Talanoa ki he Moʻuí

Ko ha Moʻui Fakafiemālie Neongo ʻa e Ngaahi Loto-Mamahí

FAKAMATALA FAI ʻE AUDREY HYDE

ʻI he manatu ki he taʻu laka hake he 63 ʻi he ngāue fakafaifekau taimi-kakató—ko e taʻu ʻe 59 ʻi he ʻuluʻi ʻapitanga ʻo e Kau Fakamoʻoni ʻa Sihová ʻi he māmaní—ʻoku lava ke u pehē ko ha moʻui fakafiemālie kuó u maʻú. Ko e moʻoni, ʻi he sio ki hoku ʻuluaki husepānití ʻi he māmālie ʻa e faai hifo ke ne mate ʻi he kanisaá mo e faingataʻaʻia ʻa hoku husepāniti hono uá mei he ngaahi nunuʻa ʻo e mahaki loto-ngalongaló naʻe taulōfuʻu. Kae tuku ke u vahevahe atu ʻa e founga kuó u tauhi maʻu ai ʻeku fiefiá neongo ʻa e ongo fakatamaki ko ení.

NAʻÁ KU tupu hake ʻi heʻeku kei siʻí ʻi ha faama ofi ki he kiʻi kolo ko Haxtun ʻi he lautoka ʻo e tokelau-hahake ʻo Colorado ofi ki he kauʻāfonua Nebraska. Ko e toko nima ʻaki au ʻa e fānau ʻe toko ono ʻa Orille mo Nina Mock. Ko Russell, Wayne, Clara mo Ardis naʻe fāʻeleʻi kinautolu ʻi he vahaʻa ʻo e 1913 mo e 1920, pea naʻá ku hoko atu ai ʻi he taʻu hono hokó. Naʻe fāʻeleʻi ʻa Curtis ʻi he 1925.

ʻI he 1913, naʻe hoko ai ʻa e fineʻeikí ko ha tokotaha Ako Tohi Tapu, hangē ko ia naʻe uiʻaki ʻa e Kau Fakamoʻoni ʻa Sihová ʻi he taimi ko iá. Faifai atu pē, ko e toenga ʻo kimautolu ʻi he fāmilí naʻa mau hoko foki ko e Kau Fakamoʻoni ʻa Sihova.

Ko ha Moʻui Tuʻunga Lelei ʻi he Lautoká

Naʻe mātuʻaki ʻalu fakataha ʻa e tangataʻeikí mo e fakalakalaká. Naʻa mau maʻu ʻa e maama ʻuhila ʻi homau ngaahi fale kotoa ʻi he fāmá, ʻa ia ko e meʻa ia naʻe hāhāmolofia ʻi he ngaahi ʻaho ko iá. Naʻa mau toe maʻu ʻa e ngaahi fua anga-maheni ʻi he ngāue fakangoué—ko e fuaʻimoa mei heʻemau fanga moá, mo e huʻakau, kilimi mo e pata mei heʻemau fanga pulú. Naʻa mau ngāueʻaki ʻa e fanga hōsí ki hono palau ʻa e kelekelé pea tō ʻa e sitolōpeli mo e pateta, pea pehē ki he uite mo e koane.

Naʻe tui ʻa e tangataʻeikí ko kimautolu fānaú ʻoku totonu ke mau ako kotoa ke ngāue. Naʻa mo e ki muʻa ke u kamata akó, naʻe akoʻi au ke u ngāue ʻi he ngaahi ngoueʻangá. ʻOku ou manatuʻi ʻa hono huo ʻi he taimi māfaná ʻi he laʻā vevelá ʻa e ngaahi ʻotu lōloa ʻi heʻemau ngoué. ‘ʻE faifai ange peá u aʻu ki he ngataʻangá?’ ko ʻeku fifilí ia. Naʻe tafe ʻa e pupuhá ʻi hoku sinó pea naʻe uʻu au ʻe he fanga honé. ʻI he taimi ʻe niʻihi, naʻá ku ongoʻi fakaʻofaʻia ai ʻiate au koeʻuhi ko e fānau iiki kehé naʻe ʻikai pau ke nau ngāue lahi kinautolu ʻo hangē ko kimautolú. Kae kehe, ʻi hono moʻoní, ʻi heʻeku manatu atu ki heʻeku kei siʻí, ʻoku ou houngaʻia ʻi hono akoʻi kimautolu ke ngāué.

Ko kimautolu kotoa naʻe ʻi ai ʻemau ngaahi ngāue naʻe vaheʻi. Naʻe lava ʻe Ardis ke tatau lelei ange ʻa e fanga pulú ʻiate au, ko ia ko ʻeku ngāué ko hono fakamaʻa ʻa e ngaahi loki ʻi he fale hōsí, ʻo tata ki tuʻa ʻa e teʻe hōsí. Neongo ia, naʻa mau toe maʻu foki ʻa e taimi fakaoli pea mau fai mo e ngaahi vaʻinga. Ko Ardis mo au naʻá ma vaʻinga ʻi ha timi fakafeituʻu. Naʻá ku teka, pe naʻá ku vaʻinga tautuaʻā ʻi he kolo hono tolú, pea naʻe vaʻinga tautuaʻā ʻa Ardis ʻi he kolo ʻuluakí.

