻitakiʻanga ʻoku fakahaaʻi ai ko e talangofua ki he fekau ʻa e ʻOtuá ke ʻoua ʻe kei feohi mo e ngaahi kāinga kuo tuʻusí ʻe lava ke iku atu ki he ngaahi ola lelei?

¹⁶ ʻOku ʻi ai ʻa e ngaahi mēmipa ʻi he fakatahaʻangá naʻa nau fai ʻa e ngaahi angahala mamafa pea naʻe valokiʻi kinautolu “ʻi he founga fefeka, ke nau hoko ai ʻo moʻui lelei ʻi he tuí.” (Tai. 1:13) Ki he niʻihi, kuo fiemaʻu ai ʻi heʻenau tōʻongá ke tuʻusi kinautolu. Ki he “faʻahinga kuo akoʻi aí,” kuo tokoniʻi kinautolu ʻe he kinisi ko iá ke nau hoko ʻo toe moʻui fakalaumālie. (Hep. 12:11) Fēfē kapau ʻoku ʻi ai hatau kāinga pe ko ha kaumeʻa ofi ʻoku tuʻusi? ʻOku siviʻi leva ai pe ʻoku tau mateaki ki he tokotaha ko iá, pe ki he ʻOtuá. ʻOku vakai mai ʻa Sihova kiate kitautolu ke sio pe te tau talangofua ki heʻene fekau ke ʻoua ʻe fetuʻutaki mo ha taha pē ʻoku tuʻusi.—Lau ʻa e 1 Kolinitō 5:11-13.

¹⁷ Fakakaukau ki ha foʻi fakatātā ʻe taha ʻo e lelei ʻe lava ke maʻu ʻi he taimi ʻoku poupou mateaki ai ha fāmili ki he tuʻutuʻuni ʻa Sihova ke ʻoua ʻe feohi mo e ngaahi kāinga kuo tuʻusí. Ko ha kiʻi talavou naʻe tuʻusi ʻo laka hake ʻi he taʻu ʻe hongofulu, ʻi he lolotonga ʻa e taimi ko iá ko ʻene tamaí, faʻeé, mo hono fanga tokoua ʻe toko fā naʻa nau ‘tuku ʻa e kei feohi’ mo iá. ʻI he taimi ʻe niʻihi, naʻá ne feinga ke fakakau atu ia ʻi heʻenau ngaahi meʻa ʻoku faí, ka ʻoku taau ke fakaongoongoleleiʻi kinautolu, he naʻe tuʻumaʻu ʻa e mēmipa taki taha ʻo e fāmilí ʻi he ʻikai fai ha fetuʻutaki ʻe taha mo iá. ʻI he hili hono toe fakafoki mai iá, naʻá ne pehē naʻá ne ongoʻi maʻu pē ʻa e ʻikai feohi mo hono fāmilí, tautefito ʻi he taimi poʻulí ʻi heʻene nofo toko tahá. Ka naʻá ne fakahaaʻi moʻoni, kapau naʻe feohi ʻa e fāmilí mo ia, naʻa mo ha kiʻi feohi siʻisiʻi pē, ne mei fiemālie ai pē ia. Kae kehe, koeʻuhi naʻe ʻikai te ne maʻu naʻa mo ha kiʻi fetuʻutaki siʻisiʻi pē mei ha taha ʻo hono fāmilí, naʻe hoko ai ʻa e holi mālohi ke feohi mo kinautolú ko ha fakaueʻiloto ia ʻe taha ki heʻene toe fakafoki mai ʻa hono vahaʻangatae mo Sihová. Fakakaukau angé ki aí kapau ʻe faifai ange pea fakataueleʻi koe ke maumauʻi ʻa e fekau ʻa e ʻOtuá ke ʻoua ʻe feohi mo ho ngaahi kāinga kuo tuʻusí.

18. Hili ʻa e vakai ki he fepaki ʻa e ngaahi lelei ʻo e mateakí mo e ngaahi nunuʻa ʻo e taʻemateakí, ko e hā hoʻo fakapapaú?

¹⁸ ʻOku tau moʻui ʻi ha māmani anga-kākā mo taʻemateaki. Ko ia ai, ko e faʻahinga takatakai ʻia kitautolu ʻi he fakatahaʻanga Kalisitiané, ʻe lava ke tau maʻu ai ʻa e ngaahi faʻifaʻitakiʻanga ʻo e mateakí ke faʻifaʻitaki ki ai. Ko ʻenau ʻalunga moʻuí ʻoku lea ia maʻanautolu, ʻo hangē ia ʻoku pehē mai: “Ko kimoutolú ko e kau fakamoʻoni, pea pehē foki ki he ʻOtuá, ʻo fekauʻaki mo e anga ʻo e mateaki mo e māʻoniʻoni mo e taʻehalaia ʻi heʻemau fakafeangai kiate kimoutolu kau tuí.” (1 Tes. 2:10) ʻOfa ke tau hoko kotoa ʻo hanganaki tuʻumaʻu ai pē ʻi heʻetau mateaki ki he ʻOtuá pea ʻiate kitautolú.

[Fakamatala ʻi lalo]

[Fakatātā ʻi he peesi 10]

Naʻe mateaki ʻa Pita ki he ʻAlo pani ʻo e ʻOtuá neongo naʻe talitekeʻi Ia ʻe he niʻihi