Ko ha Tamasiʻi Naʻe Tulemohe

ʻOIAUĒ! Ko e hā ʻa e meʻa ʻoku hoko ʻi hení? ʻOku lavea lahi ʻaupito ʻa e tamasiʻi ʻoku tokoto ʻi he kelekelé? Sio ange! ko Paula ko e taha ʻi he kau tangata ʻoku nau hū ki tuʻa mei he falé! ʻOkú ke toe sio ai kia Tīmote? Naʻe tō ʻa e tamasiʻí ni ki tuʻa mei he matapā-sioʻatá?

ʻIo, ko e meʻa ia naʻe hokó. Naʻe fai ʻe Paula ha malanga ki he kau ākonga ʻi Taloasí. Naʻá ne ʻilo ʻe ʻikai te ne toe sio kiate kinautolu ʻi ha taimi fuoloa koeʻuhi kuo pau ke ne ʻalu ʻi ha vaka ʻi he ʻaho hono hokó. Ko ia naʻe hokohoko atu ʻene malangá ʻo aʻu ki he tuʻuapō.

Ko e tamasiʻi ko ʻení ko ʻUtiko naʻe hekeheka ʻi he matapā-sioʻatá, peá ne tulemohe. Naʻá ne tō ki tuʻa ʻi he matapā-sioʻatá ki he kelekelé mei he fungavaka hono tolú! Ko ia ʻoku mahino kiate koe ʻa e ʻuhinga ʻoku mata hohaʻa ai ʻa e kakaí. ʻI hono hiki hake ʻe he kau tangatá ʻa e tamasiʻí, naʻe hangē pē ko ia ko ʻenau fakakaukaú. Kuo mate ia!

ʻI he sio ʻa Paula kuo mate ʻa e tamasiʻí, naʻá ne tokoto foʻohifo ʻiate ia ʻo kuku ia. Peá ne pehē: ‘ʻOua te mou hohaʻa. ʻOkú ne sai pē!’ Pea ʻokú ne pehē! Ko ha mana ia! Naʻe fakafoki mai ia ʻe Paula ke moʻui! Ko ha fuʻu fiefia lahi naʻe ongoʻi ʻe he fuʻu kakaí.

Naʻa nau toe ʻalu hono kotoa ki ʻolunga ʻo fai ʻenau kai. Naʻe hoko atu ai ʻe Paula ʻa ʻene malangá ʻo aʻu ki he ʻaho. Ka ʻe lava ke ke ʻilo pau naʻe ʻikai ke toe tulemohe ʻa ʻUtiko! Pea ko Paula, Tīmote mo kinautolu naʻe fononga mo kinauá naʻa nau heka ki he vaká. ʻOkú ke ʻilo pe ko ʻenau ō ki fē?

Ko e fakaʻosiʻosi eni ʻa e fononga fakamisinale hono tolu ʻa Paulá, pea ko ʻene foki atu eni ki hono ʻapí. ʻI he fononga ko ʻení naʻe nofo ʻa Paula ʻi he taʻu ʻe tolu ʻi he kolo pē ko ʻEfesoó. Ko ia naʻe fuoloa ange ʻa e fononga ko ʻení ʻi he fononga hono uá.

ʻI he mavahe mei Taloasí, naʻe afe ʻa e vaká ʻo taimi siʻi ʻi Mileto. Koeʻuhi ko ʻEfesō naʻe kiʻi maile siʻi pē hono mamaʻo mei ai, naʻe fekau ʻe Paula ki he kau mātuʻa ʻi he fakatahaʻangá ke nau haʻu ki Mileto ke lava ke lea fakaʻosi kiate kinautolu. ʻI he hili ia, ʻi he hoko ʻa e taimi ke folau ai ʻa e vaká, ko e loto-mamahi lahi ē ko ʻenau sio ki he ʻalu ʻa Paulá!

Faifai atu pē pea naʻe foki mai ʻa e vaká ki Sesalia. Lolotonga ʻa e nofo ʻi heni ʻa Paula ʻi he fale ʻo e ākonga ko Filipé, naʻe fai fakatokanga ʻe he palōfita ko ʻAkapusi kia Paula. Naʻá ne pehē ʻe hoko ʻa Paula ko ha pōpula ʻi haʻane aʻu ki Selusalema. Pea ko e meʻa pē ia naʻe hokó. Pea, ʻi he hili ʻene nofo pilīsone ʻi he taʻu ʻe ua ʻi Sesaliá, naʻe ʻave ʻa Paula ki Loma ke fai ʻa e hopo ʻi he ʻao ʻo e pule Loma ko Sisa. Tau sio ange pe ko e hā naʻe hoko ʻi he fononga ki Lomá.