Ko e ngaahi pō langi tafitongá naʻe fakaʻofoʻofa ʻaupito ia ʻi he lautoká. Ko e ngaahi fetuʻu ʻe laui afé naʻe fakamanatu mai ai kia au ʻa hotau Tokotaha-Fakatupú, ʻa Sihova ko e ʻOtuá. Naʻa mo e ʻi he tuʻunga ko ha kiʻi leká, naʻá ku fakakaukau ai fekauʻaki mo e Sāme 147:​4, ʻa ia ʻoku pehē ai: “ʻA ʻene ʻAfio [ʻa Sihova] ʻoku ne lau ʻa e ngaahi fetuʻu pe ʻoku fiha; ʻoku ne fakahingoa honau kotoa.” ʻI he ngaahi pō tafitonga lahi ko ení, ko ʻemau kulií, ko Judge, naʻe ʻolunga mai ki hoku fungá pea ʻalu holo pē mo au. Naʻá ku faʻa tangutu ʻi homau fakafaletoló ʻi he hoʻatā efiafí ʻo fakaʻofoʻofaʻia ʻi he ngoue uite lanu matá ʻi hono puhi ʻe he havilí, ʻo fakatupunga ai ke nau hangē ha silivá ʻi he maama ʻo e laʻaá.

Faʻifaʻitakiʻanga Lelei ʻa e Fineʻeikí

Ko ʻeku faʻeé ko ha uaifi mātuʻaki anga-līʻoa. Ko e tangataʻeikí naʻe hoko maʻu pē ko e ʻulu ʻo e fāmilí pea naʻe akoʻi ʻe heʻemau faʻeé kia kimautolu ke mau fakaʻapaʻapa kiate ia. ʻI he 1939 naʻá ne hoko ai mo ia foki ko e taha ʻo e Kau Fakamoʻoni ʻa Sihová. Naʻa mau ʻiloʻi naʻe ʻofa ʻemau tangataʻeikí ʻia kimautolu neongo naʻá ne ʻai ke mau ngāue mālohi pea naʻe ʻikai te ne fakapelepelekoviʻi kimautolu. ʻI he taimi lahi ʻi he faʻahitaʻu momokó naʻá ne fakapiti ai ha timi ʻo e fanga hōsí ʻo ʻomai ke mau heka holo ai he sinoú. He fiefia ē ko kimautolu ʻi he hina ekiaki ʻa e sinoú!

Kae kehe, ko e fineʻeikí, naʻá ne tauhi hake kimautolu ke ʻofa ki he ʻOtuá pea ke ʻapasia ki he Tohi Tapú. Naʻa mau ako ʻo ʻilo ko e huafa ʻo e ʻOtuá ko Sihova pea ko e Matavai ia ʻo e moʻuí. (Sāme 36:9; 83:18) Naʻa mau toe ʻiloʻi kuó ne tokonaki mai kia kimautolu ha ngaahi tataki, ʻo ʻikai ke ne kaihaʻasi ʻa ʻemau fiefiá, ka ke mau maʻu ʻaonga mei ai. (Aisea 48:17) Naʻe toutou fakamamafaʻi mai ʻe he fineʻeikí kia kimautolu ʻoku ʻi ai ʻemau ngāue makehe ke fai. Naʻa mau ʻiloʻi naʻe tala ʻe Sīsū ki hono kau muimuí: “Pea ʻe ʻoua ke fanongonongo ki mamani katoa ʻa e ongoongolelei ko eni ʻo e puleʻanga, ke ai ha fakamatala ki he ngāhi kakai kotoa pe, pea toki hoko ʻa e ngataʻanga.”—Mātiu 24:14.

ʻI he muʻaki ngaahi ʻaho ko iá, ʻi he taimi pē naʻá ku foki mai ai mei he akó naʻe ʻikai ke ʻi ʻapi ʻa e fineʻeikí, naʻá ku ʻalu ʻo kumi holo ia. ʻI he taimi ʻe taha, ʻi heʻeku taʻu onó nai pe taʻu fitú, naʻá ku maʻu atu ia ʻi he fale ʻo e fanga manú. Pea naʻe kamata ke ʻuha lahi ʻaupito. Naʻá ma ʻi he loki mohukú, pea naʻá ku ʻeke ange ai kiate ia pe ʻe toe ʻomai ʻe he ʻOtuá ha Lōmaki. Naʻá ne fakapapauʻi mai kiate au kuo palōmesi ʻa e ʻOtuá ʻe ʻikai ʻaupito te ne toe fakaʻauha ʻa e foʻi māmaní ʻaki ha lōvai. ʻOku ou toe manatuʻi ʻa e taimi lahi naʻá ku lele ai ke toitoi ʻi lalo fale, he naʻe ʻikai ko ha meʻa foʻou ʻa e hoko ʻa e ngaahi ʻahiohió.

