Fehuʻi mei he Kau Lautohí

Ko e kau Kalisitiane ʻe niʻihi ʻoku nau ngāueʻaki ʻa e tekinolosia ʻi onopōní ke fetuʻutaki ai mo honau fāmilí mo e kaungā-Fakamoʻoní. Ko e moʻoni, ko e Kalisitiane matuʻotuʻá te ne manatuʻi ʻa e faleʻi ko ení: “Ko e tokotaha fakapotopotó ʻokú ne sio ki he fakatuʻutāmakí peá ne toi, ka ko e tokotaha taʻetaukeí ʻokú ne hanganaki laka atu pē ʻo ne fuesia ʻa e ngaahi nunuʻá.”​—Pal. 27:12.

ʻOku tau houngaʻia ʻi he loto ʻa Sihova ke ne maluʻi kitautolú. Ko ia ʻoku ʻikai ke tau feohi mo e faʻahinga ʻoku nau fakatupunga ʻa e māvahevahé, faʻahinga kuo tuʻusi pe ʻoku nau pouaki ʻa e ngaahi akonaki mioʻí. (Loma 16:17; 1 Kol. 5:11; 2 Sio. 10, 11) ʻOku ʻi ai ʻa e niʻihi ʻi he fakatahaʻangá ʻoku ʻikai nai ke nau tōʻonga ʻi ha founga lāngilangiʻia. (2 Tīm. 2:20, 21) ʻI hono fili ha ngaahi kaumeʻa, ʻoku tau manatuʻi eni. Heʻikai nai ke faingofua ke fili ʻa e ngaahi feohi leleí fakafou ʻi ha polokalama feʻaveʻaki pōpoaki.

ʻOku tautefito ʻa e feʻungamālie ke filifili ʻa e faʻahinga ke feohi mo iá ʻi heʻene haʻu ki he ngaahi kulupu feʻaveʻaki pōpoaki lalahí. Kuo kau ʻa e kau Kalisitiane ʻe niʻihi ʻi he ngaahi kulupu lalahi, ʻo iku atu ki he ngaahi ola kovi. ʻE lava fēfē ke tokanga ha tokoua pe tuofefine kapau ʻoku aʻu ha kulupu ki he lauingeau pe laui afe? Heʻikai malava ke ʻiloʻi ʻa e tuʻunga totonu mo e tuʻunga fakalaumālie ʻo e faʻahinga kotoa ʻi he kulupú. ʻOku pehē ʻi he Saame 26:4: “ʻOku ʻikai te u feohi mo e kau tangata kākaá, pea ʻoku ou fakaʻehiʻehi mei he faʻahinga ʻoku nau fufū honau tuʻunga totonú.” ʻIkai ʻoku fakahaaʻi mai ai ke tau ngāueʻaki ha polokalama feʻaveʻaki pōpoaki ke fetuʻutaki pē ki he faʻahinga ʻoku tau ʻiloʻí?

Naʻa mo ha kulupu feʻaveʻaki pōpoaki tokosiʻi ange, ʻoku fiemaʻu ki ha Kalisitiane ke ne sivisiviʻi ʻa e taimi mo e meʻa ʻokú ne talanoa ki aí. ʻOku ʻikai ke ʻuhinga ia ʻoku totonu ke tau tali ʻa e meʻa ʻoku tohi ki ai ʻa e niʻihi kehé pe tatau ai pē pe ko e hā ʻa e lahi ʻo e taimi ʻoku nau fakamoleki aí. Naʻe fakatokanga ʻa Paula kia Tīmote fekauʻaki mo e faʻahinga te nau hoko “ko e kau ngutu-lau mo e kau kaunoa ʻi he ngaahi meʻa ʻa e kakai kehé.” (1 Tīm. 5:13) ʻI he ʻahó ni, ʻoku malava ke fai ha meʻa meimei tatau ʻo ngāueʻaki ʻa e polokalama fakaʻilekitulōniká.

Ko ha Kalisitiane matuʻotuʻa heʻikai ke ne fai pe fanongo ki he ngaahi fakamatala fakaangá pe fakahaaʻi ʻa e fakamatala fakapulipuli fekauʻaki mo ha kaungātui. (Saame 15:3; Pal. 20:19) Pea te ne fakaʻehiʻehi mei he ngaahi fakamatala fakalahi pe ʻikai fakapapauʻí. (ʻEf. 4:25) Ko hono moʻoní ʻoku tau maʻu ʻi heʻetau uepisaiti jw.org mo e ngaahi polokalama fakamāhina ʻi he JW Broadcasting^® ʻa e meʻakai fakalaumālie hulu fau mo e ngaahi fakamatala fakamuimui taha alafalalaʻanga.

ʻOku ngāueʻaki ʻe he Kau Fakamoʻoni ʻe niʻihi ʻa e feʻaveʻaki pōpoaki fakaʻilekitulōniká ke fakatau atu, fakatau mai mo tuʻuaki ai ʻa e ngaahi koloa pe ko ha ngāue. Ko e ngaahi ngāue fakakomēsiale ia ʻo ʻikai ko ha meʻa fakateokalati. Ko e kau Kalisitiane ʻoku nau loto ke “ʻataʻatā mei he ʻofa ki he paʻangá” ʻoku nau talitekeʻi ha faʻahinga fakatauele pē ke ngāueʻaki ʻetau fetokouaʻakí ki ha taumuʻa fakakomēsiale.​—Hep. 13:5.

Kae fēfē hono ngāueʻaki ʻa e ngaahi polokalama feʻaveʻaki pōpoakí ke kole ha paʻanga maʻá e kaungātui ʻoku masivá pe ke tokoni ki ha fakatamaki? ʻOku tau faʻa fakahāhā ʻa e mahuʻingaʻia anga-ʻofa ʻi he fetokoniʻakí mo e fefakalototoʻaʻakí. (Sēm. 2:15, 16) Ka ko e feinga ke fai pehē fakafou ʻi ha kulupu feʻaveʻaki pōpoaki tokolahi ʻe fakafaingataʻaʻiaʻi nai ai ʻa e ngaahi fokotuʻutuʻu maau kuo fai ʻe he ʻōfisi vaʻa fakalotofonuá pe fakatahaʻangá. (1 Tīm. 5:3, 4, 9, 10, 16) Pea ko hono moʻoní ʻoku ʻikai ha taha ʻo kitautolu ʻe loto ke fakahaaʻi ʻoku tau maʻu ha vāhenga-ngāue makehe ke tokangaʻi ʻa e fanga sipi ʻa e ʻOtuá.

ʻOku tau holi ke fai ʻa e meʻa ʻe ʻave ai ʻa e lāngilangí ki he ʻOtuá. (1 Kol. 10:31) Ko ia ʻi he fili pe te ke ngāueʻaki ha polokalama feʻaveʻaki pōpoaki pe ko ha tekinolosia kehe, fakakaukau ki he ngaahi fakatuʻutāmaki ʻe ala hokó pea tokanga.