Ko e Hā ʻE Fakahoko ʻe he Puleʻanga ʻo e ʻOtuá?

ʻE fetongi ʻe he Puleʻanga ʻo e ʻOtuá ʻa e ngaahi puleʻanga fakaetangatá kotoa peá ne pule mai ki he māmaní kotoa. (Taniela 2:44; Fakahā 16:14) ʻI heʻene hoko pē iá, ʻe hanga ʻe he Puleʻanga ʻo e ʻOtuá ʻo . . .

• Toʻo ʻa e fulikivanú, ʻa ia ko ʻene siokitá ē ʻoku hoko ai ʻa e kovi kiate kitautolu kotoa. “Ko e meʻa ki he kau fulikivanú, ʻe tuʻusi atu kinautolu mei he māmaní.”—Palōveepi 2:22.

• Fakangata ʻa e taú kotoa. “[Ko e ʻOtuá] ʻokú ne fakangata ʻa e ngaahi taú ʻi he māmaní kotoa.”—Saame 46:9.

• ʻOmai ʻa e lakalakaimonū mo e malu ki he māmaní. “Te nau tangutu taki taha ʻi hono lalo kālepi pea ʻi hono lalo fiki, pea ʻe ʻikai ha taha te ne ʻai kinautolu ke nau ilifia.”—Maika 4:4.

• Ngaohi ʻa e māmaní ko ha palataisi. “ʻE fiefia ʻa e toafá mo e fonua pakukaá, pea ʻe mavava ʻa e toafa tokaleleí pea matala ʻo hangē ko e lilé.”—ʻAisea 35:1

• Tokonaki ki he tokotaha kotoa ha ngāue mohu ʻuhinga, mo fakafiefia. “Ko e ngāue ʻa honau nimá ʻe fiefia kakato ai ʻa e faʻahinga kuo fili [ʻa e ʻOtuá]. ʻE ʻikai taʻeʻaonga ʻa ʻenau fakaongosiá.”—ʻAisea 65:21-23.

• Toʻo ʻosi ʻa e mahakí. “ʻE ʻikai ha taha ʻoku nofo ai te ne pehē: ‘ʻOku ou puke.’”—ʻAisea 33:24.

• Fakatauʻatāinaʻi kitautolu mei he hoholo ke motuʻá. “Tuku ke hoko ʻa hono kakanó ʻo foʻou ange ia ʻi he taimi ʻo ʻene kei talavoú; tuku ke ne toe foki ki he ngaahi ʻaho ʻo hono mālohi fakatalavoú.”—Siope 33:25.

• Toe fakamoʻui ʻa e kau maté. “Ko e faʻahinga kotoa ʻi he ngaahi fonualoto fakamanatú te nau fanongo ki hono leʻó [ʻo Sīsuú] pea te nau hū mai ki tuʻa.”—Sione 5:28, 29