Naʻa mo e ki muʻa ke fāʻeleʻi aú, naʻe kau ʻa e fineʻeikí ʻi he ngāue fakamalangá. Naʻe fakataha ha kulupu ʻi homau ʻapí, ko e faʻahinga kotoa ko iá naʻa nau maʻu ʻa e ʻamanaki ko e moʻui fakataha mo Kalaisi ʻi hēvani. Neongo ko e malanga fale ki he falé naʻe hoko ko ha pole ia ki he fineʻeikí, naʻá ne tuku ʻene ʻofa ki he ʻOtuá ke ne ikunaʻi ʻa ʻene manavaheé. Naʻá ne faitōnunga ʻo aʻu ki he ʻaho ʻo ʻene tei maté, ʻi he ʻaho 24 ʻo Nōvema, 1969, ʻi he taimi naʻá ne taʻu 84 aí. “Fineʻeiki, te ke ʻalu ki hēvani pea te ke fakataha ai mo ho ngaahi mahení,” ko ʻeku fafana hifo ia ʻi hono telingá. He fiefia ē ko au ʻi he lava ke u ʻi ai mo e fineʻeikí ʻi he taimi ko iá ʻo vahevahe mo ia ʻeku tuipau ki he ʻamanaki ko iá! Naʻá ne lea leʻo-siʻi mai, “ʻOkú ke mātuʻaki lelei kiate au.”

Naʻa Mau Kamata ke Malanga

ʻI he 1939, naʻe hoko ai ʻa Russell ko ha tāimuʻa, hangē ko ia ʻoku uiʻaki ʻa e kau ʻevangeliō taimi-kakato ʻi he lotolotonga ʻo e Kau Fakamoʻoni ʻa Sihová. Naʻá ne tāimuʻa ʻi Oklahoma mo Nebraska ʻo aʻu ki he 1944 ʻa ia ko e taimi ia naʻe ui ai ke ne ngāue ʻi he ʻuluʻi ʻapitanga ʻi māmani ʻo e Kau Fakamoʻoni ʻa Sihová (ʻoku ui ko e Pēteli), ʻi Brooklyn, Niu ʻIoke. Naʻá ku kamata tāimuʻa ʻi he ʻaho 20 ʻo Sepitema, 1941, pea ngāue ʻi he ngaahi feituʻu kehekehe ʻi Colorado, Kansas mo Nebraska. Ko e ngaahi taʻu ko ia ʻo e ngāue tāimuʻá ko e ngaahi taʻu fakafiefia, ʻo ʻikai koeʻuhi pē naʻe lava ke u tokoniʻi ai ʻa e niʻihi kehé fekauʻaki mo Sihova kae pehē foki koeʻuhi naʻá ku ako ke falala kakato kiate ia.

ʻI he taimi nai naʻe kamata tāimuʻa ai ʻa Russell, naʻe ʻi he kolisí ai ʻa Wayne ʻi he matāfonua hahaké hili ia ʻene ngāue paʻanga ʻi ha kiʻi taimi. Ki mui ai, naʻe fakaafeʻi ia ki Pēteli. Naʻá ne ngāue ʻi ha vahaʻa taimi ʻi he Faama Puleʻanga, ofi ki Ithaca, Niu ʻIoke. Naʻe tō ai ʻa e meʻakai ki he kiʻi fāmili ngāue he fāmá pea pehē ki he kau ngāue ko e toko 200 nai ʻi he Pēteli Brooklyn. Naʻe ngāueʻaki ʻe Wayne ʻa ʻene ngaahi pōtoʻí mo e taukeí ʻi he ngāue ʻa Sihová ʻo aʻu ki heʻene mate ʻi he 1988.

Ko hoku tokoua ko Ardis naʻe mali ia mo James Kern, pea naʻá na maʻu ha fāmili ʻo e fānau ʻe toko nima. Naʻá ne mate ʻi he 1997. Ko hoku tokoua ʻe tahá, ʻa Clara, kuó ne faitōnunga ai pē kia Sihova ʻo aʻu mai ki he ʻahó ni, pea ʻi he lolotonga ʻo hoku ngaahi taimi mālōloó ʻoku ou kei ʻaʻahi pē kiate ia ʻi hono ʻapí ʻi Colorado. Ko homau tuongaʻane siʻi tahá ʻa Curtis, naʻá ne haʻu ki he Pēteli Brooklyn ʻi he konga-loto ʻo e 1940 tupú. Naʻá ne fakaʻuli ʻi ha loli ki he Faama Puleʻangá mo foki mo e ngaahi koloa mo e naunau kehekehe. Naʻe ʻikai ʻaupito te ne mali, pea naʻá ne mate ʻi he 1971.

Ko ʻEku Holí—Ngāue Pēteli

Naʻe ʻalu ki muʻa ange ʻa hoku ongo tuongaʻane lalahí ki Pēteli, pea ko ʻeku holí ia ke ngāue foki ʻi ai. ʻOku ou fakapapauʻi ko ʻena faʻifaʻitakiʻanga leleí ʻa e meʻa naʻe iku ai ki hono fakaafeʻi aú. Ko e fanongo ki he talanoa ʻa ʻeku faʻeé fekauʻaki mo e hisitōlia ʻo e kautaha ʻa e ʻOtuá pea mo e sio tonu ki hono fakahoko ʻo e ngaahi kikite Fakatohitapu fekauʻaki mo e ngaahi ʻaho fakaʻosí naʻá ne fakatupulekina ai ʻiate au ha holi ke ngāue ʻi Pēteli. Naʻá ku fuakava kia Sihova ʻi he lotu kapau te ne tuku ke u ngāue ʻi Pēteli, ʻe ʻikai ʻaupito te u mavahe mei ai tuku kehe kapau ʻe ʻi ai haʻaku ngaahi fatongia faka-Kalisitiane ke fakahoko.

Naʻá ku aʻu ki Pēteli ʻi he ʻaho 20 ʻo Sune, 1945, pea naʻe vaheʻi au ke u ngāue ko ha tokotaha tauhi ʻapi. Ko e loki ʻe 13 naʻe tuku mai ke u fakamaʻá fakataha mo e mohenga ʻe 26 ke ngaahi ʻi he ʻaho taki taha, tānaki atu ki ai ʻa e ngaahi hala vahaʻa lokí, ngaahi sitepú mo e ngaahi matapā sioʻatá ke fufulu. Naʻe faingataʻa ʻa e ngāué. ʻI he ʻaho kotoa pē lolotonga ʻa e ngāué, naʻá ku hanganaki tala maʻu pē kiate au, ‘Ko e moʻoni, ʻokú te helaʻia, ka ʻokú te ʻi Pēteli, ko e fale ʻo e ʻOtuá!’

Mali mo Nathan Knorr

Talu mei he 1920 tupú, ko e kau ngāue Pēteli naʻe loto ke malí naʻe fiemaʻu ke nau mavahe mei Pēteli ʻo ngāue ki he ngaahi meʻa ʻo e Puleʻangá ʻi ha feituʻu kehe. Ka ʻi he konga ki muʻa ʻo e 1950 tupú, ko ha ngaahi hoa tokosiʻi ʻa ia naʻe ngāue ʻi Pēteli ʻi ha taimi lōloá naʻe fakaʻatā ke nau mali pea nofo ai. Ko ia ʻi he taimi naʻe fakahaaʻi ai ʻe Nathan H. Knorr, ʻa ia naʻe takimuʻa ʻi he taimi ko iá ʻi he ngāue ʻo e Puleʻangá ʻi māmani lahí ha mahuʻingaʻia ʻiate aú, naʻá ku fakakaukau, ‘Sai, ko e tokotaha eni ʻa ia te ne nofo maʻu ʻi Pētelí!’

Naʻe lahi ʻa e ngaahi fatongia ʻo Nathan ʻi hono tokangaʻi ʻa e ngāue ʻi māmani lahi ʻa e Kau Fakamoʻoni ʻa Sihová. Ko ia naʻá ne faitotonu ʻaupito kiate au, ʻo ne ʻomai kiate au ʻa e ngaahi ʻuhinga lahi ʻoku totonu ai ke u fakakaukau lelei ki muʻa ke u tali ʻa ʻene kole malí. ʻI he ngaahi ʻaho ko iá, naʻá ne folau lahi ke ʻaʻahi ki he ngaahi vaʻa ʻo e Kau Fakamoʻoni ʻa Sihová ʻi he māmaní kotoa pea naʻá ne faʻa mavahe ʻi ha ngaahi uike. Ko ia naʻá ne fakamatala mai te ma mavaeua ʻi ha ngaahi vahaʻa taimi lōloa.

ʻI heʻeku kei siʻí, naʻá ku sioloto ai ki haʻaku mali ʻi he faʻahitaʻu failaú pea hanimuni he ʻosi ʻa e malí ki he ʻotu motu Pasifiki ʻo Hauaiʻí. Kae kehe, naʻá ma mali ʻi he faʻahitaʻu momokó ʻi he ʻaho 31 ʻo Sanuali, 1953, pea naʻá ma hanimuni ʻi he efiafi Tokonaki ko iá mo e Sāpaté ʻi New Jersey. ʻI he Mōnité naʻá ma toe foki ki he ngāué. Kae kehe, ʻi ha uike ki mui ai, naʻá ma ō ai ʻo hanimuni ʻi ha uike ʻe taha.

Ko ha Kaumeʻa Ngāue Mālohi

Naʻe taʻu 18 ʻa Nathan ʻi he taimi naʻá ne aʻu ai ki Pēteli ʻi he 1923. Naʻá ne maʻu ʻa e ako mahuʻinga mei he kau taʻumotuʻa taukei hangē ko Joseph F. Rutherford, ʻa ia naʻá ne taki ʻi he ngāue ʻa e Kau Fakamoʻoní, mo e pule he ʻōfisi pulusí ko Robert J. Martin. ʻI he taimi naʻe mate ai ʻa Tokoua Martin ʻi Sepitema 1932, naʻe hoko ai ʻa Nathan ko e pule he ʻōfisi pulusí. ʻI he taʻu hoko maí, naʻe ʻave ai ʻe Tokoua Rutherford ʻa Nathan ʻo na ō ʻi heʻene ʻaʻahi ki he ngaahi vaʻa ʻo e Kau Fakamoʻoni ʻa Sihova ʻi ʻIulopé. ʻI Sanuali 1942 ʻi he taimi naʻe mate ai ʻa Tokoua Rutherford, naʻe ʻoange ai kia Nathan ʻa e fatongia ko hono tokangaʻi ʻa e ngāue ʻi māmani lahi ʻa e Kau Fakamoʻoni ʻa Sihová.

Naʻe mātuʻaki laka ki muʻa ʻa Nathan, ʻo palani maʻu pē ki muʻa ki ha tupu he kahaʻú. Naʻe vakai ʻa e niʻihi ki he meʻá ni naʻe taʻefeʻungamālie, koeʻuhi ko e ngataʻanga ʻo e fokotuʻutuʻu ko eni ʻo e ngaahi meʻá naʻe fai ʻa e vakai ki ai ʻoku ofi ʻaupito. Ko hono moʻoní, ko e tokotaha ʻa ia naʻá ne sio ki he ngaahi palani ʻa Nathan naʻá ne ʻeke ange kiate ia: “Ko e hā eni Tokoua Knorr? ʻOku ʻikai koā haʻo tui?” Naʻá ne tali: “ʻIo, ʻoku pehē, ka ʻo kapau ʻe ʻikai ke hoko vave mai ʻa e ngataʻangá ʻo hangē ko ia ʻoku tau ʻamanekiná, te tau mateuteu.”

Ko e foʻi fakakaukau ʻe taha ʻa ia naʻe tautefito ʻa e tui ki ai ʻa Nathan ko hono fokotuʻu ha akoʻanga ki he kau misinalé. Ko ia ai, ʻi Fepueli 1, 1943, naʻe kamata ai ha akoʻanga misinale ʻi he faama lahi ʻa ia naʻe ngāue ai he taimi ko iá ʻa hoku tuongaʻane ko Wayne. Neongo naʻe kau ki he akó ha koosi ako lahi ʻo e Tohi Tapú ʻi he fakafuofua ki he māhina ʻe nima, naʻe fakapapauʻi ʻe Nathan ke maʻu ʻe he kau akó ha fakafiefia. Lolotonga ʻa e muʻaki ngaahi kalasí, naʻá ne kau ai ki ha ngaahi vaʻinga, ka ki mui ai naʻe ʻikai te ne vaʻinga heʻene manavahē naʻa lavea ʻo uesia ai ʻa ʻene maʻu ʻa e ngaahi fakataha-lahi fakavahe ʻi he faʻahitaʻu māfaná. ʻI hono kehé naʻá ne fili ke ne hoko ko ha ʻōfisa sipoti. Naʻe mālieʻia ʻa e kau akó ʻi heʻene liliu mataʻāʻā ʻa e ngaahi laó ʻi heʻene kau ki he kau ako muli naʻe vaʻingá.

Ngaahi Folau mo Nathan

Faifai atu pē, naʻá ku kamata folau ki muli fakataha mo Nathan. Naʻá ku fiefia ʻi he ʻinasi ʻi he ngaahi meʻa naʻe hokosiá mo e kau ngāue pole he vaʻá pea mo e kau misinalé. Naʻá ku malava ai ke sio totonu ki heʻenau ʻofá mo e līʻoá, pea naʻá ku ako fekauʻaki mo ʻenau founga-tuʻumaʻú mo e ngaahi tuʻunga ʻo e moʻuí ʻi he ngaahi fonua naʻe vahe kinautolu ki aí. ʻI he faai mai ʻa e ngaahi taʻú, naʻe hokohoko ʻa ʻeku maʻu ʻa e ngaahi tohi ʻo fakahā mai ai ʻa e houngaʻia ki he ngaahi ʻaʻahi peheé.

ʻI he sio atu ki heʻema ngaahi folaú, ʻoku ou manatuʻi ʻa e ngaahi meʻa lahi naʻe hokosia. Ko e fakatātaá, ʻi he taimi naʻá ma ʻaʻahi ai ki Pōlaní, naʻe fefanafanahi ai ha ongo tuofefine ʻi heʻeku ʻi aí. Naʻá ku ʻeke ange kia kinaua, “Ko e hā ʻokú mo fafana aí?” Naʻá na kole fakamolemole, ʻo na fakamatala naʻá na anga ki he fafaná koeʻuhi naʻe tapui ʻi Pōlani ʻa e ngāue ʻa e Kau Fakamoʻoni ʻa Sihová pea naʻe tau uaea fakapulipuli ai honau ngaahi ʻapí ke puke ʻenau talanoá.

Ko Tuofefine Adach ko e taha ia ʻi he tokolahi ʻa ia naʻe ngāue ʻi he malumalu ʻo e tapui ʻi Pōlaní. Naʻá ne ʻulu mingimingi fakataha mo e tope. Naʻá ne ueʻi hake hono topé he taimi ʻe taha ʻo fakahaaʻi mai kiate au ha foʻi piki loloto, ko e tupu ia mei hono taaʻi ʻe ha tokotaha fakatanga. Naʻá ku ʻohovale ke sio totonu ʻi he ngaahi ola ʻo e ngaohikoviʻi fakamamahi naʻe pau ke kātekina ʻe hotau fanga tuongaʻané mo e fanga tokouá.

Fika ua ki Pēteli, ko Hauaiʻi ʻa hoku feituʻu manakó. ʻOku ou manatuʻi ʻa e fakataha-lahi ʻi ai ʻi he kolo ko Hilo ʻi he 1957. Ko ha kātoanga lahi ia, pea ko e kau maʻu fakatahá naʻe tokolahi ange ia ʻi he tokolahi fakakātoa ʻo e Kau Fakamoʻoni fakalotofonuá. Naʻe aʻu ʻo fai ʻe he pule-koló ha talitali fakalāngilangi ʻo Nathan. Naʻe haʻu ʻa e tokolahi ʻo fakafeʻiloaki mai kia kimaua, ʻo fakakahoa ʻaki kimaua ʻa e ngaahi kahoa.

Ko e toe fakataha-lahi fakalotomāfana ʻe taha naʻe ʻi Nuremberg, Siamane, ʻi he 1955, ʻo fai ʻi he meʻa naʻe hoko ko e malaʻe fakatē ʻo e kau tau ʻa Hitilaá. ʻOku ʻiloa ʻo pehē naʻe fuakava ʻa Hitilā ke ne fakangata ʻosi ʻa e kakai ʻa Sihova ʻi Siamané, ka ʻi he taimi ko ení naʻe fonu ʻa e sitētiumé ʻi he Kau Fakamoʻoni ʻa Sihová! Naʻe ʻikai lava ke u taʻofi ʻa e ngangana ʻa hoku loʻimatá. Naʻe lahi fau ʻa e peletifōmú pea naʻe tuʻu mei mui ai ha ngaahi fuʻu pou lalahi mataʻāʻā ʻe 144. Naʻá ku ʻi he siteisí pea lava ke u sio atu ai ki he fuʻu kau fanongo tokolahi fau laka hake ʻi he toko 107,000. Naʻe mamaʻo ʻaupito ia ki mui ʻo ʻikai ai te u meimei lava ke sio ki he ʻotu fakaʻosí.

Naʻe lava ke ma mahinoʻi ʻa e anga-tonu ʻa e fanga tokoua Siamané mo e mālohi naʻa nau maʻu meia Sihova lolotonga ʻa honau fakatangaʻi ʻi he malumalu ʻo e pule ʻa e Nasí. Naʻá ne ʻai ke mālohi ʻa ʻema fakapapauʻi ke hoko ʻo mateaki pea tauhi maʻu ʻema anga-tonu kia Sihová. Naʻe fai ʻe Nathan ʻa e malanga fakaʻosí, pea ʻi heʻene ʻosi iá, naʻá ne taʻataʻalo fakamāvae ki he kau fanongó. Naʻa nau tali mai he taimi pē ko iá ʻaki ʻa e taʻataʻalo fakamāvae ʻaki honau ngaahi holoholó. Naʻe hā mai ia ʻo hangē ha fuʻu ngoue matalaʻiʻakau fakaʻofoʻofá.

Naʻe fakangalongataʻa foki ʻa ʻema ʻaʻahi ki Potukali ʻi Tīsema 1974. Naʻá ma maʻu ʻa e ʻuluaki fakataha ʻa e Kau Fakamoʻoní ʻi Lisbon hili hono fakalaoʻi ai ʻa ʻetau ngāue fakaefakamoʻoní. Naʻe tapui ia ʻo feʻunga mo e taʻu ʻe 50! Neongo naʻe toko 14,000 pē ʻa e kau malanga ʻo e Puleʻangá ʻi he fonuá ʻi he taimi ko iá, naʻe ʻi ai ʻa e toko 46,000 tupu ʻi he ongo fakataha ʻe ua naʻe fai aí. Naʻá ku tō loʻimata ʻi he pehē ʻe he fanga tokouá: “ʻOku ʻikai ʻaupito fiemaʻu ke mau toe toitoi. Kuo mau tauʻatāina.”

ʻI hoku ngaahi ʻaho ʻo e folau mo Nathan ʻo aʻu mai ki he ʻahó ni, ʻoku ou fiefia ʻi he faifakamoʻoni ʻi he founga ʻikai anga-mahení—ʻi he ngaahi vakapuná, ʻi he ngaahi falekaí—pea mo e faifakamoʻoni ʻi he halá. ʻOku ou ʻave holo maʻu pē ʻa e ʻū tohi koeʻuhi ke u mateuteu. ʻI he taimi ʻe taha ʻi heʻema tatali ki ha vakapuna ʻa ia naʻe toloi, naʻe ʻeke mai ai ʻe ha fefine kia au pe ʻoku ou ngāue ʻi fē. Naʻe iku ia ki ha fetalanoaʻaki mo ia pea mo e niʻihi kehe takatakai ʻia kimaua ʻa ia naʻa nau fanongo maí. Ko e ngāue Pētelí mo ʻeku ngāue fakamalangá kuo hanganaki ʻai ai au ke u femoʻuekina mo fiefia ʻaupito.

Puké pea mo e Fakalototoʻa ʻi he Māvaé

ʻI he 1976, naʻe hoko ai ʻo puke ʻa Nathan ʻi he kanisaá, pea ko au, fakataha mo e kau ngāue Pētelí, naʻa mau tokoniʻi ia ke ne fekuki mo ia. Neongo ʻa ʻene mahamahakí, naʻá ma fakaafeʻi ki homa lokí ʻa e ngaahi mēmipa kehekehe ʻo e ngaahi ʻōfisi vaʻa takatakai ʻi he māmaní ʻa ia naʻa nau ʻi Brooklyn he taimi ko iá ki ha ako. ʻOku ou manatuʻi ʻa e ngaahi ʻaʻahi mai ʻa Don mo Earlene Steele, Lloyd mo Melba Barry, Douglas mo Mary Guest, Martin mo Gertrud Poetzinger, Pryce Hughes mo e tokolahi kehe. Naʻa nau faʻa vahevahe mo kimaua ʻa e ngaahi meʻa naʻe hokosia mei honau fonuá. Naʻe maongo tautefito kiate au ʻa e ngaahi meʻa naʻe hokosia felāveʻi mo e tuʻumaʻu ʻa hotau fanga tokouá ʻi he malumalu ʻo e tapuí.

ʻI hono ʻiloʻi ʻe Nathan naʻe ofi ʻa ʻene maté, naʻá ne ʻomai ha faleʻi lelei kiate au ke tokoniʻi au ke u fekuki mo e tuʻunga uitoú. Naʻá ne pehē: “Kuó ta maʻu ha nofo mali fiefia. Kuo ʻikai ʻaupito ke hokosia ia ʻe he kakai tokolahi.” Ko e meʻa ʻe taha naʻá ne ʻai ke fakafiefia ʻa ʻema nofo malí ko e faʻa fakakaukau ʻa Nathan. Hangē ko ení, ʻi he taimi naʻá ma feʻiloaki ai mo e faʻahinga kehekehe ʻi heʻema ngaahi folaú, naʻá ne pehē mai kia au: “Audrey, kapau ʻoku ʻi ai ha ngaahi taimi ʻoku ʻikai te u fakafeʻiloaki atu ai kinautolu kiate koe, ʻoku peheé koeʻuhi kuo ngalo ʻia au honau hingoá.” Naʻá ku fiefia lahi ʻi heʻene tala mai ia ki muʻá.

Naʻe fakamanatu mai ʻe Nathan: “ʻI he hili ʻa e maté, ko ʻeta ʻamanakí ʻoku pau pea ko ia ai ʻe ʻikai ʻaupito ke ta toe tofanga ʻi ha mamahi.” Naʻá ne ekinaki mai leva kia au: “Hanga ki muʻa, he ʻoku ʻi ai ho palé. ʻOua ʻe nōfoʻi ʻi he kuohilí—neongo ʻe hokohoko atu ʻa hoʻo ngaahi manatú. ʻE tokoni ʻa e taimí kia koe ke ke sai ai. ʻOua ʻe hoko ʻo ʻiteʻita mo ongoʻi fakaʻofaʻia ʻiate koe. Fiefia ʻi hoʻo maʻu ʻa e ngaahi fiefia mo e ngaahi tāpuaki ko ení. Hili ha taimi, te ke ʻiloʻi ai ʻe ʻoatu ʻe he ngaahi manatú kia koe ʻa e fiefia. Ko e ngaahi manatú ko e meʻaʻofa ia ʻa e ʻOtuá kia kitautolu.” Naʻá ne tānaki mai: “Hanganaki femoʻuekina—feinga ke ngāueʻaki hoʻo moʻuí ʻi hono fai ha meʻa maʻá e niʻihi kehé. ʻE tokoniʻi koe ʻe he meʻá ni ke ke maʻu ai ʻa e fiefia ʻi he moʻuí.” Faifai atu pē, ʻi he ʻaho 8 ʻo Sune 1977, naʻe mole atu ai ʻa Nathan mei he māmaní.

Mali mo Glenn Hyde

Naʻe tala mai ʻe Nathan ʻe lava ke u moʻui ʻi he kuohilí fakataha mo ʻeku ngaahi manatú pe ko ʻeku langa hake ha moʻui foʻou. Ko ia ʻi he 1978, hili ʻeku hiki ki he Ngaahi Faama ʻa e Taua Leʻó ʻi Wallkill, Niu ʻIoké, naʻá ku mali ai mo Glenn Hyde, ko ha tokotaha matātangata ʻaupito, anga-fakalongolongo mo anga-lelei. Ki muʻa ke ne hoko ko ha Fakamoʻoní, naʻá ne ngāue ʻi he Tau-Tahí ʻi he taimi naʻe tau ai ʻa e ʻIunaite Seteté mo Siapaní.

Naʻe ʻi he vaka PT (leʻo tōpito) ʻa Glenn pea naʻe vaheʻi ia ki he loki mīsiní. Koeʻuhi ko e longoaʻa ʻa e mīsiní, naʻe mole ai ʻa e konga ʻo ʻene fanongó. Hili ʻa e taú, naʻá ne hoko ko ha tangata tāmate-afi. ʻI he ngaahi taʻu lahi naʻá ne faʻa misi kovi ai koeʻuhi ko e ngaahi meʻa naʻe hokosia ʻi he taimi taú. Naʻá ne ako ʻa e moʻoni Fakatohitapú mei heʻene sekelitalí, ʻa ia naʻá ne faifakamoʻoni kiate ia ʻi he founga ʻikai anga-mahení.

Ki mui ai, ʻi he 1968, naʻe ui ai ʻa Glenn ki Pēteli ke ne ngāue ko ha tangata tāmate-afi ʻi Brooklyn. Pea ʻi he taimi naʻe maʻu ai ʻe he Ngaahi Faama ʻa e Taua Leʻó ʻenau loli tāmate-afí naʻá ne hiki ki ai ʻi he 1975. ʻI ha taimi, naʻe taaʻi ai ia ʻe he mahaki loto-ngalongaló. Hili ʻema mali ʻo feʻunga mo e taʻu ʻe hongofulu, naʻe mate ʻa Glenn.

ʻE fēfē haʻaku fekuki mo ia? Ko e poto naʻe ʻomai kia au ʻe Nathan ʻi heʻene ʻiloʻi naʻá ne mei maté naʻe toe hoko ia ko ha fakafiemālie kia au. Naʻá ku hokohoko lau ʻa e meʻa naʻá ne hiki mai kia au ʻo fekauʻaki mo e feangainga pea mo e tuʻunga uitoú. ʻOku ou kei vahevahe ʻa e ngaahi fakamatala ko ení mo e niʻihi kehe kuo mole honau hoá, pea ko kinautolu foki kuo fakafiemālieʻi ʻaki ʻa e faleʻi ʻa Nathan. ʻIo, ʻoku lelei ke hanga atu ki muʻa ʻo hangē ko ia naʻá ne fakalototoʻaʻi au ke u faí.

Ko ha Fetokouaʻaki Mahuʻinga

Ko e meʻa naʻe tokoni tautefito ki heʻeku moʻui fiefia mo fakafiemālié ko e ngaahi kaumeʻa ʻofeina ʻi he fāmili Pētelí. Ko e tokotaha tefito ai ko Esther Lopez, naʻá ne maʻu tohi fakamoʻoni ako ʻi he 1944 mei he kalasi hono tolu ʻo e Akoʻanga Tohi Tapu Taua Leʻo ko Kiliatí. Naʻá ne foki ki Brooklyn ʻi Fepueli 1950 ke ngāue ai ko ha tokotaha liliu ʻo ʻetau ʻū tohi Fakatohitapú ki he faka-Sipeiní. ʻI he taimi naʻe faʻa mamaʻo ai ʻa Nathan, ko Esther ʻa hoku kaumeʻa ofí. Ko ia foki ko ha tokotaha ia ʻi he Ngaahi Faama ʻa e Taua Leʻó. ʻI he taimí ni ʻi hono taʻu 90 tupú, ʻokú ne ʻi ha tuʻunga mahamahaki pea ʻoku tokangaʻi ia ʻi homau feituʻu ʻoku tokangaʻi ai ʻa e kau vaivaí.

Fekauʻaki mo hoku fāmili fakakakanó tonu, ko Russell pē mo Clara ʻokú na kei moʻuí. ʻOku taʻu 90 tupu ʻa Russell pea ʻokú ne ngāue faitōnunga ʻi he Pēteli Brooklyn. Naʻá ne ʻi he lotolotonga ʻo e ʻuluaki faʻahinga naʻe fakaʻatā ke nofo ai pē ʻi Pēteli hili ʻenau malí. ʻI he 1952, naʻá ne mali ai mo e kaungā Pēteli ko Jean Larson. Ko e tuongaʻane ʻo Jean ko Max naʻá ne haʻu ki Pēteli ʻi he 1939 ʻo ne fetongi ʻa Nathan ʻi he tuʻunga ko e ʻovasia pulusí ʻi he 1942. ʻOku hokohoko atu ʻa Max ʻi hono fua ʻa e fatongia lahi ʻi Pēteli, ʻo kau ai ʻa e tokoni ke tokangaʻi ʻa hono uaifi ʻofeiná, ko Helen, ʻa ia ʻokú ne fekuki mo e mahaki multiple sclerosis.

ʻI he sio atu ki he taʻu laka hake he 63 ʻi he ngāue taimi-kakato ʻa Sihová, ʻoku lava ke u pehē kuo hoko moʻoni haʻakú moʻui ko ha moʻui fakafiemālie. Naʻe hoko ʻa Pēteli ko hoku ʻapi, pea ʻoku ou hokohoko atu ʻa e ngāue hení fakataha mo e loto-fiefia. ʻOku ʻave ʻa e fakahīkihikí ki heʻeku ongo mātuʻá ʻi heʻena fakahūhū kia kimautolu ʻa e ʻuhinga ʻo e ngāué pea mo e holi ke tauhi kia Sihová. Ka ko e meʻa ʻokú ne ʻai moʻoni ʻa e moʻuí ke fakafiemālié ko ʻetau fetokouaʻaki fakaofó mo e ʻamanaki ʻo e moʻui fakataha mo hotau fanga tokouá mo e fanga tuongaʻané ʻi ha māmani palataisi, ʻo tauhi ai ki hotau Tokotaha-Fakatupu Maʻongoʻonga, ʻa e ʻOtua moʻoni pē taha ko Sihová, ʻi he kotoa ʻo ʻitānití.

[Fakatātā ʻi he peesi 24]

Ko ʻeku ongo mātuʻá ʻi hona ʻaho malí ʻi Sune 1912

[Fakatātā ʻi he peesi 24]

Toʻohema ki toʻomataʻu: Ko Russell, Wayne, Clara, Ardis, ko au pea mo Curtis ʻi he 1927

[Fakatātā ʻi he peesi 25]

Tuʻu ʻi he vahaʻa ʻo Frances mo Barbara McNaught, lolotonga ʻa e ngāue tāimuʻa ʻi he 1944

[Fakatātā ʻi he peesi 25]

ʻI Pēteli ʻi he 1951. Mei he toʻohemá ki toʻomataʻu: Ko au, Esther Lopez mo hoku tokoua-ʻi-he-fonó, ʻa Jean

[Fakatātā ʻi he peesi 26]

Mo Nathan pea mo ʻene ongo mātuʻá

[Fakatātā ʻi he peesi 26]

Mo Nathan ʻi he 1955

[Fakatātā ʻi he peesi 27]

Mo Nathan ʻi Hauaiʻi

[Fakatātā ʻi he peesi 29]

Mo hoku husepāniti hono uá, ʻa Glenn